1-2. Iˉsaˍyaˆ liꞈ 65:16, 17 hkʼaw Yaˬhoˉvaˬ kʼoˆ ve tawˇ hkawˇ ngaˬ hui awˬ gʼaˇ maˇ nuˇ tuˬ hkʼaˬ hkʼe ga laˇ ve le?

 “Te tcuhˉ taˍ˗oꞈ!” Chi lehˬ 2017 hkʼawꞈ hpawnˬ daꞈ lonˉ 3 nyi awˬ lawn lonˉ ma hpehꞈ ve pa taw, ngaˬ hui htaꞈ awˬ gʼaˇ peꞈ laˇ jaˇ. Hpawnˬ daꞈ ve chi ve hkʼaw ngaˬ hui shoꞈ shaꞈ ve htaꞈ hkʼaˬ hkʼe te yeunˇ hkanˍ gʼaˇ tuˬ ga laˇ ve yoˬ. Hpawnˬ daꞈ lonˉ chi peuˬ laˬ ve 4 hkʼawꞈ gaˬ˗oˬ ve htawˇ, haiˬ ve miˬ guiˬ chi hkʼoˆ lo ngaˬ hui shoꞈ shaꞈ ve htaꞈ gʼa yeunˇ hkanˍ sheˍ.

² Chi teˇ hkui nawˬ aˬ htoꞈ ma htaꞈ gʼa yeunˇ hkanˍ ve le? Yehˬ kʼa hkʼaw ve chaw maˇ heˆ leh nawˬ meuˆ daꞈ jaˇ ve awˬ chawˇ suh˗e gehˇ sheˍ ve laˇ? Nawˬ naˬ chehˇ ve laˇ? A shaꞈ maˇ ve pa taw, nawˬ tuꞈ hkanˍ ve gʼa hpuˇ chehˇ ve laˇ? Mvuhˇ yeˬ mvuhˇ haw, haiˬ ve awˬ ceuˬ, maˇ heˆ leh tawˍ ve tsuhˇ ve nawˬ gʼa hpuˇ chehˇ ve laˇ? Maˇ heˆ leh a naˍ 19 nawˬ htaꞈ heuˆ la kuiˬ cawˬ˗aw laˇ? Chi hkʼe ve teˇ hpaˍ maˇ gʼa hpuˇ ve awˬ nyi leh, maˇ kʼawꞈ dawˇ nawˇ tuˬ awˬ nyi htaꞈ ngaˬ hui mawˬ gaˇ ve yoˬ!—Iˉsaˍyaˆ 65:16, 17 gʼaw sheˍ.

3. Chi teˇ hkui ngaˬ hui aˬ htoꞈ ma gʼa te cawˇ ve le? Leh aˬ htoꞈ ma pa taw le?

³ Miˬ guiˬ chi hkʼoˆ lo ve a shaꞈ teꞈ hkʼaˇ tuꞈ hkanˍ jaˇ leh awˬ gʼuˇ suhˍ hpawˇ ngaˬ hui tuꞈ jaˇ hkanˍ jaˇ ve chi aꞈ kehˉ gʼa hpuˇ tuˬ sheˍ. (Maꞈhtehˍ 24:21) Chi ngaˬ hui caˉ leh yeunˇ hkanˍ gʼaˇ tuˬ te jawˬ cawˇ ve yoˬ. Aˬ htoꞈ ma pa taw le? Yeˍsuˆ kʼoˆ ve, ‘nawˬ hui nyi ma yeˬ puiˉ ve htaꞈ pa taw, co co taiˍ taiˍ a shaꞈ gʼa tuˬ yoˬ.’ (Luˉkaꞈ 21:19) Ngaˬ hui hkʼa shuˍ shoꞈ shaꞈ ve gʼa hpuˇ ve chaw hkʼaˬ hkʼe te yeunˇ hkanˍ gʼaˇ ve tehꞈ dawˇ nyi ve kʼo, ngaˬ hui kaꞈ yeunˇ hkanˍ gʼaˇ tuˬ yoˬ.

4. Yaˬhoˉvaˬ lehˬ yeunˇ hkanˍ ve daꞈ jaˇ ve henˇ yuˬ tuˬ hpehꞈ ve tehꞈ aˬ htoꞈ ma te ngaˬ hui kʼoˆ gʼa ve le?

⁴ Yeunˇ hkanˍ ve daꞈ jaˇ ve henˇ yuˬ tuˬ a shu hpehꞈ ve le? Yaˬhoˉvaˬ Gʼuiˬ sha yoˬ. Yaˬhoˉvaˬ hpehꞈ ve nawˬ anˇ˗aw laˇ? Nawˬ hkʼa dehꞈ dawˇ nyi ve kʼo, na gʼa tuˬ yoˬ. Chi teˇ hkui Saˍtanˍ lehˬ miˬ guiˬ htaꞈ uˉ peunˍ chehˇ ve yoˬ. Hkʼe te leh, miˬ guiˬ hkʼoˆ shoꞈ shaꞈ ve awˬ lawn tiˉ cawˬ ve yoˬ. Awˬ tehˬ kʼo, Yaˬhoˉvaˬ kanˇ paˆ cawˬ leh awˬ lawn chi htaꞈ gu kaꞈ  gʼa ve yoˬ. Yaꞈ hkʼaˇ, yawˇ awˬ yanˇ cawˇ ve htaꞈ law taˍ ve yoˬ. (Roˉmaꞈ 9:22) Law chehˇ ve awˬ yanˇ htaˇ, Gʼuiˬ sha yeunˇ hkanˍ jaˇ. Yaˬhoˉvaˬ gʼa yeunˇ hkanˍ cawˇ ve 9 lawn htaꞈ ngaˬ hui teˇ geh henˇ tuˬ yoˬ.

5. Gʼuiˬ sha ve awˬ meh luˬ tuˬ hkʼaˬ hkʼe te piˇ ve le? Leh awˬ lawn chi nawˬ hkʼaˬ hkʼe dawˇ ve le?

⁵ Gʼuiˬ sha ve awˬ meh luˬ tuˬ te piˇ ve. Yaˬhoˉvaˬ yawˇ ve awˬ meh htaꞈ haꞈ jaˇ leh yawˇ ve awˬ meh htaꞈ teˇ gʼaˇ le le yawˆ yan tcuh gaˇ ve yoˬ. (Iˉsaˍyaˆ 42:8) Yaꞈ hkʼaˇ, ponˬ laˬ ve 6,000 hkʼawꞈ ve awˬ yanˇ awˬ hkʼaw lo Gʼuiˬ sha ve awˬ meh luˬ tuˬ te piˇ ve yoˬ. (Chiˇ mvuh ve 74:10, 18, 23) Awˬ lawn chi lehˬ Eˍdenˍ hko hkʼaw tanˬ ve yoˬ. Daꞈ ve awˬ ceuˬ Aˍdanˍ leh Eˇvaꞈ htaꞈ maˇ cawˬ tcuh gaˇ ve tehꞈ Saˍtanˍ Gʼuiˬ sha htaꞈ she pfuhˍ ve yoˬ. (Awˬ hkuiˉ puiˍ 3:1-5) Oˇ ve teˇ yanˇ htaˇ tanˬ leh chaw yaˇ daꞈ ve awˬ ceuˬ gʼa cawˇ ve htaꞈ Yaˬhoˉvaˬ tawˍ taˍ ve tehꞈ she pfuhˍ piˇ ve yoˬ. Yeˍsuˆ yawˇ Awˬ pa ve awˬ meh luˬ ve htaꞈ dawˇ haˍ ve yoˬ. Hkʼe te leh, Yeˍsuˆ awˬ laꞈ gʼawˇ htaꞈ bon lawˬ tuˬ maˍ piˇ ve, “mvuhˇ naw ma hkʼoˆ chehˇ ve ngaˬ hui ve Awˬ pa˗oˬ, nawˬ ve awˬ meh htaꞈ yawˆ yan te piˇ lawˬ˗oꞈ.”—Maꞈhtehˍ 6:9.

6. Yaˬhoˉvaˬ uˉ peunˍ keunˍ ve tehꞈ hpeuꞈ maw piˇ tuˬ aˬ htoꞈ ma te awˬ yanˇ gʼa yehˇ maw jaˇ ve le?

⁶ Gʼuiˬ sha uˉ peunˍ ve htaꞈ tawˍ piˇ ve. Mvuhˇ naw ma hkʼoˆ leh miˬ guiˬ hkʼoˆ uˉ peunˍ tuˬ ve Yaˬhoˉvaˬ teˇ gʼaˇ ceh tiˉ a hkaw˗anˬ cawˬ ve yoˬ. Leh yawˇ uˉ peunˍ ve kaꞈ daꞈ jaˇ. (Hpeuꞈ maˍ ve 4:11) Yaꞈ hkʼaˇ, Gʼuiˬ sha uˉ peunˍ tuˬ a hkaw˗anˬ maˇ cawˬ tehꞈ Saˍtanˍ mvuhˇ naw ma tcuh yaˇ leh chaw yaˇ htaꞈ heˍ piˇ leh dawˇ tcuh ve yoˬ. Saˍtanˍ kʼoˆ ve htaꞈ hpeuꞈ maw piˇ tuˬ awˬ yanˇ gʼa yehˇ maw ve yoˬ. Ngaˬ hui htaꞈ hpanˍ shehˍ hpaˇ Gʼuiˬ sha htaꞈ maˇ cuˇ ve kʼo, chaw yaˇ uˉ peunˍ maˇ gʼa tehꞈ shiˍ gʼa tuˬ, chaw yaˇ hkʼaˇ chaw yaˇ uˉ peunˍ tuˬ awˬ yanˇ piˇ ve yoˬ. (Yeˍraˍmiˆ 10:23) Gʼuiˬ sha yeunˇ hkanˍ ve pa taw, awˬ lawn chi kʼawꞈ chaˬ nyi tuˬ maˇ loˍ. Awˬ leh meuˇ htaˇ, Yaˬhoˉvaˬ lehˬ mvuhˇ naw ma hkʼoˆ leh miˬ guiˬ hkʼoˆ uˉ peunˍ tuˬ ve a hkaw˗anˬ cawˬ ve tehꞈ, teˇ gʼaˇ˗ehˬ kaꞈ htawˇ dawˇ nawˬ dawˇ cawˬ tuˬ maˇ loˍ. Yaˬhoˉvaˬ uˉ peunˍ ve daꞈ jaˇ ve awˬ hkʼaˇ hpehꞈ ve tehꞈ teˇ gʼaˇ le le gʼa mawˬ tuˬ yoˬ. Gʼuiˬ sha ve mvuhˇ miˬ ceh tiˉ miˬ guiˬ chi hkʼoˆ dawˇ sha gawˬ lehˍ ve leh kawˆ tuˬ maˇ cawˬ ve te laˇ gʼa ve yoˬ.

7. Yaˬhoˉvaˬ htaꞈ hpfuhˆ ve a shu kaꞈ cawˬ ve le? Leh Yaˬhoˉvaˬ yawˇ hui htaꞈ hkʼaˬ hkʼe te piˇ tuˬ le?

⁷ Gʼuiˬ sha ve yaˇ Gʼuiˬ sha htaꞈ hpfuhˆ ve. Yaˬhoˉvaˬ mvuhˇ naw ma tcuh yaˇ leh chaw yaˇ htaꞈ biˇ jaˇ ve te hpanˍ taˍ ve yoˬ. Yaꞈ hkʼaˇ, mvuhˇ naw ma tcuh yaˇ teˇ gʼaˇ Saˍtanˍ lehˬ Gʼuiˬ sha htaꞈ hpfuhˆ ve yoˬ. Leh Saˍtanˍ lehˬ Aˍdanˍ leh Eˇvaꞈ kaꞈ Gʼuiˬ sha htaꞈ hpfuhˆ tuˬ te piˇ ve yoˬ. Peuˬ hkʼawꞈ nawˉ, mvuhˇ naw ma tcuh yaˇ leh awˬ nu ve chaw yaˇ kaꞈ Gʼuiˬ sha htaꞈ hpfuhˆ tuˬ te piˇ ve yoˬ. (Yuˇdaꞈ 6) Iˉsaˍreˍlaˆ chaw Gʼuiˬ sha leuˆ yuˬ taˍ ve chaw hpehꞈ ve htawˇ, yawˇ htaꞈ maˇ haꞈ yuˬ leh maˇ heˆ heˆ ve gʼuiˬ sha htaꞈ oˉ kʼoˍ pui ve yoˬ. (Iˉsaˍyaˆ 63:8, 10) Yawˇ hui Yaˬhoˉvaˬ htaꞈ hpfuhˆ piˇ ve yoˬ. Yaꞈ hkʼaˇ, yawˇ yeunˇ hkanˍ leh yawˇ htaꞈ hpfuhˆ ve chaw hkʼa peu˗eˬ htaꞈ te luˬ piˇ htaˇ hkʼa gaˬ, yawˇ caˉ leh yeunˇ hkanˍ tuˬ yoˬ. Haiˬ ve miˬ guiˬ chi htaꞈ maˇ gʼa yeunˇ hkanˍ˗oˬ ve pa taw, Yaˬhoˉvaˬ leh yawˇ htaꞈ ka tiꞈ yeˬ ve chaw ha lehˬ jaˇ tuˬ yoˬ!

8-9. Saˍtanˍ Yaˬhoˉvaˬ htaꞈ caˉ daꞈ ve hkʼaˬ hkʼe heˍ ve le? Ngaˬ hui hkʼaˬ hkʼe te cawˇ ve le?

⁸ Saˍtanˍ heˍ ve. Yawˇbaˆ Yaˬhoˉvaˬ ve kanˉ te ve lehˬ teˇ ceuˬ ceuˬ dawˇ law taˍ ve tehꞈ Saˍtanˍ she pfuhˍ piˇ ve yoˬ. Chi ve lehˬ, Yawˇbaˆ htaꞈ ceh tiˉ she pfuhˍ piˇ ve maˇ heˆ. Yaˬhoˉvaˬ ve kanˉ te ve chaw teˇ gʼaˇ le le leh Yaˬhoˉvaˬ htaꞈ kaꞈ she pfuhˍ piˇ ve yoˬ. (Yawˇbaˆ 1:8-11; 2:3-5) Chi lehˬ chi teˇ hkui hkʼa gaˬ kaꞈ Saˍtanˍ te chehˇ sheˍ ve yoˬ. (Hpeuꞈ maˍ ve 12:10) Ngaˬ hui Yaˬhoˉvaˬ htaꞈ haꞈ ve pa taw, ngaˬ hui shoꞈ shaꞈ ve gʼa hpuˇ ve htaꞈ yeunˇ hkanˍ leh Yaˬhoˉvaˬ htaꞈ ka tiꞈ yeˬ ve kʼo, Saˍtanˍ kʼoˆ ve awˬ tehˬ maˇ heˆ tehꞈ ngaˬ hui hpeuꞈ maw piˇ chehˇ ve yoˬ. Ngaˬ hui chi hkʼe yeunˇ hkanˍ ve kʼo, Yaˬhoˉvaˬ Yawˇbaˆ htaꞈ awˬ bon naꞈ piˇ ve hkʼa shuˍ ngaˬ hui htaꞈ kaꞈ naꞈ laˇ tuˬ yoˬ.—Yaˍkoˆ 5:11.

⁹ Saˍtanˍ bon awˬ hoˉ teˇ hpaˍ htaꞈ cuˇ leh Yaˬhoˉvaˬ haiˬ jaˇ ve tehꞈ maˍ tcuh leh tuꞈ ve hkanˍ ve hkʼa peu˗eˬ te shehˍ hpaˇ hpehꞈ ve tehꞈ maˍ tcuh  ve yoˬ. Tawˇ pa haˉ te kʼo, yaˇ ehˉ suh˗e htaˇ chi hkʼe hpehꞈ ve lehˬ Gʼuiˬ sha mvuhˇ naw ma tcuh yaˇ, maˇ maˇ loˍ ve tehꞈ yawˇ hui kʼoˆ ve yoˬ. Yaꞈ hkʼaˇ, chi hkʼe maˍ ve lehˬ Gʼuiˬ sha htaꞈ maˇ shawˍ maˇ caˆ kʼoˆ ve yoˬ. Yaˬhoˉvaˬ lehˬ chi hkʼe ve Gʼuiˬ sha hpehꞈ ve maˇ heˆ tehꞈ ngaˬ hui shiˍ ve yoˬ. Ngaˬ hui naˬ jaˇ ve maˇ heˆ leh ngaˬ hui haꞈ ve chaw suh˗e ve kʼo, ngaˬ hui Yaˬhoˉvaˬ htaꞈ venˇ baˆ maˇ taˍ. Teˇ nyi kʼo, chi ve hkʼa peu˗eˬ Yaˬhoˉvaˬ gu tuˬ yoˬ tehꞈ ngaˬ hui yonˍ ve yoˬ. Yaˬhoˉvaˬ ngaˬ hui htaꞈ haꞈ jaˇ ve Gʼuiˬ sha hpehꞈ ve tehꞈ awˬ nu ve chaw htaꞈ kʼoˆ piˇ tuˬ yoˬ. Ngaˬ hui chi hkʼe te ve kʼo, Gʼuiˬ sha htaꞈ kʼoˆ guiˇ gʼuiˬ guiˇ ve chaw htaꞈ hkʼawꞈ piˇ chehˇ ve yoˬ.—Tawˇ naˉ ve 27:11.

10. Chiˇ mvuh ve liꞈ 22:23, 24 hkʼaw Yaˬhoˉvaˬ htaꞈ caˉ daꞈ ve ngaˬ hui htaꞈ aˬ htoꞈ ma kʼoˆ laˇ ve le?

¹⁰ Gʼuiˬ sha ve kanˉ te ve chaw gʼa tuꞈ gʼa hkanˍ ve. Yaˬhoˉvaˬ lehˬ ha kʼaˉ puiˉ ve Gʼuiˬ sha hpehꞈ ve yoˬ. Tawˍ ve tsuhˇ ve, naˬ ve gawˬ ve htaꞈ gʼa yeunˇ hkanˍ ve, maˇ heˆ leh ngaˬ hui maˇ biˇ ve chaw hpehꞈ leh laiˉ pawˆ te yaꞈ ve pa taw, ngaˬ hui hawˬ ve htaꞈ Gʼuiˬ sha maˇ mawˬ gaˇ. (Chiˇ mvuh ve 22:23, 24 gʼaw sheˍ.) Ngaˬ hui hkʼaˬ hkʼe taw naˬ ve yawˇ na gʼa ve yoˬ. Leh yawˇ ngaˬ hui htaꞈ chi hkʼe ve maˇ hpuˇ tcuh gaˇ. Awˬ lawn chi teˇ hpaˍ htaꞈ yawˇ awˬ tehˬ gu laˇ tuˬ yoˬ. (Tawˆ kʼai ve 3:7, 8; Iˉsaˍyaˆ 63:9 htaꞈ tehˆ daꞈ sheˍ.) Maˇ maw kʼo ‘yawˇ lehˬ, ngaˬ hui ve mehˆ gʼuiˬ hkʼa peu˗eˬ htaꞈ shiˆ baˬ laˇ tuˬ yoˬ. Suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.’—Hpeuꞈ maˍ ve 21:4.

11. Yaˬhoˉvaˬ yawˇ ve kanˉ te ve chaw suh˗oˬ ve htaꞈ hkʼaˬ hkʼe dawˇ ve le?

¹¹ Gʼuiˬ sha ve awˬ chawˇ suh kʼai ve. Yaˬhoˉvaˬ yawˇ ve kanˉ te ve chaw suh˗oˬ ve htaꞈ hkʼaˬ hkʼe dawˇ ve le? Yawˇ yawˇ hui htaꞈ dawˇ nawˇ leh mawˬ gaˇ jaˇ! (Yawˇbaˆ 14:15) Yaˬhoˉvaˬ yawˇ ve awˬ chawˇ Aˍbraˍhanˍ htaꞈ hkʼaˬ hkʼe taw dawˇ nawˇ ve dawˇ nyi sheˍ. (Yaˍkoˆ 2:23) Yaˬhoˉvaˬ lehˬ “Moˉseˍ htaꞈ mehˆ hpfuhˇ mawˬ daꞈ leh tawˇ yaw piˇ ve” hkʼe yaw daꞈ jaw ve yoˬ. Yawˇ yawˇ htaꞈ kʼawꞈ yaw daꞈ gaˇ sheˍ ve yoˬ. (Tawˆ kʼai ve 33:11) Gʼuiˬ sha Daˍviˆ ve kʼa  muiˬ hkawˇ leh Chiˇ mvuh ve liꞈ bvuhꞈ paˍ ve kʼa muiˬ hkawˇ htaꞈ hkʼaˬ hkʼe taw na gaˇ ve dawˇ nyi sheˍ. (Chiˇ mvuh ve 104:33) Gʼuiˬ sha ve awˬ chawˇ chi teˇ hpaˍ suh˗oˬ ve htawˇ, yawˇ yawˇ hui htaꞈ maˇ leunˇ jaw. (Iˉsaˍyaˆ 49:15) Gʼuiˬ sha yawˇ hui htaꞈ caˉ daꞈ ve hkʼa peu˗eˬ tawnˇ gʼa ve yoˬ. Gʼuiˬ sha lehˬ yawˇ hui “hkʼa peu˗eˬ teꞈ chehˇ” sheˍ ve tehꞈ shawˍ ve yoˬ. (Luˉkaꞈ 20:38) Maˇ maw kʼo, Gʼuiˬ sha yawˇ hui htaꞈ kʼawꞈ teꞈ tu la piˇ leh yawˇ hui ve bon lawˬ hkawˇ htaꞈ yawˇ gʼa kʼawꞈ na leh yawˇ hui yawˇ htaꞈ oˉ kʼoˍ teˇ pawˆ gʼa kʼawꞈ pui la ve htaꞈ mawˬ tuˬ yoˬ. Nawˬ haꞈ ve chaw suh˗oˬ ve cawˬ ve kʼo, awˬ lawn chi nawˬ htaꞈ awˬ gʼaˇ peꞈ laˇ jaˇ ve yoˬ.

12. Haiˬ ve miˬ guiˬ chi hkʼoˆ lo Yaˬhoˉvaˬ nyi ma naˬ jaˇ tuˬ te piˇ ve aˬ htoꞈ ma cawˬ ve le?

¹² Haiˬ ve chaw awˬ nu ve chaw htaꞈ fawˉ mehˍ piˇ ve. Haiˬ ve chaw awˬ nu ve chaw htaꞈ fawˉ mehˍ piˇ ve yoˬ. Eˍdenˍ hko hkʼaw hpfuhˆ peuˬ hkʼawꞈ nawˉ, miˬ guiˬ chi hkʼoˆ lo Yaˬhoˉvaˬ daꞈ ve maˇ te piˇ sheˍ htaˇ, miˬ guiˬ chi gʼaˇ hteꞈ luˬ kʼai chehˇ ve tehꞈ yawˇ shiˍ ve yoˬ. Haiˬ ve, maˇ hteˇ maˇ cawˇ ve, leh chi beuꞈ teˇ co˗e miˬ guiˬ hkʼoˆ lo hehnˇ ve awˬ ceuˬ htaꞈ Yaˬhoˉvaˬ nyi bawˬ ve yoˬ. Awˬ gʼaˇ nuˇ leh a shu yawˇ awˬ to htaꞈ ga maˇ gʼa ve leh shu htaꞈ maˇ gʼaˇ puiˉ ve chaw Yaˬhoˉvaˬ ha kʼaˉ jaˇ ve yoˬ. Tawˇ pa haˉ te kʼo, yaˇ cuˬ shi leh mehˇ chawˇ ma yoˬ. (Zaˍhkaˍriˆ 7:9, 10) Yawˇ ve kanˉ te ve chaw htaꞈ shu fawˉ mehˍ leh htawnˍ hkʼaw yuˬ keu piˇ ve htaꞈ yawˇ gʼa mawˬ htaˇ, nyi ma luˬ jaˇ ve yoˬ. Teˇ gʼaˇ le le awˬ lawn chi hkʼe ve yawˇ geh teˇ geh gʼa yeunˇ hkanˍ ve chaw lehˬ, Yaˬhoˉvaˬ yawˇ hui htaꞈ haꞈ ve tehꞈ yonˍ sheˍ.

13. Chi beuꞈ teˇ co˗e ve chaw yaˇ htaꞈ Yaˬhoˉvaˬ hkʼaˬ hkʼe dawˇ ve le? Leh yawˇ aˬ htoꞈ ma te tuˬ le?

¹³ Chaw yaˇ lehˬ gʼaˇ hteꞈ luˬ kʼai chehˇ ve. Chaw yaˇ lehˬ gʼaˇ hteꞈ luˬ kʼai chehˇ ve yoˬ. Chaw yaˇ lehˬ Gʼuiˬ sha ve awˬ hoꞈ awˬ han hkʼe hpanˍ taˍ ve yoˬ. Yaꞈ hkʼaˇ, Saˍtanˍ lehˬ chaw yaˇ htaꞈ luˬ kʼai tcuh gaˇ ve yoˬ. Noˉaꞈ ve awˬ co˗e htaˇ, “miˬ guiˬ hkʼoˆ chehˇ ve chaw yaˇ chi teˇ hpaˍ ve dawˇ hkʼaˇ te hkʼaˇ teˇ hpaˍ chaꞈ chiˆ jaˇ ve htaꞈ Gʼuiˬ sha gʼa mawˬ ve teˇ yanˇ, yawˇ chaw yaˇ htaꞈ te hpanˍ taˍ ve lehˬ yaꞈ jaˇ ve law tehꞈ shiˍ leh dawˇ haˍ ve yoˬ.” (Awˬ hkuiˉ puiˍ 6:5, 6, 11) Oˇ ve teˇ yanˇ tanˬ leh chaw yaˇ daꞈ la˗aw laˇ? Maˇ daꞈ la. Haˉ chawˇ haˉ paˆ te ve, hawˉ hkʼaˆ chawˇ hawˉ hkʼaˆ, yaˇ miˇ chawˇ yaˇ miˇ teˇ geh zuhꞈ ve, maˇ˗awˍ ve chaw a hkʼe leˇ dawˇ ve htaꞈ Saˍtanˍ mawˬ htaˇ ha lehˬ jaˇ! (Eˇfeˇsuꞈ 4:18, 19) Gʼuiˬ sha ve chaw gʼaˇ hteꞈ te yaꞈ ve htaꞈ Saˍtanˍ mawˬ htaˇ ha lehˬ jaˇ. Yaˬhoˉvaˬ yeunˇ hkanˍ ve awˬ leh meuˇ gaˬ htaˇ, te yaꞈ ve chaw hkʼa peu˗eˬ venˇ baˆ maˇ dawˇ hpfuhˆ ve chaw htaꞈ yawˇ te luˬ piˇ tuˬ yoˬ.

14. Gʼuiˬ sha hpanˍ taˍ ve awˬ ceuˬ htaꞈ chaw yaˇ aˬ htoꞈ ma te chehˇ ve le?

¹⁴ Gʼuiˬ sha hpanˍ taˍ ve awˬ ceuˬ htaꞈ te luˬ ve. Gʼuiˬ sha hpanˍ taˍ ve awˬ ceuˬ htaꞈ te luˬ ve yoˬ. Chaw yaˇ hkʼaˇ chaw yaˇ uˉ peunˍ ve lehˬ, chaw yaˇ htaꞈ ceh tiˉ luˬ tuˬ te piˇ ve maˇ heˆ. Miˬ guiˬ leh to nuˇ to shaˆ chaw yaˇ nyi haꞈ shaˉ tcuh taˍ ve htaꞈ kaꞈ te luˬ ve yoˬ. (Cuˇ yiˍ piˇ ve 8:9; Awˬ hkuiˉ puiˍ 1:28) Cuˇ yiˍ cawˬ paˍ teˇ hpaˍ kʼoˆ ve, awˬ gʼuˇ suhˍ hpawˇ a shaꞈ teꞈ ve awˬ ceuˬ teˇ lanˬ ceuˬ hpaˆ mehˍ kʼai tuˬ chaw yaˇ te piˇ ve yoˬ. Suhˆ cehˬ hawˆ cehˬ luˬ kʼai chehˇ ve tehꞈ laiˉ gʼaˇ dawˇ haˍ ve chi anˇ tuˬ maˇ loˍ! Yaꞈ hkʼaˇ, “miˬ guiˬ htaꞈ te luˬ ve chaw teˇ hpaˍ htaꞈ te luˬ piˇ” leh miˬ guiˬ hkʼoˆ lo Paˍraˍdiˇsuˆ teˇ pawˆ kʼawꞈ hpehꞈ la piˇ tuˬ yoˬ tehꞈ, Yaˬhoˉvaˬ ka tiꞈ te taˍ laˇ ve pa taw ha lehˬ jaˇ.—Hpeuꞈ maˍ ve 11:18; Iˉsaˍyaˆ 35:1.

15-16. Ngaˬ hui Yaˬhoˉvaˬ hkʼe leˇ yeunˇ hkanˍ gʼaˇ tuˬ aˬ htoꞈ ma ga laˇ ve le? Tawˇ pa haˉ kʼoˆ maˍ laˇ sheˍ.

¹⁵ Peuˬ laˬ ve laiˉ hinˉ hkʼawꞈ Yaˬhoˉvaˬ aˬ htoꞈ ma htaꞈ gʼa yeunˇ hkanˍ ve dawˇ nyi sheˍ. (Awˇ ceˍ awˇ fa “ Yaˬhoˉvaˬ aˬ htoꞈ ma htaꞈ yeunˇ hkanˍ sheˍ ve le?” htaꞈ nyi sheˍ.) Awˬ tehˬ kʼo, Yaˬhoˉvaˬ lehˬ miˬ guiˬ chi hkʼoˆ lo haiˬ ve leh shoꞈ shaꞈ ve htaꞈ Yaˬhoˉvaˬ hkʼaˬ hkʼe htaˇ gu kaꞈ gʼa ve yoˬ. Yaꞈ hkʼaˇ, Yaˬhoˉvaˬ yeunˇ hkanˍ ve pa taw, chi ngaˬ hui awˬ bon gʼa jaˇ. Awˬ lawn chi htaꞈ teˇ geh dawˇ nyi sheˍ, awˬ hpawˇ awˬ miˇ ma teˇ ca yaˇ cawˬ˗a te chehˇ ve yoˬ. Yaˇ paw la tuˬ ve chi awˬ nu ve chaw htaꞈ maˇ shuˍ leh paw la˗oˬ htaˇ kaꞈ yaˇ ve a shaꞈ tuꞈ hkanˍ jaˇ leh hkʼaˬ nyiˇ hkʼawꞈ maˇ gʼa chehˇ tehꞈ saˍ laꞈ gʼonˍ yawˇ huiˉ maˬ htaꞈ kʼoˆ piˇ ve yoˬ. Yaꞈ hkʼaˇ, yaˇ chi teˇ gʼaˇ htaꞈ tuꞈ  hkanˍ ve hkʼaw gʼa nyi haꞈ shaˉ ve tehꞈ yawˇ hui shiˍ ve htawˇ, yawˇ hui kaꞈ yaˇ chi teˇ gʼaˇ paw la tcuh ve yoˬ. Yawˇ hui yaˇ htaꞈ haꞈ jaˇ leh yaˇ chi teˇ gʼaˇ a shaꞈ teꞈ hkʼaˇ daꞈ la tuˬ te gʼa ve hkʼe teˇ ceuˬ le le yeunˇ hkanˍ leh te ve yoˬ.

¹⁶ Chaw yaˇ lehˬ paw la htaˇ kaꞈ maˇ biˇ ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ haꞈ leh dawˇ haˍ ve yoˬ. (1 Yoˇhanˬ 4:19) Yaˬhoˉvaˬ lehˬ tawˇ pa haˉ tehˆ maˍ laˇ taˍ ve awˬ pa awˬ e htaꞈ maˇ shuˍ. Gʼuiˬ sha lehˬ chaw yaˇ tuꞈ hkanˍ ve gʼa hpuˇ ve teˇ ceuˬ le le htaꞈ gu laˇ gʼa tuˬ yawˇ awˬ yanˇ tinˍ taˍ ve yoˬ. (Maꞈhtehˍ 24:36) Chi hkʼe shiˍ htaˇ, Gʼuiˬ sha gu laˇ htaˇ hkʼa gaˬ ngaˬ hui kaꞈ yawˇ geh teˇ geh yeunˇ hkanˍ chehˇ ve yoˬ.

17. Heˍbrehˇ liꞈ 12:2, 3 hkʼaw Yeˍsuˆ ve awˬ lawn ngaˬ hui caˉ leh yeunˇ hkanˍ gʼaˇ tuˬ hkʼaˬ hkʼe ga laˇ ve le?

¹⁷ Yaˬhoˉvaˬ lehˬ yeunˇ hkanˍ ve daꞈ jaˇ ve henˇ yuˬ tuˬ hpehꞈ ve yoˬ. Leh Yeˍsuˆ kaꞈ awˬ lawn chi ve yawˇ ve Awˬ pa htaꞈ henˇ yuˬ ve yoˬ. Yeˍsuˆ miˬ guiˬ hkʼoˆ lo chehˇ htaˇ, shu hkʼa mvuhˇ hkʼa na kʼoˆ ve, yaꞈ taw ve htaꞈ gʼa yeunˇ hkanˍ leh ngaˬ hui awˬ pon suhˆ hkuiˉ daw hkʼoˆ lo hkanˍ suh laˇ ve yoˬ. (Heˍbrehˇ 12:2, 3 gʼaw sheˍ.) Yaˬhoˉvaˬ ve awˬ lawn Yeˍsuˆ awˬ gʼaˇ gʼa tuˬ ga piˇ leh yeunˇ hkanˍ gʼaˇ ve yoˬ. Yaˬhoˉvaˬ ve awˬ lawn ngaˬ hui htaꞈ kaꞈ ga laˇ gʼa ve yoˬ.

18. 2 Peˍtruˆ liꞈ 3:9 hkʼaw kʼoˆ taˍ ve hkʼe, Yaˬhoˉvaˬ yeunˇ hkanˍ ve lehˬ aˬ htoꞈ ma awˬ bon gʼa ve le?

¹⁸ 2 Peˍtruˆ 3:9 gʼaw sheˍ. Yaˬhoˉvaˬ lehˬ haiˬ ve miˬ guiˬ chi htaꞈ hkʼaˬ hkʼe htaˇ gu cawˇ ve yawˇ shiˍ ve yoˬ. Yaˬhoˉvaˬ yeunˇ hkanˍ laˇ ve pa taw, chi chaw maˇ maˇ yawˇ htaꞈ shiˍ daꞈ tuˬ te piˇ leh chi teˇ hkui chaw awˬ moˍ lonˉ laiˉ lanˬ gʼaˇ yawˇ htaꞈ oˉ kʼoˍ pui la tuˬ te piˇ ve yoˬ. Yaˬhoˉvaˬ yeunˇ hkanˍ laˇ ve pa taw, yawˇ hui teˇ gʼaˇ le le ha lehˬ jaˇ. Chi yawˇ hui paw la tuˬ te piˇ leh yawˇ ve awˬ lawn gʼa henˇ ve, yawˇ htaꞈ haꞈ ve, leh yawˇ htaꞈ awˬ to chiˇ aꞈ piˇ ve yoˬ. Oˇ ve teˇ yanˇ yawˇ hui awˬ leh hkʼa gaˬ yeunˇ hkanˍ ve pa taw, chaw laiˉ lanˬ gʼaˇ laꞈ shawnˍ gʼa tuˬ yoˬ. Yaˬhoˉvaˬ yeunˇ hkanˍ ve leh dawˇ cheˆ ve cawˇ jaˇ ve tehꞈ ngaˬ hui hkʼa tawˍ lehˆ gʼa mawˬ ve yoˬ!

19. Ngaˬ hui aˬ htoꞈ ma te tuˬ dawˇ teh taˍ ve le? Leh ngaˬ hui chi hkʼe te ve kʼo, aˬ htoꞈ ma awˬ bon gʼa tuˬ le?

¹⁹ Yaˬhoˉvaˬ ve awˬ lawn ngaˬ hui ha lehˬ ha kʼa yeunˇ hkanˍ gʼaˇ tuˬ hkʼaˬ hkʼe maˍ laˇ ve le? Saˍtanˍ lehˬ naˬ ve gawˬ ve leh tuꞈ ve hkanˍ ve te laˇ ve htawˇ, Yaˬhoˉvaˬ lehˬ “awˬ bon uiˍ ve Gʼuiˬ sha” hpehꞈ ve yoˬ. (1 Tiˆmoˉseˍ 1:11) Yaˬhoˉvaˬ yawˇ ve awˬ meh htaꞈ yawˆ yan tuˬ te piˇ ve awˬ yanˇ htaꞈ yeunˇ hkanˍ leh law chehˇ htaˇ, yawˇ teˇ gʼaˇ tiˉ uˉ peunˍ keunˍ ve a hkaw˗anˬ cawˬ ve tehꞈ hpeuꞈ maw piˇ htaˇ, haiˬ ve hkʼa peu˗eˬ htaꞈ yuˬ baˬ htaˇ, leh ngaˬ hui gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ gu laˇ htaˇ, ngaˬ hui kaꞈ ha lehˬ jaˇ tuˬ yoˬ. Ngaˬ hui chi hkʼe te ve kʼo, Yaˍkoˆ liꞈ 1:12 hkʼaw kʼoˆ taˍ ve hkʼe, “beˬ ve lawˇ ve htaꞈ gʼa hpuˇ daꞈ htaˇ, yeunˇ hkanˍ puiˉ ve chaw lehˬ, awˬ bon uiˍ ve yoˬ. Awˬ lawn kʼo, lawˇ nyi ve teˇ ceuˬ htaꞈ hkanˍ gʼaˇ peuˬ hkʼawꞈ nawˉ, co tiꞈ ha tiꞈ shi uˉ tcuhˍ htaꞈ yawˇ gʼa tuˬ yoˬ. Shi uˉ tcuhˍ oˇ ve lehˬ, Gʼuiˬ sha htaꞈ haꞈ ve chaw teˇ hpaˍ htaꞈ yawˇ piˇ tuˬ yoˬ” tehꞈ kʼoˆ ve ngaˬ hui gʼa tuˬ yoˬ.