1-2. Yinki mutindu bampova ya Yehova yina kele na Yezaya 65:16, 17 kena kukindisa beto beto bika ve?

‘KUBIKA VE!’ yau nde vuandaka yintu ya diambu ya lukutakanu ya nene ya 2017. Lukutakanu yango monisaka beto mutindu beto lenda kanga ntima na mambu ya mpasi. Bamvula yiya meluta banda lukutakanu yango ya nene salamaka, mpe tii bubu yayi beto kena kutatamana kukanga ntima na yinza yayi ya yimbi.

² Yinki mambu ya mpasi nge mekatuka kukutana na yau ntama ve? Nge mekatuka fuila mpangi ya dibuta to nkundi yina nge kezolaka mingi? Nge kele na maladi mosi ya ngolo? Mambu ya luzingu mekuma mpasi samu nge mekuma kiboba? Kisumbula ya nene, kinkesi, to kumekama? To mambu ya mpasi yina maladi yayi ya yimbi COVID-19 menata? Beto kena kuvingila na nsatu ya ngolo kilumbu mambu yango ya mpasi kemanisa—beto kekanisa yau diaka ve, mpe yakevutuka diaka ve!—Tanga Yezaya 65:16, 17.

3. Yinki beto fueti sala ntangu yayi, mpe samu na yinki?

³ Luzingu na yinza yayi kele mpasi, mpe beto lenda kutana diaka na mambu yankaka ya mpasi na bilumbu kena kuiza. (Mat. 24:21) Na yau, beto fueti tatamana kulonguka kukanga ntima kuluta. Samu na yinki? Samu Yesu tubaka: ‘Kana beno mekanga ntima beno ketanina baluzingu na beno.’ (Luka 21:19) Kukanisa na mutindu bampangi yankaka kena kununga kukanga ntima na bampasi yina mekokana na yina ya beto, lenda sadisa beto beto vuanda na dikoki ya kukanga ntima kuluta.

4. Samu na yinki beto lenda tuba ti Yehova kele kifuani ya mbote na diambu metadila kukanga ntima?

⁴ Nani kele kifuani ya mbote na diambu metadila kukanga ntima? Yehova Nzambi. Yamekamuisa nge? Mbala yankaka nge mekamua. Kasi kana nge mekanisa samu na diambu yango, nge kebakusa ti Diabulu nde kena kuyadila yinza yayi mpe yau yina nde yamefuluka  na bampasi. Yehova kele na kilendo ya kumanisa yau ata ntangu yayi, kasi yandi kena kuvingila kilumbu yandi ponaka samu na kusala yau. (Bar. 9:22) Tekila ntangu yango koka, Nzambi na beto kena kutatamana kukanga ntima tii kilumbu yango kekuiza. Beto tadila mambu 9 yina Yehova kena kukangila ntima.

5. Yinki mutindu babebisaka lokumu ya nkumbu ya Nzambi, mpe yinki mutindu nge kekukimonaka samu na yau?

⁵ Kubebisama ya lokumu ya nkumbu na yandi. Yehova kezolaka nkumbu na yandi, mpe yandi kezolaka muntu nionso zitisa nkumbu yango. (Yez. 42:8) Kasi bamvula 6 000 meluta, babebisaka lokumu ya nkumbu na yandi. (Nk. 74:10, 18, 23) Yabandaka na bilanga ya Edeni ntangu Diabulu (yina zola monisa muntu ya “Luvunu”) fundaka Nzambi ti yandi keyiminaka Adamu mpe Eva kima mosi yina lenda sala ti bavuanda na kiese. (Kuy. 3:1-5) Banda vana, Yehova kefundamaka na mutindu ya yimbi ti yandi keyiminaka bantu bima yina bakele na yau mpenza nsatu. Yesu tungisamaka samu babebisaka lokumu ya nkumbu ya Tata na yandi. Yakele samu na yau nde, yandi longaka banlonguki na yandi basambilaka ti: ‘Tata na beto yina kele na dizulu, nkumbu na nge yazitusua.’—Mat. 6:9.

6. Samu na yinki Yehova bikaka ntangu mingi luta tekila yandi zenga diambu metadila luyalu na yandi?

⁶ Kutelemina luyalu na yandi. Yehova kaka kele na yinsua ya kuyadila dizulu mpe ntoto, mpe mutindu na yandi ya kuyadila kele mbote kuluta. (Kus. 4:11) Kasi Diabulu mekaka kuvuna bambasi mpe bantu na kutindaka bau bakanisa ti Nzambi kele ve na yinsua yango. Yalombaka ntangu samu na kumonisa ti Yehova nde kele na yinsua ya kuyadila mpe yandi kele n’yadi yina kele mbote kuluta. Na nduenga na yandi, Nzambi bikilaka bantu ntangu ya yinda samu bakukiyadila, samu bamona ti balenda nunga ve kukiyadila kukondua lutuadusu ya Mvangi. (Yer. 10:23) Na nzila ya mvibudulu na yandi nde Nzambi kesala ti diambu yango zengama mbala mosi. Mvibudulu ya Nzambi nde kesala ti muntu mosi ve tula ntembe ti Nzambi kele na yinsua ya kuyadila dizulu mpe ntoto. Muntu nionso kezaba ti mutindu ya kuyadila ya Yehova kele mbote kuluta mpe kaka Kimfumu na yandi nde ketula kiyenge mpe luvuvamu awa na ntoto.

7. Banani tombokilaka Yehova, mpe yinki yandi kesala bau?

⁷ Butomboki ya ndambu ya bana na yandi. Yehova semaka bana na yandi ya kimpeve mpe ya kinsuni na nzutu ya kukoka. Kasi na manima Satana (yina zola monisa “Mutomboki”) mosi ya bambasi na yandi tombokaka mpe yandi tindaka bantu ya kukoka, Adamu mpe Eva, batombokila Yehova. Bambasi mpe bantu yankaka sanganaka na butomboki yango. (Yude 6) Na manima, ata mpe Bayisaele, dibuta yina Nzambi ponaka, pesaka yandi mukongoni mpe bakumaka kusambila banzambi ya luvunu. (Yez. 63:8, 10) Yehova kukimonaka ti bameteka yandi. Kasi, yandi kangaka ntima, mpe yandi ketatamana kukanga ntima tii ntangu kekoka ya kufua batomboki nionso. Mpe Yehova na bisadi na yandi ya kukuikama kevuanda na kiese na mutindu bakevuanda diaka ve na nsatu ya kukanga ntima!

8-9. Yinki luvunu bantu kena kutuba samu na Yehova, mpe yinki beto lenda sala samu na yau?

⁸ Diabulu kena tatamana kuvuna. Satana fundaka Yobi kisadi ya kukuikama ya Yehova, na kutubaka ti bisadi nionso ya kukuikama ya Yehova kesadilaka Nzambi samu na mambote ya bau mosi. (Yobi 1:8-11; 2:3-5) Diabulu tatamanaka kufunda bantu tii bubu yayi. (Kus. 12:10) Beto lenda pesa maboko samu na kumonisa ti Satana kele muntu ya luvunu na kukangaka ntima na bampasi na beto mosi mpe kukuikama na Yehova samu na kumonisa ti beto kezolaka yandi. Yehova sakumunaka Yobi, yandi kesakumuna beto diaka kana beto mekanga ntima.—Yak. 5:11.

⁹ Satana kesadilaka bamfumu ya mabundu ya luvunu samu na kutuba ti Yehova kele muntu ya  kinkesi mpe bampasi ya bantu kekatukaka na yandi. Bayankaka ketubaka ti kana bana mekufua, Nzambi nde kebakaka bau samu yandi kevuandaka na nsatu ya bambasi mingi na dizulu. Yayi kele mpenza kukondua luzitu na Nzambi! Beto mezaba ti Yehova kele Tata ya nzola. Ntangu beto kena kubela maladi mosi ya ngolo to muntu mosi yina beto kezolaka mingi mekufua, beto fueti pesa Nzambi foti ve. Nzokande, beto kele na kiminu ti kilumbu kele yandi kekatula maladi nionso mpe yandi kefutumuna bantu ya kufua. Beto lenda zabisa na muntu yina kesepela kuwa beto ti Yehova kele Nzambi mosi ya nzola. Yau nde kepesa yandi nzila ya kupesa mvutu na muntu yina kena kusokusa yandi.—Bin. 27:11.

10. Yinki Nkunga 22:23, 24 kena kumonisa samu na Yehova?

¹⁰ Kuniokuama ya bisadi na yandi yina yandi kezolaka. Yehova kele Nzambi ya kiadi. Yandi keyinaka kuwa beto beto kena kudila samu na mambu ya mpasi yina beto kena kukangila ntima, na kifuani—kutelemina, maladi, to kimuntu na beto ya kukondua kukoka. (Tanga Nkunga 22:23, 24.) Yehova mezaba bampasi beto kena kumona; yandi kele na nsatu ya kukatula yau, mpe yandi kekatula yau. (Fuanikisa Kubasika 3:7, 8; Yez. 63:9.) Kilumbu kele yina ‘yandi kepangusa mansanga na meso na [beto], mpe lufua kevuanda diaka ve, bidilu mpe mpasi kevuanda diaka ve.’—Kus. 21:4.

11. Yinki mutindu Yehova kekukimonaka samu na bisadi na yandi ya kukuikama yina mekufuaka?

¹¹ Kukabuana na bankundi na yandi yina mekufuaka. Yinki mutindu Yehova kekukimonaka samu na bisadi na yandi ya kukuikama ya banketo mpe ya babakala yina mekufuaka? Yandi kele na nsatu ya kumona bau diaka! (Yobi 14:15) Nge lenda kanisa nsatu yina Yehova kele na yau ya kumona diaka nkundi na yandi Abrahami? (Yak. 2:23) To Mose, yina sololaka na yandi “meso na meso”? (Kub. 33:11) Mpe mutindu yandi kele na nsatu ya kuwa Davidi mpe banyimbidi yankaka ya nkunga kena kuyimbila bankunga na bau  ya kitoko ya kupesa nkembo! (Nk. 104:33) Atako bankundi yango ya Nzambi mekufuaka, Yehova zimbakana bau ve. (Yez. 49:15) Yandi zimbakana ve konso diambu metadila kimuntu na bau. Biblia metuba ti, ‘na meso na yandi bau nionso kele na luzingu.’ (Luka 20:38) Kilumbu kele, yandi kefutumuna bau, mpe yandi kekuwa bisambu na bau yina mekatuka na ntima mpe yandi kendima nsambudulu na bau. Kana nge mefuilaka muntu mosi yina nge vuandaka zola, mbala yankaka makanisi yayi kebomba mpe kekindisa nge.

12. Yinki mambu kepesaka Yehova mingi mingi kiadi na bilumbu yayi ya nsuka ya yimbi?

¹² Mutindu bantu ya yimbi kesalaka bantu yankaka mpasi. Ntangu butomboki bandaka na Edeni, Yehova zabaka ti luzingu ya bantu ketatamana kubeba tekila yabonga. Yehova keyinaka mambu ya yimbi, ya kukondua lunungu, mpe ya kinkesi na yinza. Yandi kemonisaka ntangu nionso ntima kiadi na bantu yina kemonanaka lokola bakele ve na muntu yina kekotila bau—na kifuani, bana yina mefuilaka bibuti mpe banketo yina mefuilaka babakala. (Zek. 7:9, 10) Yehova kemonaka diaka mpasi ntangu yandi ketalaka mutindu bakena kuniokola bisadi na yandi ya kukuikama mpe bakena kukotisa bau buloko. Beno ndimisama ti Yehova kezolaka beno nionso yina kena kukanga ntima na bampasi kintuadi na yandi.

13. Yehova kena kumona makanisi ya bantu mekuma yinki mutindu, mpe yinki yandi kesala samu na yau?

¹³ Makanisi ya bantu kena kutatamana kubeba na diambu metadila kusangisa nzutu. Satana kezolaka kubebisa bantu, yina salamaka na kifuani ya Nzambi. Ntangu Yehova ‘monaka yimbi ya muntu kumaka mingi’ na ntangu ya Noa, ‘Yehova monaka kiadi mutindu yandi salaka bantu na ntoto, mpe yandi monaka mpasi na ntima.’ (Kuy. 6:5, 6, nyp., 11) Bubu yayi mambu mebonga? Ve! Diabulu kena kusepela ntangu yandi kena kumona pite ya mutindu nionso kena kusalama, na kifuani nketo mpe bakala yina kele ya kukuelana ve mpe banketo na banketo mpe babakala na babakala! (Efe 4:18, 19) Yakesalaka Satana kiese kana bisadi ya Yehova mekubua na disumu ya nene. Ntangu ntima yinda ya Yehova kekuma na nsuka, yandi kemonisa ti yandi keyinaka pite mutindu yandi kekufua bantu nionso yina memanga kusala bansobolo.

14. Yinki bantu kena kusala na ntoto yina Nzambi salaka?

¹⁴ Bantu kena kubebisa ntoto. Muntu kena ‘kuyadila muntu samu na kupesa yandi kaka mpasi ve’ kasi yandi kena kutanina ntoto ve mpe bibulu mutindu Yehova pesaka muntu ntumu. (Lon. 8:9; Kuy. 1:28) Bantu yankaka ya siansi metuba ti mambu yina bantu kena kusala kesala ti milion mosi ya mitindu * ya bibulu mpe ya bayinti zimbana na bamvula kena kuiza. Yakele mpasi ve kubakusa samu na yinki bantu kena kukitungisa samu na ntoto! Beto kele na butondi, na nsilulu ya Yehova ya ‘kubebisa bantu yina kebebisaka ntoto’ mpe kukumisa ntoto ya vimba paradiso.—Kus. 11:18; Yez. 35:1.

15-16. Yinki fueti tinda beto beto kanga ntima kintuadi na Yehova? Pesa kifuani.

¹⁵ Kanisa mambu nionso ya mpasi yina Tata na beto ya dizulu kekangilaka ntima banda mafunda ya bamvula. (Tala ankadre “ Mambu yina Yehova kekangilaka ntima.”) Yehova lenda tula nsuka ya yinza yayi ya yimbi na konso ntangu yina yandi zola. Kasi ntima na yandi ya yinda menatina beto balusakumunu mingi! Beto lenda kokanisa yau na kifuani yayi: Kanisa ntete bametubila bakala mosi mpe nketo na yandi ti muana na bau yina kezola butuka kebutuka na kieta, luzingu na yandi kevuanda na mpasi mpe yandi kekufua na kimuana. Kasi, bibuti kevuanda na kiese na kumona muana yango mebutuka, atako yakevuanda mpasi samu na bau ya kuyundula yandi. Nzola na bau samu na muana ketinda bau bakanga  ntima na konso mpasi yina bakekutana na yau samu na kupesa yandi luzingu ya mbote.

¹⁶ Mutindu mosi mpe, bana nionso ya Adamu mpe Eva kevuandaka ya kukondua kukoka ntangu bakebutukaka. Kasi, Yehova kezolaka bau mpe yandi ketudilaka bau dikebi. (1 Yoane 4:19) Mpe na lusuasanu na bibuti ya kifuani yayi, Yehova lenda manisa bampasi ya bana na yandi. Yandi mebongisaka kilumbu mosi yina yandi kemanisa bampasi ya bantu. (Mat. 24:36) Nzola yina Yehova kemonisinaka beto fueti tinda beto diaka beto kanga ntima kana diluaku kele.

17. Yinki mutindu bampova ya Yesu yina kele na Baebreo 12:2, 3 kena kukindisa beto beto tatamana kukanga ntima?

¹⁷ Yehova kele kifuani ya mbote na diambu metadila kukanga ntima. Yesu nungaka na kulandaka kifuani ya kikadulu ya kukanga ntima ya Tata na yandi. Ntangu yandi vuandaka awa na ntoto, yandi kangaka ntima na bampova ya mpasi, ya nsoni, mpe na yinti ya mpasi samu na mambote na beto. (Tanga Baebreo 12:2, 3.) Kukondua ntembe, kifuani ya kikadulu ya kukanga ntima ya Yehova pesaka Yesu ngolo samu yandi kanga ntima. Yalenda pesa beto diaka ngolo.

18. Yinki mutindu 2 Piere 3:9 kena kusadisa beto beto bakusa yina mvibudulu ya Yehova kena kukokisa?

¹⁸ Tanga 2 Piere 3:9. Yehova mezaba ntangu yina mebonga samu na kufua yinza yayi ya yimbi. Ntima yinda na yandi mepesa beto diluaku ya kukota na kati ya kimvuka ya nene, yina mesangisa bamilion ya bantu yina kena kusambila mpe kukumisa yandi. Bau nionso kele na kiese na mutindu Yehova kangaka ntima na ntangu ya yinda tii babutukaka, tii balongukaka kuzola yandi, mpe tii bakukipesaka na yandi. Ntangu Yehova kepesa mambote na bamilion ya bantu yina kekanga ntima tii na nsuka, na ntangu yango nde yakemonana puelele ti Yehova bakaka nzengolo ya mbote ya kuvibidila!

19. Beto fueti baka nzengolo ya kusala yinki, mpe yinki lusakumunu beto kebaka?

¹⁹ Yehova kena kulonga beto mutindu ya kukanga ntima na kiese. Atako mambu ya kiadi mpe ya mpasi yina Satana bimisaka, Yehova ketatamana kuvuanda “Nzambi ya kiese.” (1 Tm. 1:11) Beto diaka beto lenda tatamana kuvuanda na kiese na kumonisaka mvibudulu samu na kuvingila Yehova sakumuna nkumbu na yandi, kumonisa ti yandi kele Mfumu, kumanisa mambu nionso ya yimbi, mpe kumanisa mambu ya mpasi yina beto kena kukutana na yau bubu yayi. Beto baka nzengolo ya kukanga ntima mpe beto baka lukindusu na kuzaba ti Tata na beto diaka ya dizulu kena kukanga ntima. Kana beto mesala mutindu yina, bampova yayi kekuma ya kedika samu na mosi mosi na beto: ‘Kiese na muntu yina kena kutatamana kukanga ntima na kumekama, samu kana Nzambi mendima yandi, yandi kebaka yimpu ya kimfumu ya luzingu yina Yehova mepesa nsilulu na bantu yina kena kutatamana kuzola yandi.’—Yak. 1:12.