1-2. Aw di wɔd dɛn we Jiova tɔk na Ayzaya 65:​16, 17 de ɛnkɔrej wi lɛ wi nɔ giv-ɔp?

DI TIM fɔ wi 2017 kɔnvɛnshɔn program na bin “NƆ GIV-ƆP!” Di program bin ɛp wi fɔ no aw wi go bia wi prɔblɛm dɛn. Na 4 ia dɔn pas frɔm we wi bin gɛt da kɔnvɛnshɔn de, ɛn wi stil de bia di tin dɛn we de mit wi na dis wikɛd wɔl.

² Us prɔblɛm dɛn yu dɔn gɛt dis biɛn tɛm? Wan pan yu fambul ɔ yu padi dɛn dɔn day? Yu gɛt bad bad sik we go mek yu day? Layf nɔ izi fɔ yu bikɔs yu de ol? Yu de sɔfa bikɔs nachɔral dizasta bin apin usay yu de, pipul dɛn de fɛt-fɛt ɔ pipul dɛn de agens yu? Ɔ yu de sɔfa bikɔs ɔf di COVID-19 pandɛmik ɔ ɔda sik we tan lɛk am? Wi de rili wet fɔ di tɛm we wi go fɔgɛt bɔt ɔl dɛn prɔblɛm dɛn ya ɛn we dɛn nɔ go ɛva apin igen!—Rid Ayzaya 65:​16, 17.

3. Wetin wi fɔ du naw, ɛn wetin mek?

³ Layf na dis wɔl nɔ rili izi, ɛn sɔntɛm wi go gɛt fɔ bia prɔblɛm dɛn we wɔs pas dis tumara bambay. (Mat. 24:​21) So wi nid fɔ kɔntinyu fɔ lan aw fɔ bia mɔ ɛn mɔ. Wetin mek? Na bikɔs Jizɔs bin se: “We una bia, una go sev una layf.” (Lyuk 21:​19) Wi go ebul fɔ bia mɔ ɛn mɔ we wi tink bɔt aw ɔda pipul dɛn de bia prɔblɛm dɛn we fiba wi yon.

4. Wetin mek wi go se na Jiova sɛt di bɛst ɛgzampul we i kam to aw fɔ bia?

⁴ Udat sɛt di bɛst ɛgzampul we i kam to aw fɔ bia? Na Jiova Gɔd. Da ansa de sɔprayz yu? Sɔntɛm yu sɔprayz. Bɔt if yu tink bɔt am yu go ɔndastand wetin mek. Na di Dɛbul de kɔntrɔl dis wɔl, ɛn i ful-ɔp wit bɔku prɔblɛm dɛn. Jiova gɛt di pawa fɔ mek ɔl dɛn prɔblɛm dɛn ya dɔn wantɛm wantɛm, bɔt i de wet fɔ di de we i go du dat tumara bambay. (Rom. 9:​22) Rayt naw, wi Gɔd de  kɔntinyu fɔ bia te da tɛm de rich. Lɛ wi tɔk bɔt nayn tin dɛn we Jiova dɔn disayd fɔ bia.

5. Aw dɛn dɔn gi Gɔd badnem, ɛn aw dat de mek yu fil?

⁵ Di badnem we dɛn dɔn put pan am. Jiova lɛk in nem, ɛn i want mek ɔlman rɛspɛkt am. (Ayz. 42:​8, NWT) Bɔt insay di sik tawzin ia we dɔn pas, dɛn dɔn gi am badnem. (Sam 74:​10, 18, 23) Dis bin stat na di gadin na Idɛn we di Dɛbul (we min “Pɔsin we de pwɛl sɔmbɔdi in nem”) bin lay se Gɔd nɔ want mek Adam ɛn Iv gɛt di tin we dɛn nid we go mek dɛn gladi. (Jɛn. 3:​1-5) Frɔm da tɛm de naw, dɛn dɔn lay pan Jiova se i nɔ de gi mɔtalman di tin dɛn we dɛn rili nid. Jizɔs in at bin de pwɛl we dɛn bin de gi in Papa badnem. Na dat mek i bin tich in disaypul dɛn fɔ pre se: “Wi Papa we de na ɛvin, lɛ ɔlman tek yu nem as sɔntin we oli.”—Mat. 6:​9.

6. Wetin mek Jiova dɔn alaw bɔku tɛm fɔ pas bifo i pruv se na in gɛt di rayt fɔ rul di ɛvin ɛn di wɔl?

⁶ Di chalenj fɔ se i nɔ gɛt rayt fɔ rul. Na Jiova nɔmɔ gɛt di rayt fɔ rul di ɛvin ɛn di wɔl, ɛn i de rul di bɛst we. (Rɛv. 4:​11) Bɔt di Dɛbul dɔn tray fɔ ful di enjɛl dɛn ɛn mɔtalman fɔ lɛ dɛn tink se Gɔd nɔ gɛt da rayt de. I go tek tɛm fɔ pruv se na Jiova gɛt di rayt fɔ rul ɛn in na di bɛst rula. Bikɔs Gɔd gɛt sɛns, i dɔn alaw mɔtalman fɔ rul dɛnsɛf fɔ lɔng tɛm so dat dɛn go si se dɛn nɔ go ebul rul dɛnsɛf fayn fayn wan if dɛn nɔ lisin to di Wan we mek dɛn. (Jɛr. 10:​23) So bikɔs Gɔd de peshɛnt, nɔbɔdi nɔ go dawt se na in gɛt di rayt fɔ rul di ɛvin ɛn di wɔl. Ɔlman go no se Jiova de rul di bɛst we ɛn na in Kiŋdɔm nɔmɔ go mek wi gɛt tru tru kolat, ɛn natin nɔ go mek wi fred na dis wɔl.

7. Udat dɛn dɔn tɔn dɛn bak pan Jiova, ɛn wetin i go du to dɛn?

⁷ Di tɔn we sɔm pan in pikin dɛn tɔn dɛn bak pan am. We Jiova bin mek di enjɛl dɛn ɛn mɔtalman, dɛn bin pafɛkt ɛn dɛn nɔ bin gɛt wan bɔt. Bɔt di enjɛl we kam fɔ bi Setan (we min “Pɔsin we de agens ɔda pɔsin”) bin tɔn in bak pan Jiova, ɛn i bin mek di pafɛkt mɔtalman dɛn we na Adam ɛn Iv dɛnsɛf tɔn dɛn bak pan Jiova. Dɔn bak, ɔda enjɛl ɛn mɔtalman dɛn bin tɔn dɛn bak pan Jiova. (Jud 6) Leta, ivin sɔm pan di Izrɛlayt dɛn we na bin Gɔd in pipul dɛn we i dɔn pik, bin tɔn dɛn bak pan am, ɛn dɛn bigin fɔ wɔship lay lay gɔd dɛn. (Ayz. 63:​8, 10) Jiova bin gɛt rayt fɔ fil bad fɔ we dɛn kɔmɔt biɛn am. Bɔt i stil de bia, ɛn i go kɔntinyu fɔ bia te di tɛm kam we i go dɔnawe wit ɔl di wan dɛn we tɔn dɛn bak pan am. Da tɛm de, Jiova ɛn in fetful savant dɛn go gladi fɔ we dɛn nɔ gɛt fɔ kɔntinyu fɔ bia di bad tin dɛn we de apin na dis wɔl!

8-9. Wetin na di lay tin dɛn we dɛn kin tɔk bɔt Jiova, ɛn wetin wi go du bɔt dat?

⁸ Di lay dɛn we Setan de lay ɔltɛm. Setan bin lay pan Job ɛn Jiova in ɔda fetful savant dɛn se, dɛn jɔs de wɔship Jiova bikɔs ɔf di tin dɛn we I de du fɔ dɛn ɛn di tin dɛn we I go du fɔ dɛn. (Job 1:​8-11; 2:​3-5) Ɛn te tide, di Dɛbul de kɔntinyu fɔ lay pan mɔtalman. (Rɛv. 12:​10) Wisɛf go ɛp fɔ pruv se na lay Setan de lay bay we wi de bia wi prɔblɛm dɛn ɛn kɔntinyu fɔ de biɛn Jiova bikɔs wi lɛk Am. Ɛn if wi kɔntinyu fɔ bia, Jiova go blɛs wi jɔs lɛk aw i bin blɛs Job.—Jems 5:​11.

⁹ Setan de yuz bigman dɛn pan lay lay rilijɔn fɔ tɔk se Jiova wikɛd ɛn na in de  mek mɔtalman de sɔfa. Sɔm pan dɛn kin ivin se we pikin dɛn day, na Gɔd dɔn tek dɛn bikɔs i nid mɔ enjɛl dɛn na ɛvin. Dis na big big fityay to Jiova. Bɔt wi no se Jiova na wi Papa we lɛk wi. So we wi sik siriɔs wan ɔ we pɔsin we wi lɛk day, wi nɔ de ɛva blem wi Gɔd. Bifo dat, wi gɛt fet se di tɛm go kam we i go mɛn di wan dɛn we sik ɛn gi layf bak to di wan dɛn we dɔn day. Lɛ wi tɛl ɔlman we go lisin to wi se Jiova na Gɔd we lɛk wi. Dat go mek i gi fayn ansa to di wan we de briŋ fityay to am.—Prɔv. 27:​11.

10. Wetin Di Sam Dɛm 22:​23, 24 tɛl wi bɔt Jiova?

¹⁰ Di sɔfa we in savant dɛn we i rili lɛk de sɔfa. Jiova na Gɔd we gɛt sɔri-at. I kin rili fil am we i de si wi de sɔfa, sɔntɛm bikɔs pipul dɛn de du bad tin to wi, wi sik, ɔ bikɔs wi nɔ pafɛkt. (Rid Di Sam Dɛm 22:​23, 24.) Jiova ɔndastand di pen we wi de fil; i want fɔ stɔp am, ɛn i go stɔp am. (Luk Ɛksodɔs 3:​7, 8; Ayzaya 63:​9.) Di tɛm go kam we i “go wep ɔl di kray wata na [wi] yay, ɛn day nɔ go de igen, pwɛlat ɛn pen nɔ go de igen, ɛn [wi] nɔ go kray igen bikɔs [wi] at pwɛl.”—Rɛv. 21:​4.

11. Aw Jiova de fil bɔt in fetful savant dɛn we dɔn day?

¹¹ Di day we in padi dɛn dɔn day. Aw Jiova de fil bɔt di day we fetful man ɛn uman dɛn dɔn day? I rili want fɔ si dɛn bak! (Job 14:​15) Yu ebul imajin di kayn we aw Jiova de mis in padi Ebraam? (Jems 2:​23) Ɔ di we aw i de mis Mozis we i bin de tɔk to “fes to fes”? (Ɛks. 33:​11) Ɛn i de rili wet fɔ di tɛm we i go yɛri we Devid ɛn di ɔda man dɛn we rayt di sam buk de siŋ fayn fayn siŋ dɛn fɔ prez am! (Sam 104:​33) Pan ɔl we dɛn pipul dɛn ya we na Jiova in padi dɛn dɔn day, i nɔ  fɔgɛt dɛn. (Ayz. 49:​15) I de mɛmba ɔltin bɔt dɛn. Di Baybul se, “to am dɛn ɔl de alayv.” (Lyuk 20:​38) Di tɛm go kam we i go gi dɛn layf bak, ɛn i go yɛri we dɛn de pre to am wit ɔl dɛn at, ɛn i go gladi fɔ di we aw dɛn de wɔship am. If pɔsin we yu lɛk dɔn day, yu go gɛt kɔrej we yu mɛmba dɛn tin dɛn ya.

12. Wetin de apin insay dis las dez we de rili mek Jiova in at pwɛl?

¹² Di we aw wikɛd pipul dɛn de mek ɔda pipul dɛn sɔfa. We Setan, Adam, ɛn Iv bin tɔn dɛn bak pan Jiova na di gadin na Idɛn, Jiova bin no se tin go jɔs de wɔs, ɛn i nɔ go bɛtɛ atɔl. Jiova et di wikɛdnɛs ɛn di fɛt-fɛt we de apin na di wɔl tide ɛn we pipul dɛn nɔ de trit dɛn kɔmpin dɛn fia wan. I dɔn de sho ɔltɛm se i rili bisin bɔt di wan dɛn we nɔ gɛt pɔsin fɔ ɛp dɛn, lɛk di wan dɛn we wik ɛn we nɔ ebul protɛkt dɛnsɛf, dat na pikin dɛn we nɔ gɛt mama ɛn papa ɛn uman dɛn we dɛn man dɔn day. (Zɛk. 7:​9, 10) Jiova kin rili fil am we i de si we pipul dɛn de mek in fetful savant dɛn sɔfa ɛn we dɛn de put dɛn na prizin. Wan dawt nɔ de se i lɛk una ɔl we de bia jɔs lɛk aw insɛf de bia.

13. Us shemful tin dɛn we Gɔd de si se mɔtalman de du, ɛn wetin i go du bɔt dat?

¹³ Di bad we aw mɔtalman de liv. Gɔd mek mɔtalman fɔ falamakata am, bɔt Setan lɛk fɔ mek mɔtalman du bad bad tin dɛn. We Gɔd bin “si se mɔtalman in wikɛdnɛs dɔn pasmak” insay Noa in tɛm, Jiova “fil am bad we i mek mɔtalman ɛn put am na di wɔl. In at pwɛl.” (Jɛn. 6:​5, 6, 11) Fɔ se di wɔl dɔn bɛtɛ frɔm da tɛm de? Nɔ, i nɔ bɛtɛ atɔl! Di Dɛbul gladi pasmak fɔ si we bɔku pipul dɛn de du ɔlkayn mami ɛn dadi biznɛs di we aw Gɔd nɔ want, dat na di wan dɛn we man ɛn uman dɛn kin du wit dɛnsɛf, ɛn di wan dɛn we man ɛn man ɔ uman ɛn uman dɛn kin du! (Ɛfi. 4:​18, 19) Setan kin rili gladi we i de mek pipul dɛn we de wɔship Jiova de kɔmit siriɔs sin. We Jiova nɔ go kɔntinyu fɔ peshɛnt igen, i go sho se i et we pipul dɛn de du mami ɛn dadi biznɛs di we aw i nɔ want bay we i go dɔnawe wit ɔl di pipul dɛn we nɔ go gri fɔ chenj.

14. Wetin mɔtalman de du to di wɔl ɛn di animal dɛn?

¹⁴ We mɔtalman de pwɛl di wɔl. Mɔtalman nɔ jɔs de “sɔprɛs di wan we i gɛt pawa pas” bɔt dɛn nɔ de kia fɔ di wɔl ɛn di animal dɛn lɛk aw Jiova se dɛn fɔ du. (Ɛkli. 8:​9; Jɛn. 1:​28) Sɔm sayɛnsman dɛn se di tin dɛn we mɔtalman de du go mek insay di nɛks tu-tri ia, wan milyɔn difrɛn kayn animal ɛn plant dɛn nɔ go de igen. I izi fɔ ɔndastand wetin mek pipul dɛn de wɔri bɔt di tin dɛn we de arawnd wi. Wi tɛl Jiova tɛnki fɔ we i dɔn prɔmis se i go “pwɛl di wan dɛn we de pwɛl di wɔl,” ɛn i go mek di wɔl bi Paradays.—Rɛv. 11:​18; Ayz. 35:​1.

15-16. Wetin mek wi fɔ bia lɛk Jiova? Gi wan ɛgzampul.

¹⁵ Tink bɔt ɔl di prɔblɛm dɛn we wi Papa we de na ɛvin dɔn de bia fɔ lɔng lɔng tɛm. (Luk di bɔks we se “ Wetin-ɛn-Wetin Jiova De Bia?”) Jiova ebul fɔ dɔnawe wit dis wikɛd wɔl ɛnitɛm we i want. Bɔt di peshɛnt we i de peshɛnt dɔn rili ɛp wi! Tink bɔt dis ɛgzampul. Imajin se dɔktɔ tɛl wan man ɛn in wɛf se di pikin we de na di uman in bɛlɛ gɛt siriɔs wɛlbɔdi prɔblɛm, ɛn we dɛn bɔn am i nɔ go ɛva ebul fɔ ɛnjɔy in layf ɛn i go day we i yɔŋ. Bɔt di  mama ɛn papa gladi fɔ we dɛn bɔn di pikin, pan ɔl we i nɔ go izi fɔ lɛ dɛn kia fɔ am. Bikɔs dɛn lɛk dɛn pikin, dɛn go bia ɛni prɔblɛm jɔs fɔ mek dɛn gi am di bɛst layf we i go ebul fɔ gɛt.

¹⁶ Semweso, ɔl di pikin dɛn we Adam ɛn Iv bɔn nɔ pafɛkt. Bɔt stil, Jiova lɛk dɛn ɛn i de kia fɔ dɛn. (1 Jɔn 4:​19) Ɛn Jiova nɔ tan lɛk di mama ɛn papa we de na di ɛgzampul we wi tɔk bɔt bikɔs in ebul fɔ mek in pikin dɛn lɛf fɔ sɔfa. I dɔn pik di tɛm we i go pul ɔl di tin dɛn we de mek mɔtalman sɔfa. (Mat. 24:​36) Jiova in lɔv fɔ mek wisɛf kɔntinyu fɔ bia te in tɛm rich.

17. Wetin mek di tin we Ibruz 12:​2, 3 tɔk bɔt Jizɔs de ɛnkɔrej wi fɔ kɔntinyu fɔ bia?

¹⁷ Jiova sɛt di bɛst ɛgzampul we i kam to aw fɔ bia. Jizɔs bin falamakata di bia we in Papa de bia. We i bin de na dis wɔl, i bin bia we dɛn tɔk bad bɔt am, we dɛn mek i shem, ɛn we i bin de na di tik we i sɔfa pan fɔ wi sek. (Rid Ibruz 12:​2, 3.) Na Jiova in ɛgzampul bin gi Jizɔs di trɛnk fɔ bia di tin dɛn we bin apin to am. In ɛgzampul go gi wi bak di trɛnk we wi nid.

18. Aw 2 Pita 3:​9 ɛp wi fɔ ɔndastand di tin dɛn we dɔn apin bikɔs Jiova peshɛnt?

¹⁸ Rid 2 Pita 3:​9. Jiova no di bɛst tɛm fɔ dɔnawe wit dis wikɛd wɔl. Bikɔs i de peshɛnt, bɔku mɔtalman dɛn dɔn kam fɔ sabi am, ɛn naw bɔku bɔku pipul dɛn de wɔship am. Dɛn ɔl gladi fɔ we Jiova dɔn bia te dɛn bɔn dɛn, dɛn lan fɔ lɛk am, ɛn gi dɛn layf to am. Bay di tɛm we Jiova go blɛs di bɔku bɔku pipul dɛn we bia te di ɛnd, ɔlman go kam fɔ no se na di rayt tin i bin disayd fɔ du bay we i de peshɛnt!

19. Wetin wi fɔ mekɔp wi maynd fɔ du, ɛn us blɛsin wi go gɛt?

¹⁹ Jiova in ɛgzampul de ɛp wi fɔ no aw fɔ bia wit gladi-at. Pan ɔl we Setan de mek pipul dɛn sɔfa ɛn gɛt pwɛlat, Jiova de kɔntinyu fɔ bi di “Gɔd we gladi.” (1 Tim. 1:​11) Wisɛf go kɔntinyu fɔ gladi as wi de peshɛnt wet fɔ lɛ Jiova mek in nem oli, sho se na in gɛt di rayt fɔ rul, dɔnawe wit ɔl di bad tin dɛn we de apin, ɛn pul ɔl di prɔblɛm dɛn we wi gɛt naw. Lɛ wi mekɔp wi maynd fɔ bia ɛn gɛt kɔrej bikɔs wi no se wi Papa we de na ɛvin insɛf de bia. If wi du dat, di tin we dis vas tɔk go apin fɔ ɛniwan pan wi. I se: “Di wan we kɔntinyu fɔ bia we sɔntin tɛst am gɛt gladi-at, bikɔs we Gɔd gladi fɔ am, i go gɛt di krawn we na layf, we Jiova dɔn prɔmis di wan dɛn we kɔntinyu fɔ lɛk Am.”—Jems 1:​12.