1-2. Eme Aizaya 65:16, 17 o ta, nọ u bi fiobọhọ kẹ omai thihakọ?

UZOẸME okokohọ ubrotọ 2017 họ “Jọ Oma O Rrọ Owhẹ Hẹ!” Ma jọ okokohọ yena wuhrẹ epanọ ma sai ro thihakọ nọ ebẹbẹ i te bi te omai. Anwọ ikpe ene ena nọ ma ro kpohọ okokohọ yena, yọ rite inẹnẹ na, ebẹbẹ i gbe bi te omai evaọ akpọ omuomu nana nọ ma bi thihakọ rai.

² Ebẹbẹ vẹ i te owhẹ no kẹle na? O sae jọ nọ ohwo uviuwou ra hayo ogbẹnyusu ra jọ o whu kẹle na. O sae jẹ jọ nọ ẹyao hayo owho o be jọ owhẹ rọ ufe te ufe he. Whaọ, okpẹtu nọ a robọ so ho, ọwọsuọ, hayo ozighi ọ be wha ẹkẹ ebẹbẹ riẹ ze. A gbe du ta ha, idhọvẹ nọ ẹyao wọhọ COVID-19 ọ wha ze no! Uzẹme riẹ họ, ebẹbẹ nana kpobi i ti notọ ẹdẹ jọ, ma te gbẹ kareghẹhọ ae ofa ha. Ma be lẹ nọ jọ oke yena u te vẹrẹ!​—Se Aizaya 65:16, 17.

3. Eme o roja nọ ma re ru enẹna, kọ fikieme?

³ Ebẹbẹ e da akpọ na fia nẹnẹ. Yọ ẹsejọhọ ma te nyaku ebẹbẹ nọ i ti yoma vi enana evaọ obaro. (Mat. 24:21) Fikiere, o roja gaga re ma riẹ epanọ a re thihakọ ziezi enẹna. Jesu ọ ta nọ: “Wha te thihakọ, wha ti siwi uzuazọ rai.” (Luk 21:19) Ma te rri epanọ amọfa nọ a wo oghẹrẹ ebẹbẹ nọ ma wo na a be sai ro thihakọ, ma te sai thihakọ re.

4. Fikieme ma rọ ta nọ Jihova ọ mai thihakọ eware iyoma no?

⁴ Ono o thihakọ eware iyoma buobu no, nọ ma rẹ rọ aro kele? Jihova Ọghẹnẹ. Kọ u gbe owhẹ unu inọ Jihova? Who te roro iei ziezi, whọ te ta nọ ere o ginẹ rrọ. Ẹdhọ họ ohwo nọ o bi su akpọ na, yọ ebẹbẹ ọvo e dariẹ fia. Jihova o wo ogaga nọ ọ sai ro ku ebẹbẹ na kpobi họ obọnana. Rekọ o ri ru ere he, ukpoye o bi thihakọ hẹrẹ oke nọ o fihọ  inọ o ti ro ru ei. (Rom 9:22) Joma ta kpahe eware izii jọ nọ Jihova o bi thihakọ rai.

5. Oghẹrẹ vẹ a rọ raha odẹ Ọghẹnẹ no, kọ ẹvẹ whẹ omara who rri onana?

⁵ Odẹ riẹ nọ a be raha. Jihova ọ rẹ rọ odẹ riẹ zaharo ho, yọ ọ gwọlọ nọ ahwo kpobi a rọ adhẹẹ kẹe. (Aiz 42:8) Anwọ ikpe idu ezeza nọ i kpemu na, a raha odẹ Ọghẹnẹ gaga no. (Ol 74:10, 18, 23) Ọgbọ Idẹn onana o jọ muhọ evaọ oke nọ Ẹdhọ, koyehọ “Ohwo Ọtaraha” na ọ rọ ta nọ Ọghẹnẹ ọ be gbọ Adamu avọ Ivi oware jọ nọ o rẹ sae lẹliẹ eva were ae. (Emu 3:1-5) Anwọ oke yena ze a be rọ ta Jihova raha inọ ọ be gbọ ahwo-akpọ oware nọ o rẹ lẹliẹ eva were ae. O kẹ Jesu uye gaga inọ a be raha odẹ Ọsẹ riẹ. Fikiere o te wuhrẹ ilele riẹ nọ jọ a lẹ inọ: “Ọsẹ mai nọ ọ rrọ obọ idhiwu na, jọ odẹ ra o jọ fuafo.”​—Mat. 6:9.

6. Fikieme Jihova ọ rọ kuvẹ oke lelehie re ahwo-akpọ a su omobọ rai?

⁶ A be wọso Jihova gbe esuo riẹ. Jihova o wo udu nọ o re ro su odhiwu gbe akpọ na, yọ esuo riẹ ọ mai woma. (Evia. 4:11) Rekọ Ẹdhọ ọ bẹbẹ ikọ-odhiwu jọ gbe ahwo jọ họ bi roro nọ Ọghẹnẹ o wo udu nọ o re ro su hu. Ẹme ohwo nọ o wo udu nọ o re ro su odhiwu gbe akpọ na o rrọ oware nọ a re kuhọ asohẹrioke he. Fikiere Jihova ọ tẹ kẹ ahwo-akpọ uvẹ re a su omarai evaọ oke lelehie re a ruẹ nọ a sai su omarai hi ababọ Ọghẹnẹ. Oware areghẹ Jihova o ru na. (Jeri. 10:23) Uvẹ nọ Jihova ọ kẹ ahwo-akpọ re a su omarai yọ ọyomariẹ o bi thihakọ hẹrẹ na u ti ru nọ a te rọ riẹ ohwo nọ o gine wo udu nọ o re ro su odhiwu gbe akpọ na. Idhiwu gbe akpọ a ti vuhumu nọ Jihova ọvo họ ọnọ ọ rẹ sai su nọ udhedhẹ gbe omofọwẹ o sae rọ jọ akpọ na.

7. Amono a wọso Jihova, kọ eme o ti ru ai?

⁷ Emọ riẹ jọ a wọso ẹe. Jihova ọ ma ikọ-odhiwu gbe ahwo-akpọ gbagba evaọ oke ọsosuọ. Rekọ nọ u te oke jọ no, Setan koyehọ “Ohwo Ọwọsuọ” na ọ tẹ bẹbẹ Adamu avọ Ivi nọ a jọ gbagba na họ wọso Jihova. Ikọ-odhiwu jọ gbe ahwo-akpọ jọ a te kuomagbe ae be wọso Jihova. (Jud 6) Uwhremu na, ahwo orẹwho Izrẹl nọ Jihova ọ salọ dede a te kiukeku ei je mu emedhọ họ ẹgọ. (Aiz. 63:8, 10) Eware nana kpobi e kẹ Jihova uye gaga, rekọ o thihakọ rai. Yọ o gbe bi thihakọ bẹsenọ ọ te raha ahwo ọwọsuọ na kpobi no. Onana o te wha ufuoma se idibo riẹ nọ e be romakpotọ, enọ i bi thihakọ eyoma nana evaọ edẹ urere na.

8-9. Erue vẹ a bi gu fihọ Jihova uzou, kọ eme ma re ru kpahe iẹe?

⁸ Erue nọ Ẹdhọ o bi gu. Job yọ ohwo nọ ọ jẹ gọ Ọghẹnẹ ziezi. Rekọ Setan ọ tẹ bọwo iẹe ota, yọ ọ rọ ẹme riẹ dhesẹ nọ ohwo kpobi nọ ọ be gọ Ọghẹnẹ o bi ru ere fiki eware nọ Ọghẹnẹ o bi ru kẹe. (Job 1:8-11; 2:3-5) Setan o gbe bi gu erue fihọ ahwo uzou rite inẹnẹ. (Evia. 12:10) Nọ orọnọ ma you Jihova na, ma tẹ dadamu abọ riẹ je bi thihakọ edawọ, ma rẹ rọ ere dhesẹ nọ ẹme Setan na yọ ọrue. Ma te ru ere, Jihova ọ te ghale omai wọhọ epanọ ọ ghale Job na.​—Jem. 5:11.

⁹ Setan ọ be rọ isu egagọ erue wuhrẹ ahwo eware nọ e be lẹliẹ ai roro nọ Jihova ọ rrọ eva gaga gbe inọ ọye ọ be wha uye-oruẹ ze. Ejọ e rẹ tubẹ ta kẹ ahwo nọ ọmọ rai o whu inọ Ọghẹnẹ ọ rehọ ọmọ na kpobọ odhiwu keme ọ gbẹ gwọlọ ikọ-odhiwu. Who rri eme-aghọ nọ ahwo a be ta! U woma gaga nọ ma rọ riẹ nọ Ọghẹnẹ  ọ rrọ yoyou, ọ sai ru oware utioye he. Okpẹyao jọ o te kie omai hayo ohwo o te whu ku omai, ma rẹ ta nọ Ọghẹnẹ ọ wha riẹ ze he. Ukpoye ma riẹ nọ oke jọ u ti te nọ o ti ro si ẹyao no otọ jẹ kpare ahwo nọ a whu no ze. Ma rẹ ta kẹ ohwo kpobi nọ ọ rọwo gaviezọ inọ Jihova yọ Ọghẹnẹ nọ ọ rrọ yoyou gaga. Ma te kru ẹrọwọ mai je bi thihakọ ghelọ ebẹbẹ nọ i re te omai kpobi kẹhẹ, ọ te ruẹ ẹme kpahe kẹ ọnọ ọ be poviẹ iẹe na.​—Itẹ 27:11.

10. Eme ẹme nọ ọ rrọ Olezi 22:23, 24 o dhesẹ kpahe Jihova?

¹⁰ Uye nọ o be bẹ idibo riẹ nọ o you gaga na. Jihova ọ rẹ re ohrọ ohwo gaga. Ma tẹ be viẹ fiki uye nọ o be bẹ omai, ẹsejọhọ fikinọ a be wọso omai, ẹyao o kie omai hayo ma rọ obọ si ebẹbẹ jọ se omamai fikinọ ma gba ha, o rẹ da Jihova gaga. (Se Olezi 22:23, 24.) Ohrọ mai o be re Jihova gaga, ọ gwọlọ si ebẹbẹ kpobi notọ kẹ omai, yọ o ti ru ere. (Je rri Ọnyano 3:7, 8; Aizaya 63:9.) Oke o be tha nọ o ti “ririe irui-oviẹ kpobi no aro [mai], uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”​—Evia. 21:4.

11. Ẹvẹ egbẹnyusu Jihova nọ i whu siọ iẹe ba no na o rrọ iẹe oma?

¹¹ Egbẹnyusu riẹ nọ i whu siọ iẹe ba no. Ezae gbe eyae nọ e jọ egbẹnyusu riẹ nọ i whu siọ iẹe ba no o be dae gaga. Ọ gwọlọ kpare ae zihe ziọ uzuazọ. (Job 14:15) Ma riẹ nọ o gbẹ be da Jihova rite inẹnẹ inọ Abraham, ogbẹnyusu riẹ na o whu siọ iẹe ba no. (Jem. 2:23) Kọ Mosis who roro nọ ọ be da Jihova ha, ọnọ avọ Jihova a jẹ hae ta ẹme “ovao dhe ovao”? (Ọny. 33:11) Yọ ma riẹ nọ Jihova ọ gwọlọ nọ oke u te vẹrẹ re Devidi gbe eso-ilezi na a te so ile ujiro kẹe nọ a tẹ kparoma ze no. (Ol. 104:33) Egbẹnyusu riẹ nana a re thọrọ iẹe  ẹro ho dede nọ a whu no. (Aiz. 49:15) Ọ be kareghẹhọ oghẹrẹ nọ a jọ kpobi. Ebaibol ọ ta nọ “evaọ aro riẹ aikpobi a rrọ uzuazọ.” (Luk 20:38) Ọ te kpare ae no uwhu ze ẹdẹ jọ, a vẹ te wariẹ mu ei họ ẹgọ. Otẹrọnọ ohwo jọ o whu ku owhẹ, hai roro kpahe eware nana, oma o te sasa owhẹ.

12. Eme ọ be via evaọ edẹ urere na nọ o be kẹ Jihova uye gaga?

¹² Ahwo omuomu nọ a bi kienyẹ ahwo. Nọ Adamu avọ Ivi a veghe uzou kẹ Jihova no evaọ ọgbọ Idẹn, Jihova ọ riẹ nọ taure eware i te ti woma, i ti yoma gahọ tao. Ma riẹ nọ umuomu, okienyẹ gbe ozighi nọ ọ rrọ akpọ na nẹnẹ na o be dha Jihova eva. Notọ avọ otọ ze, Jihova ọ be hae re ohrọ ahwo nọ a wo ohwo ho, eyae-uku, gbe emọ nọ i wo ọsẹgboni hi. (Zẹk. 7:9, 10) O rẹ kẹ Jihova uye gaga nọ a te bi kienyẹ idibo riẹ je bi fi ai họ uwou-odi. Uzẹme riẹ họ, Jihova o you idibo riẹ kpobi nọ i bi thihakọ wọhọ ọyomariẹ.

13. Eware etọtọ vẹ ahwo a bi ru nẹnẹ, kọ eme Jihova o ti ru ahwo otiọna?

¹³ Uzuazọ ọfariẹ-ogbe nọ ahwo a bi yeri nẹnẹ. Setan ọ gwọlọ nọ ahwo-akpọ nọ Jihova ọ ma tho uwoho riẹ a gbe-ọfariẹ hayo ru eware etọtọ. Evaọ oke Noa, nọ Jihova ọ “ruẹ nọ umuomu ohwo-akpọ o re ruaro . . . o tẹ da Jihova nọ ọ ma ahwo fihọ otọakpọ na, yọ o kẹ riẹ uye evaọ udu.” (Emu. 6:5, 6, 11) Kọ akpọ na o woma no nẹnẹ? Vievie! Ma riẹ nọ eva e be were Ẹdhọ gaga inọ ahwo a be rọ ọfariẹ-ogbe họ nẹnẹ, te ezae nọ i bi lele ezae wezẹ, gbe eyae nọ i bi lele eyae wezẹ. (Ẹf. 4:18, 19) A gbe du ta ha epanọ eva e rẹ were Ẹdhọ te nọ odibo Jihova jọ ọ tẹ thuzi ulogbo jọ. Nọ Jihova o te thihakọ te oke nọ o fihọ no, ọ te raha ahwo omuomu na no, yọ ọ te rọ ere dhesẹ nọ eware etọtọ rai na e be dhae eva anwẹdẹ.

14. Eme ahwo a bi ru emama Ọghẹnẹ?

¹⁴ Emama Ọghẹnẹ nọ ahwo-akpọ a be raha. Ohwo-akpọ o bi “su ọrivẹ riẹ ruọ uye.” Rekọ ọ jọ etẹe serihọ họ. Ọ be jẹ raha otọakpọ na gbe erao nọ Ọghẹnẹ ọ ta nọ a rẹrote. (Ọtausi. 8:9; Emu. 1:28) Egba-eriariẹ jọ a ta nọ eware nọ ahwo-akpọ a bi ru nẹnẹ o te whae ze nọ oghoghẹrẹ erao gbe ire nọ i bu te ima ọvo e te gbẹ rọ jariẹ hẹ evaọ imikpe jọ nọ e be tha na. Agbẹta nọ otujọ a be rọ ruawa kpahe oghẹrẹ nọ ahwo a bi ru emama Ọghẹnẹ na. U woma kẹhẹ nọ Ọghẹnẹ ọ rọ ta nọ ọ te “raha enọ e be raha otọakpọ na,” o ve ti zihe otọakpọ na soso ruọ aparadase.​—Evia. 11:18; Aiz. 35:1.

15-16. Fikieme ma rẹ rọ daoma thihakọ wọhọ Jihova? Kẹ oriruo.

¹⁵ U wo eware buobu nọ Jihova o bi thihakọ rai anwọ ikpe buobu ze na. (Rri ẹkpẹti na “ Eware nọ Jihova O bi Thihakọ Rai.”) Anwọ ikpe buobu ze na, Jihova ọ hae sae raha akpọ na no. Rekọ o ru ere he. Ukpoye o bi thihakọ, yọ ithihakọ riẹ na o wha irere buobu ze no. Joma kẹ oriruo jọ. Ma rehọ iẹe nọ aye jọ o dihọ. Edọkita ọ tẹ ta kẹ aye na avọ ọzae riẹ nọ ọmọ nọ a dieva riẹ họ na o wo oghẹrẹ ẹyao jọ. Ọ ta nọ a tẹ maki yẹi ze dede, ọ te sai ru oware ovo kẹ omobọ riẹ hẹ nọ ọ be te rro ze na, yọ o ti kri ewhu hu. O make rrọ ere na, eva e were ọsẹgboni na nọ a yẹ ọmọ na no dede nọ a riẹ nọ a te ruẹ uye taso tuvo re a sae rẹrotei. Fikinọ a you ọmọ na, a te bi ru oware kpobi re a rẹrotei dede nọ o lọhọ kẹ ae he.

¹⁶ Ere ọvona re, a yẹ omai emọ Adamu avọ Ivi kpobi avọ uzioraha. Ma gba ha, ghele na, Jihova o you omai yọ ọ be  rẹrote omai. (1 Jọn 4:19) Whaọ Jihova o wo ohẹriẹ no ọzae-avọ-aye nọ ma rọ kẹ oriruo na. O wo ogaga nọ ọ sai ro si uzioraha notọ riẹriẹriẹ. O fi ẹdẹ họ no nọ o ti ro si uye kpobi notọ kẹ ahwo-akpọ. (Mat. 24:36) Ma rẹ daoma thihakọ ebẹbẹ nọ i bi te omai nẹnẹ na keme ma riẹ nọ Jihova o you omai yọ o ti ru oware jọ kpahe ae.

17. Ẹvẹ oware nọ Ahwo Hibru 12:2, 3 o ta kpahe Jesu o sai ro fiobọhọ kẹ omai thihakọ?

¹⁷ Jihova o thihakọ eware buobu no. Jesu ọ rọ aro kele Ọsẹ riẹ thihakọ eware buobu no re. Oke nọ ọ jọ otọakpọ, a la riẹ eka, a kpomovuọ họ iẹe oma, a te je kpei evaọ ure-oja. O thihakọ eware nana kpobi fiki mai. (Se Ahwo Hibru 12:2, 3.) Jihova ọye Jesu ọ rọ aro kele nọ ọ sai ro thihakọ eware nana kpobi. Epọvo na re, ma te roro te eware nọ Jihova o thihakọ rai no, u re fiobọhọ kẹ omai thihakọ ebẹbẹ nọ i bi te omai.

18. Eme o rrọ 2 Pita 3:9 nọ u dhesẹ nọ u woma gaga nọ Jihova o bi ro thihakọ?

¹⁸ Se 2 Pita 3:9. Jihova ọ riẹ oke nọ o mai woma nọ ọ te rọ raha akpọ na. Fikinọ Jihova o bi thihakọ anwẹdẹ ze na, ima ahwo buobu a kurẹriẹ ze no jẹ be gọe. O hae jọ nọ Jihova ọ raha akpọ na no anwẹdẹ, a hae te sai yẹ omai hi, ma hae te sai wuhrẹ kpahe iẹe he, yọ ma hae te sae gọe he. Nọ Jihova ọ te ghale omai enọ i thihakọ te urere evaọ obaro, ma te ruẹ nọ u woma gaga nọ ọ gbẹ rọ raha akpọ na no anwẹdẹ hẹ.

19. Eme ma rẹ gbaemu nọ ma re ru, kọ erere vẹ ma ti wo?

¹⁹ Ma wuhrẹ mi Jihova nọ ma tẹ be maki thihakọ, eva e rẹ were omai. Keme ghelọ eghughu ebẹbẹ nọ Setan ọ wha ze nọ Jihova o bi thihakọ rai na, Jihova ọ gbẹ rrọ “Ọghẹnẹ evawere na” ghele. (1 Tim. 1:11) Jọ eva e were omai nọ ma bi thihakọ hẹrẹ oke nọ Jihova o ti ro ru odẹ riẹ fo, dhesẹ nọ esuo riẹ ọ mai woma, si emuemu kpobi notọ, je ti ku ebẹbẹ na kpobi họ. Joma hae kareghẹhọ nọ mai ọvo ma bi thihakọ họ. Jihova Ọsẹ obọ odhiwu mai o bi thihakọ re. Ajọ onana o bọ omai ga re ma gbaemu nọ ma re thihakọ te urere. Ma te ru ere, ẹme Jemis nana o ti rugba evaọ omamai, nọ ọ ta nọ: “Eva e were ohwo nọ ọ ruabọhọ bi thihakọ odawọ, keme nọ Ọghẹnẹ o te kuenu kẹe no, o ti wo etu-uvie uzuazọ, onọ Jihova ọ ya eyaa nọ ọ te kẹ enọ i you Rie te urere.”​—Jem. 1:12.