1-2. Nka gurhe ebinwa bya Yehova bili mu Isaya 65:16, 17 birhuhebere omurhima rhumenye rhwarhama?

“ORHARHAMAGA!” lyaliri rhwe lisimisize bwenene ly’embuganano ye eneo y’omwaka gwa 2017. Eyola programe yalirhuyerekere okuntu rhwakalembera ebibazo byerhu. Hamagera myaka ene kurhenga agola mango, rhunali rhwagenderera kulembera ebibazo rhuli rhwahurana nabyo mu linola gulu libi.

² Bibazo bihe ochizindire kulembera? Ka wafisize omuntu w’omulala gwawe changwa mwira wawe muzigirwa? Ogwerhe obulwala bukomere si? Ka bibazo bilerherwe n’obushaja, echinjira, obubandi, changwa obupinzani si? Changwa si, k’obulwala b’okuyahukira bwakuhumireko, nk’eyila Korona? Rhulingirize oku nyorha nene amango ebila byoshi nji byahwa; amango nji rhwabiyibirira birhakanachi rhengerera chiro n’akatyu!​—Osome Isaya 65:16, 17.

3. Bichi rhukwanene kujira zene, na bulagurhe?

³ Akalamo ka mu linola gulu libi kakomere, nkabaga rhwanachihurana n’ebibazo bikomere bwenene omu mango mayinjire. (Mt. 24:21) Bobola birhuhemere rhugenderere kukomeza engeso yerhu y’okulembera. Bulagurhe? Bulala Yesu aderhaga ntya: “Kugerera okulembera kwenyu, nji mwayokola akalamo kenyu.” (Lu. 21:19) Okuwaza okuntu abandi bali bagenderera kulembera ebibazo bili nk’ebyerhu, kwarhuheba emisi y’okugenderera kulembera.

4. Bulagurhe rhwakaderha ku Yehova ali mufano gwinja g’okulembera?

⁴ Inde oli mufano gwinja bwenene g’okulembera? Yehova Mungu. Ka wasomezwe n’echola chishubizo? Chakakusomeza, aliko nk’owazize kucho, wabiyunva bwinja. Linola gulu lirhambwirwe na Shetani, che chirhumire liyunjwire mw’ebibazo. Yehova agwerhe emisi y’okubimala aho han’aho, aliko ali alingiriza kujira ntyo lusiku luguma omu mango mayinjire. (Ro. 9:22) Embere  olola lusiku luhike, Mungu werhu agenderere kulembera kugera amola mango ahebereho. Rhujage rhwaganira ku bintu mwenda Yehova ali alembera.

5. Nka gurhe ezino lya Mungu lili lyadukangwa, na gurhe ochiyunvirhe eju y’echola?

⁵ Echisobe bahesaga ezino lyage. Yehova asima ezino lyage, analonzeze buli yeshi alikenge. (Isa. 42:8) Aliko hamagera myaka 6 000 ntya ey’ezino lyage lili lyadukangwa. (Zb. 74:10, 18, 23) Echola chahwanzizaga omu bustani ye Edeni amango Ibilisi (k’okuderha “Mukomezi”) ashobekaga Mungu oku ayimire Adamu na Eva chintu chilebe bakenere yi bagwarha obusime. (Mwa. 3:1-5) Kurhenga agola mango, bagenderere kubeshera Yehova oku anayima abantu ebi bakenere bwenene. Byalilumire Yesu oku murhima bwenene okubona ezino ly’Eshe lili lyagenderera kudukangwa. Che charhumaga Yesu ayigiriza abanafunzi bage bayinje basalira ntya: “Darha oli omu mbingu, ezino lyawe lichesibwe.”​—Mt. 6:9.

6. Bulagurhe Yehova alekere bisanzi binene bigere omu kuyerekana oku yekwanene arhegeke embingu n’egulu?

⁶ Okupingwa k’oburhegesi bwage bukulu. Yehova yenyine yekwanene kurhegeka embingu n’egulu, n’obulyo bwage b’okurhegeka b’obwinja bwenene kulusha obwindi-bwindi boshi. (Ufu. 4:11) Aliko Ibilisi ajirire okwage koshi agalire omu kurhebeka bamalayika n’abantu bawaze oku Mungu arhali yekwanene kurhegeka. Hali kwanene hagere bisanzi binene yi bibonekana oku Yehova yekwanene arhegeke n’oku yenali murhegesi mwinja bwenene. Bulala Mungu ali mwengehe, alekeere oburhegesi bw’abantu kasanzi kanene yi babona oku barhakagala kuchirhegeka bwinja bonyine buzira kuyunviriza Omulemi wabo. (Yer. 10:23) Bulala Mungu alindirire, nta muntu n’omuguma nji wagwarha engangane okw’arhali yekwanene kurhegeka embingu n’egulu. Na boshi nji bamenya oku Oburhegesi bwa Mungu bobuli bwinja kulusha obwindi-bwindi boshi, n’oku Obwami bwage bonyine bunji bwalerha omurhula n’obubegere oku gulu.

7. Bande banajira obugamba ku Yehova, na bichi nj’abakolera?

⁷ Obugamba bwa baguma omu bana bage. Yehova alemaga abana bage, bamalayika n’abantu eyi bali bashinganyanya, buzira nshembo yoshi-yoshi. Aliko malayika muguma aba chigamba embere za Yehova, anashumika abantu bashinganyanya, k’okuderha Adamu na Eva nabo babe bigamba embere za Yehova. Abandi bamalayika n’abantu babakulikira m’obola bugamba. (Yud. 6) Buzinda, baguma omu shanja lye Izraeli, olubaga Mungu achishogaga, bamujahika banarhondera kuharamya bamungu b’obubeshi. (Isa. 63:8, 10) Yehova aliyunvire agayire bwenene. Aliko agenderere kulembera, anagenderera kulembera kuhika olusiku nj’akula ebigamba byoshi. Okola nji kwalerhera migisho minene balala begenderere kuba bimana. Bobola Yehova na balala bagenderere kuba bimana nji bagwarha omwishingo bulala barhakachigenderera kulembera ebintu bibi bili mu linola gulu!

8-9. Bubeshi buhe banaderhera Yehova, na bichi rhwakabukolako?

⁸ Obubeshi bwa Ibilisi. Shetani alishobekere Yubu, mukozi mwimana wa Yehova, omu kuderha oku abakozi bimana ba Yehova boshi banamuharamya eju y’enyungu zabo bonyine. (Yob. 1:8-11; 2:3-5) Ibilisi agenderere kushobeka abantu kuhika zene. (Ufu. 12:10) Kugerera obuzigire rhugwerhe ku Yehova, rhwakayerekana oku Shetani ali mubeshi amango rhuli rhwagenderera kulembera ebibazo byerhu. Yehova aligishire Yubu, nerhu nji rhwagishwa akaba rhugenderere kulembera.​—Yak. 5:11.

⁹ Shetani ali akolesa abakulu b’amadini  m’obubeshi okuderha oku Yehova arhajira bonjo, n’oku yerhumire abantu baba bali balibuka. Chiro na baguma banaderha oku amango abana bamafa, eyi Mungu amabaheka bulala akenere bamalayika banene omu mbingu. Okola kuli kudukanga Mungu bwenene! Aliko rhumenyere oku Yehova ali Darha w’obuzigire. Amango rhugwerhe obulwala bukomere bwenene, changwa amango omuzigirwa werhu amafa, rhurhakadukanga Mungu. Ahubwe rhugwerhe obunihire oku lusiku luguma nj’afumya abalwala n’okufula abafire. Rhwakabwira ngasi yeshi oku Yehova ali Mungu w’obuzigire. Ahola Yehova anahana echishubizo chinja k’olala onamuhalalira.​—Mez. 27:11.

10. Bichi Zaburi 22:23, 24 eyerekene oku bilolere Yehova?

¹⁰ Amalibuko oku bakozi bage bazigirwa. Yehova ali Mungu w’akababaro. Arhayunva asimire okubona rhwalakiswa n’ebibazo rhuli rhwalembera; nk’okupingwa, obulwala, changwa okurhashinganana kwerhu. (Osome Zaburi 22:23, 24.) Yehova ali ayunva amalumwa merhu; alonzeze kumamala, nj’anajira ntyo. (Ohuzanye na Kutoka 3:7, 8; Isaya 63:9.) Olusiku nji lwahika amango “nj’ashangula emiziga yoshi omu masu [merhu], n’olufu lurhakachibaho, changwa emishibo, endulu, changwa amalumwa birhachibaho chiro n’akatyu.”​—Ufu. 21:4.

11. Gurhe Yehova ali achiyunva oku bilolere abakozi bage bimana bafire?

¹¹ Okurhaba haguma na bera bage bafire. Nka gurhe Yehova anachiyunva oku bilolere abalume n’abakazi bimana bafire? Akumbwire (adulire) bwenene okushuba kubabona! (Yob. 14:15) Wakaba nka wawaza okuntu Yehova ali akumbula mwira wage Abrahamu si? (Yak. 2:23) Changwa Musa, eyibagendaga baganira naye “masu oku masu”? (Kut. 33:11) Akanasima kuyunva Daudi n’abandi bandisi be Zaburi, bali bayimpa enyimpo zinja z’obuharamye!  (Zb. 104:33) Chiro akaba abola bera ba Mungu bafire, Yehova arhakafa abayibagire. (Isa. 49:15) Ayibukire buli chintu oku bilolere oborhere bwabo. Ebiblia ederhere oku, “yewe ababwene nka boshi bali baguma-guma.” (Lu. 20:38, amahugulo m’eshishi.) Lusiku luguma nj’abafula, nj’anashuba hwanza kuyunviriza amasala marhengere oku murhima gwabo, n’okuyemera obuharamye bwabo. Akaba wafisize omuzigirwa wawe, amala mawazo makakurhuliriza n’okukukomeza.

12. Bichi bili byababaza Yehova bwenene mu zinola siku zibi z’obuzinda?

¹² Abantu babi bali bababaza abandi. Amango obugamba bwarhonderaga omu Edeni, Yehova alimenyere okw’ebintu byakabihire bwenene embere bishube kukwira. Yehova agayire obubi, omulyagane, n’obubandi buli mu linola gulu zene. Ali alaga bwenene oku bazamba barhakanagala kuchilanga, nk’efubi n’abakana. (Zek. 7:9, 10) Yehova ali agaya ahanene amango yabona abakozi bage bimana bali balibuzwa n’okushwekwa. Rhwakachizera ku Yehova azigire balala boshi bali balembera haguma naye.

13. Bijiro bihe by’eshonyi Mungu ali abona abantu bali bakola, na bichi nj’ajira oku bilolere ebyola bijiro?

¹³ Obubaraga bw’abantu bwavire bwakabya. Abantu balemwaga oku shusho lya Mungu, aliko Shetani yewe alonzeze abantu bakole ebintu bibi bikozeze eshonyi bwenene. Amango Mungu “abonaga obubi b’omuntu bulugire bwenene” omu siku za Nowa, “Yehova agaya okubona alemaga abantu oku gulu, n’ebyola byamuluma oku murhima.” (Mwa. 6:5, 6, 11) K’egulu lyajire lyakwira kurhenga amola mango si? Haba n’akatyu! Ibilisi akwanene kuba ey’asimire bwenene okubona gurhe obubaraga bwa buli lubero bwavire bwakabya, kuheba han’obubaraga bubi bw’abalume n’abakazi n’abalume oku balume n’abakazi oku bakazi! (Efe. 4:18, 19) Ahanene Shetani asima bwenene amango amagala kushumika abakozi ba Yehova bajire ebyaha bikomere. Amango okulindira kwa Yehova nji kwagera oku buzinda, nj’ayerekana oku agayire ebijiro byoshi by’obubaraga omu kulimbula boshi babikola balahire kuhindamuka.

14. Gurhe abantu bali bakolera egulu n’enyama Mungu alemere?

¹⁴ Abantu bali balimbula ebi Mungu alemere. Omuntu arhali ‘arhambula owabo muntu omu kumubabaza’ k’onyine, aliko arhanali ashishikala egulu n’enyama Yehova amubwiraga ashishikale. (Muh. 8:9; Mwa. 1:28) Basomi baguma bakengusize oku ebijiro by’abantu byakarhuma mbero * zirhalukire muliyoni muguma z’enyama zahera omu myaka yayinjire! Che chirhumire abantu bali bayunva balumirwe okubona ebilemwa by’egulu bili byaharabiswa. Ech’okusimisa, kuli kubona oku Yehova alaganyize oku “ashereza balala bali bashereza egulu” n’okuhindamula egulu lyoshi libe Paradizo.​—Ufu. 11:18; Isa. 35:1.

15-16. Bichi byakarhushunika rhulembere kuguma na Yehova? Lerha omufano.

¹⁵ Waza oku bibazo byoshi bigayisize Darha w’embingu amalembera omu bihumbi by’emyaka yamagera. (Olole echisanduku “ Ebi Yehova Ali Alembera.”) Yehova akalerhere obuzinda bw’elila gulu libi omu kasanzi koshi-koshi alonzeze. Aliko okulembera kwage kwarhulerhere emigisho! Waza k’ogula mufano. Rhuderhe oku munganga amabwira mulume muguma na mukage ok’omwana wabo oli omu nda agwerhe obulwala bukomere, oku nj’anagwarha akalamo kali mu bibazo  binene bwenene, n’oku nj’anafa juba. Aliko abazere banayunva basimire amango omwana wabo amaburhwa, chiro akaba oku byabakomerera kumushishikala. Obuzigire bagwerhe oku mwana wabo bwanabashunika balembere ebibazo byoshi babuganana nabyo yi barhabala omwana wabo agenderere kulama nk’oku byakagalikana.

¹⁶ Konakuguma, oluburho loshi lwa Adamu na Eva lurhaba lushinganene amango lwamaburhwa. Aliko Yehova anabazigira n’okubashishikala. (1 Yo. 4:19) Na Yehova yewe arhali kuguma n’abazere b’abantu b’omu mufano gwerhu, bulala akamala amalibuko moshi m’abana bage. Ahebere h’olusiku nj’amala amalwala n’amalibuko moshi m’abantu. (Mt. 24:36) Obuzigire bwakarhushunika rhulembere haguma na Yehova nk’oku byakanagalika.

17. Nka gurhe ebiderherwe ku Yesu omu Waebrania 12:2, 3, byakarhuheba omurhima rhugenderere kulembera?

¹⁷ Yehova yeli mufano gushinganyanya g’okulembera. Yesu aliyiganyize omufano gw’Eshe g’okulembera. Amango aliri oku gulu, alilembere ebidusi, eshonyi, n’omurhi gw’amalibuko eju yerhu. (Osome Waebrania 12:2, 3.) Buzira ngangane, omufano gwa Yehova g’okulembera gwalihere Yesu naye emisi y’okulembera. Gwakarhuheba emisi nerhu.

18. Nka gurhe olwandiko lwa 2 Petro 3:9 lurhurhabere rhuyunve bichi okulembera kwa Yehova kuli kwayeneza?

¹⁸ Osome 2 Petro 3:9. Yehova amenyere akasanzi kakwanene k’okulimbula elila gulu libi. Bulala analindira, kwarhumire bantu banene bamumenya, na zene echigusho ch’amamiliyoni m’abantu chikala chili chamuharamya. Boshi basimire bulala Yehova alingire baburhwe, bayige kumuzigira, banahaane akalamo kabo emwage. Amango nji haba amamiliyoni m’abantu balembere kuhika oku buzinda, echola nji chayerekana oku Yehova alirholere omuhigo gwinja g’okulembera!

19. Bichi rhukwanene rhuhigirire kujira, na migisho ehe nji rhwagwarha?

¹⁹ Omufano gwa Yehova gurhuyigirize okuntu rhwakalembera n’omwishingo. Chiro akaba ku Shetani alerhere amabi n’amalibuko manene, Yehova agenderere kuba “Mungu w’omwishingo.” (1 Ti. 1:11) Konakuguma nerhu rhwakagenderera kugwarha omwishingo oku rhuli rhwagenderera kulinga gurhe Yehova achesa ezino lyage, ayerekane oku yenyine yekwanene arhegeke, amale obubi boshi, amale n’ebibazo rhuli rhwahurana zene. Rhuhigirirage okulembera, rhunagwarhe echirhulirizo omu kumenya oku Darha w’embingu naye ali alembera. Rhukajira ntyo, buli muguma werhu nj’achibonera okw’ebila binwa bili by’okuli: “Osimire ali muntu ogenderera kulembera ebigeregezo, bulala enyuma y’echola anaba muntu oyemererwe n’okuhabwa echishema (engofera) ch’obuguma-guma echi Yehova alaganyize balala bagenderere kumuzigira.”​—Yak. 1:12.