1-2. Mazu aYehova asonekawu haIsaya 65:16, 17 atukoleshaña ñahi kubula kuzeya?

MUTU wakupompa kweluña kwamu 2017 wahosheleña nawu “Bayi Muzeyaku!” Iku kupompa kwatukwashili kwiluka chitunateli kuumika nakukala kutunakumona. Yaaka yiwana yinahitihu dehi kufuma hayina mpinji, ilaña tuchidi kuumika kukala kwanshakaminu yamakonu.

² Kukalanyi kumwadiña nakumona? Mwafwisha ntaña yenu hela ibwambu denu? Munakukatakata? Komana chihandilu chinakuyikalila muloña wakukula, wubanji wadimwekenaña, yikonkojola hela makabisha? Indi kwiji munakukabakana muloña wachipupu chaCOVID-19? Tunakutalila mpinji yakela kukala kwejimiku kunahiti dehi, mpinji yitukavulamena yuma yejimiyi nawa yiyakabulaña kumwekana cheñi!—Tañenu Isaya 65:16, 17.

3. Chumanyi chitwatela kwila chayinu mpinji, nawa muloñadi?

³ Chihandilu muyinu nshakaminu chakola, nawa hadaha tunateli nikumona kukala kwasweja kumbindi. (Mat. 24:21) Dichi, twatela kutwalekahu kudiza chakuumika. Muloñadi? Muloña Yesu wahosheli nindi: “Neyi mwakomika, mwakapulwisha mawumi enu.” (Luka 21:19) Neyi tutoñojoka hadi akwetu chinakuumikawu kukala kudi neyi kutunakumona, chinateli kutukwasha kutwalekahu kuumika.

4. Tukuhosheladi netu Yehova diyi muntu wunakuumika itwatela kwimbujola?

⁴ Hinyi womikaña chikupu itwatela kwimbujola? Yehova Nzambi. Komana munahayami hakutiya iyi ñakwilu? Hadaha munahayami, ilaña neyi mutoñojokahu, mukuhayama wanyi. Kanu kaayi anakukiyuula kudi Diyabolu, nawa mudi kukala kwakuvulu. Yehova wukweti ñovu yakufumishahu iku kukala neyi mukulabula kwadisu, ilaña nakutalila ifuku dakumbidi  kulonda yakeli mwenimu. (Rom. 9:22) Chayinu mpinji, Nzambi yetu natwalekihu kuumika sampu mpinji yatoñolayi yinashiki. Tuhanjekenu hayuma 9 yinakuumikayi Yehova.

5. Indi ijina daNzambi adisawulaña ñahi, nawa mwatiyaña ñahi hamuloña wachumichi?

⁵ Kasawuntu kaletañawu hejina dindi. Yehova wakeña ijina dindi nawa nakukeña muntu wejima yadilemesheña. (Isa. 42:8) Ilaña hadi yaaka 6000 yinahitihu, ijina dindi anadisawuli. (Mas. 74:10, 18, 23) Chumichi chatachikili mwitempa daEdeni helili Diyabolu (ijina daya mukwila nawu “Mukwakudimbulula”) yamutwambili Nzambi nindi wakeñeleña wanyi Adama naEva adiluñisheña yuma yayiwahi hakwila ekali namuzañalu. (Kutach. 3:1-5) Kufuma tuhu yina mpinji, Yehova amutwambilaña nawu wayuminaña antu yuma yakeñañawu. Yesu wakameneneña hakasawuntu kaleteleñawu hejina daTata yindi. Muloña wachumichi, wayilejeli atumbanji twindi kulomba nawu: “Tata yetu wekala mwiwulu, ijina deyi diikali dajila.”—Mat. 6:9.

6. Muloñadi Yehova chinetejeliyi hahiti mpinji yayilehi kulonda yamwekeshi nindi diyi wukweti wuswa wakuyuula mwiwulu nihamaseki?

⁶ Antu amavulu amwovwahilaña wanyi Nzambi nichiyuulu chindi. Yehova wudi nawuswa wakuyuula mawulu nimaseki nawa wayuulaña chiwahi. (Chim. 4:11) Ilaña Diyabolu nadimbi añelu niantu kulonda atoñojokeña nawu Nzambi hakweti wuswa wakuyuulaku. Hakwila Yehova yamwekeshi nindi diyi wukweti wuswa wakuyuula nawa diyi nyuuli wamuwahi, hatela kuhita mpinji. Nzambi neteji antu kudiyuula aweni hadi mpinji yayilehi kulonda amoni nawu hiyanateli kudiyuula aweni chiwahi neyi abula kumutiyilila Nleñiku. (Yere. 10:23) Hamuloña wakudiwunjika kwaNzambi, iku kukala akakumanisha. Akamulemesha chikelukawu nawu Wanta windi hohu diwu wunateli kuleta kuwunda nikukiñewa hamaseki.

7. Anyi adikaña naYehova, nawa chumanyi chikayilayi?

⁷ Kudikaña kwadikañiliwu anyanindi amakwawu. Yehova waleñeli añelu niantu nanyijimba yawanina. Ilaña kañelu Satana (ijina daya mukwila nawu “Mukwakudikaña”) waletesheli antu awanina, Adama naEva kudikaña naYehova. Añelu amakwawu niantu niwena adikañili. (Yuda 6) Chimwahitili mpinji, nimuza waIsarela, antu atondeliyi Nzambi, amukaanini nawa atachikili kudifukula kudi anzambi akutwamba. (Isa. 63:8, 10) Yehova waneñeli nankashi. Hela chochu, nomiki nawa natwalekihu kuumika sampu nimpinji yakayijilumunayi akwakudikaña ejima. Chumichi chikaletesha antu jindi ashinshika anakuumika hamu nayena munshakaminu yamakonu kwikala namuzañalu.

8-9. Yumanyi yamutwambilañawu Yehova, nawa chumanyi chitwatela kwila?

⁸ Kutwamba kwaDiyabolu. Satana wamutwambilili Yoba, niambuña aYehova ashinshika ejima nindi adifukulaña kudi Yehova muloña wayuma yayinkayi. (Yoba 1:8-11; 2:3-5) Diyabolu natwalekihu kutwambila antu kushika niamakonu. (Chim. 12:10) Tunateli kumwekesha netu Satana wahoshaña mwakutwamba neyi tuumika kukala nawa tutwalekahu kwikala ashinshika kudi Yehova muloña wakumukeña. Kufwana Yoba, neyi tuumikaña akatukiswila.—Yak. 5:11.

⁹ Satana wazatishaña anlomboli ansakililu yakutwamba kulonda ahosheña nawu Yehova watama nawa diyi waleteshaña antu akabakaneña. Amakwawu ahoshaña nawu neyi mwana nafwi, Nzambi diyi wamusendaña kulonda yekali kañelu. Aka hikasawuntu chikupu! Tweluka netu Yehova hiTata wukweti kukeña. Neyi  tunakati nankashi hela muntu itwakeña nafwi, hitwamutwikaña Nzambi nyiloñaku. Ilaña twakuhwelelaña netu ifuku dimu wukawahisha yuma. Twatela kulejaku antu ejima anateli kutiyilila netu Yehova, hiNzambi wukweti kukeña. Chumichi chamukwashaña Yehova kwakula muntu wamusawulaña.—Yish. 27:11.

10. Masamu 22:23, 24 yamwekeshañadi hadi Yehova?

¹⁰ Chakabakanañawu ambuñindi akeñayi. Yehova hiNzambi wukweti wushona. Watiyaña kutama namakabi itwamonaña, chidi neyi anakutukabisha, yikatu hela kubula kuwanina. (Tañenu Masamu 22:23, 24.) Yehova weluka chitwatiyaña, nakukeña kufumishahu yuma yatama, nawa wukayifumishahu. (Esekejenu Kwidika 3:7, 8; Isaya 63:9.) Ifuku dakenza “[Dakakombolayi] madilu ejima kumesu [etu]; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.”—Chim. 21:4.

11. Yehova watiyaña ñahi nawambuñindi ashinshika afwa dehi?

¹¹ Kwambuka nawamabwambu jindi afwa dehi. Yehova watiyaña ñahi nawamayala niambanda ashinshika afwa dehi? Wafwilaña kuyimona cheñi! (Yoba 14:15) Yehova wafwilaña kumona cheñi ibwambu dindi Abarahama. (Yak. 2:23) Hela Mosi, muntu wahosheliyi nindi mesu-namesu. (Kwid. 33:11) Nawa watalilaña mpinji yakatiyililayi kutumina twakumushimeka twembileñayi Davidi niañimbi amasamu amakwawu! (Mas. 104:33) Hela chakwila amabwambu jaNzambi afwa dehi, Yehova wayijimbala wanyi. (Isa. 49:15) Wayanukaña chikupu. Bayibolu yahosha nawu: “Ejima wawu amomi” kwesekeja nachamonañayi. (Luka 20:38, tth.) Ifuku dimu wakayisañula, nawa wakatiyilila cheñi kukulomba kwawu kwakufuma hamuchima nawa waketeja nikudifukula kwawu. Neyi munafwishi  ntaña yenu imwakeña, awa mazu ayiwundisheña nikuyikundeja.

12. Chumanyi chamuneñeshaña Yehova munanu mafuku atama akukuminina?

¹² Antu atama chinakukabishawu antu. Kudikaña chikwatachikili mwitempa daEdeni, Yehova welukili nindi yuma yikaswejelaku kutama henohu kanda yiwahi. Yehova wahela kutama, wuñaji waheña nimadombu adi mukaayi makonu. Mpinji yejima, wakamenaña antu abula wakuyikiña, chidi neyi anshona nianfwila. (Zek. 7:9, 10) Yehova waneñaña neyi yamona ambuñindi ashinshika anakuyikabisha nikuyisha mutuleya. Ilukenu chikupu nenu wayikeña wejima wenu munakuumika hamu nayena.

13. Yilwilwinyi yatama yamonañayi Yehova mudi antu, nawa chumanyi chakelayi?

¹³ Yilwilu yawantu chiyinakutaminaku. Satana wakeñaña antu aleñawu muchifwanisha chaNzambi eleña yuma yatama. Nzambi chamweniyi “kutama kwawantu kunatohi hamaseki” mumafuku aNowa, “Yehova chamufutwili kumuchima nanochu cheliliyi muntu hamaseki, chamutiyishili kumuchima bwi.” (Kutach. 6:5, 6, 11) Komana kaayi kanawahiliku kufuma yina mpinji? Inehi mwani. Diyabolu watiyaña kuwaha kumona nyitapu yawuvumbi yejima chiyinasweji kuvulilaku, kushilahu niyilwilu yawuvumbi yekala hakachi kawamayala niambanda niwutumwa. (Efwe. 4:18, 19) Satana watiyaña kuwaha sweje-e neyi yaletesha antu adifukulaña kudi Yehova kukoña nshidi. Neyi mpinji yinashiki, Yehova wakamwekesha chahelayi yilwilu yejima yawuvumbi.

14. Antu anakwila ñahi nayileñaleña yaNzambi?

¹⁴ Chinakukisañanawu iseki. Muntu ‘nakutamisha mukwawu muntu,’ cheñi nakukisañana iseki nianyama ayinkeliyi Yehova antu nindi ayakameneña. (Mukwa. 8:9; Kutach. 1:28) Asayantisiti ahoshaña nawu hamuloña wayuma yelañawu, nyitapu yayileñaleña * yikujiya muyaaka yantesha yinakwinza. Dichinakuhoshelawu nawu yileñaleña yidi mukukala. Ilaña Yehova wakana nindi “[wakajilumuna] antu anakukisañana iseki” nawa wakabalumuna iseki kwikala Paradisa.—Chim. 11:18; Isa. 35:1.

15-16. Chumanyi chinateli kutukwasha kuumika neyi chinakuumikayi Yehova? Lumbululenu.

¹⁵ Toñojokenu hakukala kwejima kunomikiyi Tata yetu wamwiwulu hadi yaaka yayivulu. (Talenu chikasha chinakwila nawu, “ Yuma Yinakuumikayi Yehova.”) Yehova wukujilumuna kanu kaayi katama hadi mpinji yidi yejima. Ilaña kudiwunjika kwindi kunatukwashi nankashi. Toñojokenu hanichi chakutalilahu. Twili netu eyala namumbanda anayileji nawu mwanawu wakavwalika wakekala nakukala kweneni, nawa mwana hakahanda chiwahiku, wakafwa nawansi. Hela chochu, anvwali ekalaña namuzañalu neyi mwanawu navwaliki hela chakwila chakayikalilaña hakwila nawu akamwakameneña mwanawu. Chineli amukeña, atwalekañahu kuumika kukala kudi kwejima kulonda amwakameni mwanawu chachiwahi.

¹⁶ Munjila yoyimu, anyana kaAdama naEva neyi anavwaliki ekalaña awanina wanyi. Hela chochu, Yehova wayikeña nawa wayakamenaña. (1 Yow. 4:19) Nawa kwambukaku nawanvwali amuchakutalilahu chetu, Yehova nateli kumanisha kukala kunakumonawu anyanindi. Watonda mpinji yakamanishayi makabi ejima amonañawu antu. (Mat. 24:36) Komana kukeña kutwamukeña kwila kutuletesha kutwalekahu  kuumika hamu nayena neyi chinatwesheki nehi?

17. Indi mazu amulumbululawu Yesu asonekawu haAHeberu 12:2, 3 atukoleshaña ñahi kutwalekahu kuumika?

¹⁷ Yehova womikaña ninetu twatela kumwimbujola. Yesu womikileña neyi Tata yindi. Hadiñayi hamaseki, Yesu womikili nhoshelu yakudikaña, kasawuntu nikumukabishila hamutondu wakuyandishila kukola etu. (Tañenu AHeberu 12:2, 3.) Chakadi nikujina, chomikañayi Yehova dichamuletesheli Yesu niyena kuumika. Dichi ninetu chinateli kutukwasha kuumika.

18. 2 Petulu 3:9 yinateli kutukwasha ñahi kwiluka chuma chinakumwekana muloña wakwila Yehova wadiwunjika?

¹⁸ Tañenu 2 Petulu 3:9. Yehova weluka mpinji yatelela yakujilumwinamu kanu kaayi katama. Muloña wakudiwunjika Kwindi antu amavulu anakumwiluka nawa izaza deneni dawantu dinakudifukula kudi yena. Wejima wawu azañalalaña muloña Yehova nadiwunjiki hadi mpinji yayilehi hakwila avwaliki, amukeñi nawa adihani kudi yena. Chakomikawu antu amavulu kushika nikunsa chikamwekesha nawu Yehova welili chiwahi hakufuukulahu kwikala wadiwunjika.

19. Chumanyi chitwatela kufwila kwila nawa chumanyi chitukatambwila?

¹⁹ Twomikaña namuzañalu muloña wakwila Yehova niyena dichelañayi. Hela chakwila Satana waletaña yihuñu, Yehova natwalekihu kwikala “Nzambi wamuzañalu.” (1 Tim. 1:11) Ninetu tunateli kutwalekahu kwikala namuzañalu hampinji yitunakuhembelela Yehova kujilika ijina dindi, chiyuulu chindi, kufumishahu kutama kwejima nikufumishahu yihuñu yejima yitunakumona. Dichi tuumikenuña nikwiluka netu Tata yetu wamwiwulu niyena nakuumika. Neyi tukuumikaña, awa mazu akushikijewa hadi etu, akwila nawu: “Wukweti muzañalu yowu muntu watwalekañahu nakuumika hampinji yinakuhitayi mukweseka, muloña neyi Nzambi yamutiya kuwaha, wakatambwila chibaaba chawumi chakanayi Yehova antu atwalekañahu nakumukeña.”—Yak. 1:12.