1-2. Kasano a ti sasao ni Jehova iti Isaias 65:16, 17 maparegtanatayo a saan a sumuksuko?

“DIKA SUMUKSUKO!” Dayta ti makapagagar a tema ti rehional a kombension idi 2017. Impakita ti programa no kasanotayo a makapagibtur iti laksid dagiti suot a mapaspasarantayo. Uppat a tawenen ti napalabas sipud idi, ngem addatay pay laeng nga agib-ibtur iti daytoy agdama a sistema ti bambanag.

² Ania dagiti nabiit pay a problema nga inibturam? Natayanka kadi iti kapamilia wenno patpatgen a gayyem? Adda kadi grabe a sakitmo? Marigatanka kadi gapu ta lumaklakay ken bumakbaketkan? Maysaka kadi a biktima ti natural a didigra, kinaranggas, wenno panangidadanes? Wenno apektadoka kadi iti sakit, a kas iti COVID-19 pandemic? Segseggaantayo unay ti aldaw inton mapukawen amin dagita​—inton malipatantayon dagita ken dinto pulos mauliten!—Basaen ti Isaias 65:16, 17.

3. Ania ti masapul nga aramidentayo ita, ken apay?

³ Narigat ti biag iti daytoy a sistema, ken mabalin a narigrigatto pay iti masanguanan. (Mat. 24:21) Nalawag a masapul nga itultuloytayo a sursuruen ti ad-adda pay nga agibtur. Apay? Gapu ta imbaga ni Jesus: “Maisalakanyonto ti biagyo no agibturkayo.” (Luc. 21:19) No panunotentayo no kasano a naibturan ti dadduma dagiti suot a kas kadagiti mapaspasarantayo, maitultuloytayo ti agibtur.

4. Apay a maikunatayo a ni Jehova ti kasayaatan nga ulidan ti panagibtur?

⁴ Asino ti kasayaatan nga ulidan ti panagibtur? Ni Jehova a Dios. Masdaawka kadi iti dayta a sungbat? Panunotem: Kontrolado ti Diablo daytoy a lubong a napnuan iti problema. Kabaelan ni Jehova a pagpatinggaen a dagus dayta. Ngem ur-urayenna ti inkeddengna nga aldaw a panangaramidna iti dayta. (Roma 9:22) Kabayatanna, agib-ibtur ti Diostayo agingga a dumteng dayta a naikeddeng a tiempo. Usigentayo ti siam nga ib-ibturan ni Jehova.

5. Kasano a malalais ti nagan ti Dios, ken ania ti mariknam iti dayta?

⁵ Ti pannakalais ti naganna. Ipatpateg ni Jehova ti naganna, ket kayatna a raemen dayta ti amin. (Isa. 42:8) Ngem agarup innem a ribun a tawen a malalais ti naimbag a naganna. (Sal. 74:10, 18, 23) Nangrugi dayta idiay hardin ti Eden idi a ti Diablo (kayatna a sawen “Manangpadakes”) inakusaranna ti Dios a papaidamanna kano da Adan ken Eva iti maysa a banag a kasapulanda tapno agbalinda a naragsak. (Gen. 3:1-5) Sipud idin, maak-akusaranen ni Jehova a papaidamanna kano dagiti tattao iti talaga a kasapulanda. Kayat ni Jesus a maalangon ti nagan ni Amana, isu nga insurona nga ikararag dagiti adalanna: “Amami nga adda iti langit, masantipikar koma ti naganmo.”​—Mat. 6:9.

6. Apay nga impalubos ni Jehova a lumabas ti umdas a tiempo sakbay a solbarenna ti isyu maipapan iti kinasoberanona?

⁶ Ti pannakabusor ti kinasoberanona. Ni Jehova laeng ti addaan iti naan-anay a kalintegan a mangituray iti langit ken daga, ket ti pamay-anna a mangituray ti kasayaatan. (Apoc. 4:11) Ngem inkagumaan ti Diablo nga allilawen dagiti anghel ken tattao tapno panunotenda a saan nga agpayso dayta. Saan nga insigida a masolbar ti isyu maipapan iti kalintegan ni Jehova a mangituray. Nainsiriban nga impalubos ti Dios ti umdas a tiempo tapno maawatan dagiti tattao a no padasenda nga iturayan ti bagida nga awan ti Namarsua, sigurado a mapaayda. (Jer. 10:23) Gapu iti panaganus ti Dios, mammaminsanto a masolbar ti isyu. Maalangonto isuna bayat a mapaneknekan a ti laeng Pagarianna ti makaipaay iti pudpudno a talna ken talged ditoy daga.

7. Siasino dagiti nagrebelde ken Jehova, ken anianto ti aramidenna kadakuada?

⁷ Ti panagrebelde ti dadduma nga annakna. Pinarsua ni Jehova dagiti annakna nga anghel ken tattao kas perpekto, nga awan a pulos ti pakapilawanda. Ngem ti rebelde nga anghel nga anakna a ni Satanas (kayatna a sawen “Manangsupiat”) kinombinsirna dagiti perpekto a tattao a da Adan ken Eva a tumallikud ken Jehova. Nagrebelde met ti dadduma pay nga anghel ken tattao. (Jud. 6) Idi agangay, uray dagiti miembro ti nasion ti Israel, ti ili a pinili ti Dios, timmallikudda kenkuana ket nagdaydayawda kadagiti ulbod a didiosen. (Isa. 63:8, 10) Natural laeng a narikna ni Jehova a naliputan isuna. Ngem agib-ibtur ken itultuloyna dayta agingga a dumteng ti tiempo a dadaelennan ti amin a rebelde. Sigurado a mabang-aran ken maragsakanto dagiti matalek kenkuana, a kaduana nga agib-ibtur iti kinadakes daytoy a sistema ti bambanag!

8-9. Ania dagiti kinaulbod a maibagbaga maipapan ken Jehova, ken ania ti maaramidtayo maipapan kadagita?

⁸ Dagiti di agbalbaliw a kinaulbod ti Diablo. Ni Satanas inakusaranna ni Job a matalek nga adipen ni Jehova. Arigna imbagana nga amin a matalek nga agdaydayaw ken Jehova ket agserserbi laeng Kenkuana gapu kadagiti managimbubukodan a rason. (Job 1:8-11; 2:3-5) Ak-akusaran pay laeng ti Diablo dagiti tattao agingga ita. (Apoc. 12:10) Mapaneknekantayo nga ulbod ni Satanas no ibturantayo dagiti suot ken agtalinaedtayo a matalek ken Jehova gapu ta ay-ayatentayo. Kas ken Job, mabendisionantayonto met gapu iti panagibturtayo.​—Sant. 5:11.

⁹ Us-usaren ni Satanas dagiti lider ti ulbod a relihion tapno paruarenda a naulpit ni Jehova ken isu kano ti makinggapuanan iti panagsagaba ti tao. Adda pay ketdi dagiti mangibaga a no matay dagiti ubbing, innala ida ti Dios gapu ta kasapulanna ti ad-adu pay nga anghel idiay langit. Nagkaro ketdin a kinaawan panagraem iti Dios! Ngem ammotayo a saan a kasta ti Dios.  No agsakittayo iti grabe wenno adda matay nga ay-ayatentayo, ditay pulos pabasolen ti Diostayo. Mamatitayo ketdi a dumtengto ti aldaw nga ilintegna ti bambanag. Mabalintayo nga ibaga kadagiti dumngeg a ti Diostayo a ni Jehova ket nadungngo. Iti kasta, adda maisungbat ni Jehova iti daydiay mangin-insulto kenkuana.​—Prov. 27:11.

10. Ania ti ipakita ti Salmo 22:23, 24 maipapan ken Jehova?

¹⁰ Ti panagsagaba dagiti ipatpategna nga adipen. Ni Jehova ket naasi a Dios. Dina kayat a mangngeg nga agsangsangittayo gapu iti panagsagaba nga ib-ibturantayo​—dayta man ket pannakaidadanes, sakit, wenno kinaimperpekto. (Basaen ti Salmo 22:23, 24.) Maawatan ni Jehova ti nasaem a marikriknatayo. Kayatna nga ikkaten dayta, ket sigurado nga aramidennanto dayta. (Idilig ti Exodo 3:7, 8; Isaias 63:9.) Asidegen ti aldaw a “punasennanto ti amin a lua kadagiti mata[tayo], ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”​—Apoc. 21:4.

11. Ania ti kailiw ni Jehova kadagiti natayen a matalek nga adipenna?

¹¹ Ti pannakaisinana kadagiti gagayyemna a natayen. Ania ti marikrikna ni Jehova kadagiti matalek a lallaki ken babbai a natayen? Kailiwna a makita manen ida! (Job 14:15) Maimadyinmo kadi ti pannakailiw ni Jehova iti gayyemna a ni Abraham? (Sant. 2:23) Wenno ni Moises, a nakasaritana iti “rupanrupa”? (Ex. 33:11) Ket sigurado a kayatna manen a mangngeg ni David ken ti dadduma pay a salmista a mangikanta iti nagpipintas a kantada a mangidaydayaw kenkuana! (Sal. 104:33) Uray no natayen dagita a gagayyem ni Jehova, saanna ida a nalipatan. (Isa. 49:15) Malagipna ti amin a detalye maipapan iti kinataoda. No ar-arigen, “sibibiagda amin iti panangmatmatna.” (Luc. 20:38, ftn.)  Addanto aldaw a pagungarenna ida, ket mangngegna manen dagiti napasnek a kararagda ket awatenna ti panagdaydayawda. No adda patpatgem a natayen, sapay koma ta dagita a sasao ti mangpalag-an iti riknam ken mangliwliwa kenka.

12. Ania ti nangnangruna a pagladingitan ni Jehova bayat dagitoy dakes a maudi nga al-aldaw?

¹² Ti panangirurumen dagiti managdakdakes iti padada a tao. Idi nangrugi ti panagrebelde idiay Eden, ammo ni Jehova a kumaro dagiti kasasaad sakbay a sumayaat dagita. Kagura ni Jehova ti kinadakes, di kinahustisia, ken kinaranggas iti lubong ita. Kanayon a maasian kadagidiay awan gawayna, a kas kadagiti ulila ken balo a babbai. (Zac. 7:9, 10) Nangnangruna a maladingitan ni Jehova no makitana a mairurrurumen ken maibalbalud dagiti matalek nga adipenna. Masiguradoyo nga ay-ayatennakayo amin, dakayo nga agib-ibtur a kas kenkuana.

13. Kasano a kumarkaro ti kinaimmoral dagiti tattao iti imatang ti Dios, ken anianto ti aramidenna iti dayta?

¹³ Ti kumarkaro a kinaimmoral dagiti tattao. Naparsua dagiti tattao iti ladawan ti Dios. Ngem maay-ayatan ni Satanas a mangimpluensia kadakuada nga agaramid iti immoralidad. Idi “nakita ni Jehova a nakaro ti kinadakes ti tao” idi kaaldawan ni Noe, “nagladingitan[na] ti panangparsuana kadagiti tattao ditoy daga, ket nasaktan ti pusona.” (Gen. 6:5, 6, 11) Simmayaat kadi dagiti kasasaad sipud idi? Sigurado a saan! Maay-ayatan la ketdi ti Diablo no makitkitana ti kinasaknap ti seksual nga immoralidad, a pakairamanan dagiti immoral nga aramid dagiti agkasekso ken saan nga agkasekso! (Efe. 4:18, 19) Nakaragragsak met ni Satanas no maimpluensiaanna nga agbasol dagidiay mangan-annurot iti pudno a panagdaydayaw. Inton agpatingga ti panaganus ni Jehova, ipakitananto a kagurana ti amin nga immoral nga aramid.

14. Ania ti ar-aramiden dagiti tattao kadagiti pinarsua ti Dios ditoy daga?

¹⁴ Ti pannakadadael dagiti parsuana. Ti tao saanna la nga ‘iturturayan ti padana a tao iti pakadangranna’ no di ket dina met ay-aywanan ti daga ken dagiti animal nga intalek kenkuana ni Jehova. (Ecl. 8:9; Gen. 1:28) Ipakpakdaar ti dadduma nga eksperto a gapu iti ar-aramiden dagiti tattao, posible a maysa pay a milion nga species * ti mapukaw iti sumaganad a tawtawen. Di pakasdaawan nga ibagbagada a madaddadaelen ti nakaparsuaan! Imbag laengen ta inkari ni Jehova a “dadaele[nna] dagidiay mangdaddadael iti daga” ket pagbalinenna a paraiso ti intero a planetatayo.​—Apoc. 11:18; Isa. 35:1.

15-16. Ania ti pakatignayantayo nga agibtur a kas ken Jehova? Iyilustrar.

¹⁵ Panunotem ti amin a makapaladingit a problema a rinibun a tawen nga ib-ibturan ti nailangitan nga Amatayo. (Kitaen ti kahon a “ Dagiti Ib-ibturan ni Jehova.”) Kabaelan ni Jehova a pagpatinggaen iti aniaman nga oras daytoy dakes a sistema ti bambanag. Ngem napaneknekan a nagsayaatantayo ti panaganusna! Panunotem daytoy nga ilustrasion. Ipapantayon a naibaga iti maysa nga agassawa a ti maisiksikog nga anakda ket adunto ti depekto ti bagina, marigatanto nga agbiag, ken nasapa a matay. Ngem gapu ta ay-ayatenda, naragsakanda idi naipasngayen ti anakda. Uray marigrigatanda nga agaywan, ti ayatda kenkuana ti nakatignayanda a mangibtur iti aniaman a rigat tapno maipaayda kenkuana ti kasayaatan a biag.

¹⁶ Umasping iti dayta, amin a kaputotan da Adan ken Eva ket saan a perpekto idi nayanakda. Ngem ay-ayaten ken ay-aywanan latta ida  ni Jehova. (1 Juan 4:19) Ken saan a kas kadagiti nagannak iti ilustrasiontayo, kabaelan ni Jehova a pagpatinggaen ti panagrigrigat dagiti annakna. Inkeddengnan ti petsa a pukawenna ti amin a problema a mangparparigat kadagiti parsuana a tattao. (Mat. 24:36) Saan kadi a ti ayatna ti mangtignay koma kadatayo nga agibtur a kas kenkuana agingga a kasapulan?

17. Kasano a makatulong kadatayo nga agibtur ti pannakailadawan ni Jesus iti Hebreo 12:2, 3?

¹⁷ Ni Jehova ti perpekto nga ulidan ti panagibtur. Tinulad ni Jesus ti panagibtur ni Amana. Idi adda ditoy daga ni Jesus kas tao, inibturanna dagiti nasakit a sasao, pannakaibabain, ken ti pagtutuokan a kayo para kadatayo. (Basaen ti Hebreo 12:2, 3.) Sigurado a ti panagibtur nga inyulidan ni Jehova ti nakatulong kenkuana nga agibtur. Dayta met ti makatulong kadatayo.

18. Kasano a matulongannatayo ti 2 Pedro 3:9 a mangtarus kadagiti nasayaat a resulta ti panaganus ni Jehova?

¹⁸ Basaen ti 2 Pedro 3:9. Ammo ni Jehova ti kasayaatan a tiempo a pagpatinggaenna daytoy dakes a lubong. Gapu iti panaganusna, maur-urnong ti dakkel a bunggoy, a minilion itan ti bilangda. Agdaydayaw ken agserserbida kenkuana. Maragragsakanda ta gapu iti nabayagen a panagibtur ni Jehova, nayanakda, nasursuroda nga ayaten isuna, ken indedikarda ti bagida kenkuana. Mapaneknekan a husto ti desision ni Jehova nga agibtur inton siraragsak a gunggonaanna ti minilion kadatayo a nakapagibtur agingga iti panungpalan!

19. Ania koma ti determinasiontayo, ken anianto ti gunggonatayo?

¹⁹ Masursurotayo ken Jehova no kasano ti agibtur a siraragsak. Iti laksid ti amin a panagladingit ken panagsagaba a pinataud ni Satanas, ni Jehova ket “naragsak [latta] a Dios.” (1 Tim. 1:11) Makapagtalinaedtayo met a naragsak no siaanus nga urayentayo ni Jehova a mangsantipikar iti naganna, mangalangon iti kinasoberanona, ken mamagpatingga iti amin a kinadakes ken amin a problematayo ita. Determinadotayo koma nga agibtur ken maliwliwa ta ammotayo nga agib-ibtur met ti nailangitan nga Amatayo. No aramidentayo dayta, pumaysonto iti tunggal maysa kadatayo dagitoy a sasao: “Naragsak ti tao nga agtultuloy nga agibtur iti pakasuotan, ta no maaprobaran awatennanto ti korona ti biag, nga inkari ni Jehova kadagidiay agtultuloy nga agayat Kenkuana.”​—Sant. 1:12.