1-2. Baka ni jaku Jehovah ba Isaiah 65:16, 17 ulih meransang kitai deka terus betan?

“ANANG NGALAHKA DIRI!” Nya meh tema konvensyen pelilih menua ba taun 2017. Program tu nunjukka baka ni kitai ulih betan napi penanggul. Udah empat taun konvensyen tu belalu, tang kitai agi betan ba dunya ti jai tu.

² Nama penanggul ke ditapi nuan baru-baru tu? Kati bisi diri sebilik tauka bakih ti dikerinduka nuan udah nadai? Kati nuan balat sakit? Kati pengidup nuan majak tusah ketegal nuan mansang tuai? Kati nuan napi penanggul ketegal disakal, pengerusak alam, jenayah tauka penyakit, baka pandemik COVID-19? Kitai enda sabar nganti maya semua penanggul tu nadai agi!—Bacha Isaiah 65:16, 17

3. Nama patut digaga kitai diatu, lalu nama kebuah?

³ Pengidup ba dunya tu amat tusah, tang kitai engka napi penanggul ke tusah agi jemah ila. (Mat. 24:21) Nya alai, kitai patut terus betan. Nama kebuah? Laban Jesus madahka: “Ulih ati ti tan kita deka diselamatka.” (Luk. 21:19) Kitai deka betan agi enti kitai berundingka pasal orang bukai ke mujur napi penanggul ke sama baka kitai.

4. Nama kebuah Jehovah nya teladan ti pemadu manah ba pengeliat ati?

⁴ Sapa ke nyadi teladan ti pemadu manah ba pengeliat ati? Petara Jehovah. Kati saut tu ngasuh nuan tekenyit? Engka. Tang enti nuan berundingka nya enggau manah, nuan deka meretika kebuah iya. Dunya tu di baruh kuasa Sitan. Nya alai kitai bisi mayuh penanggul. Jehovah bisi kuasa muai semua penanggul tekala nya. Tang Iya nganti maya ti ngena  deka ngereja nya. (Rom. 9:22) Ke diatu, Petara kitai terus betan nyentukka maya Iya deka ngerusakka dunya ti jai tu. Aram kitai beratika semilan iti penanggul ke ngasuh Jehovah milih deka terus betan.

5. Baka ni nama Petara dipejaika, lalu nama asai ati nuan pasal tu?

⁵ Nama Iya dipejaika. Jehovah rinduka nama Iya, lalu Iya deka semua orang bebasaka nya. (Isa. 42:8) Tang pengelama enam ribu taun, nama Iya enda dipebasa. (Mas. 74:10, 18, 23) Tu berengkah nyadi ba Kebun Eden lebuh Sitan betenah sereta nuduh Petara enda meri Adam enggau Awa utai ti ulih ngagaka ati sida. (P-kal. 3:1-5) Kenyau ari nya, Jehovah dituduh enda meri utai ti diguna mensia. Jesus irau laban nama Apai iya enda dimuliaka. Nya kebuah, Jesus ngajar bala murid iya besampi: “Apai kami ti di serega: Kudus meh nama Nuan.”—Mat. 6:9.

6. Nama kebuah Jehovah meri awak sebedau Iya mutarka pekara pasal hak Iya merintah?

⁶ Hak Jehovah merintah dilaban. Jehovah bisi hak merintah serega enggau dunya, lalu chara Jehovah merintah nya pemadu manah. (Pem. 4:11) Tang Sitan nguji deka nipu bala melikat enggau mensia ngambika sida ngumbai Jehovah nadai hak merintah. Pekara tu begunaka awak kena nunjukka Jehovah bisi hak merintah sereta Iya pemerintah ti pemadu badas. Petara meri mensia peluang merintah diri empu ngambika sida sedar sida enda ulih mujur enti enda ningaka Penempa sida. (Jer. 10:23) Ketegal pengeliat ati Petara, pekara tu deka diputarka sekali aja lalu penanggul tu enda agi nyadi. Semua deka nemu chara Jehovah merintah nya pemadu manah lalu semina Perintah Iya aja ulih mai pemaik enggau pengelikun ba dunya tu.

7. Sapa ngelaban Jehovah, lalu nama deka digaga Iya ngagai sida?

⁷ Dilaban bala anak Iya di serega enggau ba dunya. Jehovah nempa bala melikat sereta mensia enggau sempurna. Tang udah nya, seiku melikat ke dikumbai Sitan (reti iya “Penyakal”) mai mensia ti sempurna, Adam enggau Awa, ngelaban Jehovah. Bala melikat enggau mensia ke bukai mega berengkah ngelaban Jehovah. (Jud. 6) Indah bansa Israel, ke udah dipilih Petara, nulak Iya sereta berengkah nyembah petara pelesu. (Isa. 63:8, 10) Ketegal tu Jehovah tentu berasai tusah ati. Taja pia, Iya sabar lalu terus betan nyentukka maya Iya ngemunaska semua orang ke ngelaban Iya. Lalu Jehovah enggau sida ke taluk ngagai Iya deka gaga ati laban sida enda ibuh napi penyai ba dunya tu!

8-9. Nama pemula ke dipadah pasal Jehovah, lalu nama ulih digaga kitai?

⁸ Pemula ke datai ari Sitan. Sitan nuduh Jop nyembah Jehovah ketegal deka bulih utai ari Petara. Jaku tuduh tu mega ditujuka ngagai semua nembiak Jehovah ke tetap ati. (Jop 1:8-11; 2:3-5) Sitan terus nuduh mensia nyentukka kemayaharitu. (Pem. 12:10) Kitai ulih nunjukka Sitan nya bula enti kitai terus betan napi penanggul sereta mengkang tetap ati ke Jehovah ketegal pengerindu kitai ngagai Iya. Baka Jop, kitai deka diberekat Jehovah enti kitai terus betan.—Jas. 5:11.

⁹ Sitan ngena tuai pengarap pelesu madahka Jehovah nya amat jai lalu Iya ke ngasuh mensia merinsa. Indah sekeda orang  madah enti anak mit mati, nya ketegal Jehovah begunaka mayuh melikat ba serega. Jaku ke baka tu amat enda bebasaka Petara! Tang kitai nemu Jehovah nya Apai ti bepengerindu. Enti kitai sakit raya tauka orang ti dikesayauka kitai mati, kitai enda nyalahka Jehovah. Tang, kitai pechaya dudi hari ila Jehovah deka ngeraika orang ke sakit lalu ngangkatka orang ke udah mati. Kitai ulih madah ngagai semua orang ke deka ninga, Jehovah nya Petara ti bepengerindu. Enggau nya, Jehovah ulih meri saut ngagai Sitan ke nyakal Iya!—J-lam. 27:11.

10. Nama dipadah Masmur 22:23, 24 pasal Jehovah?

¹⁰ Pemerinsa nembiak ti dikesayauka Iya. Jehovah nya Petara ti siru. Jehovah berasai tusah ati maya meda kitai merinsa, engka ketegal diperinsa orang, sakit, tauka pengelemi diri. (Bacha Masmur 22:23, 24.) Jehovah nemu pemedis ti ditapi kitai lalu Iya deka muai nya. (Bandingka Pemansut 3:7, 8; Isaiah 63:8, 9.) Maya deka datai alai “Iya deka ngendas semua ai mata ari mata [kitai], lalu pemati nadai agi, nadai agi ngulit, nadai agi nyabak, nadai agi pedis.”—Pem. 21:4.

11. Nama asai ati Jehovah pasal nembiak Iya ke tetap ati ke udah nadai?

¹¹ Beserara ari pangan Iya ke udah nadai. Nama asai ati Jehovah pasal bala nembiak Iya ke tetap ati ke udah nadai? Iya keran deka betemu enggau sida baru. (Jop 14:15) Ulih nuan ngambarka Jehovah lelengauka pangan Iya Abraham? (Jas. 2:23) Tauka Moses, ke kala “bejaku betunga mua” enggau Iya? (P-sut. 33:11) Lalu Iya keran nganti maya Iya ulih ninga David enggau pemasmur ke bukai belaguka lagu puji ti ngerinduka ati! (Mas. 104:33)  Taja pan bala pangan Petara tu udah nadai, tang Jehovah agi ingatka sida. (Isa. 49:15) Iya ingatka semua utai pasal sida. Bup Kudus madahka, ‘Ba Petara semua orang idup magang.’ (Luk. 20:38) Dudi hari ila, Iya deka ngangkatka sida idup baru lalu sekali agi ninga sampi sereta nerima sembah sida. Enti orang ke dikesayauka nuan udah nadai, arapka penemu tu ulih ngelantangka ati nuan.

12. Nama ngasuh Jehovah tusah ati kemayaharitu?

¹² Orang ke jai ngemediska orang bukai. Lebuh pengawa ngelaban Jehovah berengkah ba Kebun Eden, Jehovah nemu pekara tu deka nyadi majak jai. Jehovah begedika penyai, ulah ti enda lurus sereta jenayah ba dunya kemayaharitu. Jehovah amat ibuhka sida ke lemi sereta enda ulih ngelindung diri empu, baka anak ke nadai apai indai sereta sida ke balu. (Sek. 7:9, 10) Nambahka nya, Jehovah tentu tusah ati meda nembiak Iya ke tetap ati diperinsa sereta dijil. Nyadi, andal meh Jehovah amat rinduka nuan laban nuan sama betan enggau Iya.

13. Nama ulah ke majak dikereja mensia kemayaharitu, lalu baka ni Jehovah deka mutarka pengawa tu?

¹³ Mensia majak ngereja ulah seks ti kamah. Mensia digaga ngambika ulih neladan Petara. Tang Sitan rindu ngasuh sida ngereja utai ti jai. Maya Petara meda penyai semua orang ba jeman Noah, “Iya ngesal udah ngaga sida lalu ngengkahka sida di dunya tu. Iya balat amat ngesalka nya.” (P-kal. 6:5, 6, 11) Kati gaya dunya bisi nyadi manah agi? Enda! Sitan gaga ati maya iya meda orang ngereja mayuh macham ulah seks ti kamah lalu pekara tu nyadi utai ke biasa ba sida, tu nyengkaum ulah seks entara orang ke ukai laki bini, tauka orang ke sama penempa! (Eps. 4:18, 19) Sitan amat gaga ati, kelebih agi maya iya meda orang ke nyembah Jehovah ngereja dosa tu. Tang jemah ila, Jehovah deka nunjukka Iya begedika ulah ti kamah lebuh Iya ngemunaska orang ke ngereja ulah ti kamah ke enggai berubah.

14. Nama digaga mensia ngagai dunya enggau bala jelu?

¹⁴ Mensia ngerusak dunya ke ditempa Petara. Mensia ukai semina merinsaka mensia bukai, tang sida enda nyaga dunya enggau jelu baka ke dipinta Jehovah kereja mensia. (P-kal. 1:28; P-jar. 8:9) Sekeda saintis madahka ketegal pengawa mensia, sejuta bansa jelu enggau utai tumbuh deka lenyau dalam urung beberapa taun. Nya alai, mayuh orang irauka rampa menua kitai! Tang, Jehovah besemaya deka “ngerusak sida ke nyadi pengerusak dunya” lalu ngubah dunya tu nyadi Paradais.—Pem. 11:18; Isa. 35:1.

15-16. Nama ke meransang kitai betan enggau Jehovah? Padahka siti sempama.

¹⁵ Pikirka meh semua penanggul ke ditapi Apai kitai ti di serega pengelama beribu taun. (Peda kutak “ Utai ke Ngasuh Jehovah Milih Deka Liat Ati.”) Jehovah ulih ngerusak dunya ti jai tu ba sebarang maya. Tang pengeliat ati Jehovah mai mayuh penguntung ke kitai! Pikirka sempama tu. Lutur madahka ngagai sepasang laki bini, anak seduai iya ke dalam kandung bisi penimpang. Enti sema sida deka ngadaka anak nya, pengidup anak nya deka tusah lalu engka mati biak. Taja pia, maya anak nya ada, seduai iya amat gaga ati. Ketegal seduai iya rinduka anak nya, seduai iya sanggup betan napi penanggul ngambika ulih meri anak nya pengidup ti pemadu manah.

 ¹⁶ Baka nya mega, semua peturun Adam enggau Awa enda sempurna maya sida ada. Taja pia, Jehovah rinduka sida sereta ngintu sida. (1 Jhn. 4:19) Enda baka apai indai ke dalam sempama tadi, Jehovah bisi kuasa kena ngujungka semua pemerinsa bala anak Iya. Iya udah netapka hari maya Iya deka ngujungka semua pemerinsa mensia. (Mat. 24:36) Endaka pengerindu Jehovah nulung kitai betan sama enggau Iya seagi-agi kitai ulih?

17. Baka ni utai ke ditulis pasal Jesus ba Hebrew 12:2, 3 ulih meransang kitai terus betan?

¹⁷ Jehovah netapka teladan ti sempurna lebuh nunjukka pengeliat ati. Jesus neladan pengeliat ati Apai iya. Lebuh ba dunya, Jesus betan lebuh orang jai jaku enggau iya, lebuh dikemaluka sereta dipantang ba tiang perinsa ketegal kitai. (Bacha Hebrew 12:2, 3.) Pengeliat ati Jehovah tentu meransang Jesus betan. Tu mega ulih nulung kitai.

18. Baka ni 2 Peter 3:9 nulung kitai meretika penguntung ke diulih ari pengeliat ati Jehovah?

¹⁸ Bacha 2 Peter 3:9. Jehovah nemu maya ti pemadu manah kena ngerusak dunya ti jai tu. Ketegal pengeliat ati Iya, mayuh mensia ulih ngelala Iya lalu nyadi seraban besai orang ke nyembah sereta muji Iya. Semua sida berasai beterima kasih laban Jehovah udah ngayanka pengeliat ati. Nya alai sida bisi peluang belajar pasal Iya, rinduka Iya sereta nyerahka diri ngagai Iya. Enti bejuta iku mensia udah betan datai ke ujung, tu nunjukka Jehovah udah ngaga pemutus ti betul maya Iya milih deka liat ati!

19. Nama juluk ati kitai, lalu nama upah kitai?

¹⁹ Kitai belajar ari Jehovah baka ni ulih betan enggau gaga ati. Taja pan Sitan udah mai pemerinsa, Jehovah mengkang “Petara ti gaga ati.” (1 Tim. 1:11, NWT) Kitai ulih terus gaga ati lebuh kitai enggau sabar nganti Jehovah nguduska nama Iya, nunjukka hak Iya merintah, muai semua penyai sereta ngujungka semua penanggul ke ditapi kitai diatu. Aram meh kitai betan laban Apai kitai ti di serega pan benung betan! Enti kitai ngereja nya, kitai deka ngasaika pemendar ari ayat tu: ‘Beberekat meh orang ke tan natka penguji, laban lebuh iya tan diuji, iya deka nerima makota pengidup ti udah disemaya Jehovah ke orang ke rinduka Iya.’—Jas. 1:12.