អត្ថបទសិក្សា ២៧
ចូរស៊ូទ្រាំដូចព្រះយេហូវ៉ា
«បើអ្នករាល់គ្នាស៊ូទ្រាំដល់ទីបញ្ចប់ នោះអ្នករាល់គ្នានឹងរក្សាជីវិតខ្លួន»។—លូក. ២១:១៩
ចម្រៀងលេខ១១៤ ‹ចូរមានចិត្តអត់ធ្មត់›
សេចក្ដីសង្ខេប *
១-២. តើប្រសាសន៍របស់ព្រះយេហូវ៉ានៅអេសាយ ៦៥:១៦, ១៧លើកទឹកចិត្តយើងមិនឲ្យឈប់ព្យាយាមយ៉ាងដូចម្ដេច?
«ចូរកុំឈប់ព្យាយាម!» នេះជាប្រធានដ៏គួរឲ្យរំភើបចិត្តនៃកម្មវិធីមហាសន្និបាតតាមភូមិភាគឆ្នាំ២០១៧។ កម្មវិធីនោះបានបង្ហាញយើងអំពីរបៀបដែលយើងអាចស៊ូទ្រាំនឹងទុក្ខលំបាក។ បួនឆ្នាំបានកន្លងទៅហើយតាំងពីមហាសន្និបាតនោះ ហើយយើងនៅតែស៊ូទ្រាំនៅក្នុងរបៀបរបបពិភពលោកដ៏អាក្រក់នេះ។
២ តើអ្នកបានជួបប្រទះនឹងបញ្ហាអ្វីខ្លះនៅថ្មីៗនេះ? តើសមាជិកគ្រួសារ ឬមិត្តភក្ដិជាទីស្រឡាញ់បានស្លាប់ឬទេ? តើអ្នកមានជំងឺមួយដែលអាចប៉ះពាល់ដល់អាយុជីវិតរបស់អ្នកឬ? តើអ្នកមានបញ្ហាផ្សេងៗដោយសារអ្នកមានភាពចាស់ជរាឬទេ? តើអ្នករងទុក្ខដោយសារមហន្តរាយធម្មជាតិ អំពើឃោរឃៅ ឬការបៀតបៀនឬ? តើអ្នករងទុក្ខដោយសារជំងឺផ្សេងៗ ដូចជាជំងឺកូវីដ-១៩ឬទេ? ពិតមែនហើយ យើងទាំងអស់គ្នាទន្ទឹងរង់ចាំពេលដែលយើងលែងមានបញ្ហាបែបនេះទៀត។ ពេលនោះ យើងនឹងមិននឹកឃើញអំពីបញ្ហាទាំងនេះ ហើយវាលែងកើតឡើងទៀតដែរ។—សូមអាន អេសាយ ៦៥:១៦, ១៧
៣. តើយើងត្រូវធ្វើអ្វីនៅឥឡូវនេះ ហើយហេតុអ្វី?
៣ ជីវិតនៅក្នុងរបៀបរបបរបស់ពិភពលោកនេះគឺពិបាក ហើយយើងប្រហែលជានឹងជួបការពិបាកកាន់តែខ្លាំងឡើងនៅថ្ងៃអនាគត។ (ម៉ាថ. ២៤:២១) ដូច្នេះ យើងត្រូវបន្តបង្កើនសមត្ថភាពស៊ូទ្រាំរបស់យើង។ ហេតុអ្វី? ពីព្រោះលោកយេស៊ូបានមានប្រសាសន៍ថា៖ «បើអ្នករាល់គ្នាស៊ូទ្រាំដល់ទីបញ្ចប់ នោះអ្នករាល់គ្នានឹងរក្សាជីវិតខ្លួន»។ (លូក. ២១:១៩) យើងនឹងកាន់តែអាចស៊ូទ្រាំ បើយើងគិតអំពីរបៀបដែលអ្នកឯទៀតកំពុងស៊ូទ្រាំនឹងបញ្ហាដែលស្រដៀងនឹងបញ្ហារបស់យើង។
៤. ហេតុអ្វីយើងអាចនិយាយថាព្រះយេហូវ៉ាគឺជាគំរូដ៏ល្អបំផុតអំពីការចេះស៊ូទ្រាំ?
៤ តើអ្នកណាជាគំរូដ៏ល្អបំផុតអំពីការចេះស៊ូទ្រាំ? គឺព្រះយេហូវ៉ា។ អ្នកប្រហែលជាភ្ញាក់ផ្អើលចំពោះចម្លើយនេះ ប៉ុន្តែបើអ្នកគិតអំពីរឿងនេះ អ្នកនឹងយល់អំពីមូលហេតុដែលយើងអាចនិយាយដូច្នេះ។ ពិភពលោកនេះនៅក្រោមអំណាចរបស់មេកំណាច ហើយពោរពេញទៅដោយបញ្ហាផ្សេងៗ។ ព្រះយេហូវ៉ាមានសមត្ថភាពបញ្ឈប់បញ្ហាទាំងអស់នេះក្នុងមួយរំពេចបាន តែលោកមានថ្ងៃកំណត់រួចហើយនាពេលអនាគត ហើយលោកកំពុងរង់ចាំឲ្យថ្ងៃនោះមកដល់។ (រ៉ូម ៩:២២) រហូតដល់ពេលកំណត់នោះ ព្រះរបស់យើងបន្តស៊ូទ្រាំ។ សូមយើងគិតអំពីបញ្ហា៩យ៉ាងដែលព្រះយេហូវ៉ាបានសម្រេចចិត្តស៊ូទ្រាំ។
តើព្រះយេហូវ៉ាសម្រេចចិត្តស៊ូទ្រាំចំពោះរឿងអ្វីខ្លះ?
៥. តើនាមរបស់ព្រះបានត្រូវគេតិះដៀលយ៉ាងដូចម្ដេច ហើយតើអ្នកមានអារម្មណ៍យ៉ាងណាចំពោះរឿងនេះ?
៥ ការតិះដៀលចំពោះនាមរបស់ព្រះយេហូវ៉ា។ ព្រះយេហូវ៉ាស្រឡាញ់នាមលោក ហើយចង់ឲ្យបុគ្គលគ្រប់រូបគោរពនាមនោះ។ (អេ. ៤២:៨) ប៉ុន្តែ អស់រយៈពេល៦.០០០ឆ្នាំហើយ នាមដ៏ល្អរបស់លោកបានត្រូវគេតិះដៀល។ (ចសព. ៧៤:១០, ១៨, ២៣) នេះបានចាប់ផ្ដើមនៅសួនអេដែន ពេលមេកំណាច(ដែលមានន័យថាអ្នកបង្កាច់បង្ខូច)បានចោទប្រកាន់ព្រះថា លោកមិនបានផ្ដល់ឲ្យអ្វីដ៏សំខាន់ចាំបាច់ដែលអាដាមនិងអេវ៉ាត្រូវការដើម្បីមានសុភមង្គលឡើយ។ (ដក. ៣:១-៥) តាំងពីពេលនោះ ព្រះយេហូវ៉ាបានត្រូវគេចោទប្រកាន់មិនពិតថា លោកមិនបានផ្ដល់ឲ្យអ្វីដែលមនុស្សពិតជាត្រូវការ។ លោកយេស៊ូព្រួយបារម្ភ ដោយសារនាមរបស់បិតាលោកបានត្រូវអាប់ឱនកិត្តិយស។ ហេតុនេះហើយ លោកបានបង្រៀនអ្នកកាន់តាមលោកឲ្យអធិដ្ឋានថា៖ «ឱបិតារបស់យើងដែលនៅស្ថានសួគ៌អើយ សូមឲ្យនាមរបស់លោកបានបរិសុទ្ធ»។—ម៉ាថ. ៦:៩
៦. ហេតុអ្វីព្រះយេហូវ៉ាបានទុកពេលយូរ មុនបង្ហាញថាលោកមានសិទ្ធិគ្រប់គ្រងលើស្ថានសួគ៌និងផែនដី?
៦ ការប្រឆាំងចំពោះសិទ្ធិគ្រប់គ្រងរបស់ព្រះ។ មានតែព្រះយេហូវ៉ាប៉ុណ្ណោះដែលមានសិទ្ធិគ្រប់គ្រងលើស្ថានសួគ៌និងផែនដី ហើយរបៀបគ្រប់គ្រងរបស់លោកគឺល្អបំផុត។ (បប. ៤:១១) ប៉ុន្តែ មេកំណាចបានព្យាយាមបំភាន់ទេវតានិងមនុស្សឲ្យគិតថាព្រះគ្មានសិទ្ធិគ្រប់គ្រងទេ។ រឿងអំពីសិទ្ធិគ្រប់គ្រងរបស់ព្រះយេហូវ៉ាមិនអាចដោះស្រាយភ្លាមៗបានទេ។ ព្រះបានបង្ហាញប្រាជ្ញាដោយទុកពេលយូរល្មមឲ្យឃើញថា ពេលមនុស្សជាតិព្យាយាមគ្រប់គ្រងលើអ្នកឯទៀតដោយមិនស្ដាប់បង្គាប់អ្នកបង្កើត ពួកគេបរាជ័យ។ (យេ. ១០:២៣) ដោយសារព្រះបានបង្ហាញចិត្តអត់ធ្មត់ រឿងនេះនឹងត្រូវដោះស្រាយមួយដងជាការស្រេច។ បុគ្គលគ្រប់រូបនឹងដឹងថា របៀបគ្រប់គ្រងរបស់ព្រះយេហូវ៉ាគឺល្អបំផុត ហើយថាមានតែរាជាណាចក្ររបស់លោកប៉ុណ្ណោះដែលនឹងនាំឲ្យមានសន្តិភាពនិងសន្តិសុខពិតប្រាកដនៅផែនដី។
៧. តើអ្នកណាខ្លះបានបះបោរប្រឆាំងព្រះយេហូវ៉ា ហើយតើលោកនឹងធ្វើអ្វីចំពោះពួកគេ?
៧ ការបះបោរនៃកូនខ្លះរបស់ព្រះ។ ព្រះយេហូវ៉ាបានបង្កើតទាំងបុគ្គលវិញ្ញាណ ទាំងមនុស្សដែលជាកូនៗរបស់លោកយ៉ាងល្អឥតខ្ចោះ។ ប៉ុន្តែក្រោយមក ទេវតាមួយរូបបានបះបោរ ហើយវាបានត្រូវហៅថាសាថាន(ដែលមានន័យថា«អ្នកប្រឆាំង»)។ វាបានធ្វើឲ្យអាដាម និងអេវ៉ាដែលជាមនុស្សល្អឥតខ្ចោះ ប្រឆាំងនឹងព្រះយេហូវ៉ា។ ទេវតានិងមនុស្សឯទៀតបានរួមដៃជាមួយវាក្នុងការបះបោរ។ (យូ. ៦) ក្រោយមក សូម្បីតែមនុស្សក្នុងចំណោមប្រជាជាតិអ៊ីស្រាអែលជារាស្ត្រដែលព្រះបានជ្រើសរើស ក៏បានបដិសេធលោក ហើយបែរជាគោរពបូជាព្រះមិនពិត។ (អេ. ៦៣:៨, ១០) ព្រះយេហូវ៉ាឈឺចិត្ត តែលោកបានស៊ូទ្រាំ ហើយលោកនឹងបន្តស៊ូទ្រាំរហូតដល់ពេលកំណត់ដើម្បីបំផ្លាញអ្នកបះបោរទាំងអស់។ ក្រោយមក ព្រះយេហូវ៉ានិងពួកអ្នកស្មោះត្រង់ចំពោះលោក នឹងអរសប្បាយដោយសារពួកគេលែងត្រូវស៊ូទ្រាំនឹងរបៀបរបបពិភពលោកដ៏អាក្រក់នេះទៀតហើយ!
៨-៩. តើមានការភូតភរអ្វីខ្លះអំពីព្រះយេហូវ៉ា ហើយតើយើងអាចធ្វើអ្វីចំពោះរឿងនោះ?
៨ ការភូតភររបស់មេកំណាច។ សាថានចោទប្រកាន់យ៉ូបនិងអ្នកបម្រើដ៏ស្មោះត្រង់ទាំងអស់របស់ព្រះយេហូវ៉ាថា ពួកគេគោរពប្រណិប័តន៍ព្រះដើម្បីប្រយោជន៍ខ្លួនតែប៉ុណ្ណោះ។ (យ៉ូប ១:៨-១១; ២:៣-៥) មេកំណាចបន្តចោទប្រកាន់មនុស្សរហូតដល់សព្វថ្ងៃនេះ។ (បប. ១២:១០) យើងអាចជួយបង្ហាញថាសាថានគឺជាអ្នកភូតភរ ដោយស៊ូទ្រាំនឹងទុក្ខលំបាកដែលយើងជួបប្រទះ និងរក្សាចិត្តស្មោះភក្ដីចំពោះព្រះយេហូវ៉ា ដោយសារយើងស្រឡាញ់លោក។ ដូចយ៉ូប យើងនឹងទទួលពរចំពោះការស៊ូទ្រាំរបស់យើង។—យ៉ា. ៥:១១
៩ សាថានប្រើអ្នកដឹកនាំសាសនាមិនពិតឲ្យនិយាយថាព្រះយេហូវ៉ាឃោរឃៅ និងបណ្ដាលឲ្យមនុស្សរងទុក្ខវេទនា។ អ្នកដឹកនាំសាសនាខ្លះថែមទាំងនិយាយថាពេលកូនក្មេងស្លាប់ គឺព្រះដែលបានយកពួកគេទៅស្ថានសួគ៌ ដោយសារលោកត្រូវការទេវតាថែមទៀត។ នេះជាការប្រមាថមើលងាយចំពោះព្រះ! ប៉ុន្តែ យើងដឹងថានេះមិនមែនជាការពិតទេ។ ពេលយើងមានជំងឺធ្ងន់ធ្ងរ ឬពេលមនុស្សជាទីស្រឡាញ់របស់យើងស្លាប់ យើងមិនបន្ទោសព្រះទេ។ ផ្ទុយទៅវិញ យើងជឿថា នៅថ្ងៃអនាគតលោកនឹងធ្វើឲ្យមនុស្សឈឺជាសះស្បើយ ហើយប្រោសមនុស្សស្លាប់ឲ្យរស់ឡើងវិញ។ យើងអាចប្រាប់បុគ្គលគ្រប់រូបដែលចង់ស្ដាប់ថាព្រះយេហូវ៉ាជាព្រះដែលប្រកបដោយសេចក្ដីស្រឡាញ់។ យ៉ាងនេះព្រះយេហូវ៉ាអាចតបឆ្លើយទៅអ្នកដែលតិះដៀលលោក។—សុភ. ២៧:១១
១០. តើចម្រៀងសរសើរព្រះ ២២:២៣, ២៤បង្ហាញយ៉ាងណាអំពីព្រះយេហូវ៉ា?
១០ ការរងទុក្ខរបស់អ្នកបម្រើជាទីស្រឡាញ់លោក។ ព្រះយេហូវ៉ាជាព្រះដែលអាណិតមេត្តា។ ពេលលោកឃើញយើងរងទុក្ខដោយសារជំងឺ ការបៀតបៀន ឬភាពមិនល្អឥតខ្ចោះរបស់យើង លោកឈឺចិត្តខ្លាំង។ (សូមអាន ចម្រៀងសរសើរព្រះ ២២:២៣, ២៤) ព្រះយេហូវ៉ាយល់អំពីការឈឺចាប់របស់យើង។ លោកចង់បំបាត់វាចោល ហើយលោកនឹងធ្វើដូច្នេះ។ (សូមពិនិត្យបន្ថែម ដំណើរចាកចេញ ៣:៧, ៨; អេសាយ ៦៣:៩) នៅថ្ងៃអនាគត លោកនឹង«ជូតអស់ទាំងទឹកភ្នែកចេញពីភ្នែករបស់[យើង] ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ ក៏នឹងលែងមានទៀតដែរ»។—បប. ២១:៤
១១. តើព្រះយេហូវ៉ាមានអារម្មណ៍យ៉ាងណាចំពោះពួកអ្នកបម្រើដ៏ស្មោះត្រង់របស់លោកដែលបានស្លាប់?
១១ ការបែកពីមិត្តសម្លាញ់របស់លោកដែលបានស្លាប់។ តើព្រះយេហូវ៉ាមានអារម្មណ៍យ៉ាងណាចំពោះបុរសស្ត្រីដ៏ស្មោះត្រង់ដែលបានស្លាប់? លោកពិតជាចង់ជួបពួកគេម្ដងទៀតខ្លាំងណាស់! (យ៉ូប ១៤:១៥) តើអ្នកអាចស្រមៃឃើញឬទេថា ព្រះយេហូវ៉ានឹកអាប្រាហាំដែលជាមិត្តសម្លាញ់របស់លោកខ្លាំងយ៉ាងណា? (យ៉ា. ២:២៣) តើអ្នកអាចស្រមៃឃើញថាព្រះយេហូវ៉ាចង់និយាយម្ដងទៀតជាមួយម៉ូសេ ដែលលោកធ្លាប់«មានប្រសាសន៍ទល់មុខ»ឬ? (ដច. ៣៣:១១) លោកច្បាស់ជាទន្ទឹងរង់ចាំស្ដាប់ម្ដងទៀតនូវការច្រៀងចម្រៀងដ៏ពីរោះរបស់ដាវីឌ និងអ្នកឯទៀតដែលច្រៀងចម្រៀងសរសើរព្រះ! (ចសព. ១០៤:៣៣) ទោះជាមិត្តសម្លាញ់ទាំងនេះរបស់ព្រះបានស្លាប់ហើយក្ដី ព្រះយេហូវ៉ាមិនបានបំភ្លេចពួកគេទេ។ (អេ. ៤៩:១៥) លោកនឹកចាំអំពីបុគ្គលិកលក្ខណៈទាំងអស់របស់ពួកគេ។ ក្នុងន័យម្យ៉ាង លោកចាត់ទុកថា«ពួកគេទាំងអស់គ្នាកំពុងរស់នៅ»។ (លូក. ២០:៣៨) នៅថ្ងៃអនាគត លោកនឹងប្រោសពួកគេឲ្យរស់ឡើងវិញ ហើយលោកនឹងស្ដាប់សេចក្ដីអធិដ្ឋានដ៏ស្មោះរបស់ពួកគេ ព្រមទាំងទទួលការគោរពប្រណិប័តន៍របស់ពួកគេម្ដងទៀត។ បើអ្នកបានបាត់បង់មនុស្សជាទីស្រឡាញ់ដោយសារសេចក្ដីស្លាប់ ចំណុចទាំងនេះអាចសម្រាលទុក្ខអ្នក។
១២. តើអ្វីធ្វើឲ្យព្រះយេហូវ៉ាពិបាកចិត្តជាខ្លាំងក្នុងអំឡុងគ្រាចុងក្រោយបង្អស់ដ៏អាក្រក់នេះ?
១២ ការសង្កត់សង្កិនរបស់មនុស្សអាក្រក់ទៅលើអ្នកឯទៀត។ ពេលការបះបោរចាប់ផ្ដើមនៅសួនអេដែន ព្រះយេហូវ៉ាដឹងថាស្ថានភាពពិភពលោកនឹងកាន់តែអាក្រក់ទៅៗ មុនពេលដែលលោកធ្វើឲ្យល្អប្រសើរឡើង។ ព្រះយេហូវ៉ាស្អប់អំពើអាក្រក់ អំពើអយុត្តិធម៌ និងអំពើឃោរឃៅនៅក្នុងពិភពលោកសព្វថ្ងៃនេះ។ លោកតែងតែយកចិត្តទុកដាក់ជាពិសេសចំពោះអ្នកដែលងាយត្រូវគេធ្វើបាប ពោលគឺអ្នកទន់ខ្សោយនិងអ្នកដែលគ្មានការការពារដូចជាក្មេងកំព្រា ព្រមទាំងស្ត្រីមេម៉ាយជាដើម។ (សាក. ៧:៩, ១០) ព្រះយេហូវ៉ាពិបាកចិត្តជាខ្លាំងពេលលោកឃើញអ្នកបម្រើដ៏ស្មោះត្រង់របស់លោកត្រូវគេសង្កត់សង្កិន និងចាប់ដាក់គុក។ សូមដឹងប្រាកដថា លោកស្រឡាញ់អស់អ្នកដែលកំពុងស៊ូទ្រាំជាមួយលោក។
១៣. តើព្រះឃើញអំពើអាក្រក់អ្វី ហើយតើលោកនឹងធ្វើអ្វីចំពោះរឿងនេះ?
១៣ ការដែលមនុស្សជាតិបានត្រូវបន្ទាបបន្ថោក។ សាថានចូលចិត្តបន្ទាបបន្ថោកមនុស្សដែលបានត្រូវបង្កើតមកឲ្យមានភាពដូចព្រះ។ ពេល«ព្រះយេហូវ៉ាបានឃើញថាការអាក្រក់របស់មនុស្សមានច្រើនក្រៃលែង»នៅសម័យណូអេ លោក«ស្ដាយដែលបានបង្កើតមនុស្សជាតិនៅផែនដី ហើយលោកឈឺចិត្តជាខ្លាំង»។ (ដក. ៦:៥, ៦, ១១) តើស្ថានភាពពិភពលោកបានល្អប្រសើរជាងតាំងពីពេលនោះឬទេ? មិនមែនទាល់តែសោះ! មេកំណាចច្បាស់ជាសប្បាយចិត្ត ពេលវាឃើញថាពិភពលោកពោរពេញទៅដោយអំពើប្រាសចាកសីលធម៌ខាងផ្លូវភេទគ្រប់បែបយ៉ាង រួមទាំងអំពើប្រាសចាកសីលធម៌ខាងផ្លូវភេទរវាងបុគ្គលដែលមានភេទផ្ទុយគ្នា និងបុគ្គលដែលមានភេទដូចគ្នា។ (អេភ. ៤:១៨, ១៩) សាថានពិតជាសប្បាយចិត្តពេលវាអាចបណ្ដាលឲ្យពួកអ្នកដែលគោរពប្រណិប័តន៍ពិតប្រព្រឹត្តអំពើខុសឆ្គងធ្ងន់ធ្ងរ។ ពេលចិត្តអត់ធ្មត់របស់ព្រះយេហូវ៉ាដល់កម្រិត លោកនឹងបង្ហាញថាលោកស្អប់អំពើប្រាសចាកសីលធម៌ទាំងអស់។
១៤. តើមនុស្សកំពុងធ្វើអ្វីចំពោះផែនដីនិងសត្វ?
១៤ ការបង្ខូចផែនដីដែលព្រះបានបង្កើត។ មនុស្សមិនគ្រាន់តែ‹ត្រួតត្រាលើមនុស្ស នាំឲ្យមានទុក្ខវេទនា›ប៉ុណ្ណោះទេ តែពួកគេក៏មិនថែរក្សាផែនដីនិងសត្វ ដូចដែលព្រះយេហូវ៉ាបានសុំមនុស្សឲ្យធ្វើនោះទេ។ (អទ. ៨:៩; ដក. ១:២៨) អ្នកវិទ្យាសាស្ត្រខ្លះនិយាយថា ដោយសារការប្រព្រឹត្តរបស់មនុស្ស សត្វនិងរុក្ខជាតិ១លានប្រភេទទៀត អាចនឹងផុតពូជនៅប៉ុន្មានឆ្នាំខាងមុខនេះ។ យើងពិតជាអាចយល់មូលហេតុដែលមនុស្សបារម្ភអំពីបរិស្ថាន! យើងសប្បាយចិត្តណាស់ដែលព្រះយេហូវ៉ាបានសន្យាថា លោកនឹង«បំផ្លាញពួកអ្នកដែលកំពុងបង្ខូចផែនដី» ហើយធ្វើឲ្យផែនដីទាំងមូលទៅជាសួនឧទ្យាន។—បប. ១១:១៨; អេ. ៣៥:១
អ្វីដែលយើងរៀនពីការស៊ូទ្រាំរបស់ព្រះយេហូវ៉ា
១៥-១៦. តើអ្វីគួរជំរុញចិត្តយើងឲ្យស៊ូទ្រាំដូចព្រះយេហូវ៉ា? សូមលើកឧទាហរណ៍។
១៥ សូមគិតអំពីបញ្ហាដ៏ឈឺចាប់ទាំងអស់ដែលបិតារបស់យើងនៅស្ថានសួគ៌បានស៊ូទ្រាំអស់រាប់ពាន់ឆ្នាំមកហើយ។ (សូមមើលប្រអប់ដែលមានចំណងជើងថា« អ្វីដែលព្រះយេហូវ៉ាកំពុងស៊ូទ្រាំ») ព្រះយេហូវ៉ាអាចបំផ្លាញរបៀបរបបពិភពលោកដ៏អាក្រក់នេះនៅពេលណាក៏បាន។ ប៉ុន្តែ ចិត្តអត់ធ្មត់របស់លោកបានផ្ដល់ប្រយោជន៍ឲ្យយើង! សូមគិតអំពីឧទាហរណ៍មួយ។ ឧបមាថាគ្រូពេទ្យប្រាប់ប្ដីប្រពន្ធមួយគូថា កូនដែលនៅក្នុងផ្ទៃប្រពន្ធនោះមានបញ្ហាកាយសម្បទាធ្ងន់ធ្ងរ។ កូននោះនឹងរស់នៅប្រចាំថ្ងៃដោយពិបាក ហើយស្លាប់មុនអាយុ។ ប៉ុន្តែ ឪពុកម្ដាយនោះនៅតែសប្បាយចិត្តពេលកូននោះកើតមក។ ទោះជាពួកគេនឹងពិបាកមើលថែទាំក្មេងនោះយ៉ាងណាក៏ដោយ សេចក្ដីស្រឡាញ់របស់ពួកគេចំពោះកូនជំរុញចិត្តពួកគេឲ្យស៊ូទ្រាំនឹងការពិបាកផ្សេងៗ ដើម្បីឲ្យកូននោះមានជីវិតដ៏ល្អបំផុតតាមដែលអាចធ្វើបាន។
១៦ ស្រដៀងគ្នាដែរ កូនចៅទាំងអស់របស់អាដាមនិងអេវ៉ាជាមនុស្សមិនល្អឥតខ្ចោះពេលពួកគេកើតមក។ ទោះជាយ៉ាងនោះក៏ដោយ ព្រះយេហូវ៉ាស្រឡាញ់និងថែទាំពួកគេ។ (១យ៉ូន. ៤:១៩) ខុសពីឪពុកម្ដាយដែលបានត្រូវរៀបរាប់ក្នុងឧទាហរណ៍នៅខាងលើ ព្រះយេហូវ៉ាមានសមត្ថភាពដោះស្រាយបញ្ហានេះ។ លោកបានកំណត់ថ្ងៃដែលលោកនឹងធ្វើឲ្យទុក្ខវេទនាទាំងអស់របស់មនុស្សលែងមានទៀត។ (ម៉ាថ. ២៤:៣៦) សេចក្ដីស្រឡាញ់របស់ព្រះយេហូវ៉ាគួរជំរុញចិត្តយើងឲ្យស៊ូទ្រាំដូចលោករហូតដល់ពេលកំណត់នោះ។
១៧. តើការរៀបរាប់អំពីលោកយេស៊ូនៅហេប្រឺ ១២:២, ៣លើកទឹកចិត្តយើងយ៉ាងណាឲ្យបន្តស៊ូទ្រាំ?
១៧ ព្រះយេហូវ៉ាគឺជាគំរូដ៏ល្អបំផុតអំពីការស៊ូទ្រាំ។ លោកយេស៊ូក៏បានយកតម្រាប់បិតាលោកក្នុងការស៊ូទ្រាំផងដែរ។ ពេលលោកយេស៊ូនៅផែនដី លោកបានស៊ូទ្រាំនឹងសម្ដីប្រឆាំង ភាពអាម៉ាស់ខ្មាស ហើយក៏បានស៊ូទ្រាំលើបង្គោលទារុណកម្មដើម្បីជាប្រយោជន៍ដល់យើង។ (សូមអាន ហេប្រឺ ១២:២, ៣) គំរូរបស់ព្រះយេហូវ៉ាស្ដីអំពីការស៊ូទ្រាំប្រាកដជាបានឲ្យលោកយេស៊ូមានកម្លាំងដើម្បីស៊ូទ្រាំ ហើយនេះក៏អាចពង្រឹងកម្លាំងយើងដែរ។
១៨. តើពេត្រុសទី២ ៣:៩ជួយយើងឲ្យយល់យ៉ាងណាអំពីប្រយោជន៍ដែលមកពីចិត្តអត់ធ្មត់របស់ព្រះយេហូវ៉ា?
១៨ សូមអាន ពេត្រុសទី២ ៣:៩។ ព្រះយេហូវ៉ាដឹងអំពីពេលដ៏ល្អបំផុតដើម្បីបំផ្លាញពិភពលោកដ៏អាក្រក់នេះ។ ដោយសារលោកមានចិត្តអត់ធ្មត់ មនុស្សមួយក្រុមធំដែលមានគ្នារាប់លាននាក់ កំពុងគោរពប្រណិប័តន៍និងសរសើរលោក។ ពួកគេទាំងអស់គ្នាសប្បាយចិត្តដែលព្រះយេហូវ៉ាបានស៊ូទ្រាំយូរល្មមឲ្យពួកគេកើតមក រៀនឲ្យចេះស្រឡាញ់លោក និងប្រគល់ខ្លួនជូនលោក។ ពេលព្រះយេហូវ៉ាផ្ដល់រង្វាន់ដល់មនុស្សរាប់លាននាក់ដែលបានស៊ូទ្រាំរហូតដល់ទីបញ្ចប់ គឺនឹងសឲ្យឃើញថាការសម្រេចចិត្តរបស់លោកក្នុងការស៊ូទ្រាំគឺត្រឹមត្រូវ។
១៩. តើយើងគួរតាំងចិត្តធ្វើអ្វី ហើយតើយើងនឹងទទួលរង្វាន់អ្វី?
១៩ យើងរៀនពីព្រះយេហូវ៉ាអំពីរបៀបស៊ូទ្រាំដោយមានអំណរ។ ទោះជាសាថានបានបណ្ដាលឲ្យមានការឈឺចាប់ និងទុក្ខវេទនាជាច្រើនក្ដី ព្រះយេហូវ៉ានៅតែជា«ព្រះដែលមានសេចក្ដីសប្បាយ»។ (១ធី. ១:១១) យើងក៏អាចរក្សាអំណរកាលដែលយើងរង់ចាំដោយចិត្តអត់ធ្មត់ឲ្យព្រះយេហូវ៉ាធ្វើឲ្យនាមរបស់លោកបានបរិសុទ្ធ បង្ហាញថាលោកមានសិទ្ធិគ្រប់គ្រង ថារបៀបគ្រប់គ្រងរបស់លោកគឺល្អបំផុត ព្រមទាំងបំផ្លាញអំពើអាក្រក់ទាំងអស់ និងលុបបំបាត់បញ្ហាទាំងអស់ដែលយើងមាននៅសព្វថ្ងៃនេះ។ សូមយើងតាំងចិត្តស៊ូទ្រាំ និងទទួលការសម្រាលទុក្ខ ដោយដឹងថាបិតារបស់យើងនៅស្ថានសួគ៌ក៏កំពុងស៊ូទ្រាំដែរ។ បើយើងធ្វើដូច្នេះ ពាក្យទាំងនេះនឹងក្លាយទៅជាការពិតចំពោះយើងម្នាក់ៗ ដែលថា៖ «អ្នកណាដែលបន្តស៊ូទ្រាំនឹងទុក្ខលំបាក អ្នកនោះមានសុភមង្គល ពីព្រោះពេលដែលព្រះយេហូវ៉ាពេញចិត្តអ្នកនោះ អ្នកនោះនឹងទទួលមកុដជីវិត ដែលព្រះបានសន្យាឲ្យដល់អស់អ្នកដែលរក្សាសេចក្ដីស្រឡាញ់ចំពោះលោក»។—យ៉ា. ១:១២
ចម្រៀងលេខ១៣៩ សូមស្រមៃឃើញខ្លួននៅពិភពលោកថ្មី
^ វគ្គ 5 យើងទាំងអស់គ្នាមានបញ្ហាផ្សេងៗ។ បញ្ហាជាច្រើននៅសព្វថ្ងៃនេះ គឺគ្មានដំណោះស្រាយទេ យើងត្រូវតែស៊ូទ្រាំនឹងវា។ ប៉ុន្តែ មិនមែនមានតែយើងម្នាក់ឯងប៉ុណ្ណោះដែលត្រូវស៊ូទ្រាំទេ។ ព្រះយេហូវ៉ាផ្ទាល់ក៏កំពុងស៊ូទ្រាំនឹងបញ្ហាជាច្រើនដែរ។ ក្នុងអត្ថបទនេះ យើងនឹងពិចារណាបញ្ហា៩ដែលលោកកំពុងស៊ូទ្រាំ។ យើងក៏នឹងរៀនថាការស៊ូទ្រាំរបស់ព្រះយេហូវ៉ានាំឲ្យមានប្រយោជន៍អ្វី ហើយអ្វីដែលយើងអាចរៀនពីគំរូរបស់លោក។
