1. Ginipai Yekova namangihe foro?

WAIGU mo ada ni Dezire Yekova? Ni bambataha, mo agi “wene pangbanga,” isoke ngba avunguro, ngba gamo badiasunge, kuaro sukuru yo, watadu gu regbo aDezire Yekova aye ka tungusapai kpuro yo. (Mk. 13:10) Fuo gure, boro adi bakere regbo na ki mangi bakere asadatise tipa kaa wisigo Ziazia Kekeapai na mo. Ti regbo gu wisigopai re, mo aye ka kpinyemu Yekova na mo awiriki gupai nga ko ima kpinyemu ro a. Yekova agbe ro ku rogo rengo yo, na awere wa ngia mo ga Yesu Kristo bawiriki, mo na gu maabangirise nga ga raka nyeanye kindi. (Yo. 6:44) Zanga kapa, mo na tambuahe fu Yekova nga ko afõngbadu boro yo ni yugu rengo foro na Ko ki idi gupai nga mo du ni boro sa dagba Gako amoyambu yo.

2. Gini apai ani nika sakapai tipaha rogo gi kekeapai re?

² Awere tie, wa ani naima ino rengo, ani na gu momu nga ga undo kura aboro i koditiyo na ani ngba gu gene nandu koyo du unga ni. Si ima rengba kadu ni taataha furani ka tungusapai fu aboro, ono si ima rengba kadu ni mbumbuhe furani tipa ka sana boro singia ni naida ani wiriki Ziazia Kekeapai na ni watadu si ima rengba kadu ni mbumbuhe ka wisigo Ziazia Kekeapai na boro. Ya mo wo duhe tipa ro? Ka singia wo duhe, isoke mo nika bi bete agu aberãpai du rogo gi kekeapai re ni pa undo foro. Ani nika sakapai tipa gupai nafõngbadu rani yo tipa ani undo na sunge sa aboro ni abawiriki. Ani nika sakapai a tipa agu akpakarapai rengbe ka sa rani ani du na ndundu ka wisigo Ziazia Kekeapai na boro. Ni bambataha, ani sakingo pai tipa ndu gupai si aidanga ani du ti ni sa ni kina abatungusi wene pangbanga ya, ono ni abayugupai a.

3. Tipagine ani atungusapai ti ni?

³ Ho Yesu adu ni auru kpotosende, ko afu zinahe fu apefuoko i naamangasunge nga gu du na apaparaha ue. Ni bambataha, ko  aya fuyo i tungusi gu wene pangbanga nga ga Kindo, na ko ayugu wai fuyo si aida i mangi gipai re. (Mt. 10:7; Rk. 8:1) Ni kpiapai, Yesu agumba gupai fu gako abawiriki si aaida i mangihe ho aboro adegatuyo ni kuti gu pangbanga nga ga Kindo na gupai si aaida i mangihe ho aboro adeganga tuyo ni kutini ya. (Rk. 9:2-5) Ko asaki gupai a nga, gako abawiriki nika tungusapai fu badungu aboro na rogo badungu aba ho ko aya ni wẽ, i nika manga ‘dezirepai fu arikaaboro dũ.’ (Mt. 24:14; Amo. 1:8) Singia aboro nadia gu pangbanga re kugume watadu i adianga ha te, Yesu arugu gako abawiriki nga i pepa ga Mbori Kindo fu aboro na agu apai si nika mangaha.

4. Ringbisihe kuti Matayo 28:18-20, ginipai si aida ani mangihe kupati gu nga ga tungusapai tipa Kindo?

⁴ Gini uepai nga gu Yesu azinahe fu gako abawiriki i nimangihe? Ko agumba gupai fu apefuoko nga i naayugopai fu aboro i nikakuti agu apai dunduko ko arugu paha. Kura aboro ima rengba ka pe gupai nga ga Yesu zinahe tipa ka tungusapai na ka yugopai adu sa fu kina agu aKristano naadu rogo bambata sa kama agarã. Ono ya mo gipai re nga rengo? Oò, Yesu ape gupai nga, gi nyanyakipa sunge re nika ndu kindi ku mbatayo zavura da kuti gi gaani regbo re, “ki da ti digida zegino.” (Oni gedi Matayo 28:18-20.) Si nawira gupai nga, Yesu afu gi rugapai re ho ko ayugu tiko ni fu gako abawiriki bangeyo aima susa 500. (1 Kor. 15:6) Na rogo gu yuguyugupai yo Yesu ayuguhe fu Yoane, ko aima yugoho ziazia nga ko naida gako abawiriki undo kura aboro i wirikipai tipa Yekova.—Yugo. 22:17.

5. Ringbisihe kuti 1 AKorindo 3:6-9, waigu Pauro aringbisipa gu wiratise du dagba tungusapai na yugopai?

⁵ Gu mokedi nangia Pauro aringbisi gu sunge nga ga sa aboro ni abawiriki kuti rũhe, tipa ka yugo gupai nga si naida ani mangi gi sunge re ni bakerehe gbe kisusi gu nga ga rũ kina rũrũ tunga. Ko atingidi AKorindo na gupai nga: “Mi arũ he, Aporo ki nitudi he . . . Oni nga ga Mbori ati.” (Oni gedi 1 AKorindo 3:6-9.) Wa du ani ni amangisunge rogo ‘‘ga Mbori ati,’’ ani arũngo kina ruru tunga sa te, ono ani natuda ha atuda a, na ani na wisigoho dedede ka bi wai si asona. (Yo. 4:35) Ti kina gu bangisa regbo re, ani ima rugatirani na gupai nga Mbori du nasa gu tunga re si sono.

6. Ho ani ayugopai ni fu aboro, ginipai si aida ani undoyo i mangihe?

⁶ Ani nagbata agu aboro “i aima ringbisa yo sa nyenye unga” watadu du na nyemu ka gbia nyenye unga. (Amo. 13:48) Tipa ka undo agu aboro re i da ni abawiriki, si naida ani undoyo (1) i rugutiyo na agu apai i awirikaha rogo Ziazia Kekeapai yo, (2) i di gupai i awirikaha kugume, na (3) ki moihe ku rogo mangapai yo. (Yo. 17:3; Koro. 2:6, 7; 1 Tesa. 2:13) Agu aboro dunduko du rogo dungurati ima rengba ka undo abawiriki Ziazia Kekeapai niyugo yo nyemuse fuyo na ni dia yo kugume ho i aye ni kupati adunguratise. (Yo. 13:35) Si ima rengba a ka ida gupai nga gu boro nawisigo Ziazia Kekeapai na boro di bakere regbo na ki fu ome ni ni bakerehe gbe tipa ka undo bawiriki Ziazia Kekeapai nimbu “nyanyaki” aida watadu mangaapai. (2 Kor. 10:4, 5) Si ima rengba ka dia badungu adiwi tipa ka undo boro tipa ni mangi agi aˈariapai re rogo gani raka yo tipa gupai nga ni rẽ ka zio bapatiza. Ono manga agu aˈariapai re na bakere undo ti ni.

7. Ginipai nafõngbadu rani yo tipa ani naamangasunge tungusapai na sunge sa aboro ni abawiriki?

⁷ Tipagine du ani atungusapai ti ni fu aboro na kini yugupai fuyo i da ni abawiriki? Bambatapai nga, mbiko gupai nga ani ima kpinyemu Yekova. Ho mo amanga ai gupai ni rengbe mo ka mangaha tipa ka irisa gu zinahe nga ga sa aboro ni abawiriki, mo nayugo gamo nyemuse tipa Mbori. (1 Yo. 5:3) Mo berẽnga kurii gipai re: Gamo nyemuse tipa Yekova ima fõngbadu ro yo mo naatungusapai kporo na kporo. Ya mo si adu ni taataha foro tipa mo mangipai kuti gu zinahe re? Si nawira gupai nga si aadunga taata te. Ya mo mo adu na gunde tigu bambata regbo mo andu ka tungusapai? Zanga kapa, mo aima du na gunde! Ono mo aima ino gupai nga gi sunge re du Yesu  aida mo mangihe na mo amangipai kuti gu zinahe re. Na fuo mo tungusipai tipa bete regbo, si nawira gupai nga sunge tungusapai aye kada taata foro. Ono wai du mo abi gu sunge nga ga wisigo Ziazia Kekeapai na boro? Ya mo gunde ninaamanga ro ho mo naaberã paha ni? Si ima rengba kadu wo. Ono tie, ho mo asana Yekova ni tipa ko undo ro mo dibe gamo gunde na ki gbia ngarã tipa ka sana boro ka wisigo Ziazia Kekeapai na ni, Yekova ima rengba ka undoro mo kiisi gamo nyemupai tipa kaa sa aboro ni abawiriki.

8. Ringbisihe kuti Marako 6:34, gini kurapai rengbe ka fõngbadu rani yo tipa ani yugupai fu kura aboro?

⁸ Uepai nga, gaani nyemuse tipa akuarani nafõngbadu rani yo tipa ani yugu rengo fuyo. Ti kura regbo sa, aYesu na gako abawiriki adu na bakere mbugo mbiko i aima tungusapai ni bakerehe. I aaida gu ba nga gu ka i ongodi rogoho, ono bakere ndurumo aboro kini ye fuoyo. Nunga aboro azi Yesu na ko ki tona ka yugo “dungu apai” fuyo. (Oni gedi Marako 6:34.) Ko aima manga bakere sunge wa si avura du nga ko aima du na mbugo. Tipagine? Ko amoi tiko kuba gu ndurumo aboro re. Ko aaida ka undo yo bambiko ko abi gupai nga i aarungo na i aaida na maabangirise. Kina gu bangisapai re a du tipa aboro areme. Aboro na kpakarapai tiyo na i naida na maabangirise ka si vura kaa ngera wa i na ngbarago na kidu wenengai rogo gayo raka yo vurũ. I wa agu akandoro naima inga, ka babandara adunga ho ka ngbe fu ra kumbatayo ya. Gu mokedi nangia Pauro aya tipa agi aboro re i ainongo Mbori te na i na maabangirise a te. (Ef. 2:12) I ngba “gu gene nangbe koyo du kpio ni”! (Mt. 7:13) Ho ani aberãpa bakio wai ni si aida agu aboro du rogo gaani dagbarago ini Mbori, nyemuse gbiati nunga nafõngbadu rani yo tipa ani undo yo. Na gu bawene gene ngba kisusi rengbe ani ka undo ngbaha nga ka fu tirani ka wisigo Ziazia Kekeapai na yo.

9. Ringbisihe kuti AFiripoio 2:13, waigu Yekova narengbe ka undo ro?

⁹ Mo ima rengba kadu na gunde mbiko mo ima ino gupai nga, si nika ida mo di bakere regbo adia tipa kaa mbakada gupai mo nika wisigoho na boro na kini mangi gu wisigopai re. Ka singia wo du duhe, mo gumbaha fu Yekova. Mo sanako ko undoro mo gbia gu boro rengbe mo ka wirika Ziazia Kekeapai na ni. (Oni gedi AFiripoio 2:13, NW.) Gu mokedi nangia Yoane akido rani nga, Mbori na karagapai akaraga kuti agu akparakpee du na ngbanya dagbaha na gupai Ko akpinyemuhe. (1 Yo. 5:14, 15) Sidu, mo ima rengba kadu na gu kido nga Yekova nika undo ro aundo mo sonosi nyemu gu sunge nga ga sa aboro ni abawiriki.

10-11. Ginipai rengbe ka sarani ani du na ndundu ka wisigo Ziazia Kekeapai na boro?

¹⁰ Ani ima inoho ya, si ni nyanyakipa pai gbe ka yugopai, ono si ima rengba kadu ni mbumbuhe furani tipa ka mangasunge sa aboro ni abawiriki ni bakerehe wa gu ani aida ha. Ani sakingo pai tipa bete agu akpakarapai re, na wai rengbe ani ka diabe he.

¹¹ Ani ima rengba ka zanga mangapai wa gu ani aida ha mbiko rengba berani te. Ni kpiapai, kura abatungusipai kinaho naima gbinza watadu adunga kpotoyo wenengai ya. Ya mo si nga gupai du tipa ro? Ka singia wo duhe, mo bingo pai sa dagba agu apai yo wiriki ani he tigu ririkaza nga Korona. Ani ima wirika gupai nga, ani ima rengba ka wisigo Ziazia Kekeapai na boro rogo gaani aterefuni watadu gu kura aũfugo dagbase! Sidu, mo ima rengba ka tona wirika Ziazia Kekeapai na boro mo kidu kina kpuro yo, nga gupai naima rengba kadu ni taataha gbe foro. Na kura wenepai kinaho berewe du ti gipai re. Kura aboro kinaho naida ka wisigo Ziazia Kekeapai, ono i naadunga ho ti agu aregbo awirinarani naakura gene tungusapai yo te. Ono tie, i ima rengba kadu ho ngbatutu wiso watadu kusa yuru. Ya mo mo rengbe kaa wisigo Ziazia Kekeapai na boro ti agi aregbo re? Yesu ayugupai fu Nikodemo yuru, nga gu regbo nangba ti Nikodemo.—Yo. 3:1, 2.

12. Gini apai nafu gu kido furani nga ani ima rengba kadu ni wene abayugupai?

 ¹² Ani rengbe ka berãha nga rengba berani ka wisigo Ziazia Kekeapai na boro te. Isoke, ani nabihe nga si naida ani du na bakere inohe watadu si naida ani du ni bawene abayugupai mbata fu ani tona ka wisigo Ziazia Kekeapai na boro. Ka singia wo du mo abihe, mo bingo apai sita nga gu nika undo ro mo bihe nga mo ima rengba ka wisigo Ziazia Kekeapai na boro. Bambatapai nga, Yekova nabi ro nga mo ima rẽ kaa yugopai fu kura aboro. (2 Kor. 3:5) Uepai nga, Yesu nga guko ‘i na asia pa ahe fuko dunduko ku ngbangbaturũ yo na ku sende no’ du fu zinahe foro mo yugupai. (Mt. 28:18) Biatapai nga, mo ima rengba ka kido kuti kura aboro tipa i undo ro. Yesu adu nakido kuti gupai Bako ayuguhe fuko ko gumbaha, na kina gi bangisapai re rengbe mo ka mangaha. (Yo. 8:28; 12:49) Kurigure, mo ima rengba ka sana gu wirina nangerakurii gu badona nga ga tungusapai nga gu du mo rogoho, gu bazakigene du na bakere inohe, watadu gu batungusipai du na bakere inohe tipa ni undo ro mo tona wisigopai na boro. Gene sa dagba agu akuraha yo rengbe mo kadu ngbaha ni bawene bayugupai nga, ni koda mo tiro na agi abatungusipai re ho i awisigo Ziazia Kekeapai ni na boro.

13. Tipagine si aida ani du ti ni na nyemu kaa yugopai ngba agene ni bakiakia?

¹³ Ani ima rengba ka bihe ni mbumbuhe tipa ka inido tirani na vovo agene nga ga tungusapai gbiati vovo aũsunge nga ga tungusapai. Gu gene ani awisigo Ziazia Kekeapai ngbaha na aboro ima ariatihe awere. Ringbisihe kuti gaani nyanyakipa buku du riihe nga, Mo Raki Nyeanye Kindi na Ngbarago!, si naida gupai nga ani naambakada tirani tipa ka wisigopai na boro na kini mangihe ngba kura gene kia ti gu ani anaamangaha mbata. Ani nageda bete agenewaraga na kidu na bakere fugodagbase na bawiriki Ziazia Kekeapai. Ho ani ayugopai ni, ani namangasunge na badungu avidio, na agu aũsunge nga ga erekturoni wa gu nga JW Library^®. Ka mo aainongo wai ka mangasunge na agi aũsunge re ya, mo sana kura boro tipa ni undo ro mo ini wai ka mangasunge na ni. Gupai ningba ti aboro gbe nga kaa mangapai ngba gu gene i nainidihe. Si ni taataha furani tipa ani inidi vovo agene nga ga mangapai te. Ono na ga Yekova undo gbiati gu undo nga ga kura aboro, mo nika bihe ni taataha tipa ka manga aˈariapai kuti gi vovo agene yugopai re, na zavura ki gbia bakere ngbarago ti wisigo Ziazia Kekeapai na boro. A wa gu kura bazakigene sa agumbaha, gi gene wisigo Ziazia Kekeapai na boro re nafu “ngbarago fu bawiriki Ziazia Kekeapai na fu bayugu Ziazia Kekeapai a.”

14. Ginipai si aida ani tingidihe ho ani atungusapai ni rogo gu dagbarago dungu aboro adeganga tuyo furani rogoho ya, na waigu du 1 AKorindo 3:6, 7 nipa ngarasaro furani?

¹⁴ Ani ima rengba kaa tungusapai rogo gu dagbarago duhe ni mbumbuhe tipa ka tona wisigopai na boro rogoho. Kura aboro kinaho adunga nyemu gaani pangbanga tiyo ya watadu nasogaha. Ginipai rengbe ka undo rani anidu na ruru bipai rogo gu ngbatunga dagbarago re? Oni tingidi gupai nga, agu apai du tipa aboro ima rengba ka ariatihe niipo rogo gi kpakarakpakara zagino re, na agu aboro naadunga na bakere nyemupai mbata ya ima rengba ka tona ka berãpa gu gayo azingo nga ga toro. (Mt. 5:3, NW. ) Gu kura aboro kinaho naanaká gaani awaraga aká ti aregbo dunduko, ono kusa, i kini idi ka wisigo Ziazia Kekeapai. Ani ima ino gupai a nga, Yekova nga gu Gbia du zuzuhe ni gako. (Mt. 9:38) Ko naida gupai nga ani naarũ he na kini tudihe, ono ko du nasaha si sono. (1 Kor. 3:6, 7) Na si nipa ngarasaro gbe ka tingida gupai nga, ka si vura du vurũ nga ani na rengba ka wisigo Ziazia Kekeapai na boro awere te, Yekova nafu mosoro afu furani mbiko gu bakere asadatise ani amangaha angianga sangbana gaani tungusapai ya! *

15. Waigu du Yekova ho boro aida ni ka wirika Ziazia Kekeapai na kini mangipai kuti gupai ni awirikaha?

¹⁵ Yekova nangiangi ho boro aida agu arengo ni nga ga Baibiri na kini yugu agu arengo re fu kura aboro. (Snz. 23:15, 16) Nairiwo gu bakere ngbarago du Yekova na ni ho ko abi gu bakerepai ni namanga ti gi gaani regbo re! Ni kpiapai, wa vura duhe nga gu ririkaza nga Korona aima du ni kerehe rogo gu garã nga ga sunge nangia ga 2020, ani awiriki Ziazia Kekeapai na aboro bangeyo adu nga 7,705,765, nga gu naundo aboro nga 241,994 tipa i kpara gayo raka fu Yekova na ki zi bapatiza. Gi vovo abawiriki re nika wisigopai a tigayo na badungu aboro na ki sa badungu aboro ni abawiriki. (Rk. 6:40) Zanga kapa, ani nasa Yekova ko du na ngbarago ho ani amangasunge sa aboro ni ni abawiriki.

16. Gini wene sasa rengbe ani ka maaha?

¹⁶ Sunge sa aboro ni abawiriki nga nyanyaki sunge, ono na ga Yekova undo ani ima rengba ka fubee kuti gu sunge nga ga yugopai fu aboro tipa i kpinyemu gu Barani du ngbangbaturũ yo. Ya mo ani rengbe ka maa gu sasa nga ga ka tona wisigopai na kandara boro sa? Ngbarani ima rengba ka zera ka bi gupai rengbe ka manga ka ani mangisunge na ai gu regbo rẽarẽ ka sana agu aboro ani agbiayo singia i naida ani wisigi Ziazia Kekeapai na yo. Ani ima rengba kadu na gu kido nga Yekova nika fu maku afu kurii gaani bakere asadatise.

17. Waigu ani nika du ka ani du na rengba ka wisigo Ziazia Kekeapai na boro?

¹⁷ Nairiwo gu bakerepa momu du berani nga ga tungusapai na yugo rengo fu kura aboro re! Gi sunge re nasarani ani du nzunzu na ngbarago. Gu mokedi nangia Pauro, nga guko naundo badungu aboro Tesaronike yo tipa i da ni abawiriki asakipai tipa wai ko adu ki ya: “Gine tie nga gaani maabangirise, na ngbarago, na ũtaarimo? Nga kina roni, te? barangba gaani Gbia Yesu ho ko ka ye ni. Bambiko oni nga gaani taarimo na gaani ngbarago.” (1 Tesa. 2:19, 20; Amo. 17:1-4) Badungu aboro areme du na kina gu bangisa bipai re. Wirina sa du rimori nga Stéphanie gbiati kumbari, ima undo badungu aboro i zi bapatiza, ri aya, “Ngbarago ho kii kisusi gu nga ga undo aboro i kpara gayo raka fu Yekova te.”