1-2. Isaya 65:16, 17 nǎ ká kʉ ngba tsodha ndirigoti ri ká ka ndi kó ko tsotso ko ve kpakpalo tso ngbaribbai?

“USIACHE HATA KIDOGO!” Føri ngʉe 2017 nǎ eneo nǎ dangʉe ná asamble djǒ. Ri nǎ programu dhongʉe ngbaribbai ma ko ka kosi kpakpalo djolu nari. Føri goti cho da 4 b’lo, ro ko ra anzi dhé kpakpalo tso ko ve i dz’ djó nari na.

² I ddoro ká ni adi bani ngba kpakpalo na? Ri ka kʉ nidhó familia nǎ ddikpa le inga nidhó kau dhedhe nari? Ni ro ká kʉ nzɨ sini ná dhe? Nidhó maisha ká kʉ kpakpa ni ngʉ ngó nari dho? Chʉ ngaba nalo ma, fudjo nrŭ nji nari ma, nza nrŭ le nza nari ma na ká adi ni thí nza ddi maisha nǎ? Inga ni ká nzani dhe dzá lodho inga COVID-19 dzá lodho? Ko i dz’ djó kpakpalo tso si d’ø ná ddo b’o ndirigoti kosi fø kpakpalo nga vivi, ri ki ro nga sie ri!​—Azø Isaya 65:16, 17.

3. Kodho ká ringani ko nji addu kpadjo ndirigoti addudho?

³ Maisha kʉ kpakpa i dz’ djó, njaro gosi ná saa na kosi tso ve nalo si dada iddoro kʉ nari djolu. (Mt. 24:21) Føridho kodho ringani ko liri kodhó ngatsovedha e kpakpa. Ká addudho? Dhonalo Yesu pongʉeri i: “Nidhi ngatsovedha chulu ni si nidhi shinga gøgø.” (Lu. 21:19) Ko di ngaddi ngbaribbai ma nja nrŭ kpakpalo tso ve nari djo ró, ko ka ko ve kpakpalo tso ngba.

4. Ká addudho ko ka ko pori Yova kʉ bblo kʉ ná loroji ngatsovedha kana?

⁴ Ngatsovedha kana ie ká kʉ bblo kʉ ná loroji? Ri kʉ Mungu. Fø jibu ká ke ni nanga ke? Njati ni ddinga bbo følo djo ró, ni ka ni famu ri ngba. I dz’ kʉ Stani dhó bbonga tsena, ndirigoti ri djó kpakpalo lili. Yova kʉ kpakpanga na ndi si i dz’ djó kpakpalo d’e, ro ke si rinji gosi ná  saa na. (Ro. 9:22) Ro kodhi Mungu ra anzi dhé ngatso ndi ve nari na kpø i dz’ ndi si sa ná ngadjo. Akonja Yova tso ve nalo ro 9.

5. Mungu rodho djo ká nrŭ tingʉe chelo ngbaribbai ndirigoti ni ka adi ni mbu ngbaribbai fø lodho?

⁵ Yova adi ndi rodho djo nrŭ chelo ti nari tso veve. Yova jirie ndi rodho ji ndirigoti ke adi riji nrŭ krʉ bbʉ heshima ri dho. (Isa. 42:8) Ro Mungu rodho djo nrŭ nga chelo tidha tso nari goti cho da 6 000 b’lo. (Zb. 74:10, 18, 23) Fø lotso ngangʉeni Edeni na Diabolo (fø dho na mana kʉ “nrŭ djotso gba ná ke”) bbøngʉe Mungu nga Adamu ma dho Eva ma na ná saa. Ke pongʉeri Mungu jʉ kpa tso hwè ka ndi bbʉ kpa dho ná ritsi ró. (Mwa. 3:1-5) Fønga djó ro nrŭ adi ripo Yova jʉ nrŭ tso bblo kʉ ná ritsi ró. Yesu thí bangʉe njedha bbo dhonalo kedzá Baba rodho dho nzá nrŭ bbʉngʉe heshima ro ri. Føridho ke ddingʉeri ndi unakpa dho kpa di sala nji: “Kodhi ra nǎ Baba, aliri ni rodho mani.”​—Mt. 6:9.

6. Yova ká bbangʉeri ddo da bí ndiro nrŭ churi nari kʉ ndi kaka pinyodha dho d’e addudho?

⁶ Yova adi ndidzá bbonga nrŭ gʉ nari tso veve. Yova kaka ndi nyo pi ra nǎ ndirigoti dz’ djo, ke kʉ bblo pinyo ná ke. (Ufu. 4:11) Ro Stani shangʉe malaiká ma, nrŭ ma na ndiro kpa ddiri nari kʉ Mungu nzá ka ndi nyo pi ri. Ri ka ndi dzie saa bbo ndiro le chu nari kʉ Yova kʉ bblo kʉ ná pi ndirigoti kedho pidhinga kʉ bblo nari d’e. Nyodyu na Mungu bbari nrŭ nyo pi bicha ndiro nrŭ churi nari kʉ kpa nzá ka ndima nyo pi ndima djo ndima ro ri njati Ngano ná ke kó kpa tsotso nzá ró. (Yer. 10:23) Mungu dhó ngatsovedha dzá lodho karrnga goti nrŭ krʉ si ri chu nari kʉ Mungu kʉ bblo kʉ ná bbonga ra na ndirigoti dz’ lu djo. Nrŭ krʉ si ri chu nari kʉ Mungu dhó Pidhinga kʉ bblo ndirigoti ri si bbʉbbʉ kʉ ná ngoi ma bbʉ b’oddidha ma na i dz’ djo.

7. Yova ro ká ie ma tsangʉe, ndirigoti ke kasi kpa nji ngba?

⁷ Yova adi ndidzá nja nzø tsa ndi ró nari tso veve. Yova nongʉe malaiká ma nrŭ ma na kaka ná kpa. Ro tsatsangʉe ná malaika Stani (fø dho na mana kʉ “gʉ lo gʉ ná ke”) lingʉeri Adamu ma Eva ma na tsatsa Yova ro. Nja malaika ma nja nrŭ ma na tsangʉe tsa. (Yud. 6) Luti Mungu vʉngʉe Waizraeli ndi dho, fø kpa ma tsangʉe tsa ddi ke ro ndirigoti kpa ngʉ kali dhi miungu má. (Isa. 63:8, 10) Yova thí bangʉe njedha bbo. Yova ngatsove godhé ndirigoti ke ra anzi ngatsovedha na kpø ndi si tsatsangʉe ná kpa sa ná ngadjo. Føri kasi ledha bbʉ chí tøni ná kpa dho ni ndima ngatsove che kʉ ná i dz’ djó Yova bbai ro.

8-9. Yova djo ká nrŭ adi ngba kali dhi lo po, ndirigoti ko ká ka ko d’ra ngba lo kpa dho?

⁸ Yova adi Diabolo sha ndi djo ná kali tso veve. Stani bbøngʉe Yova dzá njí dhi ke Yobu, ndirigoti ke adi Yova dho njínji ná nrŭ krʉ bbø i ndi ripo ro, kpa njínji ke dho ke bbʉ kpadho ná ritsi dzá lodho. (Yob. 1:8-11; 2:3-5) Diabolo nrŭ bbø godhé kpø njʉnga djo. (Ufu. 12:10) Ko ka ko dhori Stani kʉ kali ba nzadha tso kove nari na ndirigoti chí ko tøni Yova dho kodhi ji na nari chulu. Yova lengʉe Yobu ronga le ndirgoti kesi ko ronga ma le ddi njati ko ve ngatso ngba ró. ​—Yak. 5:11.

⁹ Kali dhi walimu chulu Stani adi rili nrŭ uri nari kʉ Yova kʉ che kʉ ná ke ndirigoti nzadha bbʉ nrŭ dho ná ke. Nja nrŭ  adi ripo nari kʉ njati ddikpa ngba dhe ró, fø ngba Mungu dzi ndiro ndi ra di ra na malaika kana d’e. Følo nzɨ adi heshima bbʉ Mungu dho ri! Ro ko churi nari kʉ Yova kʉ jidha dhi Baba. Njati rie dhe ma ko nji ri ró inga ko ji ná le dhedhe ma ró, ko nzɨ adi chelo ro ti Mungu djo ri. Fø nga ringa na, ko uri nari kʉ kesi dhe tso d’ød’ø ndirigoti ke si checheni ná nrŭ gaga. Ngba ji ndima rr hwè dhi lo i ná nrŭ dho akod’rari nari kʉ Yova kʉ jidha dhi Mungu. Føri ka ndi liri Yova ngʉ chø ndi chø ná ke dhó logoti. ​—Mez. 27:11.

10. Zaburi 22:23, 24 ká ngba lo dho Yova djo?

¹⁰ Yova adi ndidzá ji dhi njí dhi kpa nzani nari tso veve. Yova kʉ zølo dhi Mungu. Ke nzɨ adi riji ko nzani ri, rie nrŭ ko nza nari dho ma, dhe dzá lodho ma inga ko nzá kaka ri nari dho ma ró. (Azø Zaburi 22:23, 24.) Yova chu kodhó kpakpalo ngba, ke adi riji ndi d’ø ritso d’ø ndirigoti kesi ritso d’ød’ø. (Anja Kutoka 3:7, 8; Isaya 63:9.) Karrnga goti kesi “[ko] nyodda njʉ krʉ ndirigoti dhe kasie nga, dzz le dzz nari ma ka sie nga, ndi le ronga ndi nari ma ka sie ngaddi.”​—Ufu. 21:4.

11. Yova ká adi ndi mbu ngbaribbai ndidzá checheni ná chí njí dhi nrŭ djo?

¹¹ Yova adi ndima kana nga ndoni ndidhó kau ma na dhe chulu nari tso veve. Yova ká adi ndi mbu ngbaribbai checheni ná chí ngʉe ná nrŭ djo? Ke kʉ ù na bbo ndi nja kpa ki vi! (Yob. 14:15) Addinga ngbabʉ ma Yova riji ndi nja ndidzá kau Abrahamu ki nari djo! (Yak. 2:23) Inga addinga ngbaribbai ma Yova ka ndi jiri ndima tilo ki Musa na “nja ndima ndima nyodjonga nja ro nari djo” anziro kpa ngʉ adi loti ndima kana naribbai! (Kut. 33:11) Ndirigoti ke kʉ ù na bbo ndi rr Daudi ma zaburi ndingʉe ná nja  kpa ma na madha dhi dyi ndima ngo ro! (Zb. 104:33) Ngba mai Mungu dzá fø kau cheni che ro, ke nzá d’e kpa nga ro vi ri. (Isa. 49:15) Ke kpadhó krʉ kʉ nalo nga no ni. Biblia ripo “kpa krʉ kʉ shi ke dho.” (Lu. 20:38, maelezo ya chini.) Ddikpa cha ke kasi kpa ngʉ shi vi, ke kasi kpadhó sala rr rr ndirigoti ke kasi kpa madha bbʉ ndi dho nari tso uu. Njati rie vi ni vi ji ni ji ná le dhe chulu ró, fø lo ka ndi pi ni iso pi.

12. Kpakpalo tso o ná i saa na ká ngba lo adi Yova thí nza bbo?

¹² Yova adi chelo nji ná kpa nrŭ nza nari tso veve. Adamu tsangʉe Edeni na ná saa na, Yova chungʉeri lo ka ndi sanisa ri thika si thɨni nari nji. Yova ndrorie che kʉ nalo ma, nga kʉ chø nalo ma, i dz’ djó nrŭ nji ná fudjo ma na. Ke adi ngaddi bbo nga kʉ uwezo na ná nrŭ djo, føri kʉ zønzø (bayatima) ma, dhe bbá kpa dhe ná isɨ nrŭ ma na. (Zek. 7:9, 10) Yova thí adi njedha ba bbo ndidzá njí dhi kpa dho nja nrŭ nzadha bbʉ ná saa na ndirigoti prizo na nrŭ kpa li ná saa na. Anichu nari kʉ Yova ji ni bbo dhonalo ni ngatsove ddinga ke ma na.

13. Yova ká che kʉ ná ngba nyi nja nrŭ kana njʉ, ndirigoti ke kasi addu nji fø lo dho?

¹³ Yova adi nrŭ dhó che kʉ ná nyi ra anzi nari tso veve. Mungu nongʉe nrŭ ndi ró ji na, ro Stani adi riji nrŭ nji chelo dhé. Mungu njangʉe “nrŭ dhó chelo nanga nyani “ Noa dhó saa na nari ro, “Yova nanga nrŭ ndi no dz’ djo nari d’ongʉe d’o ndirigoti ri bbʉngʉe njedha ke thí dho.” (Mwa. 6:5, 6, maelezo ya chini, 11) Nde fønga djó ro ká dz’ djó lo thika leni le? Nzá! Ngono dhi lo na nrŭ dhó nyi ra anzi nari adi hwè bbʉ bbo Stani dho! (Efe. 4:18, 19) Stani adi hwè ba bbo Yova má ná nrŭ nji chenga ró. Yova si ridho ndi ndro che kʉ nalo ndro gʉgʉri ndima leni chenga nǎ ro ná nrŭ kesi sa ná saa na.

14. Nrŭ ká adi ngba lo nji dz’ ró, ndirigoti zǎ ró?

¹⁴ Yova adi nrŭ dz’ djó nga sa nari tso veve. Nrŭ adi ‘pinyo nrŭ djo nja ndima vu na vu nrŭ ró d’e,’ ro kpa nzɨ dz’ ronga b’o ndirigoti zǎ ronga b’o anziro Yova jingʉeri naribbai ri. (Muh. 8:9; Mwa. 1:28) Bbo chulo ná kpa adi ripo nari kʉ nrŭ nji nalo dzá lodho gosi ná cho na milioni ddi kʉ ná ritsi tsɨ * ka ndi sinisi, føri kʉ zǎ tsɨ ma, njonjo kʉ ná tsu ma na. Føridho ri kʉ dhʉdhʉ ko famu nrŭ ripo dz’ djó nga sani njʉ nari! Hwè dhi kʉ Yova tsoni ndi si “dz’ sa ná nrŭ sa sa” kesi dz’ lu djónga ngʉ Paradiso.​—Ufu. 11:18; Isa. 35:1.

15-16. Addui ká ka ndi cho ko ronga ko ve ngatso Yova bbai? Abbʉ loroji.

¹⁵ Addinga kodhi ra nǎ Baba adi tsove nalo djo ndirigoti ke verie ritso cho bí b’lo. (Anja kisanduku “ Yova tso ve nalo.”) Yova ka ndi d’ø i dz’ djó chelo tso ndi ji ná saa na. Ro kedhó ngatsovedha kʉ ledha ko krʉ dho! Addinga i loroji djo. Ddikpa dza dhi nrŭ dho le pori kpadhi ngba si gøni na saa ngba sie che kʉ afya na, ngba dhó maisha nga sie bblo ri, ndirigoti ngba si dhe kalʉ ro. Ngba mai kpa churi fø ngba si ndima thí nza bbo ro, kpa ko ngba hwè na dhé. Kpa ji ndima dhi ngba nari dho kpa ka ndima ve fø kpakpalo tso krʉ ndiro ndima b’o ndima dhi ngba ronga d’e.

 ¹⁶ Føri bbai, Adamu dzá nzø krʉ gøni chenga na. Yova ji kpa bbo ndirigoti ke ka ndi ko kpa tsostso ngba. (1 Yo. 4:19) Ndirigoti njonjo ko tilo djo ná gødhi nrŭ ró ro, Yova si ndidzá nzø dhó nzadha tso d’ød’ø. Yova pɨ ndi si nrŭ dhó nzadha tso d’ø ná ddo ngba. (Mt. 24:36) Yova dzá jidha ka ndi kó ko tsotso ko ve ngatso ddinga ke ma na.

17. Waebrania 12:2, 3 tilo Yesu djo. Fø lo ká ka ndi kó ko tsotso ko ve ngatso ngbaribbai?

¹⁷ Yova kʉ bblo kʉ ná loroji ngatsovedha kana. Yesu dyøngʉe ndidzá Baba dhó loroji ngatsovedha kana. Nrŭ ke ngʉe ná saa na, ke vengʉe chelo nrŭ ngʉ po ndi djo nari tso ma, pa nrŭ ngʉ ndi nja nari tso ma, nzadha dhi tsu ma na kodhi lodho. (Azø Waebrania 12:2, 3.) Yova dho bblo kʉ ná loroji ngatsovedha kana, føri kongʉe Yesu tsotso ndiro ndi ve ngatso d’e. Fø loroji ka ndi bbʉ kpakpanga ko dho maddi.

18. Ddiddi 2 Petro 3:9 ripo naribbai, Yova ngatsove nari ká liri ngba lo njini?

¹⁸ Azø 2 Petro 3:9. Yova chu che kʉ ná i dz’ tso ndi si d’ø ná ddo ngba. Ke ngatsove na lodho bí kʉ ná nrŭ chu ke ndirigoti mamilioni kʉ ná nrŭ njínji ke dho i ddoro. Fø nrŭ krʉ nanga adi jini dhonalo kʉ Yova dhó ngatsovedha dzá lodho kpa gøni, kpa chulo ke djo ndirigoti kpa bbʉ ndima ke dho. Njati fø nrŭ ve ngatso kpø mwisho djo ró, føri si ridho nari kʉ Yova njiri bblo ngatso ndi ve nari na!

19. Kodho ká ringani ko nji addu, ndirigoti ko kasi ngba ledha ba?

¹⁹ Yova riddi ko di ngatsove hwè na. Ni mai Stani chelo nji ndirigoti nzadha bbʉ ro, Yova kʉ “hwè dhi Mungu” dhé. (1 Ti. 1:11) Ko maddi ko ka ko ve ngatso hwè na Yova si nji nalo ko b’o ro. Kesi rili ndi rodho mani ma, ndidzá bbonga nyi chuni, kesi dz’ djó chelo ma ndirigoti krʉ na ko bani njʉ ná kpakpalo tso d’ød’ø. Akora anzi ngatsovedha na ndirigoti koe kpakpa i ko churi ro kodhi ra nǎ Baba ma ngatsove ddi. Njati ko njiri fø ró, i lo ka ndie bbʉbbʉ ko kana njale ddiro dho: “Hwè na kʉ nari kʉ kprɨ tøni mbudha kana ná le dhonalo ke tso uni narigoti, kesi shinga dhi taji ba Yova tsongʉeni ndi si bbʉ ngba ji ndi ná nrŭ dho nari.”​—Yak. 1:12.