1-2. Tɔm ndʋ Yehowa yɔɔdɩ Izaayii 65:16, 17 taa yɔ, ɛzɩma tɩkpazɩɣ-ɖʋ ɖoŋ se ɖɩtaalɔ lidaʋ?

“TAALƆ LIDAƲ!” kaakɛnɩ 2017 kigbeɣluu sɔsɔʋ ɖʋtʋ tɔm ñʋʋ; nɛ tɔm ñʋʋ ŋgʋ kiseɣtiɣ ɛyʋ siŋŋ. Kigbeɣluu ŋgʋ, kɩɩwɩlɩ-ɖʋ ɛzɩma ɖɩpɩzɩɣ nɛ ɖɩɖɔkɩ ɖa-laŋa alɩwaatʋ ndʋ ɖɩkatɩɣ kala yɔ. Ðɩlabʋ Kigbeɣluu ŋgʋ yɔ, pɩtɛm labʋ pɩnzɩ naanza, nɛ halɩ nɛ sɔnɔ ɖɩwɛɛ nɛ ɖɩɖɔkʋʋ ɖa-laŋa ɛjaɖɛ kɩdɛkɛdɩyɛ ɖɩnɛ ɖɩ-taa.

² Pitileɖi yɔ kala wena ŋkataa? Ŋlesi ñɔ-hɔʋ taa tʋ nɔɔyʋ yaa ña-taabalʋ kʋsɔɔlʋ nɔɔyʋ? Ŋhɩnɩ kʋdɔŋ ŋgʋ kɩpɩzɩɣ nɛ kɩkɔnɩ-ŋ sɩm yɔ? Ŋwɛɛ nɛ ŋkatɩɣ kala mbʋ pʋyɔɔ yɔ ŋwɛɛ nɛ ŋkpadɩyɩɣ? Asɛyʋʋ nakʋyʋ talɩ-ŋ yaa palabɩ-ŋ puuyaɣ lakasɩ nasɩyɩ yaa ŋkatɩ nazɩm nabʋyʋ? COVID-19 kʋdɔŋ yaa kʋdɔŋ nakʋyʋ yeba nɛ ŋnɩɣ siziŋ na? Pɩtʋʋ fɛyɩ se ɖɩɖaŋ kɩyakʋ ŋgʋ wɛtʋ ndʋ tɩkaɣ pɩsʋʋ ɖa-wayɩ tɔm, nɛ ɖɩɩkaɣ tasʋʋ tɔzʋʋ tɩ-yɔɔ, nɛ tɩɩkaɣ tasʋʋ labʋ wiɖiyi kpa yɔ!—Kalɩ Izaayii 65:16, 17.

3. Ɛbɛ pɩwɛɛ se ɖɩla lɛɛlɛɛyɔ, nɛ ɛbɛ yɔɔ?

³ Wezuu caɣʋ wɛ kaɖɛ ɛjaɖɛ kɩdɛkɛdɩyɛ ɖɩnɛ ɖɩ-taa, nɛ pɩtɩla cee wayɩ ɖɩkaɣ katʋʋ kala nɛ pɩkpaɖɩ mbʋ. (Mat. 24:21) Ye mbʋ, pɩpɔzʋʋ se ɖiwolo pɩ-yɔɔ nɛ ɖɩkpɛlɩkɩɣ ɛzɩma ɖɩɖɔkɩ ɖa-laŋɩyɛ nɛ pɩkpaɖɩ yɔ. Ɛbɛ yɔɔ? Mbʋ pʋyɔɔ yɔ Yesu yɔɔdaa se: “Ye ɩɖɔkɩ mɩ-laŋa yɔ, ɩkaɣ yabʋ mi-weziŋ ñʋʋ.” (Luka 21:19) Ɛyaa lalaa wɛɛ nɛ pɔɖɔkʋʋ pa-laŋa kala wena anɩɣzɩnɩ ɖa-ñɩna yɔ a-taa. Ye ɖɩmaɣzɩɣ ɛzɩma pɔɖɔkʋʋ pa-laŋa yɔ pɩ-yɔɔ yɔ, ɖɩkaɣ pɩzʋʋ nɛ ɖɩɖɔkɩ ɖa-laŋa nɛ pɩkpaɖɩ.

4. Ɛbɛ yɔɔ ɖɩpɩzɩɣ nɛ ɖɩyɔɔdɩ se Yehowa hanɩ laŋɩyɛ ɖɔkʋʋ kɩɖaʋ ŋgʋ kɩkpaɖaa yɔ?

⁴ Aha-ɖʋ laŋɩyɛ ɖɔkʋʋ kɩɖaʋ ŋgʋ kɩkpaɖaa yɔ? Ɛsɔ Yehowa. Tɔm cosuu pʋnɛ pɩɖɩɣzɩɣ-ŋ yaa we? Pʋtɔma yɔ pɩɖɩɣzɩ-ŋ, ɛlɛ ye ŋmaɣzɩ pɩ-yɔɔ yɔ, pɩɩɖɩɣzɩɣ-ŋ. Ɛjaɖɛ ɖɩnɛ, Eleeu ɖiyiɣni-ɖɩ, nɛ ɖɩ-taa suni kala. Yehowa wɛnɩ ɖoŋ se ɛɖɩzɩ ɛjaɖɛ ɖɩnɛ kpaagbaa,  ɛlɛ ɛwɛɛ nɛ ɛɖaŋɩɣ cee wayɩ kɩyakʋ nakʋyʋ se ɛla mbʋ. (Roma 9:22) Ɛlɛ lɛɛlɛɛyɔ lɛ, ɖɛ-Ɛsɔ wɛɛ nɛ ɛɖɔkʋʋ ɛ-laŋɩyɛ se alɩwaatʋ ndʋ ɛɖʋwa yɔ tɩtalɩ. Iyele nɛ ɖɩna wɛtʋ nakʋ ndʋ tɩ-taa Yehowa wɛɛ nɛ ɛɖɔkʋʋ ɛ-laŋɩyɛ yɔ.

5. (a) Ɛzɩma pepisi Ɛsɔ hɩɖɛ? (b) Nɛ ŋmaɣzɩɣ pɩ-yɔɔ lɛ ɛzɩma pɩlakɩ-ŋ?

⁵ Pepisi Ɛsɔ hɩɖɛ. Yehowa sɔɔlɩ ɛ-hɩɖɛ, nɛ ɛñɩnɩɣ se paa weyi lɛ, ɛwɛɛnɩ ñamtʋ ɖɩ-yɔɔ. Bibl yɔɔdʋʋ se: “Ma yɔ [Yehowa]; ma-hɩɖɛ lɛ; nɛ maakaɣ mon-ɖoŋ haʋ nɔɔyʋ nɛ man-samtʋ sɩʋ kpelisi.” (Iza. 42:8) Ɛlɛ pɩlakɩ pɩnzɩ 6 000 mbʋ yɔ, pɛwɛʋ nɛ pepisiɣ ɛ-hɩɖɛ kɩbanɖɛ nɖɩ yɔ. (Keɣa 73:10, 18, 23) Edɛɛnɩ kaɖaɣ taa pɩpaɣzaa, alɩwaatʋ ndʋ Eleeu (pʋ-tɔbʋʋ se “Kɔlɔmɔtʋ tʋ”) kʋyɩ Ɛsɔ yɔɔ se ɛwɛɛ nɛ ɛpɛŋ Aɖam nɛ Ɛva mbʋ pɩpɔzʋʋ-wɛ se pɛwɛɛ koboyaɣ taa yɔ. (Kiɖe 3:1-5) Kpaɣnɩ alɩwaatʋ ndʋ lɛ, pɛwɛɛ nɛ pɛcɛtɩɣnɩ Yehowa taa se ɛwɛɛ nɛ ɛpɛŋ ɛyaa mbʋ ɖeyi ɖeyi pɩpɔzʋʋ-wɛ yɔ. Pɩɩcɛyɩ Yesu se pɛwɛɛ nɛ pepisiɣ ɛ-Caa hɩɖɛ. Pʋyɔɔ Yesu wɩlɩ ɛ-tɔmkpɛlɩkɩyaa se patɩmɩ se: “Ða-Caa ña weyi ŋwɛ ɛsɔdaa yɔ, ña-hɩɖɛ yɔɔ ɛñalɩ.”—Mat. 6:9.

6. Ɛbɛ yɔɔ Yehowa yeba se alɩwaatʋ sakɩyɛ ɛɖɛɛ pʋcɔ nɛ ɛcɔnɩ e-kewiyitu kɩkɩlɩtʋ tɔɔʋ tɔm ɖeɖe?

⁶ Pakaɖɩnɩ Ɛsɔ kewiyitu kɩkɩlɩtʋ tɔɔʋ. Yehowa ɖeke wɛnɩnɩ waɖɛ se ɛtɔɔ kewiyitu ɛsɔdaa nɛ tataa, nɛ ɛzɩma ɛtɔkɩ kewiyitu yɔ mbʋ kɩlɩnɩ ɖeu. (Natʋ 4:11) Ɛlɛ Eleeu ñaɣ pana nɛ epeɣzi Ɛsɔ tiyiyaa nɛ ɛyaa nɛ eyele nɛ pamaɣzɩ se Ɛsɔ fɛyɩnɩ waɖɛ nɖɩ. Pʋcɔ nɛ pɩna kaɣlaa se Yehowa mʋnɩna se ɛtɔɔ kewiyitu kɩkɩlɩtʋ lɛ, pɩpɔzʋʋ alɩwaatʋ sakɩyɛ. Ye mbʋ, pɩkɛnɩ lɔŋsɩnɖɛ se Ɛsɔ yebi ɛyaa se pɔtɔɔ kewiyitu alɩwaatʋ sakɩyɛ, se pɩsa nɛ papɩzɩ pana se paapɩzɩɣ nɛ pɔtɔɔ kewiyitu pa-maɣmaɣ nɛ piɖeni-wɛ ye paawelisiɣni pa-Lɩzɩyʋ yɔ. (Yer. 10:23) Ɛsɔ ɖʋʋ suuɖu yɔ, pɩkaɣ yebu nɛ pɔcɔnɩ tɔm ndʋ ti-ɖeɖe tam kʋɖʋm nɛ pɩla se pɩtɛma. Nɛ paa weyi ɛkaɣ tɩlʋʋ se ɛzɩma Yehowa tɔkɩ kewiyitu yɔ mbʋ kpaɖɩnɩ ɖeu, nɛ e-Kewiyaɣ ɖeke kaɣnɩ kɔnʋʋ laŋhɛzɩyɛ nɛ pɛɛyɛ siŋŋ tɛtʋ yɔɔ.

7. (a) Mba kʋyaa nɛ pakaɖɩnɩ Yehowa? (b) Nɛ ɛbɛ Yehowa kaɣ-wɛ labʋ?

⁷ Ɛsɔ piya nasɩyɩ kaɖɩnɩ-ɩ. Alɩwaatʋ ndʋ Yehowa lɩzɩ Ɛsɔ tiyiyaa nɛ ɛyaa yɔ, paatalɩ pilim. Ɛlɛ pʋwayɩ lɛ, Ɛsɔ tiyiyaa taa nɔɔyʋ pɩsɩ Sataŋ (pʋ-tɔbʋʋ se “Koyindu”) nɛ epeɣzi Aɖam nɛ Ɛva nɛ pakaɖɩnɩ Yehowa. Aɖam nɛ Ɛva paatalɩ pilim. Ɛsɔ tiyiyaa nabɛyɛ nɛ ɛyaa nabɛyɛ sɔzɩ pɔ-yɔɔ nɛ pakaɖɩnɩ Ɛsɔ. (Yud. 6) Pʋwayɩ lɛ, halɩ Izrayɛɛlɩ samaɣ ŋga Ɛsɔ lɩzɩ ɛ-tɩ yɔ, kekizi-i nɛ kapaɣzɩ sɛʋ cɛtɩm ɛsɔnaa. (Iza. 63:8, 10) Yehowa maɣzaa se palɩ ɛ-wayɩ nɛ ɛɛwɛnɩ toovenim se ɛmaɣzɩ mbʋ. Ɛlɛ ɛɖɔkɩ ɛ-laŋɩyɛ, nɛ ɛkaɣ wobu pɩ-yɔɔ nɛ ɛɖɔkɩ-ɖɩ, pɩkɔɔ pɩtalɩ alɩwaatʋ ndʋ ɛɖʋwa se ɛɖɩzɩɣ kaañamtʋ tɩnaa mba pa-tɩŋa yɔ. Ðɩnɛ ɛlɛ, Yehowa nɛ mba pɔɖɔkɩ pe-siɣsiɣ wɛtʋ ɛ-ɛsɩndaa yɔ, pa-taa kaɣ labʋ leleŋ se pɩɩkaɣ tasʋʋ pɔzʋʋ se pɔɖɔkɩ pa-laŋa wɛtʋ kɩdɛkɛdɩtʋ ndʋ tɩwɛ ɛjaɖɛ kɩdɛkɛdɩyɛ ɖɩnɛ ɖɩ-taa yɔ tɩ-taa!

8-9. (a) Cɛtɩm tɔm ndʋ pɛwɛɛ nɛ pɔyɔɔdʋʋ Yehowa yɔɔ? (b) Nɛ ɛbɛ ɖɩpɩzɩɣ nɛ ɖɩla?

⁸ Eleeu cɛtɩm tɔm. Sataŋ kʋyɩ Yɔɔb nɛ Yehowa sɛyaa siɣsiɣ tɩnaa lalaa tɩŋa yɔɔ se piɖeni men-ɖeke lɩmaɣza yɔɔ pɛsɛɣ Ɛsɔ. (Yɔɔb 1:8-11; 2:3-5) Eleeu wobi pɩ-yɔɔ nɛ ɛkʋyʋʋ ɛyaa yɔɔ halɩ nɛ sɔnɔ. (Natʋ 12:10) Ðɩpɩzɩɣ nɛ ɖɩɖʋ nesi nɛ ɖɩwɩlɩ se Sataŋ kɛ cɛtɩyʋ, ye ɖɩsɔɔlɩ Yehowa nɛ sɔɔlɩm mbʋ piseɣtiɣ-ɖʋ se ɖɩɖɔkɩ ɖa-laŋa kala taa nɛ ɖɩtɛ ɖɩɖɔkɩ ɖe-siɣsiɣ wɛtʋ ɛ-ɛsɩndaa yɔ. Yehowa wazɩ Yɔɔb, nɛ ɛkaɣ ɖa ɖɔɖɔ wazʋʋ ye ɖɩɖɔkɩ ɖa-laŋa yɔ.—Yak. 5:11.

⁹ Sataŋ tɩŋɩɣnɩ cɛtɩm Ɛsɔ sɛtʋ ñʋndɩnaa yɔɔ nɛ ɛwɩlɩɣ se Yehowa kɛ kañatʋ tʋ nɛ  ɛnʋ yekina nɛ ɛyaa tɔkɩ kʋñɔmɩŋ. Halɩ nabɛyɛ yɔɔdʋʋ se alɩwaatʋ ndʋ piya sɩkɩ yɔ, Ɛsɔ kpakɩɣnɩ-sɩ mbʋ pʋyɔɔ yɔ pɩpɔzʋʋ-ɩ tiyiyaa sakɩyɛ ɛsɔdaa nɛ pɩkpaɖɩ. Pɩkɛnɩ Ɛsɔ tʋtʋ sɔsɔtʋ siŋŋ! Ɛlɛ ɖɩnawa se Yehowa kɛ Caja sɔɔlɩm tʋ. Alɩwaatʋ ndʋ ɖɩtɔlʋʋ kʋdɔŋ sɔsɔʋ nakʋyʋ yaa alɩwaatʋ ndʋ ɖɛ-ɛyʋ kʋsɔɔlʋ nɔɔyʋ sɩkɩ yɔ, ɖɩɩyɔɔdʋʋ kpa se Ɛsɔ cɔlɔ pɩlɩnaa. Ɛlɛ ɖɩwɛnɩ tisuu se wiɖiyi ɛkaɣ waʋ kʋdɔndɩnaa nɛ efezi sɩɖaa. Ðɩpɩzɩɣ nɛ ɖiheyi mba payɩ pɔsɔɔlaa se pewelisini-ɖʋ yɔ se Yehowa kɛ Ɛsɔ sɔɔlɩm tʋ. Ye ɖɩlabɩ mbʋ yɔ, piyeki se Yehowa ecosi weyi ɛtʋʋ-ɩ yɔ.—Adu. 27:11.

10. Tɔm ndʋ Keɣa 21:24, 25 heyiɣ-ɖʋ Yehowa yɔɔ?

¹⁰ Ɛ-sɛyaa mba ɛsɔɔlɩ-wɛ yɔ pa-kʋñɔmɩŋ. Yehowa kɛ Ɛsɔ pʋtɔdɩyɛ nayʋ. Alɩwaatʋ ndʋ ɛnaɣ kʋñɔmɩŋ weyi nazɩm, kʋdɔŋ, yaa ɖɛ-ɛjandʋ yeki nɛ ɖɩtɔkɩ yɔ lɛ, ɛwɛɣ laŋwɛɛkɩyɛ taa siŋŋ. (Kalɩ Keɣa 21:24, 25.) Yehowa nɩɣ ɖe-siziŋ; ɛsɔɔlaa se eyele nɛ ɩsɩɩ tɩnaɣ, nɛ ɛkaɣ yebu nɛ ɩsɩɩ tɩnaɣ. (Kpaɣ tʋ nɛ ŋmaɣzɩnɩ Ejipiti Lɩʋ 3:7, 8; Izaayii 63:9.) Kɩyakʋ nakʋyʋ kaɣ kɔm, nɛ puwiye lɛ, “ɛkaɣ hɩzʋʋ ɛsɩtɛɣlɩm kpeekpe [ɖɛ-ɛsɩndaa], nɛ sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.”—Natʋ 21:4.

11. Yehowa maɣzɩɣ ɛ-sɛyaa siɣsiɣ tɩnaa mba pasɩba yɔ pɔ-yɔɔ lɛ, ɛzɩma pɩlakɩ-ɩ?

¹¹ Ɛsɔ taabalaa sɩm. Yehowa maɣzɩɣ abalaa nɛ halaa siɣsiɣ tɩnaa mba pasɩba yɔ pɔ-yɔɔ lɛ, ɛzɩma pɩlakɩ-ɩ? E-liu wɛɛ kpem se ɛtasɩ-wɛ naʋ! (Yɔɔb 14:15) Maɣzɩ nɛ ŋna ɛzɩma Yehowa sɔɔlaa kpem se ɛtasɩ naʋ ɛ-taabalʋ Abraham yɔ! (Yak. 2:23) Yaa maɣzɩ nɛ ŋna ɛzɩma Yehowa sɔɔlaa kpem se ɛtasɩ yɔɔdɩnʋʋ Moyizi weyi ɛyɔɔdaɣnɩ-ɩ ‘ɛ-ɛsɩndaa yɔ’! (Ejl. 33:11) Nɛ ɛzɩma ɛɖaŋ kpam se ewelisi hendu kɩbandʋ ndʋ Daviid nɛ keɣsi maɖaa lalaa peteɣaɣ nɛ pɛɖɛyɩɣnɩ-ɩ yɔ! (Keɣa 103:33) Paa Yehowa taabalaa mba, pɛwɛɛ nɛ poɖou sɩm  taa yɔ, ɛtɩsɔɔ pɔ-yɔɔ. (Iza. 49:15) Ɛtɔzʋʋ ɛyʋtʋ ndʋ paawɛna yɔ tɩ-tɩŋa tɩ-yɔɔ tete. Bibl yɔɔdʋʋ se: “Ɛ-ɛsɩndaa lɛ, pa-tɩŋa payɩ pɛwɛ wezuu.” (Luka 20:38) Wiɖiyi ɛkaɣ-wɛ fezuu, nɛ ɛkaɣ tasʋʋ welisuu adɩma wena palakɩ-ɩ nɛ pa-laŋɩyɛ pilim yɔ nɛ ɛmʋ pɛ-sɛtʋ. Ye ñɛ-ɛyʋ kʋsɔɔlʋ nɔɔyʋ ɛsɩba yɔ, tɔm tʋnɛ tɩpɩzɩɣ nɛ tɩhɛzɩ ña-laŋɩyɛ.

12. Ɛjaɖɛ kɩdɛkɛdɩyɛ ɖɩnɛ ɖɩ-kɛdɛzaɣ kɩyakɩŋ ɩnɛ ɩ-taa, ɛbɛ yeki nɛ Yehowa wɛɣ laŋwɛɛkɩyɛ taa siŋŋ?

¹² Ɛzɩma ɛyaa kɩdɛkɛdaa nazɩɣ ɛyaa lalaa yɔ. Alɩwaatʋ ndʋ pakaɖɩnɩ Yehowa Edɛɛnɩ kaɖaɣ taa yɔ, ɛɛnawa se ɛjaɖɛ yɔɔ wɛtʋ kaɣ wɛɛkʋʋ wɛɛkʋʋ yɔɔ pʋcɔ nɛ pɩɩkɔɔ nɛ pɩñɔɔzɩ. Yehowa paɖɩɣ kañatʋ lakasɩ, mulum lakasɩ nɛ puuyaɣ lakasɩ nzɩ sɩwɛ ɛjaɖɛ yɔɔ sɔnɔ yɔ. Paa ɛzɩmtaa lɛ, Yehowa maɣzɩɣ mba pɛkɛ ajamaa siŋŋ yɔ pɔ-yɔɔ, pʋ-tɔbʋʋ se mba paapɩzɩɣ nɛ pakandɩyɩ pa-tɩ yɔɔ yɔ; pa-taa nabɛyɛ lɛ solisi nɛ lelaa. (Zek. 7:9, 10) Kɔzɩ kɔzɩ lɛ, alɩwaatʋ ndʋ Yehowa naɣ pɛwɛɛ nɛ panazɩɣ ɛ-sɛyaa siɣsiɣ tɩnaa nɛ pɛwɛ salaka taa yɔ, ɛnɩɣ siziŋ siŋŋ. Ña-taa ɛtɛ se ɛsɔɔlɩ mba payɩ pɛwɛɛ nɛ pɔɖɔkʋʋ pa-laŋa ɛzɩ ɛnʋ yɔ.

13. (a) Kʋzɔɔtʋ lakasɩ nzɩ Ɛsɔ naɣ ɛyaa hɛkʋ taa? (b) Nɛ ɛbɛ ɛkaɣ labʋ?

¹³ Kʋzʋʋ kɩdɛkɛdʋʋ wezuu caɣʋ wɛɛ nɛ pɩtɛzɩɣ tɔyʋʋ. Ɛsɔ lɩzɩ ɛyaa se pamaɣzɩnɩ-ɩ, ɛlɛ Sataŋ sɔɔlaa se etuyi-wɛ nɛ pacaɣ wezuu kɩdɛkɛdʋʋ. Noowa alɩwaatʋ taa Yehowa nawa se “ɛyʋ kañatʋ paɣlɩ tataa” lɛ, ekpiɖi “se ɛɛnawa ɛtaalɩzɩ ɛyʋ tɛtʋ yɔɔ, nɛ pɩwɩzɩ ɛ-taa.” (Kiɖe 6:5, 6, 11) Kpaɣnɩ alɩwaatʋ ndʋ lɛ, ɛzɩ ɛjaɖɛ yɔɔ wɛtʋ ñɔɔzaa? Aayɩ pɩtɩñɔɔzɩ! Sataŋ taa lakɩ leleŋ siŋŋ alɩwaatʋ ndʋ ɛnaɣ kʋzʋʋ kɩdɛkɛdʋʋ wezuu caɣʋ lakasɩ ndɩ ndɩ yɔ. Lakasɩ nzɩ sɩ-taa nasɩyɩ yɔ: Mba patɩkaa kʋzʋʋ piliŋa nɛ mba paka kʋzʋʋ piliŋa yɔ pacakɩ kʋzʋʋ kɩdɛkɛdʋʋ wezuu! (Efɛz. 4:18, 19) Sataŋ taa lakɩ leleŋ siŋŋ alɩwaatʋ ndʋ ɛyaa mba pɛsɛɣ Yehowa yɔ palakɩ kɩdɛkɛdɩm sɔsɔm nabʋyʋ yɔ. Alɩwaatʋ ndʋ Yehowa suuɖu ɖʋʋ talɩɣ tɩnaɣ yɔɔ yɔ, ɛkaɣ ɖɩzʋʋ ɛyaa mba payɩ pacakɩ kʋzʋʋ kɩdɛkɛdʋʋ wezuu nɛ pekiziɣ se paalɛɣzɩɣ yɔ nɛ ɛwɩlɩ se ɛpaɖɩɣ lakasɩ nzɩ siŋŋ.

14. Ɛbɛ ɛyaa wɛɛ nɛ palakɩ tɛtʋ nɛ kpɩna?

¹⁴ Ɛyaa wɛɛ nɛ pɛwɛɛkɩɣ mbʋ Ɛsɔ lɩzaa yɔ. Pɩtasɩna se “ɛyʋ ñazɩɣ ɛyʋ nɛ ɛwɩlɩɣ-ɩ kʋñɔŋ” lɛ, ɛwɛɛ nɛ ɛwɛɛkɩɣ tɛtʋ nɛ ɛkɔŋnɩ ɖɔɖɔ kaɖɛ kpɩna wena Yehowa ɖʋzɩ ɛyʋ nesi tɛɛ se ɛcɔnɩ a-yɔɔ yɔ. (Ekl. 8:9; Kiɖe 1:28) Lɔŋsɩnɖaa nabɛyɛ yɔɔdʋʋ se ɛyaa tʋma kaɣ yebu se pɩnzɩ pazɩ nzɩ sɩkɔŋ yɔ sɩ-taa, wondu kɩlɩzɩtʋ ndɩ ndɩ miiliyɔɔ kʋɖʋmʋʋ ɛɖɩ tɛtʋ yɔɔ. Ye mbʋ, ɛyaa yɔɔdʋʋ se mbʋ pɩwɛ tɛtʋ yɔɔ yɔ pɩwɛ kaɖɛ taa yɔ, pɩtɩkɛ piti tɔm. Pɩlabɩ ɖeu se Yehowa yɔɔdaa se ɛkaɣ ‘ɖɩzʋʋ mba pɛwɛɛkɩɣ tɛtʋ yɔ’ nɛ eyele nɛ tɛtʋ pɩsɩ paradisuu.—Natʋ 11:18; Iza. 35:1.

15-16. Ɛbɛ pɩwɛɛ se piseɣti-ɖʋ nɛ ɖɩɖɔkɩ ɖa-laŋa ɛzɩ Yehowa yɔ? Ha kɩɖaʋ nakʋyʋ.

¹⁵ Maɣzɩ kaɖɛ wɛtʋ ndʋ tɩ-tɩŋa tɩ-taa ɖa-Caa kʋsɔɔlʋ Yehowa wɛɛ nɛ ɛɖɔkʋʋ ɛ-laŋɩyɛ pɩnzɩ kudokiŋ sakɩyɛ yɔ tɩ-yɔɔ nɛ ŋna. (Kalɩ aɖakaɣ “ Wɛtʋ ndʋ tɩ-taa Yehowa wɛɛ nɛ ɛɖɔkʋʋ ɛ-laŋɩyɛ yɔ.”) Yehowa pɩzɩɣ nɛ ɛɖɩzɩ ɛjaɖɛ kɩdɛkɛdɩyɛ ɖɩnɛ paa alɩwaatʋ ndʋ tɩ-yɔɔ, ɛlɛ e-suuɖu ɖʋʋ wɛɛ nɛ pɩwazɩɣ-ɖʋ. Maɣzɩ kɩɖaʋ kʋnɛ kɩ-yɔɔ nɛ ŋna. Ðɩkpaɣ se peheyi abalʋ nɔɔyʋ nɛ ɛ-halʋ se pɩɣa ŋga pakaɣ-kɛ lʋlʋʋ yɔ, kakaɣ hɩnʋʋ kʋdɔmɩŋ sɔsɔŋ ndɩ ndɩ nɛ pɩɣa ŋga, wezuu caɣʋ kaɣ-kɛ labʋ kaɖɛ kpem; nɛ kakaɣ sɩbʋ lɔŋ. Paa pɩkaɣ-wɛ labʋ kaɖɛ siŋŋ se pɔcɔnɩ pɩɣa ŋga kɔ-yɔɔ yɔ, pa-taa kaɣ labʋ leleŋ alɩwaatʋ ndʋ palʋlʋʋ-kɛ yɔ. Ɛzɩma pɔsɔɔlɩ pa-pɩɣa ŋga yɔ pʋyɔɔ lɛ, pakaɣ ɖɔkʋʋ pa-laŋa paa kaɖɛ nɖɩ lɛ ɖɩ-taa se pɩsa nɛ pasɩnɩ-kɛ nɛ piɖeni-kɛ ke-wezuu caɣʋ taa.

¹⁶ Mbʋ ɖɔɖɔ pɩwɛ Aɖam nɛ Ɛva lʋlʋʋ taa  mba tɩŋa hɔɔlʋʋ taa. Palʋlʋʋ-wɛ lɛ, pɛkɛ ɛyaa mantɩtalɩ pilimwaa. Paa mbʋ yɔ, Yehowa sɔɔlɩ-wɛ nɛ ɛcɔŋnɩ pɔ-yɔɔ. (1 Yoh. 4:19) Ɛlɛ Yehowa wɛ ndɩ nɛ lʋlɩyaa mba pɔ-tɔm ɖɩyɔɔdɩ kɩɖaʋ taa yɔ, mbʋ pʋyɔɔ yɔ ɛpɩzɩɣ eyele nɛ kʋñɔmɩŋ weyi e-piya tɔkɩ yɔ, ɩsɩɩ tɩnaɣ. Ɛɖʋ alɩwaatʋ ndʋ tɩ-yɔɔ ɛkaɣ yebu nɛ ɛyaa kʋñɔmɩŋ tɩŋa sɩɩ tɩnaɣ yɔ. (Mat. 24:36) Pɩwɛɛ se Yehowa sɔɔlɩm eseɣti-ɖʋ nɛ ɖa ɖɔɖɔ ɖɩɖɔkɩ ɖa-laŋa alɩwaatʋ ndʋ payɩ pɩpɔzʋʋ se ɖɩla mbʋ yɔ.

17. Yesu yɔɔ tɔm ndʋ pɔyɔɔdɩ Ebree mba 12:2, 3 taa yɔ, ɛzɩma tɩkpazɩɣ-ɖʋ ɖoŋ se ɖiwolo pɩ-yɔɔ nɛ ɖɩɖɔkʋʋ ɖa-laŋɩyɛ?

¹⁷ Yehowa hanɩ laŋɩyɛ ɖɔkʋʋ kɩɖaʋ ŋgʋ kɩtalɩ pilim yɔ. Yesu pɩzaa nɛ ɛmaɣzɩnɩ ɛ-Caa laŋɩyɛ ɖɔkʋʋ. Alɩwaatʋ ndʋ Yesu kaakɛ ɛyʋ tɛtʋ yɔɔ yɔ, ɛɖɔkɩ ɛ-laŋɩyɛ alɩwaatʋ ndʋ pɔyɔɔdɩ ɛ-yɔɔ tɔm kɩdɛkɛdɩtʋ, paɖʋ-ɩ fɛyɛ, nɛ pakamɩ-ɩ nazɩm sizika yɔɔ ɖɔ-yɔɔ yɔ. (Kalɩ Ebree mba 12:2, 3.) Pɩtʋʋ fɛyɩ se Yehowa laŋɩyɛ ɖɔkʋʋ sɩnɩ Yesu nɛ ɛɖɔkɩ ɛ-laŋɩyɛ. Pɩpɩzɩɣ nɛ pɩsɩnɩ-ɖʋ ɖɔɖɔ.

18. Ɛzɩma 2 Pɩyɛɛrɩ 3:9 sɩɣnɩ-ɖʋ se ɖɩtɩlɩ mbʋ pɩlɩɣ Yehowa suuɖu ɖʋʋ taa yɔ?

¹⁸ Kalɩ 2 Pɩyɛɛrɩ 3:9. Yehowa sɩm alɩwaatʋ kɩbandʋ ndʋ tɩ-yɔɔ pɩwɛɛ se ɛɖɩzɩ ɛjaɖɛ kɩdɛkɛdɩyɛ ɖɩnɛ yɔ. Yehowa suuɖu ɖʋʋ ha nʋmɔʋ ɛyaa sakɩyɛ se papɩzɩ nɛ patɩlɩ-ɩ; nɛ lɛɛlɛɛyɔ lɛ, ɛyaa samaɣ sɔsɔɔ nakɛyɛ wɛɛ nɛ kɛsɛɣ-ɩ; ka-taa mba talɩ ɛyaa miiliyɔɔwaa sakɩyɛ. Pa-tɩŋa payɩ pa-taa wɛ leleŋ se Yehowa ɖɔkɩ ɛ-laŋɩyɛ nɛ pileɖi nɛ pɩha nʋmɔʋ nɛ palʋlɩ-wɛ, pɛkpɛlɩkɩ ɛ-yɔɔ tɔm, pɔsɔɔlɩ-ɩ nɛ paha-ɩ pa-tɩ. Yehowa kaɣ wazʋʋ ɛyaa miiliyɔɔwaa sakɩyɛ mba pɔɖɔkʋʋ pa-laŋa nɛ pɩkɔɔ pɩtalɩ tɩnaɣ yɔɔ yɔ. Alɩwaatʋ ndʋ tɩ-taa lɛ, pɩkaɣ naʋ kpayɩ kpayɩ se ɛlɩzʋʋ se ɛɖɔkʋʋ ɛ-laŋɩyɛ yɔ, pɩkɛ lɩmaɣzɩyɛ kɩbanɖɛ.

19. (a) Ɛbɛ pɩwɛɛ se ɖɩtɛ ɖa-taa se ɖɩlakɩ? (b) Nɛ ɛbɛ kaɣ kɛʋ ɖa-kɩhɛyʋʋ?

¹⁹ Ðɩkpɛlɩkɩ Yehowa cɔlɔ ɛzɩma ɖɩɖɔkɩ ɖa-laŋɩyɛ nɛ taa leleŋ yɔ. Paa Sataŋ kaayeba nɛ laŋwɛɛkɩyɛ nɛ kʋñɔmɩŋ wɛɛ yɔ, Yehowa wobi pɩ-yɔɔ nɛ ɛkɛ “Ɛsɔ koboyaɣ tʋ.” (1 Tim. 1:11) Ða ɖɔɖɔ mbʋ, ɖɩpɩzɩɣ nɛ ɖɩwɛɛ taa leleŋ taa alɩwaatʋ ndʋ ɖɩwɛɛ nɛ ɖɩɖaŋɩɣ nɛ suuɖu se Yehowa ɛñalɩ ɛ-hɩɖɛ yɔɔ, ɛlʋ e-kewiyitu kɩkɩlɩtʋ tɔɔʋ yɔɔ, eyele nɛ kañatʋ lakasɩ tɩŋa sɩɩ tɩnaɣ, nɛ eyele ɖɔɖɔ nɛ kʋñɔmɩŋ weyi ɖɩkatɩɣ sɔnɔ yɔ ɩsɩɩ tɩnaɣ yɔ. Iyele nɛ ɖɩtɛ ɖa-taa se ɖɩɖɔkʋʋ ɖa-laŋa nɛ ɖihiɣ laŋɩyɛ hɛzʋʋ mbʋ pʋyɔɔ yɔ ɖɩnawa se ɖa-Caa weyi ɛwɛ ɛsɔdaa yɔ, ɛwɛɛ nɛ ɛɖɔkʋʋ ɛ-laŋɩyɛ ɖɔɖɔ. Ye ɖɩlakɩ mbʋ yɔ, tɔm tʋnɛ tɩkaɣ labʋ ɖa-taa paa weyi lɛ ɛ-hɔɔlʋʋ taa: “Koboyaɣ tʋ lɛ ɛyʋ weyi ɛɖɔkʋʋ ɛ-laŋɩyɛ takɩm taa yɔ, mbʋ pʋyɔɔ yɔ ɛpɩsɩɣ weyi ɛ-tɔm kɛdɩɣnɩ Ɛsɔ yɔ lɛ, ɛkaɣ mʋʋ wezuu wabɩtʋ hulaɣ ŋga Yehowa yɔɔdaa se ɛhaɣ mba powoki pɩ-yɔɔ nɛ pɔsɔɔlʋʋ-ɩ yɔ.”—Yak. 1:12.