1-2. I mushind kaay mudy may ma Yehow mady mu mukand a Yeshaay 65:16, 17 mitwambulwiish bwa kutaatameen?

“KULEKEDI NANSHA!” cyaakady ciin bwaal cya program a Cihwiil cya Rejon cya muvw a 2017. Program oow waakady mwiituleej mushind utudy mwa kutaatameen myand yitufiifikil. Kukaady mivw yinaay yikaady yiman kuhit ni leeloow, tucidy teng tutaatameen myand ya mu bulongolody bubiih oobw.

² I makab kaay mawudy muhet mu mafuk mashaal aam? Udy mufwiishok muut mu cisak eeny mulund neeb uwudy mukat eeny? Udy mutatok ni lubeel eeny? Udy muhet makab bwaal ukaady wend ukuluuh eeny? Udy mutatok bwa cikumin, cikis eecy bwa bulwiish eeny? Eecy udy mukab bwa lubeel bu mudy cihuh cya KOVID-19 eeny? I mushind kaay utwiiyumvumvw bwa diifuk diikal myand yoosolol eey kayiciiyok​—katwaakuvulukoh bend myand ya kal eecy kwiiyilang!​—Bal Yeshaay 65:16, 17.

3. Bikaam tulong biny kaabaak, ni bwabiny?

³ Ha bulab, tudy mu kayeel-yeel, ni twiiyiiy kutwiilangan ni mal miimiin meeh mu mafuk miiyiiy. (Mat. 24:21) Biin-biin, tukaakaam kutungunuk ni kulong bwa kukashish micim yiitut. Bwabiny? Bwaal Yeez waakady muleeb neey: “Nwiiyiiy kuhanduk bwa kutaatameen kwiinun.” (Luuk 21:19, NWT) Hatulaalangil ha mushind udy bakwaabw bahit bilengel ni makab maakaabumw ni miitut, kwiitukaakashish bwa kutaatamen byeet.

4. Bwabiny tuleeleeb neey: Yehow i cileejel cilengel cya kutaatameen?

⁴ I ngany udy cileejel cilengel cya kutaatameen? I Yehow Mawej. Dyaalabul eedy dikukeekemeshok eeny? Ki uw mulangiloh, kwaakukemoh bend. Bulongolody oobw budy mu bukookesh bwa Dyabol, ni i bwiiwul teh ni makab. Yehow udy ni bukookesh bwa kuman myand yoos eey teng kaabaak, ki ucidy mwiimanyinok ciisang kuuhal bwa kulong naak. (Rom 9:22) Mu ciisang  eecy, Mawej iitut ucidy mutungunuk ni kutaatameen teng ni mwaakumban diib didyey mulongolol bwa kulong myand. Tutalaay myand citeem yiloolong bwa neey: Yehow ataatameen.

5. I mushind kaay udyobw batobolol diijin dya Mawej, ni ulaalang bicy bwa bwaal oobw?

⁵ Mudyobw batobolol diijin dindiy. Yehow i mukat diijin dindiy, ni ukaakaam bwa muut woos i dineemek. (Ye. 42:8) Diijin dindiy dilengel i biditobolol, kukaady mivw yihit ha 6 000 (Mis. 74:10, 18, 23) Bwaal oobw butangil mu budimy bwa Eden haakady Dyabol (diijin eey dyumvumvwiij “muut udiidingilangan myand”) mufundomw Mawej mudyey mulek kwaakish Adam ni Eev ciit cilengel cyaakadyobw bakaam bwa kwiikal ni musangal. (Kbwa. 3:1-5) Kutangil teng ku ciisang aacy, i bafundomw Yehow hakuleeb neey: i mulek kwaakish baat cidyobw bakaam menmen. Bwaal oobw butaatal cikwaabw Yeez bwa mushind udyobw baleeb bibiih bwa diijin dya taat indiy. Bwa bwaal oobw, ulongweeshel biiyij bindiy bwa kusambil nook: “Taat iitut udy mu diiwul, diijin diibuh dijilang bidimanyik kudy boos.”​—Mat. 6:9.

6. Bwabiny Yehow i mulek ciisang cileeh nook bwa kumaney cilumbw citaatal Bukaleng bwindiy?

⁶ Mudyobw balwiish bufumw bwindiy. Yehow udy ni bukenj boos bwa kulombol diiwul ni bulab, ni mushind udyey ukookesh i mulengel weeh! (Yis. 4:11) Ki Dyabol naabw, i muteet kuhambwiish banjel ni baat hakulang neey: Mawej kiishoh bend ni bukenj bwa kulombol baat. Byaakady bilomb diib bwa kuleej neey: Yehow i mukookesh muwaakan ni mulengel. Bya meej, Mawej i mulek ciisang bwa baat biilombol kaayaabw, bileej neey: kabiin mwa kwiilombol kaayabw, hadyobw kabay bakun Cyakahang mat. (Jer. 10:23) Bu mudy Mawej mutuukij, wiiyiiy kuman myand yoos musang aakaabumw. Biiyiiy kujaadik neey: teng Bukaleng bwindiy ki bwiiyiiy kutwaal diitalal dya biin-biin ha bulab.

7. I bangany baakady batombokel Yehow, ni wiiyiiy kwiibalongel biny?

⁷ Baan bindiy bakwaabw i bamutombokel. Yehow waakady muhang banjel ni baat bawaakan, kabay ni bubiih. Ki mwaan indiy ntomboj, wa mu cisak cya banjel Sataan, (diijin dyumvumvwiij mulwiish) waakady musak baat bawaakan, Adam ni Eev, bwa kutombokelobw Yehow. Banjel ni baat bakwaabw baakady batombok byaabw. (Yuud 6) Hahicil mafuk, baan ba cis cya Izaleel, baakady Mawej munoonoh, baakady bamulek ni kutwaadij kuhambidil bamawej ba makos. (Ye. 63:8, 10) Yehow umvwiil bibiih bu mwaakadyobw bamumb mwanz ku makas. Ki waakady mutaatameen, ni wiiyiiy kutaatameen teng ni diib dikaley mwa kubutul bantomboj boos. Ki wiiyiiy kusangeej baat boos bady bamulamat, bady bataatameen myand yibiih ya mu bulongolody oobw!

8-9. I myand kaay yidyobw badingidil Yehow, ni i biny bitudy mwa kulong?

⁸ Makos mady naam Dyabol. Sataan waakady mufundomw Yoobw mwiin mudimw a Yehow waakady ni myand yijaalal, hakuleeb neey: bahambidil boos ba lulamat ba Yehow, bamukaakadil mudimw bwaal wiibaloolongel myand yilengel. (Yoobw 1:8-11; 2:3-5) Dyabol ucituutungunuk ni kufundomw baat ba Mawej teng ni leeloow. (Yis. 12:10) Bikaam tuleej neey: Sataan i mwiin makos, hatutaataatameen makab ni tushaal balamat Yehow ni hatumuleeleej lukat, teng bu Yoobw, twiiyiiy kwiikal ni musangal tut bataatameen.​—Jak 5:11.

⁹ Sataan ukaakal cikwaabw mudimw ni bafumw ba bitendeleel bya makos, haleeleebobw neey: Yehow i mwiin cikis ni yiy ki ukaakaamish makeng. Bakwaabw baleeleej neey: Hady baan batofw bafw, i Mawej udy mwiibangat bwa bashaal banjel mu diiwul. I kaheej kaay kiin aak!  Ki tudy bamanyik neey: Yehow i Taat udy ni lukat. Hatutaatat bwa lubeel lukasakan eecy bafwiish muut utudy bakat, katwiin mwa kuleeboh bend bibiih bwa Mawej iitut. Hamut a kuleeb nook, twiitaatab neey: kwiiyiiy kwiikal diifuk dikaley mwa kufulok mabenj, ni kusangul bafw. Tudy mwa kwambil muut woos bwa iitab neey: Yehow i Mawej a lukat. Wiiyiiy kutwaal dyaalabul dikumban kudy muut umuleeleeb bibiih.​—Tus. 27:11.

10. Misambw 22:23, 24 uleeleeb biny bwa Yehow?

¹⁰ Makab mahehet biin mudimw bindiy badyey mukat. Yehow i Mawej udy ni lus. Umvumvw bibiih menmen bwa makeng matutaataatameen​—bu mudy bulwiish, mabenj, eecy bwa bilem bituloolong bwaal katwiish bawaakan. (Bal Musambw 22:23, 24, NWT) Yehow umvumvw mutukaakab; i mukat kufulok makab, ni wiiyiiy kwiimafulok. (Fwanyikij Cimwang 3:7, 8; Yeshaay 63:9.) Diifuk dikwaabw “wiiyiiy kwiibakuhul maasoj ku mees, lufw kalwiishoh bend lwiikalok, kakwiishoh bend kuhing kwiikal kudil kwa lufw, ning kwaabakan, ning biitiit.”​—Yis. 21:4.

11. Yehow umvumvw bicy bwa biin mudimw bindiy ba lulamat bakaady bafw?

¹¹ Bwa balund bindiy bakaady bafw. Yehow umvumvw bicy bwa biin mudimw bindiy ba lulamat baan-balum ni baan-bakaj bakaady bafw? Ukaakaam kwiibatal cikwaabw! (Yoobw 14:15) Haakady Abraham mufw, Yehow waakady mumvw bicy? (Jak 2:23) Eecy Moyiz waakadyey wiisamb nend “hal ni hal” eeny? (Cim. 33:11) I mushind kaay udyey ukaam kumvwoh Davih ni bumb ba misambw bakwaabw bend ni kumumbil misambw yilengel yeeh ya kumuh naay lutumb! (Mis. 104:33) Ning mudy balund ba Mawej aab baman kufw, Yehow kiin mwiibavulaminoh bend. (Ye. 49:15) I muvuluk myand yoos yibataatal. Bibl uleeleeb neey: “Bwaal kudy Mawej, baat boos i batal.” (Luuk 20:38) Diifuk dikwaabw, wiiyiiy kwiibasangul,  wiiyiiy kumvw cikwaabw masambil maababw ma buseeb ni kwiitab kuhambil kwaababw. Uw mwiikal mufwiish muut uwudy mukat, myand eey yidy mwa kukukashish ni kubatamij micim yiibuh.

12. I biny byaakakish Yehow kakunying kavul mu mafuk mabiih ma bulekel aam?

¹² Mudy baat babiih bakengesh bakwaabw. Haakady cilumbw cya buntomboj citang mu Eden, Yehow waakady mumanyik neey: shikacil waakady mwa kunyanguk menmen kuuhal kwa kulengeley. Yehow i mukin myand yibiih, kabow, ni cikis bidyok leeloow. Udyaakal teng uleej baat bakeekeng lus—ni bady kabay ni bakwiibaleebel, bu mudy: baan ba shiy ni bakaj ba baat baakady bafw. (Zak. 7:9, 10) Yehow udyaakal umvw bibiih menmen nang-nang hadyobw bakengesh biin mudimw bindiy ba lulamat ni bady mu bulok. Iikal mutwiishibw neey: i mukat woos wa kunudy utaataatameen myand teng bu yiy.

13. I mushind kaay udy cisak cya baan ba baat cyend cinyanguk menmen ku mees kwa Mawej, ni i biny biikaley mwa kwiiy kulong?

¹³ Kunyanguk kwa cisak cya baan ba baat. Sataan i mukat bwa baat bady Mawej muhang mu cimfwaany cindiy, biikal ni bikadil bibiih. Mawej utadil neey: “myand yibiih yaakady yend ni kuvul ha bulab” mu ciisang cya Noweh, “Utadiil wiikunying bwa baat bahangiley ha bulab, wiikungat ni uleeb ney, byaakady muusomw bwa mim kwiibahang.” (Kbwa. 6:5, 6, 11) Shikacil i mulengelok kacy ciisang aacy? Waakweeh, kiin mulengeloh bend! I musangal kaay udy nend Dyabol hadyey utal myand ya cyendend cya masandy yend ni kuvul mu baat mu mitah yoos, ni bilong bya busenj biloolong baat bady ni nyeet yishilangan ni bady ni nyeet yaakaabumw! (Ef. 4:18, 19) Cikwaabw, Sataan udy ni musangal muvul hadyey ukaam bwa bahambidil ba biin-biin bahon mu pekaat. Wiiyiiy kuleej mudyey mukin myand ya busenj ha kubutul bamulong a bibiih boos, bady balek kushituluk.

14. I biny bidy muut mulongel bulab ni nyam bidy Mawej muhang?

¹⁴ Baat i boony bulab budy Mawej muhang “Muut udyaadyaatakany mukwaabw bwa ku mushiy mu mal,” ki cikwaabw, i munyang bulab ni kiin mulam nyam bu mwaakady Yehow mumulomb bwa kulong. (Mul. 8:9; Kbwa. 1:28) Biin myand ya siyans i baleeb neey: Bwa myand yidy baat balong, miliyo ya baat ba mitah * yishil-shilangan biiyiiy kufw mu mivw yikeeh kuuhal ook. Baleeleeb biin-biin neey: kwiiyiiy kwiikal cimvund mu baat! Tufwiifwijok Yehow, bwaal i mulay neey: wiiyiiy “kubutul aab boonyoony bulab,” ni bwa kufutulul bulab butuutul bwa bushaal Paradiiz.​—Yis. 11:18; Ye. 35:1.

15-16. I biny bidy mwa kwiitusak bwa kutaatameen makab mutancy muleeh teng bu Yehow? Twaal cileejel.

¹⁵ Lang bwa myand yoos ya kakunying yidy Taat iitut a mu diiwul mutaatameen mukacy mwa mivw yivul. (Tal kazubw ka neey “ Myand Yidy Yehow Utaatameen.”) Yehow wiiyiiy kubutul bulongolody bubiih myand oobw diib didyey mukat. Ki kutukij kwindiy i musangal iitut! Tudy mwa kulangil ha cileejel eecy. Lang neey: mwaan-mulum ni mukaj indiy, i biibambil neey biiyiiy kulel mwaan aabab. Mwaan oow kaakwiikaloh bend ni makand ma nyeet malengel ni wiiyiiy kwiikal ni shikacil a lutat ni wiiyiiy kufw ucidy mwaan mutofw. Ning biby naak, balel aab bady ni musangal bwa kuhetobw mwaan aabab, ning mwiikaley ni shikacil mukasakan, bu mudyobw bamukat, biiyiiy kutaatameen lutat loos lwiikal mwa kufikil mwaan aaw ni kiihacil ka kulong mwaabab moos bwa mwaan iikal bilengel.

¹⁶ Bya mushind aakaabumw, twiikululwiil toos tudy twaalukil kudy Adam ni Eev, katwiishoh  bend tuwaakan hadyobw bitulel. Cikwaabw, Yehow i mwiitukat ni wiitutaatacil. (1 Jah 4:19) Bishilangan ni balel ba baan ba baat badyobw baleej mu cileejel ciitut, Yehow udy ni bukash bwa kwiiy kuman makab ma baan bindiy. I mulongolol diifuk dikaley mwa kuman makeng ma baan ba baat. (Mat. 24:36) Lukat lwindiy kalwiin mwa kwiitusakok bwa kutaatameen makab mutancy muleeh teng bu yiy eeny?

17. I mushind kaay udy myand yidyobw baleeb bwa Yeez yidy mu mukand a Biin Ebreh 12:2, 3 yitukashish bwa kutungunuk ni kutaatameen?

¹⁷ Yehow i cileejel cilengel cya kutaatameen. Yeez i mulond cileejel cya Taat indiy cya kutaatameen. Haakady Yeez ha bulab, waakady mutaatameen matuk, bumvw ni baakady bamuhoohel ha mutond a mal ni makab bwa bwaal bwiitut. (Bal Biin Ebreh 12:2, 3.) Biin-biin cileejel cya Yehow cya kutaatameen i cikashish Yeez bwa kutaatameen byend makab. Nook, citukaakashish byeet.

18. I mushind kaay udy mukand a 2 Pyeel 3:9 wiitwambulwiish bwa kumvw ciikal Yehow mwa kukumbaj ku dyambulwiish dya kutuukij kwindiy?

¹⁸ Bal 2 Pyeel 3:9. Yehow i mumanyik ciisang cilengel cikaley mwa kubutul bulongolody bubiih oobw. Kutuukij kwindiy i kwambulwiish bwa kukong baat bavul bwa kutweelobw byaabw mu baat miliyo yivul bamuhahambidil ni bamutuutumbish. Baat boos bady ni musangal bwaal Yehow i mutaatameen myand ciisang cileeh kuuhal kwa kwiibalelobw, kulong myand yindiy bwa bamukat, kwiilambulobw kudyey. Dihangandik dya Yehow dya kutaatameen diiyiiy kukumban menmen diifuk diikaley mwa kufut ni musangal miliyo ya baat boos ba kutudy bady bataatameen teng ni ku bulekel!

19. Bikaam twiiswiik bwa kulong biny, ni twiiyiiy kuhet diifut kaay?

¹⁹ Tuloolongel ku cileejel cya Yehow mushind a kutaatameen ni musangal. Ning bwa myand yoos yiitwiitiit ku micim ni bwa makeng mady Sataan mukaamish, Yehow udy teng “Mawej a musangal.” (1 Tim. 1:11, NWT) Tut byeet tudy mwa kushaal ni musangal hatudy batakamin ni kutuukij koos ciisang ciikal Yehow mwa kulong bwa diijin dindiy dishaal dijilang, bwa kutumbish bufumw bwindiy, ni bwa kufulok myand yibiih yoos ni bwa makab matudy naam leeloow. Twiiswiikaay boos bwa kutaatameen ni kuhet dyambulwiish hakumanyik neey: Taat iitut a mu diiwul utaataatameen byend. Tut balong nook, may aam miikaakal ma biin-biin bwa woos wa kutudy: “Mwiin dyakatook i muut ukaakashish micim hamukwaakwaat mal, bwaal hawaaman kuleej kukasakan kwindiy kwa micim, wiiyiiy kuhet buumy bu bulang bulayil Mawej baat bady bamukat.”​—Jak 1:12.