1-2. Lelaa kaat Yésaya 65:16, 17 i nhôla bés i hônba?

LIKODA li ndôn li nwii 2017 li li bééna ño nkwel le: Di tomb bañ! li bi unda bés lelaa di nla pam i hônba mandutu di mboma. Hala a yé nwii mi-na le li bi tagbe, ndi di ngi hônbaga mandutu ma bôô hiai hini.

² Mambe mandutu u mboma masañ mana? Baa u ntip nimis mut woñ lihaa tole liwanda joñ? Baa u nkon? Baa biuni gwon bi ntééñga we? Baa bikuu gwon bi ntip kwél bé libôga linan? Baa ngomin a ntééñga bé inyule ni yé Mbôgi Yéhôva, tole njôô yon i yé nayak i mbok nan? Baa nduña yon i nsômbôl nol we inyu himala hi COVID-19? Di nyamnda ni ngôñ i tehe i kel mandutu momasôna m’a mal, ñ di ga hoñol ha bé mandutu ma momasôna!​—Añ Yésaya 65:16, 17.

3. Kii di nlama boñ, inyuki?

³ Niñ i ntomb bé to ndék munu nkoñ ’isi unu, mam ma ga kônde ndik let dilo di nlo. (Matéô 24:21) Jon di nlama ke ni bisu i hônba. Inyuki? Inyule Yésu a kal le: “Hônba nan yon y’a sôñ biniñ binan.” (Lukas 21:19) I yoñ ngéda i wan lelaa bôt bape ba nhônba mandutu di mboma len i ga hôla bés i hônba.

4. Inyuki di nkal le Yéhôva a yé ndémbél i mbôk ni i nsôk i hônba?

⁴ Njee a yé ndémbél i mbôk ni i nsôk i hônba? Yéhôva Nyambe. Baa hala a nhélés we? Bebek, ndi ibale u nyoñ ngéda i ôt pék, w’a nôgda le maliga ma. Nkoñ ’isi u yé isi ane i Nsohop, jon mandutu ma yé nayak hala. Yéhôva a gwé ngui i mélés nkoñ ’isi unu kunda yada, ndi a ntéé ngim hilo inyu boñ hala. (Rôma 9:22) Tata wés nu gwéha  a ngi bemek le i ngéda a bi téé i kola. Di tehe mam bôô Yéhôva a nhônba.

5. Lelaa bôt ba nhoo jôl li Djob mahindi, ngéda u ntehe hala, kii u nôgda?

⁵ Bôt ba nhoo jôl jé mahindi. Yéhôva a ngwés jôl jé, a ngwés yak le bôt bobasôna ba ti jo lipém. (Yésaya 42:8) Ndi nano a nloo 6 000 nwii le bôt ba nyan jôl jé, ba hook jo mahindi. (Tjémbi 74:10, 18, 23) Hala a bi bôdôl i wom Éden ngéda Nsohop a bi ôm Djob nsohi le a nsôña Adam ni Éva ngim jam i i yé le i hôla bo i ba maséé. (Bibôdle 3:1-5) Ibôdôl ha, bôt ba binam ba ñôm Yéhôva nsohi ngi njom le a nsôña bo i boñ mam ba gwé ngôñ. Hala a bi tééñga Yésu ngandak i tehe bôt ba nhoo jôl li Isañ mahindi. Inyu hala nyen a bi niiga banigil bé i soohe le: “A Tata wés nu a yé i ngii, jôl joñ li tééba lipubi.”​—Matéô 6:9.

6. Inyuki Yéhôva a bi nwas le ntandaa ngéda i tagbe inyu unda le nyetama nyen a kôli ane?

⁶ Bôt ba nkolba kunde yé i énél. Yéhôva nyetama nyen a gwé kunde i énél ngii ni hisi, énél yé yotama yon i nlôôha ilam. (Masoola 4:11) Ndi Nsohop a bi lôk biañgel ni bôt ba binam, a tinde bo i hoñol le Nyambe a gwé bé kunde i énél. Hala a bé bat ngéda inyu kwés bésbobasôna nkaa le Yéhôva nyen a kôli ane, ni le énél yé i nlôôha ilam. Jon ikété pék yé yosôna, Nyambe a bi nwas le ntandaa ngéda i tagbe inyu boñ le bôt ba binam ba tehe le ba nla bé ane bomede ibabé le i nwet a bi hek bo a hôla bo. (Yérémia 10:23) Kiki Yéhôva a nhônba nano a yé ntandaa ngéda, hala a ga boñ le mut a pééna ha bañ i jam li kekikel. Ñ, hiki mut a ga yi le ndik énél yé yon i nlôôha ilam, ni le Ane yé yotama yon y’a lona nsañ hana ’isi, kayéle mut to wada a ga kon ha bé woñi.

7. Njee a bi ndogbene Yéhôva, ni kii a ga boñ ni bo?

⁷ Ndok i bon bé bahogi. Yéhôva a hek bon bé bobasôna (hala wee biañgel ni bôt ba binam) peles. Ndi añgel yada i ba nsébél le Satan (“Nkolba”) a bi ndogbene Yéhôva, a tinde yak Adam bo Éva i boñ nlélém. Mbus ngéda, biañgel bipe ni bôt ba binam ba bi noñ nye mu i ndok yé. (Yuda 6) Yak litén jé Israel, li bi tjôô nye, li ke i bégés bisat. (Yésaya 63:8, 10) Yéhôva a bi nôgda le ba nliibana nye. Ndi a bi hônba i ndok i, a ngi hônbaga yo letee ni ngéda a bi téé inyu tjé i bet ba nkolba nye i kola. Ha ngéda i, Yéhôva ni i bet ba tiñi ni nye ba ga ba maséé inyule b’a bana ha bé ngôñ i hônba mandutu ma nkoñ ’isi.

8-9. Bimbe bitembee ba ntôô inyu Yéhôva, kii di nlama boñ inyu kolba gwo?

⁸ Bitembee bi Nsohop. Satan a bi soman Hiôb ni bana bagwélél ba Yéhôva bape ba ba tiñi ni nye le ba ngwélél bé Yéhôva yañga. (Hiôb 1:8-11; 2:3-5) Nsohop a ngi kenek ni bisu i ôm bôt ba binam nsohi i len ini. (Masoola 12:10) Di nla unda le Satan a nlôk ibale di nhônba mandutu di mboma, di ntéñbe ki ni Yéhôva inyule di ngwés nye. Kiki Hiôb, Yéhôva a ga sayap bés ibale di nhônba.​—Yakôbô 5:11.

⁹ Satan a ngwélél baéga ba bikwéha bibase i tinde bôt i hoñol le Yéhôva a yé béba kiyaga, ni le nyen a boñ le mam mabe ma kwél bés. Bape ba nkal yak le, i ngéda mañge a nwo, Djob nyen a nyoñ nye, inyule a bak a gwé ngôñ ni añgel nyoo i ngii. Kinje tembee! Bés di nyi le  Yéhôva a yé Tata nu gwéha. I ngéda di nkon ngandak tole i ngéda nyemb i nkadal bés mut di gwéhék, di ñôm bé Nyambe nsohi. Maselna ni hala, di nyi ntiik le kel yada, a ga mbuubaha bakokon, a lona bawoga bitugne. Di niiga bôt bobasôna le Yéhôva a yé Djob li gwéha. Hala a mboñ le Yéhôva a ntimbhe i nwet a nkolba nye.​—Bingéngén 27:11.

10. Kii kaat Tjémbi 22:24, 25 i niiga bés inyu Yéhôva?

¹⁰ I tehe bagwélél bé a ngwés ba nson njonok. Yéhôva a gwé ñem ngôô. A ngwés bé a ntehe bés di ñee inyu mandutu di mboma, kiki bo makon, libak jés li kwéha, ni i ndééñga di nkôs inyule di yé Mbôgi Yéhôva. (Añ Tjémbi 22:24, 25.) Yéhôva a nôgda njôghe yés; a gwé ngôñ i mélés yo, ñ, a ga mélés ki yo. (Hégha ni Manyodi 3:7, 8; Yésaya 63:9.) Ndék ngéda, “a’ sas gwiiha gwobisôna i mis [més], nyemb y’a ba ha bé, to maéya, to nlondok, to njôghe bi ga ba ha bé.”​—Masoola 21:4.

11. Kii Yéhôva a nôgda inyu bagwélél bé ba ba bi wo?

¹¹ I tehe mawanda mé ma nwo. Kii Yéhôva a nôgda inyu bagwélél bé ba ba bi wo? A gwé ngôñ ikeñi i témbna bo i niñ! (Hiôb 14:15) Baa u nhégda lelaa Yéhôva a nyamnda ni ngôñ i tehe liwanda jé Abraham? (Yakôbô 2:23) Tole kiki a nsômbôl tehe Môsi, nu bo nye ba bé kwel “mbom ni mbom”? (Manyodi 33:11) Di hégda nye a ngwés tiimba emble tjémbi dilam di bibégés David ni bana batôp tjémbi bape ba bé tubul nye! (Tjémbi 104:33) Tolakii mawanda mé ma, ma bi wo, Yéhôva a mah hôya bé bo. (Yésaya 49:15) A ngi bigdaga hiki hisii jam inyu hiki wada wap. Inyu hala  nyen Bibel i nkal le: “I mis mé, bobasôna ba yé i niñ.” (Lukas 20:38, buk isi lipep.) Kel yada, a ga témbna bo i niñ, a témb a nok bo ba nsoohe nye, a neebe yak bibégés gwap. Ibale u ntip nimis mut u gwéhék, bebek i yi hala i nla hôgbaha we.

12. Kii i ntééñga Yéhôva munu dilo di nsôk dini?

¹² I tehe bibéba bi bôt bi ntét bôt bape. Ngéda Adam bo Éva ba bi ndogop i wom Éden, Yéhôva a bi yi le mam ma ga bep, bep ni bep. Yéhôva a ñoo béba, ngitelepsép, ni njôô i i yé nyonok i nkoñ ’isi len. Ibôdôl behee, a ntôñ i bôt ba gwé bé mut inyu sôñ bo, kiki bon ba nyuu ni biyik. (Sakaria 7:9, 10) Yéhôva a nok njôghe i nlôôha ngéda a ntehe bôt ba ntét bagwélél bé, ba hak bo i mok. Ibabé pééna, a ngwés bé bobasôna ba ni nhônba kiki nye.

13. Mambe mam ma nyega Yéhôva a ntehe hana nkoñ ’isi, kii a ga boñ?

¹³ I tehe bôt ba binam ba nai ni malal ma nyega. Satan a ntinde bôt ba binam ba ba bi héga i pôna i Djob, i boñ mam ma nyega. Ngéda Nyambe “a tehe le béba i mut i ba ikeñi hana ’isi” dilo di Nôa, “Yéhôva a tam le a hek mut hana ’isi, hala a siidaha nye ñem.” (Bibôdle 6:5, 6, 11) Ibôdôl ha, baa mam ma nheñ? Heni! Kinje maséé Nsohop a nlama ba i tehe le malal ma nyega ma nke i njel motama, u héya malal ipôla bôda ni bôlôm, ma yé yak ipôla bôlôm ni bôlôm, bôda ni bôda! (Éfésô 4:18, 19) Satan a nlôôha ba maséé ngéda ngwélél Djob a nkwo i béba ikeñi. I ngéda yé, Yéhôva a ga tjé bôt bobasôna ba ba ntjél héñha inyu unda le a ñoo malal ma nyega.

14. Lelaa bôt ba binam ba ntééda bibebela ni binuga?

¹⁴ I tehe bôt ba binam ba ñôbôs hisi. Mut binam ‘a mbep [ndik bé] ane mut,’ ndi a mbep yak tééda hisi ni binuga Yéhôva a bi ti nye le a tééda. (Ñañal 8:9; Bibôdle 1:28) Bôt ba njoñ yi ba nkal le, ibale di nyoñ bé yihe maboñok ma bôt ba binam ma ga boñ le hidun hiada hi bibebela ni binuga hi nyoi i mbus ndék nwii. Hala a nhélés bé bés le bayimam ba ntjelel! Masoda le Yéhôva a mbôn le a ga “lona tjiba i ngii bôt ba ba ntjé hisi,” a boñ ki le hisi hiosôna hi yila paradis.​—Masoola 11:18; Yésaya 35:1.

15-16. Kii i ntinde bés i hônba kiki Yéhôva? Ti hihéga.

¹⁵ Hégda le i mam mabe momasôna Tata wés nungingii a nhônba nano a yé dikôô di nwii. (Béñge minkéñék mi matila le “ I mam Yéhôva a nhônba.”) Yéhôva a nla tjé i béba nkoñ ’isi ini to imbe ngéda. Ndi wongut yé i yéne bés mahee! Di nla yoñ hihéga inyu tibil nok i jam li. Hégda le ba nkal babiina le man wap a’ gwééna ngim béba kon i i ga tééñga nye ngandak, ni le a ga hoo wo. Ndi to hala, bagwal ba, ba yé maséé i tehe man wap a ngwéé, to hala kiki i ga ba bé bo bun i tééda nye. Kiki ba ngwés man wap ngandak, ba yé bebee i hônba to imbe ndutu inyu boñ le niñ i nlémél nye to ndék.

¹⁶ Nlélém, bon ba Adam bo Éva bobasôna ba ngwéé bikwéha bi bôt. Ndi to hala, Yéhôva a ngwés bo, a nyoñ ki ndun ni bo. (1 Yôhanes 4:19) Maselna ni bagwal di mpôdôl mu hihéga hiés, Yéhôva nye a nla mélés béba i bon bé. A bi téé yak ngim ngéda a ga mélés makon ni  mandutu momasôna bôt ba binam ba mboma len. (Matéô 24:36) Baa gwéha i Yéhôva i ntinde bé bés i hônba ntel ngéda wonsôna a ga tehe nseñ i boñ hala?

17. Lelaa i yom ba nkal inyu Yésu i kaat Lôk Héber 12:2, 3 i ti bés makénd i hônba?

¹⁷ Yéhôva a yé ndémbél i nlôôha ilam i hônba. Man wé Yésu a bi nigle nye loñge loñge i ngéda a bé hana ’isi. A bi hônba bisol, wonyuu ni kék njiiha inyu yés. (Añ Lôk Héber 12:2, 3.) Ibabé nkaa, ndémbél i hônba i Yéhôva yon i bi ti Yésu makénd i hônba. Ñ, yak bés ndémbél i Yéhôva i nla lédés bés.

18. Lelaa kaat 2 Pétrô 3:9 i nhôla bés i nok i mam malam hônba i Yéhôva i nlona?

¹⁸ Añ 2 Pétrô 3:9. Yéhôva a nyi imbe ngéda i nlôôha ilam inyu tjé i béba nkoñ ’isi ini. Hônba yé yon i mboñ le limut likeñi li didun di bôt li kodba len inyu bégés nye. Bobasôna ba yé maséé le Yéhôva a bi hônba, ba gwéé, ba nigil maliga, ba ti bomede nkikip inyu boñ sômbôl yé. Ngéda Yéhôva a’ bom didun di bagwélél bé, hala a ga kwés bôt nkaa le a bé a kôli hônba!

19. Mambe makidik di nlama yoñ, bimbe bibom di ga kôs?

¹⁹ Yéhôva a niiga bés lelaa di hônba ikété maséé. Tolakii Satan a bi lona ngandak mandutu, Yéhôva a ngi yii “Nyambe nu maséé.” (1 Timôtéô 1:11) Yak bés di nla ba maséé to ibale di mbem ni wongut le Yéhôva a pubus jôl jé, le a unda bôt ba binam le nyen a kôli ane inyule ane yé i nlôôha ilam, ni le a mélés béba ni mandutu momasôna di mboma len. Di kee ni bisu i hônba di yik le yak Tata wés nungingii a nhônba. Ibale di mboñ hala, bibuk bini bi ga yon i ngii yés: “Maséé ni i mut a ntéñbe i hônba manoodana, inyule ngéda a mal lémél Nyambe, a’ kôhna ntut u niñ Yéhôva a bi bôn i bôt ba tiñi i gwés nye.”​—Yakôbô 1:12.