XTUUTYUM ARTIKEL 27
Hal aus soo wii Yeehoowa
“Weeche ayre persewerans, tuut teyer ayre leepe hale.” (LUKAS 21:19)
LIIT 114 Seja paciente
WAS TUUN MER SIIN? *
1-2. Wii tuut ti ferxpreche fon Isaiias 65:16, 17 uns helfe wayter aus hale?
“KEP NET UF!” waar te ufmuutiche theema fon tëm rechyonaal konkrës fon 2017. Tas prokram hot uns ketsaycht wii mer ti propleeme aus hale khene. Tas waar 4 yoore tsurik. Awer meyer al sin imer noch am mit mache ti propleeme fon tiise xlechte welt.
2 Was fer propleeme pist tuu am mit mache? Is yemant fon tayn familye orer een liipe froynt kextorep? Host tuu een xlim krankheet woo khan tich tsum toot nëme? Is tayn leepe xweyer kep weeche tayn elter? Host tuu khërtslich een natuer unklik, wyolënts orer yachtung mit kemacht? Pist tuu am layte weeche ti pantemii fon coronavirus orer was eenliches? Sicher, pist tuu am waarte te taach woo tiise propleeme ale rom kang sin — te taach wën mer tii ferkese tuun un wën se nii mools mee pasiire. (Lees Isaiias 65:16, 17.) *
3. Was mise mer yets mache un warom?
3 Tas leepe in tiise welt is xweyer; awer meyer khene waarte tas ti tinge in te futuer noch xlimer wëre. (Mat. 24:21) Tan, meyer al mise unser persewerans wayter ferxtërke. Warom? Wayl Yeesus hot kesaat: “Weeche ayre persewerans, tuut teyer ayre leepe hale.” (Luk. 21:19) Wën meyer tenke aan tëm payxpiil fon anere woo am aus hale sin, tas khan unser muut fer wayter persewerans tsayche xtërker lose.
4. Warom khene mer saan tas Yeehoowa is tas peste payxpiil fon persewerans?
4 Weer is tas peste payxpiil fon persewerans? Yeehoowa. Fiilaycht hot tiise antwort tich ferwunert. Awer wën meyer een pisye triwer noo tenke, ferxteen mer tas klaych. Ti welt is unich tëm Taywel sayn kontrol un tes weeche, is se fol propleeme. Yeehoowa hot ti kraft fer tiise xlecht welt yets fernichte, awer eyer is am waarte fer tas in te richtich tsayt in te futuer mache. (Rom. 9:22) Pis tiise tsayt khomt, halt unser Kot wayter aus. Wole mer iwer 9 tinge xpreche woo Yeehoowa raus kesuucht hot aus hale.
WAS HOT KOT RAUS KESUUCHT AUS HALE?
5. Wii is Yeehoowa sayn naame oone respekt pehantelt kep, un was xpiirst tuu too triwer?
5 Yeehoowa sayn naame is oone respekt pehantelt. Yeehoowa liipt sayn naame un tee wil hon tas ale layt tëm sayn naame respektiire. (Isa. 42:8) Awer torich ti letste 6.000 yoore, is tëm sayn naame oone respekt pehantelt kep. (Psal. 74:10, 18, 23) Tas hot aan kefang im Eetem Kaate; tat, hot te Taywel kesaat tas Kot etwas kuutes fon Aatam un Ewa am ferxtekele waar, woo tëne frooheet kepe teet. (Xee. 3:1-5) Fon tiise tsayt aan, wërt Yeehoowa imer noch falx akusiirt fon was kuutes fon te mënxheet ferxtekele. Yeesus hot sich fiil ketanke kemacht wayl Yeehoowa sayn naame oone respekt pehantelt waar. Tes weeche, hot eyer sayn tisipele in kelërnt soo peete: “Unser Fater im himel, tayn naame sol kehaylicht wëre.” (Mat. 6:9)
6. Yeehoowa hot kelos fiil tsayt rom keen fer se pewayse tas eyer tas recht fer se rechiire hot. Warom?
6 Fiile xtele sich keeche Kot un sayn rechiirung. Ploos Yeehoowa hot tas recht fer iwer ti himele un ti eyert rechiire; un ti aat wii eyer rechiirt is ti pest. (Apo. 4:11) Awer te Taywel hot fersuucht ti mënxe un engele hinerkeen, tas se tenke teete tas Kot net tiise recht hot. Es teet tsayt nëme fer se pewayse tas Yeehoowa tas recht hot fer se rechiire un tas eyer te pest rechiirente is. Weeche sayn kluucheet, hot Kot kelos tas ti mënxe sich aleen rechiire teete fer een lang tsayt. Soo, teet es fer tëne kans klaar wëre tas tii khene khee kuut rechiirung hon oone te Kriatoer aan heere. (Yee. 10:23) Weeche Yeehoowa sayn ketult, tuut nimant in te futuer tswayfele tas Eyer recht fer se rechiire hot, tas sayn aat fer rechiire ti pest is, un tas ploos tëm sayn Raych khan friit un sicherheet tsu te eyert pringe.
7. Weer hot sich keeche Yeehoowa kextelt un was macht eyer mit tëne in te futuer?
7 Etliche fon Tëm sayn khiner sin repëlix kep. Yeehoowa hot sayn khiner — ti mënxe un ti engele — oone feeler kemacht. Awer tan, hot een engel, Satanaas, sich keeche Yeehoowa kextelt. Un weeche tëm, tswaay perfekte mënxe — Aatam un Ewa — hon sich aach keeche Yeehoowa kextelt. Anere engele un mënxe hon sich aach repeliirt. (Yuu. 6) Xpeeter, etliche fon Yeehoowa sayn raus kesuuchte folek, Israël, hon Tëm ap kextos un hon aan kefang falxe kote aan peete. (Isa. 63:8, 10) Yeehoowa hot sich mit recht hinerkang kexpiirt. Awer eyer hot aus kehal, un tuut wayter aus hale pis ti tsayt khomt woo eyer ti repëlixe ale fernicht. Tan, wëre Yeehoowa un al tii woo tëm troy tiine wërklich froo, wayl tan prayche se net mee aus hale ti xlechtichkheet fon tiise welt.
8-9. Was fer liie tuun se keeche Yeehoowa saan un was khene mer too triwer mache?
8 Te Taywel sayn liie. Satanaas hot Kot sayn kerecht tiiner Yoop falx akusiirt. Tee hot kesaat tas Yoop hot Yeehoowa ploos weeche ti seechen ketiint. Soo hot Satanaas keeche Kot un sayn kanse tiiner kexproch. (Yoop 1:8-11; 2:3-5) Un pis hayt, tuut te Taywel imer noch ti mënxe akusiire. (Apo. 12:10) Awer was khene mer mache fer se pewayse tas Satanaas am liie is? Meyer mise unser proope aus hale un troy tsu Yeehoowa plaype weeche unser liip tsu Tëm. Wën mer wayter aus hale, tuut Yeehoowa uns peloone soo wii eyer Yoop peloont hot. (Tya. 5:11)
9 Satanaas penutst ti fiirer fon te falxe relichyoone fer se saan tas Kot krop is un tas Eyer ti xult hot fer was ti mënxe layte. Etliche tuun soo kaar saan tas wën een khint xtërpt, hët Kot tas kehool wayl Eyer mist noch een engel im himel hon. Tas is een iwer kroos lii un tsaycht khee respekt tsu Kot! Meyer wise kans kenau tas Yeehoowa een liipliche Fater is. Tes weeche, wën mer een xlim krankheet hon orer wën een keliipt persoon xtërpt, kepe mer net ti xult fer Kot. Kraat tas keeche teel, meyer klaape tas eene taach xtelt Yeehoowa ales in te ray. Meyer khene fer al woo uns heere wole saan wii een liipliche Kot Yeehoowa is. Un soo khan Yeehoowa een antwort kepe fer tee woo Tëm pelayticht. (Xpr. 27:11)
10. Was tuut Psalm 22:23, 24 iwer Yeehoowa tsayche?
10 Wën sayn liipe tiiner layte. Yeehoowa is een mitlaytiche Kot. Eyer wërt traurich wën tee siit tas mer layte weeche krankheet, yachtung orer unser imperfektsyoone. (Lees Psalm 22:23, 24.) * Kot ferxteet ti phayn woo mer xpiire; tee wil tas tsum ën pringe un tee tuut tas mache. (Kuk aach Eeksotus 3:7, 8; Isaiias 63:9.) Te taach is ticht wën eyer “tuut yeete treene fon [unser] aue ap trokne, un es kept kheen toot mee, kheen traurichkheet, kheen krayxe un kheen phayn.” (Apo. 21:4)
11. Wii xpiirt sich Yeehoowa iwer ti troye tiiner woo xon kextorep sin?
11 Ferlangre fon Tëm sayn froynte woo kextorep sin. Wii xpiirt sich Yeehoowa iwer ti troye mëner un fraae woo xon kextorep sin? Tee hot fiil ferlangre fon tëne un tee wil se noch mool siin. (Yoop 14:15) Tsum payxpiil: khanst tuu tich foer xtele wii fiil wil Kot sayn froynt Apraham noch mool siin? (Tya. 2:23) Orer xtel tich mool foer wii fiil wil eyer mit Mooses xpreche, mit weem eyer ‘perseenlich kexproch hot’. (Eeks. 33:11) Yeehoowa wërt wool aach aarich waarte te taach wën Eyer khan Tawi un anere psalmiste heere xeene liite fer Tëm singe. (Psal. 104:33) Tiise froynte fon Kot sin al kextorep, awer Yeehoowa hot tëne net ferkes. (Isa. 49:15) Tëne sayn kleenichkheete un kwaliteete sin noch friix in Yeehoowa sayn khop. Ti Piipel saat tas, ‘foer sayn aue, sin se al noch am leepe’. (Luk. 20:38, noote) Eene taach tuut Kot tëne tsurik tsum leepe pringe. Tan, tuut eyer tëne sayn kepeete fom hërts noch mool aan heere un sayn aanpeetung aan nëme. Host tuu yemant woos tuu liipst im toot ferloer? Tan sicher, khene tiise wërter tich treeste un uf muute.
12. Was lost Yeehoowa noch trauricher in tiise xlechte letste taache?
12 Xlechte mënxe woo anere wee mache. Wii ti repelyoon im Eetem aan kefang hot, Yeehoowa wust xon tas ti tinge xlechter weyere, eep se peser wëre khente. Kot hast ti xlechtichkheet, ti unkerechtichkheet un ti wyolënts woos hayt uf te welt kept. Yeehoowa hot sich imer fiil ketanke kemacht mit te xwache un tii woo khene sich net aleen xitse — wii ti khiner oone fater un ti witfraae. (Sak. 7:9, 10) Un wën Kot siit tëm sayn troye tiiner unertrikt orer inkexpërt, tas lost tëm noch trauricher. Sayt aych sicher: Yeehoowa liipt aych al woo, soo wii Tee, am aus hale sayt.
13. Was fer xeemlich aanxtelung siit Yeehoowa tswixich ti mënxe un was tuut eyer in te futuer too triwer mache?
13 Ti imoraaliteet tswixich ti mënxe wërt yeete taach xlimer. Ti mënxe sin kemacht kep fer Kot noo mache, awer Satanaas liipt wën se imoraalixe tinge mache un tee rechent tas uf. In Noee sayn taache, “hot Yeehoowa kesiin tas ti xlechtichkheet fom mënx aarich kroos waar”. Tes weeche, “is Yeehoowa traurich kep tas eyer ti mënxe uf te eyert kemacht hot” un “tas hot sayn hërts wee kemacht”. (Xee. 6:5, 6, noote, 11) Is ti welt hayt se taach peser? Sicher net. Te Taywel wërt wool aarich froo kepe wën eyer siit tas ale sort imoraaliteet kans normaal is — un tas pasiirt tswixich man un fraa un tswixich layt fon tëm selwiche sëks. (Ëfe. 4:18, 19) Un Satanaas wërt hauptseechlich froo wën layt woo Yeehoowa aan peete een xweyer sint mache. Awer Kot halt tas net fer imer ketultich aus; Tee hast ti imoraalix aanxtelung un klaych khomt te taach wën al tii woo net ënere wole fernicht wëre.
14. Was sin ti mënxe mit te eyert un ti tiere am mache?
14 Ti mënxe mache xaate fer ti eyert. Yeehoowa hot een wichtich flicht fer ti mënxe kep: ti eyert un ti tiere uf phase. Awer xtats tas, mache ti mënxe xaate eene fer ti anere un aach fer Kot sayn kriatsyoon. (Ekl. 8:9; Xee. 1:28) Etliche syentiste saan tas, in te neekste yoore, khene 1 milyoon sorte planse un tiere tsum ën keen weeche was ti mënxe mache. Tes weeche, is es laycht tsum ferxteen warom soo fiil layt mache sich soo fiil ketanke mit te natuer. Wii kuut tas Yeehoowa ferxproch hot tas eyer tuut ‘fernichte tii woo ti eyert fernichte’ un tas eyer tuut fon te eyert een Paratiis mache. (Apo. 11:18; Isa. 35:1)
WAS LËRNE MER MIT YEEHOOWA SAYN PERSEWERANS?
15-16. Was sol uns uf muute wayter aus hale soo wii Yeehoowa? Mach een ferklaychung.
15 Tenk mool noo aan tiise propleeme al woo unser himlixe Fater hot aus kehal in te letste tausente yoore. (Kuk te khaste “ Was Yeehoowa am aus hale is”.) Yeehoowa khan tiise xlecht welt fernichte in te xtun woo eyer wil. Awer tëm sayn ketult helft uns fiil. Tenk mool noo aan tiise ferklaychung: een mama un een papa kriin tsum wise tas sayn khint, woo klaych uf te welt khomt, een fiisix propleem hot. Tes weeche, wërt tëm sayn leepe xweyer un khorts. Noch soo, sin ti eltere aarich froo wën tas khint uf te welt khomt, opwool tas aarich xweyer is fer ti eltere tas uf phase. Weeche tëne sayn liip, hale ti eltere yeete propleem wayter aus tas tii khene tas pestes leepe woos meechlich is fer tas khint kepe.
16 In te selwich aat, khome al ti nookhomer fon Aatam un Ewa imperfekt uf te welt. Noch soo, Yeehoowa liipt tëne un khimert sich mit tëne. (1 Yo. 4:19) Awer anerste wii ti eltere fon te ferklaychung, khan Kot etwas mache; un eyer hot xon ti tsayt pextimt woo eyer ti propleeme woo ti mënxheet mit macht al fernicht. (Mat. 24:36) Wën mer aan Yeehoowa sayn liip tenke, tas muut uns uf fer wayter aus hale ti tsayt woos neetich is.
17. Wii khene ti wërter in Hepreeyer 12:2, 3 iwer Yeesus uns uf muute wayter aus hale?
17 Yeehoowa is tas perfekt payxpiil fon persewerans, un Yeesus hot sayn Fater noo kemacht. Wii Yeesus uf te eyert waar, hot eyer fiiles aus kehal — xlechte wërter fon te mënxe, xaam un te toot aan een kweel phoste weeche uns. (Lees Hepreeyer 12:2, 3.) * Kewis hot Yeehoowa sayn payxpiil fon persewerans Yeesus ti kraft kep fer wayter aus hale. Un Yeehoowa sayn payxpiil khan uns aach ferxtërke.
18. Wii helft uns 2te Pheeter 3:9 ferxteen was am pasiire is weeche Yeehoowa sayn ketult?
18 Lees 2te Pheeter 3:9. * Yeehoowa wees ti pest xtun fer tiise xlecht welt tsum ën pringe. Weeche Kot sayn ketult, hon fiile mënxe tëm khene kelërnt. Un yets, een kroos folek fon milyoone layt peet tëm aan. Tii al sin froo tas Yeehoowa soo fiil tsayt aus kehal hot, un soo khonte se uf te welt khome, tëm liipe lërne, un sayn leepe tsu tëm tetikiire. Is Yeehoowa sayn ëntxlus fer wayter aus hale te pest ëntxlus? Yawool, un wën milyoone layt pis tsum ën aus hale, wërt tas taytlich ketsaycht!
19. Was sole mer pextimt sin se mache un was wërt unser peloonung sin?
19 Mit Kot, lërne mer aach wii mit frooheet aus hale. Satanaas hot fiile xwiirichkheete un traurichkheete keprung, awer noch soo is Yeehoowa “te frooe Kot”. (1 Tim. 1:11) Klaych, tuut Yeehoowa sayn naame ferhayliche, fer ale pewayse tas sayn aat fer rechiire ti pest is, un ti kans xwiirichkheet un xlechtichkheet woo mer hayt mit mache tsum ën pringe. Soo lang wii mer tas ketultich waarte, khene mer aach uns froo hale. Tan, say pextimt fer wayter aus hale un fer nii mools ferkese tas unser Fater im himel is aach am aus hale. Wën mer es mache, kile tiise wërter fer uns aach: “Froo is te mënx woo wayter aus halt foer ti proope, wayl, wën eyer ti tsuxtimung kriit, tuut eyer tas kroon fon leepe kriin, woo Yeehoowa ferxproch hot fer tii woo tëm wayter liipe.” (Tya. 1:12)
LIIT 139 Siist tuu tich xon in te Naye Welt?
^ parágrafo 5 Meyer al hon unser propleeme. Fiile fon tëne khene mer net hayt resolwiire. Tan, tas eensiches fer se mache is wayter aus hale. Awer meyer sin net ti eensiche — Yeehoowa tuut aach fiile tinge aus hale. In tëm artikel, tuun mer iwer 9 fon tiise tinge xpreche. Meyer tuun aach siin was fer kuute tinge sin pasiirt weeche Yeehoowa sayn persewerans, un was mer mit tëm sayn payxpiil lërne khene.
^ parágrafo 2 (Isaiias 65:16, 17) Soo tas yeete eene uf te eyert woo een seechen fer sich selepst suucht wërt fon te Kot fon te woerheet keseechent. Un yeete eene uf te eyert woo een ferxpreche macht, tuut torich te Kot fon te woerheet ferxpreche. Wayl ti kanse traurichkheete fon te ferkangne yoore wëre ferkes; tii wëre fon mayn aue ferxtekelt. 17 Wayl kukt! Ich mache naye himele un een nay eyert; un ti ferkangne tinge wëre net mee erinert un tuun net mee ins hërts khome.
^ parágrafo 10 (Psalm 22:23, 24) Teyer woo Yeehoowa tiif respektiirt, loopt tëm! Teyer al, nookhomer fon Yaakop, kept tëm eer! Teyer, ti kanse nookhomer fon Israël, peet tëm aan! 24 Wayl Tee hot net sayn aue tsu kemacht orer sayn kesicht rom ketreet fon te xwiirichkheete fon tëm woo uner trikt is; Tee hot net sayn kesicht fon tëm ferxtekelt. Wii eyer noo hilef aan kehal hot, hot Tee aan keheert.
^ parágrafo 17 (Hepreeyer 12:2, 3) un tuun mer mit acht fer Yeesus kuke, tee woo te Haupste Mitler fon unser klaape is un tee woo unser klaape komplët macht. Weeche ti frooheet woo tëm foer kextelt waar, hot eyer te toot in een kweel phoste aus kehal un hot ti xaam uf sayt kelos un sich uf te rechts sayt fon Kot sayn troon kesetst. 3 Yawool, tuut mit acht tenke aan tëm woo soo fiil xlechte wërter fon sintiche layt aus kehal hot, woo keeche tëne sayn aychne interëse kang sin, tas teyer net miit kept un uf kept.
^ parágrafo 18 (2te Pheeter 3:9) Yeehoowa is net lamsam mit was sayn ferxpreche petreft, wii etliche tenke, awer tee is ketultich mit aych, wayl eyer net winxt tas yemant fernicht wërt, awer winxt tas se al sich peroye.
