1-2. Ika kụ idị ikpo onhụ phọ aZihova ogẹ bọ siphẹ Isaiah 65:16, 17 inyaamhị iyira okparạm?

“IYIRA KI/PHẸR!” kụ iḍighi bọ emhuoghaạph ookpomhoghan eephugh a2017 phọ ophạm bọ. Ookpomhoghan eephugh phọ uḍeenhaan iyira ipẹ yira kotue bọ okparạm mem iiḅaghamhị. Inya asiạ meten egbi k’amem mọ amuphẹ phọ, yira okiọm ni ghisigh rokparạm siẹn aḅirinhi phọ ophọn.

² Eeghe iiḅaghamhị kụ idị purukụ nạ asoman? Olọ eghunotu obobọ oyaghirị anạ kụ amhugh ḍughụm? Nạ asoman e/moon dị ketue ni esighẹ ghuḍum anạ ḍughụm? Aḍikpọ kụ reekpoḍị nyinhạ ḍughụm? Iigamaniạn, ikpuuroghọm, obobọ ekperenhom iiḅaghamhị eseereom kụ itir nyinhạ ḍughụm? Obobọ areezẹgh idiphọ aCOVID-19? P’eeghe idị yira ophogh rokiọm ghisigh mem dị oomo araraạr phọ iphẹn keḍighi raraạr dị meten—dị koo/tughiạn mun rootughiạn!—Bạl Isaiah 65:16, 17.

3. Ewạ moḍighi eeghe nyiidiphọ, kụ eeghe kụ iḍighi?

³ Aghuḍum akpạr ri siẹn aḅirinhi phọ, kụ eeni yira kosoman ni ipaanhaạn ghisigh dị ekpạr epu idị yira mosoman ghan. (Mat. 24:21) Esi iduọn phọ, eegholhaan ni mọ ewạ moghiọm ghisigh obughẹ okparạm mọ ayira. Eeghe kụ iḍighi? Loor esi dị aZizọs aḅẹm mọ: “Esi okparạm kụ edị nyina kemoọgh ghuḍum mọ anyina.” (Luk 21:19) Yira kotue ni okparạm eḍighi maạr dị yira ophogh aani ghan bunhọn dị osoman aani iniin phọ iiḅaghamhị phọ yira osoman bọ kụ rokparạm ni.

4. Uḍighi ika kụ yira koḅẹm bọ mọ aZihova kụ emạ eḍeenhaan okparạm?

⁴ Anhiạn kụ emạ eḍeenhaan okparạm? AZihova. Eḍighi ni iikia esi anạ ḍughụm? Etue ni eḍighi, kuolọ tuutughiạn aphogh. Eru phọ kụ ratooghị aḅirinhi phọ, kụ iiḅaghamhị phọ emuza bọ. Kụ obọ aZihova amoọgh ni iikpọ osiemhi eekunha  egina amem, kuolọ rakoriom ghan ḍio phọ aḍiphẹ odị mamaanhaạn bọ epẹ ghisigh. (Rom. 9:22) Enhaạn akiọm ghisigh akparạm rakori ghan mem mọ odị amaanhaạn bọ. Uguạ ooḅeghiọn esugha araraạr dị aZihova rakparạm.

5. Ika kụ idị ophuẹ bọ ḍien phọ Enhaạn, kụ nạ aloghoma ika ilọ iphẹn phọ?

⁵ Ipẹ moofolhomhi bọ ḍien phọ odị. AZihova apomoghiạn ḍien phọ odị, kụ rawạ mọ torobọ oye alhọgh eegu. (Isa. 42:8) Kuolọ esi odiiny oonịr asiạ, moofolhomhi ḍigey aḍien phọ odị. (Ps. 74:10, 18, 23) Iphẹn phọ imhiigh siphẹ oghoony phọ Iden, mem mọ Eru phọ (remạ ghan “Iḅoroghom”) agbạ bọ mọ Enhaạn amirighan Adạm r’Iv iyaạr dị kengọ bidị oḅaạl olhoghi. (Gen. 3:1-5) Egbi k’amem mọ amuphẹ phọ, mogbaaghị okpẹ mọ aZihova asophoghom omhạr awe iyaạr dị bidị okạr omhoghi. AZizọs amhoọgh ni ogbolhomaam ipẹ moofolhomhi bọ ḍien Odẹ phọ odị. Loor ephigh phọ ephẹn phọ, odị atughemhị ni butelhedom mọ odị mooḅereghị ghan mọ: “Odẹ phọ ayoor odi bọ k’akẹ phọ, eegu eroIonaạn ḍien phọ anạ!”—Mat. 6:9.

6. Uḍighi ika kụ aZihova awilhẹ bọ mọ amuboom amem eten ni kụ odị agbi omạ omiteom elhiom itooghị phọ odị?

⁶ Ibadị mogbagharạn elhiom itooghị phọ odị. AZihova kụ amhoọgh elhiom otooghị asikẹ phọ r’ade phọ, ḅilhẹ eten itooghị phọ odị kụ ikạr enhighẹ. (Ogan. 4:11) Kuolọ Eru phọ maakelheghi ruukpaạny r’awe bịn rootughiạn ghan mọ Enhaạn i/moọgh elhiom otooghị. Kesighẹ ni mem orue oolemhi oghaạph elhiom itooghị phọ aZihova ophọn phọ. R’osụ olhoghi, Enhaạn mangọ we muboom amem otooghị, omạ omiteom mọ itooghị omhạr awe ke/tue emoọgh ekol dị Olemiạ phọ u/lọgh ḍighaạgh. (Jer. 10:23) Kụ loor esi okparạm mọ Enhaạn, koselemhi ni iiḅaghamhị phọ iphẹn phọ mem bịn. AZihova kameremhị ni elhiom itooghị phọ odị mem mọ odị kamạ bọ amiteom mọ Itooghị phọ odị bịn kụ ketue eseere eephọ r’oghoph siẹn ade phọ.

7. Abuọ anhiạn kụ ugbagharạn aZihova, kụ odị kaḍighi ika bidị?

⁷ Iḅạph abuniin anmụny phọ odị. AZihova alhẹm ruukpaạny r’awe eten dị emhunhughan dị opiomạn u/tọl. Kuolọ aSetan (emhụ phọ pọ “Igbagharạn”) agbagharạn ni aZihova, aḅilhẹ aḍighi idị Adạm r’Iv omhunhughan bọ ogbagharạn aani Enhaạn. Abunhọn aruukpaạny r’awe uḍighan ni bịn ogbagharạn aani Enhaạn. (Jud 6) Onyebel roten, abuniin abuọ eelhe phọ Izrạl, awe phọ Enhaạn asaḅạr bọ, ughel aani ni nyodị bịn omhiigh ooseeny arumhụgh okpẹ. (Isa. 63:8, 10) AZihova alhoghoma ni mabi. Kuolọ, odị makparạm ni, kụ kakiọm ni ghisigh akparạm tutụ eteẹny mem osiemhi eekunha buọ iḅạph phọ. Kụ abuẹn oḍighan bọ nyodị rokparạm siẹn okarạph aḅirinhi phọ ophọn phọ komoọgh ni eereẹgh!

8-9. Eeghe okpẹ kụ idị mogbaaghiọm aZihova, kụ yira koḍighi ika ilọ iphẹn phọ?

⁸ Okpẹ kirokirọ phọ Eru. ASetan aḅẹm mọ aJob ebenhẹ phọ aZihova ḍikpalạm u/moọgh bọ, ḅilhẹ r’oomo arebenhẹ phọ aZihova okpẹ bọ oḍuomolhoghi phọ otuạn ni iyaạr kụ rokumu bọ aZihova. (Job 1:8-11; 2:3-5) Eru phọ akiọm ni ghisigh ragbaaghiọm okpẹ rebenhẹ phọ Enhaạn k’arodon. (Ogan. 12:10) Oḍighi oomo ipẹ yira kotue bọ omạ omiteom mọ aSetan ogbaạm okpẹ esi okparạm atorobọ imhinhimhiịn lọ yira osoman r’oḅạr aZihova loor ephomhoghiạn phọ yira omhoọgh bọ oghị esi Odị. Idiphọ osẹph bọ Job, kụ idị kusẹph aani iyira loor okparạm mọ ayira.—Jems. 5:11.

⁹ ASetan rasighẹ ghan buḍiemhiom aruukụ iiḅereghị okpẹ kụ aḍighinhom oḅẹm mọ  aZihova agbagarạ oye, ḅilhẹ mọ odị kụ rakọm bọ imhinhimhiịn omhạr awe. Buniin roḅẹm ghan kẹn mọ mem dị obumoọny amhugh mọ Enhaạn kụ isighẹ rekị oḍighinhom ookpaạny epẹ k’akẹ. P’eeghe ophuẹ aḍien! Yira olegheri ni igey phọ. Mem dị yira omheelhom e/moon obobọ oye umhughanhaan iyira, yira ro/kpalạm ghan Enhaạn. Ḍieriphọ aḍighaạgh phọ, yira omoọgh omheeraam mọ ḍiniin aḍio odị kaalemhi ni raraạr. Yira otue ni oḅenhị torobọ oye dị kameera ni anaghạn mọ aZihova Enhaạn ephomhoghiạn. Iphẹn phọ kemiteom ni ogey ophagharanhaạn engọ opọ ranmoghoghoọm bọ aZihova.—Prov. 27:11.

10. APsalm 22:23, 24 agananamhi eeghe ilọ aZihova?

¹⁰ Imhinhimhiịn abuuḅi arebenhẹ phọ odị. AZihova aḍighi Enhaạn igbiririph. Re/ḅeraạn ghan nyodị mem dị yira romoghi loor imhinhimhiịn phọ yira osoman bọ—mughumọ igbiphoghọm, e/moon, obobọ e/munughan ayira. (Bạl Psalm 22:23, 24.) AZihova anaghanhạn ni ipẹ riphin bọ iyira; kụ rawạ ni osiemhi eekunha, kụ kasiemhi ni. (Poghom Exodus 3:7, 8; Isaiah 63:9.) Aḍio retu ni dị ‘odị kagbuurogh oomo izin riḍien [ayira]. Aḍuugh r’amukum ologhi r’emoghi r’eephina ke/tọl mun.’—Ogan. 21:4.

11. Uḍighi ika kụ inyaam arebenhẹ phọ aZihova abuphẹ oḅạr bọ nyodị resiph bọ nyodị?

¹¹ Inyaam arighirị odị dị momhuughu. AZihova aloghoma ika ilọ alhephiri r’anmariịr phọ abuphẹ okpẹ bọ oḍuomolhoghi phọ kụ momhuughu bọ? Odị akạr kụ rawạ oḅilhẹ omhiịn abidị! (Job 14:15) Nạ alegheri ni idị inyaam Ebraham resiph aZihova? (Jems. 2:23) Obobọ aMozis, opọ r’odị “oosomanan ghan bọ kụ oghaaphạn”? (Ex. 33:11) Ḅilhẹ p’eeghe idị odị ragon onhaghạn dị aDevid r’abueriphọ abukọ suọr phọ romoọr imạ asuọr iiseeny phọ abidị! (Ps. 104:33) Ii, arighirị phọ aZihova  abuẹn phọ ronaanị ralạ aḍuugh, kuolọ odị o/wulha bidị. (Isa. 49:15) Odị aatughiạn ni oomo ilọ abidị. ABaibul aḅẹm mọ, “Oomo phọ abidị odi ni ropooghu esi Enaạn.” (Luk 20:38.) Ḍiniin aḍio, odị kaḅerion ni bidị, aḅilhẹ anaghạn iiḅereghị abidị ḅilhẹ asighẹ iiseeny phọ abidị. Eḍighi maạr dị oye mamhughanhaan nyinhạ, pọ iphẹn phọ ephoomhị eḅilhẹ eedereghị nyinhạ.

12. Eeghe kụ ikạr reeḅaghamhị aZihova siẹn ikarạph asiḍio eekunha phọ?

¹² Ipẹ abukarạph phọ romiinẹ bọ buphẹ u/piọm bọ. Mem mọ iḅạph phọ emhiigh bọ siphẹ Iden, aZihova alhegheri ni mọ asidọl phọ keloghorị ni kụ egbi oḅilhẹ onhighẹ. AZihova akel li sipioghọm mọ, ekeeny iiruẹn phọ, ḅilhẹ r’igamaniạn phọ edi bọ siẹn aḅirinhi phọ rodon. Odị raseenyạn ghan ni buphẹ odugh bọ—buphẹ ko/tue bọ okoph siloor abidị, idiphọ abunyigọ anmụny phọ r’ikpukele anmariịr phọ. (Zech. 7:9, 10) Reeḅaghamhị ghan ni aZihova iboom mem dị amhiịn dị rogbiphoghọm ḅilhẹ olhọgh ikoli rebenhẹ phọ odị okpẹ bọ oḍuomolhoghi. Kuphom ni owol mọ odị apomoghiạn ni oomo phọ anyinha eḍighan bọ nyodị rekparạm.

13. Ika kụ idị omhạr awe robeeph ghan bịn kolhoghorị ghisigh Enhaạn, kụ odị kaḍighi ika?

¹³ Adọl ipesi phọ omhạr awe. Eḅeraạn Setan oḍighi idị awe phọ olhẹm bọ oghighemhị Enhaạn kobeeph ghan bịn ologhorị. Mem dị Enhaạn “emhiịn bọ idị asipioghọm awe melheeny” bọ mem mọ aNoa, “iiḅaghamhị ni aZihova ipẹ eḍighi bọ kụ odị alhẹm bọ we aseere siẹn ade phọ, kụ eeḅaghamhị nyodị iboom.” (Gen. 6:5, 6, igẹ dị edi ude, 11) Kụ asidọl phọ remalaạm ni ḍughụm? Eeye! P’eeghe idị eḅeraạn Eru phọ omhiịn dị odọ kirokirọ ipesi meepaany, eḅaramaạm orolạn esi alhephiri r’alhephiri ḅilhẹ r’anmariịr r’anmariịr! (Efẹ. 4:18, 19) Reḅaạl ghan olhoghi aSetan agey mem dị odị arue aḍighi idị abuẹn rooseeny bọ aZihova oḍighi igbogh ikarạph. Mem dị okparạm mọ aZihova asi eekunha, odị kaḍeenhaan ni mọ odị akel li ipesi.

14. Ika kụ idị awe roḍighi olhẹm mọ Enhaạn siẹn ade phọ?

¹⁴ Ophiemhi olhẹm mọ odị. Abuphẹ omhoọgh bọ iikpọ phọ ro/miinẹ ghan bueriphọ awe phọ bịn, kuolọ oḅilhẹ ropiemhiom de phọ r’olhẹm inhạm mọ aZihova aḅọgh bọ angọ oye. (Eccl. 8:9; Gen. 1:28) Buniin abuọ asayẹns oḅẹm mọ iḍighinhom araraạr awe keḍighi ni idị oniin erubal odọ kirokirọ olhẹm mọ kepe bịn esi iphurukpu asiạ ghisigh. Iikia i/lo ibadị rooḅaghamhiạn bọ loor ilọ olhẹm mọ! Edụgh agey olhegheri mọ aZihova maguanhaan ophiemhi abuphẹ “ropiemi bọ aḅirini phọ” r’oḅilhẹ oḍighi oomo ade phọ paradaịs.—Ogan. 11:18; Isa. 35:1.

15-16. Eeghe kụ kinyu iyira okparạm aani idiphọ aZihova? Gbạ.

¹⁵ Tuutughiạn ilọ iiḅaghamhị kirokirọ phọ Odẹ k’akẹ phọ ayira rakparạm bọ esi asimuonịr asiạ phọ iphẹn phọ. (Miịn igbe phọ “ Araraạr Phọ AZihova Rakparaghạm Bọ.”) AZihova katue ni asiemhi eekunha aḅirinhi phọ ophọn pho torobọ amem. Kuolọ okparạm mọ odị mulhoghonhaạn ni iyira ḍighaạgh agey! Yira komaaniọm iduọn: Oḅẹm mọ olom r’anhịr dị anhịr phọ odi r’okuruḅakạ, kụ oḅenhị mọ obumoọny phọ kaarurughiạn ni, m’eeni kẹn kamugh eghoroghọr. Kụ ghalhamọ r’iduọn kesighẹ bọ ni iboom inyaạm r’amaliom, ilhoghi abidị reḅaạl ghan ni mem dị omhạr obumoọny phọ. Ephomhoghiạn phọ bidị omhoọgh bọ oghị esi obumoọny phọ renyu ghan bidị okparạm oḍighi oomo ipẹ bidị kotue bọ omhaạr ophạm odị.

 ¹⁶ Iniin phọ kẹn ni, omarạm e/munughan oomo eemharạ eemharạ phọ Adạm r’Iv. Ghalhamọ r’iduọn phọ ni, aZihova apomoghiạn ni aḅilhẹ rapogh ghan bidị. (1 Jọn 4:19) Odị apu ni odẹ phọ r’onhiin phọ oghaạph bọ oghol siphẹ oghaạph omaaniọm mọ, aZihova katue ni asiemhi eekunha imhinhimhiịn phọ ayira. Odị mamạ ni ḍio dị odị kasiemhi eekunha oomo iiḅaghamhị omhạr awe. (Mat. 24:36) Ephomhoghiạn phọ aZihova iyira i/nyu oḍighan aani odị okparạm tutụ eteẹny mem dị mekasiạn ḍughụm?

17. Ika kụ idị ipẹ oghaạph bọ ilọ aZizọs siphẹ Hibru 12:2, 3 inyaamhị iyira oghiọm aghisigh okparạm?

¹⁷ AZihova kụ eḍeenhaan ogey okparạm. AZizọs atuughaạny ni okparạm mọ Odẹ phọ odị. Mem mọ odị arọl bọ siẹn ade phọ, aZizọs aghol emhụ ayira akparạm itonyonhaan, umugholoor, r’oreeny imhinhimhiịn. (Bạl Hibru 12:2, 3.) Iikia i/lo, eḍeenhaan okparạm mọ aZihova kụ ingọ bọ Zizọs inyaạm okparạm. Kụ kikparamhị aani ni iyira.

18. Ika kụ idị 2 Pita 3:9 ilhoghonhaạn iyira ḍighaạgh onhaghanhạn iyaạr phọ okparạm mọ aZihova raḍighi bọ?

¹⁸ Bạl 2 Pita 3:9. AZihova kụ alhegheri mem dị ekạr ekasiạn ophiemhi okarạph aḅirinhi phọ ophọn. Okparạm mọ odị mangọ eepoogh ookpomhoghi aḍigbogh aḍita phọ omhạn bọ ni irubal, kụ rooseeny bọ koḅilhẹ oboom nyodị. Oomo phọ abidị omoọgh ni oḅaạl olhoghi iduọn aZihova akparạm bọ tutụ omharaghị aani bidị, ḅilhẹ bidị momhoọgh bọ eepoogh otuughạ ilọ ophomhoghiạn odị r’oḅọgh aloor ongọ odị. Osụ olhoghi phọ odi bọ esi okparạm mọ aZihova kakuamhị aganana mem dị odị kaanmo bọ ruunmo irubal abuẹn okparạm bọ tutụ k’eekunha phọ!

19. Yira osopha oḍighi eeghe, kụ eeghe kụ iikpiạ ayira?

¹⁹ Yira motuughạ esi aZihova ilọ okparạm ghan r’ibo. Etigheri oomo ariiphinha r’imhinhimhiịn phọ aSetan makọm bọ, aZihova aḍighi ni “Enaạn [oḅaạl olhoghi].” (1 Tim. 1:11) Yira phọ kẹn kotue ni opamanhạm ibo iduọn yira rokori bọ mem dị aZihova kaḅaalhamhị ḍien phọ odị, ameremhị elhiom itooghị phọ odị, asiemhi eekunha ikarạph ḅilhẹ r’iiḅaghamhị aḅirinhi phọ. Esi iduọn phọ, osopha okparạm oḅilhẹ omhoọgh iidereghị esi olhegheri mọ Odẹ k’akẹ phọ ayira rakparạm aani ni. Yira oḍighi iduọn phọ, ikpo onhụ phọ iphẹn kemunughan ni esi atorobọ onyọ ayira: “Ibo k’Enaạn edianaan ni oye lọ amerenyạn iiḅaghamị; kozu ni nyodị eghoony aghuḍum mọ epẹ Enaạn eguanaan bọ buphẹ ophomoghiạn bọ nyodị.”—Jems. 1:12.