1-2. Ebinywe bya Yehova ebiri omu Isaya 65:16, 17 bikathuhira bithi mw’omuhwa w’erithendi lhuhirira?

“SIWULHUHIRIRE!” w’owabya muthwe owakasisimulha ow’endegheka y’olhuhindano lhw’erijoni olhwa 2017. Endegheka muyathukangania ngoku thwanga ghumira ebitsibu ebya thukabana. Hamabirilhaba myaka ini lhwalibere, kandi thukinalholha embere erighumira omughulhu mubi ono.

² Ni bitsibu byahi ebya wabana lino-lino? Eriholerwa omuhughu kutse omunywani? Obulhwere obukalire? Ebitsibu eby’erikulha omo myaka? Ekitsinduli, amalhwa, kutse eriendereribwa? Ebikalhwiririra omo bulhwere, ng’ekihunzo ky’ekorona? Thukakandira kutsibu ekiro ebyosi ebyo bikendi syahwaho​—eribya isibyanga thasyibukwa kandi isibyanga thasyabyaho!​—Soma Isaya 65:16, 17.

3. Thutholere ithwakolhaki lino, kandi busana naki?

³ Engebe omwa mughulhu ono yikalire, kandi n’omwa buthuku obukasa thwangan’ongera eribana ebitsibu ebikalire. (Mt. 24:21) Neryo kwesi, thutholere ithwalholha embere erikamathya eriyiyinia lyethu. Busana naki? Kundi Yesu mwabugha athi: “Busana n’erihathikana [eriyiyinia] lyenyu mwasyabana engebe yenyu.” (Lk. 21:19) Eriminya abandi nga bakathoka bathi eriyiyinirya ebitsibu ng’ebyethu kyangana kamathya eriyiyinia lyethu.

4. Busana naki ithwabugha thuthi Yehova ky’eky’erileberyako ekyuwene eky’eriyiyinia?

⁴ Nindi oyuli ky’erileberyako ekyuwene eky’eriyiyinia? Yehova Nyamuhanga. Mbwino eky’erisubirya ekyo kyamakuswekya? Kyangana kuswekya, aliwe wamakilengekaniako isiwendi sweka. Ekihugho kino kiri omwa buthoki bwa Diabolo, kandi kyoswire mw’ebitsibu bingyi. Yehova anawithe obuthoki bw’erighunzaho  ebitsibu n’esaha eno, aliwe analindirire ekiro ekyo abirihiraho erikolha ekyo. (Abar. 9:22) Analindirire ekiro ekyo, Nyamuhanga wethu akendi lholha embere eriyiyinia erihika aho kikendi syahikira. Thulebaye ebindu mwenda ebya Yehova abirithwamu eriyiyinirya.

5. Erina lya Nyamuhanga lyabirikinibwa lithi, kandi eki kikaleka iwayowa wuthi?

⁵ Erina liwe erikinibwa. Yehova anzire erina liwe, kandi anzire obuli mundu inialisikya. (Isa. 42:8, NWT) Aliwe ahabw’emyaka nga 6000, erina liwe lyabirikinibwa. (Esy. 74:10, 18, 23) Eki kyatsuka omw’irima lye Edeni omughulhu Diabolo (ekikamanyisaya “Omuhangiriri”) abugha athi Nyamuhanga ak’ima Adamu na Eva b’ekindu ekyo bakayithagha ibo erithoka eritsema. (Enz. 3:1-5) Eritsuka-tsukana n’aho, Yehova abirihangirirwa indi ak’ima abandu b’ebibatholere. Mukyalyambya Yesu busana n’erina lya Thatha wiwe erikinibwa. Busana n’enzumwa eyo, Yesu mwakangirirya abigha biwe erisaba bathi: “Thatha wethu oyuli elhubulha, erina lyawu libye libuyirire.”​—Mt. 6:9.

6. Busana naki Yehova abirileka halhabe obuthuku imwakangania ku yuwithe ehamuli y’erithabalha?

⁶ Erihakanisya ehamuli yiwe y’erithabalha. Yehova yuwithe ehamuli yosi ey’erithabalha olhubulha n’ekihugho, kandi emibere yiwe y’erithabalha y’eyuwene kutsibu. (Erib. 4:11) Aliwe Diabolo abirilengaho erithebya abamalaika n’abandu nuku balengekanaye bathi Nyamuhanga syawithe ehamuli eyo. Omwatsi w’eribya Yehova iyuwithe ehamuli y’erithabalha syangahwere kiro kighuma. Omo menge, Nyamuhanga abiriligha halhabe obuthuku nuku abandu balhangire ngoku abandu bamayithabalhako ahathe obuwathikya bw’Omuhangiki, bakalemawa. (Yer. 10:23) Busana n’erighumisirizya lya Nyamuhanga, omwatsi oyo akendi syahweraho ighuma. Akendi syahamibwa akakangania ngoku Obwami bwiwe busa bw’obukendi syaletha okwa kihugho kw’obuholho n’obwiranda kundu.

7. Ni bahi ababiriyisamambulha oku Yehova, kandi akendi syabakoleraki?

⁷ Eriyisamambulha ly’abandi baana ba Yehova. Yehova mwahangika abamalaika n’abandu ibahikene. Aliwe omumalaika omuyisamambuli Sitani (ekikamanyisaya “Omuhakani”) mwaleka abandu abahikene, Adamu na Eva, ibayisamambulha oku Yehova. Abandi bamalaika n’abandu okwa kihugho mubayiyunga okw’iyisamambulha eryo. (Yuda 6) Enyuma waho, nibya n’abaghuma b’okwa kihanda kya Israeli, abayisoghawa ba Nyamuhanga, mubamughana bamatsuka eriramya esyonyamuhanga sy’amabehi. (Isa. 63:8, 10) Yehova mwayowa iniabirighoberibwa. Nomwabine, abiriyiyinia, kandi akinalholha embere eriyiyinia erihika aho endambi y’erithoghotheryamo abayisamambuli bosi abo yikendi syahikira. Ekyo kikendi syaletha obuholho okwa bathaleghulha, nabo ng’iyo abanemuyiyinirya obubi obuli omo mughulhu mubi ono!

8-9. Ni mabehi wahi awabirikanibwa oku Yehova, kandi thwanga kolhaki busana nagho?

⁸ Amabehi wa Sitani aw’olhughumerere. Sitani mwahangirira omughombe muthaleghulha ya Yobu n’abaghombe ba Yehova abosi athi bakaramaya Nyamuhanga isi busana n’erimwanza. (Yobu 1:8-11; 2:3-5) Namunabwire, Diabolo kw’anemuhangirira abandu. (Erib. 12:10) Ithwe ekya thutholere ithwakolha ly’erikangania ngoku Sitani ni mubehi omw’iyiyinirya ebitsibu byethu n’erisighalha bathaleghulha oku Yehova kundi thumwanzire. Nga Yobu, nethu thukendi syatsumulhwa busana eriyiyinia lyethu.​—Yak. 5:11.

⁹ Sitani akakolesaya abakulhu b’amadini w’amabehi eribugha bathi Yehova syalikwa obulighe kandi bathi yukalethera abandu  b’eriaghalhwa. Abandi nibya bakabugha bathi abaana bakabya bakaholha, Nyamuhanga yukabathwalha kundi akayithagha abandi bamalaika eryongera okwa bali elhubulha. Eri ka ni tsuma Nyamuhanga! Thunasi Yehova ya ndeke. Thwamalhwalha obulhwere obukalire kutse ow’okw’ithwe amaholha, si thuli tsweba Nyamuhanga wethu. Omwakanya k’ekyo, thwikirirye ngoku kiro kighuma akendi syalhungulha emyatsi. Thwangana bwira obuli mundu oyukathuhulikirira ngoku Yehova ni Nyamuhanga w’olhwanzo. Ekyo kikaleka iniathoka erisubirya oyukamutsuma.​—Emi. 27:11.

10. Ebiri omwa Esyonyimbo 22:23, 24 bikabisulhaki oku Yehova?

¹⁰ Eriaghalhwa ly’abaghombe biwe banzwa. Yehova ni Nyamuhanga oyakakwira abandi b’obulighe. Akapona akowa thukalira busana n’eriaghalhwa eryo thunemuyiyinirya​—mbulha ni endereribwa, obulhwere, kutse ebisobyo byethu. (Esyonyimbo 22:23, 24.) Anasi obulhumi obwa thukalhabamo; anzire eribughunzaho kandi akendi bughunzaho. (Thasyalebaya na Eriluayo 3:7, 8; Isaya 63:9.) Ekiro kikendi syahika iniasangulha “emisonia yosi oko meso [wethu]. Kandi olhuholho silhwendi syasabyaho, erisusumana kutse eririra, kutse eriaghalhwa.”​—Erib. 21:4.

11. Yehova akakandiraki okwa baghombe biwe abathaleghulha ababiriholha?

¹¹ Abanywani biwe eriholha. Yehova akayowa athi busana n’abalhume n’abakali abathaleghulha ababiriholha? Akakandira erithasyabalholhako! (Yobu 14:15) Mbwino wangana thera akasasani Yehova ng’akakandira bungahi munywani wiwe Abrahamu? (Yak. 2:23) Kutse ya Musa, oyo akanaya nayu busu okwa busu? (Eri. 33:11) Kandi ka atholere eribya iniakakandira kutsibu Dawudi n’abandi bahandiki b’esyonyimbo bakimba esyonyimbo syabu esyuwene esy’eripipa! (Esy. 104:33) Nomwakine indi banywani ba Nyamuhanga aba banaghotsere  omo lhuholho, Yehova syali athabirirwabo. (Isa. 49:15) Anibukire obuli kandu akosi akabahambireko. Ni bugha ambu, okw’iyo bali, ‘ng’abaliho.’ (Lk. 20:38) Kiro kighuma, akendi syabalhubukya, kandi iniathasyahulikirira emisabe yabu eyikalhua okwa muthima n’eriligha eriramya lyabu. Wamabya iwabiriholerwa, ambi emyatsi eyi iyakuhumulikania n’erikusikya muthima.

12. Kutsibu-tsibu ni kyahi ekikaleka Yehova iniayowa nabi omwa biro bibi eby’enyuma-nyuma bino?

¹² Ababi erinubya abandu. Eriyisamambulha lyabere likatsuka omwa Edeni, Yehova mwaminya ngoku emibere yikendi yongera eritsandira ighuma yithe yuwana. Yehova aponire obubi, obuthe bulingirirania, n’eby’amalhwa ebiri omwa kihugho munabwire. Abiribya inianemutsomana ndeke abathe banga yilhwirako​—abatseke n’abathawithe kiwathikya, esyongubi kuthya n’abakwakali. (Zek. 7:9, 10) Yehova akayowa nabi kutsibu-tsibu akalhangira abaghombe biwe abathaleghulha bakanubibwa n’erihirwa omo ngomo. Wuminye ngoku, anzire inywe bosi inywe mukayiyinaya haghuma nayu.

13. Embere sya Yehova, abandu babiritsanda bathi omwa by’obutswatswa, kandi akendi bikoleraki?

¹³ Abandu eritsanda omwa by’obutswatswa. Sitani anzire eritsandya abandu, abahangikawa omwa kisosekanio kya Nyamuhanga. Nyamuhanga abere akalhangira ngoku obubi bw’abandu bwamabya bungyi omo biro bya Noa, “mwayikubya bwomo busana n’eribumba omundu omo kihugho, mukyamwitha obulighe omo muthima wiwe.” (Enz. 6:5, 6, 11) Eritsuka n’aho, emyatsi yineyathuwana? Eyihi na hake! Sitani atholere eribya iniakatsema akalhangira erikanyirira ery’eby’obutswatswa eby’emiringo yosi, imwamuli obusingiri, n’abandu erikolha emyatsi y’engyingo n’ab’olhubutho lhughuma! (Efe. 4:18, 19) Kwilhabirirya, Sitani akatsema amaleka abali omw’iramya ly’okwenene bakawa omwa kibi. Erighumisirizya lya Yehova likendi syabya likahwa, akendi syakangania kw’aponire kutsibu eby’obutswatswa eby’emiringo yosi.

14. Ni byahi eby’abandu banemukolha okwa bihangikwa bya Nyamuhanga?

¹⁴ Abandu eritsandya ebihangikwa biwe. Omundu syali athasubulira okw’ithabalha omundu busana n’erimuhuthalya lisa, aliwe kandi anemutsandya ekihugho n’ebisoro ebya Yehova aha omundu eritheya. (Omu. 8:9; Enz. 1:28) Abandi banya sayansi bakabugha bathi ebya bandu bakakolha byangana leka eyindi miliyoni nguma y’emisindo y’ebisoro n’ebirimwa iyahwaho, omo myaka mike buyira eyikasa. Kwesi ky’ekikaleka ibabugha bathi eby’obuhangwa biri omwa kabi! Eky’obutseme, Yehova abirilhaghanisya “erithoghothya abandu abakatsandaya ekihugho” kandi iniakolha ekihugho kyosi mwa paradiso.​—Erib. 11:18; Isa. 35:1.

15-16. Ni kyahi ekikendi leka ithwayiyinia haghuma na Yehova? Iha eky’erileberyako.

¹⁵ Thalengekania okwa bitsibu byosi ebikaponesaya ebya Thatha wethu w’elhubulha abiriyiyinirya ahabw’esyongumi sy’emyaka. (Lebaya akasanduko “ Ebya Yehova Akayiyiniraya.”) Yehova angana ghunzaho omughulhu mubi ono okwa ndambi yosi-yosi. Aliwe erighumisirizya liwe ni mughisa okw’ithwe! Thwangana kirengekaniako omo nzira eno. Thubughe thuthi omulhume na mukali wiwe ibabwirwa indi omwana wabu oyuli omo nda amaghalha wiwe syuwene nahake kandi syendi syabya n’engebe eyuwene kandi akendi syaholha lhuba. Nomwakine indi obulembere bwiwe bukendi syakalha, ababuthi abo bakatsema akabuthwa. Olhwanzo olhwa bawithire omwana oyo lhukaleka ibayiyinirya ekitsibu kyosi-kyosi nuku balhangire bathi omwana wabu akabya iniane omwa ngebe eyuwene ngoku kyanga thokekana.

¹⁶ Kuthya, abaana ba Adamu abosi bakabya isibahikene bakabuthwa omwa kihugho  kino. Aliwe, Yehova abanzire kandi abatsomene. (1 Yn. 4:19) Kandi erithendibya ng’ababuthi abali omwa ky’erileberyako kyethu, Yehova iyo anganayira eky’akakolha. Abirihiraho ekiro ekyo akendi syaghunziramo amalhwere wosi awakahika okwa bandu biwe. (Mt. 24:36) Mbwino olhwanzo lhwiwe silhwanga leka thukayiyinia haghuma nayu kyamabya ikikinayithaghisibawa?

17. Ebihambire oku Yesu ebiri omwa Abaebrania 12:2, 3 byanga thuhiramo bithi omuhwa w’erilholha embere eriyiyinia?

¹⁷ Yehova abirithuhiriraho eky’erileberyako ekihikene eky’eriyiyinia. Yesu mwathoka erigherererya eriyiyinia lya Thatha wiwe. Iniane okwa kihugho, Yesu mwayiyinirya ebitsumi, erihemulhwa, n’omuthi w’amaghali busana nethu. (Soma Abaebrania 12:2, 3.) Ahathe erithika-thika, eky’erileberyako kya Yehova eky’eriyiyinia mukyaleka Yesu iniayiyinia. Nethu kyangana thughumya.

18. Ebiri omu 2 Petero 3:9 bikathuwathikaya bithi eriyitheghererya ekya erighumisirizya lya Yehova likaberereraya?

¹⁸ Soma 2 Petero 3:9. Yehova anasi endambi eyitholere ey’erithoghotheryamo ekihugho kibi kino. Erighumisirizya liwe lyabirileka endeko nene eyabirihika omwa syomiliyoni iyahindanibwa, kandi bakamuramaya n’erimupipa. Abosi batsemire busana na Yehova eriyiyinia ahabw’obuthuku bosi obu ibo erithoka eributhwa, erigha erimwanza, n’eriyihayo okw’iyo. Omughaso wa Yehova erithwamu eriyiyinia akendi syalhangirika, n’obutseme bunene akahemba esyomiliyoni sy’okw’ithwe ababiriyiyinia erihika okwa nduli!

19. Thutholere ithwathwamu erikolhaki, kandi thukendi syahebwa lhuhemboki?

¹⁹ Thuk’ighira oku Yehova ngoku thwanga yiyinia ithunatsemire. Nomwakine indi Sitani abirilethaho emilyambo n’eriaghalhwa lingyi, Yehova akasighalha inina “Nyamuhanga oyutsemire.” (1 Tim. 1:11, NWT) Nethu thwangana sighalha ithunatsemire thukalinda omw’ighumisirizya omughulhu Yehova akendi syayira erina liwe mwa libuyirire, erikangania ku yuwithe ehamuli y’erithabalha, erighunzaho obubi, n’erighunzaho ebitsibu byethu ebyosi. Kwesi ka thuthwemu eriyiyinia n’erihumulikanibwa omw’iminya ngoku Thatha wethu w’elhubulha nayu anemuyiyinia. Thwamakolha ekyo, obuli mughuma w’okw’ithwe iniakendi yilhangirira okwenene kw’ebinywe bino: “Obutseme buli n’omundu oyukasika omw’irengwako, kusangwa amabirithoka erilengwako asyangirira embitha y’engebe, eyo Nyamuhanga abirilhagha abamwanzire.”​—Yak. 1:12.