1-2. Wa’ faso Izaya 65:16, 17 ke na sadisá beto na kulemba ve?

“KULEMBA VE!” Ni yina vandá teme ya lukutakanu ya bilumbu tatu ya 2017. Lukutakanu yayi lakisá faso beto lenda kanga ntima na kati ya bampasi. Bamvula 4 me luta depwi lukutakanu yina salamá. Kasi, tii bubu yayi, samu beto ke ntete na yinza yayi, beto ke na kutaná kaka na bamambu ya mpasi.

² Mwa bilumbu yayi me luta, wapi mambu ya mpasi nge me kutana na yawu? Muntu ya famiye to kamarade yina nge ke zolá me kufwa? Ba me tala nge na maladi ya ngolo yina lenda nata nge na lufwa? Luzingu ya nge me kuma mpasi samu nge me nuna? Nge ke na talá mpasi samu na bamvula ya nene, mipepe ya ngolo mpe bubandi? To ba ke na kwamisá nge samu nge ke Temwe ya Yehova to nge ke na zolá kukuma yawu? Maladi ya coronavirus yayi to maladi ya nkaka me kumisa luzingu ya nge mpasi? Beto ke na vrai nsatu ya kutala kilumbu yina bamambu nyonso ya mpasi yayi ke salama dyaka ve mpe beto ke zimbana yawu!—Tanga Izaya 65:16, 17.

3. Yinki beto zolá sala bubu yayi, mpe samu na yinki?

³ Luzingu na yinza yayi ke mpasi. Beto zaba mpe ti, na bilumbu yina ke kwiza, beto ke kutana na bamambu ya kulutila mpasi. (Mat. 24:21) Na yawu, beto ke na nsatu ya kulongoka faso ya kukontinye na kukanga ntima. Samu na yinki? Samu Yesu zonzá: “Beno [kanga ntima]! Ni na [faso] yina beno ke vuukisa luzingu ya beno.” (Luke 21:19) Beto ke lenda kusuporte bamambu yina ke na beto, si beto kanisa na faso bantu ya nkaka mpe suporteke bamambu ya faso ya beto.

4. Samu na yinki beto lenda zonza ti Yehova ke na kangá ntima kulutila bantu nyonso?

⁴ Nani ke kangá ntima kulutila bantu nyonso? Nzambi ya beto Yehova. Reponse yayi ke pamusa ve nge si nge kanisa mbote-mbote na yawu. Satan ke mfumu ya yinza yayi. Na yawu, bamambu  ya mpasi ke mingi. Yehova ke na ngolo ya kumanisa bampasi nyonso na kilumbu mosi, kasi yandi ke na vingilá kilumbu yina yandi me sola samu na kusala yawu. (Rom. 9:22) Na yawu, yandi ke na kontinye kukanga ntima tii ntangu yina yandi ke kufwa yinza yayi. Beto zonzila bima 9 yina Yehova ke na suporteke kutala.

5. Wa’ faso ba zonzilá yimbi na nkumbu ya Nzambi, mpe yinki ya ke na salá nge?

⁵ Ba ke na fingá nkumbu ya yandi. Yehova ke zolá nkumbu ya yandi, mpe yandi ke na nsatu muntu nyonso pesa yawu buzitu. (Iza. 42:8) Kasi, depwi bamvula 6000, ba ke na fingá nkumbu ya yandi. (Nku. 74:10, 18, 23) Ya bandá na jardin d’Éden, ntangu Satan zonzá ti Nzambi ke na bumbilá na Adam na Eve kima yina zolá pesa bawu kilengi. (Kub. 3:1-5) Banda ntangu yina, ba ke vuniná Yehova bamambu ti, yandi ke mangá kupesa bantu bima yina ba ke na yawu nsatu. Ya salá Yesu mpasi na kutala faso bantu vandá losa salete na nkumbu ya Papa ya yandi. Ni na yawu yandi zonzá na badisiple ya yandi na kusambila: ‘Tata ya beto yina ke na zulu, bika nkumbu ya nge vanda santu.’—Mat. 6:9.

6. Samu na yinki Yehova biká ntangu mingi luta avan yandi yidika bamambu?

⁶ Bantu mingi ke mangá otorite ya Nzambi mpe ke sosá kusala ti volonte ya yandi salama ve. Kaka Yehova me lunga kuvanda Mfumu na zulu mpe na ntoto. Mpe faso ya yandi ya kutwadisa bantu me lutila mbote. (Luz. 4:11) Satan sosá kuvuna ba-ange mpe bantu ti, Nzambi me lunga ve kutwadisa beto. Bamvula mingi zolá luta samu ya talana pwelele ti Yehova ke Mfumu ya bien. Na mayela nyonso, Yehova biká mwa ntangu na bantu ba sala bamambu faso ba zola. Yandi salak’ yawu samu bantu kwiza tala ti bamambu ya bawu lenda simba kaka si ba kuwa yandi. (Yer. 10:23) Samu Yehova lakisá ntima ya yinda, ata muntu na mantwala, ke sala dyaka ntembe ti yandi me lunga ve kuvanda Mfumu na zulu mpe na ntoto. Bantu nyonso ke zaba ti faso ya yandi ya kutwadisa bantu me lutila mbote, mpe kaka ni Kimfumu ya yandi lenda nata kizunu mpe sekurite na zulu ya ntoto.

7. Banani balukilá Yehova, mpe yinki yandi ke sala bawu?

⁷ Bana ya yandi ya nkaka balukilá yandi. Ntangu Yehova yidiká bana ya yandi ba-ange mpe bantu awa na ntoto, ba vandá ve na masumu. Kasi na manima, Satan ange ya ntete yina balukilá Nzambi, natá Adam na Eve na kusala faso yandi. Ba-ange ya nkaka na bantu ya nkaka mpe landá yintu ngolo ya yandi. (Yude 6) Bamvula mingi na manima, Yehova solá bana ya Izraele samu na kusadila yandi. Kasi, bawu mpe mangak’ yandi mpe ba bandá kusambila banzambi ya luvunu. (Iza. 63:8, 10) Ya salá Yehova mpasi na ntima. Kasi Yehova suporteke bamambu nyonso yayi, mpe yandi ke na kontinye kukanga ntima tii kilumbu yina yandi ke kufwa ba yina nyonso ke salak’ yandi yintu ngolo. Na ntangu yina, Yehova na ba yina ke kuwak’ yandi, ke vanda na kilengi ya kukanga dyaka ve ntima, samu yinza yayi na bamambu ya yawu ya yimbi ke vanda dyaka ve!

8-9. Wapi bamambu ya luvunu ba ke zonzá na nkumbu ya Yehova, mpe yinki nge lenda sala?

⁸ Bamambu ya luvunu yina Satan ke zonzá. Satan vuná bamambu na nkumbu ya Yobi mpe ya bisadi nyonso ya Yehova. Yandi zonzá ti ba ke sambilá Nzambi kaka na intere. (Yobi 1:8-11; 2:3-5) Satan ke kaka na zonzilá bamambu ya luvunu ya faso yayi tii bubu yayi. (Luz. 12:10) Ntangu beto ke kangá ntima na kati ya bampasi samu beto ke zolá Yehova, beto ke lakisá ti Satan ke muntu ya luvunu. Faso Yehova pesá bima ya mbote na Yobi samu yandi kangá ntima, yandi ke pesa mpe beto bima ya mbote si beto kanga ntima.—Zaki. 5:11.

⁹ Satan ke sadilá bamfumu ya mabuundu ya luvunu samu na kuzonza ti Yehova ke na ntima ya yimbi, mpe ni yandi ke salá ti bantu vanda na  kati ya bampasi. Ba ya nkaka ke zonzá ti ntangu mwana ya fioti ke fwá, Nzambi ke bokilak’ yandi na zulu samu yandi vandá na nsatu ya ange ya malu-malu. Ya ke kifingu ya nene! Kasi beto, beto zaba ti Yehova ke Papa ya luzolo. Na yawu, beto lenda dasukila ve yandi si beto me kuzwa maladi ya ngolo, to ntangu muntu yina beto ke zolá ke fwá. Beto zaba ti kilumbu kele, yandi ke katula maladi mpe ke vumbula bantu ya kufwa. Beto ke lakisá na ba yina zola kuwa beto ti Yehova ke Nzambi ya luzolo. Nyonso yayi ke sala ti Yehova vanda na mambu ya mbote ya kuzonza na muntu yina ke sombolak’ yandi.—Bin. 27:11.

10. Yinki Nkunga 22:23, 24 ke zonzá samu na Yehova?

¹⁰ Bampasi yina ke talá bisadi ya yandi. Yehova ke na ntima ya kyadi. Yandi ke zolá ve kutala beto ke na dilá samu beto ke na talá mpasi, ya vanda samu ba ke na kwamisá beto, samu beto ke na belá, to samu na masumu ya beto mosi. (Tanga Nkunga 22:23, 24.) Yehova zaba bampasi ya beto. Yandi ke na nsatu ya manisa mpe yandi ke manisa yawu. (Tala Kubasika 3:7, 8; Izaya 63:9.) Kilumbu kele, “yandi ke [katula] mansangasa nyonso [. . .] na meso ya [beto]. Bantu ke kufwa dyaka ve, ke vanda dyaka ve na mawa, ke dila dyaka ve to ke tala dyaka ve mpasi.”—Luz. 21:4.

11. Wapi dikanisi Yehova ke na yawu samu na bisadi ya yandi yina me kufwá?

¹¹ Lufwa me kabula yandi na bakamarade ya yandi. Yinki Yehova ke kanisá na bakento na babakala yina vandá ya kukangama na yandi mpe kufwá? Yandi ke na vrai nsatu ya kutala dyaka bawu! (Yobi 14:15) Kanisa na nsatu yina ke na Yehova ya kutala dyaka kamarade ya yandi Abraham. (Zaki 2:23) To Moyize yina vandá sololá na yandi “meso na meso.” (Bas. 33:11) Mpe na nsatu yina ke na yandi ya kuwa David mpe bantu ya nkaka yina soniká Bankunga kuyimbila dyaka yandi banzimbu ya kitoko samu na kupesa yandi nkembo! (Nku. 104:33) Ata bakamarade  ya Yehova yayi me kufwá, Yehova me zimbana ve bawu. (Iza. 49:15) Yandi zaba bien faso ba vandá. Biblia ke zonzá ti, ‘na meso ya yandi, bawu nyonso ke na luzingu.’ (Luke 20:38) Na bilumbu yina ke kwiza, yandi ke vutula bawu na luzingu. Yandi ke banda dyaka kuwa balusambu yina ba ke sala na ntima mosi, mpe yandi ke ndima nyonso yina ba ke sala samu na kusadila yandi. Si muntu yina nge ke zolá me kufwa, bamambu yayi lenda pesa nge ngolo.

12. Yinki ke na salá Yehova mpasi na ntima na bilumbu ya nsuka ya yinza yayi?

¹² Bantu ya yimbi ke na nyokolá bantu ya nkaka. Ntangu Adam na Eve salá Nzambi yintu ngolo, Yehova zabá ti bamambu ya bantu zolá beba avan yandi kwiza yidika yawu. Yehova ke yiiná bubandi, mambu ya yimbi mpe ya kutengama yina ke na salamá na yinza bubu yayi. Yandi ke talá ntangu nyonso kyadi ya ba yina ke ya kulemba mpe ke ve na ngolo ya kubumba banzutu ya bawu faso ba-orfelin mpe ba-veuve. (Zak. 7:9, 10) Ya ke salá yandi mpasi ya kulutila, ntangu yandi ke talá faso ba ke na nyokolá bisadi ya yandi mpe ba ke na tulá bawu na boloko. Ya vrai, yandi ke zolá ba yina nyonso ke suporteke bamambu ya faso yayi faso yandi ke salak’ yawu.

13. Wapi bamambu ya salete Nzambi ke na talá bantu kusala bubu yayi mpe yinki yandi ke sala na bilumbu yina ke kwiza?

¹³ Bantu ke na vukisá banzutu na faso ya yimbi mpe ya salete. Yehova yidiká bantu samu ba sala bamambu faso yandi. Kasi, Satan ke zolá kunata bawu na kusala bamambu ya yimbi. Ntangu Nzambi talá ti ‘bantu vandá sala mambu mingi ya yimbi’ na ntoto na ntangu ya Nowe, ‘Yehova nyongá samu na yinki yandi yidiká muntu mpe ya salak’ yandi mpasi na ntima.’ (Kub. 6:5, 6, 11.) Bubu yayi, bamambu me bonga na ntoto? Ata fioti ve! Satan ke na vrai kilengi ya kutala bafaso nyonso ya yimbi mpe ya salete yina bantu ke na vukisá banzutu bubu yayi, ya vanda na kati ya kento na bakala to na kati ya babakala na babakala to bakento na bakento. (Ef. 4:18, 19) Kilengi ya Satan ke lutilá dyaka ntangu yandi ke talá bisadi ya Yehova kubwa na masumu yayi. Kilumbu yina Yehova ke zonza ti ya me lunga, yandi ke lakisa ti yandi ke zolá ve bamambu yayi. Na ntangu yina, yandi ke kufwa ba yina nyonso ke salá bamambu ya salete mpe ke mangá kubika yawu.

14. Yinki bantu ke na salá na ntoto mpe bibulu, bima yina Yehova yidiká?

¹⁴ Bantu ke na bebisá ntoto, kima yina Nzambi yidiká. Bantu ke ve kaka na ‘yalá na zulu ya bampangi samu na kutalisa bawu mpasi.’ Kasi, ba ke na mangá mpe kukipe ntoto mpe bibulu, bima yina Yehova zonzá na bawu na kukipe. (Lon. 8:9; Kub. 1:28) Bantu ya nkaka ya siense ke na zonzá ti, samu na bamambu yina ke na salá bantu, milion mosi ya bakalite ya bibulu na bayinti ke vanda dyaka ve na mwa bamvula ke kwiza. Ni na yawu, bantu mingi ke na boma na faso ntoto ke na bebá! Beto ke na kilengi ya kuzaba ti Yehova ke ‘kufwa ba yina nyonso ke bebisá ntoto’ mpe ke kumisa ntoto nyonso paradi.—Luz. 11:18; Iza. 35:1.

15-16. Yinki ke na pesá beto ngolo ya kukanga ntima faso Yehova? Pesa ekzample.

¹⁵ Kanisa na bamambu nyonso ya yimbi yina Yehova, Nzambi ya beto me suporte kutala na kati ya bamvula kuluta 6000 yina me luta. (Tala enkadre “ Bima yina Yehova ke na suporte kutala.”) Yehova lenda kufwa yinza yayi na ntangu yina yandi zola. Kasi, ntima ya yandi ya yinda me vanda mbote samu na beto. Kanisa na ekzample yayi. Kento mosi ke na kivumu. Mpe doktere me zonza na yandi mpe bakala ya yandi ti, mwana ya bawu ke butuka na maladi mosi ya ngolo, luzingu ya yandi ke vanda mpasi mpe yandi ke kufwa na mbangu. Kasi, kuple yayi ke na kilengi ya kuyamba mwana ya bawu ata ba zaba ti ya ke vanda mpasi na bawu na kukipe yandi. Samu ba zola  yandi, ba ke kanga ntima na bamambu mingi samu yandi vanda na luzingu ya mbote.

¹⁶ Faso mosi mpe, bana nyonso ya Adam na Eve ke butuká na masumu. Kasi, Yehova ke zolá bawu mpe ke kipeke bawu. (1 Yoa. 4:19) Papa na mama yayi beto me zonzila, lendá ve kumanisa bampasi ya mwana ya bawu. Kasi Yehova ke na ngolo ya kumanisa bampasi ya beto. Ya ke na kilumbu yina yandi me sola samu na kusala yawu. (Mat. 24:36) Luzolo ya Yehova zolá nata beto na kukanga ntima ata bampasi ya beto ke na manisá ve.

17. Samu na yinki ekzample ya Yesu na Baebre 12:2, 3 ke pesá beto ngolo ya kukanga ntima?

¹⁷ Yehova me kanga ntima na mantwala ya bamambu mingi kulutila bantu nyonso. Na yawu, yandi ke ekzample ya mbote samu na beto. Yesu mpe landá ekzample ya Yehova. Samu na beto, yandi kangá ntima ntangu bantu vandá finga yandi, vandá talisa yandi nsoni mpe ntangu ba tulak’ yandi na poto samu na kufwa yandi. (Tanga Baebre 12:2, 3.) Ni ekzample ya Yehova ntangu ya nkaka, pesá Yesu ngolo ya kusuporte bamambu nyonso yayi. Beto mpe lenda kuzwa ngolo na ekzample ya Yehova.

18. Faso 2 Piere 3:9 ke na zonzak’ yawu, ntima ya yinda ya Yehova me sadisa beto na kusala yinki?

¹⁸ Tanga 2 Piere 3:9. Yehova zaba ntangu ya mbote yina yandi ke kufwa yinza yayi. Samu Yehova ke na ntima ya yinda, bantu mingi me lenda kuzaba yandi mpe bubu yayi bamilion ya bantu ke na sadilá yandi. Bawu nyonso ke na kilengi yina Yehova kangá ntima tii ntangu ba butuká, ba longoká kuzola yandi mpe ba kuzwá bateme. Na bilumbu ke kwiza, yandi ke pesa bima ya mbote na bamilion ya bantu yina ke kanga ntima tii na nsuka. Na ntangu yina, ya ke talana pwelele ti desizion ya Yehova ya kukanga ntima vandá mbote.

19. Wapi desizion nge me baka, mpe yinki ya ke natina nge?

¹⁹ Ekzample ya Yehova ke na sadisá beto na kuzaba faso ya kukanga ntima na kilengi nyonso. Ata bamambu nyonso ya yimbi mpe bampasi nyonso yina Satan me nata, Yehova ke kaka ‘Nzambi ya kilengi.’ (1 Tim. 1:11) Faso mosi mpe, beto lenda bumba kilengi ya beto tii ntangu yina Yehova ke sukula salete yina ba losá na nkumbu ya yandi, ke kufwa ba yina ke mangá otorite ya yandi mpe ke manisa bamambu nyonso ya yimbi mpe bampasi ya beto. Beto lemba ve na kukanga ntima samu Papa ya beto ya zulu mpe ke kangá ntima. Si beto sala yawu, bamambu yayi ke talana na luzingu ya mosi na mosi ya beto: ‘Kilengi na muntu yina ke lemba ve kukanga ntima na kati ya bampasi, samu si Nzambi ndima yandi, yandi ke zwa yimpu ya Kimfumu ya luzingu, yina Yehova bumbila na bantu yina ke zolá yandi.’—Zaki 1:12.