1-2. Sitih inlahen öi ngönlöre tö ṙô ngam Isayā 65:16, 17?

“UH MAN HEŪLNGÖRE!” angū-ö ön ngih kui ngam könvensön ik samyeūheu 2017. Hayööken hī nuk töhakööpö hē e, öi la-al në kanihngen re. Ngaich nö fën samyeūheu rô-angen ngam könvensön, ṙòmöng ölngen ayī-ö töngamuh öi la-al në kanihngen re.

² Asuh nup tö ngaich nö kanihngen meh in në? Kapahlöng hòng më-eṅ tö aṅ patī re hēk holre inrē? Ōt hòng tökiröng invah meh, hēk kihngen hòng ṙöng tökūö meh ngaich ṙēḵtivö? Ötlēkaṙen ömeh? Lohten man inrē kihngen tö kūö nup tö lēlngökūö tī invah sā ngam COVID-19? Kilēḵngôre pöri ang Yāvē tö re min nö kēngö në kanihngen hī ngaich öt hēk min ayī-ö afēken u!—Vë-evkūö Isayā 65:16, 17.

3. Kūöyòh öi hòṅ aṅhavin tö ngam Manööyö?

³ Hö-ö in lööṙen aṅ ikūö ngih panam, pön hēk min nö sīöplöre nup kanihngen hī inup yamih ṙētak. (Mët. 24:21) Lökten in hòṅ aṅhavin tö ngam Manööyö. Ngö ṙô ök Yēsū: “Teūngen yin min tö nômöre, ip Manööyö yīö.” (Lūk. 21:19) Yöölen in min asīöp ngam Manööyö re yēḵ hī haköp inlahen yik tö sā kanihngen re.

4. Sitih inlahen ang Yāvē nö tövai nö inchōḵ elmat hī im Manööyö?

⁴ Tövai ang Yāvē nö inchōḵ elmat hī nö tö aṅhavin tö ngam Manööyö. Kò-òren öm asehkūö re. Hayöngkaṙen ngih panam tö ngam Sī-ö lökten nö keuheūtngöre chūök në kanihngen. Mihôiṅ ang Yāvē nö ilööṙen nö kēngö në kanihngen, höktöre pöri anga-aṅ pòn lēnngö tī tö ngam ṙētak re min nö ha-etngö në kanihngen. (Rōm. 9:22) Hanöng saha e pöri nö öl nö yih, höng hamöiyö re anga-aṅ. Ta-a töi ngëichkö nup tö machūöhtöre kamngö chūök ngam Tēv nö hameuktöre nö möi.

5. Sitih inlahen mufē öm më-eṅ yěn ötlēkaṙen ngam minë-eny ngam Tēv?

⁵ Hachōchiyö ngam minënyö ò. Hangenlōn an Yāvē tö ngam minë-eny re, hōten hī anga-aṅ öi milēḵṙen tö e. (Isa. 42:8) Ngaich pöri nö tafūöl köny samyeūheu rô-òten nö ötlēkaṙen ngam minënyö ò. (Sal. 74:10, 18, 23) Löktökūö el ök panô-òṅ Ēten nö hachōchiyö ngam minënyö ngam Tēv, ik sā ngam Sī-ö nö sūöchken ò nö öt kē-ěkūö na Ātöm nā Ēva tö minë tövai chehen. (Ran. 3:1-5) Löktö in e sinūöchka anga-aṅ inrē nö mahayun ngö mat tarik re tö minë tövai chehen. Höng afēkö ötlinëkö minë-eny ngam yöng re ang Yēsū. Lökten ò nö hachōḵtô yik haköptöre nö vë-ekūötēv: “Kayööngö aṅ el halīöngö, töhet an yēḵ ngam minënyö meh.”—Mët. 6:9.

6. Kūöyòh ang Yāvē nö öt ilööṙen nö hameuktöre, nöng anga-aṅ tö mihôiṅ nö hayöng?

⁶ Pōyen tö sōḵ nö hayöngkaṙen töm Tēv. Höng Yāvē an tö minhôiṅyu nö hayöng nö el halīöngö ing panam inrē, höng anga-aṅ tövāyö tī nö hayöng. (Inm. 4:11) Ngaich pöri ngam Iplīs nö halo-ongkūö yip ma-ahānga hēk më tarik inrē nö lā-al ngam inyööngö tö Yāvē. Kētö ṙētak më tarik pöri ang Yāvē nö hayöng hòṅ cha nö meūköre nö ötkô nö hayööngöre. (Yar. 10:23) Kūö inlahen ngam Tēv nö möi, kòtökūö min tarik nö meuk ngam Tēv nöng anga-aṅ tö mihôiṅ nö hayöng nö kui hī. Höng ngam Pūlngö ò min kamëtö ngam lanāmö hēk kumchikṙen inrē nö ikūöng panam.

7. Achīö yik lama-al Yāvē, sitih tī min anga-aṅ tö cha?

⁷ La-al ò yik kūön ò. Töhet yik ma-ahānga nö vīlöng tö ngam Tēv ngatī inrē ngòh tarik. Ik sā Satān pöri (ngam “lama-al tö ṙô”) halo-ongkūö nā Ātöm nā Ēva anga-aṅ, ōt yik ma-ahānga hamòlṙen ò. (Yūt 6) Unôichngöre hēk yik aṅ Israel, yik tö katöllöng nö tarik ngam Tēv, ṙāngen ò cha-a ngaich vë-ekūö insātēv. (Isa. 63:8, 10) Tökiröng nun anu-ö nö ötlinëken Yāvē. Sön pöri anga-aṅ nöng hamöiyö re hanöng sā ò nö kēngö yip lama-al re min. Möl min ip hē e ang Yāvē tö yip tarik ò inrē nö tahööḵlöng nômö!

8-9. (a) Asuh nup sinūöchkö falen Yāvē? (b) Sitih inlahen ayī-ö kò-òren minyôinyngö aṅ ngam sī-ö?

⁸ Minë minyôinyaṅ ngam Sī-ö. Sūöchken Yōp ngam Sī-ö sūöchken yip tarik ngam Tēv inrē töngamuh tö cha nöng kūö taneunglen re yin nö löklōn Yāvē. (Yōp 1:8-11; 2:3-5) Öt ṙāngôre ngam sī-ö nö sūöchkö falen yip tarik ngam Tēv söl ing töngamuh. (Inm. 12:10) Yēḵ hī pöri hāngenlōn tö Yāvē holtö Manööyö re ayī-ö la-al mine kanihngen re ngaich chiplö in Yāvē ngaich mihôiṅ min ayī-ö minyôiny ngö aṅ ngam sī-ö. Lökten ayī- hòṅ möi hòṅ hī öi teūngen töm inkôlò re sā taneūngen Yōp.—Yāk. 5:11.

⁹ Löktö in yip yöngkūö tinlööken ngam sī-ö inrē nö sūöchken ngam Tēv nö töt aṙē-ělōn hēk kamëtö kanihngen hī inrē. Ōt yip töngö ṙô yěn kapah yip kun nyī-ö, kē-ě cha ngam Tēv pön lōntö ma-ahānga re nö el halīöngö. Tökiröng angū-ö nö sinūöchkö falen ngam Tēv! Akahakūö pöri ayī-ö tö ngam Tēv nö tö hangenlōn. Lökten yēḵ hī ṙung vahavö hēk yěi kapahlöng tö yip holmaneuk re ngaich hö-ö ayī-ö öi sūöchken  ò. Kirööngö ṙinātö ellōn pöri ayī-ö tö ò min nö halööktit mine taṙòkhöre kanihngen. Mihôiṅ inrē ayī-ö vë-eny nang tahëng töm hanangenlōn Yāvē ngaich heuveu-eu ṙô min ang Yāvē nö sapṙô ngam samūöchkö falen re.—Inch. 27:11.

10. Sitih ṙô öng ngam Salmai 22:23, 24 nö vë-eny inlahen Yāvē?

¹⁰ Kanihngen Më Tarik Ò. Tö aṙē-ělōn an Yāvē nö Tēv. Lökten yēḵ ò nö meuk yip tarik re nö kihngen tökūö invah hēk hakihtuṙen inrē tökūö ṙinatö ellōnre, ngaich haṙivölōn anga-aṅ. (Vë-evkūö Salmai 22:23, 24.) Akahakūö ang Yāvē tö minë kanihngen hī, lökten ò min nöt löktu nöt kēngen u. (Ngëichköm Man. 3:7, 8; Isa. 63:9.) Veūten min anga-aṅ nö “chūtngö mak mat . . . nö ṙā-ang imat cha, öt ōtngöre min inrē ngam kinpaha, ötrēhěn min miṙivlōn nö umuh, öt pineūnyu, öt chanöku nö hēkngöre.”—Inm. 21:4.

11. Sitih mufē ang Yāvē, tö yip holre töngaich nö kapah?

¹¹ Miṙivlōn ò tö kinpahlöre tö yik holre. Sitih mufē ang Yāvē tö yip tarik alaha re yik tö ngaich nö kapah? Chamīka anga-aṅ nö hòṅ meuk kūö cha nö hēk! (Yōp 14:15) Asehkūöre man tö kumlēḵ lōn Yāvē lohten nö hòṅ meukkūö öp holre Apraham! (Yāk. 2:23) Hēk fēkö inlahen re lohten anga-a nö vë-ekūö Môsös ök chūök nö “havööhen höö kūö” nö sā vamë-ekūö holre? (Man. 33:11) Lohten inrē anga-aṅ nö afēken Tāvit tö yik tahëng inrē kamūich tinköökö nöönyö ò! (Sal. 104:33) Acha-a vē hol Yāvē, töngaich yin nö kapah, öt vaichngö pöri Yāvē tö cha. (Isa. 49:15) Köpölōn anga-aṅ tö tinrīken cha, ‘ṙòkhöre cha-a nö aṅ nö imat ò.’ (Lūk. 20:38) Ha-aṅlen cha  min hēk anga-aṅ nö ṙā-ang i tökapah. Mihôiṅ in teūngen tö hanöhlö re hē kinpahlöre tö yip hanangenlōn re yěi afēkö në inlahen Yāvē.

12. Asuh nup tö haṙivölōn tī tö Yāvē in në ṙētak töngamuh?

¹² Minë ötlanöökö tī tötlöök tarik. Löktökūö el ök panô-òṅ Ēten, ngam Tēv nö akhakūö tö inlahen në ötlanöökö nö hēk min nö ṙūöhlöre ṙòken. Kunyaha elmat takô ang Yāvē tö në ötlanöökö töngamuh. Haṙivölōn anga-aṅ yěn afēken më tong lööṙen inyëḵe tö sā më tafīösi kūönyōich inrē. (Sak. 7:9, 10) Chöknyi nômö ang Yāvē yěn meuk yip tarik re nö ötlēkaṙen hēk tö hachēlhötvö inrē. Hangenlōn pöri anga-aṅ tö cha yip tö kihngen sön nöng hamöiyöre nö la-al u.

13. Asuh nup la-en tanòk elmat Yāvē tö kēkaṙen töngamuh, sitih tī min anga-aṅ tö u?

¹³ Nup tötlöng la-en tarik. Vīlöng misī ngòh tarik pön hōtu nö asīnken ngam Tēv. Ik sā ngam Tēv pöri “nö meuk tö ötlanöökö tarik nö kiröng” inuk sakamö Nō-a, ngaich ang Yāvē nö “haṙivtīre nö vī tarik nö ikui ngam tumlat, ngaich miṙivngölōn ò angū-ö.” (Ran. 6:5, 6, 11) Höng kūö urěh në ötlanöökö töngamuh! Iṙôk ṙanamlōn ang ngam sī-ö yěn meuk inlahen yip tarik nö kēkö mine töchōich lōn ngam alaha mine tötkô nö kēkaṙen ihôi nap tötpamīhöre! (Efi. 4:18, 19) Mötlö ṙanamlōn anga-aṅ yěn ōt öp tarik ngam Tēv tö fukngö tö kūö kinëken minë töchōich la-en. Yěn ngaich pöri min nö keuheūten ngam Manööyö Yāvē, kē-ělkūö alahare min anga-aṅ nö ha-etngen yip tötlöngö la-en tarik yip tö sōḵ nö halööktit re.

14. Sitih inlahen tarik töngamuh nö ötlēken minë vahikūö kuntī ngam Tēv?

¹⁴ Ötlēkaṙen mine vahīkūö kuntī ò. Töölô misī ngòh tarik nö chumkūöken ngih panam tö mine aṅkūö e inrē. Ngaich pöri anga-aṅ nöng ‘chökhuṙen tī yěn hayöng’ nö ikui tarik. Ötlēken ngih panam inrē holre tö mine töṙeūla aṅkūö e, minë töhōtu nginëchka tö ò. (Mum. 8:9; Ran. 1:28) Ngöṙô yip Saëntis töngamuh yěn öt ṙāngenre min ngòh tarik nö ötlēken në chehen ikūöng panam ngaich köṅnyu ṙôken min nup chehen * töt ōt tit nö ikūöng panam! Kilēḵngôre pöri Yāvē nö in hī tö re min nö kēngö yip töt lamëkö tī re tong panam ngaich vīten ngih panam min anga-aṅ nö Peretāis.—Inm. 11:18; Isa. 35:1.

15-16. Asuh öp min mahayööken hī hamööyöre sā Yāvē öi la-al nup kanihngen re? Hachō elmat hī.

¹⁵ Fēkö minë ötlinëken Yāvē man iṙôtòng mine samyeūheu. (Ngëchköm pòks “ Asuh Nup Ötlinëken Yāvē.”) Mihôiṅ öre anga-aṅ nöng ilöö kēngen u, hamööyö re pöri anga-aṅ. Yöölen ayī-ö töngamuh kūö ngam Manööyö ò! Ngëchkö ngih inchōḵ elmat hī. Asehkūöre man tö nap pamīhöre tövënyu nang tö inlahen öp kūön cha tö pirūka. Vënyu nang cha-a tö ngam kūön cha min yěn fötnyuvö, nöng vāhavö öt marô-òten inrē min nö aṅ. Sön pöri cha-a nöng hòṅ iṙūöhen nö haruklö ngam kūön re pòrô nö akahakūö tö minë kanihngen re min. Ṙën cha-a nö ngatī pön hangenlōn tö ngam kūön re.

 ¹⁶ Ngatī inlahen pöchö ayī-ö öi kūön Ātöm nā Ēva öi ṙòkhöre aṅhavin tö ngam tökööl. Sön ang Yāvē nö hangenlōn tö hī. (1 Yôh. 4:19) Ngamuh inrīkngöre Yāvē tö mina inyööngö tövënyu im inchōḵ elmat, pön mihôiṅ anga-aṅ nö kēngen mine kanihngen hī. Kilēḵngôre anga-aṅ inrē töre min nöt löktu nöt kēngen minë kanihngen hī. (Mët. 24:36) Lökten ayī-ö hòṅ hamööyöre la-al minë kanihngen re hanöng sā ò nö öl nö kēngen u.

17. Sitih inlahen yanöölen öi löktö im Manööyö Yēsū imat ngam Heprāi 12:2, 3?

¹⁷ Töt insā-avö ang Yāvē nö inchōḵ elmat hī nö tö aṅhavin töm Manööyö. Asīnkö inlahen ngam Yöng re ang Yēsū hē ò nö ing panam. Hamööyöre anga-aṅ pòrô nö ötlēka elnang, miṙē-ěyö nö ikūö tömaṙôngö, uroh inrē nö fëliyö töpôkūö hī. (Vë-evkūö Heprāi 12:2, 3.) Ngön pöri ang Yēsū nö la-al nuk inkihten re kūö ò nö afēkö Manööyö ngam yöngre. Ngatī min ayī-ö ngönlöre yěi köpölōn töm Manööyö Yāvē.

18. Sā ṙô ngam 2 Pītör 3:9 asuh öp yanöölen hī tī ngam Manööyö Yāvē?

¹⁸ Vë-evkūö 2 Pītör 3:9. Akahakūö an Yāvē tö ngam ṙētak re min nö mihôiṅ nö kēngö në kanihngen. Pōyen yip tö yöölen kūö ngam Manööyö ò. Teūngen cha-a tö ṙētak re nö mikahtökūö re tö ò ngaich kētöre nö löklōn ò inrē. Ngaich yěn pōyen min tarik tö köp nö hamöiyöre söl manā-aṅ, in e mikahkūö min ayī-ö tö ngam inlahen Yāvē nö öt yëḵngen nö hameuktö Manööyö re!

19. Hòṅ sitih inlahen öi pökeh ayī-ö, asuh min öp raneushö hī?

¹⁹ Haköplu ayī-ö in Yāvē tö hī mihôiṅ holtö ṙanamlōn re la-al mine inkihten re. Köpsöṙen ang Yāvē nö “töṙāmölōn nö Tēv” pòrô nö pōyen mine ötlinëken ò tö tī ngam Sī-ö. (1 Tim. 1:11) Mihòiṅ in ayī-ö inrē köpsöṙen tī tö ngam ṙanamlōn hanöng sā Yāvē nö ha-etlö ngam minë-eny re, harōilö ngam inyööngö inrē tö re, ha-etngö në ötlanöökö hēk kēngö në kanihngen hī inrē töngamuh. Ta-a chěi töi hameuktö Manööyö re öi asīnken Yāvē. Teūngen min ayī-ö tö raneushö re sā ṙô ngam tö kūchiyö: “Tökôlò ön ngòh tarik töthanlöinyken tö kanihngen; pò ò min nö teūngen tö sapīöv ngam nômö, yē ò min nö mihôiṅ, ngam ṙô ngam Mā nö kilēḵngôre nö in cha yip töhāngenlōn tö Ò.”—Yāk. 1:12.