1-2. Paano nakakapakusog sato na padagos na magtagal an sinabi ni Jehova na nasa Isaias 65:16, 17?

‘PADAGOS NA MAGTAGAL!’—iyan an nakakapahirong tema kan programa kan pangrehiyon na kumbensiyon kan 2017. Ipinahiling kan programa kun paano ta matatagalan an mga pagbalo na napapaatubang sato. Apat na taon na an nag-agi puon kaiyan, asin uni kita ngunyan, padagos pa man giraray na nagtatagal sa presenteng sistemang ini nin mga bagay.

² Anong mga problema an inagihan mo pa sana? Pagkagadan nin kapamilya o nin namumutan na amigo? Nakakagadan na hilang? Mga kadipisilan na dara nin paggurang? Kalamidad, kadahasan, o persekusyon? O an mga epekto nin hilang, arog kan pandemyang COVID-19? Gustong-gusto ta nang umabot an aldaw na mayo na an mga bagay na iyan—dai na magigirumduman asin dai na nanggad mangyayari giraray!—Basahon an Isaias 65:16, 17, NWT.

3. Ano an dapat niyatong gibuhon ngunyan, asin taano?

³ Dipisil an buhay sa sistemang ini, asin tibaad mapaatubang kita sa mas masakit pa nganing mga problema sa maabot na panahon. (Mat. 24:21) Malinaw na kaipuhan tang padagos na urog na magtagal. Taano? Dahil sinabi ni Jesus: “Paagi sa saindong pakatagal maiingatan nindo an saindong buhay.” (Luc. 21:19) Kun huhurop-hurupon ta kun paano mapangganang natatagalan kan iba an mga pagbalong kaagid kan sa sato, makakatabang iyan na mas urog kitang magtagal.

4. Taano ta nasabi niyato na si Jehova an pinakamarahay na halimbawa nin pakatagal?

⁴ Siisay an pinakamarahay na halimbawa nin pakatagal? An Diyos na Jehova. Ikinangalas mo daw an simbag na iyan? Posibleng iyo, pero kun iisip-isipon mo iyan, masasabutan mo kun taano. An kinaban na ini nasa kontrol kan Diyablo, kaya pano-pano ini nin problema. May kapangyarihan si Jehova na tapuson iyan ora mismo, pero hinahalat niya an itinalaan na panahon para gibuhon niya  iyan. (Roma 9:22) Mantang dai pa iyan nag-aabot, padagos na nagtatagal an satuyang Diyos. Pag-ulayan ta an siyam na bagay na padagos na tinatagalan ni Jehova.

5. Paano tinawan nin katuyawan an pangaran nin Diyos, asin ano an namamatian mo manungod diyan?

⁵ An katuyawan na dinara sa pangaran niya. Mahalagang marhay ki Jehova an pangaran niya, asin gusto niya na igalang iyan kan gabos. (Isa. 42:8) Pero sa laog nin mga anom na milenyo, tinawan nin katuyawan an saiyang marahay na pangaran. (Sal. 74:10, 18, 23) Nagpuon iyan sa hardin nin Eden kan an Diyablo (nangangahulugan na “Parapakaraot”) akusaran si Jehova na may ipinapanguri daa ini ki Adan asin Eva na sarong bagay na kaipuhan ninda para magin maugma. (Gen. 3:1-5) Puon kaidto, putik nang inaakusaran si Jehova na ipinapanguri niya daa sa mga tawo an talagang kaipuhan ninda. Nahadit si Jesus sa katuyawan na itinatao sa pangaran kan saiyang Ama. Dahil kaiyan, itinukdo niya sa saiyang mga disipulo na ipamibi: “Ama niyamo na nasa langit, pakangbanalon an ngaran mo.”—Mat. 6:9.

6. Taano ta tinugutan ni Jehova na maglihis an halawig na panahon bago resolberan an isyu manungod sa saiyang soberaniya?

⁶ An pagkontra sa saiyang soberaniya. Si Jehova an may lubos na deretso na pamahalaan an kalangitan asin an daga, asin an paagi niya nin pamamahala an pinakamarahay. (Kap. 4:11) Alagad pinupurbaran kan Diyablo na dayaon an mga anghel asin an mga tawo na isipon na mayo kan deretsong iyan an Diyos. An isyu manungod sa pagigin may deretso ni Jehova bilang Soberano dai lang basta-basta mareresolberan sa halipot na panahon. Dahil sa kadunungan nin Diyos, tinugutan niya na maglihis an halawig na panahon para patunayan sa mga tawo na pag pinamahalaan ninda an sadiri ninda na mayo kan paggiya kan Kaglalang, dai nanggad sinda magigin mapanggana. (Jer. 10:23) Dahil sa pagigin mapasensiya nin Diyos, permanenteng mareresolberan an isyu. Mabibindikar siya mantang pinapatunayan niya na an saiyang Kahadian sana an makakatao nin tunay na katuninungan asin katiwasayan digdi sa daga.

7. Sairisay an nagrebelde ki Jehova, asin ano an gigibuhon niya sa sainda?

⁷ An pagrebelde kan nagkapira sa mga aki niya. Linalang ni Jehova na perpekto, mayo nin ano man na depekto, an mga aki niyang espiritu asin tawo. Pero an saiyang aking anghel na si Satanas (nangangahulugan na “Paratumang”) nagrebelde asin itinalikod ki Jehova an perpektong mga tawong si Adan asin Eva. Uminiba man sa rebelyon an iba pang mga anghel asin mga tawo. (Jud. 6) Pag-abot nin panahon, maski an mga miyembro kan nasyon nin Israel, an piniling banwaan nin Diyos, isinikwal siya asin nagsamba sa palsong mga diyos. (Isa. 63:8, 10) Kaya tama sanang makamati si Jehova na trinaydor siya. Dawa arog kaiyan, nagtagal siya, asin padagos siyang magtatagal sagkod na umabot an panahon na laglagon niya na an gabos na rebelde. Magtatao nanggad iyan nin dakulang kaginhawahan sa maimbod niyang mga lingkod na nagtatagal man kaiba niya sa maraot na mga nangyayari sa sistemang ini nin mga bagay!

8-9. Anong mga kaputikan an sinasabi manungod ki Jehova, asin ano an puwede tang gibuhon manungod diyan?

⁸ An daing pundong pagputik kan Diyablo. Inakusaran ni Satanas an matanos na lingkod ni Jehova na si Job, na garo baga sinasabing an gabos na maimbod na parasamba ni Jehova naglilingkod lang sa Diyos huli sa makasadiring kadahilanan. (Job 1:8-11; 2:3-5) Iyan pa man giraray an inaakusar kan Diyablo sagkod ngunyan. (Kap. 12:10) Puwede kitang tumabang sa pagpatunay na bako nanggad totoo an mga kaputikan ni Satanas paagi sa pagtagal sa mga pagbalo asin pagdanay na maimbod ki Jehova dahil sa pagkamuot ta sa Saiya. Arog ni Job, bebendisyunan kita dahil sa satong pakatagal.—Sant. 5:11.

⁹ Ginagamit ni Satanas an mga lider nin palsong relihiyon para sabihon na si Jehova daa maisugon  saka Siya daa an dahilan kan pagsakit kan katawuhan. Sinasabi pa ngani kan iba na pag nagadan an mga aki, an Diyos daa an nagkua sainda dahil kaipuhan niya nin dakul pang anghel sa langit! Grabeng paglanghad nanggad iyan! Aram ta na bako iyan totoo. Pag nagkaigwa kita nin malalang hilang o pag nagadan an mahal ta sa buhay, nungka tang binabasol an Diyos. Sa kabaliktaran, nagtutubod kita na maabot an panahon na papaumayan niya an mga may hilang asin bubuhayon an mga gadan. Puwede tang sabihon sa gabos na madangog kun gurano kamamumuton na Diyos si Jehova. Paagi kaiyan, makakatao siya nin marahayon na simbag sa saro na nagtutuya sa saiya.—Tal. 27:11.

10. Ano an ihinahayag kan Salmo 22:23, 24 manungod ki Jehova?

¹⁰ An pagsakit kan saiyang namumutan na mga lingkod. Mapagmakulog na Diyos si Jehova. Nakukulgan nanggad siya pag nadadangog niya kitang nag-aagrangay dahil sa pagsakit na tinatagalan ta—iyan man persekusyon, hilang, o mga kaluyahan ta. (Basahon an Salmo 22:23, 24.) Namamatian ni Jehova an kulog na namamatian ta; gusto niyang halion iyan, asin talagang hahalion niya iyan. (Ikumparar an Exodo 3:7, 8; Isaias 63:9.) Maabot an aldaw na “papahidon niya an gabos na luha sa [satong] mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kap. 21:4.

11. Sa ano napupungaw si Jehova manungod sa maimbod niyang mga lingkod na nagadan?

¹¹ An pagkagadan kan saiyang mga amigo. Ano an namamatian ni Jehova manungod sa nagadan na maimbod na mga lalaki asin babayi? Gustong-gusto niya na sindang mahiling giraray! (Job 14:15) Naiimahinar mo daw kun gurano na napupungaw si Jehova sa amigo niyang si Abraham? (Sant. 2:23) O ki Moises, na sa saiya nakipag-ulay siya nin “hampangan”? (Ex. 33:11, An Marahay na Bareta Biblia) Asin siguradong gustong-gusto niya nang madangog si David asin an iba pang salmista na nag-aawit kan saindang magayunon  na mga kanta nin pag-umaw! (Sal. 104:33) Dawa nagtuturog na sa kagadanan an mga amigong ini nin Diyos, dai sinda nalilingawan ni Jehova. (Isa. 49:15) Nasa memorya niya an lambang detalye kan saindang personalidad. Kaya kun baga, “para sa saiya gabos sinda buhay.” (Luc. 20:38) Maabot an panahon na bubuhayon niya liwat sinda gabos, asin sa giraray madadangog niya an saindang udok na mga pamibi asin aakuon an saindang pagsamba. Kun nagadanan ka nin sarong mahal sa buhay, lugod na makapakusog asin makaranga ini saimo.

12. Sa ano partikular nang napupurisaw si Jehova sa maraot na mga huring aldaw na ini?

¹² An pang-aapi kan maraot na mga tawo sa saindang kapwa. Kan magpuon an rebelyon sa Eden, aram ni Jehova na lalong magraraot an sitwasyon sa kinaban. Nauungis si Jehova sa karatan, inhustisya, asin kadahasan sa kinaban ngunyan. Puon pa kaidto, nagmamalasakit siya partikular na sa mga maluya asin daing kalaban-laban, sa mga ilo pati man sa mga balo. (Zac. 7:9, 10) Napupurisaw si Jehova lalo na pag nahihiling niyang inaapi asin ipinepreso an maimbod niyang mga lingkod. Makakasigurado nanggad kamo na namumutan niya kamo gabos na nagtatagal kaiba niya.

13. Paano hinahalian nin onra an pamilya nin tawo sa mismong atubangan nin Diyos, asin ano an gigibuhon niya manungod diyan?

¹³ An lalong pagigin imoral kan pamilya nin tawo. Gustong-gusto ni Satanas na halian nin onra an mga tawo, na linalang uyon sa ladawan nin Diyos. Kan mahiling nin Diyos na “grabe na an karatan kan tawo” kan panahon ni Noe, “ikinamundo ni Jehova na ginibo niya an mga tawo sa daga, asin nakulgan an saiyang puso.” (Gen. 6:5, 6, 11, NWT) Nagrahay daw an mga kamugtakan puon kaidto? Dai nanggad! Siguradong ugmahon an Diyablo na mahiling na lakop na marhay an gabos na klase nin seksuwal na imoralidad, kaiba na an imoral na mga gibo kan mga bakong magkasekso asin kan mga magkasekso! (Efe. 4:18, 19) Lalo nang nauugma si Satanas pag nagigibo niyang magkasala an mga nagsasagibo nin tunay na pagsamba. Pag matapos na an pagpapasensiya ni Jehova, ipapahiling niya an grabeng pagkaungis niya sa gabos na imoral na gibo.

14. Ano an ginigibo nin tawo sa mga hayop asin sa daga?

¹⁴ An pagraot sa mga linalang niya. An tawo dai lang ‘nagsasakop sa tawo sa saiyang ikakaraot’ kundi pinamamahalaan niya man sa salang paagi an daga asin an mga hayop na ipinagkatiwala ni Jehova sa tawo. (Par. 8:9; Gen. 1:28) Nagpapatanid an nagkapirang eksperto na dahil sa mga ginigibo nin tawo, posibleng marhay na maubos na an sarong milyon pang species * sa sunod na pirang taon. Kaya bakong makangangalas na sinasabi nindang namemeligro na an satong kapalibutan! Marahay na sana ta nanunuga si Jehova na lalaglagon “idtong mga nagpapahamak kan daga” asin gigibuhon na paraiso an bilog na daga.—Kap. 11:18; Isa. 35:1.

15-16. Ano an nakakapahiro sato na magtagal kaiba ni Jehova? Iilustrar.

¹⁵ Isipa an gabos na nakakapurisaw na problema na ribo-ribong taon nang tinatagalan kan satong langitnon na Ama. (Hilingon an kahon na “ Kun Ano an Tinatagalan ni Jehova.”) Kayang-kayang tapuson ni Jehova ano man na oras an maraot na sistemang ini nin mga bagay. Pero dakulang bendisyon nanggad sato an saiyang pagigin mapasensiya! Isipa an ilustrasyon na ini: Sinabi sa sarong mag-agom na an saindang dai pa namumundag na aki igwang grabeng problema sa pisikal asin magigin masakit nanggad an buhay kaini saka amay na magagadan. Dawa arog kaiyan, maski mangangaipo iyan nin dakulang pagsasakripisyo sa parte kan mag-agom, maugma sinda kan mamundag na an saindang aki. Dahil sa pagkamuot ninda sa aki ninda, tinatagalan ninda an ano man na kadipisilan tanganing matawan siya kan pinakamagayon na buhay na posible.

 ¹⁶ Sa kaagid na paagi, an gabos na gikan ni Adan asin Eva bakong perpekto kan mamundag sinda. Dawa arog kaiyan, namumutan sinda ni Jehova asin nagmamalasakit siya sainda. (1 Juan 4:19) Asin bakong arog kan mga tawong magurang sa ilustrasyon, may magigibo si Jehova sa sitwasyon ta. Nagtalaan siya nin panahon para halion an gabos na dahilan nin pagsakit kan saiyang mga tawong linalang. (Mat. 24:36) Bako daw na nakakapahiro nanggad sato an pagkamuot niya na magtagal kita kaiba niya nin sagkod sa kinakaipuhan iyan?

17. Paano an mga tataramon manungod ki Jesus sa Hebreo 12:2, 3 nakakapakusog sato na padagos na magtagal?

¹⁷ Si Jehova an perpektong halimbawa nin pakatagal. Asin naarog ni Jesus an pakatagal kan saiyang Ama. Bilang tawo, tinagalan ni Jesus an maraot na mga sinabi saiya, an kasusupgan, asin an hariging pasakitan alang-alang sato. (Basahon an Hebreo 12:2, 3.) An halimbawa ni Jehova nin pakatagal siguradong nakatao ki Jesus kan kusog para makatagal. Mapapakusog man kita kaiyan.

18. Paano kita tinatabangan kan 2 Pedro 3:9 na masabutan kun ano an naisasagibo kan pagigin mapasensiya ni Jehova?

¹⁸ Basahon an 2 Pedro 3:9. Aram ni Jehova an pinakamarahay na panahon para tapuson an maraot na kinaban na ini. Dahil sa saiyang pagigin mapasensiya, nagin posible na matipon an sarong dakulang kadaklan, na milyon-milyon na an bilang, na nagsasamba asin nag-uumaw saiya. Gabos sinda maugma na si Jehova nagtagal para halaton na mamundag sinda, mamutan siya, asin idusay an sadiri ninda saiya. Lubos nanggad na mahihiling na tama an desisyon ni Jehova na magtagal pag balusan niya na an milyon-milyon sato na nagtagal sagkod sa katapusan!

19. Ano an dapat na determinado tang gibuhon, asin ano an magigin balos sato?

¹⁹ Nanunudan ta ki Jehova kun paano magtagal nin may kaugmahan. Sa ibong kan gabos na kamunduan asin pagsakit na itinatao ni Satanas, si Jehova nagdadanay na “maugmang Diyos.” (1 Tim. 1:11) Puwede man kitang magdanay na maugma mantang mapasensiya kitang naghahalat na pakangbanalon ni Jehova an pangaran niya, ibindikar an soberaniya niya, tapuson an gabos na karatan, asin halion an gabos tang problema ngunyan. Lugod na magin determinado kitang magtagal asin maranga kan pakaaram na an satong langitnon na Ama nagtatagal man. Kun ginigibo ta iyan, magigin totoo sa lambang saro sato an mga tataramon na ini: “Maugma an tawo na padagos na nagtatagal nin pagbalo, huli ta pag siya inuyunan nin Diyos aakuon niya an korona nin buhay, na ipinanuga ni Jehova sa mga danay na namumuot sa Saiya.”—Sant. 1:12.