1-2. An Izayi 65:16, 17, Jéova ka fè-nou on bèl pwomès. Kijan pwomès-lasa ka édé-nou pou nou pa lagé ?

AN 2017, tèm a lasanblé réjyonal an nou sé té « Pa lagé ! » Sa ankourajé-nou toubònman. Adan sé diskou-la nou vwè ka nou pé fè pou kenbé magré nou ka jwenn éprèv. Men dépi sa, 4 lanné ja pasé é nou ka viv adan mond méchan lasa toujou !

² Ki éprèv ou ja jwenn dépi sa ? Ès ou ja pèd on moun an fanmi a-w oben on bon zanmi a-w ? Ès ou trapé on maladi grav é fò ou té goumé èvè-y ? Ès vi-la pi rèd pou-w pas laj-la ka bat-vou ? Ès la ou ka rété la ni on katastròf natirèl kon siklòn oben tranmanndtè ki fèt ? Ès yo ja mennasé-w, ès yo ja ba-w kou oben ès yo ja pèwsékité-w ? Ès ou ka soufè akòz dè Covid-19 la oben akòz dè ondòt maladi ankò ? Aaa sèlman, nou ka atann jou-la nou pé’é ka soufè dè tout sé biten-lasa ankò ! Nou pé’é menm ka sonjé-yo ! (li Izayi 65:16, 17).

3. Ka fò-nou fè é ki byenfé sa ké pwokiré-nou ?

³ Lavi adan mond-lasa difisil é nou sav kè difikilté dèyè poko mannyé ! (Mat. 24:21). Kifè, pi sa k’ay é pi fò-nou aprann andiré. Ki byenfé sa ké pwokiré-nou ? Mi sa Jézi di : « Si zò andiré, zò ké sové vi a zòt » (Lik 21:19). On bon mwayen pou nou pé sa andiré pibyen sé gadé kijan lézòt ka réyisi andiré lè yo ka jwenn éprèv ki ka sanm tan nou.

4. Poukwa nou pé di kè pa ni ponmoun ki ja andiré plis ki Jéova ?

⁴ Pa ni ponmoun ki ja andiré plis ki Jéova. Ès sa ka siwprann-vou ? Si sé sa pran tan réfléchi asi sa : mond-lasa anba jouk a Dyab-la é sé yenki dè pwoblèm nou ka tann palé. Jéova té’é pé réglé sé pwoblèm-lasa fap-fap men i ka atann bon moman-la pou i aji (Wom. 9:22). Toupannan i ka atann, i ka kontinyé andiré diféran sitiyasyon ki rèd  toubònman. Adan awtik-lasa, nou ké palé dè 9 sitiyasyon kè Jéova ka andiré.

5. a) Kijan yo sali non a Bondyé ? b) Ka ou ka rèsanti lè ou ka vwè jan yo sali non a Bondyé ?

⁵Yo sali non a-y. Jéova enmé non a-y é i vé pa ponmoun dérèspèkté-y (Iz. 42:8). Men dépi 6 000 an, yo ka sali non a Jéova konsa, alòskè non a-y sen (Sòm 74:10, 18, 23). Adan Jadendédèn-la Dyab-la (mo-lasa vlé di on moun ki ka manti asi on moun pou fè-y ditò) akizé Bondyé lè i di konsa kè i ka anpéché Adan é Èv ni sa yo bizwen pou ni tchè-kontan (Jén. 3:1-5). É i ka kontinyé fè sa toujou ! I ka di kè Jéova pa’a ba lézimen sa yo bizwen. Lè Jézi té ka vwè jan yo té ka sali non a Pap’a-y, i pa té ka sipòté sa menm. Sé pousa, mi sa i di disip a-y mandé adan priyè a yo : « Pap’an nou ki an syèl-la, fò non a-w vin sen » (Mat. 6:9).

6. Yo di kè Jéova pa andwa gouvèné. Poukwa i lésé tousa tan pasé pou réglé kèsyon-lasa ?

⁶Onlo moun kont dominasyon a-y. Sé yenki Jéova ki ni dwa gouvèné an syèl-la é asi latè é dominasyon a-y sé méyè dominasyon ki tini (Rév. 4:11). Men Dyab-la rivé pran tèt a onlo zanj é ta onlo nonm é i fè-yo kwè kè Bondyé pa andwa gouvèné. Pou sav si Jéova andwa gouvèné, a pa dé jou sèlman i té’é fo pou réponn a kèsyon-lasa ! Èvè onlo sajès, Jéova lésé onlo tan pasé pou toutmoun pé byen vwè kè san Kréyatè a yo, lézimen pa kapab dirijé-yo tousèl a yo. Sé yenki échwé yo ké échwé ! (Jér. 10:23). Grasa pasyans a Jéova, lè kèsyon-lasa ké réglé, i ké réglé pou touttan. Non a Bondyé ké wouvin pwòp lèwvwè sa ké klè pou toutmoun kè sé yenki wayòm a-y ki ké pòté lapé é lasékirité asi latè.

7. Kimoun ki ba Jéova do é ka ki ké rivé sé moun-lasa talè ?

⁷Ni sèwten adan timoun a-y ki ba-y do. Lè Jéova kréyé sé zanj-la é lè i kréyé lézimen, yotout té pawfè kivédi yo pa té ni pon défo. Men ni on zanj, Satan (mo-lasa vlé di « lènmi »), ki ba Jéova do. É i rivé pran tèt a Adan é Èv é i fè-yo ba Jéova do alòskè Adan é Èv té pawfè. Apré, ni dòt zanj é dòt moun ki pran menm chimen ki yo (Jid 6). Plita ankò, alòskè Bondyé té chwazi nasyon a Izrayèl pou vin pèp a-y, ni onlo moun adan nasyon-lasa ki ba-y do é ki mèt-yo ka adoré fo-dyé (Iz. 63:8, 10). Nou ka tou konprann jan sa fann tchè a Jéova, men i andiré sitiyasyon-lasa. É i ké kontinyé andiré joustan moman-la rivé pou i détwi tout sé moun-la ki ka ba-y do la. Lèwvwè moman-lasa ké rivé sé ké on bèl soulajman pou tout sèwvitè fidèl a Bondyé, pas kon Bondyé, yo ka sipòté tout méchansté ki adan mond-lasa.

8-9. Ki manti lènmi a Jéova ka simé, é kijan nou pé montré kè sa yo ka di la pa vré ?

⁸Dyab-la pa ka arété simé manti asi-y é asi sèwvitè a-y. Satan di konsa kè si Jòb té ka sèvi Jéova sé paskè i té ni on entéré adan sa. É lè i fè sa, sé konsi i té ka di osi kè tout sèwvitè a Bondyé ka fè menm biten-la (Jòb 1:8-11 ; 2:3-5). Jous a jòdijou, Satan ka akizé sèwvitè a Bondyé (Rév. 12:10). Noutout pé montré kè Satan sé on mantè si nou ka andiré lè nou ka jwenn éprèv é si nou ka sèvi Bondyé a san pou san pas nou enmé-y. Menmjan ki Jòb, si nou ka kontinyé andiré, nou pé sèten kè Jéova ké béni-nou (Jak 5:11).

⁹ Anplisdisa, Satan ka sèvi èvè sé chèf a sé fo rèlijyon-la pou fè moun kwè kè Jéova méchan toubònman é kè si nou ka soufè sé akòz dè Jéova osi. Pa ègzanp, lè on  timoun ka mò, ni sèwten moun ki ka di kè sé Bondyé ki pran-y pas i té bizwen on ti zanj an syèl-la. Mi on manti ki ka dérèspèkté Bondyé mi ! Nou sav byen kè Jéova pa té’é jen fè on biten konsa. Lè nou ka trapé on maladi ki grav oben lè nou ka pèd on moun nou enmé, nou pa’a jen di kè sé fòt a Bondyé pas nou sav kè on jou, Jéova kè géri tout kalté maladi é kè i ké résisité moun ki mò. Anplisdisa, nou ka èspliké toutmoun ki ka kouté-nou kè Jéova sé on Bondyé ki plen lanmou. Kifè, tout sé biten-lasa ka pèwmèt Bondyé réponn Satan ki pa’a jen las provoké-y (Pwov. 27:11).

10. Ka Sòm 22:23, 24 ka aprann-nou asi Jéova ?

¹⁰I enmé sèwvitè a-y é i ka vwè lè yo ka soufè. Jéova sé on Bondyé ki ni konpasyon. Sa ka fè-y lapenn toubònman lè i ka vwè-nou ka soufè ki sé lè yo ka pèwsékité-nou ki sè lè nou malad oben ki sé akòz dè défo an nou (li Sòm 22:23, 24). Jéova ka konprann doulè an nou, i vé fè-y disparèt é i ké fè-y (gadé Ègzòd 3:7, 8 ; Izayi 63:9). On jou, « i ké suiyé tout dlo an zyé [an nou], é lanmò pé ké la ankò ; pé ké tini ni dèy, ni kri, ni doulè ankò » (Rév. 21:4).

11. Ka Jéova ka rèsanti lè i ka sonjé sèwvitè a-y ki fidèl é ki mò ?

¹¹Konm zanmi a-y mò, i pé pa pasé tibwen tan èvè yo ankò. Ka Jéova ka rèsanti lè i ka sonjé sèwvitè a-y ki fidèl é ki mò ? A pa ti présé i présé wouvwè-yo ! (Jòb 14:15). Ès ou ka imajiné jan Abraam ka manké-y ? (Jak 2:23). É Moyiz aprézan, siwtou i té ka palé èvè-y « fas a fas » ? (Ègz. 33:11). É i dwèt présé vwè David é sélézòt boug-la ki maké sé Sòm-la pou yo pé sa chanté louwanj ba-y ! (Sòm 104:33). Yotout té zanmi a-y, i pa oubliyé-yo menmsi yo mò (Iz. 49:15). I ka sonjé chak ti détay  a pèwsonalité a yo. ‘Pou-y, sé konsi yo vivan toujou’ (Lik 20:38, nòt). On jou, i ké résisité-yo. A moman-lasa, a pa ti kontan i ké kontan lèwvwè yo ké ka adoré-y ! I ké kontan tann priyè a yo ki ka sòti anfon a tchè a yo. Si ou pèd on fanmi a-w oben on zanmi a-w, lè ou ka tann sa, sa pé konsolé-w.

12. Jòdijou, ki biten ki ka fè Jéova lapenn toubònman ?

¹²Sé méchan-la ka fè-moun vwè bon mizè. Lèwvwè sé rèbèl-la ba Jéova do adan Jadendédèn-la, i té sav byen kè avan sitiyasyon-la ranjé i té’é vin pli mové. Jòdijou, ni onlo méchansté, onlo enjistis é onlo vyolans adan mond-lasa é Jéova hay sa toubònman. Jéova toujou pran penn a moun ki pi frajil é ki pa ni ponmoun pou défann-yo, kon timoun ki san papa oben ki san manman, oben kon madanm ki pèd mari a yo (Zak. 7:9, 10). On biten ki ka fè Jéova lapenn toubònman, sé lèwvwè yo ka fè sèwvitè a-y bon atrosité é kè yo ka mèt-yo lajòl. Noutout ka andiré é nou pé sèten kè Jéova enmé-nouchak.

13. Ni sèwten konduit Jéova ka vwè ki ka ba-y malotchè. Ki konduit ésa é ka i ké fè talè pousa ?

¹³Pi sa k’ay é pi sé moun-la ka fè mové biten. Lè Jéova kréyé lézimen sé té pou yo té imité-y, men Satan enmé fè-yo fè dé biten ki pa bon. An tan a Noé, lè « Jéova vwè kè lézòm té ka fè onlo méchansté [...] i règrété i té mèt lézòm si latè é sa fè-y lapenn » (Jén. 6:5, 6, nòt, 11). É dépi sa, ès sitiyasyon-la vin méyè ? Awa ! Satan kontan toubònman lè i ka vwè sa ki lanmòd jòdijou. I kontan vwè sé moun-la adan tout kalté vis ki sé madanm é misyé, ki sé misyé é misyé oben madanm é madanm (Éféz. 4:18, 19). É lè i ka pousé on sèwvitè a Jéova fè on péché ki grav, i pi kontan ankò ! Pou lèmoman Jéova ka atann men lè lè-la ké rivé, i ké montré toutmoun jan i hay tout sé mové konduit-lasa.

14. Ka lézimen ka fè latè é sé zannimo-la sibi ?

¹⁴Lézimen ka détwi sa i kréyé. « Lòm ka dominé lòm pou fè-y soufè ». Anplisdisa, olyé lòm okipé-y dè latè é dè sé zannimo-la kon Bondyé té mandé-y, sé détwi i ka détwi-yo (Ékl. 8:9 ; Jén. 1:28). Ni sèwten èspésyalis ki ka di kè ni on milyon zannimo é plant ki pé rivé a disparèt adan kèlkè lanné. Nou ka tou konprann poukwa sé moun-la enkyèt pou planèt-la. Men érèzman, Jéova pwomèt kè i ké « détwi séla ki ka détwi latè », é kè i ké fè planèt an nou touné an paradi (Rév. 11:18 ; Iz. 35:1).

15-16. Ki lidé ki pé ban-nou fòs pou nou pé sa andiré menmjan ki Jéova ? Bay on ègzanp.

¹⁵ Pran on ti tan pou réfléchi asi tout sé sitiyasyon difisil la kè Pap’an nou ki an syèl-la ka andiré dépi nanni-nannan (gadé ti karé-la «  Sa Jéova ka andiré »). Jéova pé fin bat èvè mond méchan lasa a nenpòt ki moman men érèzman kè Jéova ni pasyans, sa ka édé-nou toubònman. Pou nou byen konprann sa, an-nou pran on ègzanp : imajiné kè on misyé é on madanm kay ni on timoun é kè dòktè-la ka di-yo kè timoun-la ké fèt èvè on maladi ki grav. Timoun-lasa ké soufè tout vi a-y é i pé’é viv lontan. Men jou-la i ka fèt la, a pa ti kontan fanmi a-y kontan menmsi yo sav kè fò yo ké pran swen a-y toutlè. Konm yo enmé timoun a yo, yo ké andiré tout difikilté yo ka jwenn é yo ké fè ansòt pou timoun a yo ni on vi ki bèl.

¹⁶ Ègzanp a timoun-lasa ka fè-nou sonjé sitiyasyon a tout désandan a Adan é Èv. Lè  yo ka fèt yotout enpawfè men apapousa Jéova pa enmé-yo é pa’a pran swen a yo (1 Jan 4:19). Adan ègzanp a talè la, sé paran-la pa té pé fè ayen pou anpéché timoun a yo soufè. Men li Jéova, i pé fè ansòt pou timoun a-y pa soufè ankò. I chwazi on jou pou i fè tousa ki ka fè lézimen soufè disparèt (Mat. 24:36). Pannan tout tan-la nou ké bizwen andiré la, lanmou a Jéova ké ban-nou fòs pou nou pé sa andiré menmjan ki-y.

17. Kijan sa yo di asi Jézi an Ébré 12:2, 3 ka ban-nou fòs pou andiré ?

¹⁷ Jéova andiré onlo é sé méyè ègzanp ki ni adan domenn-lasa. Jézi rivé imité ègzanp a Pap’a-y, i andiré li osi. Pou i té pé sa sové-nou, i andiré mové pawòl, i méprizé lahont é i tchenn tchè asi on poto (li Ébré 12:2, 3). Lèfètkè Jéova andiré, sèten sa ba Jézi fòs pou andiré osi. Ègzanp a Jéova ka ban-nou fòs pou andiré osi.

18. Onlo biten vin posib grasa pasyans a Jéova. Kijan 2 Pyè 3:9 ka montré-nou sa ?

¹⁸ (Li 2 Pyè 3:9.) Jéova konnèt kitan pou i détwi mond-lasa é lè i ké fè sa sé ké méyè moman-la. Grasa pasyans a-y ni onlo moun ki aprann konnèt-li, kifè, konnyéla la ni on gran foulmoun ki ka adoré-y é ki ka ba-y louwanj. A pa ti kontan yo kontan Jéova andiré ! Pas grasa sa, yo ni tan fèt, yo ni tan aprann konnèt-li é yo vin enmé-y é yo ni tan ba Jéova vi a yo. Lè i ké rékonpansé-nou pas nou andiré jous a lafen, toutmoun ké vwè kè i té ni rézon pran pasyans.

19. Ka fò-nou byen désidé a fè é ki rékonpans nou ké ni ?

¹⁹ Jéova ka aprann-nou andiré èvè tchè-kontan. Satan ja fè moun lapenn é i ja fè moun soufè ! É menmsi Jéova soufè adan sa osi, i toujou rété menm moun-la, ‘Bondyé-la tchè a-y kontan la’ (1 Tim. 1:11). Nou osi nou pé ni tchè-kontan toupannan nou ka atann èvè konfyans kè Bondyé fè non a-y vin sen, kè i montré toutmoun kè sé-y ki andwa gouvèné é kè i fè ki pwoblèm an nou ki laméchansté disparèt. Fò-nou byen désidé a andiré é fò pa nou jen oubliyé kè Pap’an nou ki an syèl-la ka andiré li osi. É si nou fè sa, nouchak ké vwè sé pawòl-lasa réyalizé : « Tchè-kontan pou moun-la ki ka kontinyé andiré éprèv pas aprésa, i ké ni favè a Bondyé é i ké rèsèvwa kouwòn a lavi, kouwòn-la Jéova pwomèt kè i ba moun ki ka kontinyé enmé-y » (Jak 1:12).