1-2. Bushe amashiwi yaba pali Esaya 65:16, 17 yatukoselesha shani ukukananenuka?

UMUTWE wa kulongana kwa citungu ukwa mu 2017 waleti, “Te Kwesha Ukunenuka!” Pali uku kulongana twalisambilile ifyo twingacita pa kuti tuleshipikisha amafya tukwata. Nomba napapita imyaka 4 ukufuma apo twakwatile uku ukulongana kwa citungu, kabili tucili tuleshipikisha amafya muli cino calo cabipa.

² Bwafya nshi mwakwete nomba line? Bushe mwalifwililwe lupwa nelyo cibusa wenu? Bushe mwalilwala ubulwele ubukalamba? Bushe namukwata amafya pa mulandu wa kuti namukula? Bushe balimucushishepo nelyo ukumusansa? Bushe mwaliponenwe no busanso ubukalamba? Nelyo bushe mwalikwata ubwafya pa mulandu wa bulwele bumo pamo ngo bulwele bwa COVID-19? Tulafwaisha sana ukuti inshita ikafike ilyo ifyabipa fishakabeko, kabili tatwakalafibukisha no kufibukisha!—Belengeni Esaya 65:16, 17.

3. Finshi tufwile ukulacita pali ino nshita, kabili mulandu nshi?

³ Ifintu muli cino calo cabipa nafyafya, kabili nalimo ku ntanshi kukaba amafya ayakalamba ayo tukalakabila ukushipikisha. (Mateo 24:21) Kanshi ino e nshita tulingile ukusambilila ukulashipikisha. Mulandu nshi? Yesu atile: “Nga mwashipikisha e lyo mukaba aba mweo.” (Luka 21:19) Nga tuletontonkanya pa bantu abaleshipikisha amafya ayapalana na yo tukwata, cikalenga tukaleshipikisha.

4. Cinshi twingalandila ukuti Yehova e ushipikisha sana kabili e o tulingile ukupashanya?

⁴ Nani uushipikisha sana uo tulingile ukupashanya? Ni Yehova Lesa. Bushe camupapusha ukumfwa ifi? Nalimo camupapusha. Lelo nga mwatontonkanyapo sana, kuti mwaumfwikisha ico twalandila ifi. Satana Kaseebanya e uteka cino calo, kabili mu calo mwaliba amafya ayengi nga nshi. Yehova alikwata amaka.  Kanshi nangu ni lelo line fye kuti apwisha amafya yonse ayo tukwata, lelo alalolela inshita ilyo akapwisha amafya ku ntanshi. (Rom. 9:22) Kanshi pali ino nshita, Lesa wesu alashipikisha ukufikila inshita ilyo akonaula cino calo cabipa. Lekeni tusambilile pa fintu 9 ifyo Yehova ashipikishako.

5. Bushe ishina lya kwa Lesa baliseebanya shani, kabili mumfwa shani ifi baliseebanya?

⁵ Yehova alashipikisha pa fyo baseebanya ishina lyakwe. Yehova alitemwa ishina lyakwe, kabili afwaya bonse balelicindika. (Esa. 42:8) Lelo pa myaka nalimo 6,000 iyapita, ishina lyakwe baliliseebanya. (Amalu. 74:10, 18, 23) Uyu umuseebanya watendeke mwi bala lya Edeni ilyo Kaseebanya, icalola mu kuti “Uwa Lwambo,” abepeshe Lesa ukuti alitanine Adamu na Efa ifintu ifisuma ifyali no kulenga baba ne nsansa. (Ukute. 3:1-5) Ukutula ilya nshita, Yehova balamubepesha ukuti tapeela abantu ifisuma ifyo bakabila. Yesu alisakamene pa fyo baseebenye ishina lya kwa Wishi. E mulandu wine aebele abasambi bakwe ukulapepa ati: “Shifwe wa mu muulu, ishina lyenu libe ilya mushilo.”—Mat. 6:9.

6. Cinshi Yehova alekela papita inshita ilyo ashilalenga caishibikwa ukuti e wakwata fye insambu sha kuteka ku muulu na pano isonde?

⁶ Abengi balakaana Lesa kabili balakaana no kuti alebateka. Yehova e wakwata fye insambu sha kuteka mu muulu na pano isonde, kabili imitekele yakwe e yawamisha. (Ukus. 4:11) Lelo Kaseebanya ena alefwaya ukubeleleka bamalaika kabili alyeseshe ukubabeleleka. Na kabili ukutula na kale alafwaya ukubeleleka abantunse pa kuti baletontonkanya ukuti Lesa takwata insambu sha kubateka. Nomba pali no kupita inshita pa kuti Yehova alenge cishibikwe ukuti e wakwata fye insambu sha kuteka, no kuti e kateka umusuma sana. Apo Lesa wa mano, alipeela abantunse inshita iikalamba iya kuiteka pa kuti bashininkishe ukutila te kuti baiteke abene. (Yer. 10:23) Ifi Lesa atekanya akalenga cikeshibikwe ukuti e walinga ukuteka, kabili takwakabe uukatwishika ukuti e wakwata fye insambu sha kuteka. Bonse bakeshiba ukuti imitekele ya kwa Yehova e yawamisha, no kuti Ubufumu bwakwe e bukalenga fye pano isonde ponse pakabe umutende.

7. Ni bani bapondokela Yehova, kabili finshi akabacita?

⁷ Abana bakwe bamo balimupondokele. Ilyo Yehova apangile bamalaika na bantu, abapangile abapwililika. Nomba Satana (icalola mu kuti “Uukanya”) malaika uwapondweke alilengele Adamu na Efa abali abapwililika nabo bapondokela Yehova. Kabili kwali bamalaika na bambi e lyo na bantunse bamo abapondokele Yehova. (Yuda 6) Lyena pa numa, uluko ulwa bena Israele, abantu abo Lesa asalile, na bo bene balimukeene no kutendeka ukupepa balesa ba bufi. (Esa. 63:8, 10) Ifi bacitile fyelengele Yehova omfwe ukuti nabamupondokela. Na lyo line, alishipikishe kabili akatwalilila ukulashipikisha mpaka na lintu akonaula bonse abamupondokela. Lyena Yehova na bonse ababa ne cishinka kuli ena, bakaba ne nsansa pantu bakaleka ukushipikisha ifyabipa ificitika muli cino calo!

8-9. Bufi nshi babepesha Yehova, kabili finshi tulingile ukucitapo?

⁸ Ubufi ubo Satana Kaseebanya abepa. Satana alibepeshe Yobo ilyo atile ababomfi ba kwa Yehova bonse aba cishinka babombela Lesa pa mulandu wa kuti alabapeelako fimo. (Yobo 1:8-11; 2:3-5) Satana Kaseebanya alitwalilila ukubepesha abantu ukufika na muno nshiku. (Ukus. 12:10) Nga tuleshipikisha amesho no kutwalilila ukuba aba cishinka kuli Yehova pa mulandu wa kuti twalimutemwa, tukalanga ukuti ifyo Satana alanda bufi ubwafiita fititi. Kanshi nga twatwalilila ukushipikisha, Yehova  akatupaala nga filya fine apaalile Yobo.—Yako. 5:11.

⁹ Satana abomfya intungulushi sha mu mipepele ya bufi ishisambilisha ifilenga abantu balamona ukuti Yehova munkalwe kabili e ulenga fwe bantu tulecula. Bamo basambilisha no kuti abana nga bafwa, batila ni Lesa e ubasenda pantu ninshi alefwaya bamalaika na bambi ku muulu. Ukulanda ifi kusaalula Lesa! Lelo ifwe twalishiba ukuti Yehova ni Shifwe uwaba no kutemwa. Kanshi nga twalwala ubulwele ubukalamba nelyo nga ca kuti lupwa lwesu nelyo cibusa afwa, tatupeela Lesa umulandu. Lelo twalicetekela ukuti kasuba kamo Yehova akafumyapo amalwele kabili akabuusha abafwa. Kanshi tufwile ukwebako bonse abengatemwa ukukutika ukuti Yehova ni Lesa uwaba no kutemwa. Nga twacita ifi, Yehova akasuka uumuseebanya.—Amapi. 27:11.

10. Finshi Amalumbo 22:23, 24 yatweba pali Yehova?

¹⁰ Ababomfi bakwe abo atemwa nga balecula. Apo Yehova Lesa alomfwila abantu uluse, tomfwa bwino ukumona balecula nalimo pa mulandu wa kuti balebacusha, balelwala, nelyo pa mulandu wa kukanapwililika. (Belengeni Amalumbo 22:23, 24.) Yehova aleshiba amafya tukwata; alafwaya ukuyapwisha, kabili akayapwisha. (Linganyeniko Ukufuma 3:7, 8 na Esaya 63:9.) Inshita ileisa ilyo “akafuuta ifilamba fyonse ku menso [yesu], ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—Ukus. 21:4.

11. Cinshi Yehova afuluka pa babomfi bakwe abafwa abali aba cishinka kuli ena?

¹¹ Alashipikisha ukukanaba pamo ne fibusa fyakwe abafwa. Bushe Yehova omfwa shani pa baume na banakashi abali ne cishinka kuli ena abafwa? Alafulukisha ukubamona! (Yobo 14:15) Elenganyeni ifyo Yehova afulukisha ukumona cibusa wakwe Abrahamu. (Yako. 2:23)  Nelyo Mose uo balelanshanya nankwe ninshi “nabaloshanya ifinso.” (Ukufu. 33:11) Kabili elenganyeni ifyo Yehova afulukisha ukumfwa Davidi e lyo na bakemba ba malumbo bambi balemwimbila inyimbo sha kumulumbanya! (Amalu. 104:33) Nangu ca kuti ifi ifibusa fya kwa Lesa balifwa, Yehova tabalaba. (Esa. 49:15) Alebukisha imibele yabo yonse. Baibolo itila: “Kuli ena bonse ba mweo.” (Luka 20:38) Bushiku bumo akababuusha, kabili akakutika ku mapepo yabo no kupokelela ukupepa kwabo. Nga ca kuti mwalifwilwa balupwa nelyo ifibusa, ukutontonkanya pali ifi kuti kwamusansamusha.

12. Finshi maka maka ifilecitika muli shino nshiku sha kulekelesha ifilenga Yehova aleumfwa ububi?

¹² Abantu ababipa balacusha abanabo. Ilyo Adamu na Efa bapondweke mu Edeni, Yehova alishibe ukuti ifintu fyali no kubipa. Lyena pa numa fyali no kuwama. Yehova alipata ububifi, ulufyengo, no bunkalwe ififulile muno nshiku. Kabili lyonse alasakamana abashakwata aba kubacingilila pamo nga abana banshiwa na bamukamfwilwa. (Seka. 7:9, 10) Yehova alomfwa ububi nga amona ababomfi bakwe aba cishinka balebacusha nelyo ukubakaka. Muleibukisha ukuti Yehova alimutemwa bonse mwe baleshipikisha nga filya fine na o ashipikisha.

13. Finshi ifyabipa ifyo Lesa amona abantu balecita, kabili finshi akacitapo?

¹³ Abantu pali ino nshita balacita sana ubulalelale. Lesa apangile abantu ukuti balemupashanya, lelo Satana ena afwaya ukuti balecita ifyabipa. Mu nshiku sha kwa Noa ilyo “Yehova amwene ukuti abantu bacilamo ukucita ifyabipa pano isonde . . . alangulwike ico apangiile abantunse pano isonde, kabili aumfwile ubulanda mu mutima wakwe.” (Ukute. 6:5, 6, 11) Bushe ukufuma ilya nshita ifintu mu calo fyaliwaminako? Awe! Satana alitemwa sana ifi abantu bacita ubulalelale bwa misango yonse pamo nga abaume ukulaala na banakashi abo bashaupana nabo, abaume ukulaala na baume banabo, nelyo abanakashi ukulaala na banakashi banabo. (Efes. 4:18, 19) Satana alacilanapo ukutemwa nga amona ababomfi ba kwa Yehova bacita imembu ishikalamba. Ilyo inshita ikafika iya kuti Yehova akafumyepo ifyabipa, akonaula bonse abacita ifyabipa abashifwaya ukwaluka kabili ici cikalanga ukuti alipata imibele yabipa.

14. Finshi abantu bacita kwi sonde ilyo Lesa apanga e lyo ne fyabamo?

¹⁴ Abantu baleonaula isonde. Abantu tabapelela fye pa ‘kuteka abantu banabo ku kubacusha,’ lelo tabasunga bwino ne sonde e lyo ne nama isho Lesa abapeela. (Luk. Mil. 8:9; Ukute. 1:28) Abasambilila bamo batila ifyo abantu bacita fikalenga inama ishingi ne fimenwa fikalobe mu myaka fye iinono ku ntanshi. Kanshi e mulandu wine abantu basakamikilwa pa filecitika kwi sonde ne fyabamo. Nomba Yehova alilaya ukuti ‘akonaula abaleonaula isonde’ kabili akalilenga ukuba paradaise.—Ukus. 11:18; Esa. 35:1.

15-16. Cinshi cifwile ukulenga twalashipikisha amafya nga filya Yehova ashipikisha? Langilileni.

¹⁵ Tontonkanyeni pa mafya ayengi ayo Shifwe wa ku muulu ashipikisha pa myaka iingi nga nshi iyapita. (Moneni akabokoshi akaleti “ Ifyo Yehova Ashipikisha.”) Yehova kuti afumyapo ifyabipa ificitika muli lino isonde inshita fye iili yonse. Ifi Yehova atekanya fyalilenga twanonkelamo! Natulangilile, tutile abaupana abale-enekela ukukwata umwana babeba ukuti umwana wenu akafyalwa na malwele ayakalamba, lyena pa numa ya kufyalwa takekale imyaka iingi, akafwa. Lelo abafyashi balatemwa ilyo umwana afyalwa, nangu ca kuti bakakwata amafya pa kumusakamana. Apo balitemwa  umwana bakalashipikisha amafya yonse ayo bakalakwata pa kuti bakalemusakamana bwino.

¹⁶ Ifi fine e fyo caba na ku bana ba kwa Adamu na Efa, bafyalwa abashapwililika. Lelo Yehova alibatemwa kabili alabasakamana. (1 Yoh. 4:19) Nomba Yehova alipusanako na bafyashi abo tulandilepo mu cilangililo, pantu ena alikwata amaka ya kufumyapo amafya abana bakwe baculako. Alisala ubushiku ilyo akafumyapo amafya yonse ayo abantunse bakwata. (Mat. 24:36) Ukwishiba ukuti Yehova alitutemwa kufwile ukulenga tuletwalilila fye ukushipikisha amafya.

17. Bushe ifyo Baibolo ilanda pali Yesu pa AbaHebere 12:2, 3 kuti fyatukoselesha shani ukulashipikisha?

¹⁷ Yehova e o tulingile ukupashanya ukushipikisha. Yesu alepashanya Wishi ukushipikisha. Ilyo Yesu ali pano isonde alishipikishe ilyo balemutuka, ilyo balemuseebanya, na lintu alefwa pa mulandu wesu pa cimuti ca kucushiwilwapo. (Belengeni AbaHebere 12:2, 3.) Ifyo Yehova ashipikisha fyalikoseshe Yesu, kabili fyalengele na o aleshipikisha. Kabili na ifwe kuti fyatukosha.

18. Bushe ilembo lya kwa 2 Petro 3:9 litwafwa shani ukumfwikisha ifyacitika ifi Yehova atekanya?

¹⁸ Belengeni 2 Petro 3:9. Yehova alishiba inshita iisuma iyakonaula cino calo cabipa. Pa mulandu wa kuti alitekanya, abantu abengi nga nshi balisambilila pali ena no kumwishiba, kabili pali ino nshita ili ibumba likalamba balamupepa. Bonse fye balitemwa ifi Yehova atwalilila ukushipikisha ica kuti basuka bafyalwa, basambilila pali ena, bamutemwa kabili baipeela na kuli ena. Ilyo abantu abengi nga nshi bakashipikisha ukufika na ku mpela, e lyo cikeshibikwa ukuti kanshi Yehova alicitile fye bwino ukutwalilila ukushipikisha.

19. Finshi tulingile ukutwalilila ukulacita, kabili cilambu nshi tukapokelela?

¹⁹ Tulasambilila kuli Yehova ifyo twingaba ne nsansa ilyo tuleshipikisha. Nangu ca kuti Satana alicita ifintu ifingi ifikalifya Yehova kabili ifilenga aba no bulanda, alitwalilila ukuba “Lesa wa nsansa.” (1 Tim. 1:11) Na ifwe bene kuti twatwalilila ukulasekelela ilyo tulelolela ukuti Yehova akalenge ishina lyakwe ukucindikwa, akalange ukuti e walinga ukuteka, akafumyepo ababifi bonse, e lyo no kufumyapo amafya yonse ayo tukwatwa. Kanshi lekeni tutwalilile ukulashipikisha no kulaba ne nsansa, pantu twalishiba ukuti Shifwe wa ku muulu na o alatwalilila ukushipikisha. Na kuba Baibolo itila: “Alipaalwa umuntu uushipikisha ubwesho, pantu nga aba uwasuminishiwa akapokelela icilambu ca mweo, ico Yehova alaile abatwalilila ukumutemwa.”—Yako. 1:12.