1-2. Lembe ma Yehova ung’olo i Isaya 65:16, 17 ubekonyowa nenedi niciro?

I ORO 2017, wadikara i coko ma dit mir adhura m’umiyo amora lee i kumwa; thiwiye ubino: “Kud wavocu!” Programne unyutho iwa kite ma wacopo ciro ko peko ma tung’ tung’ ma wabenwang’ara ko. Kawoni oro ang’wen udaru kadhu, re fodi asu wabeciro peko i ng’om maeni ma rac.

² Nindo m’ukadhu ceng’ini eni inweng’iri ku peko ma kani? Nyo wat peri kunoke jarimbi moko utho? Nyo inweng’iri ku remokum? Nyo kwo udoko iri tek pilembe tiyo udaru mondo i kumi? Nyo peko ma wok rek, rop, kunoke ragedo? Kunoke nyo ibeneno can pi peko ma thong’om moko ukelo, calu ve thong’om mi Korona? Wabekuro kud ava nindo ma peko maeno ceke bithum i iye magwei, nindo ma wabiwil ko pigi man ma gibidwogo i iye kendo ngo!​—Som Isaya 65:16, 17.

3. Ukwayu watim ang’o niai kawoni, man ke pirang’o?

³ I ng’om maeni ma wabekwo i iye, kwo tie tek, man ebidoko tek nisagu i nindo m’ubino. (Mat. 24:21) Ukwayu wamedara niponjo cirolembe. Pirang’o? Pilembe Yesu uyero kumae: “I twiocwiny mu wubibodho kwo mu.” (Lk. 21:19) Ka waparu pi dhanu m’ubeciro kit peko m’urombo ku mwa, lembene miyo iwa tego mi ciro peko mwa bende.

4. Pirang’o wacopo yero nia Yehova tie lapor ma ber m’usagu zoo i lembe m’uneno cirocir?

⁴ Yehova Mungu tie iwa lapor ma ber m’usagu zoo i lembe m’uneno cirocir. Nyo lembuno ubewang’u ii? Kan iparu cuu, lembene copo wang’u ngo ii. Tin Sitani re m’ubebimo wi ng’om maeni, uketho ng’om upong’ ku peko i  iye. Yehova tie ku tego mi daru peko maeno kawoni, ento ebekuro nindo m’eketho m’ebidaru i iye pekonegi. (Rum. 9:22) Ento pi kawoni fodi ebemedere asu niciro nitundo ma saane biromo. Dong’ wakewec iwi lembe abung’wen ma Yehova ubeciro.

5. Nying’ Mungu ucidere nenedi, man in ke ibewinjiri nenedi pir acidine?

⁵ Acidi ma jucido ko nyinge. Yehova umaru nyinge man ebemito dhanu ceke uwor nyingene. (Isa. 42:8) Jucido nyinge oro ukadhu ma romo elufu abusiel. (Zab. 74:10, 18, 23) Acidine ucaku i podho mir Eden kinde ma Wonabali (niwacu “Jacid nying’”), uloko nia Mungu utwono Adamu giku Eva ku piny moko ma ber ma nwang’u copo ketho gibedo kud anyong’a. (Tha. 3:1-5) Niai eca ci, nying’ Yehova ucidere nia ebetwono dhanu ku gin ma gitie ku yenyne. Yesu ubed udieng’ akeca pir acidi ma jucido ko nying’ Won, uketho eponjo julubne gibed girwo kumae: “Wegwa ma ni i polo, Nyingi bed leng’.”​—Mat. 6:9.

6. Pirang’o Yehova uweko nindo ma lee ukadhi kara enyuth nia en kende re m’etie ku twero mi bimo?

⁶ Jai ma jujai ko i kum dito pare ma malu ngbir. Yehova kende re m’utie ku twero mi bimo i polo man i ng’om zoo, bende ayi m’ebimo ko tie ber m’usagu. (Nyu. 4:11) Ento Wonabali uwondo jumalaika moko man dhanu kara gipar nia Mungu umbe ku twero maeno. Etie lembe ma ting’o kare pi ninyutho nia Yehova re m’utie ku twero mi bimo. Pieno, Mungu unyutho rieko m’eweko ko dhanu gikegibim wigi gigi pi oro ma dupa kara ginen ka nyo andha gicopo bimo wigi cuu m’umbe telowic pare. (Yer. 10:23) Cirocir pa Mungu biketho piem maeno bithum magwei. Mungu binyutho nia en re m’etie ku twero mi bimo man nia Ker pare kende re ma romo kelo kwiyocwiny man bedomoth mandha iwi ng’om.

7. Jukani ma gijai ni Yehova, man Yehova bitimo lembang’o i kumgi?

⁷ Jai mir awiya pare. Yehova ucwiyo jumalaika ku dhanu m’umbe kosa moko acel de. Ento i ng’eye, Sitani ujai ni Yehova man eketho Adamu giku Eva ma gitie cwic ma leng’ de gijai ire. Jumalaika ku dhanu mange de gijai. (Yuda 6) I ng’eye, kadok nyithindho mir Israel ma gitie dhanu ma Mungu ung’iyo de gijai ire, man gilokiri gicaku woro mungu m’araga. (Isa. 63:8, 10) Yehova uwinjo can ma lee i cwinye pi lembuno. Re eciro lembene, man ebemedere niciro nitundo i nindo m’ebinyotho i iye ju m’ujai ceke. Lembuno bimiyo anyong’a ni ju ma gibegwoko bedoleng’ migi ire, man ma gibeciro karacelo kude lembe ma rac mi ng’om maeni!

8-9. Vupo ma kani ma jubecwayu iwi Yehova, man wan ke wacopo timo ang’o?

⁸ Vupo pa Wonabali. Sitani uloko nia Yob ku dhanu mange ceke gibetimo ni Yehova pi bero moko ma gibinwang’u i bang’e. (Yob 1:8-11; 2:3-5) Wonabali ubemedere asu kud adote pare cil tin. (Nyu. 12:10) Wacopo nyutho nia Sitani tie javupo nwang’u wabeciro peko man wabegwoko bedoleng’ mwa ni Yehova pi mer ma wamare ko. Calu ma Yehova umiyo mugisa ni Yob, wan de ebimiyo iwa mugisa pi cirocir mwa.​—Yak. 5:11.

⁹ Sitani ubetiyo ku judong dini mi ndra pi niponjo nia Yehova tie ng’atu ma rac  man nia en re m’eketho dhanu ubesendiri iwi ng’om. Jumoko ponjo nia awiya m’ubetho de en re m’ebenego, pilembe etie ku yeny mi jumalaika lee i polo. Eno gino acidi ma rukani! Wang’eyo nia Yehova tie Wego ma jamer. Ka twoyo ma pek upodho i wiwa kunoke wedi mwa moko utho, waloko ngo lembene iwi Mungu. Tung’ ku maeno, wabedo ku genogen nia nindo moko ebidaru twoyo man ebicero wedi mwa m’utho. Wanyutho ni dhanu ceke nia Yehova tie Mungu ma jamer. Eno miyo ire kaka m’elok ko lembe ni ng’atu m’ubecaye.​—Rie. 27:11.

10. Giragora mi Zaburi 22:23, 24 ubenyutho lembang’o iwi Yehova?

¹⁰ Masendi ma jurutic pare gibesendiri ko. Yehova tie Mungu ma Jakisa. Can benege lee kan ebeneno wabewak pi masendi; calu ve pi ragedo, remokum, kunoke pi kosa mwa. (Som Zaburi 22:23, 24.) Yehova ubewinjo litho mwa; ebemito edar lithone man ebidare de andha. (Nen bende Ai 3:7, 8; Isaya 63:9.) Nindo ubebino m’ebiweyo i iye “piwang’ pet kud i [wang’wa]; man tho bibedo nuti kendo ngo; kadok can, kadi ywak, kadok remokum de bibedo nuti kendo ngo.”​—Nyu. 21:4.

11. Yehova winjere nenedi pi jurutic pare ma githo?

¹¹ Tho mi jurimbe. Yehova winjere nenedi pi jurutic pare ma gidaru tho? Etie kud ava mi nenogi kwo kendo! (Yob 14:15) Kepar pir ava ma Yehova tie ko m’ebemito enen ko jarimbe m’Abraham! (Yak. 2:23) Kunoke m’enen ko Musa ma tie ng’atu m’eweco kude ‘wang’ ku wang’’! (Ai 33:11) Man ebekuro kud ava niwinjo wer ma mit mi pak pa Daudi man mi jugor zaburi mange! (Zab. 104:33) Kadok jurimb  Mungu maeno githo de, re Yehova uwil ungo pigi. (Isa. 49:15) Ebepoy pi kite migi acel acel. Biblia uyero nia, “i wang’e gin ceke gikwo.” (Lk. 20:38, NWT) Ebicerogi nindo moko, ebiwinjo rwo migi man ebijolo thier migi kendo. Tek ng’atu moko m’imaru utho, wec maeni copo juko cwinyi.

12. Lembang’o ma nyayu can akeca i Yehova i nindo mi kajik maeni ma rac?

¹² Masendi ma dhanu ma reco ubesendo ko jumange. Niai ma jai ucaku i podho mir Eden ci, Yehova ung’eyo nia lembe bidoko rac nisagu ka fodi lembe uyikere ngo. Yehova udagu lembe ma reco man rop m’ubetimere i ng’om tin. Kisa nege, akecane i kum ju ma gimbe ku copo ma gicer ko bang’gi; calu ve nyithikic man mon ma coggi tho. (Zek. 7:9, 10) Yehova winjere ku can lee mandha kinde m’ebeneno jubesendo jurutic pare man jubetwiyogi. Ng’ey nia emaru wun ceke ma wubeciro lembe karacelo kude.

13. Kit timo mi kurajo ma kani m’unyothere ma Mungu ubeneno, man ebitimo ang’o pi lembene?

¹³ Kurajo m’unyothere. Mungu ucwiyo dhanu ma ber i ayine, ento Sitani ubemito gitim lembe ma reco. Kinde ma Mungu “neno nia dubo mi dhanu e dit” i rundi pa Noa, “Yehova lokre kum etimo dhanu wi ng’om, man can unege i adundene.” (Tha. 6:5, 6, 11) Nyo lembe udok uyikere? Ungo! Anyong’a ubenego Wonabali lee pi kwond lembsasa mi tarwang’ ceke m’ubetimere tin, uketho i iye lembsasa mi tarwang’ i kind mon ku co, man co ku co kunoke mon ku mon! (Efe. 4:18, 19) Anyong’a nego Sitani asagane kan eketho dhanu m’ubeworo Yehova gipodho i dubo ma pek. Kinde ma cirocir pa Yehova bitundo i ajikine, e ebinyotho dhanu m’ubetimo kura ma reco eno cen pi ninyutho nia edagu timone.

14. Dhanu ubetimo ang’o i kum giracwiya pa Mungu?

¹⁴ Ng’om ma dhanu ubenyotho. Dhanu ‘ubebimo pi nitimo wadi rac’ kende ngo, ento ebenyotho bende ng’om ku lei ma tie giracwiya ma Mungu umiyo nia dhanu gigwoki. (Ekl. 8:9; Tha. 1:28) Jururieko moko uyero nia gin ma dhanu ubetimo copo nyotho kit lei man yen ma tung’ tung’ ma romo milioni acel i kind oro m’ubino. Etie lembe mi zungo ngo ka dhanu beyero nia giracwiya m’udhokowa ubenyothere. Wabedwoko foyofoc ni Yehova pilembe eng’olo nia ‘ebinyotho ju m’unyotho ng’om,’ man ebidwoko ng’om zoo bidoko ni paradizo.​—Nyu. 11:18; Isa. 35:1.

15-16. Lembang’o ma copo cwaluwa niciro lembe calu Yehova? Kemii lapor moko.

¹⁵ Kepar pi lembe ceke ma Wegwa m’i polo udaru ciro pi oro elufu swa. (Nen sanduku “ Lembe ma Yehova ubeciro.”) Nwang’u Yehova copo daru lembe ma reco mi ng’om maeni saa moko ci. Ento cirocir pare umiyo iwa kony dupa. Kepar pi lapor ma e: Juyero ni ng’atu moko ku min ot pare nia nyathin ma gibinyolo binyolere kud abala ma lee, i ng’eye ebikwo ku peko man ebitho ma fodi e nyanok. Ento kinde ma nyathin ne unyolere, jurunyodo pare gibedo kud anyong’a kadok nwang’u nigwoke bibedo igi lembe ma tek de. Mer ma gimaru ko nyathin migi ucwalugi niciro peko moko ci kara kwo pare ubed ma ber.

¹⁶ Kumeno bende, nyikway Adamu  giku Eva ceke ginyoliri ku kum mi dubo. Re asu Yehova umarugi man ebedieng’ pigi. (1 Yoh. 4:19) Ento tung’ ku jurunyodo ma waweco pigi i lapor, Yehova copo daru masendi mir awiya pare. Edaru ketho nindo m’ebidaru iye twoyo ceke m’ubesendo dhanu. (Mat. 24:36) Nyo mer m’emaru kowa copo cwaluwa ngo niciro lembe calu en pi nindo ma lee kan ukwayere?

17. Lembe ma jukoro iwi Yesu i Juebrania 12:2, 3 ubekonyowa nenedi kara wamedara niciro?

¹⁷ Yehova tie iwa lapor ma ber mi cirolembe. Yesu de ulubo lapor mi cirocir pa Won. Kinde m’ebino iwi ng’om, eciro wec ma reco, acidi, man eciro bende yen mi can piwa. (Som Juebrania 12:2, 3.) M’umbe jiji, lapor mi cirocir pa Yehova umiyo tego ni Yesu uketho en de eciro. Laporne copo miyo tego iwa bende.

18. Giragora pa 2 Petro 3:9 ubekonyowa nenedi ninyang’ i kum bero mi cirocir pa Yehova?

¹⁸ Som 2 Petro 3:9. Yehova ung’eyo saa ma ber m’ebidaru iye lembe ma reco m’i ng’om maeni. Cirocir pare uketho dhanu dupa ung’eye man udul dhanu milioni ma dit gibewore. Gin ceke gitie kud anyong’a pilembe cirocir pa Yehova umiyo igi kare ma ginyoliri ko, ging’eye ko, man githiero ko kwo migi ire. Yub ma Yehova umaku m’eciro ko lembe binyuthere kamaleng’ nia etie yub ma cuu, kinde m’ebimiyo mugisa ni milioni mi dhanu ma giciro nitundo i ajiki!

19. Ukwayu wabed ku lembakeca mi timo ang’o, man wabinwang’u mugisa ma kani?

¹⁹ Lapor pa Yehova unyutho iwa kite ma wacopo ciro ko lembe kud anyong’a. Kadok Sitani unyayu lembe ma reco ku masendi dupa de, re Yehova tie pare asu “Mungu ma [jamutoro].” (1 Tim. 1:11) Wan bende wamedara nibedo kud anyong’a ma wakur ko ku cirocir saa ma Yehova bidwoko iye nyinge leng’, ebinyutho nia en re m’etie ku twero mi bimo, man ebidaru iye lembe ceke ma reco ma wabenwang’ara ko. Dong’ wabed ku lembakeca ma wacir ko lembe man wang’ey ko nia Wegwa m’i polo de ubeciro. Ka watimo kumeno, wabineno nia lembe ma e tie lemandha: “Ng’atu m’uciro abidhe mugisa kwanye; kum ka judaru mulo ie, ebinwang’u jamkermiwic mi kwo, ma [Yehova] ung’olo ni ju m’umare.”​—Yak. 1:12.