၁-၂. ယဟိဝၤ​ယွၤ​အ​တၢ်​ကတိၤ​ဖဲ ယၡါယၤ ၆၅:၁၆, ၁၇ န့ၣ်​ ဟ့ၣ်ဂံၢ်​ဟ့ၣ်ဘါ​ပှၤလၢ ပ​က​ဆဲး​အိၣ်ဒီး​တၢ်​တူၢ်န့ၢ်​ခီၣ်ကဲ​ဒ်လဲၣ်.

တၢ်​အိၣ်ဖှိၣ်​ဖးဒိၣ်​ ၂၀၁၇ အ​ခိၣ်တီ​လၢ “တ​ဘၣ်​တူၢ်ၡူ​န​သး​တဂ့ၤ” န့ၣ်​ဟ့ၣ်​ဆူၣ်​ထီၣ်​ ပ​ဂံၢ်​ပ​ဘါ​ဒိၣ်မး​လီၤ. တၢ်​အိၣ်ဖှိၣ်​ဖးဒိၣ်​ တၢ်ရဲၣ်​တၢ်ကျဲၤ​အံၤ ပာ်ဖျါ​ထီၣ်​ဝဲ​လၢ တၢ်ကီ​တၢ်ခဲ​လၢ ပ​ထံၣ်​ဘၣ်​အီၤ​တဖၣ်​န့ၣ်​ ပ​လဲၤ​ခီဖျိ​အီၤ က​သ့​ဒ်လဲၣ်. ပ​ထီၣ်​ဘၣ်​တၢ်​အိၣ်ဖှိၣ်​ဖးဒိၣ်​အံၤ ပူၤကွံာ်​​ဝဲ​လွံၢ်​နံၣ်​လံ ဒီး​ပ​ဆဲး​ထံၣ်​ဘၣ်​ဒံး​တၢ်ကီ​တၢ်ခဲ​တဖၣ်​လၢ ဟီၣ်ခိၣ်​လၢ​အပှဲၤ​ဒီး​တၢ်အၢ​တၢ်သီ​အံၤ​လီၤ.

^၂ ဆၢကတီၢ်​ခဲအံၤ န​ထံၣ်​ဘၣ်​တၢ်ကီ​တၢ်ခဲ မနုၤ​လဲၣ်. မ့ၢ်​န​ဟံၣ်ဖိ​ဃီဖိ​ဒီး န​တံၤသကိး​လၢ န​အဲၣ်​ဘၣ်​အီၤ သံ​သဒၣ်​နၤ​အိၣ်​တဂၤ​ဂၤ​ဧါ. မ့ၢ်​န​အိၣ်ဒီး တၢ်ဆူး​တၢ်ဆါ​နးနး​ကလဲာ်​ဧါ. ခီဖျိ​လၢ​န​သးပှၢ်​ထီၣ်​အဃိ န​တၢ်​အိၣ်မူ​ကီခဲ​ထီၣ်​ဧါ. မ့ၢ်​န​ထံၣ်​ဘၣ်​ဒီး န့ဆၢၣ်​တၢ်​ဘၣ်ဒိ​ဘၣ်ထံး, တၢ်အၢ​တၢ်သီ ဒီး​တၢ်​မၤအၢ​မၤနး​စ့ၢ်ကီး​ဧါ. တကး​ဒံးဘၣ်​ ခီဖျိ​လၢ COVID-19 တၢ်ဆါ​သံသတြိာ် ရၤ​လီၤ​သး​အဃိ မ့ၢ်​အ​မၤ​ဘၣ်ဒိ​နၤ​စ့ၢ်ကီး​ဧါ. ပ​အိၣ်ခိး​ကွၢ်လၢ် တၢ်​ဆၢကတီၢ်​လၢ တၢ်​သ့ၣ်​တဖၣ်​အံၤ က​လီၤမၢ်​ကွံာ်​ခဲလၢာ်, ပ​တ​သ့ၣ်နီၣ်​ထီၣ်​က့ၤ အီၤ​လၢၤဘၣ်​ ဒီး​တၢ်​သ့ၣ်​တဖၣ်​အံၤ တ​ကဲထီၣ်​က​ဒီး​အသး နီတဘျီ​လၢၤ​စ့ၢ်ကီး​ဘၣ်.—ဖး ယၡါယၤ ၆၅:၁၆, ၁၇ တက့ၢ်.

၃. ခဲအံၤ ပ​က​​ဘၣ်​မၤ​တၢ်မနုၤ​လဲၣ်​ ဒီး​​ဘၣ်​မနုၤ​အဃိ​လဲၣ်.

^၃ ပ​အိၣ်မူ​​ဘၣ်​လၢ ဟီၣ်ခိၣ်​လၢ မုၣ်ကီၤလံၢ် ပၢ​ဝဲ​အဃိ ပ​တၢ်​အိၣ်မူ​ပှဲၤ​ဒီး​တၢ်ကီ​တၢ်ခဲ​တဖၣ်​လီၤ. ဒီး​ခါဆူညါ တၢ်အိၣ်သး​ကနး​ထီၣ်ဝဲ ကွ့ၢ်ကွ့ၢ်​အဃိ ပ​က​​ဘၣ်​အိၣ်ဒီး တၢ်​တူၢ်န့ၢ်​ခီၣ်ကဲ အါန့ၢ်​ဒံး​အလီၢ်​လီၤ. (မးသဲ ၂၄:၂၁) အဃိ ပ​က​​ဘၣ်​မၤလိ​အါထီၣ်​ ပသး​ဒ်သိး ပ​ကအိၣ်​ဒီး တၢ်တူၢ်န့ၢ်​ခီၣ်ကဲ​လီၤ. ​ဘၣ်​မနုၤ​အဃိ​လဲၣ်. ယ့ၣ်ၡူး​တဲ​ဝဲ​လၢ “ခီဖျိ​လၢ သု​တၢ်​တူၢ်န့ၢ်​ခီၣ်ကဲ​အဃိ သု​က​အုၣ်က့ၤ​ခီၣ်က့ၤ သု​သးသမူ​လီၤ.” (လူၤကၣ်​ ၂၁:၁၉) ပ​မ့ၢ်​ဆိကမိၣ်​ထီၣ်​ ပှၤလၢ​အ​အိၣ်ဒီး တၢ်ကီ​တၢ်ခဲ ဒ်သိး​ဒီး​ပှၤ​တဖၣ်​ လဲၤ​ခီဖျိ​​ဝဲ​တၢ်ကီ​တၢ်ခဲ န့ၢ်​ဒ်လဲၣ်​အဂ့ၢ်​န့ၣ်​ ပ​ကအိၣ်ဒီး တၢ်​တူၢ်န့ၢ်​ခီၣ်ကဲ​စ့ၢ်ကီး​လီၤ.

၄. ​ဘၣ်​မနုၤ​အဃိ ပ​တဲ​သ့​လၢ ယဟိဝၤ​ယွၤ​မ့ၢ်​ပှၤ လၢ​အ​အိၣ်ဒီး တၢ်​တူၢ်န့ၢ်​ခီၣ်ကဲ အဒိၣ်​ကတၢၢ်​တဂၤ​လဲၣ်.

^၄ ပှၤလၢ​အ​အိၣ်ဒီး တၢ်​တူၢ်န့ၢ်​ခီၣ်ကဲ အဒိၣ်​ကတၢၢ်​န့ၣ်​ မ့ၢ်​မ​တဂၤ​လဲၣ်. မ့ၢ်​ဝဲ​ယဟိဝၤ​ယွၤ​လီၤ. ​ဘၣ်​သ့ၣ်​သ့ၣ်​ တၢ်​စံးဆၢ​အံၤ ကဒုး​ကမၢ​ကမၣ်​နၤ​လီၤ. ဘၣ်ဆၣ်​ န​မ့ၢ်​ဆိကမိၣ်​ထံ  တၢ်ဂ့ၢ်​လီၤတံၢ်​လီၤဆဲး​န့ၣ်​ န​က​သ့ၣ်ညါ​ထီၣ်​ အ​တၢ်​စံးဆၢ​လီၤ. ခီဖျိ​လၢ မုၣ်ကီၤလံၢ်​ပၢ​ဝဲ​ဟီၣ်ခိၣ်​အံၤ အဃိ တၢ်ကီ​တၢ်ခဲ​အိၣ်​ဝဲ​အါမး​လီၤ. ယဟိဝၤ​ယွၤ​အိၣ်ဒီး တၢ်စိ​တၢ်ကမီၤ​လၢ က​မၤ​လီၤမၢ်​ကွံာ် တၢ်ကီ​တၢ်ခဲ​တဖၣ်​ တဘျီ​ဃီ​လီၤ. ဘၣ်ဆၣ်​ ယဟိဝၤ​ယွၤ​အိၣ်ခိး​​ဝဲ​လၢ က​မၤ​လီၤမၢ်​ကွံာ် တၢ်ကီ​တၢ်ခဲ ခဲလၢာ်​လၢ​ခါဆူညါ​လီၤ. (ရိမ့ၤ ၉:၂၂) အဃိ ခဲအံၤ​န့ၣ်​ ယဟိဝၤ​ယွၤ​အိၣ်ခိး​ဝဲ တၢ်​ဆၢကတီၢ်​လၢ အ​ပာ်​ပနီၣ်​ဃာ်ဝဲ မ့ၢ်​ဟဲ​တုၤ​မး အ​က​မၤ​ဟးဂီၤ​ကွံာ် ဟီၣ်ခိၣ်​လၢ မုၣ်ကီၤလံၢ်​ပၢ​ဝဲ​အံၤ​လီၤ. မ်ပ​ကွၢ်သကိး တၢ်ဂ့ၢ်​ခွံ​ထံၣ်​လၢ ​ဘၣ်​မနုၤ​အဃိ ယဟိဝၤ​ယွၤ ​ဘၣ်​အိၣ်ဒီး တၢ်​တူၢ်န့ၢ်​ခီၣ်ကဲ​လဲၣ်န့ၣ်​တက့ၢ်.

၅. ယဟိဝၤ​ယွၤ​အ​မံၤ ​ဘၣ်​တၢ်​ဒုၣ်ဒွဲၣ်​အီၤ​ဒ်လဲၣ်​ ဒီး​ယဟိဝၤ​ယွၤ​အ​မံၤ ဘၣ်တၢ်​ဒုၣ်ဒွဲၣ်​အီၤ​အဃိ န​တူၢ်​ဘၣ်​ဒ်လဲၣ်.

^၅ ယဟိဝၤ​ယွၤ အ​မံၤ​​ဘၣ်​တၢ်​ဒုၣ်ဒွဲၣ်​စံးဆၢ​အီၤ​လီၤ. ယဟိဝၤ​ယွၤ​ပာ်ဒိၣ်​​ဝဲ​အ​မံၤ ဒီး​အဲၣ်ဒိး​ဝဲ​လၢ ပှၤ​ခဲလၢာ်​က​ပာ်ကဲ​အ​မံၤ​လီၤ. (ယၡါယၤ ၄၂:၈) ဘၣ်ဆၣ်​ ယဟိဝၤ​ယွၤ​အ​မံၤ ​ဘၣ်​တၢ်​ဒုၣ်ဒွဲၣ်​စံးအၢ အိၣ်​လံ​အ​နံၣ်​ ၆,၀၀၀ ဃၣ်ဃၣ်​လံ. (စံးထီၣ်​ပတြၢၤ ၇၄:၁၀, ၁၈, ၂၃) တၢ်ဂ့ၢ်​အံၤ​စးထီၣ်​အသး​လၢ ဧ့ၤဒ့ၣ်​တၤသၣ်​အလီၢ်​ဖဲ မုၣ်ကီၤလံၢ် (အခီ​ပညီ​မ့ၢ်ဝဲ “ပှၤလၢ​အ​တဲ​ဟးဂီၤ​ပှၤ​ဂ့ၢ်”) တဲ​ဝဲ​လၢ ကစၢ်​ယွၤ​တ​ဟ့ၣ်​ နီၢ်​အံၣ်အု​ဒီး​စီၤ​အၤဒၣ်​ တၢ်​လၢ​က​မၤ​သးခု အဝဲသ့ၣ်​အသး​ဘၣ်. (၁ မိၤၡ့ ၃:၁-၅) စးထီၣ်​ဖဲ​န့ၣ်​လံၤ​လံၤ ပှၤ​ဟီၣ်ခိၣ်​ဖိ​တဖၣ်​ ဆိကမိၣ်​​ဘၣ်​​ဝဲ​လၢ ယဟိဝၤ​ယွၤ​တ​ဟ့ၣ်​လီၤ တၢ်လၢ​အဝဲသ့ၣ်​ ကြၢး​ဒိးန့ၢ်​​ဘၣ်​​ဝဲ​လီၤ. ခီဖျိ​လၢ ယဟိဝၤ​ယွၤ​အ​မံၤ ဘၣ်တၢ်​ဒုၣ်ဒွဲၣ်​စံးအၢ​စံးသီ​အီၤ​အဃိ ယ့ၣ်ၡူး​ဘၣ်ယိၣ်​တၢ်​ဒိၣ်မး​လီၤ. လၢ​တၢ်ဂ့ၢ်​အံၤ​အဃိ ယ့ၣ်ၡူး​သိၣ်လိ အပျဲၢ်​အဘီၣ်​တဖၣ်​လၢ က​ဃ့​ဘါ​ထုကဖၣ်​လၢ “အိၣ်​လၢ​မူခိၣ်​ပ​ပၢ်ဧၢ, မ်​န​မံၤ ​ဘၣ်​တၢ်ပာ်​စီဆှံ​အီၤ​တက့ၢ်.”—မးသဲ ၆:၉.

၆. ဒ်သိး​ယဟိဝၤ​ယွၤ​က​ပာ်ဖျါ​ထီၣ်​ဝဲ​လၢ အ​အိၣ်ဒီး​တၢ်ခွဲး​တၢ်ယာ်​လၢ ကပၢတၢ်​လၢ​မူခိၣ်​ဒီး​ဟီၣ်ခိၣ်​အဂီၢ် ​ဘၣ်​မနုၤ​အဃိ အ​ပျဲ​ဝဲ​တၢ်​ဆၢကတီၢ် ဖးယံာ်​လဲၣ်.

^၆ ပှၤ​အါဂၤ​ထီဒါ​ကစၢ်​ယွၤ​ဒီး​အ​တၢ်ပၢအခွဲး​လီၤ. ထဲ​ယဟိဝၤ​ယွၤ​တဂၤ​ဧိၤ​န့ၣ်​ အ​အိၣ်ဒီး​တၢ်ခွဲး​တၢ်ယာ်​လၢ က​ပၢတၢ်​လၢ မူခိၣ်​ဒီး​ဟီၣ်ခိၣ်​လီၤ. ဒီး​အ​တၢ်ပၢ​န့ၣ်​ မ့ၢ်​ဝဲ​တၢ်ပၢ​လၢ အဂ့ၤ​ကတၢၢ်​လီၤ. (လီၣ်ဖျါ ၄:၁၁) ဘၣ်ဆၣ်​ မုၣ်ကီၤလံၢ် ဂုာ်ကျဲးစၢး​လံၣ်န့ၢ်​လီန့ၢ် မူခိၣ်​ကလူး​ဒီး​ပှၤ​ဟီၣ်ခိၣ်​ဖိ​တဖၣ်​ ဒ်သိး က​ဆိကမိၣ်​​ဝဲ​လၢ ကစၢ်​ယွၤ​န့ၣ်​ပၢတၢ်​တ​သ့​ဘၣ်. ဒ်သိး​ယဟိဝၤ​ယွၤ က​ပာ်ဖျါ​ထီၣ်​လၢ အ​ဝဲ​အိၣ်ဒီး​တၢ်ခွဲး​တၢ်ယာ်​လၢ က​ပၢတၢ်​ဒီး​အ​တၢ်ပၢ​န့ၣ်​ မ့ၢ်​တၢ်ပၢ​လၢ​အဂ့ၤ​ကတၢၢ်​အဂီၢ် အ​လိၣ်​ဘၣ်​တၢ်​ဆၢကတီၢ်​လီၤ. ကစၢ်​ယွၤ​အိၣ်ဒီး​တၢ်​ကူၣ်သ့​အဃိ ပျဲ​ဝဲ​လၢ ပှၤ​ဟီၣ်ခိၣ်​ဖိ​တဖၣ်​ က​ပၢ​​လီၤ​အသး​ဖးယံာ် ဒ်သိး​ပှၤ​ဟီၣ်ခိၣ်​ဖိ​က​သ့ၣ်ညါ​​ဝဲ​လၢ မ့ၢ်​တ​ဒိကနၣ်​ ကစၢ်​ယွၤ​အ​ကလုၢ်​​ဘၣ်​န့ၣ်​ အဝဲသ့ၣ်​ပၢ​လီၤ အ​နီၢ်ကစၢ်​သး​တ​သ့​ဘၣ်. (ယံးရမံယၤ ၁၀:၂၃) ခီဖျိ​လၢ ကစၢ်​ယွၤ​အိၣ်ဒီး တၢ်​ဝံသးစူၤ​အဃိ ပှၤ​ခဲလၢာ်​က​သ့ၣ်ညါ​​ဝဲ​လၢ ကစၢ်​ယွၤ​အိၣ်ဒီး တၢ်ခွဲး​တၢ်ယာ်​လၢ က​ပၢတၢ်​လၢ​မူခိၣ်​ဒီး​ဟီၣ်ခိၣ်​လီၤ. ဒီး​ပှၤ​က​သ့ၣ်ညါ​​ဝဲ​လၢ ယဟိဝၤ​ယွၤ​အ​တၢ်ပၢ​န့ၣ်​ အဂ့ၤ​ကတၢၢ်​ဒီး ထဲဒၣ်​အဘီ​အမုၢ်​န့ၣ်​ ကဒုး​အိၣ်​ထီၣ်​ တၢ်ဃူ​တၢ်ဖိး​ဒီး တၢ်မုာ်​တၢ်ခုၣ်​နီၢ်နီၢ်​လီၤ.

၇. မ​တဂၤ​ထီဒါ ယဟိဝၤ​ယွၤ​လဲၣ်​ ဒီး​ယဟိဝၤ​ယွၤ က​မၤ​အဝဲသ့ၣ်​ဒ်လဲၣ်.

^၇ ကစၢ်​ယွၤ​အ​ဖိ​တဖၣ်​ ပူထီၣ်​ထီဒါ​တၢ်​လီၤ. ယဟိဝၤ​ယွၤ​တ့လီၤ မူခိၣ်​ကလူး​ဒီး​ပှၤ​ဟီၣ်ခိၣ်​ဖိ​တဖၣ်​ လၢ​လၢပှဲၤ​ပှဲၤလီၤ. တၢ်​လဲၤ​ကမၣ်​အသး တအိၣ်​နီတမံၤ​ဘၣ်. ဘၣ်ဆၣ်​ ကစၢ်​ယွၤ​အ​ဖိခွါ​မူခိၣ်​ကလူး​လၢ​အ​ကဲထီၣ်​ စၤတၣ်​ (အခီ​ပညီ​မ့ၢ်ဝဲ “ပှၤလၢ​အ​ထီဒါတၢ်”) န့ၣ်​အ​ထီဒါ​က့ၤ​ယဟိဝၤ​ယွၤ​လီၤ. တကး​ဒံးဘၣ်​ အ​ဝဲ​မၤ​ဝဲ​ဒ်သိး ပှၤ​ဟီၣ်ခိၣ်​ဖိ​လၢ​အလၢ​အပှဲၤ လၢ​အမ့ၢ်​နီၢ်​အံၣ်အု​ဒီး​စီၤ​အၤဒၣ်​စ့ၢ်ကီး က​ထီဒါ​က့ၤ ယဟိဝၤ​ယွၤ​လီၤ. မူခိၣ်​ကလူး​လၢ​အဂၤ ဒီး​ပှၤ​ဟီၣ်ခိၣ်​ဖိ​တဖၣ်​ ထီဒါ​တၢ်​စ့ၢ်ကီး​လီၤ. (ယူဒၤ ၆) လၢခံ ကစၢ်​ယွၤ​အပှၤ​ဂီၢ်မုၢ်​အံၣ်စရ့လး​လၢ အ​ဃုထၢထီၣ်​ဝဲ​စ့ၢ်ကီး ပာ်တ့ၢ်​ကွံာ်​အီၤဒီး ဘူၣ်ထီၣ်​ဘါထီၣ်​ဝဲ ယွၤ​လၢ​အ​ကမၣ်​တဖၣ်​လီၤ. (ယၡါယၤ ၆၃:၈, ၁၀) ယဟိဝၤ​ယွၤ​တူၢ်​ဘၣ်​​ဝဲ​လၢ ပှၤ​ထီဒါ​က့ၤ​အီၤ​လီၤ. ဘၣ်ဆၣ်​ အ​ဝဲ​ဆဲး​အိၣ်ဒီး တၢ်​တူၢ်န့ၢ်​ခီၣ်ကဲ ဒီး​အိၣ်ခိး​ဝဲ တၢ်​ဆၢကတီၢ်​လၢ ကမၤ​ဟးဂီၤ​ကွံာ် ပှၤလၢ​အ​ထီဒါ​တၢ်​တဖၣ်​ခဲလၢာ်​လီၤ. ဖဲ​န့ၣ်​အခါ ယဟိဝၤ​ယွၤ​ဒီး​အခ့​အပှၤ​လၢ အသး​တီ​ဒီး​အီၤ​တဖၣ်​န့ၣ်​ က​သးခု​ဝဲ မ့ၢ်​လၢ ပှၤ​ထီဒါ​တၢ်​တဖၣ်​န့ၣ်​ တအိၣ်​လၢၤ​ဘၣ်​အဃိ​လီၤ.

၈-၉. ပှၤ​တဲလံၣ်​တဲလီ​ဝဲ ယဟိဝၤ​ယွၤ​အဂ့ၢ်​ဒ်လဲၣ်​ ဒီး​မ့မ့ၢ်​ပှၤ​န့ၣ်​ ပ​က​မၤ​ဒ်လဲၣ်.

^၈ မုၣ်ကီၤလံၢ်​လံၣ်တၢ် ခဲအံၤ​ခဲအံၤ​လီၤ. မုၣ်ကီၤလံၢ်​တဲ​ဟးဂီၤ စီၤ​ယိၤဘး​ဒီး ယဟိဝၤ​ယွၤ​အခ့​အပှၤ​လၢ အသး​တီ​တဖၣ်​လၢ အဝဲသ့ၣ်​ဘါထီၣ်​ကစၢ်​ယွၤ​န့ၣ်​ လၢ​အ​နီၢ်ကစၢ်​အဘျုး​အဂီၢ်​လီၤ. (ယိၤဘး ၁:၈-၁၁; ၂:၃-၅) ဒီး​မုၣ်​ကီၢ်​လံၢ်​ဆဲး​တဲ​ဟးဂီၤ​ဒံး ပှၤ​ဟီၣ်ခိၣ်​ဖိ​တဖၣ်​တုၤ​လၢ မုၢ်မဆါ​တနံၤ​အံၤ​လီၤ. (လီၣ်ဖျါ ၁၂:၁၀) ပ​ပာ်ဖျါ​ထီၣ်​လၢ မုၣ်ကီၤလံၢ်​န့ၣ်​ အ​တဲလံၣ်​တၢ် ခီဖျိ​ပ​အဲၣ်​ယဟိဝၤ​ယွၤ​ဒီး​ဆဲး​တီ​ဒီး​အီၤ ဒီး​အိၣ်ဒီး​တၢ်​တူၢ်န့ၢ်​ခီၣ်ကဲ ဖဲ​ပ​ထံၣ်​ဘၣ်​တၢ်​မၤကွၢ်​ တဖၣ်​အခါ​လီၤ. ဒ်​စီၤ​ယိၤဘး​အသိး ခီဖျိ​လၢ​ပ​အိၣ်ဒီး တၢ်​တူၢ်န့ၢ်​ခီၣ်ကဲ​အဃိ ပ​က​ဒိးန့ၢ်​​ဘၣ်​တၢ်​ဆိၣ်ဂ့ၤ​လီၤ.—ယၤကိာ် ၅:၁၁.

^၉ မုၣ်ကီၤလံၢ်​သူဝဲ တၢ်ဘူၣ်​တၢ်ဘါ​ကမၣ်​ခိၣ်နၢ်​တဖၣ်​ လၢ​က​တဲ​ဟးဂီၤ​​ဝဲ​လၢ ယဟိဝၤ​ယွၤ​န့ၣ်​ မ့ၢ်​ပှၤလၢ​အအၢ​အသီ ဒီး​ပှၤလၢ​အ​ဒုးအိၣ်​ထီၣ်ဝဲ တၢ်နး​တၢ်ဖှီၣ်​လီၤ. ပှၤ​တနီၤ​တဲ​ဝဲ​လၢ ကစၢ်​ယွၤ​လိၣ်​ဘၣ်​အါထီၣ်​ မူခိၣ်​ကလူး​အဃိ ဖဲ​ဖိသၣ်​သံ​အခါ ကစၢ်​ယွၤ​ကိးက့ၤ​​ဝဲ​လီၤ. ခီဖျိ​လၢ​အဝဲသ့ၣ်​တဲ​ဝဲ​ဒ်အံၤ​အဃိ ကစၢ်​ယွၤ​အ​မံၤလၤ​သၣ်ကပီၤ ဟးဂီၤ​​ဝဲ​လီၤ. ဘၣ်ဆၣ်​ ပ​သ့ၣ်ညါ​လၢ ယဟိဝၤ​ယွၤ​န့ၣ်​ မ့ၢ်​ပၢ်​လၢ​အပှဲၤ​ဒီး​တၢ်အဲၣ်​တၢ်ကွံ​လီၤ. ဖဲ​ပ​ထံၣ်​ဘၣ်​တၢ်ဆူး​တၢ်ဆါ​နးနး​ကလဲာ် ဒီး​ပှၤလၢ​ပ​အဲၣ်​ဘၣ်​အီၤ​တဂၤ​သံ​အခါ ပ​တ​ပာ်​တၢ်​ကမၣ်​လၢ ကစၢ်​ယွၤ​အ​ဖီခိၣ်​ဘၣ်. လၢ​တၢ်န့ၣ်​အလီၢ် ပ​သ့ၣ်ညါ​​ဘၣ်​လၢ မုၢ်​က​အိၣ်​ဝဲ​တနံၤ​လၢ ကစၢ်​ယွၤ​က​မၤ​လီၤမၢ်​ကွံာ် တၢ်ဆူး​တၢ်ဆါ ဒီး​က​မၤ​ဂဲၤ​ဆၢထၢၣ်​သမူထီၣ်​က့ၤ​ပှၤသံ​လီၤ. ပ​က​တဲ​ဘၣ်​ ပှၤလၢ​အသး​အိၣ်​ ဒိကနၣ်​တၢ်​တဖၣ်​လၢ ယဟိဝၤ​ယွၤ​န့ၣ်​ မ့ၢ်​ကစၢ်​ယွၤ​လၢ​အပှဲၤ​ဒီး​တၢ်အဲၣ်​တၢ်ကွံ​လီၤ. ပ​မ့ၢ်​မၤ​ဒ်​န့ၣ်​န့ၣ်​ ယဟိဝၤ​ယွၤ​စံးဆၢ​က့ၤ​ပှၤလၢ အ​ဒုၣ်ဒွဲၣ်​အီၤ​တဂၤ​န့ၣ်​သ့​ဝဲ​လီၤ.—ကတိၤဒိ ၂၇:၁၁.

၁၀. စံးထီၣ်​ပတြၢၤ ၂၂:၂၃, ၂၄ တဲ​ဘၣ်ဃး​ဒီး ယဟိဝၤ​ယွၤ​ဒ်လဲၣ်.

^၁၀ ကစၢ်​ယွၤ​အခ့​အပှၤ​တဖၣ်​ ထံၣ်​ဘၣ်​ဒီး​တၢ်နး​တၢ်ဖှီၣ်​လီၤ. ယဟိဝၤ​ယွၤ​မ့ၢ် ကစၢ်​လၢ​အ​အိၣ်ဒီး တၢ်​သးကညီၤ​လီၤ. ခီဖျိ​လၢ ပ​မ့ၢ်​ပှၤ​တလၢ​တ​ပှဲၤ​ဘၣ်, ပ​ထံၣ်​ဘၣ်​ဒီး​တၢ်​မၤအၢ​မၤနး ဒီး​တၢ်ဆူး​တၢ်ဆါ အဃိ ပသူၣ်​ဟးဂီၤ​သး​ဟးဂီၤ​ဒိၣ်မး​လီၤ. ဖဲ​ယဟိဝၤ​ယွၤ​ထံၣ်​ဘၣ်​ဝဲ လၢ​ပ​လဲၤ​ခီဖျိ​ဘၣ်​ တၢ်​သ့ၣ်​တဖၣ်​အံၤ​အခါ အသး​ဘၣ်ဒိ​​ဝဲ​ဒိၣ်မး​လီၤ. (ဖး စံးထီၣ်​ပတြၢၤ ၂၂:၂၃, ၂၄ တက့ၢ်.) တၢ်​လၢ​ပ​တူၢ်​ဘၣ်​ခီၣ်​​ဘၣ်​တဖၣ်​န့ၣ်​ ယဟိဝၤ​ယွၤ​ထံၣ်ဝဲ ဒီး​အ​အဲၣ်ဒိး​မၤ​လီၤမၢ်​ကွံာ်ဝဲ ဒီး​က​မၤ​လီၤမၢ်​ကွံာ်​ဝဲ​သပှၢ်တၢၢ်​လီၤ. (ထိၣ်သတြီၤ​ဒီး ၂ မိၤၡ့ ၃:၇, ၈; ယၡါယၤ ၆၃:၉ တက့ၢ်.) မုၢ်​က​အိၣ်​ဝဲ​တနံၤ​လၢ “ကစၢ်​ယွၤ​က​ထွါကွံာ် [ပှၤ] အ​မဲာ်ထံ​ခဲလၢာ် လၢ​အ​မဲာ်ချံ​ပူၤ ဒီး​တၢ်သံ​တအိၣ်​လၢၤဘၣ်. ဒီး​တၢ်​သူၣ်အုး​သးအုး​မ့ၢ်ဂ့ၤ, တၢ်ဟီၣ်​တၢ်ယၢၤ​မ့ၢ်ဂ့ၤ, တၢ်​လၢ​အ​ဆါ​မ့ၢ်ဂ့ၤ, တအိၣ်​လၢၤဘၣ်.”—လီၣ်ဖျါ ၂၁:၄.

၁၁. ယဟိဝၤ​ယွၤ​အခ့​အပှၤ​လၢ အသး​တီ​ဒီး​အီၤ​လၢ အ​သံတ့ၢ်​သ့ၣ်​တဖၣ်​န့ၣ်​ ယဟိဝၤ​ယွၤ​သ့ၣ်နီၣ်​​ဘၣ်​အဝဲသ့ၣ်​ဒ်လဲၣ်.

^၁၁ ကစၢ်​ယွၤ​​ဘၣ်​လီၤဖး​ဒီး အ​တံၤသကိး​လၢ အ​သံ​သဒၣ်​အီၤ​တဖၣ်​လီၤ. ဖဲ​ယဟိဝၤ​ယွၤ​ထံၣ်ဘၣ်​ အခ့​အပှၤ​လၢ အသး​တီ​တဖၣ်​သံ​အခါ​န့ၣ်​ အ​တူၢ်​ဘၣ်​​ဝဲ​ဒ်လဲၣ်. ယဟိဝၤ​ယွၤ​အဲၣ်ဒိး ထံၣ်​ဘၣ်​ကဒါက့ၤ အဝဲသ့ၣ်​သပှၢ်တၢၢ်​လီၤ. (ယိၤဘး ၁၄:၁၅) ထံၣ်တမှံကွၢ်  ယဟိဝၤ​ယွၤ​အဲၣ်ဒိး​ထံၣ်​ဘၣ်​ကဒါက့ၤ အ​တံၤသကိး စီၤ​အၤဘြၤ​ဟၣ်​ လၢ​အ​သံ​သဒၣ်​အီၤ​ထဲလဲၣ်​န့ၣ်​တက့ၢ်. (ယၤကိာ် ၂:၂၃) ဒီး​ယဟိဝၤ​ယွၤ​အဲၣ်ဒိး တဲသကိး​က့ၤ​တၢ်​ဒီး​စီၤ​မိၤၡ့ “မဲာ်​သကိး​မဲာ်” ဒ်​အ​ပူၤကွံာ်​လၢညါ​အသိး​လီၤ. (၂ မိၤၡ့ ၃၃:၁၁) တကး​ဒံးဘၣ်​ ယဟိဝၤ​ယွၤ​အဲၣ်ဒိး နၢ်ဟူ စီၤ​ဒၤဝံး​ဒီး ပှၤ​ကွဲး​ထါ​စံးထီၣ်​ပတြၢၤ​အဂၤ​တဖၣ်​ အ​တၢ်​သးဝံၣ်​စံးထီၣ်​ပတြၢၤ​တၢ်​လီၤ. (စံးထီၣ်​ပတြၢၤ ၁၀၄:၃၃) ယဟိဝၤ​ယွၤ​အ​တံၤသကိး​သ့ၣ်​တဖၣ်​အံၤ သံ​သဒၣ်​အီၤ​သနာ်က့ ကစၢ်​ယွၤ​တ​သးပ့ၤနီၣ်​ အဝဲသ့ၣ်​ဘၣ်. (ယၡါယၤ ၄၉:၁၅) ကစၢ်​ယွၤ​နီၣ်​ဘၣ်​အဝဲသ့ၣ်​ အဂ့ၢ်​အကျိၤ​ခဲလၢာ်​လီၤ. လံာ်စီဆှံ​တဲ​ဝဲ​လၢ “လၢ​ကစၢ်​ယွၤ အ​တၢ်​ထံၣ်​န့ၣ်​ အဝဲသ့ၣ်​ခဲလၢာ် မ့ၢ်​ပှၤ​မူ​လီၤ.” (လူၤကၣ်​ ၂၀:၃၈, တၢ်ဂ့ၢ်​အဘျဲၣ်.) မုၢ်​က​အိၣ်​ဝဲ​တနံၤ ယဟိဝၤ​ယွၤ က​မၤ​သမူထီၣ်​က့ၤ​အဝဲသ့ၣ်​ ဒီး​က​နၢ်ဟူ​​ဘၣ်​အဝဲသ့ၣ်​ တၢ်​ဃ့​ဘါ​ထုကဖၣ်​လီၤ. ဒီး​ယဟိဝၤ​ယွၤ​က​တူၢ်လိာ် အဝဲသ့ၣ်​အ​တၢ်​ဘူၣ်ထီၣ်​ဘါထီၣ်​လီၤ. ဖဲ​ပှၤလၢ​န​အဲၣ်​ဘၣ်​အီၤ​တဂၤ သံ​သဒၣ်​နၤ​အခါ န​မ့ၢ်​ဆိကမိၣ်​ထီၣ်​က့ၤ တၢ်ဂ့ၢ်​သ့ၣ်​တဖၣ်​အံၤန့ၣ်​ န​သး​ကမုာ်​ထီၣ်​ဝဲ​လီၤ.

၁၂. တၢ်မနုၤ​မၤ​သးအုး ယဟိဝၤ​ယွၤ​အသး အဒိၣ်​ကတၢၢ်​လဲၣ်.

^၁၂ ကစၢ်​ယွၤ​ထံၣ်ဘၣ်​ ပှၤအၢ​ပှၤသီ​တဖၣ်​ မၤနၢၤ​အီၣ်ဃီၣ်​ပှၤဂၤ​အခါ အ​သးအုး​လီၤ. ဖဲ​ပှၤ​ပူထီၣ်​ထီဒါ​တၢ်​လၢ ဧ့ၤဒ့ၣ်​အခါ အ​ဝဲ​သ့ၣ်ညါ​​ဝဲ​လၢ တၢ်အိၣ်သး​ကနး​ထီၣ်ဝဲ ကွ့ၢ်ကွ့ၢ်​လီၤ. ယဟိဝၤ​ယွၤ သးဟ့​တၢ်အၢ​တၢ်သီ, တၢ်​တတီ​တလိၤ ဒီး​တၢ်​မၤဆူၣ်​မၤစိး​လၢ မုၢ်မဆါ​တနံၤ​အံၤ​လီၤ. ထီဘိ​န့ၣ်​ ယဟိဝၤ​ယွၤ​သးကညီၤဝဲ ပှၤလၢ​အ​ဂံၢ်စၢ်​ဘါစၢ်​လၢ ပှၤ​မၤနၢၤ​အီၣ်ဃီၣ်​အဝဲသ့ၣ်​ ဒီး​ပှၤလၢ​အ​ဒီသဒၢ​လီၤ အ​နီၢ်ကစၢ်​အသး တ​သ့​​ဘၣ်​တဖၣ်​ ဒ်သိး​ဒီး ပှၤ​ဖိၣ်ဃဲ​ဒီး​မုၣ်ကမဲ​တဖၣ်​လီၤ. (စ​ကး​ရ​ယၤ ၇:၉, ၁၀) ဖဲ​ယဟိဝၤ​ယွၤ ထံၣ်​ဘၣ်​ဝဲ ပှၤ​မၤအၢ​မၤနး ဒီး​ပာ်​လီၤ​အခ့​အပှၤ​လၢ​အသး​တီ​တဖၣ်​ လၢ​ဃိာ်ပူၤ​အခါ အသး​ဘၣ်ဒိ​ဒိၣ်မး​လီၤ. ပ​နာ်​သ့​သပှၢ်​ကတၢၢ်​လၢ ယဟိဝၤ​ယွၤ​အဲၣ်​ ပ​ဝဲ​ဒၣ်​ခဲလၢာ်​လီၤ.

၁၃. ပှၤ​ဟီၣ်ခိၣ်​ဖိ​တဖၣ်​ အိၣ်ဒီး​လုၢ်လၢ်​လၢ အ​လီၤရၢၢ်​လီၤစၢၢ်​ဒ်လဲၣ်​ ဒီး​ယဟိဝၤ​ယွၤ​က​မၤ​ဝဲ​ဒ်လဲၣ်.

^၁၃ ပှၤ​ဟီၣ်ခိၣ်​ဖိ​တဖၣ်​အိၣ်ဒီး​လုၢ်လၢ်​လၢ အ​လီၤရၢၢ်​လီၤစၢၢ်​လီၤ. ယဟိဝၤ​ယွၤ​တ့လီၤ ပှၤ​ဟီၣ်ခိၣ်​ဖိ​တဖၣ်​လၢ က​ကွၢ်လိ​မၤဒိး​အီၤ​အဂီၢ်​လီၤ. ဘၣ်ဆၣ်​ မုၣ်ကီၤလံၢ်​အဲၣ်ဒိး​ဝဲ​လၢ အဝဲသ့ၣ်​က​မၤ​တၢ်အၢ​တၢ်သီ​လီၤ. ဖဲ​စီၤ​နိအၤ​အ​စိၤ​န့ၣ်​ “ယွၤ​ထံၣ်​ဝဲ​လၢ ပှၤကညီ​အ​တၢ်​ဒဲးဘး​န့ၣ်​ မ့ၢ်​အဒိၣ်” အဃိ မ့ၢ်​လၢ​ကစၢ်​ယွၤ “တ့​လီၤ​ပှၤကညီ​လၢ​ဟီၣ်ခိၣ်​ချၢ​ဒီး, ယွၤ​ပီၢ်ယၢ်​​လီၤ​က့ၤ​အသး, ဒီး​အ​သးအုး​လၢ​အ​သးကံၢ်​ပူၤ​လီၤ.” (၁ မိၤၡ့ ၆:၅, ၆, ၁၁) စးထီၣ်​ဖဲ​န့ၣ်​လံၤ​လံၤ မ့ၢ်​ဟီၣ်ခိၣ်​အ​တၢ်အိၣ်သး ဂ့ၤထီၣ်​​ဝဲ​စ့ၢ်ကီး​ဧါ. တၢ်အိၣ်သး​တဂ့ၤ​ထီၣ်​နီ​တ​ဆဲး​ဘၣ်. မုၣ်ကီၤလံၢ်​သးခု​​ဝဲ​ဒိၣ်မး ဖဲ​အ​ထံၣ်​ဘၣ်​​ဝဲ​လၢ ပှၤ​ဟီၣ်ခိၣ်​ဖိ​တဖၣ်​ အိၣ်ဒီး​လုၢ်လၢ်​လၢ အ​လီၤရၢၢ်​လီၤစၢၢ် လၢန့ၣ်​အ​ကျါ​ပၣ်ဃုာ်​ဒီး တၢ်​မံဃုာ်​အိၣ်ဃုာ်​ဒီး​ပိာ်မုၣ်​ဒီး​ပိာ်ခွါ ဒီး​မုၣ်​ကဒဲ​ကဒဲ​ခွါ​ကဒဲကဒဲ တၢ်​မံဃုာ်​အိၣ်ဃုာ်​လီၤ. (အ့းဖ့းစူး ၄:၁၈, ၁၉) ဖဲ​ယဟိဝၤ​ယွၤ​အခ့​အပှၤ​တဖၣ်​ မၤ​​ဘၣ်​တၢ်​ဒဲးဘး​အခါ မုၣ်ကီၤလံၢ်​သးခု​ဒိၣ်မး​လီၤ. ဖဲ​ယဟိဝၤ​ယွၤ အ​တၢ်​ဝံသးစူၤ​ဝံၤ​​ဝဲ​အခါ အ​ဝဲ​က​မၤ​ဟးဂီၤ​ကွံာ် ပှၤလၢ​အ​အိၣ်ဒီး လုၢ်လၢ်​သ​ကဲး​ပ​ဝး လၢ​အ​လီၤရၢၢ်​လီၤစၢၢ်​တဖၣ်​အံၤ​လီၤ.

၁၄. ပှၤ​ဟီၣ်ခိၣ်​ဖိ​တဖၣ်​ မၤ​ဘၣ်ဒိ​ဟီၣ်ခိၣ်​ဒီး ဆၣ်ဖိ​ကီၢ်ဖိ​တဖၣ်​ဒ်လဲၣ်.

^၁၄ ပှၤ​ဟီၣ်ခိၣ်​ဖိ​တဖၣ်​ မၤ​ဟးဂီၤ ကစၢ်​ယွၤ​အ​တၢ်​ဘၣ်​တ့လီၤ. ဆၢကတီၢ်​ခဲအံၤ “ပှၤ​ပၢ​ပှၤဂၤ​လၢ​တၢ်အၢ​အဂီၢ်” တကး​ဒံးဘၣ်​ ပှၤ​မၤ​ဟးဂီၤ​ဟီၣ်ခိၣ်​ ဒီး​ဆၣ်ဖိ​ကီၢ်ဖိ​လၢ ကစၢ်​ယွၤ​မၢ​အဝဲသ့ၣ်​ ကွၢ်ထွဲ​ဝဲ​တဖၣ်​လီၤ. (စံၣ်တဲၤ​တဲ​လီၤ​တၢ် ၈:၉; ၁ မိၤၡ့ ၁:၂၈) ပှၤ​ကူၣ်​​ဘၣ်​ကူၣ်သ့​တနီၤ​တဲ​ဝဲ​လၢ ခီဖျိ​လၢ​ပှၤ​ဟီၣ်ခိၣ်​ဖိ အတၢ်ဖံး​တၢ်မၤ​အဃိ လၢ​စှၤကိာ်​နံၣ်​ဒီး​န့ၣ်​ ဆၣ်ဖိ​ကီၢ်ဖိ ဒီး​တၢ်မုၢ်​တၢ်ဘိ​အကလုာ်​ကလုာ် လၢ​တကကွဲၢ်​ဃၣ်ဃၣ်​ က​လီၤတူာ်​ကွံာ်​ဝဲ​လီၤ. အဃိ ပနၢ်ပၢၢ်​သ့​လၢ ​ဘၣ်​မနုၤ​အဃိ ပှၤ​ဟီၣ်ခိၣ်​ဖိ​ဘၣ်ယိၣ်​တၢ်​လၢ န့ဆၢၣ်​အဂီၢ်​လဲၣ်န့ၣ်​လီၤ. ယဟိဝၤ​ယွၤ​အၢၣ်​လီၤ​​ဝဲ​လၢ “က​မၤ​ဟးဂီၤ ပှၤလၢ​အ​မၤ​ဟးဂီၤ ဟီၣ်ခိၣ်​န့ၣ်​လီၤ.” ဒီး​ကစၢ်​ယွၤ​က​မၤ​ကဲထီၣ်​က့ၤ ဟီၣ်ခိၣ်​အံၤ​လၢ ပၤရဒံစူး​လီၤ. ပ​သ့ၣ်ညါ​​ဘၣ်​ဒ်အံၤ​အဃိ ပ​သးခု​ဒိၣ်မး​လီၤ.—လီၣ်ဖျါ ၁၁:၁၈; ယၡါယၤ ၃၅:၁.

၁၅-၁၆. တၢ်မနုၤ ထိၣ်ဟူး​ထိၣ်ဂဲၤ​ထီၣ်​ပှၤလၢ ပ​ကအိၣ်​ဒီး တၢ်​တူၢ်န့ၢ်​ခီၣ်ကဲ ဒ်​ယဟိဝၤ​ယွၤ​အသိး​လဲၣ်. ဟ့ၣ်​တၢ်​အဒိ​တက့ၢ်.

^၁၅ ဆိကမိၣ်​ကွၢ် တၢ်ကီ​တၢ်ခဲ​လၢ ယဟိဝၤ​ယွၤ​ထံၣ်​ဘၣ်​​ဝဲ​လၢ အနံၣ်​လၢ​အ​ကထိ​တဖၣ်​န့ၣ်​တက့ၢ်. (ကွၢ်​တၢ်လွံၢ်နၢၣ်​လၢ “ ယဟိဝၤ​ယွၤ ​ဘၣ်​လဲၤ​ခီဖျိ တၢ်မနုၤ​လဲၣ်” တက့ၢ်.) ယဟိဝၤ​ယွၤ​မ့ၢ်​မၤ​လီၤမၢ်​ကွံာ် တၢ်အၢ​တၢ်သီ​လၢ​ဟီၣ်ခိၣ်​ချၢ​အံၤ သ့​ကိး​ဆၢ​ကိး​ကတီၢ်ဒဲး​လီၤ. ဘၣ်ဆၣ်​ ခီဖျိ​လၢ​ယဟိဝၤ​ယွၤ ဝံသးစူၤ​တၢ်​အဃိ ပ​ဒိးန့ၢ်​ဘၣ်​  အဘျုး​အဖှိၣ်​အါမး​လီၤ. ဆိကမိၣ်​ကွၢ် တၢ်​အဒိ​အံၤ​တက့ၢ်. ကသံၣ်​သရၣ်​တဲ​ဘၣ်​ ပှၤ​နီၢ်​ဒီမါဝၤ​ခံဂၤ​လၢ အ​ဖိ​လၢ​က​အိၣ်ဖျဲၣ်​ထီၣ်န့ၣ်​ အတၢ်​အိၣ်ဆူၣ်​အိၣ်​ချ့​တဂ့ၤ​ဘၣ်. ဒီး​ဖိသၣ်​အံၤ မ့ၢ်​အိၣ်ဖျဲၣ်​ထီၣ်​န့ၣ်​ အ​တၢ်​အိၣ်မူ​က​ပှဲၤ​ဒီး တၢ်ကီ​တၢ်ခဲ ဒီး​တ​အိၣ်မူ​ဘၣ်​ ယံာ်​ယံာ်​ဘၣ်. ဘၣ်ဆၣ်​ မိၢ်ပၢ်​ခံဂၤ​အံၤ​သးခု​​ဝဲ​ဒိၣ်မး​ဖဲ အ​ဖိ​အိၣ်ဖျဲၣ်​ထီၣ်​ဝဲ​အခါ ဒီး​အဝဲသ့ၣ်​​ဘၣ်​ကွၢ်​လုၢ်ဒိၣ်​ထီၣ်​ အ​ဖိ​ကီကီ​ခဲခဲ​လီၤ. ခီဖျိ​လၢ​အဝဲသ့ၣ်​ အဲၣ်​အ​ဖိ​အံၤ​အဃိ အဝဲသ့ၣ်​လဲၤ​ခီဖျိ​​ဝဲ​တၢ်ကီ​တၢ်ခဲ​ဒီး ကွၢ်​လုၢ်ဒိၣ်​ထီၣ်​အ​ဖိ လၢ​အဂ့ၤ​ကတၢၢ်​လီၤ.

^၁၆ ဒ်​န့ၣ်​အသိး နီၢ်​အံၣ်အု​ဒီး​စီၤ​အၤဒၣ်​ အ​ဖိ​အလံၤ​တဖၣ်​န့ၣ်​ မ့ၢ်ပှၤ​တလၢ​တ​ပှဲၤ​ဘၣ်​ ဘၣ်ဆၣ်​ ယဟိဝၤ​ယွၤ​အဲၣ်​အဝဲသ့ၣ်​ ဒီး​ကဟု​ကယာ်​အဝဲသ့ၣ်​လီၤ. (၁ ယိၤဟၣ်​ ၄:၁၉) မိၢ်ပၢ်​လၢ​တၢ်​အဒိ​အံၤန့ၣ်​ တအိၣ်​ဒီး​တၢ်​သ့​တၢ်​ဘၣ်​လၢ က​မၤ​လီၤမၢ်​န့ၢ် အ​ဖိ​တၢ်ကီ​တၢ်ခဲ​ဘၣ်. ဘၣ်ဆၣ်​ မ့မ့ၢ်​ယဟိဝၤ​ယွၤ​န့ၣ်​ မၤ​လီၤမၢ်​ကွံာ် တၢ်ကီ​တၢ်ခဲ​လၢ အဖိ​တဖၣ်​ထံၣ်​ဘၣ်​​ဝဲ​သ့​လီၤ. ယဟိဝၤ​ယွၤ​ပာ်​ပနီၣ်​ဃာ် တၢ်​ဆၢကတီၢ်​လၢ က​မၤ​လီၤမၢ်​ကွံာ် ပှၤ​ဟီၣ်ခိၣ်​ဖိ အ​တၢ်ကီ​တၢ်ခဲ ခဲလၢာ်​လီၤ. (မးသဲ ၂၄:၃၆) ယဟိဝၤ​ယွၤ အ​တၢ်အဲၣ်​တၢ်ကွံ​အံၤ ကြၢး​ထိၣ်ဟူး​ထိၣ်ဂဲၤ​ထီၣ်​ပှၤလၢ ပ​ကအိၣ်​ဒီး​တၢ်​တူၢ်န့ၢ်​ခီၣ်ကဲ တမ့ၢ်​ဧါ.

၁၇. ယ့ၣ်ၡူး​အဂ့ၢ်​လၢ ဧ့ၤဘြံၤ ၁၂:၂, ၃ အ​ပူၤ​န့ၣ်​ ဟ့ၣ်ဂံၢ်​ဟ့ၣ်ဘါ​ပှၤလၢ ပကအိၣ်​ဒီး​တၢ်​တူၢ်န့ၢ်​ခီၣ်ကဲ​ဒ်လဲၣ်.

^၁၇ ယဟိဝၤ​ယွၤ​အိၣ်ဒီး တၢ်​ဒိဂ့ၤ​တဲာ်ဘၣ်​ ဘၣ်ဃး​ဒီး တၢ်​တူၢ်န့ၢ်​ခီၣ်ကဲ​လီၤ. ယ့ၣ်ၡူး​ကွၢ်လိ​မၤဒိး ယဟိဝၤ​ယွၤ အ​တၢ်​တူၢ်န့ၢ်​ခီၣ်ကဲ သ့​ဂ့ၤဂ့ၤ​လီၤ. ဖဲ​ယ့ၣ်ၡူး​အိၣ်​လၢ​ဟီၣ်ခိၣ်​ချၢ​အခါ အ​ဝဲ​​ဘၣ်​လဲၤ​ခီဖျိ​ဝဲ တၢ်​ဆူၣ်ဆူၣ်​ကိၤကိၤ, တၢ်​မဲာ်ဆှး​ဒီး တၢ်​မၤအၢ​မၤနး​လၢ ပဂီၢ်​​လီၤ. (ဖး ဧ့ၤဘြံၤ ၁၂:၂, ၃ တက့ၢ်.) ယဟိဝၤ​ယွၤ​အဒိ​အတဲာ်​န့ၣ်​ မၤစၢၤ​ယ့ၣ်ၡူး​လၢ ကအိၣ်​ဒီး​တၢ်ဂံၢ်​တၢ်ဘါ​လၢ က​လဲၤ​ခီဖျိ​တၢ်ကီ​တၢ်ခဲ​အဂီၢ်​လီၤ. ဒီး​အ​မၤစၢၤ​စ့ၢ်ကီး​ပှၤလီၤ.

၁၈. ၂ ပ့းတရူး ၃:၉ န့ၣ်​မၤစၢၤ​ပှၤလၢ ပ​သ့ၣ်ညါ​ထီၣ်​ ယဟိဝၤ​ယွၤ​အ​တၢ်​ဝံသးစူၤ​ဒ်လဲၣ်.

^၁၈ ဖး ၂ ပ့းတရူး ၃:၉ တက့ၢ်. ယဟိဝၤ​ယွၤ​သ့ၣ်ညါ​​ဝဲ​လၢ က​ဘၣ်​မၤ​ကတၢၢ်​ကွံာ် တၢ်အၢ​တၢ်သီ​လၢ ဟီၣ်ခိၣ်​အံၤ​အခါ​ဖဲလဲၣ်​န့ၣ်​လီၤ. ခီဖျိ​လၢ​ယဟိဝၤ​ယွၤ ဝံသးစူၤ​တၢ်​အဃိ ပှၤ​ဂီၢ်မုၢ်​လၢ​အ​ကကွဲၢ်​တဖၣ်​ အိၣ်ဒီး​တၢ်ခွဲး​တၢ်ယာ်​လၢ က​သ့ၣ်ညါ​ထီၣ်​အီၤ​ဒီး ဘူၣ်ထီၣ်​ဘါထီၣ်​​ဘၣ်​အီၤ​လီၤ. အဝဲသ့ၣ်​သးခု​ဒိၣ်မး​လၢ ယဟိဝၤ​ယွၤ​အိၣ်ဒီး တၢ်တူၢ်န့ၢ်​ခီၣ်ကဲ ဖးယံာ်​တုၤ​လၢ အဝဲသ့ၣ်​အိၣ်ဖျဲၣ်​ထီၣ်, မၤလိ​​ဘၣ်​အဂ့ၢ်, အဲၣ်အီၤ ဒီး​ဟ့ၣ်​လုၢ်ထီၣ်​အသး လၢ​အ​အိၣ်​လီၤ. ပှၤလၢ​အ​ကကွဲၢ်​တဖၣ်​ အိၣ်ဒီး​တၢ်​တူၢ်န့ၢ်​ခီၣ်ကဲ တုၤ​အ​ကတၢၢ်​န့ၣ်​ ပာ်ဖျါ​ထီၣ်​ဝဲ​လၢ ယဟိဝၤ​ယွၤ​မၤဝဲ တၢ်​ဆၢတဲာ်​လၢ​အဘၣ်​ ခီဖျိ​လၢ အ​အိၣ်ဒီး တၢ်​ဝံသးစူၤ​အဃိ​လီၤ.

၁၉. ပ​ပာ်​လီၤ​ပသး​လၢ ပ​က​မၤ​တၢ်မနုၤ​လဲၣ်​ ဒီး​ပ​က​ဒိးန့ၢ်​​ဘၣ်​တၢ်မနုၤ​လဲၣ်.

^၁၉ ပ​လဲၤ​ခီဖျိ​တၢ်ကီ​တၢ်ခဲ​လၢ တၢ်​သးခု​အ​ပူၤ​သ့ ခီဖျိ​ပ​မၤလိ​န့ၢ်​တၢ်​လၢ ယဟိဝၤ​ယွၤ​အ​အိၣ်​လီၤ. မုၣ်ကီၤလံၢ်​ဒုးအိၣ်​ထီၣ်ဝဲ တၢ်ကီ​တၢ်ခဲ ဒီး​တၢ်နး​တၢ်ဖှီၣ်​ သနာ်က့ ယဟိဝၤ​ယွၤ​ဆဲး​မ့ၢ်​ဒံးဝဲ “ကစၢ်​ယွၤ​လၢ​အ​သးခု​တဂၤ” လီၤ. (၁ တံၤမသ့း ၁:၁၁) ပ​ဝဲ​စ့ၢ်ကီး ပ​မ့ၢ်​အိၣ်ခိး​ယဟိဝၤ​ယွၤ​လၢ တၢ်​သးစူၤ​အ​ပူၤ​န့ၣ်​ ယဟိဝၤ​ယွၤ​က​ပာ်​စီဆှံ​အ​မံၤ, အိၣ်ဒီး​တၢ်ပၢအခွဲး​ဒီး က​မၤ​ကတၢၢ်​ကွံာ်​တၢ်အၢ​တၢ်သီ ဒီး​တၢ်ကီ​တၢ်ခဲ​လၢ ပ​ထံၣ်​ဘၣ်​အီၤ​ခဲလၢာ်​လီၤ. အဃိ မ်​ပ​ပာ်​လီၤ​ပသး ဂၢၢ်​ဂၢၢ်​ကျၢၤကျၢၤ​လၢ ပ​က​ဆဲး​အိၣ်ဒီး တၢ်​တူၢ်န့ၢ်​ခီၣ်ကဲ ဒီး​သ့ၣ်ညါ​လၢ ယဟိဝၤ​ယွၤ​စ့ၢ်ကီး အိၣ်ဒီး​တၢ်​တူၢ်န့ၢ်​ခီၣ်ကဲ​လီၤ. ပ​မ့ၢ်​မၤ​ဒ်​န့ၣ်​န့ၣ်​ လံာ်စီဆှံ​တ​ဆၢ​အံၤ က​ဟဲ​လၢထီၣ်​ပှဲၤထီၣ်​​ဝဲ​လၢ ပဂီၢ်​လီၤ. “ပှၤလၢ အ​ဆဲး​အိၣ်ဂၢၢ်​ဆိးကျၢၤ ဖဲ​အ​ဘၣ်​တၢ်​မၤကွၢ်​အီၤ​အခါ​န့ၣ်​ က​သးခု​ဝဲ, မ့ၢ်​လၢ ဖဲ​အ​ကဲထီၣ်​ပှၤလၢ အ​ဘၣ်​တၢ်​တူၢ်လိာ်​အီၤ​အခါ အ​က​ဒိးန့ၢ်​ဘၣ်​ တၢ်မူ​အ​ခိၣ်သလုး​လၢ ယဟိဝၤ​ယွၤ အၢၣ်​လီၤ​ပာ်စၢၤ​ဝဲ ပှၤလၢ​အ​အဲၣ်အီၤ​တဖၣ်​န့ၣ်​လီၤ.”—ယၤကိာ် ၁:၁၂.