1-2. Jehova ye min fɔ Ezayi 65:16, 17 kɔnɔ, o b’an jija cogo di an kana an fari faga?

SAAN 2017 ka tile saba lajɛnba kuun tun ye ko: “Kana i fari faga!” Lajɛnba ka kalanw y’a yira an be se k’an ka gwɛlɛyaw muɲu cogo minw na. Saan naani tɛmɛnin kɔ, an bele be gwɛlɛyaw muɲuna duniɲa juguman nin kɔnɔ.

² Gwɛlɛya jumanw lo b’i kan? Yala i somɔgɔ dɔ wala i teri sɔbɛ dɔ sara wa? Yala bana dɔ b’i la min b’i niin bila farati la wa? Yala koow man nɔgɔ i fɛ kɔrɔya kosɔn wa? Yala i be tɔɔrɔla sabu balawo wala fariyako dɔ kɛra aw ka yɔrɔ la wala mɔgɔw b’i kɛlɛla i ka lannakow kosɔn wa? Wala, i be tɔɔrɔla COVID-19 bana wala bana wɛrɛ kosɔn wa? O gwɛlɛyaw bɛɛ bena ban loon min na, an kɔrɔtɔnin lo o ka se. O koow tɛna kɛ tugun ani an bena ɲinɛ u kɔ pewu!—Ezayi 65:16, 17 kalan.

3. An ka ɲi ka mun lo kɛ sisan ani mun na?

³ Koow man nɔgɔ fewu duniɲa nin kɔnɔ. Loon nataw la, n’a sɔrɔ an bena gwɛlɛya minw sɔrɔ, olu bena juguya ka tɛmɛ (Mat. 24:21). O kama, an ka ɲi k’a ɲini ka muɲuli kɛ kosɔbɛ. An ka ɲi k’o kɛ sabu Yezu y’a fɔ ko: “Aw ka muɲuli ben’a to aw bena hɛrɛ [wala kisili] sɔrɔ.” (Luka 21:19). Tɔɔw be an ka gwɛlɛyaw ɲɔgɔn muɲuna cogo min na, n’an be miiri o la, o bena an dɛmɛ ka muɲuli kɛ koɲuman.

4. Mun na an be se k’a fɔ ko Jehova lo be muɲuli kɛra ka tɛmɛ bɛɛ kan?

⁴ Jɔn lo be muɲuli kɛra ka tɛmɛ bɛɛ kan? Jehova Ala lo. Yala o be bari i la wa? N’i miirila, i bena a faamu fɛɛn min kama an b’o fɔ. Duniɲa nin be Sutana lo fanga kɔrɔ ani gwɛlɛyaw ka ca kojugu. See be Jehova ye k’o gwɛlɛyaw ban yɔrɔnin kelen. Nka, a be kɔnɔni kɛra k’o kɛ sini ma  (Ɔrɔm. 9:22). Sanni o cɛ, a bele be muɲuli kɛra fɔɔ o wagati ka se. An ka koo kɔnɔntɔn lajɛ a be minw muɲuna.

5. Ala tɔgɔ tiɲɛna cogo di? O be mun lo kɛ ele la?

⁵ U b’a tɔgɔ tiɲɛna. Jehova tɔgɔ ka di a ye ani a b’a fɛ bɛɛ ka bonya la a kan (Ezayi 42:8). Nka a saan 6 000 ɲɔgɔn ye nin ye mɔgɔw b’a tɔgɔ tiɲɛna (Zab. 74:10, 18, 23). O daminɛna Edɛn nankɔ kɔnɔ tuma min na Sutana Naafigi ye ngalon tigɛ ka la Ala kan (Naafigi kɔrɔ ko fana ngalontigɛla). A ko Adama ni Awa mako be min na walisa ka ninsɔndiya sɔrɔ, Ala b’u jɛnna o la (Zɛnɛzi 3:1-5). Kabi o wagati, Sutana be Ala tɔgɔ tiɲɛna ko a be adamadenw jɛnna u makoɲɛfɛn jɔnjɔnw na. Ala tɔgɔ tiɲɛna cogo min na, o tun be hami bila Yezu la. O kama, a ko a ka kalandenw ka delili kɛ ko: “An Faa min be sankolo la, i tɔgɔ ka boɲa.”—Mat. 6:9.

6. Mun na Jehova y’a to wagati caaman tɛmɛna ka sɔrɔ k’a yira ko joo be ale kelenpe lo fɛ ka kuntigiya kɛ?

⁶ Mɔgɔw banna Ala ka kuntigiya ma. Joo be Jehova kelenpe lo fɛ ka kuntigiya kɛ sankolo ni dugukolo kun na ani a ka kuntigiya ɲɔgɔn tɛ yen (Yir. 4:11). Nka, Sutana y’a ɲini ka mɛlɛkɛw ni adamadenw lafili u k’a miiri ko joo tɛ Ala fɛ k’o kɛ. Walisa k’a yira ko joo be Jehova lo fɛ ka kuntigiya kɛ ani ko a ka kuntigiya ɲɔgɔn tɛ yen, o tun bena wagati ta. Ala ye hakilitigi ye minkɛ, a ye wagati caaman to adamadenw ye walisa u k’u yɛrɛ mara. A y’o kɛ walisa u k’a faamu ko u tɛ se k’o kɛ koɲuman n’u ma mɛnni kɛ u Danbaga fɛ (Zer. 10:23). Sɔsɔliko min lawulila, Ala ka muɲuli bena a to o ka ɲɛnabɔ pewu! Bɛɛ bena a lɔn ko a ka kuntigiya ɲɔgɔn tɛ yen ani ko a ka Masaya dɔrɔn lo be se ka lafiya ni hɛɛrɛ sɔbɛ sigi dugukolo kan.

7. Jɔnw lo murutira Jehova ma? A bena mun lo kɛ o mɔgɔw la?

⁷ Jehova ka deen dɔw murutira a ma. Tuma min na Jehova ye mɛlɛkɛw ni mɔgɔw dan, u tun dafanin lo. Nka, mɛlɛkɛ dɔ murutira a ma k’a yɛrɛ kɛ Sutana ye (o kɔrɔ, “Kɛlɛbaga”). O kɔ, a ye Adama ni Awa lasun ka muruti. Mɛlɛkɛ wɛrɛw ni adamaden dɔw fana murutira Ala ma (Zude 6). Ala tun ye Israɛl siya sugandi k’a kɛ a ka jama ye. Nka kɔfɛ, olu fana murutira a ma ani u y’a daminɛ ka ngalon alaw bato (Ezayi 63:8, 10). O koo ye Jehova dusu tiɲɛ. O bɛɛ n’a ta, a ye muɲuli kɛ ani a bele bena to ka muɲuli kɛ fɔɔ tuma min na a bena mɔgɔ murutininw bɛɛ halaki. O kɔ, Jehova ni mɔgɔ kantigiw bena ninsɔn diya sabu u tɛna koo jugu muɲu tugun!

8-9. Sutana ye ngalon jumanw lo la Jehova kan? An be se k’a yira cogo di ko Sutana ye ngalontigɛla ye?

⁸ Sutana ka ngalonw. Sutana ye Zɔbu ani Jehova sagokɛla kantigiw bɛɛ jalaki ko u be Ala sago kɛra nata lo kosɔn (Zɔbu 1:8-11; 2:3-5). Halibi, Sutana be adamadenw jalakira (Yir. 12:10). An be se k’a yira ko a ye ngalontigɛla ye an kɛtɔ k’an ka gwɛlɛyaw muɲu. An be se k’o yira fana n’an b’an jija ka to kantigiya la Jehova ye sabu an b’a kanu. O la, Jehova bena an duga an ka muɲuli kosɔn i ko a ye Zɔbu duga cogo min na.—Zaki 5:11.

⁹ Sutana be tɛmɛ diinan kuntigiw fɛ ka mɔgɔw lafili. Misali la, u b’a fɔ ko Jehova ka fari ani ko tɔɔrɔ min be adamadenw kan ale nɔɔ lo. Dɔw yɛrɛ b’a fɔ ko ni denmisɛnw sara, Ala lo y’u ta sabu  a mako be mɛlɛkɛw la sankolo la. O ngalonw be Ala tɔgɔ tiɲɛ yɛrɛ le! Nka, an b’a lɔn ko Jehova ye Faa kanutigi ye. Ni bana jugu dɔ b’an na wala an ka mɔgɔ kanulen dɔ sara, an t’a fɔ abada ko an ka Ala nɔɔ lo. An lanin b’a la ko loon dɔ, a bena banabagatɔw kɛnɛya ani ka suuw kunu. Mɔgɔ o mɔgɔ be sɔn k’an lamɛn, an be se k’a fɔ a ye ko Jehova Ala b’an kanu kosɔbɛ. O la, Jehova bena sababu sɔrɔ k’a darabɔbaga jaabi.—Talenw 27:11.

10. Mun lo fɔra Zaburuw 22:24, 25 kɔnɔ Jehova koo la?

¹⁰ A sagokɛla kanulenw be tɔɔrɔla. Jehova ye makaritigi Ala ye. N’an be tɔɔrɔla, o b’a dusu tiɲɛ kosɔbɛ. Koo nunu be se k’a to an be tɔɔrɔ: N’u b’an kɛlɛ an ka lannakow kosɔn, bana, wala an ka dafabaliyakow (Zaburuw 22:24, 25 kalan). N’an be tɔɔrɔla, Jehova b’an faamu. A b’a fɛ ka daan sigi o la ani a yɛrɛ bena o lo kɛ (Ɛkizɔdi 3:7, 8; Ezayi 63:9 lajɛ). Loon dɔ, “a bena [an] ɲaji bɛɛ cɛ. Saya kɔni, o te yen tugu. Mɔgɔ tena sa, mɔgɔ tena kasi, mɔgɔ tena tɔɔrɔ tugu.”—Yir. 21:4.

11. Jehova sagokɛla kantigi minw sara, a be mun lo miiri olu koo la?

¹¹ A teri minw sara, olu ɲɛnafin b’a la. Cɛɛw ni muso kantigi minw sara, Jehova be mun lo miiri olu koo la? A kɔrɔtɔnin lo k’u ye tugun! (Zɔbu 14:15). Miiri k’a filɛ Jehova tericɛ Ibrayima ɲɛnafin b’a la cogo min na (Zaki 2:23). Jehova tun be kuma ni Musa ye “daa ni daa.” (Ɛkiz. 33:11). Miiri k’a filɛ Jehova b’a fɛ cogo min na ka kuma n’a ye tugun. A kɔrɔtɔnin lo fana ka Dawuda ni Zaburu sɛbɛbaga tɔɔw ka dɔnkili diimanw lamɛn (Zab. 104:33). Hali ni a teriw sara,  Jehova ma ɲinɛ u kɔ (Ezayi 49:15). A hakili bele be u ka jogow la. Bibulu b’a fɔ ko Jehova fɛ, “u ɲanaman lo.” (Luka 20:38). Loon dɔ, a bena u kunu ka bɔ saya la. U bena delili minw kɛ ni kɔnɔgwɛ ye, a bena u lamɛn tugun ani ka sɔn u ka batoli ma i ko a tun b’a kɛ cogo min na. N’i ka mɔgɔ kanulen dɔ sara, an jigi b’a la k’o kumaw be i jija ani k’i dusu saalo.

12. Mun lo be Jehova dusu kasi duniɲa laban wagati nin na?

¹² Mɔgɔ juguw be koo jugu kɛ tɔɔw la. Tuma min na murutiliko daminɛna Edɛn nankɔ kɔnɔ, Jehova tun b’a lɔn ko koow bena juguya le fɔlɔ ka sɔrɔ ka fisaya. Juguya, tilenbaliyakow ani fariyako minw be kɛra duniɲa kɔnɔ bi, Jehova b’u kɔniya. Mɔgɔ minw ye barikantanw ye i n’a fɔ dɛmɛbaga tɛ minw na, falatɔw ani firiyamusow, Jehova b’a janto kosɔbɛ olu la tuma bɛɛ (Zak. 7:9, 10). Ni Jehova y’a ye ko u b’a sagokɛla kantigiw tɔɔrɔla ani k’u don kaso la, o yɛrɛ lo b’a dusu tiɲɛ kosɔbɛ. An ka la a la ko an minw bɛɛ be muɲuli kɛra i ko ale, a b’an kanu.

13. Jehova ɲɛɛ be koo haramulen jumanw lo la minw be kɛra adamadenw cɛma? A bena mun lo kɛ o koo la?

¹³ Adamadenw ka kakalayakow be juguyara ka taga. Adamadenw danna Ala jaa la. Nka, a ka di Sutana ye k’u lasun ka kakalayakow kɛ. Nuhun ka wagati la, tuma min na Ala “y’a ye ko mɔgɔw be juguyara ka taga . . . a nimisara mɔgɔw danko la dugukolo kan, a dusu kasira kosɔbɛ.” (Zɛnɛzi 6:5, 6, 11). Yala koow fisayara bi wa? Ayi dɛ! Sutana ninsɔn ka di kosɔbɛ k’a ye ko mɔgɔ caaman b’u yɛrɛ bila kakalayako sifa bɛɛ la. Misali la, cɛɛw ni musow be kakalayakow kɛ ani u yɛrɛ b’o kɛ n’u cɛɲɔgɔnw wala n’u musoɲɔgɔnw ye! (Efɛz. 4:18, 19). Min yɛrɛ be Sutana ninsɔn diya ka tɛmɛ, o ye n’a sera ka Jehova sagokɛla dɔw lasun ka jurumuba kɛ. Ni Jehova ka muɲuli sera a daan ma, minw be kakalayakow kɛ, a bena u bɛɛ halaki. O cogo la, bɛɛ bena a ye ko a be kakalayako sifa bɛɛ haramuya.

14. Mɔgɔw be mun lo kɛra dugukolo ni bɛgɛnw na?

¹⁴ Adamadenw be Ala ka danfɛnw halakira. Adamaden “be kuntigiya kɛ a tɔɲɔgɔn kan k’a tɔɔrɔ.” Nka o dɔrɔn tɛ. Ala ye dugukolo ni bɛgɛn minw kalifa a ma walisa a k’a janto u la, a t’u minɛna ka ɲɛ (Waaj. 8:9; Zɛnɛzi 1:28). Lɔnnikɛla dɔw ko yanni saan damanin, bɛgɛn sifa miliyɔn kelen bena tunu adamadenw ka kɛwalew kosɔn. A tɛ bari an na k’a ye ko mɔgɔ dɔw be jɔrɔ dugukolo n’an laminiyɔrɔ koo la! Ninsɔndiya lo k’a ye ko Jehova y’a daa di ko a bena “dugukolo tiɲɛbaaw halaki” ani k’a yɛlɛma k’a kɛ alijɛnɛ ye.—Yir. 11:18, Bible senuma; Ezayi 35:1.

15-16. Mun lo ka ɲi k’an lasun ka muɲuli kɛ i ko Jehova? Ɲɛyirali dɔ fɔ.

¹⁵ Miiri k’a filɛ an sankolola Faa be dusukasiko minw bɛɛ muɲuna kabi saan waa caaman. (Koorilen nin lajɛ: “ Jehova be koo minw muɲuna.”) Jehova be se ka daan sigi duniɲa juguman nin na wagati min k’a diya. Nka, a ka muɲuli kɛra duga sababu ye an fɛ! An ka ɲɛyirali dɔ lajɛ. Miiri k’a filɛ dɔgɔtɔrɔw b’a fɔ cɛɛ dɔ n’a muso ye ko u deen bena wolo ni fiɲɛba dɔ ye. U ko ɲɛnamaya bena gwɛlɛya o deen ma ani ko a bena sa a denmisɛn tuma na. O bɛɛ n’a ta, a wolotuma na, bangebagaw ninsɔn ka di, hali n’u b’a lɔn  ko a bena gwɛlɛya u ma kosɔbɛ k’u janto o deen na. Komi u b’u deen kanu, o b’u lasun ka gwɛlɛya sifa bɛɛ muɲu walisa a ka ɲɛnamaya kɛ cogo fisaman na.

¹⁶ O cogo kelen na, Adama ni Awa bɔnsɔnw bɛɛ ye mɔgɔ dafabaliw ye u wolotuma na. O bɛɛ n’a ta, Jehova b’u kanu ani a b’a janto u la (1 Zan 4:19). An kumana bangebaga minw koo la, olu tɛ se ka foyi kɛ ka daan sigi u deen ka tɔɔrɔ la. Nka, Jehova be se ka daan sigi a deenw ka tɔɔrɔ la. A ye wagati dɔ latigɛ, o min na a bena adamadenw ka tɔɔrɔ bɛɛ ban (Mat. 24:36). Yala Jehova ka kanuya t’an lasun k’a ka muɲuli ladegi, an ka tɔɔrɔw mana mɛɛn cogo o cogo wa?

17. Min fɔra Yezu koo la Eburuw 12:2, 3 la, mun na o b’an jija an ka to ka muɲuli kɛ?

¹⁷ Jehova ka muɲuli ɲɔgɔn tɛ yen. Yezu ye a Faa ka muɲuli ladegi. K’a to dugukolo kan, a ye kuma juguw ni maloya muɲu ani a ye tɔɔrɔ muɲu gwengwenyiri kan an kosɔn (Eburuw 12:2, 3 kalan). Siga t’a la, Jehova ka muɲuli ye fanga di Yezu ma ka muɲuli kɛ. O be se ka an fana dɛmɛ ka muɲuli kɛ.

18. Koo minw be kɛra Jehova ka muɲuli sababu la, 2 Piyɛri 3:9 b’an dɛmɛ cogo di k’o faamu?

¹⁸ Vɛrise nin kalan: 2 Piyɛri 3:9. Jehova b’a lɔn a bena daan sigi duniɲa juguman nin na wagati bɛnnin min na. A ka muɲuli sababu la, mɔgɔ caaman be sera k’a lɔn. Ka fara o kan, jamaba mɔgɔ miliyɔn caaman b’a batora. U bɛɛ be Jehova waleɲuman lɔn kosɔbɛ sabu a be muɲuli kɛra kabi wagatijan. O kɛra sababu ye, u wolola, u y’a kanu ani k’u yɛrɛkun di a ma. Mɔgɔ miliyɔn caaman minw bena muɲuli kɛ fɔɔ ka taga se a laban na, Jehova bena u duga. O wagati lo la an bena a faamu kosɔbɛ ko kuun tun b’a la Jehova ka muɲuli kɛ!

19. An ka ɲi k’an jija ka mun lo kɛ ani n’an y’o kɛ, an bena mun lo sɔrɔ?

¹⁹ Jehova b’a yira an na an be se ka muɲuli kɛ ni ninsɔndiya ye cogo min na. Sutana be mɔgɔw tɔɔrɔ ani k’u dusu kasi. O bɛɛ n’a ta, Jehova m’a to o k’a ka ninsɔndiya nagasi (1 Tim. 1:11). An fana ninsɔndiyanin be se ka to n’an be muɲuli kɛra Jehova ka koo nunu kɛ: k’a tɔgɔ saniya, k’a ka masabaya lafasa ani ka juguya n’an ka gwɛlɛyaw bɛɛ ban. An k’a to an sankolola Faa ka muɲuli k’an jija ani an k’an cɛsiri ka muɲuli kɛ. N’an y’o kɛ, an kelen kelen bɛɛ bena a ye ko vɛrise nin ka kumaw ye tiɲɛn ye: “Mɔgɔ min be jija ka sigɛn muɲu, o tigi dagamunin lo. Bari n’a sera ka sigɛn nunu muɲu, a bena nii banbali sɔrɔ a ka tɔnɔ ye. Ala tun y’a daa di a kanubagaw ma, ko u bena min sɔrɔ.”—Zaki 1:12.