1-2. Esaja 65:16, 17-ilu piner­tusaar­nis­samut qanoq iluaqutigaar­put?

2017-IMI ul­luni pingasuni ataatsimeersuar­neq ima qulequtaqar­poq: “Piner­tusaarit!” Ataatsimeersuar­nermi sam­mineqar­poq ajor­nar­torsior­nitsin­ni qanoq piner­tusaarsin­naasugut. Maan­na ukiut sisamat qaangiutereersut silarsuatoq­qami suli piner­tusaar­pugut.

² Il­lit qanoq nalaataqar­nikuuit? Ilaqut­tan­nik ikin­ngutin­nil­luun­niit toquk­kut an­naasaqarsimavit? Toqus­sutaasin­naasumik nap­paateqar­pit? Utoq­qaliar­tor­nerit ar­torsaatigaajuk? Pin­ngor­titami ajunaar­nersuarmit eq­qugaanikuuit, nakuuserfigineqar­nikuuit malersugaal­lutil­luun­niit? Imaluun­niit nap­paas­suit, soorlu COVID-19-ip, atugaanerat naal­liuutigaajuk? Tamak­kor­pas­suit atuuk­kun­naavin­nis­saat puior­neqar­nis­saal­lu qilanaaringaarsin­naavar­put! – Esaja 65:16, 17 atuakkit.

3. Susariaqar­pugut, aam­ma sooq?

³ Silarsuatoq­qami inuuneq ilungersunaqaaq, siunis­samilu suli ilungersunar­nerulis­sagunar­poq. (Matt 24:21) Taamaat­tumik piner­tusaar­tuarsin­naanis­saq ilin­niar­tariaqar­par­put. Tamatuma pingaaruteqar­nera Jiisusip ersersip­paa ima oqarami: “Piner­tusaar­nis­sigut inuunersi pigit­tuin­nas­savarsi.” (Luk 21:19) Al­lat uagutsitul­li ajor­nar­torsioraluarlutik piner­tusaar­tut ilin­niarfigisin­naavagut.

4. Sooq Jehova piner­tusaar­nermut tun­ngatil­lugu maligas­saal­luar­ner­paava?

⁴ Jehova Guuti piner­tusaar­nermut tun­ngatil­lugu maligas­saal­luar­ner­paavoq. Taman­na aal­laq­qaam­mut paasiuminaatsis­sin­naavar­put. Unali eq­qarsaatigiuk: Nunarsuar­put Saatanimit pis­saaneqarfigineqarmat ajor­nar­torsiutit imaagin­navip­put.  Jehova maan­na aaq­qiinis­saminut pis­saaneqar­poq, ul­lorli aalajangik­kani piner­tusaarluni utaq­qivaa. (Rom 9:22) Piner­tusaar­neranut takus­sutis­sat qulingiluat maan­na sam­meriar­tigit.

5. Guutip atia qanoq nikanarsar­neqarsimava, taman­nalu qanoq misigilis­sutigaajuk?

⁵ Atimi nikanar­sarneqar­nerani. Jehovap atini nuan­naraa, kis­saatigaalu kik­kun­nit tamanit ataq­qineqas­sasoq. (Es 42:8) Atiali ukiut 6.000-t mis­saan­ni nikanarsar­neqarsimavoq. (Tuss 74:10, 18, 23) Taman­na naatsiivim­mi Edenimi aal­lar­tip­poq. Taamani Diaavulu (“Mamarliisoq”) sal­lul­luni oqar­poq Adami Evalu pil­luarsin­naan­ngitsut Jehovap ajun­ngitsunik erliguum­magit. (1 Mos 3:1-5) Taamanimiil­li Jehova taamatorluin­naq sal­luliuutigineqar­taler­poq. Jiisusip Ataatami atiata nikanarsar­neqar­nera isumakuluutigigamiuk ajoqersuk­kani ima qinusaq­quai: “Ataatar­put qilan­niit­tutit! Aq­qit il­ler­nar­titaali.” – Matt 6:9.

6. Sooq Jehovap kisimi qilam­mi nunamilu oqar­tus­saanermi up­per­narsineqar­nis­saanut pif­fis­saq sivisooq ingerlatip­paa?

⁶ Kisimi oqartus­saanermi akerlilersor­neqar­nerani. Diaavulup in­ngilit inuil­lu sal­loqit­tarlugit eq­qarsalersin­niar­tar­pai Guuti naalak­kersuisutut piuk­kun­nan­ngitsuusoq. Jehovali qilam­mi nunamilu kisimi naalak­kersuisin­naatitaavoq, naalak­kersueriaasialu tamanit pitsaaner­paavoq. (Saqq 4:11) Taman­nali up­per­narsineqas­sap­pat pif­fis­saq sivisooq ingerlaq­qaar­tariaqar­poq. Taamaat­tumik Jehovap silatusaarluni inuit sivisuumik nam­min­neq naalak­kersuisin­naatip­pai. Suna ersersin­niar­paa? Inuup Pin­ngor­titsisumit siulersor­neqarani iluatsil­luar­tumik naalak­kersuisin­naan­ngin­nera. (Jer 10:23) Jehovap piner­tusaarluni utaq­qinerata kingunerisaanik kisimi oqar­tus­saanera apeq­quser­neqarsin­naajun­naas­saaq. Kik­kut tamarmik paasis­savaat Guutip naalak­kersueriaasia tamanit pitsaaner­paasoq kun­ngeqarfialu kisimi nunarsuarmi toq­qis­sineqar­titsil­lunilu eq­qis­sineqalersitsisin­naasoq.

7. Kik­kut Jehovamut pikitsitsip­pat, qanorlu pineqas­sap­pat?

⁷ Qitornami ilaat pikitsitsim­mata. Jehovap in­ngilit inuil­lu naam­mal­luin­nar­tutut pin­ngor­tip­pai. In­ngilili, kingor­na Saatanimik (“Akerlilersuisoq”) ilisimaneqalersoq, Jehovamut pikitsitsivoq. Adami Evalu pikitsitseqataaler­put. Aam­ma in­ngilit al­lat inup­pas­suil­lu taamaalior­put. (Jud 6) Kingusin­nerusuk­kut al­laat Israelik­kut – Guutip in­nut­tamisut toq­qagai – Jehova tunup­paat guutipilus­siulerlutil­lu. (Es 63:8, 10) Jehovap asasaminit kil­luutigineqar­nini aliasuutigisimas­saqaa. Taamaak­kaluar­toq piner­tusaar­poq pikitsitsisul­lu peersitaanis­saasa tungaanut piner­tusaar­tuas­sal­luni. Taamanik­kus­samut ajor­tut pis­sutigalugit ilumoorfigin­nitsinilu piner­tusaar­tariaqarun­naas­sagamik nuan­naas­sap­put!

8-9. Jehova qanoq sal­luliuutigineqar­tar­pa, uagul­lu qanoq akis­sutaasin­naavugut?

⁸ Saatanimit salluliuutigineqar­tuarnermini. Saatanip Jobi Jehovamul­lu kif­faasut aalajaatsut tamaasa nam­minis­sarsiorlutik Jehovamut kif­far­tor­nerar­pai. (Job 1:8-11; 2:3-5) Maan­namul­lu suli taamatut un­nerluus­siuar­poq. (Saqq 12:10) Asan­nin­ner­put tun­ngavigalugu Jehovamut ilumoorfigin­nit­tuarut­ta misilin­neqar­nitsin­nilu piner­tusaar­tuarut­ta Saatanip sal­lutuujuneranik up­per­narsaaqataas­saagut, Jehoval­lu pil­luaq­qus­savaatigut. – Jaak 5:11.

 ⁹ Saatanip up­perisarsior­nik­kut siut­tut atorlugit inuit isumaqalersin­niar­tar­pai Jehova peq­qar­niitsuul­lunilu naal­liuutinut pisuusoq. Al­laat meeq­qat toqugaangata oqar­toqar­tar­poq Guuti in­ngilinik pisariaqar­titsigami qilaliar­tik­kai! Ila Jehovamut nikanarsaataangaas­susia! Uagul­li nalun­ngilar­put Jehova asan­nit­tuusoq. Nap­parsimaleraangat­ta toqusooraangat­taluun­niit pisuutin­neq ajor­par­put, up­peril­luin­nar­par­pul­li ajor­tut tamaasa atuuk­kun­naarsik­kumaarai. Jehovap asan­nit­tuunera tusar­naarumasunut tamanut tul­luusimaarluta oqalut­tuarerusup­par­put. Taamaalior­ner­put Jehovap mital­lersiminut akis­sutitut atorluar­tar­paa. – Uss 27:11.

10. Jehova pil­lugu Tus­siaat 22:24, 25-milu qanoq paasisaqar­pugut?

¹⁰ Kiffami asangaak­kami naalliun­neranni. Jehova Guutiuvoq misigin­neqataasoq. Malersor­neqar­neq, nap­parsimaneq naam­mal­luin­nan­ngitsuuner­pul­lu ilaatigut pis­sutigalugit naal­liuk­kaangat­ta aliasungaar­tar­poq. (Tussiaat 22:24, 25 atuakkit). An­niaatigut an­niaatigisar­pai, taamatul­lu atugaqar­nis­sar­put kis­saatigin­ngin­namiuk atuuk­kun­naarsik­kumaar­pai. (Naleq­qiuk­kit 2 Mosesi 3:7, 8; Esaja 63:9; Zakaria 2:12) Taamanik­kus­samut ‘qul­liit tamaasa isitsin­nit al­lar­terumaar­pai, toqulu peeruk­kumaar­poq, aliasut­toqarun­naarlunilu nil­liasoqarun­naarlunilu an­niar­toqarun­naas­saaq’. – Saqq 21:4.

11. Kif­fani aalajaatsut toqusimasut pil­lugit Jehova qanoq misigiva?

¹¹ Ikin­ngutiminit toqusimasunit avis­saaq­qanermini. Kif­fani aalajaatsut toqusimasut pil­lugit Jehova qanoq misigiva? Takoq­qin­nis­saat qilanaaringaar­paa! (Es 26:19) Takorlooruk ikin­ngutini Aaperaat qanoq maqaasitigineraa! (Jaak 2:23) Mosesil­lu oqaloqatigeq­qin­nis­saa qilanaaringaarsimas­savaa! (2 Mos  33:11) Aam­ma Daavip tus­siaasior­tul­lu al­lat tusar­neqisumik erinarsorlutik un­nersiutigin­nin­neran­nik tusar­naaq­qin­nis­sani qilanaaraa. (Tuss 104:33) Ikin­ngutini taak­ku toqunikuugaluar­tut Jehovap puiun­ngilai. (Es 49:15) Inut­tut pis­susaat tamaasa eq­qaamaq­qis­saar­pai, ‘taas­sumun­ngalu tamarmik inuup­put’. (Luk 20:38) Taak­ku inuulerseq­qik­kunigit qaman­nga pisumik qin­nutaat tusaq­qit­talis­savai pal­lorfigin­nin­neral­lu akueralugu. Asasan­nik toquk­kut an­naasaqarsimaguit qanor­toq taman­na tup­pal­lersaatigisaruk.

12. Ul­luni kingul­ler­ni mak­kunani suut Jehovap ingam­mik aliasuutigai?

¹² Inuit inunnit ajor­tunit naqisimaneqar­neranni. Edenimi pikitsitsisoqarmat Jehovap ingerlaan­naq paasivaa pis­sutsit iluarsitin­natik ajorseriaq­qaarumaar­tut. Jehovap ajus­suseq, naaper­tuil­luan­ngitsulior­neq nakuuser­nerlu nalitsin­ni atugaaqisut maajugai. Ingam­mik san­ngiin­nerusut im­minul­lu il­lersorsin­naan­ngitsut – soorlu angajoq­qaaverun­nikut kisimiit­tul­lu – tamak­kunin­nga eq­qor­neqaraangata misigin­neqatigingaar­tar­pai. (Zak 7:9, 10) Aam­ma kif­fani aalajaatsut naqisimaneqarlutil­lu malersor­neqaraangata aliasungaar­tar­poq. Qularin­ngis­sin­naavar­put im­misut piner­tusaar­tut tamaasa asangaarai.

13. Inuit qanoq kan­ngunar­tulior­tar­pat, taman­nalu Guutip qanoq iliuuseqarfigiumaar­paa?

¹³ Inuit kan­ngunartuliortar­neranni. Inuit Guuti as­silil­lugu pin­ngor­titaasut Saatanip kan­ngunar­tulior­tik­kusup­pai. Noap nalaani “inuit ajus­susiat angeqisoq” Jehovap takugamiuk ‘nunarsuarmi inun­nik pin­ngor­titsisimanini peq­qis­simis­sutigiler­paa aliasulerlunilu’. (1 Mos 6:5, 6, 11) Pis­sutsit taamanimiil­li iluarsinerusimap­pat? Naamerluin­naq! Inuit kinguaas­siuutitigut maajun­nar­tulior­tar­nerat taama siaruaas­simatigisoq takul­lugu Diaavulu nuan­naar­tarsimas­saqaaq. Al­laam­mi anguteqatinoor­neq ar­naqatinoor­nerlu nalingin­naalersimavoq! (Ef 4:18, 19) Ingam­mik Jehovap kif­fai ingasat­tumik ajor­tulioraangata Saatani nuan­naar­tar­poq. Jehoval­li piner­tusaar­nini naam­magileruniuk tamak­kunin­nga tamanik maajugisaqar­nini ersersis­savaa. Taamanik­kus­samut inuit ajor­tulior­tar­nermin­nik asoorus­siuman­ngitsut nungutin­neqas­sap­put.

14. Inuit pin­ngor­titarsuarmik uumasunil­lu paarsinerat qanoq ingerlava?

¹⁴ Pinngortitarsuup aseroriartuin­narnerani. ‘Inuit inoqatimin­nut ajoqutaasumik pis­saaneqar­pal­laagin­naratik’ aam­mali nunarsuarmik uumasunil­lu Jehovap isumageq­qusaanik paarsinerlup­put. (Oqal 8:9; 1 Mos 1:28) Ilisimatuut ilaat isumaqar­put uumasoqatigiit as­sigiin­ngitsut mil­lionit ukiualuit ingerlanerini nunguk­kumaar­tut. Paasinar­tumik inup­pas­suit pin­ngor­titarsuaq isumakuluutigisar­paat. Qujanar­tumil­li Jehova neriorsuisimavoq inuit ‘nunarsuarmik aseruisut aserorumaarlugit’ nunarsuarlu tamaat paratiisin­ngor­tik­kumaarlugu. – Saqq 11:18; Es 35:1.

15-16. Suna kajumis­sis­sutigalugu Jehovatul­li piner­tusaarsin­naavugut? As­sersuuteqarit.

¹⁵ Alianar­tor­pas­suaqaraluar­toq Ataatar­put qilam­miusoq ukiuni tuusintilin­ni piner­tusaar­poq. (Ungalusaq “ Jehova piner­tusaar­poq” takuuk). Jehovap piumaguni silarsuatoqaq ingerlaan­naq nungutis­simasin­naagaluar­paa. Utaq­qikatajuin­nerali iluaqutigaar­put! Ima as­sersuusiorsin­naavugut: Aap­pariit oqarfigineqar­put meerar­taas­saat inun­ngoruni timimigut in­narluuteqas­sagami naal­liut­tarumaar­toq toqujaarlunilu. Taamaak­kaluar­toq  inun­ngor­nera nuan­naarutigis­savaat. Qanorluun­niil­lu ilungersor­tigigaluarunik meerar­tik asal­lugu sapin­ngisamik pitsaaner­paamik inuuneqar­tik­kusus­savaat.

¹⁶ Tamatumun­nga as­singusumik inuit tamarmik naam­mal­luin­nan­ngitsuul­lutik inun­ngor­tar­put. Jehoval­li asavai isumas­sorlugil­lu. (1 Joh 4:19) Angajoq­qaat as­sersuusiarineqar­tut iliuuserisin­naan­ngisaan­nik Jehova iliuuseqarsin­naavoq. Tas­sa ul­lormi aalajangersimasamini qitor­nami naal­liuutaat atuuk­kun­naarsis­savai. (Matt 24:36) Jehovap asan­nin­nera kajumis­sis­sutigalugu qanorluun­niit sivisutigisumik piner­tusaarsin­naavugut.

17. Jiisusip maligas­siaa piner­tusaar­nis­samut qanoq iluaqutigaar­put? (1 Petr 2:21-24)

¹⁷ Piner­tusaar­nermut tun­ngatil­lugu Jehova maligas­saal­luar­ner­paavoq, Jiisusil­lu taman­na ilin­niarfigaa. Nunarsuarmiin­nermini as­sor­tor­neqar­tar­poq, kan­ngunarsar­neqar­tar­poq al­laal­lu nap­pak­kamut kikiat­tugaal­luni. (1 Petrusi 2:21-24 atuakkit). Jehoval­li piner­tusaar­nera ilin­niarfigalugu Jiisusi piner­tusaar­poq. Uagut­taaq taamaaliorsin­naavugut.

18. Petrusip al­lagaasa aap­paat 3:9 naaper­torlugu Jehovap utaq­qisin­naas­suseqar­nera qanoq kinguneqar­pa?

¹⁸ 2 Petrusi 3:9 atuaruk. Jehovap nalun­ngilaa silarsuatoqaq qaqugor­piaq suujun­naarsin­neqar­pat pitsaaner­paas­sasoq. Utaq­qisin­naas­suseqarmat inuit mil­lionil­lit nuan­naarutigeqisamin­nik Jehovamut ikin­ngutaalersin­naap­put pal­lorfigin­nilerlutil­lu. Taak­kua al­laat naggatis­samut piner­tusaar­nerisa ersersis­savaat Jehovap utaq­qikatajuil­luni piner­tusaarsimanera eq­qor­tulior­nerusoq!

19. Suna aalajangiusimas­savar­put, taman­nalu qanoq pil­luaq­quneqaatigis­savar­put?

¹⁹ Jehovatul­li nuan­naarluta piner­tusaarsin­naavugut. Saatani aliasutsitsil­lunilu naal­liutsitsigaluar­toq Jehova pil­luar­tuar­poq. (1 Tim 1:11) Uagut­taaq utaq­qitil­luta pil­luar­tuarsin­naavugut. Ungasin­ngitsuk­kut Jehovap atini il­ler­narsisis­savaa, kisimi oqar­tus­saanini up­per­narsas­savaa, ajus­suseq suujun­naarsis­savaa ajor­nar­torsiutitsin­niil­lu aniguisil­luta. Ataatat­ta qilam­miusup piner­tusaar­nera tup­pal­lersaatigalugu piner­tusaar­nis­sar­put aalajangiusimatigu! Taamaaliorut­ta oqaatsit uku uagutsin­nut eq­quutis­sap­put: “Pil­luar­poq inuk misilin­neqar­nermini piner­tusaar­toq, misilin­neqar­ninimi at­tak­kuniuk piumaaramiuk ajugaasumut niaqorusius­sas­saq inuus­sutaasoq Guutip asasiminut neriorsuutigisaa.” – Jaak 1:12.