1-2. Inki mutindu mambu yina Yehowa tubaka na Yezaya 65:16, 17 ke pesa beto kikesa ya kulanda kukanga ntima?

NTU-DIAMBU ya lukutakanu ya distrike ya 2017 vandaka “Kuyambula Ve!” Lukutakanu yina sadisaka beto na kuzaba mutindu beto lenda kanga ntima na bampasi yina beto ke kutanaka ti yo. Banda lukutakanu yina salamaka, bamvula iya me luta mpi beto ke landa kaka kukanga ntima na bampasi yina beto ke kutana ti yo na nsi-ntoto yai.

² Inki bampasi nge ke kutana ti yo? Keti yo kele lufwa ya muntu mosi ya dibuta na beno to ya nduku na nge? Keti nge ke bela maladi mosi ya ngolo? Keti nge ke kutana ti bampasi sambu nge me kuma mununu? Keti nge ke kutana ti mpasi ya kisumbula ya lugangu, mubulu to bo ke niokula nge? To keti nge ke kutana ti bampasi sambu na Coronavirus to diambu ya nkaka? Beto ke vingila kilumbu yina bampasi yai yonso ta mana mpi beto ta yibukaka yo diaka ve.—Tanga Yezaya 65:16, 17.

3. Inki beto fwete sala mpi sambu na nki?

³ Beto ke kutana ti bampasi ya ngolo na nsi-ntoto yai mpi beto lenda kutana diaka ti bampasi ya ngolo mingi kuluta na bilumbu ke kwisa. (Mat. 24:21) Yo yina, beto fwete landa kibeni kukanga ntima. Sambu na nki? Sambu Yezu tubaka nde: “Kana beno kanga ntima, beno ta tanina luzingu na beno.” (Luka 21:19) Kana beto ke yindula mutindu bampangi ya nkaka ke kanga ntima na bampasi ya mutindu mosi ti ya beto, yo ta sadisa beto mpi na kukanga ntima.

4. Sambu na nki beto ke tuba nde Yehowa kele mbandu ya mbote na yina me tala kukanga ntima?

⁴ Nani kele mbandu ya mbote na yina me tala kukanga ntima? Yehowa Nzambi. Keti mvutu yai ke yitukisa nge? Mbala ya nkaka yo ke yitukisa nge. Kansi kana nge yindula mbote, nge ta bakisa nde Yehowa ke kangaka ntima na mambu ya nkaka. Diabulu muntu  ke yala nsi-ntoto yai mpi yo me fuluka ti bampasi. Yehowa kele ti ngolo ya kukatula bampasi yai na mbala mosi kansi yandi ke vingilaka kilumbu yina yandi me tulaka sambu na kukatula yo. (Bar. 9:22) Yandi ke landa kukanga ntima tii ntangu kilumbu yina ta lunga. Beto tadila ntangu yai mambu uvwa ya mpasi yina Yehowa ke kangilaka ntima.

5. Inki mutindu bo fingisaka zina ya Nzambi mpi yo ke salaka nge nki mutindu?

⁵ Bo me fingisaka zina na yandi. Yehowa ke zolaka zina na yandi mpi yandi ke zolaka nde bantu yonso kuzitisa yo. (Yez. 42:8) Kansi kiteso ya bamvula 6000 me luta, bo fingisaka zina na yandi. (Nk. 74:10, 18, 23) Yo yantikaka na kilanga ya Edeni ntangu Diabulu (disongidila “Muntu ya ke kusilaka bantu makambu”) tubaka nde Nzambi pesaka ve Adami mpi Eva kima mosi yina bo vandaka na yo mfunu sambu bo vanda na kiese. (Kuy. 3:1-5) Banda na ntangu yina tii bubu yai, bo ke kusilaka Yehowa makambu nde yandi ke pesaka ve bantu bima yina bo ke vandaka kibeni ti yo mfunu. Yezu kudiyangisaka mingi mutindu bo fingisaka zina ya Tata na yandi. Yo yina, yandi longaka balongoki na yandi na kusamba nde: “Tata na beto yina kele na zulu, zina na nge kuvanda ya santu.”—Mat. 6:9.

6. Sambu na nki Yehowa me bikaka nde bantu kuyala bantangu mingi na ntwala ya kumonisa nde yandi mpamba muntu kele ti nswa ya kuyala?

⁶ Bo teleminaka luyalu ya Nzambi. Yehowa mpamba muntu kele ti nswa ya kuyala zulu mpi ntoto mpi yandi ke yalaka na mutindu ya mbote kibeni. (Kus. 4:11) Kansi, Diabulu me salaka yonso sambu na kupusa bawanzio mpi bantu na kuyindula nde Nzambi kele ve ti nswa ya kuyala. Yo lombaka bantangu mingi sambu Yehowa kumonisa kibeni nde yandi kele ti nswa ya kuyala mpi nde yandi ke yalaka na mutindu ya mbote kibeni. Yo yina, Nzambi me bikaka nde bantu kuyala bantangu mingi sambu bo bakisa nde bo ta kuka ve kuditwadisa kukonda lutwadisu na yandi. (Yer. 10:23) Nzambi ke monisa ntima-nda sambu yandi yidika mambu yonso mbala mosi. Yandi ta monisa nde yandi mpamba muntu kele ti nswa ya kuyala ntangu Kimfumu na yandi ta tula kibeni ngemba mpi ta sala nde bantu kuzinga na lutaninu awa na ntoto.

7. Banani me kolamaka na Yehowa mpi nki yandi ta sala bo?

⁷ Bana ya nkaka ya Nzambi kolamaka na yandi. Ntangu Yehowa gangaka bawanzio mpi bantu, bo vandaka ya kukuka. Kansi na nima Satana (disongidila “Mbeni”) yina vandaka ntete wanzio ya mbote pusaka Adami ti Eva na kukolama na Yehowa. Bawanzio ya nkaka ti bantu ya nkaka kolamaka mpi na Yehowa. (Yude 6) Na nima, bantu ya dikanda ya Izraele disongidila dikanda yina Nzambi ponaka yambulaka yandi mpi bo kumaka kusambila banzambi ya luvunu. (Yez. 63:8, 10) Mambu yai pesaka Yehowa mpasi kibeni. Ata mpidina, Yehowa me kangaka ntima mpi yandi ke landaka kukanga ntima tii ntangu yandi ta fwa bantu yonso yina ke kolamaka na yandi. Yo ta sala nde Yehowa mpi bansadi na yandi ya kwikama kuvanda na kiese sambu bo ta kangaka diaka ve ntima na mambu ya mbi.

8-9. Inki mambu ya luvunu bantu ke tubaka sambu na Yehowa mpi nki beto ke salaka sambu na kumonisa nde mambu yango kele ya luvunu?

⁸ Mambu ya luvunu yina Diabulu ke tubaka. Yobi vandaka nsadi ya kwikama ya Yehowa mpi Satana kusilaka yandi makambu. Satana tubaka nde Yobi mpi bansadi yonso ya kwikama ya Yehowa ke sadilaka yandi sambu na bikuma ya bwimi. (Yobi 1:8-11; 2:3-5) Diabulu ke landaka kukusila bansadi ya Yehowa makambu tii bubu yai. (Kus. 12:10) Beto ke monisaka nde Satana kele muntu ya luvunu ntangu beto ke kangaka ntima na bampasi mpi ke bikalaka ya kwikama na Yehowa sambu beto ke zolaka yandi. Kana beto ke kanga ntima, Yehowa ta sakumuna beto mpi mutindu yandi sakumunaka Yobi.—Yak. 5:11.

 ⁹ Satana ke sadilaka bamfumu ya mabundu sambu na kumonisa nde Yehowa kele nku mpi nde yandi muntu kele na kisina ya bampasi ya bantu. Bankaka nkutu ke tubaka nde kana bana me fwa, Nzambi ke nataka bo na zulu sambu yandi ke vandaka ti mfunu ya bawanzio mingi. Malongi yai ke vwezaka kibeni Nzambi! Beto me zaba mbote nde Yehowa kele Tata ya zola. Kana beto ke bela maladi mosi ya ngolo to kana muntu mosi yina beto ke zolaka me fwa, beto ke tubaka ve nde Nzambi muntu kele na kisina ya bampasi yina. Kansi beto ke ndimaka nde kilumbu kele Nzambi ta belula bambefo mpi ta futumuna bantu yina me fwaka. Yo ke pusaka beto na kusonga bantu nde Yehowa kele Nzambi ya zola. Yo ke sadisaka Yehowa na kupesa mvutu na muntu yina ke sosilaka yandi.—Bing. 27:11.

10. Inki mambu Nkunga 22:23, 24 ke tuba sambu na Yehowa?

¹⁰ Bampasi yina bansadi ya Yehowa ke kutanaka ti yo. Yehowa kele Nzambi ya mawa. Yandi ke waka mpasi mingi kana bo ke niokula beto, kana beto ke bela to kana beto ke kutana ti bampasi ya nkaka sambu beto kele bantu ya kukonda kukuka. (Tanga Nkunga 22:23, 24.) Yehowa ke zabaka bampasi na beto; yandi ke zolaka kumanisa yo mpi yandi ta manisa yo. (Tala mpi Kubasika 3:7, 8; Yezaya 63:9.) Yehowa “ta kusula mansanga yonso na meso na [beto], lufwa ta vandaka diaka ve; mawa, bidilu, mpi mpasi ta vandaka diaka ve.”—Kus. 21:4.

11. Inki mutindu Yehowa ke waka sambu na bansadi na yandi ya kwikama yina me fwaka?

¹¹ Yehowa ke waka mpasi sambu na lufwa ya banduku na yandi. Inki mutindu Yehowa ke waka sambu na bansadi na yandi ya kwikama yina me fwaka? Yehowa kele ti nzala ya ngolo ya kumona bo diaka. (Yobi 14:15) Yehowa kele kibeni ti nzala ya ngolo ya kumona diaka nduku na yandi ya ngolo Abrahami. (Yak. 2:23) Yandi kele mpi ti nzala ya ngolo ya kumona diaka Moize yina yandi vandaka kusolula ti yandi “meso  na meso.” (Kub. 33:11) Yandi ke vingila ti nzala ya ngolo ntangu yina yandi ta wa Davidi ti miyimbi-bankunga ya nkaka ta yimbila yandi bankunga sambu na kukumisa yandi. (Nk. 104:33) Ata banduku yai ya Yehowa me fwaka, yandi me vilaka bo ve. (Yez. 49:15) Yandi ke yibukaka mambu yonso ya kimuntu na bo. Biblia ke tuba nde: “Na meso na yandi bo yonso kele na luzingu.” (Luka 20:38) Yehowa ta futumuna bo mpi yandi ta wa diaka bisambu na bo ya masonga mpi yandi ta ndima nde bo sambila yandi. Kana muntu mosi yina nge vandaka kuzola me fwaka, mambu yai lenda lembika nge mpi kupesa nge kikesa.

12. Inki ke pesaka Yehowa mpasi mingi na bilumbu yai ya nsuka?

¹² Bantu ya mbi ke niokula bantu ya nkaka. Ntangu bantu kolamaka na kilanga ya Edeni, Yehowa zabaka nde mambu ta landa kukuma mbi kuluta na ntwala nde yandi yidika yo. Yehowa ke mengaka mambu ya mbi, kukonda lunungu mpi mubulu ya ke salama bubu yai na nsi-ntoto. Yehowa ke wilaka bantu mawa, mingi-mingi bantu yina me konda lusadisu, bantu yina kele ngolo ve, bana ya nsiona mpi mifwidi. (Zek. 7:9, 10) Yehowa ke waka mpasi mingi ntangu bantu ke niokulaka bansadi na yandi ya kwikama mpi ke tulaka bo na boloko. Ya kieleka, Yehowa ke zolaka bansadi na yandi yonso yina ke kangaka ntima na bampasi bonso yandi.

13. Inki mansoni bantu ke sala bubu yai mpi nki Nzambi ta sala bantu yonso yina ke salaka yo?

¹³ Bantu ke sala mansoni ya mutindu na mutindu. Nzambi salaka bantu sambu bo landa mbandu na yandi kansi Satana ke pusaka bo na kusala mansoni. Ntangu Yehowa “monaka nde mambi ya muntu vandaka mingi” na bilumbu ya Noa, “Yehowa waka mawa sambu yandi salaka bantu na ntoto, mpi yandi waka mpasi na ntima.” (Kuy. 6:5, 6, noti na nsi ya lutiti, 11) Bubu yai mpi, mambu ya mbi ke landa kaka kusalama. Diabulu ke wa kiese mingi mutindu bantu me kuma kusala mansoni ya mutindu na mutindu. Mu mbandu bo ke sala mansoni, babakala ti bankento, babakala ti babakala mpi bankento ti bankento. (Baef. 4:18, 19) Satana ke waka diaka kiese mingi kana muntu yina ke sambila Yehowa me sala disumu ya nene. Ntangu ntima-nda ya Yehowa ta kuma na nsuka, yandi ta fwa bantu yonso yina ke salaka mansoni; bayina ta buya kusoba.

14. Inki bantu ke sala ntoto mpi bambisi yina Nzambi me salaka?

¹⁴ Bantu ke bebisa ntoto yina Nzambi salaka. Bantu ke yala bantu ya nkaka sambu na kupesa bo mpasi mpi bo ke bebisa ntoto mpi bambisi yina Nzambi pesaka bo na kutanina. (Lon. 8:9; Kuy. 1:28) Bantu ya nkaka ya mayele ke tuba nde mambu yina bantu ke sala lenda sala nde milio mosi ya banti mingi mpi ya bambisi mingi kumana na mwa bamvula ke kwisa. Yo yina bantu ke tuba nde ntoto ke fwa. Diambu ya kiese kele nde Yehowa ke tuba nde ‘yandi ta fwa bantu yina ke bebisaka ntoto’ mpi yandi ta kumisa ntoto ya mvimba Paladisu.—Kus. 11:18; Yez. 35:1.

15-16. Inki fwete pusa beto na kukanga ntima bonso Yehowa? Pesa mbandu.

¹⁵ Yindula mambu yonso ya mpasi yina Tata na beto ya zulu ke kangilaka ntima banda bamvula mingi. (Tala lupangu “ Mambu Yina Yehowa Ke Kangilaka Ntima.”) Yehowa lenda fwa nsi-ntoto yai ya mbi konso ntangu yina yandi me zola. Kansi kikalulu na yandi ya ntima-nda ke sadisaka beto mingi. Beto baka mbandu yai sambu na kubakisa yo mbote. Bo me songa bakala mosi ti nkento na yandi nde mwana na bo yina kele na divumu kele ti maladi mosi ya ngolo kibeni mpi nde ntangu mwana yango ta butuka, yandi ta niokwama mingi mpi yandi ta fwa nswalu. Kansi bibuti yai me wa kiese mingi ntangu mwana yango me butuka ata bo me zaba nde yo ta vanda mpasi na kusansa yandi. Zola na bo sambu na mwana na bo ta pusa bo na kukanga ntima na bampasi yonso ya mwana yina mpi na kusala  yonso sambu na kusadisa yandi na kuzinga mbote.

¹⁶ Mutindu mosi mpi, bana yonso ya Adami ti Eva ke butukaka bantu ya kukonda kukuka. Kansi Yehowa ke landaka kuzola bo mpi yandi ke taninaka bo. (1 Yoa. 4:19) Bibuti yina beto me tubila na mbandu yai lenda gulusa ve mwana na bo, kansi Yehowa kele ti ngolo ya kumanisa bampasi na beto yonso. Yandi me tulaka kilumbu yina yandi ta katula maladi yonso yina ke yangisa bantu. (Mat. 24:36) Zola ya Yehowa fwete pusa beto na kukanga ntima, ata yo lenda baka bantangu mingi na ntwala nde Yehowa kukatula bampasi na beto.

17. Sambu na nki mambu yina Baebreo 12:2, 3 ke tuba na yina me tala Yezu ke pesa beto ngolo ya kulanda kukanga ntima?

¹⁷ Yehowa kele mbandu ya kukuka na yina me tala kukanga ntima. Yezu landaka mbandu ya kukanga ntima ya Tata na yandi. Ntangu yandi vandaka na ntoto, bo fingaka yandi, bo pesaka yandi nsoni mpi bo tulaka yandi na zulu ya nti ya mpasi sambu na mambote na beto. (Tanga Baebreo 12:2, 3.) Ya kieleka, mbandu ya Yehowa ya kukanga ntima pesaka Yezu mpi ngolo ya kukanga ntima na bampasi yina yonso. Yo lenda pesa beto mpi ngolo ya kukanga ntima na bampasi na beto.

18. Mutindu 2 Piere 3:9 ke monisa yo, ntima ya nda ya Yehowa me salaka nki?

¹⁸ Tanga 2 Piere 3:9. Yehowa me zaba ntangu ya mbote yina yandi ta fwa nsi-ntoto yai. Ntima-nda ya Yehowa me salaka nde bantu mingi kuzaba yandi mpi bubu yai bamilio ya bantu ke sambila yandi. Bantu yai yonso kele na kiese sambu Yehowa kangaka ntima bamvula mingi sambu bo butuka, bo longuka na kuzola yandi mpi bo kudipesa na yandi. Yo ta monana kibeni pwelele nde lukanu ya Yehowa ya kukanga ntima vandaka lukanu mosi ya mbote ntangu yandi ta sakumuna bamilio ya bantu yina ta kanga ntima tii na nsuka.

19. Inki beto fwete sala mpi nki mambote beto ta baka?

¹⁹ Mbandu ya Yehowa ya kukanga ntima ke sadisa beto mpi na kukanga ntima na kiese. Ata Satana me nataka bampasi mingi, Yehowa kele kaka “Nzambi ya kiese.” (1 Tim. 1:11) Beto mpi lenda landa kuvanda na kiese ntangu beto ke vingila ti ntima-nda yonso ntangu yina Yehowa ta santisa zina na yandi, ta nwanina luyalu na yandi, ta manisa mambu yonso ya mbi mpi ta katula bampasi na beto yonso. Yo yina beto fwete kanga ntima mpi kubaka kikesa, sambu beto ke zaba nde Tata na beto ya zulu ke kangaka mpi ntima. Kana beto sala mutindu yai, beto ta mona kulungana ya mambu yai: “Kiese na muntu yina ke landa kukanga ntima na mumekamu, sambu kana Nzambi ndima yandi, yandi ta baka mpu ya kimfumu ya luzingu, yina Yehowa me silaka na bantu yina ke landaka kuzola yandi.”—Yak. 1:12.