1-2. Iehova ena hereva Isaia 65:16, 17 ese edena dala ai ita ia durua ita haheauka totona?

“ITA HESIKU LASI!” be lagani 2017 ena rijinol hebouhebou ena sinado. Unai program ese hekwakwanai ita haheaukalaia dalana ia hahedinaraia. Bona lagani 4 idia hanaia vadaeni, to ita be inai tanobada dikana dekenai hekwakwanai ita do haheaukalaia noho.

² Hari dahaka hekwakwanai oi davaria noho? Reana emu ruma bese tauna ta eiava tura namona ta ia mase, a? Eiava gorere badana ta oi davaria, a? Eiava oi buruka oi lao dainai mauri ia auka, a? Eiava emu gabu ai tuari o disasta ta ia vara, o haida ese oi idia dagedage henia, a? Eiava gorere badana ta, hegeregere COVID-19 gorerena dainai oi lalohisihisi, a? Unai hekwakwanai ibounai do idia ore negana ita naria noho, bona unai gaudia do idia vara lou lasi bona do ita laloaboio momokani!​—Isaia 65:16, 17 duahia.

3. Hari dahaka ita karaia be namo, bona dahaka dainai?

³ Hari nega be ia auka momokani, bona vaira dinadia ai hekwakwanai badadia do ita davaria. (Mat. 24:21) Unai dainai, gau badana be iseda haheauka karana ita hagoadaia noho. Dahaka dainai? Badina Iesu ia gwau: “Emui haheauka karana dainai emui mauri do umui dogoatao.” (Luka 21:19) Ma haida be ita davaria hekwakwanai idia davaria danu, to edia haheauka karana ese ita ia durua ita haheauka noho totona.

4. Dahaka dainai ita gwau diba haheauka karana dekenai Iehova be haheitalai namona?

⁴ Daika be haheauka karana dekenai haheitalai namona ia hahedinaraia? Iehova Dirava. Unai haere dekenai oi hoa, ani? To bema oi lalohadailaia namonamo neganai, do oi laloparara. Inai tanobada be Diabolo ese ia biagua dainai hekwakwanai be momo herea. Ena be Iehova be mai ena siahu hekwakwanai idauidau ia haorea diba, to ia naria noho vaira  negana ai unai ia karaia totona. (Roma 9:22) Hari, iseda Dirava be ia haheauka noho ela bona ia abia hidi negana ai unai do ia karaia. Mani Iehova ese ia haheaukalaia gaudia 9 ita herevalaia.

5. Dirava ena ladana be edena bamona idia hadikaia, bona unai kara be edena bamona oi laloa?

⁵ Iehova ena ladana idia hadikaia. Iehova be ena ladana ia ura henia bada, bona ia ura taunimanima ese unai ladana idia matauraia. (Isa. 42:8) To idia hanaia lagani 6,000 lalonai, Iena ladana namona idia matauraia lasi. (Sal. 74:10, 18, 23) Unai be Eden umana lalonai ia matamaia, unai neganai Diabolo (anina be “Ladana Hadikaia Tauna”) ia gwau Dirava ia ura lasi Adamu bona Heva do idia moale, unai dainai idia amo gau namona ta ia kokia. (Gen. 3:1-5) Unai nega amo, Iehova ena ladana idia hadikaia bona idia gwau Ia ese taunimanima edia ura gaudia ia henia lasi. Iesu be unai dainai ia lalohisihisi bada bona iena hahediba taudia ia hadibaia unai do idia gurigurilaia: “Aiemai Tamana guba dekenai oi noho, namona be ibounai ese emu ladana idia hahelagaia.”​—Mat. 6:9.

6. Dahaka dainai Iehova be nega daudau ia naria noho ia lohia be mai ena maoro ia hamomokania totona?

⁶ Dirava bona ena lohia siahuna idia dadaraia. Iehova be mai ena maoro guba bona tanobada ia lohiaia totona, bona Iena lohia dalana be namo herea. (Apok. 4:11) To Diabolo ese aneru bona taunimanima ia koia, unai amo do idia laloa Dirava be maoro lasi ia lohia totona. Nega korikori ai taunimanima do idia diba Iehova be mai ena maoro ia lohia totona bona iena lohia dalana be namo herea. Oibe, Dirava ese nega bada ia henia taunimanima idia lohia totona, unai amo do idia itaia idia be hegeregere lasi sibona idia lohiaia, badina Havaraia Tauna idia kamonai henia lasi. (Ier. 10:23) Dirava ena haheauka karana dainai, Iena lohia ena maoro dekenai ta do ia daradara lou lasi. Taunimanima ibounai do idia diba Iehova ena lohia dalana be namo herea bona Iena Basileia sibona ese tanobada dekenai maino bona noho namo do ia mailaia.

7. Daidia ese Iehova idia gwau-edeede henia, bona idia dekenai dahaka do ia karaia?

⁷ Iena natudia haida idia gwau-edeede. Iehova ese aneru bona taunimanima ia havaraia neganai, idia be goevadae. To gwau-edeede tauna Satani ese goevadae taudia, Adamu bona Heva, ia koia Iehova idia gwau-edeede henia totona. Aneru bona taunimanima haida danu idia gwau-edeede. (Iuda 6) Danu gabeai, Israela taudia haida be Dirava idia dadaraia bona dirava koikoidia idia tomadiho henia. (Isa. 63:8, 10) Iehova ia lalohisihisi bada. To, ia haheauka noho ela bona nega maorona ai gwau-edeede taudia ibounai do ia haorea. Bena Iehova bona Ia idia badinaia noho taudia be do idia moale bada, badina tanobada ena dika idauidau do idia haheaukalaia lou lasi!

8-9. Iehova dekenai dahaka koikoi herevadia idia gwauraia, bona dahaka do ita karaia?

⁸ Diabolo ena koikoi karadia. Satani ia gwau Iehova ena abidadama hesiai taudia, Iobu danu, be Dirava amo gau namodia idia abia totona Ia idia tomadiho henia. (Iobu 1:8-11; 2:3-5) Diabolo be unai bamona samania hereva ia gwauraia noho ema bona hari. (Apok. 12:10) Bema Iehova ita lalokau henia dainai hekwakwanai idauidau ita haheaukalaia bona Ia ita badinaia noho, do ita hamomokania Satani ena hereva ibounai be koikoi. Iehova ese Iobu ia hanamoa hegeregerena, bema ita haheauka, ita do ia hanamoa danu.​—Iam. 5:11.

⁹ Satani ese tomadiho koikoi edia gunalaia taudia ia gaukaralaia unai amo idia  gwau Iehova be dagedage Diravana bona taunimanima ia hahisia. Danu idia gwau natudia idia mase neganai, Dirava ese idia ia abia daekau bona aneru ta ai ia halaodia. Unai be Dirava matauraia lasi herevadia! To ita diba Iehova be lalokau Tamana. Gorere badana ta ita davaria eiava iseda lalokau tauna ta ia mase neganai, ita gwau lasi unai be iseda Dirava ena kerere. To, ita abia dae nega ta Ia ese unai hekwakwanai ibounai do ia hamaoromaoroa. Ita ese kamonai taudia ibounai ita hamaoroa Iehova be lalokau Diravana. Unai amo Iena inai tauna ia haere henia diba.​—Aon. 27:11.

10. Salamo 22:23, 24 ese Iehova be edena bamona ia herevalaia?

¹⁰ Iena hesiai taudia be hisihisi idia davaria noho. Iehova be hebogahisi bada Diravana. Dagedage, gorere, eiava goevadae lasi maurina dainai ita hisihisi neganai, Iehova be ita dekenai ia hebogahisi bada. (Salamo 22:23, 24 duahia.) Iehova be iseda hisihisi ia mamia; Ia ura ia hanamoa, bona unai do ia karaia. (Esodo 3:7, 8; Isaia 63:9 hahegeregerea.) Nega ta do ia mai, Dirava ese “mata ranu ibounai be [iseda] matana amo do ia dahua ore, bona mase, lalohisihisi, taitai, bona hisihisi be do idia ore.”​—Apok. 21:4.

11. Iehova ese idia mase vadaeni abidadama tatau bona hahine be edena bamona ia laloa?

¹¹ Iena tura namodia momo idia mase. Iehova ese idia mase vadaeni abidadama tatau bona hahine be edena bamona ia laloa? Ia ura dikadika idia ia itaia lou! (Iobu 14:15) Mani oi laloa, Ia ura dikadika ena turana namona Aberahamo ia itaia lou! (Iam. 2:23) Eiava Ia ura dikadika guna “ia hereva henia” tauna Mose ia itaia lou! (Eso. 33:11) Bona ia ura dikadika Davida bona salamo torea taudia haida edia ane namodia ia kamonai lou! (Sal. 104:33) Ena be Dirava ena tura namodia idia mase vadaeni, to Iehova ese idia ia  laloaboio lasi. (Isa. 49:15) Edia kara ibounai ia laloatao. Baibel ia gwau, “iena laloa dekenai idia ibounai be idia mauri noho.” (Luka 20:38, ftn.) Nega ta, Ia ese idia do ia hamauria lou, bona edia guriguri namodia do ia kamonai bona edia tomadiho karadia do ia abia dae. Bema emu lalokau tauna ta ia mase vadaeni, unai hereva namodia ese oi idia hagoadaia diba.

12. Inai dina gabedia lalonai, dahaka dainai Iehova ia lalohisihisi?

¹² Kara dika taudia ese ma haida idia hahisia. Eden dekenai gwau-edeede karana ia vara neganai, Iehova ia diba unai kara do ia bada ia lao. Iehova ese idia vara noho kara dikadia, haida hahisia karadia, bona dagedage karadia ia inai henia. Ia ese nega ibounai manoka taudia bona sibona idia gimaia diba lasi taudia, hegeregere tama sina lasi natudia bona vabu ia laloa bada. (Sek. 7:9, 10) Iehova ia itaia ena abidadama hesiai taudia idia dagedage henia bona dibura ruma ai idia atodia neganai, ia lalohisihisi bada. Namona be oi diba, Ia ida ita haheauka noho dainai, ita ia lalokau henia.

13. Taunimanima be dahaka kara dikadia idia karaia noho, bona Dirava be dahaka do ia karaia?

¹³ Taunimanima edia kara be ia dika momokani. Dirava ese taunimanima ia karaia ia idia tohotohoa totona, to Satani ia ura bada kara dikadia idia karaia. Noa ena negai, Iehova ia itaia “taunimanima edia kara dika be bada herea” neganai, “ia lalohisihisi badina tanobada ai taunimanima ia karaia, oibe, ena kudouna ia metau.” (Gen. 6:5, 6, 11) Unai nega amo ema bona hari taunimanima edia kara ia namo ia lao, a? Lasi momokani! Diabolo ia moale badina ia itaia taunimanima be kara bodaga idauidau idia karaia, hegeregere tatau bona hahine idia heudahanai, bona tatau be tatau ida eiava hahine be hahine ida idia mahuta hebou! (Efe. 4:18, 19) Iehova idia tomadiho henia taudia ese kara dika badana ta idia karaia neganai, Satani ia moale bada. Iehova ena haheauka karana ia ore neganai, kara bodagadia idia karaia taudia ibounai do ia haorea.

14. Taunimanima be tubutubu gaudia bona animal dekenai dahaka idia karaia?

¹⁴ Ia havaraia gaudia idia hadikaia. Hari inai negai, “taunimanima ese ta ta idia biagua bona idia hahisia,” unai sibona lasi, to idia ese tanobada bona animal idia hadikaia. (Had. 8:9; Gen. 1:28) Saiens taudia haida idia gwau unai kara dainai, lagani haida murinai animal bona tubutubu gaudia idauidau 1 milioni mai kahana do idia boio. Unai dainai, taunimanima haida be idia lalohekwarahi! To ita moale, badina Iehova ia gwauhamata ‘tanobada idia hadikaia taudia do ia hadikaia ore’ bona tanobada be paradaiso ai do ia halaoa.​—Apok. 11:18; Isa. 35:1.

15-16. Dahaka ese ita ia hagoadaia Iehova hegeregerena ita haheauka totona? Haheitalai gwauraia.

¹⁵ Lagani tausen momo lalonai iseda guba Tamana ese ia haheaukalaia hekwakwanai idauidau mani ita laloa. (Maua itaia: “ Iehova ese Ia Haheaukalaia Gaudia.”) Iehova ese inai tanobada dikana ia haorea haraga diba. To ena haheauka dainai hahenamo ita davaria! Mani inai haheitalai ita laloa: Doketa ese tau ta bona ena adavana idia hamaoroa, edia beibi be bogana lalonai ia do noho neganai gorere badana ta ia abia, bona ia vara murinai ena mauri do ia auka bena do ia mase. Beibi ia vara neganai tama sina idia moale bada, ena be ia naria totona idia hekwarahi bada. Bona idia lalokau henia dainai, gau ibounai idia karaia beibi idia naria namonamo totona.

¹⁶ Unai hegeregerena, Adamu bona Heva edia bese amo idia mai taudia ibounai be  idia goevadae lasi. To, Iehova ese idia ia lalokau henia bona ia lalodia bada. (1 Ioa. 4:19) Paragraf 15 ai ita herevalaia tau bona ena adavana amo Iehova be idau. Badina Ia ese dina ta ia abia hidi vadaeni, taunimanima edia hisihisi ibounai do ia haorea. (Mat. 24:36) Iehova ena lalokau dainai, namona be ita haheauka noho ela bona dokona.

17. Heberu 12:2, 3 ai Iesu ena sivarai ese edena dala ai ita ia hagoadaia ita haheauka noho totona?

¹⁷ Haheauka karana dekenai Iehova be haheitalai hereadaena. Iesu be ena Tamana ena haheauka karana ia tohotohoa. Iesu be tanobada ai ia noho neganai, ia dekenai hadikaia herevadia idia gwauraia, idia hahemaraia, bona ita totona au dekenai idia hamasea karana ia haheaukalaia. (Heberu 12:2, 3 duahia.) Oibe, Iehova ena haheauka karana ese Iesu ia hagoadaia ia haheauka totona. Bona unai ese ita ia hagoadaia danu.

18. Petero Iharuana 3:9 ai, Iehova ena haheauka karana dainai taunimanima be dahaka idia karaia diba?

¹⁸ Petero Iharuana 3:9 duahia. Iehova be inai tanobada dikana do ia haorea ena nega maorona ia diba. Iena haheauka karana dainai, taunimanima milioni momo, hutuma bada unai, be Ia idia diba bona tomadiho henia noho. Idia ibounai idia moale badina Iehova ena haheauka karana dainai idia vara, ia idia lalokau henia, bona ia dekenai edia mauri idia gwauhamatalaia. Taunimanima milioni momo idia haheauka noho ela bona dokona dainai, unai ese ia hamomokania Iehova ena haheauka karana be maoro!

19. Dahaka ita karaia be namo, bona dahaka hahenamo do ita abia?

¹⁹ Iehova ena haheitalai amo, mai moale ida ita haheauka dalana ita dibaia. Ena be Satani ese lalohisihisi bona dika bada herea ia havaraia, to Iehova be “moale Diravana.” (1 Tim. 1:11) Iehova ese ena ladana do ia hanamoa, ena lohia siahuna do ia abia isi, kara dika ibounai do ia haorea, bona iseda hekwakwanai ibounai do ia haorea negana ita naria noho lalonai, do ita moale noho. Namona be ita haheauka noho, badina iseda guba Tamana danu be ia haheauka noho. Bema unai bamona ita karaia, ita ta ta dekenai Baibel ena hereva do ia guguru, ia gwau: “Hahetoho ia haheaukalaia noho tauna be ia moale, badina Dirava ese ia lalonamo henia neganai, ia be mauri ena korona do ia abia, Iehova ese unai be ia idia lalokau henia noho taudia dekenai ia gwauhamatalaia.”​—Iam. 1:12.