1-2. Okonu ō ce nyá yɔ ipu ɔkpá ku Ayisáya 65:16, 17 nōo gē ta alɔ abɔ ku alɔ gɔbu yɔ i lɔtu a?

“Ɛ̄JƐ̄ KÓŌ HII JƐ UWƆ Ŋ!” wɛ ɛyi ɛlā ku ojileyi nɛhi ku ihayi ku 2017 a. Ōmiya ku ojileyi ɔɔma mafu, ɛgɛ nɛ alɔ géē yɔ i lɔtu ipu unwalu ɛyɛɛyɛyi nɛ alɔ gē má a. Ó le fu ajɛ ihayi ɛnɛ (4) nɛ alɔ gā ojileyi ɔɔma ɛ, naana alɔ kē yɔ i lɔtu ku aunwalu ɛyɛɛyɛyi ipu ɛcɛ obɔbi nyā kpɔ.

² Aunwalu nyá nɛ a má nɛ ó gboji ɛɛ ŋ ma? Ɔcɛ apɔlɛ ku uwɔ amāŋ ɔkpa ku uwɔ nōo kwu uwɔ ajaajɛ gekwū? A yɔ i doōcē nɛɛnɛhi nōó cɛ ō mɛ ŋ? A yɔ i lɔtu ku unwalu ɛyɛɛyɛyi ohigbu ku a yɔ i je hilokplici nɛ? Kɛɛ ka unwalu a wɛ amiya, ɛfú ō kpo, amāŋ ka oyaŋmo? Kɛɛ ku a yɔ i má unwalu ohigbu ōcē ku corona nōo yɔ ipu oduudu ɛcɛ a? Oduudu alɔ yɔ i leyi ce eko nɛ ɛjɛɛji aunwalu nyā géē mɛ kpɛɛm, nɛ alɔ i gáā blakwu uwa gboogboo ɛɛ gɛ ŋ ma!​—Jé Ayisáya 65:16, 17.

3. Ɔdi nɛ alɔ cɛgbá ō ya babanya a, ɔdi kē ya a?

³ Oyeeyi ku alɔ ipu ɛcɛ obɔbi nyā lɔnɔ, naana a, alɔ lɔfu lɔtu ku āhɔ̄ ō lɔnɔ fiyɛ ɛnyā ɛcɔbu. (Umát. 24:21) Ohigbu ɛnyā, alɔ cɛgbá ō nwu babanya ɛgɛ nɛ alɔ géē lɔtu fiyɛ a. Ɔdiya a? Ohigbu ka Ujisɔsi kahinii: “Aá lɔtūlé, yɔ̄ ī lɔtūce Ɔwɔicō kpɔ́, cɛ́ɛ́ aá lɛ oyēeyí opiyóó lɛ.” (Ulúk. 21:19) Ó géē tɔɔtɛ lɛ alɔ ō lɔtu fiyɛ, ɔdaŋ ku alɔ gē gbɛla kwu ācɛ nōo lɔtu ku ɛdɔ unwalu ɛgɛnyā gbɔbu ɛ ma.

4. Ɔdiya nɛ alɔ ka ka Ujehofa wɛ ɛnɛɛnɛ ocabɔ ku ɔtu ō lé a?

⁴ Ɔnyɛ wɛ ɛnɛɛnɛ ocabɔ mafu ku ɔtu ō lé fiyɛ duu a? Ujehofa nōo wɛ Ɔwɔico a nɛ. Ohi nyā lɔfu hɛ uwɔ idaago, ó lɛ a ŋ? Ii ó lɔfu hɛ uwɔ idaago, amáŋ ɔdaŋ ku a gbɛla tu ɔ lɔɔlɔhi a géē jé ɛyi nu. Ɛcɛ nyā yɔ ipu abɔ ku Ebilii, ɔɔma ya nɛ aunwalu kpɛɛm nyā yɔ ipu nu a. Ɔdaŋ ku a Ujehofa dɔka, ó lɔfu ya ku unwalu nyā kóō mɛ icɛ gla, amāŋ ó ya lɛ a ŋ, ó lɛ ɔtu lé yɔ i  gbeyi ɛ̄cī nɛ ó miya taajɛ a. (Uróm. 9:22) Ujehofa le miya ō yɔ i lɔtu, jaa gbeeka nɛ ó gáā je ɛcɛ obɔbi nyā cataajɛ a. Babanya, ku alɔ leyi yɛ aɔdā ahaanɛ nɛ Ujehofa miya ō lé ɔtu ku nu a.

5. Ɛgɛnyá néē je iyē ku Ɔwɔico teelihɔ a, ɛgɛnyá nɛ ɛnyā kē lɛ abɔ kwu uwɔ ɔtu a?

⁵ É kwu iyē ku Ujehofa i teelihɔ. Ujehofa yihɔtu iyē ku nu nɛhi, ó kē dɔka ku oduudu ācɛ kéē lɛ ojilima ce iyē ku nu. (Ayis. 42: 8) Amáŋ bɛɛka ihayi utajan ɛhilii (6,000) nōo gā yɛ a, é kwu iyē otiihɔ ku nu nyā i teelihɔ. (Aíjē 74:10, 18, 23) Ɛnyā kē gbɔɔ ŋma ipu ɛhɔ ku Idɛn eko néē Ebilii (nɛ ɛyi nu wɛ ɔcɛ o “Kɛmgbɛ a”) kɛmgbɛ lɛ Adam mla Iifu ka Ɔwɔico i dɔka ɔdā nōo géē cɛ lɛ uwa gweeye ŋ ma. (Ohút. 3:1-5) Ŋma eko ɔɔma jaa gáā kwu icɛ, ācɛ gē kpɛla ce Ujehofa ka ó gē je ɔdā nɛ ācɛ cɛgbá ō ya kéē gweeye a lɛ uwa ŋ. Ó kwu Ujisɔsi iyē nɛhi, ohigbu iyē ku Adā nu néē je teelihɔ a. Ohigbu ɛnyā, ó nwu ayikpo ku nu kéē gbɔɔkɔ kahinii: “Adā alɔ, nōo yɔ̄ ɔkpáncō, Alɔ gbɔ̄ɔkɔ ká ā yá ká ācɛ kéē lɛ ojīlīmā ce iyē otīhɔ kú uwɔ.”​—Umát. 6: 9.

6. Ɔdiya nɛ Ujehofa lɔtu ku ihayi alɛwa kóō gáā le yɛ, ɛɛ kóō mafu ku anu foofonu lɛ íkwu ō lé ɔcɛ ɔkpanco mɛmla ɛcɛ a?

⁶ Ācɛ alɛwa ta íkwu ku ɔcɛ́ ō ce ku Ujehofa. Ujehofa foofunu lɛ íkwu ō lé ɔcɛ́ ɔkpanco mɛmla ɛcɛ a, ɔwɛ o lé ɔcɛ́ ku nu kē lɔhi fiyɛ duu a. (Mafú. 4:11) Amáŋ Ebilii ceyitikwu lɛ aalelekwu ōhī mla alɛɛcɛ pla, o ya ɛɛ kéē gbɛla ka Ɔwɔico i lɛ íkwu ō lé ɔcɛ́ ŋ. Ohigbu ɛnyā, ó géē je eko gbɔbu ɛɛ ku ācɛ kóō gáā jé ka Ɔwɔico lɛ íkwu ō lé ɔcɛ́ a. Ó kē wɛ ɔdā ijeyi nɛhi abɔɔ Ujehofa lɛ eko taajɛ lɛ alɛɛcɛ, kéē lɛ ɔcɛ́ lé ikpɛyi ku iyi uwa kéē má ɔ, ɔdaŋ ka é géē ya lɔhi gla a. (Ujɛr. 10:23) Ohigbu ɛgɛ nɛ Ɔwɔico lɔtu lɛ a, ɔcɛ duuma i lɛ aafu ka Ɔwɔico lɛ íkwu ō lé ɔcɛ́ ɔkpanco mɛmla ɛcɛ ŋ. Ó gboji ŋ, ɛjɛɛji ācɛ géē jé ka ɔwɛ ō lé ɔcɛ́ ku Ujehofa foofunu kpaakpa a, ka Ajɔɔcɛ ku nu foofunu kē gáā bi ɛbɔ mla ogbotu wa ipu ɛcɛ a.

7. Anyɛ ya ikpɛyi olɔfu ta Ɔwɔico a, ɔdi nɛ ó kē gáā ya lɛykwu uwa a?

⁷ Ikpɛyi olɔfu nɛ ayi ku nu ōhī ya a. Ujehofa ya aalelekwu otɛhɔ mla alɛɛcɛ ɔwɛ néē lɛ ɛnyá duuma ŋ. Amáŋ alelekwu otɛhɔ éyi néē hi ka Usetan (nɛ ɛyi nu wɛ ɔcɛ o “Bɛyikwu” a) lɛ ikpɛyi olɔfu ya tu Ujehofa, klla ya ku Adam mla Iifu néē ya néē lɛ ɛnyá duuma iyē ŋ ma, kéē lɛ ikpɛyi olɔfu ya tu Ujehofa duu. Aalelekwu otɛhɔ mla alɛɛcɛ ɔhá klla gáā gbɔɔ ō yikpɛyi olɔfu tu Ujehofa duu. (Ujúd 6) Igbihaajɛ, ōhī ku ācɛ Isrɛlu nɛ Ujehofa fu kéē wɛ ācɛ ɔlɛ nu piii a, ta ɛlā ku nu klla gbɔɔ ō gba aɔwɔ ɔhá ɛ̄gbā. (Ayis. 63:8, 10) Ujehofa má ɔ ka é lɛ anuɔ ya bɔbi nɛhi. Naana a, ó yɔ i lɔtu. Ó kē géē gɔbu yɔ i lɔtu jaa gbeeko nɛ eko kpaakpa géē wa, nɛ ó géé je ɛjɛɛji ācɛ o ya ikpɛyi olɔfu nyā kpo yiifi. Cɛɛ Ujehofa mla ācɛ nōo hayi kpaakpa lɛ ɔ a, géē gbɔɔ ō gweeye ka é gáā cɛgbá ō lɔtu ku ɔdobɔbi duuma ɛɛ gɛ ŋ!

8-9. Aɛkɛmgbɛ nyá néē yɔ i ka ba Ujehofa a, ɔdi nɛ alɔ kē gáā ya lɛyikwu ɔ a?

⁸ Ɛkɛmgbɛ nɛ Ebilii yɔ i ka eko doodu a. Usetan kpɛla ce Ujobu ɔcɛ o gba Ujehofa ɛ̄gbā nōo hayi kpaakpa a kahinii: Ɛjɛɛji ācɛ nōo gē gba ɔ ɛ̄gbā kpaakpa a, gē ya lɛ a ohigbu ɔdā nɛ Ujehofa gē ya lɛ uwa a nɛ. (Ujób. 1:8-11; 2:3-5) Ebilii kē yɔ i kɛmgbɛ nyā ba alɛɛcɛ jaa kwu icɛ. (Mafú. 12:10) Alɔ géē mafu ka Usetan wɛ ɔcɛ o kɛmgbɛ, ɔdaŋ ku alɔ ceyitikwu hayi kpaakpa ipu ojama duuma nɛ alɔ gē má a, ohigbu ihɔtu nɛ alɔ lɛ lɛ Ujehofa a. Ujehofa lɛ ɔhā hɛ ce Ujobu, ó kē géē hɛ ɔhā ce alɔ duu, ɔdaŋ ku alɔ lɛ ɔtu lé gā ajaajɛ.​—Ujɛ́m. 5: 11.

⁹ Usetan klla gē bi aotrɛyi ku icɔɔci gē ka ka Ɔwɔico ɔ bɔbi, klla lɛ abɔ ipu owe nɛ ācɛ yɔ  i má a. Ōhī ku uwa gē ka ka eko nɛ ɔyipɛ gekwū, ka Ɔwɔico ɔ je ɔ a ohigbu ka ó cɛgbá alelekwu otɛhɔ ɔkpanco. Ɛnyā i mafu ojilima ɛgɛ iyi Ɔwɔico fluflu ŋ! Amáŋ alɔ a jé ka Ujehofa wɛ Ɔwɔico ku ihɔtu nɛ. Ɔdaŋ ku alɔ yɔ i doōcē nɛɛnɛhi amāŋ ka ɔcɛ nɛ alɔ yihɔtu nu gekwū, alɔ i gē ŋmo Ɔwɔico ɛpɔbi ŋ. Ikɔkɔ ɔɔma, alɔ kpɔtuce ka ɛ̄cī éyi, ó géē je oduudu ācɛ o doōcē hɛta ŋma ōcē ku uwa klla géē je ācɛ nōo kwū a heyi ŋma ɔlekwū. Alɔ da oduudu ācɛ nōo géē dɔka ō jahɔ tu alɔ a gla, ka Ujehofa wɛ Ɔwɔico ku ihɔtu. Cɛɛ Ujehofa géē má ohi ō ta ɔcɛ nōo yɔ i lɛ okonu kwu ɔ iyē a.​—Aíit. 27: 11.

10. Ɔdi nɛ Aíjē Kú Ɛ̄gbā 22:23, 24 nwu alɔ lɛyikwu Ujehofa a?

¹⁰ Owe nɛ ācɛ o gba ɔ ɛ̄gbā nōo he ɔtu nɛhi a ba yɔ i má a. Ujehofa wɛ Ɔwɔico ku eyinyinyi. Ó gē kwu ɔ iyē nɛhi eko duuma nɛ alɔ yɔ i má owe, a jé ŋ, ohigbu oyaŋmo, ōcē amāŋ ku ajila iyē ŋ ku alɔ. (Jé Aíjē Kú Ɛ̄gbā 22:23, 24.) Ujehofa jé owe nɛ alɔ yɔ i má a, ó dɔka ō ya kóō mɛ, ó kē i ya ɔ. (Klla má Oōyɛbɛ̄ɛcɛ 3:7, 8; Ayisáya 63: 9.) Eko yɔ i wa nɛ ó “géē nya ɛjɛ̄ɛ̄jī agīje ŋmá īkpēyī kú [alɔ]. Ikwū í gáā yɔ̄ gɛ ŋ́, ācɛ í kē gáā yēkwu gɛ ŋ́, ācɛ í gáā jikwū gɛ ŋ́, ācɛ í kē gáā jɔɔnɔ gɛ ŋ.”​—Mafú 21: 4.

11. Ɛgɛnyá nɛ ɔtu yɔ i ya Ujehofa lɛyikwu aɔkpa ku nu nōo kwū a?

¹¹ Aɔkpa ku nu nōo kwū a. Ɛgɛnyá nɛ ɔtu gē ya Ujehofa lɛyikwu ācɛ, nōo gba ɔ ɛ̄gbā kpaakpa nōo kwū a? Ujehofa yɔ i leyi ce ō má uwa kpɔ! (Ujób. 14:15) Leyi yɛ ɛgɛ nɛ ɔtu yɔ i ya Ujehofa ō má ɔkpa ku nu Ebraham kpɔ a? (Ujɛ́m. 2:23) Amāŋ leyi yɛ ɛgɛ nɛ ɔtu yɔ i ya Ujehofa lɛ ō kɛla lɛ Umosisi, ɔcɛ nōo gē kɛla “leyīkwu Umosisi eyī” a? (Oyɛb. 33:11) Amāŋ leyi yɛ ɛgɛ nɛ ó yɔ i leyice ō po ɛnɛɛnɛ ijé ku Udefidi mla ācɛ o gwo ijé ɔhá a! (Aíjē 104:33) Naana nɛ aɔkpa ku Ujehofa nyā yɔ i gbiyɔla ipu unoji a, Ujehofa i je uwa mlanyi ŋ.  (Ayis. 49:15) Ó bla tu ɛjɛɛji odee lɛyikwu uwa. Ubáyíbu da alɔ kahinii: “Ɔwɔico leyi má uwa ka ɛjɛɛji uwa yeeyi.” (Ulúk. 20:38, ɛlā néē ta ɛhaajɛ ku nu a (NW.) Ɛ̄cī éyi ó géē je oduudu uwa heyi ŋma ɔlekwu. Ó géē jahɔ tu ɛnɛɛnɛ ɔkɔ néē gē gba ŋma ipu ɔtu lɛ ɔ a, klla géē miyɛ ɛ̄gbā ō gba ku uwa kpɔ. Ɔdaŋ ka ɔcɛ nɛ a yihɔtu nu duuma kwū ɛ, ɛlā nyā kóō ta uwɔ ɔtu kwu ɔtu.

12. Ɔdi wɛ ɔdā nōo gē kwu Ujehofa iyē fiyɛ duu ɛpleeko amoomɛ nyā a?

¹² Owe nɛ ācɛ yɔ i má ipu abɔ ku ācɛ obɔbi a. Boobu néē yikpɛyi olɔfu ipu ɛhɔ ku Idɛn a, Ujehofa jé ku āhɔ̄ ku alɛɛcɛ géē bɔbi nɛɛnɛhi gbɔbu ɛɛ kóō lɔhi. Ɔdā obɔbi, ɛpɔ ɛkɛmgbɛ mla ɛfú ō kpo nōo yɔ ipu oduudu ɛcɛ icɛ a gē kwu Ujehofa iyē nɛhi. Ó klla gē lɛ ɛlá wu ācɛ néē lɛ ācɛ o tu uwa abɔ fluflu ŋ ma, bɛɛka ayokwū mla anyā okwū. (Usak. 7:9, 10) Ó klla gē kwu Ujehofa iyē fiyɛ eko duuma néē yɔ i ya ɔcɛ nōo hayi kpaakpa lɛ ɔ a owe, amāŋ yɔ i je ɔ ta inu agba. Jé kpɔcii ka ó yihɔyu oduudu a nōo hayi kpaakpa klla yɔ i lɔtu mla anu a.

13. Ɛdɔ ku uce o tuweyi nyá nɛ Ɔwɔico yɔ i má ɔtahɛ ku alɛɛcɛ icɛ a, ɔdi nɛ ó kē gáā ya lɛyikwu ɔ a?

¹³ Alɛwa ku ācɛ icɛ yɔ i je piya ācɛ o gbaaja tōōtɔ̄ɔ̄. Ujehofa ya ācɛ kéē yɛce ocabɔ ku nu, amáŋ ɔtu ku Ebilii wɛ ō ya ku ɛjɛɛji ācɛ kéē kwu piya ācɛ ogbaaja. Eko nɛ Ɔwɔico má “ɛ́gɛ́nɛ̄ ɛjɛ̄ɛ̄jī ācɛ nēe bá ipú ɛcɛ ā bɔ̄bíipú lɛ” ɛpleeko ku Unowa a, ó le “kwɔ́ɔ iyē nɛ̄ɛ̄nɛ̄hi lɛyíkwu ɔ̄cɛ nōó yá wā ipú ɛcɛ ā. Íjémā le mu ɔ́ ɔtū nɛ̄hi” (Ohút. 6:5, 6, 11.) Ŋma eko ɔɔma jaa gáā kwu icɛ, ɛcɛ kwu lɔhi ɛ? Ehee! Ikɔkɔ ɔɔma, Ebilii gē gweeye nɛhi ka ɛdɔ ku aja ō gbo ɛyɛɛyɛyi le kpɔ icɛ, kwu ɛnyā nɛ acɛnya mla acɛnya amāŋ acɛnyilɔ mla acɛnyilɔ gē ya ta iyi uwa! (Āfi. 4:18, 19) Ebilii gē gweeye nɛɛnɛhi, eko duuma nɛ ācɛ nōo gē gba Ujehofa ɛ̄gbā a lɛ ɔdobɔbi ɛgɛnyā ya. Eko duuma nɛ ɔtu ō lé ku Ujehofa gā oŋmɛyi, ó géē mafu ka ó gē wɔtu ɛjɛɛji aja ō gbo ŋma lɛ ō je oduudu ācɛ nōo gē ya ɛgɛnyā a yiifi taajɛ.

14. Ɔdi nɛ ācɛ yɔ i ya ācɛ mla aɛ́bɛ́ a?

¹⁴ Alɛɛcɛ yɔ i je ɛcɛ nɛ Ɔwɔico ya a biya taajɛ. Ācɛ nēe lɛ íkwu nɛhi a i yɔ i lɛ abɔ ‘da ācɛ o gbɛha ɛyi taajɛ’ foofunu ŋ, amáŋ é leyikwu ɛcɛ ku alɔ nyā mla aɛ́bɛ́ nɛ Ujehofa ya a ŋ duu. (Ɔ̄cok. 8:9; Ohút. 1:28) Ācɛ ku usayɛnsi kahinii: Ɔdā nɛ ācɛ alɛwa yɔ i ya icɛ a, lɔfu ya ku ihayi ōhī nōo yɔ i wa a, ɛdɔ ku aɔdā oyeeyi ōhī i gáā yɔ ɛɛ gɛ ŋ. Ó hɛ alɔ idaago ŋ, ɔɔma ya ɛɛ néē ka ka aɔdā nɛ Ɔwɔico ya a yɔ ipu unwalu a! Amáŋ alɔ ta Ujehofa ahinya ohigbu okonu nɛ ó ce, ka anuɔ ‘géē je oduudu ācɛ nōo gē biya ɛcɛ nyā taajɛ a yiifi’ cɛɛ ó kwu ɛcɛ nyā u piya uparadais a.​—Mafú 11:18; Ayis. 35: 1.

15-16. Ɔdi cika ō tu alɔ ɔtu kwu ɔtu ku alɔ gɔbu yɔ i lɔtu bɛɛka Ujehofa a? Je ocabɔ mafu.

¹⁵ Leyi yɛ ɛjɛɛji aunwalu nɛ Adā alɔ nōo yɔ ɔkpanco a yɔ i lɔtu ku nu ŋmifi hayi utajan alɛwa nōo gáā yɛ a. (Má ikpati nōo kahinii: “ Ɔdā Nɛ Ujehofa Yɔ I Lɔtu Ku Nu A.”) Ujehofa je ɛjɛɛji unwalu nyā bi wa ō ŋmɛyi eko duuma gla. Amáŋ ɔtu ō lé ku nu klla kwu piya ɔhá lɛ alɔ! Kooco leyi yɛ ocabɔ mafu nyā. Leyi yɛ ɔ ka é le da ɔba mla ɔnyā éyi ka ɔyi néē gáā ma a géē doōcē klla má owe nɛɛnɛhi, naana a, ó géē kwu ɛpleeko ku ɔyipɛ ɔɔma kpɔ. Naana nɛ apɔlɛ a le jé ku aa géē má owe tu ɔyi a nɛɛnɛhi a, é lɛ ɔyi a ma kpɔ. Ohigbu ihɔtu néē lɛ lɛ ɔyi a, é cɛ ō lɔtu ku ɛjɛɛji unwalu néē gáā má a, o ya ɛɛ kéē ta ɔyi a abɔ lā oyeeyi olɔhi.

¹⁶ Ɛgɔɔma duu, ɛjɛɛji ayi nɛ Adam mla Iifu ma a, i jila iyē eko néē ma uwa wɛɛcɛ a ŋ. Naana a, Ujehofa yihɔtu uwa klla lɛ ɛlá wu uwa nɛhi. (1 Ujɔ́n. 4:19) Adā mla ɛ́nɛ́ néē kɛla lɛyikwu ɔ ipu acije ɔɔma a i ya unwalu ku ɔyi  uwa gla ŋ, amáŋ Ujehofa géē bi owe ku ācɛ ɔlɛ nu wa oŋmɛyi. Ujehofa lɛ eko nɛ ó gáā bi ɛjɛɛji owe wa oŋmɛyi a tu ɛ. (Umát. 24:36) Ihɔtu nɛ Ujehofa lɛ lɛ alɔ nyā kóō lɛ abɔ kwu alɔ ɔtu, ku alɔ gɔbu yɔ i lɔtu tɔha mla anu ɔwɛ duuma nōo cika a.

17. Ɛgɛnyá nɛ ɛlā ku Ujisɔsi nōo yɔ ipu ɔkpá ku Ācɛ Uhíbru 12:2, 3 a, je ɔtu ō tu kwu ɔtu lɛ alɔ ku alɔ gɔbu yɔ i lɔtu a?

¹⁷ Ujehofa wɛ ɛnɛɛnɛ ocabɔ ku ɔtu ō lé a. Ujisɔsi kē yɛce ocabɔ ku ɔtu ō lé ku Adā nu duu. Eko nɛ Ujisɔsi yɔ ipu ɛcɛ a, ó lɔtu ku ɛca, uweyi, klla cɛ ō gekwū ɛyi ɔci ku owe ohigbu alɔ. (Jé Ācɛ Uhíbru 12:2, 3.) O laafu ŋ, ocabɔ ku ɔtu ō lé ku Ujehofa lɛ ɔfu tu Ujisɔsi iye kóō lɔtu. Ɛnyā kē lɛ ɔfu tu alɔ iyē gla duu.

18. Ɛgɛnyá nɛ ɔkpá ku 2 Upíta 3:9 tu alɔ abɔ jé ɔdā nɛ ɔtu ō lé ku Ujehofa yɔ i ya a?

¹⁸ Jé 2 Upíta 3: 9. Ujehofa jé eko kpaakpa ō bi ɛcɛ obɔbi nyā wa oŋmɛyi a. Ɔtu nɛ Ujehofa kē lé nyā, ya ku ācɛ alɛwa kéē gáā lɛ ɔ jé. Ohigbu ɛnyā, umiliyɔn alɛwa ku ācɛ kē yɔ i gba Ujehofa ɛ̄gbā klla yɔ i je owoofu lɛ ɔ. Oduudu ācɛ nōo yɔ nyā yɔ i gweeye ka Ujehofa lɛ ɔtu lé jaa gbeeko néē lɛ uwa ma, é gáā lɛ ɔ jé klla kwu iyi uwa u gwɛɛya lɛ ɔ. Ɔtu nɛ Ujehofa lé nyā géē ta éyi peee fiyɛ, eko nɛ ó gáā hɛ ɔhā ce umiliyɔn alɛwa ku ācɛ nōo lɔtu mla anu gā ajaajɛ a!

19. Ɔdi nɛ alɔ cɛgbá ō lɛ ɔtu ku alɔ yekponu ō ya a, ɔha nyá nɛ alɔ kē gáā lɛ ɔdaŋ ku alɔ ya lɛ a?

¹⁹ Alɔ nwu ŋma ocabɔ ku Ujehofa ɛgɛ nɛ alɔ géē yɔ i lɔtu mla eeye a. Naana nɛ Usetan bi owe mla unwalu ɛyɛɛyɛyi wa ipu ɛcɛ nyā a, Ujehofa kē wɛ ‘Ɔwɔicō ku eeye kpɔ.’ (1 Utím. 1:11) Alɔ lɔfu yɔ i lɛ eeye abɔɔ alɔ yɔ i gbeyi ku Ujehofa kóō lɛ iyē ku nu ya tiihɔ, miyɛ íkwu ku ɔcɛ́ ō ce ku nu, amāŋ kwu ɛjɛɛji ɔdā obɔbi i bi o wa oŋmɛyi, klla ya ku ɛjɛɛji unwalu nɛ alɔ yɔ i má babanya a kóō mɛ a. Alɔ lɛ ɔtu ku alɔ yekponu ku alɔ yɔ i lɔtu, abɔ alɔ jé ku Adā alɔ nōo yɔ ɔkpanco a yɔ i lɔtu duu a. Ɔdaŋ ku alɔ ya lɛ a, ɛlā nyā géē ya jila ipu ɛjɛɛji oyeeyi ku alɔ: “Ācɛ nēe gē lɔtūlé ká nēé cɔ̄nyā eko nɛ̄ ojámá yɔ̄ ī yá uwā ŋ́ mā, ákú uwā kwú lɔhi ɛɛ́. Ohígbū ka eko nɛ̄ ó lɛ ojámá ā yálé glá, ó géē mīye ulé kú oyēeyi nōó ī mɛ ŋ́, nɛ̄ Ɔwɔicō cokónu lɛ ācɛ nēe yíihɔtū tá ɔ̄ ā.”​—Ujɛ́m. 1: 12.