1. მუ აკეთ იეჰოვაქ თქვანო?

თქვა მუჭო გინირთით იეჰოვაშ მოწმეთ? სახიოლო ამბე შილებე მირჩქილეთ თქვან მშობლეფშე, თანამშრომელშე, სკოლაშ ამხანაგშე ვარდა შილებე მოწმეეფქ ჸუდეშა მუგაკითხეს (მარ. 13:10). უკულ მიდგარენქ დრო დო მონდომა ვა დარკჷ თქვანდა ბიბლიაშ გურაფას. გურაფაშ დროს ქიგეჸოროფეს იეჰოვაქ დო ქიგეგით, ნამდა თის ხოლო უჸორთ. იეჰოვაქ ჭეშმარიტებაშა ქუმოიჸონეს დო ასე, მუჭოთ იესო ქრისტეშ მოწაფეს, გიღნა მარადიულ სიცოცხლეშ შესაძლებლობა (იოან. 6:44). მუშო ოკო რაგად, თქვა მარდულ რეთ იეჰოვაშ, მუშენდა თიქ აღძრჷ მიდგარენ, თქვანდა ჭეშმარიტება ქუდუგურუაფუდკო დო თეშნერო თიქ მუშ მსახურო მეიღეს.

2. მუს გუვარჩიენთ თე სტატიას?

² თქვა ჭეშმარიტება უკვე გიჩქნა, ათეშენ გიღნა პატი, შხვეფს ხოლო ქიმეხვარათ, სიცოცხლეშ შარას ქიგედირთან. შილებე კარდოკარ ქადაგება ვაიჭირდან, მარა ბიბლიაშ გურაფეფიშ ჩატარება ძნელ საქმეთ გაძირედან. თაშ ქორენ-და, თე სტატიას მოჩამილ მუსხირენ ჯგირ რჩევაქ შილებე მიგეხვარან. ჩქი ქობძირუნთ, მუ აღბძრენა, მუვამზადათ მოწაფეეფ? თეს გეძინელ, გუვარჩიენთ, მუჭო შემლებნა გივორჯგინათ სირთულეეფს, მუდგაშ გურშენ ფიფქრენთ, ნამდა შხვეფშა ბიბლია ვადმაგურენა. მორთ დიო ქობძირათ, მუშენ ოკო ვა ვორდათ ხვალე მაქადაგებელეფ დო მუშენ ოკო ვოგურუათ თინეფს სახიოლო ამბე.

3. მუშენ ფქადაგენთ?

³ დედამიწას რდუნ თიმწკუმა, იესოქ მუშ მიმაჸუნალეფს ჟირ ნაწილიან მითითება მეჩჷ. პირველ, თიქ უწუ, ნამდა  იქადაგესკო სახიოლო ამბე სამეფოშ გურშენ დო ქაძირუ, მუჭო აკეთესკო თენა (მათ. 10:7; ლუკ. 8:1). მაგალთო, იესოქ მამზად მუშ მოწაფეეფ, სახიოლო ამბეშ მიმართ ხალხიშ ქოთ ჯგირ დო ქოთ გლახა რეაქციაშო (ლუკ. 9:2—5). თიქ თინა ხოლო იწინასწარმეტყველ, სოიშა მიოჭირინუანდჷ ქადაგებაშ საქმე დო თქუ, ნამდა მუშ მიმაჸუნალეფ იქადაგენდეს „არძა ხალხშა გაცხადებელო“ (მათ. 24:14; საქ. 1:8). ხალხის მუდგანერ რეაქცია ვა უღუდკონ, იესოშ მოწაფეეფქ ოკო გაცხადესკო ზეციერ სამეფოშ დო თიშ გურშენ, მუს გაკეთენს თინა.

4. მუჭოთ მათეშ 28:18—20-ის რე მოჩამილ, მუ ოკო ვაკეთათ სამეფოშ გურშენ ქადაგებაწკუმა ართო?

⁴ მუ რდჷ იესოშ მითითებაშ მაჟია ნაწილ? თიქ მუშ მიმაჸუნალეფს უწუ, ნამდა ქუდუგურუაფდესკო მომავალ მოწაფეეფშა არძა თი მითითებაშ მორჩილება, ნამუთ მუქ მეჩჷ. ნამთინე შილებე ფიქრენდას, ნამდა ქადაგება დო მოწაფეეფიშ მომზადებაშ საქმე ხვალე პირველ საუკუნეშ ქრისტიანეფს ოვალდეს. ქორენო თენა მართალ? ვარ, მუშენდა იესოქ თქუ, ნამდა თე მნიშვნელოვან საქმე გეგრძელებუდ ამდღარ დროშახ — „თე ქიანაშ მოსპუალაშახ“ (წეკითხით მათეშ 28:18—20). შილებე იესოქ თე მითითება თიმწკუმა თქუ, მუჟამსით ართდროულო 500-შე მეტ მოწაფეს გიმეცხად (1 კორ. 15:6). უმოს გვიანო მოციქულ იოანექ ძირჷ ხილუა, ნამდგაშ გურშენ გამოცხადებაშ წიგნის ენოჭარ. თეშ საშვალებათ იესოქ არგამათ ოძირუ, ნამდა ოკო, მუშ არძა მოწაფექ ქიმეხვარას შხვეფს იეჰოვაშ გურშენ გურაფას (გამოცხ. 22:17).

5. მუჭოთ 1 კორინთელეფიშ 3:6—9-ს ჭარჷ, მუ მაგალით მიჸონ პავლექ ქადაგება დო გურაფაშ შქას კავშირიშ ოძირაფალო?

⁵ თიშ ოძირაფალო, ნამდა უმოს მეტიშ კეთება რე საჭირო, ვინემ ხვალე თასიშ თასუა, მოციქულ პავლექ მოწაფეეფიშ მომზადებაშ საქმე მოსავალიშ მოჸუნაფას შეადარ. თიქ კორინთელეფს გაშინ: „მა დობრგჷ, აპოლოსიქ დოწყარ . . . თქვა ღორონთიშ დიხაშ ნოკვეთ რეთ, ნამდგას თინა ამუშენს“ (წეკითხით 1 კორინთელეფიშ 3:6—9). ჩქი „ღორონთიშ დიხაშ ნოკვეთის“ მუშეფ ვორეთ, ათეშენ მუჟამსით ფქადაგენთ, თაშ ქოფთქუათინ, ფთასუნთ დო მუჟამსით ვოგურუანთ — ბწყარუნთ (იოან. 4:35). თეწკუმა ართო, მარჩქილენა, ნამდა ხვალე ღორონთ რდუნს თასის.

6. მუ ოკო აკეთათ მუჭოთ მასწავლებერეფქ?

⁶ ჩქი ბგორუნთ თინეფს, „მით მარადიულ ცხოვრებაშო სწორას განწყობილ“ რენა (საქ. 13:48). საჭირო რე, თითოულს ქიმეხვარათ, 1) ქიგეგან, 2) ირწმუნან დო 3) მიაჸუნან თის, მუდგას ბიბლიაშე გურაფლენა, ნამდა იესოშ მოწაფეეფო გინირთან (იოან. 17:3; კოლ. 2:6, 7; 1 თეს. 2:13). კრებას არძას შეულებ, მეხვარას ბიბლიაშ მაგურაფალს თით, ნამდა გეგმირჩქინას ჸოროფა დო გემუანო ქეშეხვადას, მუჟამსით შეხვალამეფს ოსწრჷ (იოან. 13:35). ართ ბიბლიაშ გურაფაშ ჩატარებას ხოლო შილებე ბრელ დრო დო ენერგია ოსაჭირდას, ნამდა მაგურაფალქ დოთირუას არასწორ შეხედულებეფ ვარდა გლახა ჩვევეფ (2 კორ. 10:4, 5). შილებე ბრელ თუთაქ დესაჭირას ნამთინეს ცხოვრებაშ ოთირალო დო ნათუაშ მიზანშა მიოჭირნაფალო. მარა თენა ღირჷ მონდომაშა.

7. მუ აღგძრენა, იქადაგათ დო მოწაფეეფო მამზადათ ხალხ?

⁷ მუშენ რე ჩქინო მნიშვნელოვან ქადაგება დო მოწაფეეფიშ მომზადებაშ საქმე? პირველ, ჩქი მიჸორა იეჰოვა. მუჟამსით ირნერო ოცადუთ, მიაჸუნათ მითითებას, ნამდა იქადაგათ დო მოწაფეეფ მამზადათ, ოძირანთ იეჰოვაშ ჸოროფას (1 იოან. 5:3). დეფიქრით: კარდოკარ თიშენ ქადაგენთ, ნამდა გიჸორა იეჰოვა. ადვილ გაფდესო თე მითითებაშ მეჸუნა? ალბათ ვარ. ქიგიშინით, მუს გინაფლენდით, მუჟამსით პირველო იდით კარდოკარ ოქადაგებშა. მუშო ოკო რაგად, ნერვიანენდით! მარა გიჩქუდეს, ნამდა იესოს ოკო, იქადაგათ, ათეშენ დემორჩილით თიშ მითითებას. დროშ მიკულაწკუმა  ართო, თე საქმეშ კეთებაქ ალბათ უმოსო გეგეადვილეს. მუშ რაგად შილებე შხვეფშა ბიბლიაშ გურაფაშე? თეშენ ხოლო ხომ ვა ნერვიანენთ? შილებე თაშ რდას, მარა, მუჟამსით იეჰოვას ქოთხინთ, ნამდა ქიმერჩან გაბედულება შხვეფშა ბიბლიაშ გურაფაშ შეიოთავაზებელო, თინა ქიმგეხვარებნა დო გამანგარენს თქვან სურვილს, მოწაფეეფო მამზადათ ხალხ.

8. მუჭოთ მარკოზიშ 6:34-შე იძირე, ხოლო მუ აღგძრენა, ქუდაგურუათ შხვეფს ჭეშმარიტება?

⁸ მაჟია, ჩქი მიჸორა მოყვას, ათეშენ მოკონა, ვოგურუათ ჭეშმარიტება. ართშა იესო დო მუშ მოციქულეფ მანგარ შულადირეფ რდეს, მუშენდა ბრელ იქადაგეს. ათეშენ ოსაჭირდეს ადგილ მასვანჯებელო, მარა ხალხიქ ქიმიოგორუ თინეფს. იესოს ეცოდ თე ხალხიქ დო „ბრელ მუდგარენიშ“ გურაფა ქუდუჭყჷ (წეკითხით მარკოზიშ 6:34). მართალ რე, შულადირ რდჷ, მარა ვარია ვა უთქუალ მოხვარაშე, მუშენდა თე ხალხიშ ადგილს წერმიდგინ მუშ დუდ დო ქოძირ, მუჭო იტანჯებდეს თინეფ დო მუჭო ოსაჭირდეს იმენდ. ხალხის ამდღა ხოლო უღჷ პრობლემეფ დო ოსაჭირ იმენდ, თიშ უმკუჯინუო, ნამდა შილებე თეშ იძირედას, ითამ ბედნერეფ დო ცხოვრებათ კმაყოფილეფ რენა. თინეფ ჭყიშიშ უმშო დოსქილადირ შხურს ქოგნა. მოციქულ პავლექ თქუ, ნამდა თეცალ ხალხ ვეჩინენს ღორონთის დო ვა უღჷ მომავალიშ იმენდ (ეფეს. 2:12). თინეფ „ფართე შარას“ გეჸუნა! (მათ. 7:13). მუჟამსით ფიქრენთ, მუჭო ოსაჭირ თქვან სამქადაგებლო ტერიტორიას მახორუ ხალხის ღორონთიშ გაჩინებაფა, ჸოროფა დო თინეფიშ მდგომარეობაშ გურშა მეღალა, გინგოჭყვიდირაფუანა, ქიმეხვარათ. თეშ ოკეთებელო არძაშ უჯგუშ საშვალება ბიბლიაშ გურაფაშ შეთავაზება რე.

9. მუჭოთ ფილიპელეფიშ 2:13-ს ჭარჷ, მუჭო შეულებ იეჰოვას მიგეხვარან?

⁹ შილებე გიჭირდან, ქეშეთავაზათ მითინს ბიბლიაშ გურაფა, მუშენდა გიჩქნა, ნამდა ბიბლიაშ გურაფაშო მომზადებას დო თიშ ჩატარებას ბრელ დრო ოსაჭირ. თაშ ქორენ-და, ქეჩით იეჰოვას თქვან გრძნობეფიშ გურშენ დო ქოთხით თის მოხვარა, ნამდა ქიმერჩან სურვილ, დოგორათ თიცალ პიროვნება, მიდგას ბიბლიაშ გურაფა ოკო დო ქუდაგურუათ (წეკითხით ფილიპელეფიშ 2:13). მოციქულ იოანექ დუმარწმუნეს, ნამდა ღორონთ უპასუხენს ჩქინ ლოცვეფს, ნამუთ მუშ ნებაწკუმა რე შეთანხმებულ (1 იოან. 5:14, 15). თაშ ნამდა, შეილებნა დარწმუნებულ რდათ, იეჰოვა ქიმგეხვარებნა, გიღდან სურვილ, იესოშ მოწაფეეფო მამზადათ ხალხ.

10, 11. მუშენ შილებე გიჭირდან ბიბლიაშ გურაფაშ ჩატარება?

¹⁰ ჩქი სერიოზულო ვუჯინეთ მოწაფეეფიშ მომზადებაშ საქმეს, მარა მინშა შილებე ძნელ რდას, მოკონან თიზმაშ კეთება. მორთ ქობძირათ, მუ რე თე სირთულეეფშე ნამთინე დო მუჭო შემლებნა გივორჯგინათ თინეფს.

¹¹ შილებე მოკონან თისხი ვა მაკეთებედან. მაგალთო, ნამთინე მაუწყებელ ხანიერ რე ვარდა გლახა ჯამრთელობა უღჷ. თქვან შემთხვევას ხოლო თაშ ქორენ-და, დეფიქრით, მუ დუმოგურეს კოვიდ-19 პანდემიაშ პერიოდიქ. ჩქი ქობძირით, ნამდა ბიბლიაშ გურაფეფიშ ეფექტურო ჩატარება ელექტრონულო ხოლო შემლებნა! თაშ ნამდა, თქვა შეილებნა ბიბლიაშ გურაფეფ ქიდიჭყათ დო ჩატარათ ჸუდეშე. ნამთინეს ოკო ბიბლიაშ დოგურაფა, მარა თი დროს ვა ჩოდჷ, მუჟამსით და დო ჯიმალეფ ქადაგენა. თინეფს შილებე უსხუნდან ოჭმარეს ადრე ვარდა სერით გვიანო. ქეშეილებნანო თინეფს ონწყუნან თი დროს ჩატარათ ბიბლიაშ გურაფა? იესო ნიკოდემეს სერით ოგურუანდჷ, მუშენდა თე პიროვნებაშო თაშ რდჷ მოხუჯურ (იოან. 3:1, 2).

12. მუ გარწმუნენა, ნამდა შეილებნა რდათ ჯგირ მასწავლებერეფ?

¹² შილებე ფიფქრენდათ, ნამდა ბიბლიაშ გურაფა ვაჩმატარებენა. შილებე ფიფქრენდათ, ნამდა ვამღუნა დასაბაღ რჩქინა დო  უნარ, ვორდათ მასწავლებერ. თაშ ქორენ-და, დეფიქრით თი სუმ მხარეშე, ნამუთ მიგეხვარებნა, დერწმუნათ, ნამდა შეილებნა დაგურუათ შხვეფს. პირველ, იეჰოვაშ თოლს შესაფერის რეთ თე საქმეშ შეიოსრულებერო (2 კორ. 3:5). მაჟია, იესოქ, ნამდგას ძალაუფლება უღჷ „ზეცას დო დედამიწას“, მერჩეს მითითება, ოგურუათ შხვეფს (მათ. 28:18). დო მასმა, შეილებნა მოხვარა მიღათ იეჰოვა დო და დო ჯიმალეფშე. იეჰოვაშ მოხვარათ იესოს უჩქუდ, მუ დო მუჭო იჩუკო დო თინა თქვა ხოლო მიგეხვარებნა (იოან. 8:28; 12:49). თეს გეძინელ, შეილებნა სამქადაგებლო ჯგუფიშ ზედამხედველს, გამოცდილ პიონერს ვარდა მაუწყებელს ქოთხუათ, ქიმგეხვარან ბიბლიაშ გურაფეფიშ დოჭყაფას დო ჩატარებას. ართ-ართ საშვალება, მუთ მიგეხვარებნა უჯგუშ მასწავლებერეფქ იჸუათ, თინა რე, ნამდა ქიდესწრათ შხვეფიშ ბიბლიაშ გურაფას.

13. მუშენ რე საჭირო, მიაჸუნათ გურაფაშ ახალ მეთოდით ჩატარებას?

¹³ შილებე მიჭირდან ახალ მეთოდეფ დო საშვალებეფიშ გიმორნაფა. ბიბლიაშ გურაფაშ მეთოდიქ დითირ დო ასე ჩქინ ძირითად ოგურაფალ პუბლიკაცია რე „მარადიულო გეხარით ცხოვრებათ!“. ათეშენ ასე ბიბლიაშ გურაფაშო თეშ ვევემზადებუთ, მუჭოთ თეს ადრე ვორთუდით დო ვართ ჯვეშ მეთოდით ვატარენთ თის. გურაფაშ დროს ჩქი მუსხირენ აბზაცის ბკითხულენთ დო მაგურაფალწკუმა მეტ მსჯელობა მიღნა. თეს გეძინელ, იბრინუანთ ბრელ ვიდეოს დო თიცალ ელექტრონულ საშვალებეფს, მუნერით რე „JW ბიბლიოთეკა“. თე საშვალებეფიშ გიმორნაფა ვაიჩქუნან-და, შეილებნა მოხვარა ქოთხუათ შხვეფს. ადამიანეფ უმოს თავისუფალო თიმწკუმა ბგინაფლენთ დუდის, მუჟამსით ვორთუთ თის, მუთ ჩვევას მიღნა. ათეშენ ადვილ ვა რე, მივაჸუნათ საქმეშ ახალ მეთოდით კეთებას. მარა იეჰოვა დო შხვეფიშ მოხვარათ უმოს ადვილ გაჸინა ახალ მეთოდეფშა მეხუჯაფა დო მეტ ხიოლს მოიღანა ხალხშა ბიბლიაშ გურაფა. ართ პიონერ იჩიებ, ნამდა გურაფაშ თე მეთოდ ხიოლიშ მუმაღალარ რე ქოთ ბიბლიაშ მაგურაფალშო დო ქოთ მასწავლებერშო.

14. მუ ოკო რშუდან, მუჟამსით თიცალ ტერიტორიას ქადაგენთ, სოდეთ ბრელს ვაინტერეს ჩქინ ცნობა დო მუჭო ელაიკინანა გურშა 1 კორინთელეფიშ 3:6, 7?

¹⁴ შილებე თიცალ ტერიტორიას ფქადაგენდათ, სოდეთ ბიბლიაშ გურაფაშ დოჭყაფა რთულ რე. ხალხის შილებე ვაინტერესდას ჩქინ ცნობა ვარდა მოწინააღმდეგდან. მუ მიგეხვარებნა თეცალ დროს, ვადინუათ დადებით განწყობა? რშუდან, ნამდა ხალხიშ მდგომარეობაქ შილებე ხეთეშე დითირას, მუშენდა მსოფლიოს ვა რე სტაბილურობა დო თინეფქ, მით ადრე ვერჩქილუანდეს ჩქინ ცნობას, შილებე ქიმეხვადან, ნამდა ღორონთშე ხემძღვანელობა ოსაჭირნა (მათ. 5:3). ნამთინექ, მით ულირს ვარიას იჩიებუდ პუბლიკაციეფიშ ეჭოფუაშე, უმოს გვიანო ბიბლიაშ გურაფა ქიდიჭყჷ. ჩქი თინა ხოლო მიჩქნა, ნამდა იეჰოვა რე „მოსავალიშ ბატონ“ (მათ. 9:38). თის ოკო, ვემიოტუათ თასუა დო წყარუა, მარა რდუალა მუშ საქმე რე (1 კორ. 3:6, 7). მუნერ გურიშ ემაკინალ რე თიშე ფიქრ, ნამდა ბიბლიაშ გურაფა ვა გიღნან თიმწკუმა ხოლო, იეჰოვა მონდომაშ გურშენ გაკურთხენა დო ვართ ხოლო შედეგშენ! *

15. მუს გინაფლენს იეჰოვა, მუჟამსით პიროვნება იჭყანს ბიბლიაშ გურაფას დო ნაგურეფუს ცხოვრებას ირინუანს?

¹⁵ იეჰოვას ოხიოლ, მუჟამსით პიროვნება ღებულენს ბიბლიურ ჭეშმარიტებას დო შხვეფს ხოლო გინოჩანს თის (იგავ. 23:15, 16). ღორონთის მანგარო უხარენს გურს თიშ ძირაფა, მუნერ მონდომათ ქადაგენს დო ოგურუანს მუშ ხალხ! მაგალთო,  2020 სამსახურებრივ წანას თიშ უმკუჯინუო, ნამდა მთელ მსოფლიოს მოდვალირ რდჷ პანდემია, 7 705 765 ბიბლიაშ გურაფა იტარებუდ, მუდგაქ 241 994 პიროვნებას მეხვარ, დუდ მეუძღვინკო იეჰოვას დო დინათკო. თე ახალ მოწაფეეფ ხოლო ბიბლიაშ გურაფეფს ჩატარენა დო შხვა მოწაფეეფს მამზადენა (ლუკ. 6:40). მუშო ოკო რაგად, იეჰოვას გურს უხარენთ, მუჟამსით მონაწილებას ღებულენთ მოწაფეეფიშ მომზადებაშ საქმეს.

16. მუ ჯგირ მიზან შეილებნა გიღდან?

¹⁶ მოწაფეეფიშ მომზადება ძნელ საქმე რე, მარა იეჰოვაშ მოხვარათ, შეილებნა მონაწილება მიბღათ თე საქმეს დო თინეფს ჩქინ ზეციერ მუმა ქუჸოროფუათ. შეილებნანო მიზანო გიღდან, არძაშ ნაკლებ, ართ ბიბლიაშ გურაფაშ დოჭყაფა დო ჩატარება? შილებე გუგაკვირან, თიშ ძირაფაქ, მუთ მაჸუნუ არძანერ შესაძლებლობაშ გიმორნაფას, შეთავაზათ შხვეფს ბიბლიაშ გურაფა. შეილებნა დარწმუნებულ რდათ, ნამდა იეჰოვა აკურთხენს თქვან მონდომას.

17. მუს იგინანთ, მუჟამსით შხვეფს მეხვარებუთ ბიბლიაშ გურაფას?

¹⁷ მუ დიდ პატი რე, იფქადაგათ დო ვოგურუათ შხვეფს ჭეშმარიტება! თე საქმე ნამდვილ ბედნერობას მოიღანა. მოციქულ პავლექ, მიდგაქ ბრელს მეხვარ თესალონიკეს, გინირთესკო ქრისტეშ მოწაფეთ, მუშ გრძნობეფ თეშნერო გიმოხანტჷ: „მი იჸუაფ ჩქინ იმენდ, ხიოლ დო ოამაყებელ გვირგვინ, მუჟამსით ჩქინ უფალ იესო ქუმურს? თქვა ვარიო?! ქო, თქვა რეთ ჩქინ დიდება დო ხიოლ!“ (1 თეს. 2:19, 20; საქ. 17:1—4). ამდღა ხოლო ბრელ გინაფლენს დუდის თაშ. ართ და, სტეფანი, ნამდგაქ ქომონჯწკუმა ართო ბრელს მეხვარ ნათუაშ მიზანიშ მეჭირნაფას, იჩიებ: „თიშ უმოს ხიოლ ვა არსებენს, მუჟამსით შხვეფს ოხვარუქ, დუდ მეუძღვინან იეჰოვას“.