1-2. Ngapi omu nonkango daJehova edi da kara mwaJesaya 65:16, 17 a di tu korangeda tu twikire kulididimika?

SIPARATJANGWA sosigongi setu somazuva gatatu somo-2017 kwa kere asi “Twikira kudidimika!” Elikwamo olyo kwa tu vaterere omu natu lididimikira maudigu. Ngesi pana piti nomvhura ne kutunda apa twa kere nosigongi esi, nye simpe ose kuna kutwikira kulididimikira maudigu.

² Maudigu musinke koligwanekerere nago ntaantani? Ove kwa fisa gumwe gekoro lyeni ndi kaume koge? Ove kuvera-vera ndi? Eparu kuna kukudigopera morwa ukurupe ndi? Ove kwa li gwanekera nosimpagwa ntani noukorokotji ndi kwa kuhepeka? Ndi ove kuna kuhepa morwa uvera woCorona nomauvera gamwe? Yosili, ose kuna kundindira apa maudigu nagenye ngaga ka haga noku ka ga divara!—Resa Jesaya 65:16, 17.

3. Yisinke natu rugana ngesi ntani morwasinke?

³ Eparu lina digopa unene mouzuni ou ntani kuvhura ngatu ligwanekere nomaudigu gomanene komeho. (Mat. 24:21) Eyi kulikida asi twa hepa kutwikira kulididimika. Morwasinke? Morwa Jesus kwa tente asi: “Mokudidimika kweni yimo ngomu gwanena mwenyo.” (Ruk. 21:19) Nsene tu gazadara ko omu wopeke vana kulididimikira maudigu ngwendi aga tuna kupita, ngayi tu vatera tu twikire kulididimika.

4. Morwasinke natu uyungire asi Jehova yige ga kara nosihonena sosiwa sokulididimika?

⁴ Yilye ogu ga kara nosihonena sosiwa sokulididimika? Jehova Karunga. Nampo elimbururo olyo lina ku tetukisa, nye nsene o gazadara ko kuvhura o dire kutetuka. Satana yige ana kupangera uzuni ou ntani mouzuni kuna zura mo maudigu. Jehova ga kara nononkondo dokuhagekesa po maudigu ogo  nampili ngesi, nye age kwa kundindira siruwo esi ga tura po. (Rom. 9:22) Nye nampili ngoso, age kuna kutwikira kulididimikira dogoro ngasi sike mo siruwo esi ga tura po. Tu zeni tu ka zogere yininke ntane eyi a lididimikire Jehova.

5. Ngapi omu edina lyaKarunga va li nyateka ntani ngapi omu ono kulizuvha?

⁵ Jehova kuna kulididimikira eswau eli va retera edina lyendi. Jehova kwa hara edina lyendi ntani kwa hara nkenye gumwe a li fumadeke. (Jes. 42:8) Nye nomvhura 6 000 dina ka pita, edina lyendi kwa li swaura. (Epis. 74:10, 18, 23) Ano eyi kwa tamekere mosikunino saEdeni apa Muzonaguli ga uyungire asi Karunga kapi ana harere oAdamu naEva va hafe. (Gen. 3:1-5) Kutunda pena, Jehova kwa mu rundira asi age kwa horekera vantu yininke yoyiwa. Jesus kwa kere nosinka kweyi va nyatekere edina lyoGuhwe. Eyi yiyo nye ga tanterere varongwa vendi va kanderere asi: “Guhyetu gemeguru. Edina lyoge ava li pongore.”—Mat. 6:9.

6. Morwasinke Jehova ga pulisira vantu va pangere siruwo sosire?

⁶ Sinzi sovantu kurwanesa upangeli wendi. Jehova ga kara nononkondo dokupangera meguru nepevhu, ano upangeli wendi yiwo welike wouwa po. (Ehor. 4:11) Nye Satana kwa hetekera ko kupukisa vaengeli novantu yipo va gazare asi upangeli waJehova kapisi yiwo wouwa po. Ayo ngayi gusa siruwo mokuyilikida asi upangeli waJehova yiwo welike wouwa po. Karunga kwa pulisira vantu va pangere siruwo sosire yipo va dimburure asi awo kapi ta yi vhura kuvatompoka mokulipangera vene pwa hana evatero lyendi. (Jer. 10:23) Mokumona asi Jehova simpe kwa kulididimikira, eyi kuninkisa vantu va dimburure asi age yige gelike ga wapera kupangera. Ntani vantu ngava dimburura asi nkedi zaJehova zokupangera yizo zelike zongwa po ntani Uhompa wendi yiwo ngau ka reta mbili pevhu.

7. Wolye ava va rwanesere Jehova ntani yisinke ngaka rugana ko?

⁷ Kwa kulididimikira marwaneso gokutunda kovana vendi vamwe. Jehova kwa sitire vaengeli ntani novana vendi wokulisikilira mo. Nye muengeli ogu ga ya kere Satana (kutanta asi Murwanesi) kwa ninkisire vantu wokusikilira mo oAdamu naEva va rwanese Jehova. Ano vaengeli vamwe ntani novantu vamwe nawo kwa ya kere varwanesi. (Juda 6) Konyima, muhoko goVaisraeli ogu ga horowere Karunga kwa tamekere kukarera yikarunga yoyipempa. (Jes. 63:8, 10) Jehova kwa lizuvhire asi vana mu sigi. Nye age kwa lididimikilire ntani nga twikira kulididimikira dogoro apa ngaka zonagura po varwanesi navenye. Eyi ngayi ka hafesa vakareli vendi wovalimburukwi ava vana kutwikira kulididimikira ngwendi yige.

8-9. Yipempa musinke va rundira Jehova ntani yisinke natu rugana ko?

⁸ Yipempa yaSatana. Satana kwa rundilire Joba novakareli vaJehova wovalimburukwi asi awo kukarera tupu Jehova morwa kugwanena mo mauwa. (Joba 1:8-11; 2:3-5) Satana kwa twikira kuuyunga yipempa dogoro ngesi. (Ehor. 12:10) Ose kuvhura kuyilikida asi Satana munayipempa pokutwikira kulididimikira maudigu nokulimburukwa Jehova morwa twa mu hara. Ngwendi Joba, Jehova ngatu tungika nose nsene tu lididimikira.—Jak. 5:11.

⁹ Satana kuruganesa vampitisili womaukarelikarunga goyipempa yipo va ronge vantu  asi Karunga mudona ntani yige a retesa po ruhepo rovantu. Ano vamwe kuuyunga asi apa vanona ava fu, Karunga yige ava zigida morwa ana hepa vaengeli wovanzi meguru. Yipempa eyi kuswaukisa Jehova. Nye ose twa yi diva asi Jehova kuna kara Guhya geharo. Apa atu vere unene ndi apa atu fisa gumwe ogu twa hara, ose kapi atu pe Karunga usima. Nye ose twa yi pura asi ezuva limwe Jehova ngaka verura vaveli ntani nokuka vhumbura vafe. Ose ngatu tantera ko wopeke ava ngava tu purakena asi Karunga ga kara neharo. Ano Jehova nga limburura nkenye ogu ana kumupa usima.—Yis. 27:11.

10. Yisinke ali uyunga etjangwa lyoMapisarome 22:23, 24 kuhamena Jehova?

¹⁰ Ruhepo oru ava ligwanekere naro vakareli vendi. Jehova age Karunga gonkenda. Age kuguva apa a tu mono ose kuna kuhepa. Pasihonena, apa ava tu hepeke ndi uvera ndi maupirankondo getu. (Resa Episarome 22:23, 24.) Jehova kukwata egano kukora oku tuna kupita, age ana hara kuuhagekesa po ntani ngaka u hagekesa po komeho. (Hetakanesa Exodus 3:7, 8; Jesaya 63:9.) Siruwo ngasi wiza apa “nga kokota mahodi nagenye komeho [getu]. Nomfa kapi hena ngadi kara ko, neguwo si nomalirankali nokukora kapi ngayi kara ko hena.”—Ehor. 21:4.

11. Ngapi Jehova a lizuvhu kuhamena vakareli vendi wovalimburukwi ava va fa?

¹¹ Kulididimikira nomfa dovakaume vendi ava va fa. Ngapi omu Jehova a lizuvhu kuhamena vakareli vendi wovalimburukwi ava va fa? Age kuna kundindira nononkondo mokukavamona hena. (Joba 14:15) Gazara tupu omu Jehova ana kundindira nononkondo mokuka mona hena kaume kendi Abirahamu. (Jak. 2:23) Ndi gazara tupu omu Jehova ana kundindira nononkondo mokukauyunga hena naMosesa ogu nga uyunga  nendi nare ‘poku litara’ nage. (Ex. 33:11) Jehova kuna kundindira hena nononkondo mokukazuvha Ndafita novatjangi vamwe woMapisarome kuna kudimba nonsumo donongwa. (Epis. 104:33) Nampili ngomu vakaume vendi va fa, Jehova kapi ga va divara. (Jes. 49:15) Age kudiworoka nayinye yokuvahamena. Bibeli kuuyunga asi: ‘Yeeyi kwendi vanamwenyo.’ (Ruk. 20:38) Ezuva limwe age ngaka va vhumbura ntani ngaka zuvha hena makanderero gawo gokutundilira komutjima nokukatambura ukareli wawo. Nsene wa fisa gumwe, ngano nonkango edi di ku hengagwide.

12. Yisinke a yi guvisa unene Jehova momazuva aga gomadona?

¹² Vantu wovadona kuhepeka wopeke. Apa urwanesi wa tamekere moEdeni, Jehova ga yi divire asi udona ngau ligwederera unene. Jehova kwa nyenga udona nouhahungami ntani nonyanya ezi zina kuhoroka naina. Age nkenye apa kupakera mbili ava ava hepeke ntani nava ava dili kulipopera vene, pasihonena nonsigwe novafisavayawo. (Sak. 7:9, 10) Jehova kuguva unene apa a mono vakareli vendi wovalimburukwi kuna kuvahepeka nokuvatura monodorongo. Kareni nehuguvaro asi Jehova ga mu hara namuvenye.

13. Nkareso musinke zondona vana kurugana vantu ntani yisinke ngaka rugana ko Karunga?

¹³ Ruhonda runa vhuka. Satana kwa hara kuninka vantu ava va unga mosihwi saKarunga yipo va rugane yirugana yoruhonda. Apa Karunga “ga mwene asi udona wovantu una vhuka napenye [momazuva gaNowa,] makura ta livere eyi ga ungilire vantu a va ture pevhu. Makura ta guwu unene.” (Gen. 6:5, 6, 11) Ukaro womouzuni ngesi una donapa unene. Satana ana hafa pokumona omu ruhonda runa vhuka yi kare asi pokatji komugara nomukadi ndi pokatji komugara nomugara ndi mukadi nomukadi. (Efe. 4:18, 19) Satana kuhafa unene apa vakareli vaJehova a va tura nzo zonene. Ezuva limwe Jehova ngaka yi likida asi ga nyenga ruhonda apa ngaka zonagura po vantu navenye ava ava lihameke moruhonda nokunyoka kutura po malitjindjo.

14. Yisinke vana kurugana vantu kevhu nokoyikorama?

¹⁴ Vantu kuna kuzonagura evhu eli ga sita Jehova. Vanankondo kuhepekera mo vakwawo ntani vantu kapi va kupakera mbili evhu noyikorama moomu ga yi harera Jehova. (Muud. 8:9; Gen. 1:28) Vadiviusitwe vamwe kwa tanta asi yininke eyi ava rugana vantu ngayi ninkisa marudi gamwe goyikorama noyimeno yimwe emiliyona yi fe monomvhura dongandi edi dina kara komeho. Eyi yiyo yakuninkisa vantu va kare nosinka kuhamena unsitwe. Nye Jehova kwa tumbwidira asi ngaka ‘zonagura ava wokuzonagura evhu,’ nokukalininka li ka kare paradisa.—Ehor. 11:18; Jes. 35:1.

15-16. Yisinke ayi tu tumangeda tu lididimikire ngwendi Jehova? Yi fanekesa.

¹⁵ Gazadara ko maudigu nagenye aga ga lididimikira Guhyetu gemeguru nomvhura dononzi. (Tara kakende “ Yininke musinke ana kulididimikira Jehova?”) Jehova kuvhura kuhagekesa po yininke nayinye yoyidona yomouzuni ou, nkenye apa ana harere. Nye ose twa gwanena mo uwa melididimiko lyendi. Gazadara ko kosifanekeso esi. Tu tante asi ndokotora ta tantere valikwali owo asi apa mukadi nga hampuruka, mukeke gwawo nga kara noudigu ntani nga fa nounona-nona. Nye nampili ngoso, vakurona owo tava ndindire noruhafo apa mukeke ngava mu hampuruka nampili ngomu ngayi va digopera kumupakera mbili. Nye mokumona asi va hara mukeke  ogo, awo ngava lididimikira nokumuvatera paapa va hulira.

¹⁶ Mokulifana, vantu navenye womoruvharo rwaAdamu kapi va sikiliramo. Nye Jehova simpe ga va hara ntani kuvapakera mbili. (1 Joh. 4:19) Mokulisiga novakondi womosifanekeso esi tuna tumbura, Jehova age kuvhura kugusa po maudigu nagenye aga vana kuligwanekera nago vana vendi. Age kwa tura po ezuva eli nga hagekesa po maudigu nagenye. (Mat. 24:36) Mokumona asi Jehova ga tu hara, ayo kututumangeda tu lididimikire mwanayinye.

17. Ngapi omu nonkango dokuhamena kwaJesus edi da kara moVahebeli 12:2, 3 nadi tu vatera?

¹⁷ Jehova kwa tura po sihonena sosiwa selididimiko. Jesus kwa honenene elididimiko lyoGuhwe. Apa Jesus ga ya kere pevhu, age kwa lididimikilire nonkango donondona nomaswauro ntani kukora apa va mu dipagere kositji. (Resa Vahebeli 12:2, 3.) Sihonena saJehova selididimikiro kwa vaterere Jesus a lididimikire. Nose kuvhura kutuvatera tu lididimikire.

18. Ngapi omu etjangwa lya-2 Peturusa 3:9 a li tu vatere tu kwate egano eyi lina kusikisa mo elididimiko lyaJehova?

¹⁸ Resa 2 Peturusa 3:9. Jehova ga diva siruwo souhunga apa ngaka zonagura po uzuni ou woudona. Elididimiko lyendi kwa ninkisa vantu wovanzi va ya mu dive nokutameka kumukarera. Navenye vana hafa morwa Jehova ga lididimika yipo va gwane mpito zokutameka kumuhara ntani nokuligava kwendi. Apa vantu wovanzi ngava lididimikira dogoro kouhura, ngayi likida asi Jehova ga tulire po etokoro lyewa yipo a lididimikire.

19. Yisinke natu tokomena kurugana ntani uwa musinke ngatu ka gwana?

¹⁹ Tuna lirongere ko kwaJehova omu natu lididimikira noruhafo. Nampili ngomu Satana ga retesa po maudona gomanzi, nye Jehova simpe Karunga goruhafo. Nose kuvhura tu twikire kukara noruhafo ngomu tuna kundindira apa Jehova ngaka pongora edina lyendi noupangeli wendi nokukahagekesa po maudona nagenye ntani nomaudigu aga tuna kuligwanekera nago ngesi. Tu tokomeneni kulididimika ntani nokudiworoka asi Guhyetu gemeguru nage kuna kulididimika. Nsene tu yi rugana ngoso, ngatu limonena usili wononkango edi asi: “Muntu gerago googu a didimike momaudigu, yeeyi nsene ana piti mekona-kono, nga gwana nkata zomwenyo ezi ga tumbwidira Hompa ava va mu hara.”—Jak. 1:12.