1-2. Engtin nge Isaia 65:16, 17-a chhinchhiah Jehova thute chuan beidawng lo tûra min tihchak?

KUM 2017 regional inkhâwmpui thupui chu “TLAWM SUH!” tih a ni a. Chu inkhâwmpuia thusawite chuan fiahnate chhel taka tawrh chhuah theih dân min zirtîr a. Kum li lai liam tawh mah se, he khawvêl suaksual takah hian kan la chhel reng a ni.

² Tûn hnaiah eng harsatnate nge i tawh? Thihnaah chhûngte emaw, ṭhiante emaw i chân em? Natna khirh tak i tuar em? Kum upatna avânga fiahnate i hmachhawn em? Leilung chhiatna te, tharum thawhna te, leh tihduhdahnate i tuar em? A nih loh leh, COVID-19 hripui lêng ang chi natna i tuar em? Chûng thil zawng zawngte chu tûn hma thila a chan hun tûr leh theihnghilh hlena, engtikah mah a awm leh tawh ngai loh hun tûr chu a va nghahhlelhawm tak êm!—Isaia 65:16, 17 chhiar rawh.

3. Tûnah eng nge kan tih ang a, engvângin nge?

³ He khawvêla nun hi a harsa hle a, nakinah chuan hei aia nasa zâwk harsatnate kan tâwk mai thei. (Mt. 24:21) Chuvângin, chhelna nei lehzual tûra hma kan lâk zawm zêl a ngai tih a chiang hle. Engvângin nge? Isua’n: “In chhelin in nun in chhanhim ang,” tia a sawi avângin. (Lk. 21:19) Unaute’n kan tawrh ang fiahnate chhel taka an tawrh chhuah dân kan ngaihtuah chuan chhelna kan nei lehzual ang.

4. Engvângin nge Jehova chu chhelna lantîrna kawnga entawn tûr ṭha ber a ni tia kan sawi theih?

⁴ Chhelna lantîrna kawnga entawn tûr ṭha ber chu tu nge ni? Pathian Jehova a ni. Chu chu mak i ti em? I ngaihtuah chian hma chuan mak i ti mai thei. He khawvêl hi Diabola thununna hnuaia a awm avângin buainain a khat a. Jehova chuan a thiltihtheihna hmangin titâwp nghâl thei mah se, chutianga a tih hun tûr chu a nghâk reng a. (Rom 9:22) A hun ruat a lo thlen hma chu chhel takin a tuar fan fan a ni. Jehova’n chhelna lantîr  a duh chhan pakuate chu i lo ngaihtuah ang u.

5. Engtin nge Pathian hming chu sawichhiat a nih a, chumi chungchâng chu engtin nge i ngaih?

⁵ A hming sawichhiatna. Jehova chuan a hming chu a ngaina a, chu chu mi zawng zawngin zah se a duh a ni. Bible chuan: “LALPA [“Jehova,” NW] chu ka ni, chu chu ka hming a ni; ka ropuina hi mi dang hnênah ka pe lo vang a, fak ka hlawhna hi milem siam chawpte hnênah ka pe hek lo vang,” tiin a sawi. (Is. 42:8) Mahse, a hming ṭha chu kum sângruk chhûng vêl sawichhiat a ni tawh a. (Sâm 74:10, 18, 23) Chu chu Diabola’n (a awmzia “Sawichhetu”) Eden huana Adama leh Evi hnênah Pathian chu hlimna nei tûra an mamawh thil eng emaw pe duh lotu anga a puh khân a inṭan a. (Gen. 3:1-5) Chumi hun aṭang chuan Jehova chu mite mamawh tak pe duh lotu anga dâwta puh a ni. Isua chuan a Pa hming sawichhiat a ni chu pawi a ti tak zet a. Chuvângin, a zirtîrte hnênah: “Kan Pa, vâna mi, i hming zahawm rawh se,” tia ṭawngṭai tûrin a zirtîr a ni.—Mt. 6:9.

6. Engvângin nge Jehova’n a lalchungnunna chungchânga thu buai chinfel a nih hmaa hun tam tâwk a pêk?

⁶ A lalchungnunna dodâlna. Jehova chuan lei leh vâna rorêl tûrin dikna a nei a, a rorêl dân chu a ṭha ber a ni. (Thup. 4:10, 11) Mahse, Diabola chuan vântirhkohte leh mihringte chu Pathianin rorêl tûrin dikna a nei lo nia ngai tûrin a bum a. Rorêl tûra Jehova dikna neih chungchânga thu buai chu zan khat thil thua chinfel theih a ni lo. Fing takin, Pathianin mihringte chu Siamtu tel lova mahnia ro inrêlna chu a hlawh chham ngei ngei dâwn tih hre tûrin hun tam tâwk a pe a. (Jer. 10:23) Pathian dawhtheihna avângin chu thu buai chu chatuan atâna chinfel hlen a ni tawh ang. A Lalram chauhvin leiah hian remna leh muanna dik tak a awmtîr thei tih finfiah a nih hunah, ani chu thiamchantîr a ni bawk ang.

7. Jehova chungah tute nge hel a, an chungah eng nge a thlentîr ang?

⁷ A fa ṭhenkhatte helna. Jehova chuan vântirhkohte leh mihringte chu ṭha famkimin a siam a. Mahse, chumi hnuah chuan, vântirhkoh hel pakhat Setana (a awmzia “Dodâltu”) chuan mihring ṭha famkim Adama leh Evi chu Jehova laka hel ve tûrin a hmin a ni. Vântirhkoh dangte leh mihringte pawh chu helnaah chuan an tel ve a. (Juda 6) A hnuah, Pathian hnam thlan Israel mite ngei pawhin ani chu hnâwlin, milem pathiante an bia a ni. (Is. 63:8, 10) Pathian Jehova chu phatsan niin a inhre ngei ang. Mahse, ani chuan chhelna a lantîr a, a chunga hel zawng zawngte tihboral hun a thlen hma chu chhelna a lantîr zawm zêl ang. Chu tihboralna chuan amah anga he khawvêl suaksual taka chhelna lantîrtu a mi rinawmte tân hahdamna a thlen ang!

8-9. Jehova chungchângah eng ang dâwt thute nge sawi a nih a, chu chu engtin nge kan chhân lêt?

⁸ Diabola dâwt sawina. Setana chuan Joba leh Jehova chhiahhlawh rinawm dang zawng zawngte chu mahni hmasialna avâng chauhva a rawngbâwlah a puh a. (Job. 1:8-11; 2:3-5) Chutiang chuan vawiin nî thlengin a la puh reng a ni. (Thup. 12:10) Keini pawh fiahnate chhel taka tuarin leh Jehova kan hmangaih avânga a chunga rinawm tlatin Setana chu daw thei a nihzia kan lantîr thei a ni. Joba angin, fiahnate chhel taka kan tawrh chuan malsâwm kan ni ang.—Jak. 5:11.

⁹ Setana chuan sakhaw dik lo hruaitute hmangin Jehova chu nunrâwng tak leh mihringte hrehawm tawrhnaa mawhphurtu ber niin a sawi a. Mi ṭhenkhat chuan naupangte an thih hian Pathianin vântirhkohte a mamawh belh avânga a lâksak niin an sawi hial  bawk. Pathian sawi chhiatna a va ni tak êm! Mahse, keini chuan Jehova chu hmangaihna nei tak Pa a ni tih kan hria a. Natna khirh tak kan tawrh emaw, thihnaa hmangaih tak kan chân emaw hian, Pathian kan mawhpuh ngai lo. Chu aiin, engtik nîah emaw chuan natnate a tidamin, mitthite a kaihtho leh ang tih kan ring tlat zâwk a ni. A hre duhtu apiangte hnênah Jehova chu hmangaihna Pathian a ni tih kan hrilh thei a. Chu chuan amah sawichhetute hnênah chhânna ṭha tak a pêktîr a ni.—Thuf. 27:11.

10. Sâm 22:23, 24-na chuan Jehova chungchâng eng nge a târ lan?

¹⁰ A chhiahhlawh duh takte hrehawm tawrhna. Jehova chu khawngaihnaa khat Pathian a ni a. Ani chuan tihduhdahna te, natna te, leh ṭhat famkim lohnate kan tawrh avânga kan ṭap a hmuh hian pawi a tih hle a. (Sâm 22:23, 24 chhiar rawh.) Kan natnate chu min tawrhpuiin tihtâwp a duh a, a titâwp ngei bawk ang. (Exodus 3:7, 8; Isaia 63:9 nên khaikhin rawh.) Chumi nîah chuan, “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”—Thup. 21:4.

11. Jehova chuan a chhiahhlawh rinawm thi tawhte chu engtin nge a ngaih?

¹¹ A ṭhian thi tawhte nêna inṭhenna. Engtin nge Jehova chuan a mi rinawm thi tawh a hmei a pate chu a ngaih? Anni chu hmuh leh a châk hle! (Job. 14:15) A ṭhian Abrahama a ngaih dân tûrzia chu i mitthla thei em? (Jak. 2:23) A nih loh leh, ‘inhmatawna’ a biak Mosia biak leh a châk dân chu i ngaihruat thei em? (Ex. 33:11) Chu bâkah, Davida leh fakna hla phuahtu dangte’n fakna hla mawi tak an sak chu ngaithlâk a va châk dâwn êm! (Sâm 104:33) Chûng Pathian ṭhiante chu thihnaah muhîl tawh mah se, ani chuan  a thehngilh lo. (Is. 49:15) An mizia engkim a hre vek a. Bible chuan, “Ani ngaih chuan mi zawng zawng an nung vek,” tiin a sawi a ni. (Lk. 20:38) Engtik nîah emaw chuan, anni chu a kaitho leh ang a, tih tak zeta an ṭawngṭainate chu ngahthlâksak lehin, an biakna chu a pawmsak ang. Thihnaa hmangaih tak i chân a nih chuan chûng thute chuan hnêm chein, thlamuan che rawh se.

12. Suahsualnaa khat hêng ni hnuhnûngahte hian engin nge Jehova rilru tihrehawm lehzual?

¹² Mi suaksualte’n mi dang an hnehchhiahna. Eden huana helna a inṭan khân, Jehova chuan chu dinhmun chu siam ṭhat a nih hma chuan a chhe zual zêl ang tih a hria a. Ani chuan tûn lai khawvêla suahsualna te, rorêl dik lohna te, leh tharum thawhnate hi a hua a ni. Fahrah leh hmeithai ang chi mi chak lo leh mahni invênghim thei lote chu a khawngaih lehzual ṭhîn a. (Zak. 7:9, 10) Chu bâkah, a chhiahhlawh rinawmte hnehchhiah an nih a, tân ina khung an nih hian hrehawm a ti lehzual a ni. Chuvângin, amah anga chhelna lantîrtu zawng zawngte chu a hmangaih tih ring tlat ang che.

13. Engtin nge mihring chhûngkua chu Pathian mithmuha a tlâk chhiat a, Pathianin chumi chungchângah eng nge a tih ang?

¹³ Mihring chhûngkaw tlâk chhiatna. Setana chuan Pathian anpuia siam mihringte chu tlâk chhiattîr a duh a. Pathianin Nova hun laia “mihring sualzia chu nasa tak a ni” tih a hmuh khân, “leiah hian mihring a lo siam tâk avângin LALPA chu a inchhîr a, rilru nat nân a hman phah ta a.” (Gen. 6:5, 6, 11) Chumi hun aṭangin khawvêl dinhmun chuan ṭhat lam a pan em? Pan lo! Mipat hmeichhiatna hman khawlohna leh neih inang inneihna pawh telin, nungchang bawlhhlawhna tinrêng a hluarzia a hmuh chuan Diabola chu a va lâwm dâwn tak êm! (Eph. 4:18, 19) Pathian betu dik takte thil sual a tihtîr theih hian a lâwm lehzual a. Jehova dawhtheihna a tâwp hunah, ani chuan nungchang bawlhhlawhna zawng zawng a huatzia a târ lang ang.

14. Mihringte’n Pathian siam leilung hi engtin nge an tih?

¹⁴ A thil siamte tihchhiatna. Mite chu ‘mi dang chunga pawi khawpa an intilal’ mai ni lovin, anni chuan mihringte hnêna leilung leh a thil siam nungchate ṭha taka enkawl tûra Pathian thupêk chu an ngaihsak lo va. (Thur. 8:9; Gen. 1:28) Mi thiam ṭhenkhat chuan mihringte thiltihin nakin kum rei lo têah thil nung chi hrang hrang maktaduai khat dang a timang thei tih an vaukhân a ni. Leilung hi tihchhiatin a awm mêk nia an sawi pawh hi a mak lo ve! Mahse, Jehova’n “lei tichhetute tihchhiat ve thung hun” leh leilung pum pui paradis-a a chantîr leh hun tûr a tiam chu thil lâwmawm tak a ni.—Thup. 11:18; Is. 35:1.

15-16. Engin nge Jehova ruala chhel taka tuar tûra min chêttîr ang? Entîrna pe rawh.

¹⁵ Kan Pa vâna mi’n kum sâng tam tak chhûng chhel taka a lo tawrh tawh buaina zawng zawngte hi han ngaihtuah teh. (“ Jehova’n Chhel Taka A Tawrhte,” tih bâwm chu en rawh.) Ani chuan he khawvêl suaksual tak hi eng hunah pawh a titâwp thei a. Mahse, a dawhtheihna chu kan tân malsâwmnaah a lo chang a! Hetiang hian kan ngaihtuah thei a ni. Nupa tuak khat hnênah an fa lo piang tûr chu tisa lamah harsatna nasa tak a neih avângin, nun nuam a hmang ngai dâwn lo vang a, rei pawh a dam lo vang tia hrilh hriat an ni angah han mitthla teh. An tân harsa hle dâwn mah se, chu nupa tuak chuan an fa a lo pian chuan hlim takin an lo lâwm a. An fa an hmangaihna chuan harsatna eng pawh chhel taka tuar a, nun ṭha ber neihtîr tûrin a chêttîr a ni.

¹⁶ Chutiang bawkin, khawvêla lo piang  Adama leh Evi thlah zawng zawngte chu an ṭha famkim lo vek a. Chuti chung pawhin, Pathianin min hmangaihin, min ngaihsak a ni. (1 Joh. 4:19) Tehkhin thua nu leh pate ang lo takin, Pathian Jehova chuan chumi chungchângah thil eng emaw a ti thei a ni. Ani chuan a thil siam mihringte tihrehawmtu natna zawng zawng a tihtâwp hun tûr chu a ruat tawh a. (Mt. 24:36) Pathian min hmangaihna chuan a ruala a ṭûl chhûng zawng chhel taka tuar tûrin min chêttîr tûr a ni lâwm ni?

17. Engtin nge 1 Petera 2:21-24-naa Isua chungchâng târ lante chuan chhelna nei zawm zêl tûra min tihchak?

¹⁷ Jehova chuan chhelna lantîrna kawngah entawn tûr ṭha famkim a siam a. Isua chuan a Pa chhelna chu a entawn a. Leia a awm lai khân, hnialkalhna leh tihmualphona bâkah, kan tân nghaisakna ban pawh a tuar a. (1 Petera 2:21-24 chhiar rawh.) Chhelna lantîrna kawnga a Pa entawn tûr siam chuan ani chu chhel tûrin a tichak tih a chiang hle. Chu chuan keini pawh min tichak thei a ni.

18. Engtin nge 2 Petera 3:9-na chuan Jehova dawhtheihna avânga thilthlengte hre thiam tûra min ṭanpui?

¹⁸ Petera thawn hnih 3:9 chhiar rawh. Jehova chuan he khawvêl suaksual tak tihtâwp nâna hun ṭha ber chu a hria a. A dawhtheihna avângin amah chibai bûktu mi maktaduai tam takte chu lâk khâwm mêk an ni. Jehova’n anni chu lo piang a, amah hmangaih dân zir a, a hnêna inpumpêk thei tûra hun rei tak chhûng chhelna a lantîr avângin an lâwm vek a ni. Jehova’n a tâwp thlenga chhelna lantîrtu mi maktaduai tam takte lâwm taka mal a sâwm hunah chuan chhelna lantîr tûra a duhthlânna siam chu a dikzia a lang tawh ang!

19. Eng tih nge kan tum tlat ang a, eng lâwmman nge kan dawn ang?

¹⁹ Jehova hnên aṭangin hlim taka chhelna lantîr dân kan hre tawh a. Setana chuan rilru natnate leh hrehawm tawrhna zawng zawng a awmtîr chung pawhin, Jehova chu “Pathian hlim” a ni reng a. (1 Tim. 1:11, NW) Jehova’n a hming a tihthianghlim hun tûr te, a lalchungnunna thiam a chantîr hun tûr te, suahsualna zawng zawng a tihtâwp hun tûr te, leh tûna kan buaina a tihtâwp hun tûrte dawhthei taka kan nghah lai hian keini pawhin hlimna kan nei reng thei a ni. Kan Pa vâna mi pawhin chhelna a lantîr tih hriain, thlamuanna nei a, chhelna lantîr zêl i tum ṭheuh ang u. Chutianga kan tih chuan, “Thlêmna tuar hrâm hrâmtu chu a eng a thâwl e; fiaha a awm hnuin nunna lallukhum, Lalpan amah hmangaihtute hnêna a tiam chu a hmu dâwn si a,” tih thu hi kan za atân a thleng dik ang.—Jak. 1:12.