1-2. Asas risai ḇesya ro Yesaya 65:16, 17?

”WASUSU AWER!” iso tema ḇepyum ro munara sarawrow taun 2017. Ro munara ani kofarkor moḇsa kofarmku rofyor kosmai samswen. Ro munara ani, kofarkor nyan fa kofarmku ro samswen na. Kirine, taun rifyak ḇyenande kwar fyor kofrur munara sarawrow ani, ḇape kosmai kaker ras ḇefo kuker roi ḇedwarek ro babo ine.

² Samswen risai insape wasmai babo na? Kina bedi ḇaido bati ḇefanam bedi isya imarbur Au ke? Ausya waduf marḇak ke? Kenem bedi isya samswen syadi ke snar waḇeumur kwar? Rim ḇeba, ḇaḇeḇarḇor, ḇaido ḇaḇewayam nasya nkur Au ke? Ausya waksmai dafduf COVID-19 ḇaido dafduf ḇesena ke? Na kowaf kaku fafisu kandera nakam nandebur ko, fyor koḇefnder ma kowasen kaḇer roi ḇekur kona ḇa!​—Wasya Yesaya 65:16, 17.

3. Rosai na kofrur kaku ya, ma rosai ḇefnai fa ine fyandun kaku?

³ Kokenem ro babo inema napyan ḇa, ma imbude nari kosmai samswen ḇemarḇak syadi wer. (Mat. 24:21) Inja, na kofarmkuepen pdef. Rosai ḇefnai fa ine fyandun kaku? Snar Yesus doḇe, ”Rofyor mgofarmku ido, nari mgokenem pdef.” (Luk. 21:19) Insama kofarmku, bisa kokarauser snonggaku ḇefasnai pyum ḇaḇefarmku bena samswen ḇemnis ra ko.

4. Rosai ḇefnai fa Yahwe iso ḇefasnai pyum kaku ḇaḇefarmku ya?

⁴ Mansei ḇefasnai pyum kaku ḇaḇefarmku ya? Allah Yahwe I. Imbude, na kwara ḇaḇeri Yahwe I kako dakfarmku. Ḇape kwara pan: Dunya ine Ibiris iso ḇepoik ya, inja samswen nari rya namnai ḇa. Kakuya bisa Yahwe ipyos beri samswen anna kam. Fama, ikaḇaḇaḇ fa iwaf fafisu ḇesrow fa ifrur roi anna kam. (Rm. 9:22) Kirine, Allah koḇedi kyinfir fa fyarmkuepen pdef ro roi nabore. Mgorama kawos roi risiw anane.

5. Rariso Allah snonsnon Ḇyedi sanonef i ma rariso sneḇaḇir ḇyedi faro roi ani?

⁵ Sanonef snonsnon Ḇyedi. Yahwe ima myam snonsnon  Ḇyedine fyandun kaku, ma imarisen snonggaku sya kam sesyowi snonsnon Ḇyedi. (Yes. 42:8) Ḇape indokada ro swaf taun ri 6.000 ḇarpur ine, snonsnon ḇepyum Ḇyedi sifrur naḇyeḇa i. (Mz. 74:10, 18, 23) Ine nejadi randak ro Yaf Eden. Fafisu anya, Ibiris (knam ḇyediso ”Manḇeanonef”) kyursof ḇo doḇe Allah idwarek roi oso na ḇefrur Adam ma Eva susmai aski ya. (Kej. 3:1-5) Ro fafisu ani, skursof Yahwe I ker snar soḇe dun askibur snonggaku sya. Yesus imarisen ḇaḇeri myam Kmari snonsnon Ḇyedi sanonef i. Inja, fyarkor manfamyan ḇyesi fa senadi radine, ”Kma nkobedi ro boiyaswa, Nkofasren Snomḇri kada.”​—Mat. 6:9.

6. Rosai ḇefnai fa Yahwe myam ḇo snonggaku sya sḇepoik ro swaf kawane?

⁶ Sifuken hak Ḇyedi fa ḇyepoik rai. Kakuḇae, Yahwe imonda iso Bena hak fa ḇepoik ro nanggi ma supswan ine. Osower ido, nyan ḇyepoik iso ḇepyum syadi kaku. (Why. 4:11) Ḇape, Ibiris ḇyesewar fa ifrur malaikat ma snonggaku sya skara Allah nya hak fa ḇyepoik ḇa. Imbo, samswen ine na imnai fasaw ḇeri ḇa. Inja, Allah ḇefawinanem koḇedi myam ḇo snonggaku sḇepoik ro manggunsi ro swaf kawane, insama smam ro manggunsi snar sḇepoik ro manggunsi nari nun payamyum oḇa fyor srower Manbefrur ya ḇa. (Yer. 10:23) Snar Allah ikaḇaḇaḇ, braur Ḇyesi kam bisa smam snar Iso Manḇepoik ḇepyum kaku syadi ma Karajan Ḇyedi monda na ḇefrur supswan ine ḇyeaski ma ipyum. Inja, nari snonggaku oso ḇaḇeri na ḇefuken Yahwe hak ḇyedi fa ḇyepoik.

7. Mansei monda ḇembrob faro Yahwe, ma rosai nari Ifrur ya?

⁷ Bar ḇeba ro romawa Ḇyesi simbrob I. Randakya, Yahwe ifrur romawa Ḇyesine, isoine malaikat ma snonggaku sya, sikame sinapes. Ḇape faḇye mura, malaikat ḇarpur ya sap ḇe Setan (knam ḇyediso ”Manbesampampum”) imbrob Yahwe I. Mura, ifrur Adam ma Eva su kako susampum ḇaido sumbrob Yahwe I. Ḇarpurya Malaikat ḇebor ma snonggaku ḇesesya sakwarpu fa simbrob I. (Yud. 6) Ma ono ro snonggaku Israel, Allah kawasa kyinfir sya, sakbur I ma saksyom amfyainir. (Yes. 63:8, 10) Inja, sifrur Yahwe fyafko kaku. Ḇape ikaḇaḇaḇ pdef, ma fyarmkuepen pdef isof ro oras ya ryama ipyos ḇembrob I sya kam. Ras ani ryama ido, snonggaku ḇesouser faro Yahwe nari sismai sneprei, snaro ro fafisu ine sifarmku kwar kuker I ro roi ḇeḇyeḇa sismai ro dunya Setan ya.

8-9. Kursof rosai Setan dawos ḇe Yahwe I, ma rariso kofasnai wos ḇyena nkaku ḇa?

⁸ Ibiris danggarkar ker. Ayub ima Yahwe manfamyan ḇesouser Ḇyedi. Ḇape, Setan kyursof Ayub i ma kako manfamyan ḇesouser syakam doḇo sima suffarmyan ḇe Yahwe I snar imbe sismai roi oso monda. (Ayb. 1:8-11; 2:3-5) Isof ro kirine, Ibiris danonef ko kaker. (Why. 12:10) Ko oser-oser bisa kofasnai snar roi Setan kyursof nama nkaku ḇa. Komarisen kofarmku pdef fyor kosmai fafrowes ma koswar Yahwe I inja kosouser pdef faro I. Ma kofarmku ido, nari Yahwe ḇyebarakas ko raris Ayub i.​—Yak. 5:11.

⁹ Setan byepake manfarkin agama ḇekakuḇa sya fa sikofen roi ḇekaku ḇa ḇekur Yahwe I. Soḇe Yahwe ima irarmomen, ma Iso ḇefrur snonggaku sya sekandera ya. Syadi wer, rofyor romawa kapira oso ryo ido, sia soḇe Manseren ḇeyor romawa ani, snar Manseren fyandun malaikat sibor ro nanggi yaswa. Roi ine nkaku ḇaḇeri! Kofawi Yahwe, Kma koḇedi iswar kaku ko. Fyor kosmai dafduf ḇemarḇak ḇaido snonggaku koswar sya srobur ko ido, nari kobuk sasar  ya faro Allah koḇedi ḇa. Ḇape, kokyar ras oso nari ipyosbur dafduf nakam ma ḇyawes snonggaku ḇemar kwar sya. Inja bisa kokofenḇair ḇe snonggaku syakam snar Yahwe ima Allah ḇesawarwar dirya. Kofrur rarirya ido, Yahwe nari kyarem Setan anonef ḇyena.​—Ams. 27:11.

10. Ro Mazmur 22:23, 24 rosai kofarkor ro Yahwe I?

¹⁰ Manfamyan Iswar Ḇyesi sekandera. Yahwe ima Allah ḇesawarwar rirya. Ḇyesneso kaku fyor myam koḇekandera, imnis ra kosmai ḇaḇewayam, dafduf, ḇaido ḇaḇenanapesḇa koḇena. (Wasya Mazmur 22:23, 24.) Yahwe ḇyaḇir susa koḇena. Imarisen ipyosbur na, ma nari ifrur kaku na. (Mam kako Keluaran 3:7, 8; Yesaya 63:9.) Ro fafisu ya, ”Nari ipyos mkarui nakambur mka [koḇena], snar marmarya isyaḇa kwar; sne ḇefafardun, kankanes, roḇa dafduf naisyaḇa kako”.​—Why. 21:4.

11. Rosai Yahwe imander ro manfamyan Ḇyesi ḇemar kwar sya?

¹¹ Bati ḇebor Ḇyesya simar kwar. Rariso Yahwe sneḇaḇir ḇyedi faro snonggaku ḇekyar ḇemar kwar sya? Imander kaku si! (Ayb. 14:15) Kwarauser pan moḇsa Yahwe imander kaku faro bati Ḇyedi, Abraham i? (Yak. 2:23) Ḇaido faro Moses, Yahwe ”dawos beri” ḇe i ani? (Kel. 33:11) Ma kaku nari imarisen ryower wer doya ḇepyum Daud idisen na ma Manḇefas Mazmur eḇese fa sisandik I! (Mz. 104:33) Bati Ḇyesine kam senef kwar ro marmar ya kwar rariyano, Yahwe ipok ḇyefnder si ḇa. (Yes. 49:15) Iswarepen kaku roi nakam ro si, snar myam ”sikenem ro ḇarpon ḇyedi.” (Luk. 20:38) Ro fafisu iyama, nari ḇyawes si. Mura, na ryower wer nadi sor kuker sne ḇesiper sena ma myam sisyom I wer. Inja, rofyor snonggaku waswar oso isya ḇa kwar, iḇye kada wasmai sneprei kukro wafawi Yahwe dakḇaḇir rosai waḇaḇir na.

12. Rosai ḇefrur fa Yahwe iduf kaku ro ras papupes fafisu ine?

 ¹² Snonggaku ḇeḇarḇor sifrur kandera snonggaku ḇebor sya. Rofyor ḇaḇembroḇ isya ro Yaf Eden, Yahwe ifawi roi ḇero dunya ine nari naḇyeḇa syadi wer fyor ryama ḇaim. Imarisen ḇa kaku myam roi ḇeḇarḇor, ḇaḇenanapes ḇa na, ma mamunmun ḇejadi ro kirine na. Randak iwara, iswar kaku snonggaku ḇeryar ḇa sya ma ḇesambraḇ ḇa, raris ḇeḇeawak ma ḇekabom sya. (Za. 7:9, 10) Ma, Yahwe iduf kaku fafisu myam manfamyan ḇesouser ḇyesi sewayam si ma sisun si ḇe bui. Kokyar, Yahwe iswar kaku ḇefarmku kuker I syakam.

13. Roi ḇeḇyeḇa risai Allah myam ro fafisu koḇedine, ma rosai nari ifrur kaku ya?

¹³ Snonggaku sikenem naḇyeḇa syadi. Kakuya, snonggaku ḇyeḇefrur imnis kuker Allah. Ḇape, Setan imarisen sifrur roi ḇeḇyeḇa na. Rofyor Yahwe ”myam snar roi ḇeḇarḇor nabor kaku ro supswan” ro Nuh fafisu ḇyedi, ”Ḇyesneso kaku ifrur snonggaku ro supswan ine kwar, ma sne Ḇyedi iduf kaku”. (Kej. 6:5, 6, 11) Kenem koḇena ro fafisu ine ipyum syadi kwar ke? Aroḇa beri! Farḇakḇuk famfnom nabor naisya, raris farḇakḇuk famfnom ro snon kuker bin ma snon kuker snon. (Ef. 4:18, 19) Ine na nafrur Ibiris imarisen kaku. Ma, imarisen kaku wer fyor ifrur fa Yahwe manfamyan ḇyesya sisapi ro sasar ya. Ḇape, Yahwe kaḇaḇaḇ Ḇyena nabro kwar. Inja, Yahwe ima dayin farḇakḇuk famfnom nakam. Nari myunpres snonggaku ḇefrur rarirya sya ma ḇemewer ḇefadwer kenem sena.

14. Rosai ḇejadi ya snar fararur snonggaku sifrur na kuker supswan ine ma aiwan sya?

¹⁴ Snonggaku sya sifrur Yahwe ḇraur Ḇyena napyum ḇa. Yahwe ikyar snonggaku sya kwar fa sfaduru pyum ḇraur Ḇyena. Ḇape, snonggaku sya ”sepoik snonggaku sya inja nun royoḇa ḇe manggunsi” monda ḇa, ḇoi nun roi ḇepyum ḇa kako ḇe supswan ma aiwan sya. (Pkh. 8:9; Kej. 1:28) Manfawinanem sya soḇe, ro taun riḇeso ḇe ḇarpon ine, yuta oser ro spesies * ro aiwan sya nari sibro snar roi snonggaku sifrur nane. Inja, snonggaku sya simgak supswan ine nari imgok! Ḇape, kasumasa faro Yahwe snar ḇyeasas kwar nari fyadwer supswan ine ḇesiper ḇe firdaus.​—Why. 11:18; Yes. 35:1.

15-16. Rosai ḇedif ko fa kofarmku kuker Yahwe? Fasnaiḇair pan.

¹⁵ Kwara pan samswen nabor Kma kobedi ro nanggi ismai na ro taun syaran risyaran. (Mam kotak ” Yahwe Fyarmku Fyor.”) Yahwe bisa ipyos dunya ḇeḇarḇor ine ras risai monda. Ḇape, kyinfir fa fyarmku, ma Yahwe kaḇaḇaḇ Ḇyena nbuk barakas faro ko! Ine imnis raris: Imbeswa oso sikofenḇair ḇesu snar romawa subedi nari ḇyeḇekapar mundi ḇoi ḇaken ḇyena na namnis kam ḇa ḇaido ḇyecacat. Na ikenem kawan ḇa, ma ro ras kankenem ḇyena na ḇyekandera. Sinan ḇyesuya sufawi na napyan ḇa ḇesu fa sufaduru i. Rariryano, sumarisen rofyor romawa suḇedi ḇyeḇeaḇen. Snar suswar romawa ani, inja samswen risai monda susmai na rariryano sumarisen subuk kankenem ḇepyum syadi faro i.

¹⁶ Rarirya kako, kpu up ro Adam ma Eva suḇesya kam sinapes ḇa fyor sḇeḇeaben ya. Ḇape, Yahwe iswar si pdef ma imarisen fyaduru si. (1 Yoh. 4:19) Ro fawar insandi, romawa anine sinan ḇyesuya suḇesewar marmar kaku kwar, ḇoi romawa ani na ḇyekandera kaker. Bape Yahwe I, syambraḇ  fa ipyosbur kandera nakam snonggaku sya sismai na. Ma manggundi dap kwar fafisu nari ifrur na. (Mat. 24:36) Kokarauser Yahwe saswar Ḇyena ido, nari nadif ko fa kofarmku kuker I isof ro fafisu sairirya monda kako.

17. Rariso Yesus farari ḇepyum ḇyena ro Ibrani 12:2, 3 nafnoḇek ko fa kofarmku pdef rai?

¹⁷ Yahwe byuk farari ḇepyum ma ḇemnis kaku ro ḇaḇefamku ine, ma Yesus dakso ḇaḇefarmku ro Kmari. Rofyor ryo supswan ani, Yesus imarisen fyarmku fyor skoryae, sifrur mamyai i, ma imar ro ai kandera snar ine faro ko. (Wasya Ibrani 12:2, 3.) Yesus bisa fyarmku ro roi ismai nane kam, snar kyarauser Yahwe nyan ḇepyum Ḇyena. Inja, ko kako bisa kofarmkuepen pdef fyor kokara roi ani.

18. Imnis 2 Petrus 3:9 ya, rosai bon ro Yahwe kaḇaḇaḇ Ḇyena?

¹⁸ Wasya 2 Petrus 3:9. Yahwe ifawi fafisu risai ḇesrow kaku fa ipyosbur dunya ḇeḇyeḇa ine, ma isya ḇyekaḇaḇaḇ pdef isof ro ras ani ryama. Snar Yahwe kaḇaḇaḇ Ḇyena, snonggaku ḇebor sismai swaf fa sakmambir I. Ma kirine, snonggaku riyuta sisya sisyom ma sinandik I ḇe raryur ḇeba. Sikame sikofen kasumasa snar Yahwe imarisen fyarmku kawane insama sḇeḇeaḇen, sfarkor fa siswar I, ma ḇarpur ya sakbuk kankenem manggun sena ḇe I. Rofyor snonggaku riyuta ansine sfarmku isof pupes ya, Yahwe nari ḇyebarakas si. Ro ras anya komam snar Yahwe snemuk dun fa farmku isof kirine inema snemuk ḇepyum kaku.

19. Rosai snemuk koḇena, ma barakas risai nari kosmai ya?

¹⁹ Ro Yahwe nyan fyasnai na, kofarkor moḇsa kofarmku kuker koryaḇ pdef. Setan ifrur snonggaku sya skanes ma sekandera kwar, ḇape Yahwe ima ’Allah ḇeaski’ pdef. (1 Tim. 1:11) Kokako na koryaḇ pdef fyor koisya kowaf kuker kaḇaḇaḇ isof Yahwe ifrur sren snonsnon Ḇyedi, fyasnai kaku hak Ḇyedi fa ḇyepoik, ipyosbur ḇaḇeḇarḇor nakam, ma ifrur mnai samswen koḇena kam. Mgorama kun snemuk fa kofarmku pdef, snar kofawi Kma koḇedi ro nanggi isya fyarmku kako! Kofrur rarirya ido, na ko oser-oser kosmai kankenem fyoro ya raris ḇekofen ro mnuk ine: ”Aski faro snonkaku ḇedworen ro fafrowesna, ma dores nako kwar ro manasnasen ido, nari isma wower kankenem Allah ḇyeasas faro mansei ḇeswar Allah.”​—Yak. 1:12.