1-2. Vɛɛ diomnda cho o Aisaya 65:​16, 17 niŋndaŋ la mala yɛ naa ŋ vi ŋdial te?

SUƐI lebolle le bɔŋaŋ naa bɛndoo le o wɔsii 2017 wa ni maa, “WU ŊDIAL TE”! Mi bɔŋaŋ koŋ mala naa le chɔɔ mɛɛ naŋ biunuŋ bahawɛila komal naa laŋ yɛ. Wɔsilaŋ la hiɔɔlu la hiou niŋ ni. Kɛ a koŋ kpou, ŋ cho hiouwɔɔ lachi a sɔɔŋ wɔɔŋ cho naa komallo o chieeŋndo hoo niŋndoŋ biuwɔŋndo.

² Sɔɔŋ kuɛɛ ŋ cho yɛ biuwɔŋndo suŋ suŋ? Baa waŋndo opilɛ o yuŋgu numndo niŋ ɔɔ wana ŋ kaala wo vi niŋ pa waalioo? Baa naa kala kalaa ɔɔ yuuwɛi cho num paaliaŋndo ni? Kpundɔɔ ɔɔ sɔŋgɔɔ del o tanda nyaa niŋ ni mi keŋ piiliaŋ num? Baa a cho num pa nyɛpalaa tusioo choo le laalaŋ numndo? Ɔɔ, bahawɛila naa Kolonaa hoo cho naa chuuwo laŋ la cho num saaŋgiaa ni? Ŋ cho le hɔl o nɛi le teleŋ sɔɔŋ muŋ kpou cho hunɔɔ faŋaŋndo! Nduyɛ fɛɛŋ bɛɛ ŋ yiyaŋ lɛ niŋ a muŋ okɔɔ le.—Nuawɔ Aisaya 65:​16, 17.

3. Yɛɛ naŋ nɔ yɛ miŋ tosa suŋ suŋ, nduyɛ le yɛɛ?

³ Yoomoo cho o kala kpoke o chieeŋ wɔɔŋndo hoo niŋ. Nduyɛ naapum sɔɔŋ palaŋ cheleŋ cho naa komal o chilaŋ niŋ, mbo hiou bɛɛ muŋ. (Maa. 24:​21) Hei chɔm kpendekele maa ŋ nɔ miŋ hiou lachi a biuwɔŋndo. Le sabu yɛɛ? Kanifuule, mi Chiisu dimi aa: “Te la biunuŋ pɛ haaa o mɛɛlulaŋ, la cho yoomula nyalaŋ piŋi” (Luku 21:​19) Wanaa bɔɔbɔɔ cho biuwɔŋndo bahawɛila naŋ nɔ laŋ. Te ŋ yiyaŋ pɛ a nda okɔɔ, ŋ tiuba miŋ biunuŋ.

4. Le yɛɛ naŋ dimi yɛ maa Chɛhowa kɛsi tamasi kɛndɛ kɛndɔɔ ni le kaa biuwaŋndo nɔɔ?

⁴ Nɛɛ kɛsullɛ naa tamasi kɛndɛ kɛndɔɔ le kaa biuwaŋndo nɔɔ? Ndu cho Chɛhowa Mɛlɛka ni. Mi kɔndɔfillo bii num te a yiyaŋ pɛ a muli nyunaa hoo okɔɔ. Chieeŋndo hoo kpou cho Setana o ba bɛŋgu, nduyɛ o cho o piaa cha a bahawɛilaŋ. Chɛhowa nɔ kpaayaa le mbo chii bahawɛilaŋ ndaŋ kpou o lepilɛ niŋ. Kɛ o cho chumndo le mbo huŋ chii laŋ kpou o chilaŋ niŋ. (Luomaŋ. 9:​22) Le suŋ suŋ ndɔ, o cho hiouwɔɔ lachi a biuwɔŋndo haaa mi teleŋ  o kɛɛsiaa wo fuuluu. Ŋ yaasiaŋndɔ sɔɔŋ ŋɔmahiɔɔlu ŋ Chɛhowa cho biuwɔŋndo suŋ suŋndoŋ.

5. Vɛɛ diola Mɛlɛkalaŋ la looku yɛ tɔɔ wɔɔŋndo sɔla, nduyɛ vɛɛ ŋ yiyaŋ yɛ a ndi okɔɔ?

⁵ Tɔɔ wɔɔŋ cho o diolaŋ ndɔlaŋ choo wo. Chɛhowa kaala diola ndɔlaŋ, nduyɛ o yeema mi wana o wana ke laŋ bɛɛleŋ. Baabuiyo dimi aa: “Ya cho [Chɛhowa, NWT] ni. Diola nilaŋ la cho laŋ ni. I piɔuwaŋ naŋɔɔ cho le ya wo a wana o wana le. Saŋgala waŋnda chieeya a nɔ ma ke ya wo, I chɛl, ma ke mɛlɛkaa cheleŋnda saŋgala koŋ te.” (Aisaya 42:​8) Kɛ i cho suɛi imɔnɔ le sinaa maa o cho niŋ le wɔsilaŋ waalaŋ la ŋɔmpum, waŋnda cho tuŋ hiouwɔɔ lachi a tɔɔ wɔɔŋndo handɔɔ o diola ndɔlaŋ choo. (Sam 74:​10, 18, 23) Hei kpou kanduŋ o kpeloo Idɛŋ niŋ a teleŋ Setana ɔɔ wana lachoowaa hui Adam nda Ifi wo. Mbo dimul nda maa Mɛlɛka yeema nda ma wa a kɔl kɛndɛ le, nyɛ koŋ o kuuna nda yɔm koŋ dioo ni. (Chɛ. 3:​1-5) Chɔŋ niŋ a teleŋ koŋ, waŋnda cho wɔ hiouwɔɔ lachi a diola Chɛhowalaŋ tɛɛmbuu wo maa, o yeema mi wanda chieeya wa a kɔl kɛndɛ kpeekpei le. Chiisu ndoo tambu bɔɔ kɔl le mɛɛ waŋnda tɛɛmbuu diola Finya ndɔlaŋ yɛ. Le hei mbo dimul buɛiyaa nduaa aa: “Te la wa piɛileŋ pɛ, la dimi aa: ‘Finya naa o choo choo niŋ, maa diola numndaŋ la wa la diandaa.’”—Maa. 6:​9.

6. Le yɛɛ Chɛhowa chɛllɛ niŋ le teleŋ vilɛi le mi wanachioo wa chaaŋ ndɔ choo masa?

⁶ Di o nɔ le waa masa wo simullo. Chɛhowa kinɛi nɔ dioo ni le waa masaa o choo choo niŋ a o chieeŋndo choo. Nduyɛ, wana tuu masale ndɔleŋ a le kɛ kɛ le. (Sɔɔŋ. 4:​11) Kɛ Setana kindiŋ niŋ le maalikɛiya, a waŋnda chieeya huiyo maa Chɛhowa nɔ di koŋ te. Teleŋndo tau yeemaŋ ni le mi Chɛhowa chɔm maa ndu kpeekpei nɔ dioo ni le waa masa. Le mɛɛ Chɛhowa cho Mɛlɛka taasi yɛ, mbo chɛl le teleŋ vilɛi le mi wanachioo wa chaaŋ ndɔ choo masa. Nduyɛ naapila che niŋ kpendekele maa te o cho mi ndu wa Masa le, wanachioo sɔla batiuwaa kɛ kɛ le. (Chɛlui. 10:​23) Le sabu Chɛhowa cho biuwɔŋndo cho ni, le mbo huŋ chii suɛi hei o le pilɛ niŋ kpe. Hei cho tosa mi diola ndɔlaŋ la sɔla diondɔɔ. Nduyɛ mbo chɔm vɛlɛ maa Masale ndɔleŋ kinɛi le tiuba ni mi le hiŋ a kɔl nyuloo vɛlɛ a hɛnɛkɛyɛi o chieeŋndo choo.

7. Nɛɛ waa simul lɛ Chɛhowa, nduyɛ yɛɛ o cho yɛ hunɔɔ tosa a nda?

⁷ Simul chuauwaa nduaa apum simul ndu wo. Mi Chɛhowa toosiaa maalikɛiya a Adam nda Ifi walaŋ. Ndaa nɔ sɔŋ o sɔŋ te. Kɛ mi maalikɛinɔ Chɛhowaa opilɛ simul ndu. Ndu cho yɛ Setana ɔɔ Wana Simul Waŋnda Wo ni. Nduyɛ mbo tosa mi Adam nda Ifi bɛɛ tual ndu kɔɔli. Mi maalikɛiya a waŋnda chieeyaa bɔɔbɔɔ bɛɛ del Setana kɔɔli le Chɛhowa simullo. (Chudi 6) Kaale teŋgeŋnde Mɛlɛka ndoo hɛli leŋ le wa Isɔluɛiya ni. Nda bɛɛ ma kɛɛ ndu, okoŋ ma tual mɛlɛkaa lachoowaa piɛiyo. (Aisaya 63:​8, 10) Mi hei tɛɛmbuu Chɛhowa kɔllo tau, kɛ mbo biunuŋ. Nduyɛ o cho hiouwɔɔ lachi a biuwɔŋndo haaa mbo huŋ tɛɛmbuu wanaa simul ndu wa. Hei cho wanaa cho ndu piɛiyo o laalaŋndo choo nduyɛ ma wa biuwɔŋndo o chieeŋ Setanaa hoo niŋnda tɔnɔɔ chuu.

8-9. Choola suu kuɛɛ waŋnda cho yɛ hau dimioo a Chɛhowa okɔɔ, nduyɛ yɛɛ naŋ tosa yɛ a hei okɔɔ?

⁸ Choola Setana cho hiouwɔɔ lachi a dimioo laŋ. Mi Setana dimi maa le mɛɛ Choobu wa Chɛhowa nyɔɔŋ sɔlaa o ba yɛ o wa ndu piɛiyo ni. (Choobu 1:​8-11; 2:​3-5) Nduyɛ mbo dimi maa le sabu pilɛ koŋ kpe naŋ cho ndu piɛiyo ni. (Sɔɔŋ. 12:​10) Ŋ chɔm maa wana lachoowaa Setana cho ni, te ŋ biunuŋ pɛ sɔɔŋ palaŋ komal naa woŋ, nduyɛ mi hiou lachi a loo o tiindaŋ naa choo le chɔmndo kaala naŋ nɔ le Chɛhowa wo. Mi Chɛhowa duau Choobu sala. Nduyɛ naa bɛɛ te ŋ hiou pɛ lachi biuwɔŋndo, o cho naa salaa dɔwɔɔ.—Chemi. 5:​11.

⁹ Setana cho vɛlɛ hau simlachiaa o piɛiyii lachoowɛi niŋ soliŋndo kpeku, ma wa waŋnda pɛɛkoo maa wana dɛnɛ wɔɔŋndo Chɛhowa cho ni, nduyɛ maa ndu tusi waŋnda nyɛpalaa choo ni. Te chɛlɛkpɔɔ vi pɛ, mi apum dimi maa  le mɛɛ Mɛlɛka yeema maalikɛiya chɔɔloo choo choo yɛ o chua yoomu ndɔɔ ni. Hei ke Mɛlɛka naa lebɛɛ kposoŋ te. Kɛ naŋ sina maa Finya kaala chuauwaa nduaa wo Chɛhowa cho ni. O yɔŋ bɛɛ miŋ wa saŋgaa a naa, ɔɔ mi wana naŋ kaala wo vi, ŋ bii Mɛlɛka tɔɔyaŋ le keŋ te. Kanifuule, ŋ sina maa paale wa niŋ mbo huŋ faŋa sɔɔŋ muŋ kpou o chieeŋndo choo. Le hei miŋ dimul wanaa yaŋ naa nilaŋ nda maa, Mɛlɛka kaala naa wo Chɛhowa cho ni. Keŋ tosa ni mi Chɛhowa sɔla nyɛ o mulul wanaa simul ndu wa.—Pulɔ. 27:​11.

10. Vɛɛ Sam 22:​23, 24 chɔm yɛ naa wana suu Chɛhowa cho wo?

¹⁰ Saŋga buɛiyaa nduaa o kaala wa cho hau niŋndo. Mɛlɛka inyiɛɛyo Chɛhowa cho ni. Te o yɔŋ pɛ mi waŋnda tusi naa nyɛpalaa choo le tiindaŋ naa, miŋ naa, ɔɔ miŋ wa saŋgaa le hakila naalaŋ, mi Chɛhowa tambu kɔl tau. Nuawɔ Sam 22:​23, 24.) Mi Chɛhowa sinaŋ nyɛpalaa naŋ cho niŋndo, nduyɛ mbo yeema kɛsɛ le naa ndu faŋaa choo. Lelaŋ, o cho hunɔɔ ndu faŋa o chilaŋ niŋ. (Tuuwɔ Ɛsɔdɔɔ 3:​7, 8; Aisaya 63:​9.) Paale wa niŋ, o cho naa “mamɛmɛ o mamɛmɛ wɔɔsuu o hɔl fo. Piɔm ve lɛ niŋ te, chaŋ ve lɛ niŋ te, kɔl tambɛi ve lɛ niŋ te, kɛlɛŋgaa mi nyɛ nɛiyaa wa, kanifuule nyɛ o nyɛ paandu chuu faŋaŋ.”—Sɔɔŋ. 21:​4.

11. Vɛɛ Chɛhowa yiyaŋ yɛ a chaaŋaa nduaa lo o laalaŋ ndaa choo haaa ma wu wa?

¹¹ Te chaaŋaa nduaa o kaala wa vi pɛ. Vɛɛ Chɛhowa yiyaŋ yɛ a buɛiyaa nduaa lo o laalaŋ ndaa choo haaa ma wu wa? O kpeekpei niŋ, o yeema nda niŋ bɔɔ chɔɔ. (Choobu 14:​15) Yiyaŋndɔ a mɛɛ kpɛ Chɛhowa yeema niŋ Ebilaham chaaŋ ndɔ chɔɔ yɛ. (Chemi. 2:​23) Ɔɔ Muuse o ndaa suukaŋ “hɔlla a hɔlla” wo. (Ɛsɔ. 33:​11) Nduyɛ yiyaŋndɔ vɛlɛ mɛɛ o yeema niŋ le Deeve a wanaa soliaa ŋchonduaa cheleŋ chɔɔ chondoŋ solioo o ndu lo a kɔl kɛndɛ, le ndu saŋgalaa yɛ. (Sam 104:​33) Mi che bɛɛ chaaŋaa nduaa haa kpou a vi niŋ, kɛ o puɛɛnuŋ a nda le. (Aisaya 49:​15) O sina wɔ nyɛ o nyɛ a nda okɔɔ. O dimi niŋ, nda kpou cho yoomu ndu o hɔl. (Luku 20:​38) Te teleŋ  o kɛɛsiaa wo fuuluu pɛ, o cho nda kpou miŋgi yoomu, nduyɛ mbo huŋ chɛl nda vɛlɛ ma piɛi ndu. Te o yɔŋ pɛ maa wana ŋ kaala wo vi, maa diomndaŋ ndaŋ la ke num kɔl dɛɛniaa fɔ!

12. Yɛɛ kpeekpei tɛɛmbuu yɛ Chɛhowa kɔllo o palɛi mɛɛlɛi hei niŋ?

¹² Nyɛpalaa wanaa dɛnɛ wɔɔŋnda cho waŋnda tusioo choo wo. Mɛɛ Setana simul Chɛhowa o kpeloo Idɛŋ niŋ, mi Chɛhowa sina maa sɔɔŋ wɔɔŋndoŋ cho kui tau tuupa mi chieeŋndo sɔla tambei. Chɛhowa tul dɛnɛ wɔɔŋndo, kafalaŋ, a chɔula cho hau yɔŋnɔŋndo o chieeŋndo choo laŋ leyɛ. Nduyɛ o nɔ vɛlɛ nyiɛɛye tau le wanaa nɔ wanaa malaa le wa, mɛɛ viiya a waŋ laanduaa piaandaa ndaa vi wa cho naa yɛ. (Sɛka. 7:​9, 10) Mi kɔllo tambu ndu vɛlɛ tau, te o che pɛ ma tusi buɛiyaa nduaa cho ndu piɛiyo o laalaŋndo choo wa nyɛpalaa choo, nduyɛ ma dɔu nda o chiɛila manyumndaŋ niŋ. Kɛsiŋ o kɔl maa nya o kɛ kɛ cho sɔɔŋ palaŋ muŋ biuwɔŋndo, o kaala nya tau.

13. Sɔɔŋ wɔɔŋ kuɛɛ Chɛhowa cho yɛ hau chɔɔ yɔŋnɔŋndo o chieeŋndo niŋ, nduyɛ yɛɛ o cho yɛ hunɔɔ tosa a muŋ okɔɔ?

¹³ Sɔɔŋ nɔɔlɛi cho hau yɔŋnɔŋndo o chieeŋndo choo woŋ. O velaŋ ndɔɔ niŋ Mɛlɛka toosiaa naa ni. Kɛ Setana yeema naa miŋ wou balaŋ o kaala nɔɔlɛilaŋ niŋ. O teleŋ Nuuwa wo niŋ, “mi Mɛlɛka Yaawɛɛ o saaluŋ mɛɛ dɛnɛ wɔɔŋ waŋnda chieeya tiu kpou o chieeŋndo choo yɛ. Nduyɛ, mbo saaluŋ maa yiyaŋ dɛnɛ wɔɔŋndo koni huŋ wanachioo o kɔl teleŋ o teleŋ ni. Mi mɔnɛi bii Mɛlɛka le mɛɛ o toosiaa ŋ waŋnda chiee o chieeŋndo choo yɛ. Mi i tɛɛmbuu ndu kɔl tau bɛndu.” (Chɛ. 6:​5, 6, 11) Chɔŋ a teleŋ koŋ, baa sɔɔŋ siŋgaŋ niŋ pa o chieeŋndo choo? Sako bɛɛ. Mi Setana naŋ kɔl tau te o che pɛ mɛɛ kaa ihini nɔɔlɛiyo cho o tiuwaa o chieeŋndo choo yɛ, vɛlɛ a mɛɛ waŋnda cho nɛila yɛ yɛlaŋ soliŋndo kpeku le ndu tosaa yɛ. Le tamaseliiyo, wanaa cho hau o nɔ niŋ te wa cho hau kaa ihini nɔɔlɛiyo tosaa, nduyɛ mi poo a poo ɔɔ chuaa a chuaa tosa vɛlɛ kaa hoo. (Ɛfi. 4:​18, 19) Mi Setana naŋ vɛlɛ kɔl tau, te o che pɛ hau mi wanaa cho Chɛhowa piɛiyo o laalaŋndo choo wa tosa haki wɔɔŋ wɔɔŋndo. Te Chɛhowa huŋ saŋga pɛ a wanaa dɛnɛ wɔɔŋnda biuwɔŋndo, o cho nda tɛɛmbuu.

14. Yɛɛ waŋnda chieeya cho yɛ tosaa a chieeŋndo vɛlɛ a visiaa Chɛhowa toosiaa wa?

¹⁴ Chieeŋndo tɛɛmbuu wo. Waŋnda chieeya cho hau saŋgaa tau o masale wanachioo bɛŋgu. Kɛ o faŋaŋndɔ o koŋ kɔɔli, waŋnda chieeya cho chieeŋndo biyɔɔ wɔɔŋndo, nduyɛ ma wa vɛlɛ visiaa Chɛhowa ke nda le ma wa nda hɔlteŋ choo wa biyɔɔ wɔɔŋndo. (Ikili. 8:​9; Chɛ. 1:​28) Mi wanaa sinaa dɛniaa apum dimi maa, o wɔsila biŋgi bɛŋgu, kaala waŋnda chieeya cho tosa mi nyaa yoomaa yɛ yiaa le miiliɔŋndo opilɛ faŋaŋ o chieeŋndo choo. Hei chɔm kpendekele maa nyɛm cho o chieeŋndo choo woŋ cho o kpundɔɔ niŋ. Nduyɛ le sabu koŋ, mi waŋnda chieeya buulaŋ tau a chieeŋndo hoo okɔɔ. Kɛ i cho suɛi kɛndɛ bɛndu le sinaa maa, Chɛhowa cho hunɔɔ “tɛɛmbuu wanaa cho chieeŋndo tɛɛmbuuwo wa.” Nduyɛ mbo siiŋguu chieeŋndo kpou kpele hɛnɛkiɔɔ.—Sɔɔŋ. 11:​18; Aisaya 35:​1.

15-16. Chɔmndɔ tamaselii mala naa le sinaa nyɛ nyindu naa le biuwɔŋndo maa Chɛhowa wo.

¹⁵ Yiyaŋndɔ a sɔɔŋ palaŋ yɛ yɛŋ Finya naa kaalaa cho o choo choo niŋndo cho niŋ biuwɔŋndo le wɔsilaŋ waalaŋ o waalaŋ niŋndo. (Tofa kɔfɔɔ hoo “ Sɔɔŋ Chɛhowa Cho Biuwɔŋndo Woŋ.”) Chɛhowa tiuba mbo tɛɛmbuu chieeŋ dɛnɛ wɔɔŋndo hoo teleŋ o teleŋ. Kɛ biuwɔŋ ndɔɔ choo naa malaa tau. Ŋ tuuwɔ ndi o nɛiyo hoo choo. Ŋ dimi wɔ maa wana chiɔuwaa dimul pɔnɔɔ a lanɔɔ maa chɛlɛkpɛ nda cho o demboo niŋndo nɔ bahawɛila kala kalalaŋ, nduyɛ maa yoomoo ve niŋ bɛɛŋ bɛɛŋ a ndu le. Le hei, o viu niŋ yoomu le. O yɔŋ bɛɛ maa pɔnɔɔ a lanɔɔ hoo cho luɛiyɔɔ bɔnɔ tau nduyɛ ma saŋga, kɛ kaala nda nɔ le chɛlɛkpɛ koŋ ndo cho nda nyindɔɔ le ma biunɔŋ, okoŋ ma kindi kindiŋ o nɛi o nɛi niŋ le mi yoomu ndɔɔ fula leniŋ.

 ¹⁶ O nɛi pilɛ koŋ choo, o hakioo niŋ chuauwaa Adam nda Ifi wa kpou vialuŋ ni. Kɛ a koŋ kpou, Chɛhowa kaala nda nduyɛ o buulaŋ tau le nda. (1 Chɔŋ 4:​19) Mi che bɛɛ pɔnɔɔ a lanɔ naŋ soo o tamasi naa niŋnda tiuba ma siŋga sɔɔŋ cho chɛlɛkpɛ ndaa choo woŋ te, kɛ Chɛhowa ndu tiuba. O cho hunɔɔ naalaŋ, a sɔɔŋ palaŋ kɛ kɛ cho naa choo faŋa a teleŋ o kɛɛsiaa wo. (Maa. 24:​36) Baa kaala Chɛhowa nɔ le naa wo nyindu naa le sɔɔŋ palaŋ kɛ kɛ cho naa komallo woŋ biuwɔŋndo le?

17. Vɛɛ nyɛ dimiŋ a Chiisu okɔɔ o Hibuluiya 12:​2, 3 niŋndo dɛɛniaa yɛ naa miŋ hiou lachi a biuwɔŋndo?

¹⁷ Chɛhowa kɛsul naa tamasi kɛndɛ kɛndɔɔ le biuwɔŋndo. Nduyɛ mi Chiisu bɛɛ tual tamasi ndɔɔ kɔɔli. Teleŋ Chiisu wa o chieeŋndo choo wo, mi waŋnda dimul ndu diomnda wɔɔŋndaŋ, ma tusi ndu siɔmbulaŋ, nduyɛ ma baŋ ndu o yɔmndo choo. Kɛ a koŋ kpou, mbo biunuŋ. (Nuawɔ Hibuluiya 12:​2, 3.) I cho kpendekele maa tamasi Chɛhowa kɛsi a biuwɔŋndo okɔɔ wo luei Chiisu yoomuaŋ ni mi ndu bɛɛ biunuŋ. Tamasi pilɛ koŋ kpe nɔla mbo luei naa yoomuaŋ le miŋ biunuŋ.

18. Vɛɛ Pitɛ Diiŋ Ndɔɔ 3:​9 mala yɛ naa le sinaa tɔnɔla naŋ cho sɔlaa o biuwɔŋ Chɛhowaa niŋndo?

¹⁸ Nuawɔ Pitɛ Diiŋ Ndɔɔ 3:​9. Chɛhowa sina teleŋ bɛnda le dɛnɛ wɔɔŋndo faŋaa o chieeŋndo choo wo. Biuwɔŋ ndɔɔ cho tosaa ni mi waŋnda o miiliɔŋndaŋ niŋ wa chuuŋgiaŋndo diompilɛ le ndu piɛiyo, vɛlɛ a ndu saŋgalaa. Nda kpou cho a kɔl kɛndɛ le mɛɛ Chɛhowa lo biuwɔŋndo haaa ma vialuŋ, ma pɛɛku a ndu okɔɔ, ma kaala ndu, okoŋ ma yɔŋguŋ o ndu lo yɛ. Chɛhowa cho hunɔɔ wanaa cho lo biuwɔŋndo haaa o mɛɛlulaŋ nda fanda. Nduyɛ a cho hunɔɔ mɛɛlu sina maa i wa bɔɔ suɛi kɛndɛ bɛndu le mɛɛ Chɛhowa kɛɛsiaa le waŋnda chieeya biuwɔŋndo le teleŋ vilɛi yɛ.

19. Yɛɛ naŋ nɔ yɛ miŋ kɛɛsiaŋ o kɔl le tosaa, nduyɛ fanda yɛɛ naŋ cho yɛ sɔla?

¹⁹ Ŋ pɛɛku Chɛhowa o ba maa ŋ nɔla miŋ biunɔŋ nduyɛ miŋ wa a kɔl kɛndɛ. Mi che bɛɛ mi Setana tosa mi sɔɔŋ wɔɔŋndoŋ kui tau o chieeŋndo choo, kɛ Chɛhowa cho a kɔl kɛndɛ teleŋ o teleŋ. (1 Timo. 1:​11) Naa bɛɛ nɔla miŋ hiou lachi a waa a kɔl kɛndɛ, nduyɛ miŋ hiou lachi a chumndo haaa mi Chɛhowa faŋa tɔɔ wɔɔŋndo o diola ndɔlaŋ choo, okoŋ mbo chɔm kpendekele maa ndu nɔ dioo ni le waa waŋnda chieeya choo masa. Nduyɛ, o cho hunɔɔ wanaa dɛnɛwɔɔŋnda tɛɛmbuu, vɛlɛ mbo faŋa sɔɔŋ palaŋ cho naa choo woŋ. Maa ŋ kɛɛsiaŋ o kɔl le hiouwɔɔ lachi a biuwɔŋndo, nduyɛ miŋ sɔla kɔl dɛɛniaa le sinaa maa Finyaa naa kaalaa o choo choo niŋ bɛɛ cho biuwɔŋndo! Te ŋ tosa lende pɛ, ŋ cho chɔ maa sɔɔŋ dimiŋ o bolle Baabuileŋ ndeŋ niŋndoŋ cho tonya. Le dimi aa: “Kɔl kɛndɔɔ cho le wana biunuŋ tɔɔndaŋndo wo. Kanifuule, te o yem pɛ tɔɔndaŋ koŋ, o cho hunɔɔ mɔsil yoomoo sɔla. Fandaa hoo Chɛhowaa mɛi lediom le wanaa cho hiouwɔɔ lachi a ndu kaalaa wa kioo ni.”—Chemi. 1:​12.