1-2. Isaiah 65:16, 17 chung i Jehovah bia nih lungdongh lo awkah zeitindah a kan bawmh?

“NA LUNG DONG HLAH” timi cu 2017 pengkomh civui i a biatlangpi a si. Mah program in harnak inkhawh ning kong kha kan theih hna. Mah civui kan tuahnak cu kumli a si cang. Asinain atu tiang hi vawlei ṭha lo ah kan nung rih.

² Atu ah zei buaibainak hna dah na ngeih? Na chungkharmi asiloah na dawtmi na hawi pakhat nih aan thihtak maw? Nangmah theng ṭih a nungmi zawtnak na ngei maw? Kum upatnak, leiser ral, zaangennak le hremnak hna na tong maw? Asiloah COVID-19 pulrai ti bantuk a dang zawtnak hna na ngei maw? Mah buaibainak vialte zeitikhmanh ah an um ti lai lo caan kha kan i ngaih tuk hna.—Isaiah 65:16, 17 rel.

3. Atu ah zeidah kan tuah awk a si, zeicah?

³ Hi vawlei ṭhalo ahcun nunnak cu a har tuk. Asinain hmailei ah mah nakin a ṭha lo deuhmi thil hna a um lai. (Matt. 24:21) Cucaah inkhawhnak kan ngeih nakhnga kan i zuam peng a hau. Zeicah? Jesuh nih “inkhawhnak nan ngeih ahcun nunnak nan hmu lai” tiah a ti caah a si. (Luka 21:19, NW) Kanmah bantuk buaibainak a tong nain inkhawhnak a ngeimi hna i an kong kha kan ruah ahcun inkhawhnak kan ngei deuh ve lai.

4. Inkhawhnak ngeihnak ah Jehovah cu zohchunhawk a ṭha bikmi a si tiah zeicah kan chim khawh?

⁴ Inkhawhnak ngeihnak ah zohchunhawk a ṭha bikmi cu ahodah a si? Jehovah Pathian a si. Mah nih na khuaruah aan harter men lai. Mah hi ruathmanh. Hi vawlei cu Satan kuttang ah a um caah buaibainak in a khat. Jehovah nih mah buaibainak hna tawnghtham colh awkah ṭhawnnak a ngei ko nain a caan kha a hngah. (Rom 9:22) Kan Pathian cu mah caan a phanh  hlan tiang inkhawhnak a ngei peng. Atu Jehovah nih a inkhawhmi thil pakua kong kha i ruah hna u sih.

5. Pathian min cu zeitindah thangchiat a rak si i mah kong he aa tlaiin zeitindah na um?

⁵ A min thangchiat a sinak. Jehovah nih a min kha a sunsak i mi kip nih upat hna seh ti a duh. (Isa. 42:8) Asinain a min thangchiat a sinak cu kum 6,000 hrawng a si cang. (Salm 74:10, 18, 23) Mah cu Adam le Evi nih an i nuamh nakhnga Pathian nih an herhmi thil kha a pe hna lo tiah Khuachia (“Thangchiattu” tiah sullam a ngeimi) nih sual a rak phawt lio Eden dum in aa thawk. (Gen. 3:1-5) Mah caan thawkin mi pawl kha an herh taktakmi a pe duh hna lo tiah Jehovah cu a hmaan loin sualphawt a rak si. Cutin a Pa min thangchiat a si caah Jesuh cu a ngaih a chia tuk ko lai. Cucaah a zultu pawl kha “vancung khua i a um kan Pa, na min thiang cu upat si ko seh” tiah thlacam dingin a rak cawnpiak hna.—Matt. 6:9.

6. Jehovah nih cungnung bik a sinak kong he aa tlaiin zeicah caan saupi chung a caan a rak pek?

⁶ Cungnung bik a sinak ralchanhnak. Jehovah lawnglawng hi van le vawlei uknak nawl a ngeitu a si i a uk ning zong a ṭha bikmi a si. (Biat. 4:11) Asinain Pathian cu cutin tuahnak nawl a ngei lo tiah vancungmi le minung nih an ruah nakhnga Khuachia nih a hlen hna. Cucaah Jehovah cu uknak nawl a ngeitu le a ṭha bikmi uktu a si ti langhter awkah a caan pek a hau lai. Sertu loin cun minung nih anmah tein an i uk kho lo ti kha an hngalh nakhnga Pathian nih caan saupi a caan a rak pek hna. (Jer. 10:23) Pathian lungsaunak ruangah zei ṭhatnak dah a chuak lai? Pathian cu van le vawlei uknak nawl a ngeitu a sinak, a uk ning cu a ṭha bikmi a sinak le a Pennak lawng hi vawleicung ah daihnak taktak a kan pe khotu a sinak kong kha a langhter lai.

7. Ahote nih dah Jehovah kha an ralchanh i an kong he aa tlaiin Pathian nih zeidah a tuah lai?

⁷ A fale cheukhat i ralchanhnak. Jehovah nih vancungmi le minung pawl kha chambaunak a ngei lomi mitling in a rak ser hna. Asinain vancungmi Satan (“Ralchanhtu” tiah sullam a ngeimi) nih Jehovah kha ralchanh awkah mitling a simi Adam le Evi kha a rak lem hna. Cun a dang vancungmi le minung pawl zong ralchanhnak ah an hun i tel ve. (Judas 6) A hnuah, Israel mi hmanh nih a hmaan lomi pathian kha an hun biak i Jehovah kha an hun hlawt. (Isa. 63:8, 10) Jehovah nih zumhawktlak loin an um tiah a rak ruah. Asinain ralchanhtu pawl a hrawh dih hna hlan tiang inkhawhnak a ngei. Jehovah he hi chan ṭha lo ah zumfek tein inkhawhnak a ngeimi hna cu mah caan a phanh tikah an i nuam tuk lai.

8-9. Jehovah kong he aa tlaiin zei bantuk lihbia hna dah an chim i mah kha zeitindah kan lehrulh?

⁸ Khuachia lihbia hna. Satan nih miding Job le a dang zumhfekmi Jehovah salle hna nih anmah ṭhatnak caah Pathian an biakmi a si tiah sual a puh hna. (Job 1:8-11; 2:3-5) Khuachia nih atu tiang cutin sual a kan puh rih. (Biat. 12:10) Harnak kan inkhawhnak thawngin le Jehovah kan dawt caah a cungah zumhfek tein kan umnak thawngin Satan mi lihchim a si kha kan langhter khawh. Inkhawhnak kan ngeih ahcun Job bantukin Jehovah nih thluachuah tampi a kan pek ve lai.—Jeim 5:11.

⁹ Satan nih a hmaan lomi biaknaklei hruaitu hna kha hmangin Jehovah cu a puarhrangmi a si i minung nih sifah harnak an tonmi hi amah ruangah a si tiah a ti. Cheukhat nih cun ngakchia an thih tikah vancung ah vancungmi a herh caah Pathian nih a lakmi hna a si ti  hmanh in an chim. Mah cu Pathian thangchiat a si. Asinain kannih nih cun Jehovah cu dawtnak a ngeimi Pa a si ti kha kan hngalh. Fakpi in kan zawt tik asiloah kan dawtmi pakhatkhat an thih tikah Pathian kha zeitikhmanh ah kan mawhchiat lo. Mah canah ni khatkhat ahcun a zawmi kha a damter hna lai i a thimi kha a thawhter dih hna lai ti kha kan zumh. Jehovah cu dawtnak a ngeimi Pathian a si tiah midang kha kan chimh hna. Mah lawngah Jehovah nih amah a ralchanhtu pawl kha ṭha tein a leh khawh hna lai.—Ptb. 27:11.

10. Salm 22:23, 24 nih Jehovah kong he aa tlaiin zeidah a chim?

¹⁰ A dawtmi a salle pawl harnak an tonnak. Jehovah cu zaangfahnak a ngeimi Pathian a si. Cucaah hremnak, zawtnak asiloah kan tlinlonak ruangah harnak kan tonmi a hmuh tikah a ngaih a chia tuk. (Salm 22:23, 24 rel.) Kannih zong cutin kan si ve. Pathian nih harnak hna kha hlohpiak a kan duh i a hloh zong a kan hlohpiak lai. (Exodus 3:7, 8; Isaiah 63:9 he tahchunh.) Mah caan a phanh tikah “[Kan] mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo.”—Biat. 21:4.

11. A thi cangmi zumhfekmi a salle kong he aa tlaiin Jehovah nih zeitindah a intuar?

¹¹ A thi cangmi a hawikom pawl he i ṭhennak. A thi cangmi zumhfekmi a salle kong he aa tlaiin Jehovah nih zeitindah a intuar? Anmah kha hmuh ṭhan a duh tuk hna. (Job 14:15) Jehovah nih a hawi Abraham kha zeitlukin dah hmuh ṭhan a duh lai? (Jeim 2:23) Asiloah amah he “hmaitonh” tein bia aa ruahmi Moses tah? (Ex. 33:11) Cun David le a dang salm hla phuahtu hna i thangṭhatnak an hla aw zong kha ngaih ṭhan a duh ko lai. (Salm 104:33) Mah a hawile pawl cu thihnak ah an i hngilh cang ko nain Jehovah nih a philh hna lo. (Isa. 49:15) Pumpak an sining kha  a dikthlir in aa cinken. Baibal nih Pathian hmuhnak ah ‘annih cu an nung dih’ tiah a ti. (Luka 20:38) Ni khatkhat ahcun a hawile kha a nunter ṭhan dih hna lai. An thlacamnak kha a ngaihpiak ṭhan hna lai i an biakmi kha a cohlan ṭhan lai. Na dawtmi pakhatkhat an thih ahcun mah kong hna nih hnemhnak aan pek khawh.

12. A ṭha lomi hi ni hmanung bik caan ah Jehovah kha zeinihdah a ngaih a chiatter?

¹² Minung ṭhatlonak nih midang harnak a peknak. Eden dum ah ralchanhnak aa thawk lioin Jehovah nih thil sining cu a chia chin lai ti kha a hngalh. Jehovah nih vawleicung i a ummi ṭhatlonak, dinlonak le zaangennak hna kha a huat. Bawmtu a ngei lomi, a thazaang a dermi, ngakṭah le nuhmei ti bantuk hna cungah a hleiin zaangfahnak a ngei. (Zek. 7:9, 10) Jehovah nih zumhfekmi a salle pawl harnak an pekmi hna le thong an thlakmi hna a hmuh tikah a ngaih a chia tuk. Amah he inkhawhnak a ngeimi vialte cu Jehovah nih a dawt tuk hna ti kha zum.

13. Pathian hmuhnak ah minung cu zeitlukin dah an ziaza a rawhral, mah kong he aa tlaiin Pathian nih zeidah a tuah lai?

¹³ Mi nih nupa sualnak an hun tuahnak. Amah muikeng in sermi minung hna nih ziaza ṭha lo an ngeihmi kha Satan nih hmuh a duh. Noah chan ah Jehovah nih “minung cu khuazakip ah an ṭhat lo” tuk hringhranmi kha a hmuh tikah “minung a rak ser hna i vawleicung i a rak umter hna kha a ngaih a chia. Aa ngaichih ngaingai.” (Gen. 6:5, 6, 11) Mah caan thawkin vawlei thil sining cu a ṭha deuh maw? A ṭha deuh lo. Nupa sinak aa khatmi le aa khat lomi hna nih an ziaza a rawhralmi kha a hmuh hna tikah aa nuam tuk lai. (Efe. 4:18, 19) A hleiin Jehovah a biami hna nih sualnak ngan an tuah tikah Satan cu aa nuam tuk. Pathian nih an ziaza a rawkral i thlennak tuah a duh lomi hna kha a hrawh dih hnanak thawngin nupa sualnak a huat kha a langhter lai.

14. Minung nih Pathian thil sermi kha zeitindah an tuah?

¹⁴ A sermi thil an hrawhnak. Minung uknak nih ‘harnak a chuahter.’ Mah lawng si loin mi nih Jehovah nih rian a pekmi hna vawlei le saram zong kha ṭha tein an zohkhenh hna lo. (Pct. 8:9; Gen. 1:28) Scientist cheukhat nih minung tuahsernak ruangah saram le thingkung ci * nuaikhat leng a mit kho tiah an ti. Atu ah kan pawngkam i kokek thil hna cu an rawk dih cang. Asinain Jehovah nih “vawlei a hrawktu hna” kha ka hrawh hna lai i vawlei cu paradis ah ka canter lai tiah bia aa kam.—Biat. 11:18; Isa. 35:1.

15-16. Jehovah bantukin inkhawhnak ngeih awkah zeinihdah a kan forh awk a si? Tahchunhnak pe.

¹⁵ Vancung kan Pa nih kum thong tampi chung a inmi lungretheih awk a simi buaibainak kong hna hi ruathmanh. (“ Jehovah Nih A Inmi Thil Hna” timi rinli kulh ah zoh.) Jehovah nih ṭhatlonak vialte hi zeitik caan paohah a donghter khawh. Asinain Jehovah lungsaunak nih thluachuah tampi a kan hmuhter. Mah tahchunhnak hi ruathmanh. Siibawi pakhat nih nuva hna kha a chuak rih lomi an fa kong a chimh hna. An fa cu a pum a tlam a tling lai lo. An hrin ahcun a caah a har tuk lai. A chan zong a tawi lai tiah a ti hna. Mah nuva hna nih an fa zohkhenh ding cu a fawi lai lo ti kha an hngalh ko nain hrin dingin bia an khiah. An fa kha an dawt caah zei bantuk harnak hmanh an inkhawh i an fa caah a ṭha bikmi kha pek an duh.

¹⁶ Cu bantukin Adam le Evi tefa dihlak cu an chuahka in mitlinglo an si. Asinain Jehovah  nih a dawt hna i an zawn a ruah hna. (1 Johan 4:19) Cun tahchunhnak chung i nulepa he aa lawh lonak cu Jehovah nih a fale an tonmi harnak hna kha a hlohpiak khawh hna. Jehovah nih minung tonmi sifah harnak vialte a donghter lai caan kha ri a khiah. (Matt. 24:36) Jehovah dawtnak nih mah caan tiang inkhawhnak kan ngeih nakhnga a kan forh awk a si.

17. Hebru 12:2, 3 i Jesuh chimmi bia nih inkhawhnak ngeih peng awkah zeitindah a kan bawmh?

¹⁷ Jehovah cu inkhawhnak ngeihnak ah zohchunhawk a ṭha bikmi a si. Jesuh nih a Pa ngeihmi inkhawhnak kha aa zohchunh. Vawleicung a um lioah Jesuh cu puanghrangpi in pehtlaihnak, ningzahnak le kan caah tungcung ah thlainak hna a rak tong. (Hebru 12:2, 3 rel.) Jehovah langhtermi inkhawhnak nih Jesuh kha inkhawhnak a ngeihter bantukin kannih zong a kan ngeihter ve.

18. Jehovah lungsaunak ruangah 2 Peter 3:9 ningin zeidah liim a si?

¹⁸ Kuathnih Peter 3:9 rel. Jehovah nih hi vawlei ṭha lo donghter awkah a ṭha bikmi caan kha a hngalh. A lungsaunak ruangah mi nuai tampi nih amah kha an hun hngalh i an hun biak. Jehovah lungsaunak ruangah nu paw chungin chuah awk, Pathian dawt awk le a sinah i pumpek awkah a caan a za in an ngei. Mah caah an i lawm tuk. Mi nuai tampi nih a dongh tiang inkhawhnak an ngeih tikah Jehovah nih lungsau dingin biakhiahnak a tuahmi cu a hmaanmi a si ti kha a lang lai.

19. Zei tuah awkah dah bia kan khiah awk a si i zei laksawng dah kan hmuh lai?

¹⁹ Lunglawm tein zeitindah inkhawh a si ti kha Jehovah sinin kan hngalh cang hna. Satan nih a chuahtermi ngaihchiatnak le harnak lakah Jehovah cu “aa nuammi Pathian” a si zungzal. (1 Tim. 1:11, NW) Kannih zong Jehovah nih a min a thianter lai caan, cungnung bik a sinak a langhter lai caan le atu ah kan tonmi ṭhatlonak vialte a donghter lai caan kha lungsau tein kan hngah lioah kan i nuam kho ve. Cucaah vancung kan Pa nih inkhawhnak a ngeih bantukin inkhawhnak ngeih peng ve awkah biakhiak hna u sih. Cutin kan tuah ahcun mah bia hi pakhat cio kan caah a hmaan lai: “Hneksaknak a in tikah fek tein a ummi cu a lung aa lawm, zeicahtiah cu bantuk hneksaknak kha a tei khawh caah Pathian nih amah a dawtu hna a kamhmi nunnak kha laksawng ah a hmuh lai.”—Jeim 1:12.