1-2. Sonaha janji ni Naibata na isurat bani Jesaya 65:16, 17 boi patoguhkon uhurta?

TEMA ni kebaktian regional tahun 2017, ai ma “Jangan Menyerah!”. Bani kebaktian ai iulas do sonaha carani hita boi totap martahan age pe bahat sitaronon. Domma salpu ompat tahun kebaktian ai. Tapi ronsi sonari sai totap do adong sitarononta.

² Sitaronon aha do na iahapkon ham sonari on? Ra do marujung goluh halak na hinaholonganta. Dong hita na hona naborit na parah atap pe lang margogoh be halani domma matua. Dong na marsitaronon halani bencana alam, hajahaton, ampa ianiaya pamarentah. Leganni ai, sunsah do homa hita halani pandemi COVID-19. Tontu sai tarpaima-ima do hita sanggah isalpuhon Naibata ganup sitarononta ase lang be idingat-dingat hita ganup hasunsahan ai.​—Basa Jesaya 65:16, 17.

3. Aha do na maningon bahenonta, janah mase?

³ Halani hita manggoluh i dunia na jahat on, sai na lambin bahat do holi sitaronon. (Mat. 24:21) Halani ai ma maningon totap do hita sabar. Mase? Jesus mangkatahon, “Marhitei hasabaron do maluah hosahnima.” (Luk. 21:19) Ase boi hita totap sabar manaron na marsik, porlu do iulas hita contoh-contoh na patuduhkon hasabaron age pe dong na mambahen sunsah uhur ni sidea.

4. Mase Jahowa do contoh na sidearan na patuduhkon hasabaron?

⁴ Ise do contoh na sidearan na totap patuduhkon hasabaron? Ai ma Naibata Jahowa. Mase sonai? Rimangi ma on. Halani Sibolis do na manrajai dunia on, gabe bahat tumang sitaronon. Sasintongni boi do mintor iripaskon Naibata  Sibolis ai. Tapi lang sonai ibahen Naibata. Domma itontuhon Ia panorangni laho manripaskon Sibolis. (Rom 9:22) Janah sabar do Ia paimahon ronsi jumpah panorang ai. Sonari ulas hita ma sonaha Ia patuduhkon hasabaron.

5. Sonaha do goran ni Naibata ihina, janah sonaha pangahapmu halani ai?

⁵ Goran ni Naibata ihina. Maharga tumang do goran ni Jahowa. Halani ai, sihol do Ia ase ipasangap goran-Ni ai. (Jes. 42:8) Tapi, domma hira-hira 6.000 tahun goran-Ni ihina. (Ps. 74:10, 18, 23) Sanggah i Pohon Eden ma mungkahni goran ai ihina. Ijai ihatahon Sibolis (artini “Pemfitnah”) do lang ibere Jahowa bani jolma aha na mambahen sidea marmalas ni uhur. (1 Mus. 3:1-5) Anjaha sonai do ibahen Sibolis ronsi sonari. Lang marosuh Jesus mangidah goran ni Naibata ihina. Halani ai, iajarhon ia do susianni ase martonggo sonon, “Ham Bapanami na i nagori atas. Sai napapansing ma Goran-Mu.”​—Mat. 6:9.

6. Mase ipaturut Jahowa manisia mambahen pamarentahanni sandiri sadokah marribu tahun?

⁶ Bahat do na manlawan Jahowa pakon pamarentahan-Ni. Sasintongni Jahowa do na talup mamarentah surga ampa tanoh on janah pamarentahan-Ni do na sidearan. (Pangk. 4:11) Tapi ipengaruhi Sibolis ma malekat na legan pakon jolma ase sidea marpingkir lang talup Jahowa mamarentah. Halani ai ma ibere Jahowa panorang laho mambuktihon parladung do Sibolis ai. Ipaturut Jahowa ma jolma mambahen pamarentahan sandiri sadokah marribu tahun ase taridah lang dong pamarentahan ni jolma na dear. (Jer. 10:23) Halani hasabaron ni Jahowa, ibotoh hita ma pitah Ia dassa na talup mamarentah surga ampa tanoh on. Anjaha pitah Harajaon-Ni do na boi parohkon hadameion hu sab dunia on.

7. Ise do contohni na manlawan bani Jahowa, janah aha do na laho masa bani sidea?

⁷ Malekat pakon jolma manlawan dompak Naibata. Mungkahni sempurna do itompa Naibata malekat pakon jolma. Tapi ipengaruhi Setan (artini “Sipanlawan”) si Adam pakon si Hawa laho manlawan Naibata. Dong do homa malekat na dihut manlawan dompak Naibata. (Jud. 6) Leganni ai, ilawan bangsa Israel do homa Naibata anjaha isombah sidea do gana-gana. (Jes. 63:8, 10) Tontu pusok tumang do uhur ni Naibata halani ai. Tapi sabar do Ia paima-imahon ronsi jumpah panorangni Ia manripaskon ganup sipanlawan ai. Dob ai, marmalas ni uhur ma ganup juakjuak-Ni na totap setia hu Bani.

8-9. Aha do na ihatahon Sibolis pasal Jahowa, anjaha sonaha hita boi mambela goran ni Naibata?

⁸ Sai tongtong do ifitnah Sibolis juakjuak ni Naibata. Ai do na ibahen ia bani si Job na hinan. Ihatahon Sibolis do bani Naibata pitah halani mandapot pasu-pasu do ase ra si Job ai mangidangi Naibata. (Job 1:8-11; 2:3-5) Sonai do homa na ibahen Sibolis ronsi sonari. (Pangk. 12:10) Halani ai, patuduh hita ma na parladung do Sibolis ai. Totap ma hita setia bani Naibata age pe dong sitarononta. Patuduh ma halani holong do hita ra mangidangi Jahowa. Anggo ibahen hita sonai, ipasu-pasu Jahowa do hita songon si Job.​—Jak. 5:11.

⁹ Igunahon Sibolis do pemimpin ugama laho mangajarhon kejam do Naibata ai janah Ia do na mambahen jolma sunsah. Dong na mangajarhon anggo dong  dakdanak na matei, Naibata do na mangalop ai ase ibahen gabe malekat i surga. Tontu na pasamborhon goran ni Naibata do ajaran ai. Tapi, ibotoh hita do ajaran na sintong. Anggo hita hona naborit na parah atap pe matei halak na hinaholonganta, lang isalahkon hita Naibata. Pos do uhurta sasapon ni Jahowa do holi ganup sitarononta. Ipatugah hita do homa bani na legan parholong do Jahowa ai. Halani ibahen hita sonai, gabe boi ma ibalosi Jahowa ise pe na memfitnah Ia.​—Pod. 27:11.

10. Domu bani Psalmen 22:24, 25, Naibata na sonaha do Jahowa ai?

¹⁰ Pusok uhur ni Naibata mangidah juakjuak-Ni marsitaronon. Sanggah ididah Naibata sunsah hita halani iparburu halak, halani boritan, atap pe halani kelemahanta sandiri, pusok do uhur-Ni. Naibata na paridop ni uhur do Ia. (Basa Psalmen 22:24, 25.) Iarusi Ia do sonaha pangahapta sanggah marsitaronon. Janah sasapon-Ni do holi ganup na mambahen hita sunsah. (Bandingkon 2 Musa 3:7, 8; Jesaya 63:9.) Tontu sai tarpaima-ima do hita sanggah ‘iapus Naibata sagala iluh humbani matanta, seng dong be hamatean, age pusok ni uhur, age partangisan, age halojaon seng dong be’.​—Pangk. 21:4.

11. Sonaha do pangahap ni Naibata bani juakjuak-Ni na dob matei?

¹¹ Siholan do Naibata bani juakjuak-Ni na dob matei. Sonaha pangahap ni Naibata bani juakjuak-Ni na dob matei? Tontu siholan do Ia bani sidea. (Job 14:15) Boi do ibayangkon nasiam sonaha siholni Ia mangidah si Abraham? (Jak. 2:23) Siholan do homa Ia bani si Musa na ongga marsahap pakon-Si “dumpar bohi”. (2 Mus. 33:11) Anjaha sihol tumang uhur-Ni mangidah si Daud pakon juakjuak-Ni  na mandodingkon pujian hu Bani. (Ps. 104:33) Age pe domma matei sidea, lang ihalupahon Jahowa sidea. (Jes. 49:15) Idingat Jahowa do haganup pasal sidea. Songon na ‘manggoluh do haganup sidea’ i lobei-Ni. (Luk. 20:38.) Papuhohon ni Naibata do holi haganup sidea. Ididah Naibata ma holi martonggo use sidea hu Bani ampa manombah-Si. Anggo irimangi hita ai, gabe tarapoh ma uhurta anggo dong kaluarga atap hasomanta na marujung goluh.

12. Aha ope na mambahen pusok uhur ni Jahowa bani panorang parpudi on?

¹² Pusok do uhur-Ni mangidah jolma marsitaronon halani hajahaton. Dob mardousa manisia, ibotoh Jahowa do bahat do holi hajahaton na masa i tanoh on. Lang marosuh Ia mangidah na jahat ampa na lang adil. Holong do atei-Ni mangidah halak na galek, na tading maetek, ampa na dob mabalu. (Sak. 7:9, 10) Pusok do homa uhur-Ni anggo dong juakjuak-Ni na ipenjarahon atap pe ianiaya. Pos ma uhurta sai tongtong do ihaholongi Jahowa juakjuak-Ni na totap sabar sanggah marsitaronon.

13. Sonaha do parlahou ni bahat halak sonari on, janah aha do na laho ibahen Naibata bani sidea?

¹³ Lambin bahat do na mangkorjahon na butak. Mungkahni itompa Naibata do jolma usih songon paruhuran-Ni. Tapi ipengaruhi Sibolis do jolma laho mangkorjahon na butak ampa na jahat. Sanggah ididah Jahowa “lambin roh banggalni hajahaton” bani masa ni si Noak, ‘isolsoli Ia ma uhur-Ni, halani na tinompa-Ni ai jolma i tanoh on, pusok do uhur-Ni halani ai’. (1 Mus. 6:5, 6, 11.) Anggo ididah hita sonari lambin jahat do parlahou ni jolma. Sonang tumang Sibolis mangidah bahat jolma mangkorjahon seks na lang patut, umpamani songon homoseksual. (Ep. 4:18, 19) Anjaha marosuh do ia anggo dong juakjuak ni Naibata na mangkorjahon dousa na banggal. Magigi tumang do Jahowa mangidah halak na mangkorjahon na butak. Halani ai, ripaskonon-Ni do sidea holi.

14. Aha do na ibahen bahat halak bani tanoh on ampa tompaon na legan?

¹⁴ Iparseda jolma do tanoh on. Halani jolma manrajai jolma, parohkon hasedaon do ai i tanoh on. Lang iurus manisia homa tanoh on, binatang, ampa tompaon na leganni. (Par. 8:9; 1 Mus. 1:28) Piga-piga ilmuwan mangkatahon halani pambahenan ni jolma sonari on, dong hira-hira sajuta masam ni binatang ampa suan-suanan na hampir punah. Gabe bahat do na sunsah mangidah tanoh on lambin maseda. Tapi marjanji do Jahowa ‘uhumon-Ni ma sagala na mansedahon tanoh on’ janah bahenon-Ni ma tanoh on gabe paradeiso.​—Pangk. 11:18; Jes. 35:1.

15-16. Aha do na boi mangurupi hita maniru Jahowa ase totap sabar ibagas sitaronon? Bere ma limbaga.

¹⁵ Bahat tumang do na mambahen pusok uhur ni Jahowa sadokah marribu tahun. Tapi totap do Ia sabar. (Tonggor ma kotak “ Sabar do Jahowa Age pe. . . ”) Sasintongni boi do mintor iripaskon Naibata dunia na jahat on sadihari pe rosuh-Ni. Tapi lang ibahen Ia sonai. Halani hasabaron-Ni, bahat do gunani hubanta. Ase lambin iarusi hita pasal ai, rimangi ma contoh on. Ipatugah sada dokter ma bani pasangan suami istri, dong cacat ni anak ni sidea ibagas kandungan. Anggo itubuhkon pe anak ai, lang ganjang umurni. Age  pe sonai, holong do uhur ni sidea bani anakni ai janah malas do uhur ni sidea sanggah tubuh anakni ai. Marusaha do sidea pagodangkon ia age pe bahat tantangan.

¹⁶ Ganup ginompar ni si Adam isarupahon do songon anak na cacat humbani tubuh. Age pe sonai, holong janah parduli do Jahowa bani sidea. (1 Joh. 4:19) Anggo namatoras na isaritahon nongkan, lang bahat na boi ibahen sidea ase torus anakni ai sehat. Tapi anggo Jahowa sasapon-Ni do holi ganup sitarononta bani panorang na dob itontuhon Ia. (Mat. 24:36) Anggo irimangi hita holong ni Naibata, on boi mangurupi hita ase totap sabar ibagas sitaronon.

17. Sonaha sitiruon na ibahen Jesus na isurat bani 1 Petrus 2:21-24 boi mangurupi hita totap martahan?

¹⁷ Tangkas ma totap do sabar Jahowa age pe bahat na mambahen pusok uhur-Ni. (Basa 1 Petrus 2:21-24.) Itiru Jesus do Bapani. Age pe marsik tumang sitarononni ampa igantung bani sada hayu, tapi boi do ia totap setia halani manrimangi sitiruon humbani Bapani. Sonai ma homa anggo irimangi hita hasabaron ni Jahowa, on boi mangurupi hita totap martahan ibagas sitaronon.

18. Domu bani 2 Petrus 3:9, aha do gunani hasabaron ni Jahowa hubanta?

¹⁸ Basa 2 Petrus 3:9. Ibotoh Jahowa do sadihari panorang na topat laho manripaskon dunia na jahat on. Halani ai, sabar do Ia paimahon ronsi jumpah panorang ai. Halani hasabaron-Ni ai, gabe dong marjuta halak na boi mananda Jahowa janah manombah-Si. Isobut do sidea ai humpulan na banggal. Anggo totap setia sidea, ipasu-pasu Naibata ma sidea.

19. Aha do na sihol bahenonta, janah pasu-pasu aha do na laho ibere hubanta?

¹⁹ Age pe bahat parsoalan na ibahen Sibolis tapi totap do sabar Jahowa janah marmalas ni uhur halani “Naibata na martuah” do Ia. (1 Tim. 1:11) Halani ai, ase boi hita totap marmalas ni uhur ibagas sitaronon, sabar ma hita paimahon ronsi jumpah panorangni Naibata papansingkon goran-Ni. Isasap Naibata do holi ganup sitarononta ampa hajahaton. Anjaha Naibata do holi na mamarentah i tanoh on. Jadi, tiru hita ma hasabaron ni Naibata. Anggo ibahen hita sonai, dapot hita ma songon na tarsurat bani ayat on, “Martuah ma halak na tahan bani parlajouan, ai dob monang ia bani parlajouan ai, jaloonni ma sortali hagoluhan, na dob pinarbagah ni Naibata bani na marholong ni uhur Bani.”​—Jak. 1:12.