1, 2. Ka uagu gayara lubéi líderaguniwa Isaíasi 65:16, 17 lun wawandun?

“MABUCHADALÁ HUAGU!” Ligía líribei lubuidun adamurini wéiriti le adügübei lidan irumu 2017. Arufudahati meha programa le lídanbei adamurini le woun ida luba lan wawanduni lénrengunga le wasufurirubei. Sügühali gádürü irumu, ani awanhagua awandei ibagari le lídanbei ubóu le lábugiñebei lubafu Mafia.

² Ka turobuli úmabei wagagibudagua lidan lagumuhóun dan le? Másiñati wasufuriruña lan ladüga lounwen aban waduhe o aban wamada, o ladüga aban sandi, aweiyaduni, chagaguaü le ladügübei somu liñawan dan, anarimeni, éibaahouni o sandi le gíribei COVID-19. Ma ayumahatiwa lun lachülürün weyu lun úaali lanme sun le? Masaminarun hádiwame luagu katei burí le ani masuseredun haalime (aliiha huméi Isaíasi 65:16, 17).

3. Ka lunbei wadügüni guentó, ani ka uagu?

³ Hénrenguti ibagari lidan ubóu le, ani ámuñegü másiñati wagagibudagun luma lénrengunga le hanarimetimati (Mat. 24:21). Ligíati lunti wasigirun ederebudagüdei awanduni le wawagubei. Afuranguagüda lumuti Hesusu ka lan uagu lunti lubéi wadügüni, lau lariñagun: “Anhaün deregüdagumeme, hibihubei ibagari magumuchaditi” (Luk. 21:19). Aban katei le gayaraabei líderaguniwa lau wasaminarun ida liña lan hawanduni amu óuchawaguni libe le úmabei wagagibudagua.

4. Ka uagu gayara lubéi wariñagun Heowá lan awanduti le awandatimaabei le gayaraabei wáyeihani?

⁴ Káteitima san awanduti le awandatimabei ani le gayaraabei wáyeihani? Heowá. Anhein sódini lubéi lárügüdüniwa álügüdahani le, samina waméi le. Buin liña ubóu le lau turobuli ladüga Mafia lan abugurubalin. Gayaraati hamuga lagumuchun Heowá lau ubóu le guentó guentó, gama lumoun, lagurabahaña lun lachülürün  weyu le direi laalibei lun gayara lan lagumuchun lau (Rom. 9:22). Sun aniha lan agurabahei weyu ligía anihán awanda. Ariha waméi nefu katei le lawandubei Heowá.

5. Ida liña lanabawagún liri Bungiu, ani ida liña hasandiragun hungua?

⁵ Lanabawagún liri. Hínsiñeti liri Heowá lun ani busenti lun inebe lan houn súngubei (Isa. 42:8). Gama lumoun, lidan 6,000 irumu le ásügürübei dáseiwaali lubuidun liri Heowá (Sal. 74:10, 18, 23). Sun le gumeseti lidan fuluri agei Edén dan le lariñagubei Mafia (mini lan iri le Marasualuguti) maha lan Bungiu líchuguni le lemegeirubei Adán tuma Ewa houn lun gayara lan hagundaarun (Agu. 3:1-5). Lúmagiñe dan ligía ayanuhóuali iyeeni luagu Heowá maha lan líchuguni le buídutimabei houn gürigia. Nidiheriti meha Hesusu luagu eibu lan dan lanabawaguña lan liri Lúguchi. Ligía larufudahanbei houn lani disipulugu lun hariñagun lidan furíei: “Wáguchi Bungiu le siélubei, inebewalá biri” (Mat. 6:9).

6. Ka san uagu lígira Heowá lun lásügürün saragu dan lun laransehoun turobuli luáguti liricha lun larúeihan?

⁶ Lebedaawagún lun liricha lun larúeiha. Heowarügüñein garicha lun larúeihan sielu luma Ubouagu, ani ligía urúei buídutimabei (Aruf. 4:11). Gama lumoun, yeeda laaña Mafia dandu ánheligu kei gürigia lun hasaminarun maricha lan Bungiu lun larúeihaniña. Lun larufuduniwa liricha Bungiu lun larúeiha, mama aban katei le lunti ladügüniwa lau lufuresen. Lau lichú au ígiraali Heowá lun gürigia lan arúeiha houngua luagu saragu irumu, lun larihín furangu sin lan ligía wuriba lan lidin houn (Her. 10:23 TNM). Seremei lun luguraasun Bungiu laranseruba katei sunsuinagubei. Lafuranguagüdüwaba ligía lan urúei le buídutimabei ani Larúeihanrügüñein lan gayara lanügün darangilaü inarüniti luma ichouruni Ubouagu.

7. Kátaña san ebedaagubaña lun Heowá, ani kaba ladüga hau?

⁷ Hebedaagun hádangiñe lirahüñü. Adüga lumutiña Heowá ánheligu hama gürigia sin ni murusun charati hawagu. Gama lumoun, adügati aban ánheli gíriti Satanási (mini lan iri le Kóntürati) lun hebedaagun gürigia mafigountiña Adán tuma Ewa, lun Heowá. Ebedaaguatiña giñe amu ánheligu hama amu burí gürigia lun Heowá (Hud. 6). Lau lásügürün dan, íbini hádangiñe ísüraelina, ha meha lanúadirubaña Bungiu kei lumutuniña ru hamuti meha giñe hanagan luagu ani aba hagumeserun áhuduragua houn búngiugu mama inarünitiña (Isa. 63:8, 10). Ligía lasandiragunbei Heowá lungua garabaguaaña lan hougua luagun. Ani anihamémegua awanda, ani ítarameme luba awanda darime lachülürün weyu lun lagumuchun hau sun salufuritiña. Maame lanarime awalidaguni houn lubúeingu ha úaraguabaña, ha añaheinguabaña awandei wuribani le lídanbei ubóu le úara luma.

8, 9. Ka iyeeni ariñawagúbei luagu Heowá ani ida luba wóunabuni?

⁸ Sun liyeeni Mafia. Dan le líchugubei Satanási lidurun Hobu aban wügüri úaraguati, aba lariñagun sun lan lubúeingu Bungiu ha úaraguabaña heseriwiduña lan lun ladüga buiti le heresibirubei lúmagiñe (Hob. 1:8-11; 2:3-5). Anihagua Mafia lau iyeeni le chülǘ lumoun dan le (Aruf. 12:10). Gayaraati warufuduni yee lan Satanási lau wawanduni sun lénrengunga luma lau wakipuragun woungua úaragu lun Heowá lau ínsiñeni. Ani ítara, kei lidan likesin Hobu labinirubei Heowá wawandun (Sant. 5:11).

⁹ Yusu lumutiña Satanási alidihatiña relihión mama inarünitu lun lariñagun furunde lan Heowá ani ligía lan gadurunbei luagu saragu asufuriruni le ubouagubei. Ani dan le lounwen aban irahü, añahein ariñagutiña barǘ lan Bungiu ladüga megei lan aban liraüraü ánheli sielu.  Ma lanarime hanabaguni Heowá! Ánheinti wagía subudi wamuti inarüni. Ligíati, dan le ladagarun somu sandi wawagun o weferidirun somu waduhe lidan óunweni michugún wamuti duru luagu Bungiu. Afiñerügütiwa lachülürüba lan dan lun lagidaruni wasufurirun. Gayaraabei wabahüdaguni houn sun ha aganbutiwa aban lan Bungiu hínsiñehabuti Heowá. Ani ítara luba gayara lan wóunabuniña ha anabagubalin (Ari. 27:11).

10. Ka larufudahabei Sálumu 22:23, 24 woun luagu Heowá?

¹⁰ Hasufurirun lubúeingu ha hínsiñebaña lun. Aban Bungiu gudemehabuti Heowá. Ligía gari lubéi lun larihiniwa asufurira, ladüga lan yebe éibaahouni, sandi, o ladüga lan wafigoun guánarügü (aliiha huméi Sálumu 22:23, 24). Sandí lumuti wagarigu. Ani busenti lagumuchun lau sun asufuriruni, ani ladügübei (ariha huméi giñe Áfuriduni 3:7, 8; Isaíasi 63:9). Lachülürüba weyu lun lagunfuliruni füramasei le: “Laragahabei sun háguira; úaalime óunweni ni ayahuni ni íruni ni igarigu” (Aruf. 21:4).

11. Ida liña lasandiragun Heowá lungua lau lasaminarun hawagun lubúeingu ha úaraguatiña ha hilaguaañabaña?

¹¹ Hóunwegun lumadagu. Ida liña lasandiragun Heowá lungua dan le laritagun hawagun wügüriña hama würiña ha hilaguaañabaña? Layumahaña larihiniña (Hob. 14:15). Gayaraati san wasaminarun luagu lálugun luagu Abüraámü le lumada? (Sant. 2:23). O luagu Moisesi le úmabei layanuhan “gagibugua”? (Afu. 33:11). Ani ayumahati laganbuni Dawidi hama amu abürühatiña sálumu eremuha lubuidun uremu lun! (Sal. 104:33). Íbini harumuguña lan lumadagu lidan óunweni mabulieidun lágiña (Isa. 49:15). Aritagua lágiña Heowá buidu buidu ida haña lan meha, lau sun hilaguaaña lan, “wínwangiña lanügüniña” (Luk. 20:38). Lachülürüba weyu lun lagiribudagüdüni habagari houn ani laganbahayabei lubuidun furíei le lubéi hadügüni lun ani lagundaaruba lau  háhuduragun lun. Ma ruti saminaü le gurasu houn ha féridi hamaañabaña haduheñu lidan óunweni?

12. Ka mínsiñebei lun Heowá lidan lagumuhóun weyu le buinbei lau wuribani?

¹² Wuribani le hadügübei salufuritiña houn amu gürigia. Dan le lasuseredunbei ebedaaguni Edén subudi lumuti meha Heowá lau laganwounduba lan wuribani lubaragiñe laransehani katei. Iyereeguti wuribani, marichaü luma anarimeni lun le warihibei uguñe weyu. Súnwandan nidiheri lan hawagutima gürigia ha míderawagunbaña; kéiburi ha débilibaña, ha siñabei hageindagun haweigiñegua, kei burí méteñuhaña hama würiña ha hilaali hani weiriei (Sak. 7:9, 10). Mínsiñeti lun larihini luriban houserún luma hadaürawagun lubúeingu ha úaraguabaña. Huguya ha awandubaña úara luma Heowá gayaraati hachoururuni: Hínsiñe humá sun huguya lun.

13. Ka larihibei Heowá lidan luriban hanügüni gürigia habagari, ani kaba ladüga libügürü?

¹³ Luriban hanügüni gürigia habagari. Adüga lumutiwa Bungiu lenege guánarügü, gama lumoun hínsiñeti lun Satanási leferidiraguagüdüniwa. Lidan lidaani Noé, aba larihin “Bungiu luagu hanarime lan hariban gürigia”, “aba lírudun luagu ladügüniña” (Agu. 6:5, 6, 11). Buíduhali san ubóu lúmagiñe dan ligía? Uá. Hínsiñeti lun Mafia larihin kamani lan sun luwuyeri magíaguni, hadan lan yebe wügüriña hama würiña, o wügüriña hama wügüriña o würiña hama würiña (Efe. 4:18, 19). Ani gúndaati dan le lafigouhan aban lubúein Bungiu. Larufudubei Heowá iyereegu lan sun luwuyeri magíaguni lun danme lagumuchun luguraasun.

14. Ka ladügübei wügüri lun Ubóu luma houn animaalugu?

¹⁴ Lagünrinchagun ubóu le ladügübei. Amu luéi ladügün gürigia damichi lun gürigia líledi, móunigirun lumuti ni Ubóu ni animaalugu kei labusenruni Heowá (Apur. 8:9; Agu. 1:28). Añahein hádangiñe sásaamu ariñagutiña genege lan málühaña lan gürigia agumucha hau saragu míñunu animaalugu. Ligía weiri lubéi hadiheridun! Ligía seremei wabalin Heowá luagu füramasei lagünrinchagubaña lan “ha agünrinchagubalin ubóu” ladügübei lan ubóu le ábame paraísu (Aruf. 11:18; Isa. 35:1).

15, 16. Ka gayaraabei línchahaniwa awanda úara luma Heowá? Afuranguagüda huméi lau aban sügǘ.

¹⁵ Samina wamá luagu sun turobuli le awanda laalibei Wáguchi Bungiu le siélubei luagu saragu milu irumu (ariha huméi rekuáduru “ Le lawandubei Heowá”). Gayaraati hamuga lagumuchun Heowá lau ubóu wuribati le furumiñeguarügü oura. Gama lumoun, madügün lumuti, hu hali luguraasun woun! Samina wamá luagu sügǘ le. Aba lariñawagún houn aban feru maríeitiña gasaanibaña lan ani sandi sándibei lan ani chátibei lan libagari. Íbini subudi hamani agübürigu ha hagagibudaguba lan luma turobuli, aba heresibiruni hasaani lau saragu ínsiñeni. Ladüga ínsiñeni awanda hamuti sun turobuli le ñǘbuinti, le habusenrunbei lun hasaani híchuguni ibagari le buídutimabei lun.

¹⁶ Ítarameme sun ladügawagun Adán tuma Ewa lau figóu wágurahoun. Íbini ítara hínsiñetiwa lun Heowá ani góunigi lumutiwa (1 Huan 4:19). Aban katei, gabafuti Heowá hawéi agübürigu ha buga uágubaña wayanuhan, lugundun gayaraati ladügün somu katei lun líderaguniwa. Direi hali aban weyu lun lagumuchun lau sun hasufurirun lirahüñü (Mat. 24:36). Ma lunti línchahaniwa línsiñehabu lun wawanduni sun dan le mégeiwabei?

17. Ka uagu ru lubéi le lariñagubei Ebüréu 12:2, 3 luagu Hesusu dǘgüdaguaü woun lun wawandun?

¹⁷ Heowá buídutimabei lidan awanduni. Áyeiha lumuti Hesusu Heowá buidu buidu. Dan meha le ya lubéi Hesusu Ubouagu, awanda lumuti  lanagawagun, lóuserun wuriba luma ládarawagun luagu wagabu (aliiha huméi Ebüréu 12:2, 3). Chóuruti íderagua lani láyeihani Lúguchi lun lawandun. Gayaraati giñe líderaguniwa lun derebugu wamá.

18. Ida liña líderaguniwa 2 Féduru 3:9 lun gunfuranda wamani le ibihubei seremei luguraasun Heowá?

¹⁸ (Aliiha huméi 2 Féduru 3:9). Subudi lumuti Heowá ka lan dan buídutimabei lun lagumuchun lau lagübüri ubóu le. Seremei lun luguraasun, guentó añaheinhaña saragu míñunu gürigia ha eseriwidubaña lun ani alawaha haméi. Súngubei hagía seremei hamuti lawandun Heowá saragu dan lun gayara lan hágurahoun, hafurendeirun asandira ínsiñeni luagu luma lun hederegeruni habagari lun. Danme le heresibiruni saragu míñunu wádangiñe afayeiruahaü luagu hawandun darí lumoun lagumuhóun furangubei buidu lan ladüga Heowá lau lawandun.

19. Ka aranseñu wabéi lun wadügün, ani kaba wafayeiruaha?

¹⁹ Arufudati lani Heowá hénpulu woun lau lawandun lau ugundani, lugundun aban “Bungiu gúndaati” ligía, íbini laganagua saragu igarigu luma asufuriruni le adüga laalibei Satanási (1 Tim. 1:11 TNM). Gayaraati giñe wagundaarun kei Bungiu sun awanha lan agurabahei lau gurasu lichugún inebesei lun liri, larumadahóun liricha lun larúeihan luma lun lagumuchún lau sun wuribani luma lau waturobulin. Ítarameme wamá awanda luma lun wáluahan gurasu lau wasaminarun aniheingua lan Wáguchi le siélubei awanda. Ánhawa adügei, lagunfuliruba dimurei le luagu kada aban wádangiñe: “Fuleseiwati gürigia le awandubalin óuchawaguni lau gurasu, lugundun danme le láfuridun lau buidu, libihubei ibagari magumuchaditi keisi aban afayeiruahaü le füramase lubéi Bungiu houn ha hínsiñehabubaña lun” (Sant. 1:12).