1, 2. Kukwe käbämikata Isaías 65:16, 17 yebätä, ¿ye ñobätä tä ni dimike kä ngwen nüke jankunu jai?

GÄTÄ kri regional kä 2017 yete kädekani “¡Mä ñaka ja di ngwan nekä!”. Kukweta nemen ni kisete yebe ni raba ja tuin ño ye rababa gare nie gätä kri yete. Kä nikanina kobokä ta aune kä käme nete nita kä ngwen nüke jai jankunu.

² ¿Kukwe meden tare ben nikwe ja tuanina bitinkä? Ni mräkä o ja ketamuko nikwe krütani, bren tare namani nibätä, ni niena umbre, kukwe tare namani bare, ni nuainbare tare, ja mikani ni rüere o bren tare COVID-19 ye köböite nita ja tare nike gwä ngwane raba ruin nie. Kukwe jökrä ne rikadre ta ie ni tö, ¿ñan ererea? Kukwe käme ne ñaka rükaita jire ni töite aune ñaka rakaikä mada (ñäkädre Isaías 65:16, 17 yebätä). *

3. ¿Nikwe dre nuaindre gwä ngwane aune ñobätä?

³ Kä käme nete ñan tä nemen nuäre ni kräke nünankäre aune ja känenkäre nikwe ja tuai kukwe bäri tare ben raba ruin nie (Mat. 24:21). Aisete nikwe ja ngwandre dite. Ñobätä nikwe nuaindre ye Jesukwe mikani gare kukwe nebiti: “Munkwe nünanka dite jabtä angwane, mun rabadi dianintari” (Luc. 21:19). Kukwe ben nita ja tuin ye erere ben ja mräkätre mada tä ja tuin, akwa tätre kä ngwen nüke jai yebätä nita töbike ngwane, ye tä ni dimike kä ngwen nüke jai.

4. ¿Jehovata kä ngwen nüke bäri jai ye ñobätä ni raba niere?

⁴ ¿Nireta kä ngwen nüke bäri jai? Jehová. Kukwe ne ñaka era ni kräke ngwane, ani töbike kukwe nebätä. Kukwe taretare tä nemen bare käbiti tibien ñobätä ñan aune Satana tä gobrane yebätä.  Jehová raba kukwe käme ye gainte gwä ngwane, akwa kä debe näre ngübata kwe nuainkäre (Rom. 9:22). Jehovakwe kä ngwain nüke jankunu jai nememe köbö ye näire. Kukwe keta ökänbätä Jehovakwe ja töi mikanina kä ngwen nüke jai ye ani mike ñärärä.

5. ¿Ngöbö kä mikanina ño ngwarbe jai aune kukwe ye tuin ño mäi?

⁵ Niara kä mikata ngwarbe jai. Jehová tä ja kä tarere aune ni jökrä käkwe mikadre ütiäte jai ie tö (Is. 42:8). Akwa, kä 6,000 näre te, niara kä mikata käme (Sal. 74:10, 18, 23). Kena namani bare jardín Edén yete, Diablu, ye abokän ni kukwe ngwarbe niekä meden gärätä, käkwe ja mikani niara rüere. Adán aune Eva nämäne dre ribere jai nünankäre kä jutobiti ye Ngöbö ñaka nämäne bien ietre niebare Diablukwe (Gén. 3:1-5). Yete ja käne, nitre kä tibienbätä tä dre ribere metrere jai ye Jehová ñaka bien ietre nieta Jehovabätä. Jehová kä mika jatadre bäri ngwarbe jai ye nämäne Jesús mike töbike. Yebätä nitre ja tötikaka kwe käkwe kukwe ne niedre orasionte ye driebare kwe ietre: “Nun Rün kä käinbti, ma aibe kä raba mikani ütiäte ni jökräkwe” (Mat. 6:9).

6. Kukwe niebare gobran Jehovakwe rüere ye ükatekäre, ¿ñobätä Jehovata kä mike niken raire ta?

⁶ Ja mikata gobran kwe rüere. Jehová aibe raba kä kwinta aune kä tibien gobraine aune niara ye aibe gobran bäri kwin (Apoc. 4:11). Akwa Diablu tä angeletre aune nitre kä tibienbätä töi mike ne kwe Ngöbö ñaka rabadre gobrane rabadre ruin ietre yekäre. Kukwe niebare gobran Jehovakwe yebätä ye ñaka ükate raba jötrö ngwarbe. Jehová töbätä yebätä ni kä tibienbätä tuanimetre kwe ja gobraine kä kwati krubäte te, ne kwe niara ñaka ngwanta törö jai ye köböite nüna ñaka raba kwin rabadre gare metre yekäre (Jer. 10:23). Jehovata ni ngübare bätärekä ye köböire kukwe niebare gobran kwe yebätä ye ükaite batibe aune kärekäre. Jehová aibe tä gobrane kwin aune gobran kwe ye aibe käkwe ni mikai nüne jäme aune kwin ye rabai gare metre.

7. ¿Nire nire ja mikanina Jehová rüere aune Jehovakwe dre nuaindi bätätre?

⁷ Monsotre ruäre kwe käkwe ja mikani rüere. Jehovakwe angeletre aune nitre kä tibienbätä sribebare töi metre. Akwa, ángel iti kädekata Satana, ye abokän ni ja mikaka ni mada rüere, käkwe Adán aune Eva töi metre ye mikani ja mike Jehová rüere. Angeletre aune nitre kä tibienbätä mada käkwe ja mikani Jehová rüere arato (Jud. 6). Ja känenkäre, juta dianinkä kwe ja kräke Israel yete, nitre ruäre käkwe ja mikani niara rüere aune nikanintre Ngöbö ngwarbe mike täte (Is. 63:8, 10). Ye medenbätä, ja mikani Jehová rüere namani gare metre Jehovai. Akwa Jehová tä kä ngwen nüke jai aune kä ngwandi nüke kwe jai nememe nitre jökrä ja mikaka niara rüere gaite jökrä kwe ye ngwane. Kukwe ye rabai kwin nitre niara mikaka täte ye kräke, ñobätä ñan aune tä gwairebe niarabe kä ngwen nüke jai kä käme ne näire.

8, 9. ¿Kukwe meden ngwarbe niebarera Jehovabätä aune nita dre nuainne?

⁸ Diablu tä ni ngökö käre. Satanakwe ñäkäbare Job rüere ngwane, ni kä tibienbätä tä Ngöbö mike täte jondron täri mikani gare kwe (Job 1:8-11; 2:3-5). Diablu täbe kukwe ngwarbe ye niere nükebe kä nengwane (Apoc. 12:10). Kukwe tare ben nita ja tuin yebätä nikwe kä ngwandre nüke jai aune Jehová tare nikwe yebätä nikwe ja ngwandre metre Jehovai, yebiti Satana tä ni ngökö ye nikwe bämikai. Aune Jehovakwe nuainbare Job kräke erere, nita kä ngwen nüke jai yebätä Jehovakwe kukwe kwin mikai nemen bare ni kräke (Sant. 5:11).

⁹ Jehová ye brukwä käme aune kukwe tä nemen bare käbiti tibien ye Jehová köböite, ye Satana tä nitre ji ngwanka iglesiate töi mike  niere. Aune monso chi tä krüte ngwane, Ngöböta niken ngwena kä kwinbiti ñobätä ñan aune tä ángel chi mada ribere jai ye nitre ruäre tä niere. ¡Rä kukwe ngwarbe nieta Jehovabätä! Akwa nie kukwe metre gare. Aisete, nita näkäin bren jume o ni mräkä tä krüte ngwane, ni ñaka tä ngite kite Ngöböbiti, ñakare aune kukwe ben nita ja tuin ye Ngöbökwe ükaite yei nita tö ngwen. Jehová tä ni tarere ye nikwe niedre nire ben nita blite ye ie. Aune kukwe yebiti Jehová raba ñäke ja dokwäre nireta ñäke rüere ye ie (Prov. 27:11).

10. ¿Salmo 22:23, 24 tä dre driere nie Jehovabätä?

¹⁰ Nitre niara mikaka täte tare kwe tä ja tare nike. Jehová ye ni mikaka tuin bobre jai. Yebätä, ja mikata ni rüere, bren o ni töi ngite yebätä nita ja tare nike ye tä nemen tare ie (ñäkädre Salmo 22:23, 24 yebätä). * Ja ruin ño nie ye nüke gare ie. Niara tö kukwe jökrä ye ngwanbätä krüte aune nuaindi kwe (Éxodo 3:7, 8; Isaías 63:9 mikadre ñärärä). Kukwe käbämikata kwe Apocalipsis 21:4 ye mikai nemen bare kwe: “Ngöbökwe niaratre okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä”.

11. Nitre ja ngwanka metre Jehovai krütanina yebätä Jehovata töbike ngwane, ¿jata nemen ruin ño ie?

¹¹ Ja ketamukotre kwe tä krüte. Nitre brare aune merire ja ngwanka metre Jehovai tä krüte, ¿yebätä ja ruin ño Jehovai? Niara tö nitre ye tuabätä (Job 14:15). Ja ketamuko kwe Abrahán o Moisés ben nämäne blite ngwärere ye ulieta kwe, ¿ye ni raba bämike ja okwäte? (Sant. 2:23; Éx. 33:11). ¡David aune nitre salmo mada tikaka ye nämäne kantare bä nuäre kukwe nuare ie, ye  niara töita kukwe nuabätä krubäte ye ni raba bämike ja okwäte! (Sal. 104:33). Ja ketamukotre kwe ye krütanina akwa niara ñaka käi kwitekä jabiti (Is. 49:15). Nitre ye ño ye törö kwin Jehovai aune nitre ye tä nire niara kräke ye kwrere (Luc. 20:38). Niarakwe ja nire biainta ie, nitre ye käkwe oradi ye kai ngäbiti kwe aune nitre yekwe niara mikai täte ye käi rabai jutobätä. Kukwe ne tä nire kän mräkä krütani ye töi mike jäme, ¿ñan ererea?

12. ¿Kä käme ne näire metrere kukwe meden tä Jehová mike töbike krubäte?

¹² Nitre käme tä nitre mada ngwen ja tare nike. Ja mikani Jehová rüere jardín Edén yete ye ükadrete ye känenkri kukwe ye rabai bäri käme nämäne gare Jehovai. Kukwe käme nuainta, kukwe ñaka kwin nuainta aune ja nuainta tare kä nengwane ye käme Jehová kräke. Nitre di ñakare aune ñaka raba ja ngie mike yebätä Jehová töita metrere, ñodre, nitre uli aune nitre kän muko krütani (Zac. 7:9, 10). Nitre ja ngwanka metre niarai ngwanta ja tare nike aune kitata ngite ye tä nemen bäri tare ie. Yebätä nire nire tä kä ngwen nüke jai gwaire Jehovabe, ye ie kukwe ne rabadre gare metre: Jehová tä mun jökrä tarere.

13. ¿Nitre kä nebätä tä kukwe meden käme nuainne Jehová okwäbiti aune dre nuaindi kwe bätätre?

¹³ Nitre kä nebätä tä nemen kämekäme jabe. Jehovakwe ni sribebare ja kwrere, akwa Satana tä ni töi gainte kukwe kämekäme nuainkäre. Noé näire “nitre namani kukwe käme nuainne krubäte kä tibienbätä namani tuin Jehová ie”. “Aune ni kä tibienbätä sribebare Jehovakwe ye namani tare ie bätä brukwä namani ulire” (Gén. 6:5, 6, 11). Ye bitikäre, ¿nünanta bäri kwin kä nengwane? Ñakare, ye tuin metre nie. Nitre tä nemen kämekäme jabe aune nitre ja erebe tä nemen jabe ye tuin kwin krubäte Satana ie (Efes. 4:18, 19). Aune nitre Jehová mikaka täte tä ja mike ngite ye tä kä mike bäri nuärebätä. Jehová brukwä gedai ngwane, nitre tä nemen kämekäme jabe ye yaita kwe bämikai metre kwe.

14. ¿Nitre kä nebätä tä dre nuainne kä tibien aune jondron nire sribebare yebätä?

¹⁴ Kä tibien sribebare kwe juanta ngwarbe. Ni kä nebätä tä ni mada gobraine mikakäre ja tare nike, akwa ye ñan aibe nuainta kwetre, ñakare aune kä tibien aune jondron nire ye ñaka ngübata kwetre Jehová tö namani ño ye erere (Ecl. 8:9; Gén. 1:28). Jondron nire jene jene keta kabre ye nitre kä tibienbätä gaikä ja känenkäre ye nitre científico ruäre tä mike gare. Ñobätä kukwe ye tä nitre mike töbike krubäte ye nüke gare nie. Nire nire käta kä tibien ne juen ngwarbe abokän Jehovakwe juandi ngwarbe aune kä tibien kwitai bä nuäre kwe käbämikata kwe yebätä nita debe bien krubäte (Apoc. 11:18; Is. 35:1).

15, 16. ¿Dre käkwe ni töi mikadre kä ngwen nüke jai Jehovabe? Mä raba bämike kukwe keteitibiti.

¹⁵ Kukwe jökrä keta kabrebätä Jehovata kä ngwen nüke jai kä kwati krubäte te yebätä ani töbike (recuadro “ Kukwe nebätä Jehovata kä ngwen nüke jai” ye mikadre ñärärä). Nitre käme ye Jehová raba gainte tö ñongwane erere. Akwa Jehovata ni ngübare bätärekä ye köböire kukwe kwin nemen bare ni kräke. Ani töbike kukwe nebätä. Nitre rüne kwe monso iti däredi, akwa ñan täi kwin ngrabare, nünain chi kwe aune ja tare nikai krubäte kwe ye niedre ie ye bämike ja töite. Ja tuai kukwe tare ben kwetre, akwa monso chi ye ka ngäbitita kwetre kä jutobiti. Monso chi ye tare kwe yebätä tä juto biare kä ngwankäre nüke jai kukwe tare yebätä, monso chi ye ngübakäre kwin.

¹⁶ Ye erere arato, ni abokän Adán aune Eva ngäbriänkätre yebätä nita därere ngite. Akwa yebiti ta Jehová tä ni tarere aune ni ngübare (1 Juan 4:19). Jehová ye ñaka nitre rünebätä blitani ye erere, ñobätä ñan aune Jehová raba ni  dimike yebätä. Kukwe tä ni mike ja tare nike ye Jehová käkwe diainkä ye köböi kitanina kwe (Mat. 24:36). ¿Jehovata ni tarere ye ñan raba ni dimike kä ngwen nüke jai gwairebe ben kä nuäi erere te?

17. ¿Hebreos 12:2, 3 tä kukwe niere Jesubätä ye ñobätä tä ni dimike kä ngwen nüke jankunu jai?

¹⁷ Kä ngwan nüke jai yebätä Jehovata kukwe kwin bämike ni käne. Jesukwe bämikani metre ta. Nämäne kä tibienbätä ngwane ñäkäbare tare ie, mikani klabore aune metani kribätä, akwa nämäne juto biare kä ngwankäre nüke jai kukwe yebätä ni ütiäre (ñäkädre Hebreos 12:2, 3 yebätä). * Erametre, Jehovata kukwe kwin bämike ye käkwe Jesús dimikani aune kukwe ye raba ni dimike arato.

18. Jehovata ni ngübare bätärekä ye köböire kukwe kwin tä nemen bare, ¿ye 2 Pedro 3:9 tä ni dimike ño mike gare jai?

¹⁸ (Ñäkädre 2 Pedro 3:9 yebätä). Ñongwane bäri kwin nitre käme gatekäre ye gare Jehovai. Jehovata ni ngübare bätärekä ye köböire nitre kwati krubäte tä niara mike täte aune käikitekä. Jehovata kä mike niken ta nitre käme gatekäre ye köböire ni därebare, nita Jehová tarere aune ja denkä mento niara kräke yebätä nita debe bien krubäte. Nitre kwati krubäte kä ngwain nüke jai nememe mrä ye kräke Jehovakwe kukwe kwin mikai nemen bare ngwane, Jehovata ni ngübare bätärekä ye kukwe kwin nuainta kwe rabai gare metre.

19. ¿Nikwe ja töi mikadre kwatibe dre nuainne aune kukwe kwin meden rabai nikwe?

¹⁹ Jehovata kukwe kwin bämike ye tä ni dimike kä ngwen nüke jai kä jutobiti. Kukwe tare aune Satana tä kukwe bätäkä ngwarbe nuainne Jehová mikakäre ja tare nike, akwa yebiti ta Jehová ye “Ngöbö kä juto bökänkä” (1 Tim. 1:11, TNM). Jehová ja kä mikadre deme, gobran kwe mikadre kri, kukwe käme aune kukwe tare ben nita ja tuin ye ükadrete ye känenkri, ni jökrä rabadre kä ngwen nüke jai kä jutobiti. Ni Rün kä kwinbiti tä kä ngwen nüke jai yebätä nikwe töbikadre, ye raba ni dimike ja töi mike kwatibe kä ngwen nüke jai. Nikwe ye erere nuaindi ngwane, kukwe nieta Santiago 1:12 ne rabai bare ni itire itire kräke: ‘Nire nire käta ja tare nike tödekabtä Jesubti amne tä nünenkä dite jabtä, ni yebtä abko kä rabadi bäri nuäre, ye ngwane Ngöbökwe jändrän kuin biandi ie, ni gananka ie korona bianta ye kwrere’.