1-2. Mɛni blɔ nɔ nɛ Yehowa munyu nɛ ngɛ Yesaya 65:16, 17 ɔ woɔ wɔ he wami nɛ wa yaa nɔ nɛ wa fĩɔ si?

JEHA 2017 kpokpa nɔ kpe ɔ munyuyi nɛ ji “O Kɔni Mi Nɛ Ko Jɔ̃!” ɔ woɔ nɔ bua wawɛɛ. Kpe nɛ ɔ ye bua wɔ nɛ wa na bɔ nɛ wa ma fĩ si ha ngɛ nyagbahi a mi. Jeha eywiɛ ji nɛ ɔ nɛ wa pee kpe nɛ ɔ, se loloolo ɔ, wa ngɛ si fĩe ngɛ níhi a blɔ nya tomi yaya nɛ ɔ mi.

² Mɛni nyagba nɛ o kɛ kpe lingmi nɛ ɔ? Anɛ o weku no ko aloo o huɛ ko nɛ o suɔ lɛ gbo lo? Hiɔ ko nɛ nya wa ngɛ o nya gbae lo? Bwɔmi ha nɛ o ngɛ nɔ́ nae lo? Adebɔ mi oslaa, basabasa peemi loo yi mi wami ha nɛ o ngɛ nɔ́ nae lo? Aloo hiɔ ko kaa COVID-19 nɛ gbɛ kɛ fĩa je ɔ mi ɔ ha nɛ o ngɛ dengme gboe lo? Wa ngɛ be nɛ nyagba nɛ ɔmɛ tsuo a se maa po nɛ wa hɛ maa je a nɔ ɔ blɔ hyɛe wawɛɛ!​—Kane Yesaya 65:16, 17.

3. Mɛni e sa nɛ waa pee amlɔ nɛ ɔ, nɛ mɛni he je?

³ Si himi ngɛ Satan je nɛ ɔ mi ɔ mi wa wawɛɛ, nɛ eko ɔ, waa kɛ si himi nɛ mi wa wawɛɛ po pe jã maa kpe hwɔɔ se. (Mat. 24:21) Ngɛ anɔkuale mi ɔ, e sa nɛ waa ya nɔ nɛ waa kase bɔ nɛ a fĩɔ si wawɛɛ ha. Mɛni he je? Ejakaa Yesu de ke: “Ke nyɛ fĩ si ɔ, nyɛ maa baa nyɛ wami yi.” (Luka 21:19) Wa nyɛmimɛ fuu kɛ nyagbahi nɛ waa kɛ ngɛ kpee ɔ ekomɛ ngɛ kpee. Ke wa susu bɔ nɛ a ngɛ si fĩe ha a he ɔ, e maa ye bua wɔ nɛ wa fĩ si.

4. Mɛni he je nɛ wa ma nyɛ ma de ke Yehowa ji nɔ nɛ pee si fimi he nɔ hyɛmi nɔ́ nɛ pe kulaa a?

⁴ Mɛnɔ nɛ e pee si fimi he nɔ hyɛmi nɔ́ pe kulaa? Yehowa Mawu. Eko ɔ, heto nɛ ɔ maa pee mo nyakpɛ. Se ke o susu he bɔɔ ɔ, e be mo nyakpɛ pee. Abosiami ji nɔ nɛ ngɛ níhi kudɔe ngɛ je nɛ nyagba hyi lɛ tɔ nɛ ɔ mi. Yehowa ngɛ he wami nɛ e kɛ ma kpata Satan je yaya nɛ ɔ hɛ mi amlɔ nɛ ɔ, se e pee we jã. E ngɛ mlɛe kɛ ya si be nɛ e to ɔ. (Rom. 9:22) Se loko jamɛ a  be ɔ maa su ɔ, wa Mawu ɔ maa ya nɔ ma fĩ si. Nyɛ ha nɛ wa susu si fɔfɔɛ kakaaka nɛɛ nɛ Yehowa ngɛ si fĩe ngɛ mi ɔ a he.

5. Mɛni blɔ nɔ nɛ a gbe Mawu biɛ ɔ he guɛ, nɛ kɛ lɔ ɔ haa nɛ o nuɔ he ha kɛɛ?

⁵ A gbe e biɛ ɔ he guɛ. Yehowa suɔ e biɛ ɔ, nɛ e suɔ nɛ nɔ fɛɛ nɔ nɛ ná bu kɛ ha e biɛ ɔ. (Yes. 42:8) Se jeha akpe ekpa ji nɛ ɔ nɛ a gbe e biɛ kpakpa a he guɛ. (La 74:10, 18, 23) Enɛ ɔ je sisi ngɛ Eden abɔɔ ɔ mi benɛ Abosiami (nɛ e sisi ji “Nɔ He Guɛ Gbelɔ”) tsɔɔ kaa Mawu ngɔ nɔ́ kpakpa ko nɛ ma ha Adam kɛ Hawa bua jɔmi ɔ kɛ laa mɛ ɔ. (1 Mose 3:1-5) Kɛ je lɔ ɔ se kɛ ma a, a po Yehowa nya kaa e ngɔ níhi nɛ adesahi hia nitsɛnitsɛ ɔ kɛ laa mɛ. Yesu hao ngɛ bɔ nɛ a ngɛ e Tsɛ ɔ biɛ ɔ he guɛ gbee ha a he. Enɛ ɔ he ɔ, e tsɔɔ e kaseli ɔmɛ kaa a sɔle ke: “Wa Tsɛ nɛ o ngɛ hiɔwe, ha nɛ o biɛ ɔ he nɛ tsɔ.”​—Mat. 6:9.

6. Mɛni he je nɛ Yehowa ngmɛ blɔ nɛ jehahi fuu be konɛ e kɛ ha nɛ nihi nɛ a le kaa lɛ ji nɔ nɛ ngɛ he blɔ kaa e yeɔ hiɔwe kɛ zugba a tsuo nɔ ɔ?

⁶ A te si kɛ wo he blɔ nɛ Mawu ngɛ kaa je ɔ tsuo Nɔ Yelɔ ɔ. Yehowa ji nɔ nɛ ngɛ he blɔ kaa e yeɔ hiɔwe kɛ zugba a tsuo nɔ, nɛ blɔ nɔ nɛ e guɔ kɛ yeɔ nɔ ɔ ji blɔ nɛ hi pe kulaa. (Kpoj. 4:11) Se Abosiami bɔ mɔde kaa e maa sisi hiɔwe bɔfohi kɛ adesahi nɛ a susu kaa Mawu be he blɔ kaa e yeɔ nɔ. E ma he be loko nihi maa na kaa Yehowa ji nɔ nɛ e ngɛ he blɔ kaa e yeɔ je ɔ tsuo nɔ, nɛ e ji nɔ yelɔ nɛ se be. Enɛ ɔ he ɔ, nile ngɛ mi kaa Mawu ngmɛ blɔ be gagaa konɛ adesahi nɛ a na kaa ke mɛ nitsɛmɛ a ye a he nɔ nɛ a bui Bɔlɔ ɔ tue ɔ, a be manye yee. (Yer. 10:23) Akɛnɛ Mawu to e tsui si he je ɔ, amlɔ nɛ ɔ, nɔ ko be nyɛe maa je he atsinyɛ kaa Mawu ji nɔ nɛ ngɛ he blɔ kaa e yeɔ je ɔ tsuo nɔ. Nihi tsuo ma ba le kaa blɔ nɔ nɛ Yehowa guɔ kɛ yeɔ nɔ ɔ ji blɔ nɛ hi pe kulaa. Nɛ e Matsɛ Yemi ɔ pɛ nɛ ma ha nɛ adesahi nɛ a ná tue mi jɔmi nitsɛnitsɛ nɛ a hi si slɔkee ngɛ zugba a nɔ.

7. Mɛnɔmɛ nɛ a te si kɛ wo Yehowa, nɛ mɛni e maa pee mɛ?

⁷ E bimɛ ɔmɛ ekomɛ tsɔ atua kɛ si lɛ. Yehowa bɔ bɔfo ɔmɛ, kɛ Adam kɛ Hawa kaa nihi nɛ a ye mluku, nɛ́ kpa ko kulaa be a he. Se Satan (nɛ e sisi ji “Nɔ Nɛ E Teɔ Si Kɛ Woɔ Nɔ”) nɛ e ji Mawu bi ɔ sisi Adam kɛ Hawa nɛ a te si kɛ wo Yehowa. Lɔ ɔ se ɔ, bɔfo komɛ kɛ adesa komɛ hu tsɔ atua. (Jud 6) Pee se ɔ, Israel bi nɛ a ji ma nɛ Mawu hla mɛ ɔ hu kua lɛ, nɛ a ya ja lakpa mawuhi. (Yes. 63:8, 10) Enɛ ɔ dɔ Yehowa wawɛɛ. Se e fĩ si, nɛ e maa ya nɔ ma fĩ si kɛ ya si be nɛ e ma kpata atua tsɔli tsuo a hɛ mi. Enɛ ɔ ma ha nɛ Yehowa, kɛ e sɔmɔli anɔkualetsɛmɛ nɛ mɛ hu a ngɛ si fĩe ngɛ níhi a blɔ nya tomi yaya nɛ ɔ mi ɔ hu a he maa jɔ mɛ!

8-9. Mɛni lakpa munyuhi nɛ a ngɛ tue ngɛ Yehowa he, nɛ mɛni wa ma nyɛ maa pee ngɛ he?

⁸ Lakpa munyuhi nɛ Abosiami tu. Satan po Yehowa sɔmɔlɔ anɔkualetsɛ Hiob, kɛ Yehowa sɔmɔli anɔkualetsɛmɛ kpahi a nya kaa ní kpakpahi nɛ a náa ngɛ Yehowa ngɔ ɔ he je nɛ a jaa lɛ. (Hiob 1:8-11; 2:3-5) Abosiami ya nɔ nɛ e po adesahi a nya kɛ ba si mwɔnɛ ɔ. (Kpoj. 12:10) Ke suɔmi nɛ wa ngɛ kɛ ha Yehowa a haa nɛ wa yaa nɔ nɛ wa fĩɔ si ngɛ kahi a mi ɔ, lɔ ɔ ma ha nɛ waa ye bua kɛ bu Satan lakpatsɛ. Ke wa ya nɔ nɛ wa fĩ si ɔ, Yehowa maa jɔɔ wɔ kaa bɔ nɛ e jɔɔ Hiob ɔ.​—Yak. 5:11.

⁹ Satan gu jami hɛ mi nyɛɛli nɛ a yi anɔkuale ɔ a nɔ kɛ tsɔɔ kaa Yehowa yi mi wa, nɛ lɛ nɛ e ha nɛ adesahi ngɛ nɔ́ nae. A ti ni komɛ po deɔ kaa ke jokuɛwi gbo ɔ, Mawu lɛ ngɔ mɛ kɛ ya hiɔwe akɛnɛ e hia bɔfohi fuu ngɛ hiɔwe ɔ he je. Enɛ ɔ gbeɔ Mawu he guɛ wawɛɛ! Se wɔɔ lɛɛ wa le kaa Yehowa ji Tsɛ nɛ ngɛ suɔmi. Ke hiɔ nɛ nya wa nu wɔ, aloo wa suɔlɔ ko gbo ɔ,  wa pia we Mawu kɔkɔɔkɔ. Wa ngɛ hemi kɛ yemi kaa e maa po hiɔ se, nɛ e ma tle wa suɔli nɛ a gbo ɔ si kɛ ba wami mi hwɔɔ se. Wa ma nyɛ ma de nihi nɛ a suɔ nɛ a bu wɔ tue ɔ kaa Yehowa ji Mawu nɛ ngɛ suɔmi. Enɛ ɔ ma ha nɛ Yehowa ma ná heto kpakpa kɛ ha nɔ nɛ ngɛ lɛ ahlua bɔe ɔ.​—Abɛ 27:11.

10. Mɛni nɛ La 22:23, 24 ɔ haa nɛ wa leɔ ngɛ Yehowa he?

¹⁰ E sɔmɔli anɔkualetsɛmɛ nɛ e suɔ mɛ ɔ ngɛ nɔ́ nae. Yehowa ji Mawu nɛ e mi mi sãa lɛ. Ke yi mi wami, hiɔ aloo mluku nɛ wa yi ɔ ha nɛ wa ngɛ nɔ́ nae ɔ, e dɔɔ lɛ wawɛɛ. (Kane La 22:23, 24.) Yehowa le bɔ nɛ wa ngɛ nɔ́ nae ha; e suɔ nɛ e po wa nɔ́ nami ɔ se, nɛ e maa po se hulɔ. (Kɛ to 2 Mose 3:7, 8 kɛ Yesaya 63:9 ɔ he.) Be ma nɛ “e ma tsu vo nyu fɛɛ vo nyu ngɛ [wa] hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu.”​—Kpoj. 21:4.

11. Kɛ Yehowa nuɔ he ha kɛɛ ngɛ e sɔmɔli anɔkualetsɛmɛ nɛ a gbo ɔ a he?

¹¹ E huɛmɛ nɛ gbenɔ je mɛ kɛ je e he. Kɛ Yehowa nuɔ he ha kɛɛ ngɛ e sɔmɔli anɔkualetsɛmɛ nɛ a gbo ɔ a he? E hɛ ngɛ jae ngɛ a he, nɛ e suɔ nɛ e na mɛ ekohu! (Hiob 14:15) Poo he foni nɛ o hyɛ bɔ nɛ Yehowa hɛ ngɛ jae ngɛ e huɛ Abraham he ha! (Yak. 2:23) Aloo moo hyɛ bɔ nɛ e ngɛ hlae nɛ e kɛ Mose, nɔ nɛ e kɛ lɛ “tu munyu hɛ mi kɛ hɛ mi” ɔ nɛ tu munyu ekohu ha! (2 Mose 33:11) Aloo moo hyɛ bɔ nɛ e ngɛ hlae nɛ e nu David kɛ la poli kpahi a yi jemi la ngɔngɔɛ ɔmɛ ekohu ha! (La 104:33) E ngɛ mi kaa Mawu huɛmɛ nɛ ɔmɛ nɔ gbenɔ mahe mi mohu lɛɛ, se Yehowa hɛ ji a nɔ. (Yes. 49:15) E kaiɔ bɔ nɛ a ngɛ ha a pɛpɛɛpɛ. Ngɛ Mawu “hɛ mi ɔ, mɛ tsuo a hɛ ngɛ.” (Luka 20:38) E ma tle mɛ si kɛ ba wami mi ligbi ko, e maa bu sɔlemi nɛ a maa je a tsui mi kɛ sɔle ɔ tue, nɛ e maa kplɛɛ a jami nɔ́ ekohu. Ke o suɔlɔ ko gbo ɔ, mo ha nɛ munyu nɛ ɔmɛ nɛ a wo o bua.

12. Mɛni lɛ haa nɛ Yehowa haoɔ wawɛɛ ngɛ nyagbe ligbi nɛ ɔmɛ a mi?

 ¹² Yi mi wami nɛ yiwutsotsɛmɛ kɛ baa adesa kpahi a nɔ. Benɛ a tsɔ atua ngɛ Eden abɔɔ ɔ mi ɔ, Yehowa le kaa níhi ma ba puɛ kulaa loko a ma ba hi ekohu. Yehowa hiɔ yi wu tso ní peepee, dami sane nɛ a yi, kɛ basabasa peemi nɛ yaa nɔ ngɛ je ɔ mi mwɔnɛ ɔ. E mi mi sãa lɛ ngɛ nihi nɛ a gbɔjɔ, nihi nɛ a be nyɛe ma fã a he, awusahi, kɛ yalɔyihi a he wawɛɛ. (Zak. 7:9, 10) Yehowa haoɔ wawɛɛ, titli ɔ, ke e na nɛ a wo e sɔmɔli anɔkualetsɛmɛ tsu nɛ a ngɛ mɛ yi mi wae ɔ. Nyɛ nihi tsuo nɛ nyɛ piɛɛ Yehowa he kɛ ngɛ si fĩe ɔ, nyɛ ná nɔ mi mami kaa e suɔ nyɛ.

13. Mɛni zo ní peepeehi nɛ Yehowa naa nɛ adesahi kɛ a he woɔ mi, nɛ mɛni e maa pee ngɛ he?

¹³ Adesahi kɛ a he woɔ ajuama bɔmi mi wawɛɛ. Mawu bɔ adesahi ngɛ e subai nɔ, se Satan suɔ nɛ e ha nɛ a pee yi wu tso ní. Ngɛ Noa be ɔ mi ɔ, Mawu na kaa “nimli a yi mi wa” a, “e dɔ lɛ nɛ e pia e he kaa e bɔ nɔmlɔ nɛ e kɛ lɛ wo je ɔ mi.” (1 Mose 6:5, 6, 11) Kɛ je jamɛ a be ɔ mi kɛ ma a nɛ ɔ, anɛ níhi tsake lo? Dɛbi kulaa! Ke nihi kɛ a he wo ajuama bɔmi ní peepee slɔɔto ɔmɛ a mi ɔ, Satan bua jɔɔ wawɛɛ. Ní peepee nɛ ɔmɛ ekomɛ ji, nyumu kɛ yo nɛ a sɛ we gba si himi mi nɛ a náa bɔmi, kɛ nyumu kɛ nyumu loo yo kɛ yo a bɔmi nami! (Efe. 4:18, 19) Satan bua jɔɔ wawɛɛ ke e na nɛ nihi nɛ a sɔmɔɔ Yehowa a kɛ a he wo ní peepee nɛ ɔmɛ a mi. Ke Yehowa tsui si tomi ɔ ba nyagbe ɔ, e ma kpata nihi tsuo nɛ a kɛ a he woɔ ajuama bɔmi ní peepeehi a mi ɔ a hɛ mi kɛ tsɔɔ kaa e hiɔ ní peepee nɛ ɔmɛ.

14. Mɛni nɛ adesahi ngɛ zugba a kɛ lohwehi pee?

¹⁴ Adesahi ngɛ zugba a puɛe. Pi he blɔhi nɛ adesahi ngɛ ɔ pɛ nɛ a kɛ “yeɔ a nyɛmimɛ awi.” A nyɛ we nɛ a hyɛ zugba a kɛ lohwehi nɛ Yehowa tu kɛ wo a dɛ ɔ a nɔ saminya. (Fiɛlɔ 8:9; 1 Mose 1:28) Je mi si kpali komɛ tsɔɔ kaa níhi nɛ adesahi peeɔ ɔ ma nyɛ ma ha nɛ lohwehi kɛ tso slɔɔtohi ayɔ kake ma gbo ngɛ jeha bɔɔ komɛ a mi. Enɛ ɔ he je nɛ ni komɛ deɔ ke adebɔ níhi ngɛ oslaa mi ɔ nɛ! Wa bua jɔ kaa Yehowa wo si kaa e “ma kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi,” konɛ zugba a nɛ pee paradeiso ekohu.​—Kpoj. 11:18; Yes. 35:1.

15-16. Mɛni nɛ e sa nɛ e wo wɔ he wami nɛ waa ya nɔ nɛ wa fĩ si kaa Yehowa? Mo ha enɛ ɔ he nɔ́ he tomi nɔ́.

¹⁵ Mo susu nyagbahi nɛ wa hiɔwe Tsɛ ɔ ngɛ si fĩe ngɛ mi jeha akpehi abɔ ji nɛ ɔ he nɛ o hyɛ. (Hyɛ daka nɛ ji “ Si Fɔfɔɛhi A Mi Nɛ Yehowa Ngɛ Si Fĩe Ngɛ.”) Yehowa ma nyɛ ma kpata Satan je ɔ hɛ mi be fɛɛ be nɛ e suɔ. Se e pee we jã, mohu ɔ, e to e tsui si, nɛ e tsui si tomi ɔ ba pee jɔɔmi kɛ ha wɔ! Mo susu he nɛ o hyɛ. Ngɔɔ lɛ kaa dɔkita ko de nyumu ko kɛ e yo kaa a bi nɛ a ma fɔ ɔ ma ná nɔmlɔ tso mi nyagba, nɛ jokuɛ ɔ maa na nɔ́ wawɛɛ, nɛ e se hu be kɛe ngɛ je mi. E ngɛ mi kaa e he maa wa kɛ ha fɔli ɔmɛ mohu lɛɛ, se a bua maa jɔ ke a fɔ jokuɛ ɔ. Akɛnɛ a suɔ jokuɛ ɔ he je ɔ, a ma fĩ si, nɛ a maa pee nɔ́ fɛɛ nɔ́ nɛ a ma nyɛ konɛ a hyɛ jokuɛ ɔ nɔ saminya.

¹⁶ Jã kɛ̃ nɛ Adam kɛ Hawa a bimɛ nɛ a fɔ ngɛ je nɛ ɔ mi ɔ ba pee nihi nɛ a yi mluku. Se loloolo ɔ, Yehowa suɔ mɛ, nɛ e susuɔ a he. (1 Yoh. 4:19) Fɔli nɛ wa tu a he munyu ngɛ nɔ́ he tomi nɔ́ ɔ mi ɔ be nyɛe maa pee si fɔfɔɛ ɔ he nɔ́ ko, se Yehowa lɛɛ e ma nyɛ maa po nɔ́ nami se. E to be nɛ e kɛ maa po nɔ́ nami tsuo se. (Mat. 24:36) Anɛ e sɛ nɛ suɔmi nɛ Yehowa ngɛ kɛ ha wɔ ɔ nɛ wo wɔ he wami nɛ wɔ hu wa fĩ si kɛ ya si jamɛ a be ɔ lo?

17. Kɛ munyu nɛ ngɛ Hebri Bi 12:2, 3 ɔ woɔ wɔ he wami konɛ wa fĩ si ha kɛɛ?

¹⁷ Yehowa pee si fimi he nɔ hyɛmi nɔ́ nɛ pe  kulaa. Yesu hu kase e Tsɛ ɔ si fimi ɔ. Benɛ Yesu ngɛ zugba a nɔ ɔ, nihi jɛ lɛ, a pee lɛ nisɛ ní, nɛ a gbe lɛ ngɛ sɛumi tso nɔ ngɛ wa he. Se Yesu fĩ si ngɛ si fɔfɔɛ nɛ ɔmɛ a mi. (Kane Hebri Bi 12:2, 3.) E ngɛ heii kaa Yehowa si fimi ɔ lɛ wo Yesu he wami nɛ e nyɛ nɛ e fĩ si ɔ nɛ. Yehowa si fimi ɔ ma nyɛ maa wo wɔ he wami hulɔ.

18. Kɛ 2 Petro 3:9 ɔ yeɔ bua wɔ ha kɛɛ nɛ wa naa nɔ́ nɛ ngɛ Yehowa tsui si tomi ɔ mi jee kɛ ngɛ bae?

¹⁸ Kane 2 Petro 3:9. Yehowa le be nɛ sa nɛ e kɛ ma kpata je yaya nɛ ɔ hɛ mi. Yehowa tsui si tomi ɔ ha nɛ nihi ba le lɛ. Nɛ amlɔ nɛ ɔ, nihi ayɔhi abɔ nɛ a ji asafo kuu ngua a ba ngɛ lɛ sɔmɔe. Mɛ tsuo a bua jɔ kaa Yehowa ngɛ si fĩe kɛ ba si mwɔnɛ ɔ, nɛ lɔ ɔ ha nɛ a ba fɔ mɛ, nɛ a ba ná suɔmi kɛ ha lɛ, nɛ a jɔɔ a he nɔ kɛ ha lɛ. Ke nihi ayɔhi abɔ fĩ si kɛ ya si nyagbe ɔ, e ma ha waa na kaa Yehowa mwɔ yi mi kpɔ nɛ da kaa e fĩ si nɛ e to e tsui si!

19. Mɛni nɛ e sa nɛ waa fia wa pɛɛ si kaa wa maa pee, nɛ mɛni jɔɔmi nɛ wa ma ná?

¹⁹ Wa kase kaa e sa nɛ waa kɛ bua jɔmi nɛ fĩ si kaa Yehowa. E ngɛ mi kaa Satan ní peepee ngɔ tsui yemi kɛ nɔ́ nami kɛ ba mohu lɛɛ, se loloolo ɔ, Yehowa ji “bua jɔmi Mawu.” (1 Tim. 1:11) Wɔ hu wa ma nyɛ ma ná bua jɔmi be mi nɛ wa to wa tsui si kɛ ngɛ mlɛe nɛ Yehowa nɛ tsɔ e biɛ ɔ he, e wo e biɛ ɔ nguɔ, nɛ e po yi wu tso ní peepee kɛ nɔ́ namihi tsuo a se ɔ. Nyɛ ha nɛ wɔ tsuo waa fia wa pɛɛ si kaa wa ma fĩ si, nɛ wa ha nɛ lemi nɛ wa le kaa wa hiɔwe Tsɛ ɔ hu ngɛ si fĩe ɔ nɛ wo wɔ he wami. Ke wa pee jã a, munyu nɛ ɔmɛ maa ba mi ngɛ wa blɔ fa mi. “Nɔ nɛ e yaa nɔ nɛ e hii si fĩe ngɛ ka mi ɔ ngɛ bua jɔmi, ejakaa ke Mawu bua ba jɔ e he ɔ, e nine maa su wami jlasi ɔ nɛ Yehowa wo si kaa e ma ha nihi nɛ a maa ya nɔ ma je suɔmi kpo kɛ ha lɛ ɔ nɔ.”​—Yak. 1:12.