1-2. How di pramis weh Jehoava gi wi da Isaiah 65:16, 17 inkorij wi fi kantinyu bayr op?

“NOH GIV OP!” da-mi di teem a di reejinal kanvenshan proagram eena 2017. Di proagram mi teech wi how wi ku bayr op wen wi di goh chroo prablemz. Da don foa yaaz sins wi mi ga dis kanvenshan ahn wee stil di indyoar eena dis wikid werl.

² Wat da sohn chalenjiz yu mi fays laytli? Maybi yu looz wahn famili memba er wahn fren eena det. Er maybi yu di deel wid wahn seeryos helt prablem. Ih kud bee dat laif haad fi yoo bikaaz yu di geh oalda. Maybi yu gaahn chroo wahn nachral dizaasta, vailens, er persikyooshan. Er ih ku bee dat yu di sofa bikaaz a di COVID-19 pandemik er sohnting simila. Wi di luk faawod tu di day wen aala dehnya prablemz wahn deh eena di paas, wen wi wahn ferget bowt aala dehn, ahn wen dehn noh wahn hapm neva agen!—Reed Isaiah 65:16, 17. *

3. Sins laif haad, weh wi shuda du?

³ Laif eena dis sistem veri haad, ahn wi mait haftu deel wid moa chalenjiz eena di fyoocha. (Mach. 24:21) Ih klyaa fi si dat wi need fi kantinyu indyoar. Wai? Bikaaz Jeezas mi seh: “If unu bayr op til di en, unu wahn sayv unu laif.” (Look 21:19) Wen wi tink bowt how adaz noh giv op eevn doa dehn di goh chroo prablemz jos laik wee, dat help wi fi kantinyu indyoar.

4. Wai wi ku seh dat Jehoava da di bes egzampl a Sohnbadi weh noh giv op?

 ⁴ Hoo da di bes egzampl a sohnbadi weh noh giv op? Ih mait sopraiz yu fi noa dat Jehoava da di bes egzampl a sombadi weh indyoar. If yu tink bowt it gud, den yu wahn andastan. Di Devl di kanchroal di werl, soh dats wai wi ga soh moch prablemz. Jehoava ga di powa fi put wahn en tu aala dehnya prablemz rait now, bot ih payshent. (Roam. 9:22) Hihn di wayt til di day kohn wen hihn wahn dischrai dis werl. Mek wi diskos nain tingz weh Jehoava di indyoar.

5. Wai Gaad naym noh geh di aana weh ih dizerv, ahn how yoo feel bowt dat?

⁵ Jehoava naym noh geh di aana weh ih dizerv. Jehoava lov ih naym, ahn hihn waahn evribadi rispek it. (Isa. 42:8) Bot fi di laas 6,000 yaaz, fi hihn naym noh geh di aana weh ih dizerv. (Ps. 74:10, 18, 23) Aala dis mi staat eena di gyaadn a Eedn wen di Devl, di wan weh slanda Gaad naym, mi klaym dat Gaad neva waahn Adam ahn Eev ga sohnting weh dehn mi need fi bee hapi. (Gen. 3:1-5) Sins den, dehn di akyooz Jehoava fi noh giv hyoomanz weh dehn reeli need fi bee hapi. Jeezas mi-di wori bikaaz dehn neva mi-di rispek ih Faada naym. Dat da wai hihn mi teech ih disaiplz fi pray dis way: “Hevnli Faada, wi waahn yu naym bee hoali.”—Mach. 6:9.

6. Wai Jehoava di alow soh moch taim fi paas bifoa hihn proov dat hihn ga di rait fi rool di hevnz ahn di ert?

⁶ Lata peepl deh gens Gaad ahn fi hihn roolaship. Onli Jehoava ga di rait fi rool oava di hevnz ahn di ert, ahn di way hihn rool da di bes way. (Rev. 4:11) Bot di Devl chrai fi chrik anynjelz ahn hyoomanz fi tink dat Gaad noh ga di rait fi rool. Ih wahn tek taim fi proov dat Jehoava da di Wan weh ga di rait fi rool ahn dat hihn da di bes Roola. Wi ku si wai Gaad alow hyoomanz fi rool fi wahn lang taim fi mek dehn si dat dehn kyaahn rool dehnself if dehn noh lisn tu di Kriyayta. (Jer. 10:23) Bikaaz Gaad shoa soh moch payshens, nobadi wahn ku dowt dat Gaad ga di rait fi rool oava di hevnz ahn di ert. An evribadi wahn noa dat Jehoava way fi rool da di bes ahn dat onli fi hihn Kingdom wahn bring chroo pees an evribadi wahn feel sayf pahn di ert.

7. Hoo mi ton gens Jehoava, ahn weh hihn wahn du wid dehn?

⁷ Som a ih chiljren ton gens ahn. Jehoava mi kriyayt di aynjelz an ih hyooman chiljren eena wahn perfek way. Bot den, wan a ih perfek aynjelz mi ribel ahn ton gens ahn. Soh now Saytan, di aynjel weh mi ton gens Jehoava, mi kanvins Jehoava perfek hyooman chiljren, Adam ahn Eev, fi du di saym ting. (Jood 6) Ahn laytaraan, eevn som fahn di nayshan a Izrel weh da-mi Gaad peepl mi rijek hihn ahn dehn mi ton gens ahn. Dehn staat tu wership faals Gaadz. (Isa. 63:8, 10) Soh wi ku onli imajin how Jehoava mi feel wen dehn mi bichray ahn. Bot hihn stil di indyoar ahn hihn wahn kip di indyoar til di taim kohn wen hihn wahn dischrai aal dehn wan weh ton gens ahn. Dis wahn bee soch a wandaful taim! Jehoava, lang wid ih faytful servants, noh wahn haftu deel wid Saytan an ih eevl sistem nohmoh.

8-9. Weh kaina lai Saytan di seh bowt Jehoava, ahn weh wee ku du bowt it?

⁸ Saytan lai dehn. Saytan mi akyooz Joab an ih mi seh dat aala Jehoava faytful servant dehn wership Hihn onli bikaaz a weh dehn ku geh fan ahn. (Job 1:8-11; 2:3-5) Di Devl kip di akyooz hyoomanz tu dis day. (Rev. 12:10) Wee ku help proov dat Saytan laiyad if wi kantinyu di indyoar  chroo wi chraiyalz an if wi stay laayal tu Jehoava bikaaz wi lov ahn. Jehoava mi bles Joab, ahn hihn ku bles wee tu if wi kantinyu bayr op.—Jay. 5:11.

⁹ Saytan yooz leedaz fahn faals rilijan fi seh dat Jehoava kruwil ahn dat hihn da di wan weh di kaaz hyooman sofarin. Som a dehn eevn seh dat wen wahn baybi ded, da Gaad kehr ahn bikaaz hihn mi need wahn nada aynjel da hevn. Dis reeli di disrispek Jehoava! Bot wee noa beta. Wee noa dat Jehoava da wahn lovin Faada. Wen wee ga wahn seeryos helt prablem, er wen sombadi weh wi lov ded, wi noh blaym Gaad. Insted, wi bileev ahn chros dat wan day hihn wahn bring bak tu laif dehn wan weh ded. Wi ku tel evribadi weh wahn lisn dat Jehoava da wahn lovin Gaad. Den Jehoava wahn ku ansa di wan weh kip di insolt ahn.—Prov. 27:11.

10. Weh Psalm 22:23, 24 teech wi bowt Jehoava?

¹⁰ Di sofarin a ih faytful servants. Jehoava da wahn Gaad weh ga kompashan. Soh ih reeli hert hihn wen ih si wi di sofa maybi bikaaz a persikyooshan, wahn seeryos siknis, er maybi bikaaz a wi oan imperfekshan. (Reed Psalm 22:23, 24.) * Jehoava andastan weh wi di goh chroo, ahn hihn wahn du sohnting bowt it. (Kompyaa Exodus 3:7, 8; Isaiah 63:9.) Di day wahn kohn wen “hihn wahn waip weh [wi] tyaaz fahn [wi] aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.”—Rev. 21:4.

11. How Jehoava feel bowt ih laayal servants weh don ded?

¹¹ Ih frenz weh don ded. How Jehoava  feel bowt ih faytful servant dehn weh don ded? Hihn reeli waahn si dehn agen! (Job 14:15) Yoo ku imajin humoch Jehoava wuda waahn si ih fren Aybraham agen? (Jay. 2:23) How bowt Moaziz, di man weh Jehoava mi taak tu “fays-tu-fays”? (Ex. 33:11) Hihn aalso di luk faawod fi hyaa Dayvid an di ada saamis dehn sing dehn byootiful sang weh prayz hihn! (Ps. 104:33) Eevn doa aala dehn don ded, Jehoava noh ferget dehn. (Isa. 49:15) Hihn memba evri singl lee ting bowt dehn persnaliti. Di Baibl seh dat “aala dehn livin tu hihn.” (Look 20:38) Soon, hihn wahn bring dehn bak tu laif ahn den hihn wahn ku hyaa dehn pryaaz agen an aksep dehn wership. If yu tink bowt dis, ih ku reeli komfert yu if yu eva looz sombadi weh yu lov eena det.

12. Weh mek Jehoava veri sad joorin dehnya wikid laas dayz?

¹² Di wikidnis a bad peepl. Wen di ribelyan eena Eedn mi staat, Jehoava mi noa dat tingz mi wahn geh wers. Jehoava hayt di wikidnis, injostis, ahn vailens eena di werl tudeh. Hihn aalwayz kay bowt peepl weh week ahn kyaahn protek dehnself laik di wido dehn, er chiljren weh noh ga ma er pa. (Zech. 7:9, 10) Jehoava feel reeli sad wen hihn si dat dehn chreet fi hihn faytful servant dehn bad ahn wen dehn chroa dehn eena prizn. Bot yoo ku bee shoar dat hihn lov yoo bikaaz yu di indyoar lang wid hihn.

13. Weh disgostin kandok Gaad si eena hyoomanz, ahn weh hihn wahn du bowt it?

¹³ Hyoomanz di praktis sekshwal imoraliti moa ahn moa. Gaad kriyayt hyoomanz eena fi hihn imij, bot Saytan lov fi mek dehn du imoaral tingz. Wen “Jehoava si dat di wikidnis a man mi-di tek oava di ert” eena Noawa dayz, hihn “mi feel sari dat hihn mi mek man pahn di ert, an ih haat mi geh sad.” (Gen. 6:5, 6, ftn., 11) Yu tink di werl geh beta sins den? Non ataal! Di Devl veri hapi fi si dat aal kaina sekshwal imoraliti di geh kaman tudeh, inkloodin sekshwali imoaral kandok bitween man ahn uman, man ahn man, an uman ahn uman! (Ifee. 4:18, 19) Saytan feel veri hapi wen peepl weh wership Jehoava komit wahn seeryos sin. Bot soon, Jehoava wahn shoa dat hihn hayt imoaral kandok wen hihn geh rid a aal imoaral peepl weh noh waahn chaynj.

14. How hyoomanz di chreet di ert ahn di animal dehn?

¹⁴ Hyoomanz di dischrai di ert weh Gaad kriyayt. Tudeh, hyoomanz noh onli di rool dehnself ahn kaaz payn, bot dehn aalso di rooin di ert ahn dehn noh di tek kayr a di animalz weh Jehoava kriyayt fi dehn. (Eccl. 8:9; Gen. 1:28) Sohn saiyentis seh dat eena di neks fyoo yaaz, wan milyan difrent kaina animal ahn plaant ku stap egzis sayka di damij weh hyoomanz kaaz. Noh wanda soh moch peepl di wori bowt di ert! Bot Jehoava pramis dat hihn wahn “dischrai di wan dehn weh di rooin di ert” ahn hihn wahn mek di ert intu wahn paradais.—Rev. 11:18; Isa. 35:1.

15-16. Weh shuda inkorij wi fi indyoar laik Jehoava? Yooz di egzampl eena di paragraaf.

¹⁵ Jos tink bowt aala di sad tingz weh wi hevnli Faada di indyoar fi towznz a yaaz. (Si di baks “ Weh Aal Jehoava Di Indyoar.”) Jehoava kud put wahn en tu dis wikid sistem a tingz enitaim hihn waahn. Bot fi hihn payshens help wi wahn lat! Tink bowt dis: Imajin wahn man an ih waif geh di nyooz dat dehn baybi weh noh baan yet ga wahn seeryos helt prablem ahn dat wen ih baan, ih noh wahn bee eezi far ahn. Pan  tap a dat, dehn tel dehn dat di baybi noh wahn liv lang. Eevn doa di payrents noa aala dat, dehn hapi wen di baybi baan. Da chroo, ih wahn bee haad fi mek dehn tek kayr a di baybi bot dehn noh main. Di lov weh dehn ga fi dehn baybi help dehn fi indyoar eniting soh dat dehn ku gi ahn di bes laif pasabl.

¹⁶ Sayhn way soh, non a wi neva baan perfek. Stil, Jehoava lov wi ahn kay fi wi. (1 Jan 4:19) Bot Jehoava difrent fahn di payrents eena di egzampl bikaaz hihn ku du sohnting bowt weh di hapm tu fi hihn chiljren. Hihn ku stap di sofarin weh dehn di goh chroo. Akchwali, hihn don set di taim wen hihn wahn bring wahn en tu aal hyooman sofarin. (Mach. 24:36) Di lov weh Jehoava ga fi wi shuda moov wi fi indyoar fi az lang az pasabl.

17. How Heebrooz 12:2, 3 help wi fi kip di indyoar?

¹⁷ Jehoava da di perfek egzampl a sombadi weh noh giv op. Ahn Jeezas mi kapi fi Hihn egzampl eena wahn perfek way. Wen Jeezas mi deh pahn ert, hihn mi gaahn chroo sohn terabl tingz. Fi egzampl, sohn peepl mi taak tu ahn eena wahn kruwil way, dehn mi shaym ahn, an ih mi eevn ded pahn wahn taacha stayk fi aala wi. (Reed Heebrooz 12:2, 3.) Fi shoar Jehoava egzampl a indyoarans mi gi Jeezas di schrent fi du di saym ting. Ahn dat ku help wee tu.

18. How 2 Peeta 3:9 help wi fi andastan weh hapm bikaaz Jehoava ga soh moch payshens?

¹⁸ Reed 2 Peeta 3:9. Jehoava noa wen da di bes taim fi bring dis wikid werl tu wahn en. Bikaaz a fi hihn payshens, milyanz a peepl geh di chaans fi noa hihn, ahn now dehn ga di apachooniti fi bee paat a di grayt krowd weh wership hihn. Aala dehn hapi dat Jehoava mi indyoar lang inof soh dat dehn kuda mi baan, laan fi lov hihn, ahn dedikayt dehn laif tu ahn. Wi wahn geh fi si dat Jehoava mek di rait disizhan fi bee payshent wen milyanz a peepl indyoar tu di en!

19. Weh wi mek op wi main fi du, ahn weh blesinz wi wahn get?

¹⁹ Wi ku laan fahn Jehoava how fi indyoar ahn bee hapi. Eevn doa Saytan kaaz lata sofarin, Jehoava da stil “di hapi Gaad.” (1 Tim. 1:11) Wee ku bee hapi tu wail wi di wayt fi mek Jehoava klayr op ih naym, shoa dat hihn ga di rait fi rool, en aal wikidnis, ahn fi geh rid a aala di prablemz weh wi di goh chroo rait now. Mek wi kip di indyoar bikaaz wi noa dat wi hevnli Faada di du di saym ting. If wi du dat, dehnya werdz wahn proov chroo eena wi laif: “If sombadi kip aan di bayr op anda chraiyalz, ih wahn bee hapi, bikaaz Gaad wahn pleez wid ahn, an ih wahn giv ahn di krong a laif. Jehoava pramis fi gi da krong tu peepl weh kantinyu fi lov ahn.”—Jay. 1:12.