1. Yihooway neeyyo ay oottidee?

NEENI Yihoowa Markka waana gidadii? Neeni ‘mishiraachchuwaa’ nena yelidaageetuppe, nenaara oottiyaageetuppe woy nenaara tamaariyaageetuppe woy qassi Yihoowa Markkati sabbakiiddi ne soo yin koyro siyennan waayi aggana. (Mar. 13:10) Guyyeppe, issi uri nena Geeshsha Maxaafaa daro wodiyawu xannaˈissiisinne baaxetiis. Xannaˈiyo wode, neeni Yihoowa siiqadasanne I nena siiqiyoogaa tamaaradasa. Neeni tumaa siyanaadan Yihooway oottiis; qassi haˈˈi neeni Yesuus Kiristtoosa kaalliyaagaa gidiyo gishshawu merinawu deˈiyo hidootay neessi deˈees. (Yoh. 6:44) Issi uri nena tumaa tamaarissanaadan Yihooway oottido gishshawunne I ba ashkkaradan nena ekkido gishshawu neeni A galatiyoogee qoncce.

2. Ha huuphe yohuwan nuuni ay beˈanee?

² Haˈˈi nuuni tumaa eriyo gishshawu, deˈuwawu efiya ogiyan nunaara baanaadan harata maaddiyo maatay nuuyyo deˈees. Sooppe soo biidi sabbakiyoogee nuna metennaba gidikkonne, issi uri nunaara Geeshsha Maxaafaa xannaˈanaadan oychchiyoogeenne xannaˈissiyoogee metiyaaba gidana danddayees. Neeyyo hegaadan siyettii? Yaatikko, ha huuphe yohuwan odettida amaridabati nena maaddana danddayoosona. Erissiyo ashkkara oottanawu maaddanaadan nuna denttettiyaabay aybakko tobbana. Nuuni Geeshsha Maxaafaa xannaˈissanawu mammottanaadan oottana danddayiya metota waati xoonana danddayiyaakkokka beˈana. Koyruwan, nuuni mishiraachchuwaa sabbakiyaageeta xalla gidennan, tamaarissiyaageetakka gidana bessiyoy aybissakko ane beˈoos.

3. Nuuni sabbakiyoy aybissee?

³ Yesuusi saˈan deˈiyo wode, bana kaalliyaageeti naaˈˈu oosota oottanaadan eta azaziis. Koyruwan, Kawotettaa mishiraachchuwaa  sabbakanaadan etawu yootiis, qassi waati sabbakanaakko eta bessiis. (Maa. 10:7; Luq. 8:1) Leemisuwawu, Yesuusi bana kaalliyaageeti Kawotettaa mishiraachchuwaa asay siyiyo wodenne siyenna wode waatanaakko etawu yootiis. (Luq. 9:2-5) I bana kaalliyaageeti ‘asa ubbawu markkattanaagaa’ odido wode eti cora asawu daro sohuwan sabbakanaagaakka yootiis. (Maa. 24:14; Oos. 1:8) Asay mishiraachchuwaa siyin siyana xayin, Yesuusi bana kaalliyaageeti Xoossaa Kawotettaabaanne he Kawotettay oottanabaa asawu yootanaadan azaziis.

4. Maatiyoosa 28:18-20y yootiyoogaadan, nuuni Kawotettaa mishiraachchuwaa sabbakiyoogaappe harabaa ay oottana bessii?

⁴ Yesuusi bana kaalliyaageeti oottanaadan azazido naaˈˈanttobay aybee? I azazido ubbabaa asay azazettanaadan bana kaalliyaageeti tamaarissana mala etawu yootiis. Sabbakanaadaaninne tamaarissanaadan Yesuusi koyro xeetu layttaa Kiristtaanetu xalla azaziis giidi issi issi asay yootana danddayees. SHin hegee tumee? CHii, Yesuusi ha gita oosoy nu wodiyaa gakkanaashin hegeekka, ‘wodiyaa wurssettay gakkanaashin’ oosettanaagaa yootiis. (Maatiyoosa 28:18-20 nabbaba.) Yesuusi he azazuwaa azazidoy 500ppe dariya bana kaalliyaageetuyyo qonccido wodiyaana gidennan waayi aggana. (1 Qor. 15:6) Qassi Yohaannisi ajjuutaa beˈanaadan Yesuusi oottido wode bana kaalliya ubbay harati Yihoowabaa tamaaranaadan maaddana mala I koyiyoogaa loytti qonccissiis.—Ajj. 22:17.

5. Koyro Qoronttoosa 3:6-9y yootiyoogaadan, sabbakiyoogaanne tamaarissiyoogaa giddon deˈiya dummatettaa PHawuloosi waati qonccissidee?

⁵ Kiitettida PHawuloosi erissiyo ashkkara oottiyo oosuwaa puutiyaa dichchiyoogaara geeddarssiis; hegee nuuni puutiyaa tokkiyoogaappe aadhdhiyaabaa oottana koshshiyoogaa qonccissees. I Qoronttoosan deˈiya Kiristtaanetuyyo hagaadan giis: ‘Taani puutiyaa tokkaas; Aphiloosi haattaa ushshiis; hegaa gishshawu intte Xoossaa shooqa.’ (1 Qoronttoosa 3:6-9 nabbaba.) Nuuni ‘Xoossaa shooqan’ oottiyaageeta. Yaatiyo gishshawu, nuuni sabbakiyo wode puutiyaa tokkoosinne tamaarissiyo wode haattaa ushshoos. (Yoh. 4:35) SHin, puutiyaa dichchiyaagee Xoossaa gidiyoogaa eroos.

6. Nuuni asaa tamaarissiyo wode, eti waatanaadan maaddana bessii?

⁶ “Merinaa de7uwaassi” suure wozanaa koshshay deˈiyoogeeta koyoos. (Oos. 13:48) Hegeeti erissiyo ashkkara gidanaadan, eti Geeshsha Maxaafaappe tamaariyoobaa (1) akeekanaadan, (2) ammananaadaaninne (3) oosuwan peeshshanaadan nuuni eta maaddana bessees. (Yoh. 17:3; Qol. 2:6, 7; 1 Tas. 2:13) Oorattati shiiquwaa shiiqiyo wode eta siiqiyoogaaninne mokki ekkiyoogan loˈˈo leemiso gidiyoogan gubaaˈiyan deˈiya ubbay Geeshsha Maxaafaa xinaateta maaddana danddayees. (Yoh. 13:35) Xinaatee wolqqaama ‘qato’ mala gidida ba ammaniyoobaa woy meeziyaa agganaadan xannaˈissiyaagee maaddiyoogeekka daro wodiyaanne wolqqaa ekkana danddayees. (2 Qor. 10:4, 5) Issi uri ba deˈuwan hegaa malabata aggidi xammaqettanaadan maaddiyoogee daro aginaa wurssiyaaba gidana danddayees. SHin nuuni hegaadan oottanawu baaxetiyoogee hada attiyaaba gidenna.

7. Nuuni sabbakanaadaaninne erissiyo ashkkara oottanaadan nuna denttettiyaabay aybee?

⁷ Nuuni asaayyo sabbakiyoynne erissiyo ashkkara eti gidanaadan tamaarissiyoy aybissee? Koyroogee, nuuni Yihoowa siiqiyo gishshataassa. Sabbakanaadaaninne erissiyo ashkkara oottanaadan yootido azazuwaa azazettanawu neeyyo danddayettida ubbabaa oottiyo wode, neeni Xoossaa siiqiyoogaa bessaasa. (1 Yoh. 5:3) Hagaa qoppa: Neeni asawu sabbakiyoy Yihoowa siiqiyo gishshataassa. He azazuwaa azazettiyoogee metennabee? Metana danddayees. Neeni sabbakanawu koyro biido wode yayyadii? Yayyidoogee qoncce! SHin ha oosuwaa neeni oottanaadan  Yesuusi koyiyoogaa eriyo gishshawu, he azazuwaa azazettadasa. Qassi amarida wodiyawu sabbaka simmada neeni kaseegaadan yayyennan aggana danddayaasa. SHin Geeshsha Maxaafaa xannaˈissiyoogaa xeelliyaagan neeyyo aybi siyettii? Hegaabaa qoppiyoogee nena yashshii? Yashshennan waayi aggana. Gidoppe attin, neeni xalanaadaaninne harata Geeshsha Maxaafaa xannaˈissanawu oychchanaadan Yihooway maaddana mala woossikko, erissiyo ashkkara oottanawu neeni koyanaadan I nena maaddana.

8. Marqqoosa 6:34y yootiyoogaadan, harata tamaarissanaadan nuna denttettiya harabay aybee?

⁸ Tumaa yootanaadan nuna denttettiya naaˈˈanttobay asaa siiqiyoogaa. Leemisuwawu, Yesuusinne A kaalliyaageeti darosan sabbakido gishshawu keehi daafuridosona. Eti shemppiyo sohuwaa koyidaba gidikkonne, cora asay eta demmiis. Yesuusi asawu qarettido gishshawu, eta “darobaa” tamaarissiyoogaa doommiis. (Marqqoosa 6:34 nabbaba.) I daafuridaba gidikkonne, minni oottiis. Aybissi? Yesuusi asawu siyettiyaabaa eriyo gishshataassa. Eti waayettiyoogaanne etawu hidootay koshshiyoogaa I akeekido gishshawu, eta maaddanawu koyiis. Ha wodiyan asay hegaa mala hanotan deˈees. Eta bolla bagga hanotan cimettoppa. Eti kaalettiya henttanchchi baynna bayida dorssa mala. Hegaa mala asati Xoossaa erennaagaanne etawu hidooti baynnaagaa PHawuloosi yootiis. (Efi. 2:12) Eti ‘bashshawu efiya ogiyaara’ boosona. (Maa. 7:13) Nu moottan Xoossaa erana koshshiyo asay keehi daro gidiyoogaa nuuni qoppiyo wode, eta maaddanaadan nuna siiqoynne qaretay denttettees. Geeshsha Maxaafaa eti xannaˈanaadan oychchiyoogee nuuni eta maaddana danddayiyo aybippenne aadhdhiya oge.

9. Piliphphisiyuusa 2:13y yootiyoogaadan, Yihooway nena waati maaddana danddayii?

⁹ Xannaˈissanawu giigettiyoogeenne xannaˈissiyoogee daro wodiyaa ekkiyaaba gidiyoogaa neeni eriyo gishshawu, Geeshsha Maxaafaa issi uray xannaˈanaadan oychchanawu ne yayyennan waayi aggana. Neeyyo hegaadan siyettikko, Yihoowayyo yoota. Neeni Geeshsha Maxaafaa xannaˈissana danddayiyo uraa demmanawu koyanaadan maaddana mala A oychcha. (Piliphphisiyuusa 2:13 nabbaba.) Xoossay koyiyoogaadan nuuni woossiyo woosaa I zaariyoogaa kiitettida Yohaannisi yootiis. (1 Yoh. 5:14, 15) Yaatiyo gishshawu, neeni asaa tamaarissanawu koyanaadan Yihooway nena maaddanaagaa ammanettana danddayaasa.

10-11. Geeshsha Maxaafaa xannaˈissanawu nuuni mammottana danddayiyoy aybissee?

¹⁰ Tamaarissiyoogee keehi koshshiyaaba gidiyoogaa nuuni eroos, shin erissiyo ashkkara oottiyo oosuwaa nu koyiyoogaa keenaa oottiyoogee nuuyyo deexxana danddayees. He metotuppe amaridaageeti awugeetakko, qassi eta waati xoonana danddayiyaakko ane beˈoos.

¹¹ Nuuni nu koyiyoogaa keena oottanawu waayi danddayana. Leemisuwawu, aassiya amaridaageeti cimidaageeta woy sahettiyaageeta. Ne hanotay hegaa malee? Yaatikko, ubbasaa gakkida korona harggiyaa gaasuwan nuuni tamaarido issibaa qoppa. Nuuni nu moobayliyaa woy hara elektronike miishshata goˈettidi Geeshsha Maxaafaa xannaˈissana danddayiyoogaa tamaarida! Hegaa gishshawu, neeni ne son uttada xinaatiyaa doomissananne xannaˈissana danddayaasa. Harabankka maaddiis. Amaridaageeti Geeshsha Maxaafaa xannaˈanawu koyoosona, shin nu ishantti sabbakanawu biyo wode darotoo eti son deˈokkona. Gidoppe attin, eti maallado guuran woy qammi son deˈennan waayi aggana. He wodiyan Geeshsha Maxaafaa issi uraa xannaˈissana danddayay? Niqoodimoosi qammi tamaaranawu koyido gishshawu, Niqoodimoosa Yesuusi qammi tamaarissiis.—Yoh. 3:1, 2.

12. Nuuni gooba asttamaare gidana danddayiyoogaa ammanettanaadan oottiyaabay aybee?

¹² Nuuni Geeshsha Maxaafaa xannaˈissana  danddayennabadan qoppennan waayi aggana. Nuuni issi uraa xannaˈissanaappe kase nuussi daro eray deˈana woy gooba asttamaareta gidana koshshees giidi qoppennan waayi aggana. Neeyyo hegaadan siyettikko, neeni issi uraa xannaˈissana danddayiyoogaa ammanettanaadan maaddiya heezzubata qoppa. Koyroogee, Yihooway neeni harata tamaarissana danddayiyaabadan qoppees. (2 Qor. 3:5) Naaˈˈanttoogee, ‘saluwaaninne saˈan maata ubbay’ deˈiyo Yesuusi neeni tamaarissanaadan azaziis. (Maa. 28:18) Heezzanttoogee, harati nena maaddanaagaa ammanettana danddayaasa. Yesuusi I yootanaadan ba Aaway tamaarissidoban ammanettiis, qassi neenikka ammanettana danddayaasa. (Yoh. 8:28; 12:49) Hegaa bollikka, Geeshsha Maxaafaa xannaˈissiyoogaa doomissanawu nena maaddana mala haggaazo citaa kaalettiyaagaa woy gooba aqinyiyaa woykko aassiyaagaa oychchana danddayaasa. Neeni gooba asttamaare gidanawu tamaarana danddayiyo issi ogee he aassiyaageetuppe issi uri Geeshsha Maxaafaa xannaˈissiyo wode aara xannaˈissiyoogaa.

13. Nuuni dummatiya ogiyan tamaarissanawu eeno gaana koshshiyoy aybissee?

¹³ Ooratta ogetanne hiillata meezetiyoogee nuna metana danddayees. Nuuni Geeshsha Maxaafaa xannaˈissiyo ogee haˈˈi laamettiis. Merinawu Ufayttada Deˈa! giya maxaafay nuuni xannaˈissanawu goˈettiyo waanna xuufe; nuuni kaseegaappe dummatiya ogiyan he maxaafaa goˈettidi xannaˈissanawu giigettananne xannaˈissana koshshees. Nuuni amarida menttota nabbabidi xinaatiyaara loytti haasayoos. Nuuni tamaarissiyo wode, biidota, nu websaytiyan deˈiyaabatanne JW Library® loytti goˈettoos. Neeni he miishshata waata goˈettanaakko erennaba gidikko, eta goˈettiyoogaa tamaaranaadan nena maaddana danddayiya uraa oychcha. Asay issibaa kase ba meezetido ogiyan oottiyoogan ufayttees. Issibaa ooratta ogiyan oottiyoogaa meezetiyoogee nuna metees. SHin Yihoowaynne harati maaddin neeni metootennan meezetana, ubba qassi asaa xannaˈissiyoogan keehi ufayttana. Issi aqinyee yootidoogaadan xannaˈissiyo ha hiillay “xinaatiyaakka xannaˈissiyaagaakka ufayssiyaaba.”

14. Nu yootiyoobaa daro asay siyenna moottan nuuni sabbakiyo wode ay hassayana koshshii, 1 Qoronttoosa 3:6, 7y nuna waati minttettii?

¹⁴ Nuuni sabbakiyoy Geeshsha Maxaafaa xannaˈissiyoogaa doomissanawu metiya moottaana gidana danddayees. Issi issi asay nu yootiyoobaa siyanawu koyenna woy hegaa eqettees. Geeshsha Maxaafaappe yootiyoobaa hegaa mala asay siyana danddayees giidi nuuni ubbatoo qoppanaadan nuna aybi maaddana danddayii? Ha waayissiya alamiyan asaa deˈoy eesuwan laamettana danddayiyoogaanne siyanawu koyibeennaageeti banttassi Xoossaa kaaletoy koshshiyoogaa wurssettan akeekana danddayiyoogaa hassaya. (Maa. 5:3) Kase ubbatoo nu xuufeta ekkennan ixxiya amaridaageeti guyyeppe Geeshsha Maxaafaa xannaˈanawu eeno giidosona. Qassi Yihooway kattaa Godaa gidiyoogaa nuuni eroos. (Maa. 9:38) I nuuni puutiyaa tokkanaadaaninne haattaa ushshanaadan koyiyaaba gidikkonne, dichchiyaagee A. (1 Qor. 3:6, 7) Nuuyyo Geeshsha Maxaafaa xinaatee haˈˈi baynnaba gidikkonne, Yihooway nuna anjjiyoy nuuni asawu daro xuufiyaa immiyo gishshataassa woy Geeshsha Maxaafaa xannaˈissiyo gishshataassa gidennan, asaa maaddanawu baaxetiyo gishshataassa gidiyoogaa hassayiyoogee keehi minttettiyaaba! *

15. Issi uri Geeshsha Maxaafaa tumaa ammaniyo wodenne tamaariyoobaa oosuwan peeshshiyo wode Yihoowawu aybi siyettii?

¹⁵ Issi uri Geeshsha Maxaafaa tumaa ammaniyo wodenne he tumaa haratussi yootiyo wode  Yihooway ufayttees. (Lee. 23:15, 16) Yihooway ba asay ha wodiyan minnidi sabbakiyoogaanne tamaarissiyoogaa beˈiyo wode keehi ufayttees! Leemisuwawu, 2020 haggaazo layttan, ubbasaa gakkiya harggee kumetta alamiyan deˈishinkka, 7,705,765 asaa Geeshsha Maxaafaa xannaˈissida, hegee 241,994 asay bana Yihoowawu sheedhdhidi xammaqettanaadan maaddiis. Qassi mati erissiyo ashkkara gididaageeti xinaateta Geeshsha Maxaafaa xannaˈissoosonanne daroti erissiyo ashkkarata gidanaadan maaddoosona. (Luq. 6:40) Erissiyo ashkkara gidanaadan nuuni harata tamaarissiyo wode, Yihooway ufayttiyoogaa ammanettana danddayoos.

16. Nuuni halchchana danddayiyo loˈˈo halchchoy aybee?

¹⁶ Erissiyo ashkkara oottiyoogee deexo ooso gidikkonne, saluwan deˈiya nu Aawaa siiqanaadan harata tamaarissiyo oosuwaa Yihooway maaddin nuuni oottana danddayoos. Baa giishin issi ura Geeshsha Maxaafaa xannaˈissanawu halchchana danddayiyoo? Geeshsha Maxaafaa xannaˈanaadan nunaara gayttiya ubba asaa oychchanawu injjetiya wodiyaa nuuni ubbatoo goˈettikko, haniyaabaa beˈiyoogan maalaalettennan waayi aggana. Nu baaxetiyo baaxiyaa Yihooway anjjanaagaa ammanettana danddayoos.

17. Nuuni Geeshsha Maxaafaa xannaˈissiyo wode nuuyyo aybi siyettii?

¹⁷ Haratuyyo sabbakiyoogeenne tumaa eta tamaarissiyoogee keehi gita maata! Ha oosoy nuuni wozanappe ufayttanaadan oottees. Tasalonqqe kataman deˈiya daroti erissiyo ashkkara gidanaadan maaddida kiitettida PHawuloosi bawu siyettiyaabaa hagaadan qonccissiis: “Nu Godaa Yesuus Kiristtoosi yiyo wode, nuuni be7ana giidi ufaissan naagiyoogee, woikko nu ufaissai, woikko nuuni ceeqettiyo akiliile oonee? Inttena gidekketiiyye? Aissi giikko, intte nu bonchchonne nu ufaissa.” (1 Tas. 2:19, 20; Oos. 17:1-4) Ha wodiyan deˈiya darotuyyo hegaadan siyettees. Daro asay xammaqettanaadan, ba azinaara maaddida Istefan giyo michchiyaa hagaadan gaasu: “Asay bana Yihoowawu sheedhdhidi xammaqettanaadan maaddiyoogaappe aaruwan ufayssiyaabi baawa.”