1-2. Ki promès Jéova bay annan Isaïe 65:16, 17 ki ka ankourajé nou pou nou pa anbandonnen ?

« PA ANBANDONNEN ! » A té tèm nou asanblé réjyonal 2017. Nou anprann kouman nou pouvé tchenbé rèd menm si nou gen tout kalité éprèv. Mé, kat lannen ja pasé dipi sa asanblé-a é nou la toujou ka tchenbé annan sa monn-an !

² Ki problèm to jwenn dipi sa asanblé-a ? Ès to pédi roun moun annan to fanmi ouben roun zanmi ? Ès to gen roun maladi ki grav ? Ès lavi-a rèd pou to paské laj ka rantré ? Ès to pasé anba roun katastròf ? Ès yé pèrsékité to ouben yé fè to méchansté ? Ès to ka soufri akoz di pandémi Covid-19-a ouben akoz di rounòt bagaj konsa ? A pa ti présé nou présé wè jou-a tout sa bagaj-ya ké dèyè nou, lò nou ké bliyé yé nèt é yé pa ké janmen roufèt ankò ! (li Isaïe 65:16, 17).

3. Kisa nou divèt fè, é poukisa sa enpòrtan ?

³ Lavi annan sa monn-an rèd, é pitèt titalò nou ké jwenn problèm pi rèd ankò (Mat. 24:21). Nou divèt kontinyé anprann tchenbé. Poukisa ? Paské Jézi di : « Paské zòt ka kontinyé tchenbé, zòt ké sové zòt lavi » (Luc 21:19). Nou ké pouvé tchenbé pi byen, si nou ka gadé kouman ròt-ya ka tchenbé anba problèm kou sa nou ka jwenn.

4. Poukisa nou pouvé di ki a Jéova ki ka bay pi bon èkzanp annan zafè kontinyé tchenbé ?

⁴ Kimoun ka bay pi bon èkzanp annan zafè kontinyé tchenbé ? A Jéova. Pitèt sa ka étoné to. Mé si to ka pran tan réfléchi asou sa, to ké konprann ki sa monn-an anba pouvwar Djab-a é akoz di sa, i gen roun patché problèm. Jéova pouvé fin ké sa monn-an lanmenm, mé i ka antann jou i prévwè-a pou fè sa (Rom. 9:22). An menm tan, i ka  kontinyé tchenbé jistan sa moman i chwazi-a rivé. Annan sa artik-a, nou ké wè nèf bagaj Jéova désidé kontinyé sipòrté.

5. a) Kouman yé dérèspèkté non Bondjé ? b) Kisa sa ka fè to lò to ka wè sa ?

⁵ Jéova ka sipòrté yé dérèspèkté so non. Jéova kontan so non, é i lé tout moun rèspèkté l’ (Is. 42:8). Mé sa ka fè 6 000 lannen yé ka dérèspèkté so non (Ps. 74:10, 18, 23). Sa koumansé annan jarden Édèn-an lò Djab-a (sa lé di « moun ki ka manti asou moun pou sali yé répitasyon ») akizé Bondjé. I di ki i pa té lé bay Adan ké Èv roun bagaj yé té bézwen pou yé tchò té kontan (Gen. 3:1-5). Dipi sa jou-a, moun-yan ka akizé Jéova, yé ka di ki i pa lé bay nou sa nou vréman bézwen. Jézi pa té ka sipòrté wè moun-yan sali non so Papa toulong. A pou sa i anprann so disip priyè konsa : « Nou Papa ki annan syèl-a, a pou to non sanktifyé » (Mat. 6:9).

6. Poukisa Jéova lésé roun patché tan pasé pou i montré ki i gen drwa koumandé ni syèl-a ni latè-a ?

⁶ Bokou moun pa lé asèpté Bondjé é yé pa lé i dirijé yé. A Jéova rounso ki gen drwa dirijé syèl-a ké latè-a, é a fason i ka dirijé-a ki pi bon-an (Rév. 4:11). Mé Djab-a éséyé bloublou zanj-ya ké moun-yan pou fè yé krè ki Bondjé pa gen drwa koumandé. Sa té ké pran tan pou montré ki Jéova gen drwa koumandé é ki a li ki sa miyò chèf i pouvé gen. Jéova montré so sajès lò i pèrmèt moun dirijé pannan roun bon moman pou yé pouvé wè ki yé pa pouvé dirijé yé kò tousèl, é ki san yé Kréyatèr yé pa ké jen rivé (Jér. 10:23). Paské Jéova pran pasyans, pyès moun pa ké douté ankò ki i gen drwa koumandé ni latè-a ni syèl-a. Tout moun ké savé ki fason Jéova ka dirijé-a, a li ki miyò, é ki a so rwayonm rounso ki pouvé mennen lapè-a ké sékirité asou latè-a.

7. Kimoun ki tounen yé do bay Jéova é kisa Jéova ké fè yé ?

⁷ Roun ran annan so pitit tounen yé do bay li. Jéova kréyé so pitit annan syèl-a ké asou latè-a, parfè. Mé roun zanj, Satan (ki lé di « opozan ») tounen so do bay Jéova. Épi i monté Adan ké Èv, ki té parfè, kont Jéova osi. Ròt zanj ké ròt moun asou latè-a maché dèyè yé (Jude 6). Pita, menm moun annan nasyon Israyèl-a, ki té sa pèp Bondjé té chwazi, réfizé kouté li é alé adoré fo bondjé (Is. 63:8, 10). A té roun trayizon pou Jéova, mé magré sa, i sipòrté sa sitiasyon-an é i ké kontinyé tchenbé jistan jou-a ké vini pou i fini ké tout sa ki tounen yé do bay li. A sa ki ké soulajé tout sa ki fidèl é ki, kou li, ka kontinyé sipòrté sa monn méchan-an !

8-9. Kisa lèlmi Jéova ka di asou li, é kouman nou pouvé montré ki a yenki manti ?

⁸ Djab-a ka kontinyé manti asou li ké so sèrvitèr-ya. Satan di ki Jòb té ka adoré Bondjé sèlman pou profité di sa i té ka bay li. I akizé osi tout sèrvitèr Bondjé ki fidèl (Job 1:8-11 ; 2:3-5). Djab-a ka kontinyé akizé nou jik jòdla (Rév. 12:10). Nou tout pouvé montré ki Satan ka manti lò nou ka kontinyé tchenbé anba éprèv nou ka jwenn é lò nou ka rété fidèl douvan Jéova paské nou kontan li. Jéova béni Jòb é i ké béni nou osi si nou ka kontinyé tchenbé (Jacq. 5:11).

⁹ Anplis di sa, Satan ka sèrvi fo rélijyon-yan pou di ki Bondjé mové é ki a so fot si nou ka soufri. Parèkzanp, lò roun timoun ka mouri, sèrten ka di ki a  Bondjé ki pran l’ paské i té bézwen rounòt zanj annan syèl-a. Yé ka dérèspèkté Jéova toubonnman ! Nou savé ki i pa té ké janmen fè roun bagaj konsa. Lò nou gen roun maladi grav ouben lò nou ka pédi roun moun nou kontan, nou pa janmen ka di a fot Bondjé. Nou savé ki roun jou i ké géri sa-ya ki malad é i ké résisité moun mouri-ya. É nou ka di pou tout moun ki lé kouté nou ki Jéova sa roun Bondjé plen ké lanmou. Konsa, Jéova pouvé réponn sa-la ki ka provoké l’ (Prov. 27:11).

10. Kisa Psaume 22:23, 24 ka anprann nou asou Jéova ?

¹⁰ I ka wè kouman so sèrvitèr i kontan bokou ka soufri. Jéova sa roun Bondjé ki vréman tris lò i ka wè nou soufri pitèt akoz di pèrsékisyon-an, maladi-a ouben akoz di fot nou ka fè (li Psaume 22:23, 24). Sa ka fè li mal lò i ka wè nou ka soufri ; i lé nou arété soufri é a sa i ké fè (gadé Exode 3:7, 8 ; Isaïe 63:9). Roun jou « i ké swiyé tout dlo di [nou] wéy, i pa ké gen lanmò ankò ; i pa ké gen ni dèy, ni rélé, ni doulèr ankò » (Rév. 21:4).

11. Poukisa Jéova présé rouwè so sèrvitèr fidèl ki mouri ?

¹¹ Jéova pa pouvé wè so zanmi ki mouri. Kisa Jéova ka rousanti lò i ka sonjé so sèrvitèr fidèl ki mouri ? I présé rouwè yé ! (Job 14:15). Ès to pouvé imajiné kouman Jéova anvi rouwè so zanmi Abraam ? (Jacq. 2:23). Ouben Moyiz i té ka palé « fas a fas » ké li ? (Ex. 33:11). É a pa ti présé i divèt présé tandé David ké ròt moun-yan ki ékri Psaumes-yan, chanté yé bèl louwanj pou li ! (Ps. 104:33). Yé té sa so zanmi, é i pa bliyé yé, menm si yé mouri (Is. 49:15). I ka sonjé tout bagaj asou yé. Labib-a ka di ki « pou li yé tout  vivan » (Luc 20:38, nòt). Roun jou, i ké résisité yé. I ké pouvé tandé ankò yé lapriyè ki sensèr é i ké kontan tousa yé ké fè pou adoré l’. Si roun moun to kontan mouri, sa lidé-a pouvé konsolé to.

12. Kisa ki ka fè Jéova plis lapenn jòdla ?

¹² Moun ki mové ka fè moun méchansté. Lò rébélyon-an koumansé annan jarden Édèn-an, Jéova té savé ki sitiasyon-an té ké vin pi mové anvan i viré byen. Jéova rayi méchansté-a, bagaj ki pa jis ké lavyolans i gen annan monn-an jòdla. I toujou pran swen di sa-ya ki pi frajil, é sa-ya ki pa pouvé défann yé kò, kou parèkzanp sa-ya ki pédi yé papa ké yé manman ouben madanm yé mouché mouri (Zach. 7:9, 10). Jéova tris toubonnman lò i ka wè moun ka fè so sèrvitèr fidèl méchansté ouben lò yé ka mété yé lajòl. A pou nou sir di sa : i kontan nou tout, èspésyalman lò i ka wè nou ka kontinyé tchenbé, kou li.

13. Ki bagaj moun ka fè ka fè Bondjé lapenn, é kisa i ké fè titalò ?

¹³ Pi sa ka alé, pi moun-yan ka fè bagaj ki malpròp. Bondjé fè nou pou nou imité l’ mé Satan kontan fè moun fè bagaj ki mové. Lò « Jéova wè ki méchansté moun-yan té plen latè-a » annan lépòk Noé-a, i « rigrété i fè moun asou latè-a é i vin gen lapenn » (Gen. 6:5, 6, nòt, 11). Ès bagaj-ya vin pi bon jòdla ? Awa ! A pa ti kontan Djab-a divèt kontan lò i ka wè tout kalité bagaj sèksyèl ki pa k’alé ké sa Labib-a ka di ki ka fèt, ki a mouché ké madanm ouben ki a mouché ké mouché ouben madanm ké madanm (Éph. 4:18, 19). Sa ki ka fè Satan plis plézi, a lò i ka rivé fè roun moun ki ka sèrvi Jéova fè roun péché grav. Lò pasyans Jéova ké bout, i ké montré ki i rayi imoralité sèksyèl-a.

14. Kouman moun-yan ka malmennen latè Bondjé fè-a ?

¹⁴ Moun-yan ka détrwi latè Bondjé fè-a. Non sèlman « moun ka dominé moun pou yé malò », mé anplis di sa, i pa ka pran swen di latè-a ké di zannimo-ya kou Jéova té doumandé l’ fè (Eccl. 8:9 ; Gen. 1:28). Sèrten èspésyalis ka di ki akoz di sa moun-yan ka fè, annan déztrwa lannen ankò roun milyon plant ké zannimo pouvé disparèt. Sa fasil pou nou konprann poukisa moun enkyèt pou latè-a ! Érèzman, Jéova promèt nou i ké « détrwi sa-ya ki ka détrwi latè-a » (Rév. 11:18). Apré sa, i ké fè tout latè-a divini roun paradi (Is. 35:1).

15-16. Kisa ki pouvé idé nou sipòrté kou Jéova ? Bay roun èkzanp.

¹⁵ Sonjé tout kalité problèm nou Papa ki annan syèl-a ka sipòrté dipi milyé lannen (gadé ankadré-a «  Sa Jéova ka sipòrté »). I té ké pouvé fin ké sa monn mové-a nenpòrt kitan. Mé érèzman pou nou, i gen pasyans ! Réfléchi asou sa èkzanp-a. Imajiné yé ka di roun mouché ké so madanm ki timoun yé ké gen-an ké gen gro problèm santé. Timoun-an ké soufri pannan tout so lavi é i ké mouri jenn. Mé tchò papa-a ké manman-an kontan lò bébé-a fèt menm si yé savé sa ké rèd pou yé pran swen di li. Paské yé kontan yé timoun, yé ké sipòrté nenpòrt ki kalité problèm pou bay timoun-an miyò lavi i pouvé gen.

¹⁶ Sitiasyon pitit Adan ké Èv, ka sanblé ké sitiasyon sa timoun-an. Yé pyès pa  parfè lò yé manman ka mété yé asou latè-a. Mé magré sa, Jéova kontan yé é i ka pran swen di yé (1 Jean 4:19). Mé Jéova pa kou manman ké papa-a annan èkzanp-a. I pouvé fè roun bagaj pou so timoun pa soufri ankò. I chwazi roun jou pou i fè tout yé malò disparèt (Mat. 24:36). Lanmou Jéova gen pou nou divèt fè nou sipòrté kou li menm, tout-tan i fo nou tchenbé.

17. Kouman sa ki marké asou Jézi annan Hébreux 12:2, 3 ka ankourajé nou kontinyé tchenbé ?

¹⁷ Jéova ka bay nou pi bon èkzanp-a annan zafè kontinyé tchenbé. Jézi rivé fè kou so Papa. Lò i té asou latè-a, Jézi sipòrté vyé paròl, ronté ké roun poto soufrans, tousa pou sové nou (li Hébreux 12:2, 3). Asiré pa pitèt, èkzanp Jéova ka bay annan zafè kontinyé tchenbé bay Jézi fòrs pou i tchenbé. Èkzanp Jéova pouvé bay nou fòrs osi.

18. Kouman 2 Pierre 3:9 ka idé nou konprann kisa pasyans Jéova pèrmèt ?

¹⁸ (Li 2 Pierre 3:9.) Jéova savé kitan ki miyò pou fin ké sa monn-an. Paské Jéova gen pasyans, bokou moun rivé konnèt li, é aprézan roun patché moun ka adoré l’. Yé tout byen kontan Jéova sipòrté asé lontan pou yé té pouvé vin asou latè-a, anprann kontan li é vouwé yé lavi pou li. Jou-a i ké rékonpansé nou paské nou tchenbé jistan lafen rivé, nou tout ké byen wè ki Jéova té byen gen rézon désidé pran pasyans.

19. Kisa nou divèt byen désidé fè é ki rékonpans Bondjé ké bay nou ?

¹⁹ Jéova ka anprann nou tchenbé ké tchò kontan. Magré tout lapenn ké soufrans Satan mennen, Jéova toujou sa « Bondjé ki éré-a » (1 Tim. 1:11). Nou menm osi, nou pouvé kontinyé kontan toupannan nou ka antann Jéova sanktifyé so non, montré ki a li ki gen drwa koumandé asou tout latè-a ké annan syèl-a, fin ké tout méchansté é fè tout problèm nou gen jòdla disparèt. Annou byen désidé kontinyé tchenbé é annou pa janmen bliyé ki nou Papa ki annan syèl-a ka kontinyé tchenbé li menm osi. Si nou ka fè sa, sa paròl-ya ké vré pou nou chak : « Moun-an ki ka kontinyé tchenbé lò i annan roun éprèv, so tchò kontan paské apré sa, i ké sa roun moun Bondjé kontan é i ké gen kouròn lavi-a Jéova promèt bay sa-ya ki ka kontinyé kontan l’ » (Jacq. 1:12).