1-2. Ntia kani die mu Izaya 65:16, 17 ditutindisaka mu tatamana mu korela?

“NE RENONCEZ PAS !” wo ni mutu-diambu weri wa lukutakanu lwa bilumbu bitatu lwa 2017 lwatutindisa. Programe ya lukutakanu lo yatusongela bwe tulendi korela misamu mia mpasi. Mvula ziyà zeka yôka, mpe tatamana tuta tatamana mu kwe korele mu nza yi ya mpasi.

² Ngano ntia misamu miakubwiriri ka ntama ko? Ngano muntu wa kanda peleko ndiku’aku wahombese? Ngano timbevo tinataka ku lufwa tie naku? Ngano mpasi zinataka bununu ze naku? Ngano mpasi wabwabane na zo zinataka makuba ma nza, miangu peleko nkwamusu? Ngano mpasi ta mona mu bungu dia Coronavirus peleko mu bungu dia musamu wakaka wa mpila yo? Mbo tukêlaka na timina diadiansoni, tilumbu ti wa misamu mio miamiansoni ti tuzimbakana mio, mpe milembo vutu kwa bâ!—Tanga Izaya 65:16, 17.

3. Nti tufweti sa bwawu bu, mpe mu bungu dia nti?

³ Luzingu mu nza yi mpasi lwena, mpe mu bilumbu bita kwiza tulendi bwabana na misamu miyôkela mpasi. (Mat. 24:21) Buna, wufwanakane tatatamana mu yika ngolo tifu tieto tia korela. Mu bungu dia nti? Mu bungu ti Yezu watâ ti: ‘Mu tifu tieno tia korela ni mo luvukisila bilundi bieno.’ (Like 21:19) Mbo tubâ na lenda dia korela, tala ti tudimbitiri mu mpila bantu bakaka yi bakorelaka misamu mia mpasi mi tubwabanaka na mio.

4. Mu bungu dia nti tulendi têla ti Yehova ni tifwani tiyôkele mu tifu tia korela?

⁴ Ngano nani we tifwani tiyôkele mu tifu tia korela? Ni Nzambi’eto Yehova. Ngano mbo ta yituku mu bungu dia mvutu yo? Kampe mbo ta yituku. Kâ, wamana dimbitila mu bungu dia musamu wo kuvutu’â yituku ko. Nza mu lutumu lwa Satana yena, mpe ntiangu ye ya fuluka mu misamu mia mbi. Yehova  ngolo ze nandi mu manisa misamu mio mu ntangu ni ntangu yi kazololo, kâ mbo kakêlaka mu yirika wo mu bilumbu bita kwiza. (Rom. 9:22) Nzambi’eto mbo katatamanaka mu korela tii ntangu yi kafukisa nza yi. Tataluzuleno misamu vwa (9) Yehova mi kasola mu korela.

5. Bwe bavwezela nkumbu ya Nzambi, mpe bwe monaka ku mutima mu bungu dia musamu wo?

⁵ Nkumbu ya Yehova bavweza yo. Yehova nkumbu’andi ya kazololo, mpe zololo ti bantu babansoni bazitisaka yo. (Iza. 42:8) Kâ, tûka mvula 6 000, mbo bavwezaka nkumbu’andi. (Mik. 74:10, 18, 23) Misamu miabatika ku nsaba ya Edene mu ntangu Diabulu (wuzololo tâ “Ngungu”) kakwikisila Nzambi ti Adame na Eva keri swekelaka tima tieri nawu nsatu mu bâ mu nsayi. (Mba. 3:1-5) Tûka buna, mbo bakwikisilaka Yehova ti tima tie kô bantu bê na tio nguria nsatu ti kabaswekelaka. Yezu lwaka lweri nandi mu bungu ti nkumbu ya Tata’andi bavweza yo. Ntiangu kalongesa milongoki miandi mu sambilaka ebu: “Tata’eto we ku mazulu, bika nkumbu’aku yabâ ya santu.”​—Mat. 6:9, NWT.

6. Mu bungu dia nti Yehova kabikila ntangu yayingi ntete kasongela ti ni Yandi kwa we na nswa wa yâla ku mazulu na ha mutoto?

⁶ Bantu babingi batelamanaka Nzambi na lutumu lwandi. Ni Yehova kwa Yandi kaka we na nswa wa yâla ku mazulu na ha mutoto, mpe luyalu lwandi ni lo luyôkele. (Nza. 4:11) Kâ Satana wayêla mu wubakasa bantu na bambazi mu banza ti Nzambi kena na nswa wo ko. Ntangu yayingi yafwanakana mu songela ti ni Yehova we na nswa wa yâla, mpe ni Yandi we Ntwarisi ya mbote. Na ndwenga zazansoni, Nzambi wabika ntangu yayingi kwe bantu mu mona ti ka balendi’â batitwarisa bawu beni ko tala ti ka ba bakisi’â ko. (Yer. 10:23) Mu bungu ti Nzambi luvivululu lwe nandi, ka kwena muntu ko wusa ntembe ti ni Yandi we na nswa wa yâla ku mazulu na ha mutoto. Bantu babansoni mbo babakula ti ni luyalu lwa Yehova kwa luyôkele bubote, mpe ni Timfumu tiandi kwa tinata tidzunu tia matieleka ha mutoto.

7. Banani bakolamana Yehova, mpe nti kabasa?

⁷ Bukolo bwa bala bandi bakaka. Yehova bu kasala bambazi na bantu, ba lunga beri, ka babâ na kani na tifuma ko. Kâ, ha manima, mwana wa timpeve wa Nzambi, Satana (wuzololo tâ “Mbeni”) wamukolamana, mpe wanata bantu ba lunga, Adame na Eva, mu kolamana Yehova. Mbazi zakaka na bantu bakaka mpe bayizi kolama. (Yude 6) Ha manima, bala ba Israele, dieri kanda dia sola Nzambi, bamulosa mpe babatika mu sambila nzambi za bungungu. (Iza. 63:8, 10) Yehova watomo nionga. Kâ, wakorela, mpe mbo katatamana mu korela tii ntangu yi kafukisa bô babansoni bakolamaka. Musamu wo, mbo wunatina tusakumunu kwe bô ba kwikama bakorelaka misamu mia mbi mia nza yi ntiana Yandi!

8-9. Ntia bungungu bayangasaka mu Yehova, mpe nti tulendi sa mu bungu dia bungungu bo?

⁸ Bungungu bwa Satana bwa ntangu zazansoni. Satana wakwikisila Yobe na bisari biakaka bia kwikama bia Yehova ti na mabanza ma bwimi basarilaka Nzambi. (Yobe 1:8-11; 2:3-5) Tii lumbu ti mbo katatamanaka mu kwikisila bantu misamu. (Nza. 12:10) Tulendi songela ti Satana ngungu yena bu tukorelaka misamu mia mpasi na bu tutatamanaka mu bâ ba kwikama kwe Yehova mu bungu ti Yandi tuzololo. Ntiana Yobe, mbo tubaka tusakumunu mu bungu dia tifu tieto tia korela.​—Zaki 5:11.

⁹ Satana mbo kasarilaka mfumu za mabundu ma bungungu mu tâ ti Yehova mutima wa ngolo we nandi, mpe ni Yandi tulumunaka  mpasi za bantu. Bakaka mbo batâka mpe, mu ntangu bala yi bafwaka Nzambi ba tâka mbila mu bungu ti nsatu mbazi zakaka ye nandi ku mazulu. Musamu wo nkatika kondo kwa buzitu kwena kwe Nzambi! Kâ tuzebi ti Yehova Tata diena dia luzolo. Bu tubâka na timbevo tia ngolo peleko bu tufwiluluku muntu wu tuzololo, kani kabwe ka tukwikisilaka Nzambi misamu ko. Kâ, lukwikulu lwe neto ti lumbu tie kô Nzambi mbo kakatula bimbevo biabiansoni, mpe mbo kavumbula bantu ba fwa. Tulendi tâ kwe bantu babansoni bazololo mu tu wirikila ti, Yehova Nzambi ya luzolo yena. Buna Yehova mbo kabâ na mvutu ya mbote yi kahana kwe wô mu tsotsaka.​—Bin. 27:11.

10. Ngano Mikunga 22:23, 24 bwe yitâka mu bungu dia Yehova?

¹⁰ Mpasi zi monaka bisari biandi bia luzolo. Yehova tiari tia mutima tie nandi. Ka zoloko’â ko kawâ bidilu bieto mu bungu dia mpasi zi tukorelaka—ntiana nkwamusu, bimbevo na masumu meto. (Tanga Mikunga 22:23, 24.) Yehova mpasi zi tumonaka za kabakulaka; zololo kamanisa zo, mpe mbo kamanisa zo. (Fwanakasa na Ndukulu 3:7, 8; Izaya 63:9.) Lumbu tie kô ‘kakusuna mansangaza mu meso meto, lufwa mpe ka luvutu’â kwa sâla ko, ka ku vutu’â sâla mpe bufwiri ko, bidilu na mpasi ko.’​—Nza. 21:4.

11. Ngano Yehova bwe kamonaka ku mutima mu bungu dia bisari biandi bia kwikama biafwa?

¹¹ Lufwa lwa ndiku zandi. Yehova bwe kamonaka mu bungu dia babakala na bakento ba kwikama bafwa? Zololo ti kavutu ba mona! (Yobe 14:15) Ngano lendi banza ka bwe Yehova kadingaka mu vutu mona ndiku’andi Abrahame? (Zaki 2:23) Peleko Mose, wu beri zonzaka “meso mu meso”? (Ndu. 33:11) Mpe timina die nandi dia wirikila Davide na bitsoniki biakaka bia mikunga bu batanga mikunga  mia toma mia mukembo! (Mik. 104:33) Ni bu sa ti ndiku zo za Nzambi zafwa, Yehova ka ba zimbakane’â ko. (Iza. 49:15) Mbo kabambukilaka misamu miamiansoni mia timuntu tiawu. Bibila mbo ditâka ti mu mabanza ma Yandi ba moyo bena. (Like 20:38) Lumbu tie kô ti kabavumbula kwe ba fwa, ti kavutu wâ tusambulu twawu twa bunsungu, mpe ti katambula nsambululu’awu. Tala ti muntu wu zololo wafwilulu, mabanza ma malendi ku bomba, mpe malendi ku yika ngolo.

12. Nti bitomo mwisaka Yehova mpasi ku mutima mu bilumbu bi bia mansukina?

¹² Nkwamusu zi nataka bankwa-mbi. Bukolo bu bwabatika ku Edene, Yehova wazaba ti misamu mbo miaketi tomo beba ntete mizi miatoma. Yehova mbo kayinaka mbi, kondo kwa buderede, na miangu mie mu nza lumbu ti. Mu tifwani, ntangu zazansoni mbo katomo kipaka bantu ba nôka​—peleko balendi lembo tikengerela, ntiana bala ba nsana na mifwiri mia mikento. (Zka. 7:9, 10) Yehova mbo katomo monaka mpasi ku mutima bu kamonaka bisari biandi bia kwikama bi bakwamisaka, mpe bi batubaka mu maboloko. Bêno na lukwikulu ti beno kazololo beno bansoni luta korela tintwari na Yandi.

13. Ntia ndiatulu ya nsoni Nzambi kamonaka kwe bantu, mpe nti kasa?

¹³ Bantu babingi bayika sarilaka bunsuza. Bantu babasala ngatu balanda tifwani tia Nzambi, kâ Satana zololo ti basarilaka mbi. Mu ntangu Nzambi yi kamona ti ‘mbi ya muntu yayingi yeri ha mutoto’ mu ntangu ya Noa, “Yehova wanionga bu kasala muntu ha mutoto, mpe wafwema.” (Mba. 6:5, 6, 11) Tûka buna ngano misamu miayizi toma? Na kani fioti! Diangana, Satana mu nkatika nsayi kena bu kamonaka bunsuza bwa mpila na mpila, mu kati na bunsuza bwa mukento na bakala, bwa bakala na bakala peleko bwa mukento na mukento! (Efz. 4:18, 19) Satana mbo katomo bâka mu nsayi mu ntangu bantu basarilaka Yehova yi babwaka mu masumu ma manene. Luvivululu lwa Yehova bu lusuka, mbo kasongela ti ndiatulu ya bunsuza nkatika yina kayinaka yo, bu kakatula bô babansoni bê na ndiatulu ya bunsuza balembolo zolo mu soba.

14. Ngano bantu nti basaka mu mutoto wa sala Nzambi?

¹⁴ Bantu mbo bata bebesa mutoto wa sala Nzambi. Muntu mbo kayâlaka mpwana’andi mu mu mwisa mpasi, kâ mpe kakipaka mutoto na bibulu ko buna bwa lombela wo Yehova kwe bantu. (Ekl. 8:9; Mba. 1:28) Bantu bakaka ba sianse mbo batâka ti bisalu bi salaka bantu bilendi sa ti milio mosi ya bibulu biakaka na miti miakaka miazimbakana mu mivu mita kwiza. Ka wena musamu wa nzitukulu ko bu batâka ti nza mu mpasi yena! Musamu wa nsayi ni wena’eti, Yehova wakanisina ‘mfukulu ya bô bata bebesa mutoto-nsi,’ mpe mbo kasobesa mutoto wawansoni mu paradi.​—Nza. 11:18; Iza. 35:1.

15-16. Nti bifweti tu tuma mu korela tintwari na Yehova? Hana tifwani.

¹⁵ Banza’eti misamu miamiansoni mia mpasi mi korelaka Tata’eto dia ku mazulu tûka mafunda ma mvula. (Tala kaku tie na mutu-diambu “ Mio mi korelaka Yehova.”) Yehova lendi tûla nsuka mu nza yi ya mbi mu ntangu yi kazololo. Kâ, luvivululu lwandi mbo lutomo tu bakisaka! Tadimbitileno’eti mu tifwani eti. Tala ti batêle kwe mukento na bakala ti mwana wu babuta mbo wubâ na bimbevo biabingi, luzingu lwa mpasi lubâ nandi, mpe mbo wukulu fwa. Mwana bu wubutuka, bibuti mbo bibâ mu nsayi ni bu sa ti musamu wa mpasi wena kwe bawu mu mu kipa. Luzolo lwawu  mu mwana’awu mbo lubatuma mu korela mpasi ni mpasi ngatu luzingu lwandi lwabâ lwa mbote.

¹⁶ Mpila mosi mpe, bala babansoni ba Adame na Eva masumu ma butukaka nawu. Kâ, Yehova bawu kazololo, mpe bawu kakipaka. (1 Za 4:19) Kâ luswaswanu lwe ho na bibuti bia tifwani tieto, Yehova lendi manisa mpasi za bala bandi. Ntangu ye kô kakubika yi kakatula mpasi zazansoni za bantu. (Mat. 24:36) Ngano luzolo lwandi ka lufweti’â lwatutuma ko mu korela tintwari na Yandi tii ntangu yifwanakane?

17. Bwe misamu mi batêle mu bungu dia Yezu mie mu Bahebre 12:2, 3 mita tu tindisila mu tatamana mu korela?

¹⁷ Yehova ni tifwani tia lunga mu tifu tia korela. Yezu walenda mu landa tifu tia korela tia Tata’andi. Bu keri ha mutoto, wakorela nzonzolo ya bambeni, nsoni na poto dia matimuna mu bungu dia beto. (Tanga Bahebre 12:2, 3.) Ntembe kâni, tifwani tia korela tia Yehova tiayika Yezu ngolo mu korela. Tilendi tu yika mpe ngolo.

18. Bwe 2 Piere 3:9 yita tu bakisila mu bakula misamu miayilama mu bungu ti Yehova wavivirila?

¹⁸ Tanga 2 Piere 3:9. Yehova ntangu yifwanakane mu tûla nsuka mu nza yi ya mbi ya kazebi. Mu bungu ti luvivululu lwe nandi, bantu babingi babâ na lenda dia mu zaba, mpe bwawu bu milio za bantu zimusarilaka. Babansoni mu nsayi bena mu bungu ti Yehova wakorela tûka ntangu yayingi ngatu babutuka, balongoka mu mu zolo, mpe batihana kwe Yandi. Mu ntangu milio ya bantu yi bakwizi korela tii ku nsuka, mbo wumoneka ti Yehova nzengolo ya mbote kabonga mu vivirila!

19. Ntia nzengolo tufweti bonga, mpe ntia musendo tubaka?

¹⁹ Mu tifwani tia Yehova mbo tulongokaka mu korela na nsayi yayansoni. Ntono mbi na mpasi zi tulumunaka Satana, Yehova mbo katatamanaka mu bâ Nzambi ya nsayi. (1 Tim. 1:11) Beto mpe tulendi tatamana mu bâ mu nsayi, bu tukwe kêle na luvivululu lwalwansoni ti Yehova kasantukisa nkumbu’andi, kasongela ti ni Yandi kwa we na nswa wa yâla, kamanisa mbi yayansoni, mpe katûla nsuka mu misamu miamiansoni mie neto lumbu ti. Bika tabongeno nzengolo ya korela na ya bâ na buntindi mu bungu ti Tata’eto die ku mazulu mbo kakorelaka mpe. Tamana sila bo, misamu emi mbo milungana mu beto: ‘Nsayi kwe muntu wuzebi korela ntontolo, mu bungu ti bu bamana mu tambula, mbo kabaka mpu ya luzingu ya kanisina Nzambi kwe bô bamuzololo.’​—Zaki 1:12.