1, 2. Jósʼin basenkaoná jmeni xi tso Isaías 65:16, 17 nga tosi tonda chókjoajinná je kjoa xi bitjatojiaan.

JE KJOAJTÍNTSE xi jan nichxin kisʼejna nga nó 2017 “Ali nixa̱njinlai” tsakʼin. Yaa tsakʼinyaná jméni xi sʼiaan nga chókjoajinná je kjoa xi bitjatojiaan. Jeño nó jaʼato nga kisʼejna kjoajtíntse jebi kʼoa tojo tíchókjoajinná je kjoa xi tibitjatojiaan saʼnda ndʼaibi.

² Jmé kjoa xi tibitjatojiaan ndʼaibi. Tsakui nichxin je xíngiaa kʼoa tsa jngo miyoná kinichaa, tsa táo chʼin tíbʼetʼaná, tsa jekjimajchíngaa, tsa kjoaxkón jaʼainená, tsa kjoañʼai tichjaʼá xi totʼatsʼe nga tsʼen je chjota, tsa chjota fitjenngikená kʼoa tsa totʼatsʼeje̱ COVID-19. Ngatsʼiñá nga mená katatjoxin ngayeje kjoa jebi. Kuicho nichxin nga tsín tikui si̱kjaʼaitsjenñá kʼoa tsín tikʼia kʼoakoa̱nni (tʼexkiai Isaías 65:16, 17). *

3. Jméni xi tjínnená sʼiaan ndʼaibi, kʼoa ánni.

³ Ñʼai kjimachon nichxin xi tiyoaa ndʼaibi kʼoa tsakui nichxin ngisa tiñʼai koa̱nchonngáni nichxin xi sʼa nroa (Mat. 24:21). Kuinga machjénsíni nga tosi tonda katakaná. Je Jesús kʼoakitso ánni machjénsíni nga kʼoasʼiaan. I kitso: “Xi totʼatsʼe kjoatsejtano si̱kinjao kjoabijnachonno” (Luc. 21:19). Je xi koasenkaoná kuinga si̱kjaʼaitsjenjiaan jméni xi tjíobinyakao xi kʼoati kui kjoa tjíofaʼatojin.

4. Ánni kʼoabixónsíñá nga je Jeobá xi ngisasa nda choa̱ bʼéjnaná nga tíkale.

⁴ Jé Jeobá xi ngisasa nda choa̱ bʼéjnaná nga tíkale. Kuinga kʼoabixónñá nga̱ nʼio tse kjoa tjín i̱ Sonʼnde nga je Na̱i kjinentsja  jmeni xi chon. Koaanle ngotjo kjoaʼaxinni je Jeobá xi chʼaotjín, tonga tíkoyakaola saʼnda nga kuicho nichxin xi tíjnachoa̱le (Rom. 9:22). Nga kjesa faʼaijin nichxin jebi, je Jeobá tíkale. Ñajanla koya kataʼyaa jmeni xi tíkale je Jeobá.

5. Jósʼin tíchʼasje je jaʼaínle Niná, kʼoa jósʼe tokuin xi tʼatsʼe jebi.

⁵ Tíkale je Jeobá kʼianga chʼaosʼin tíchʼasje je jaʼaínle. Je Jeobá tsjoake je jaʼaínle kʼoa kui xi mele nga kataʼyaxkón (Is. 42:8). Tonga jela 6,000 nó tjínle nga tsín ndasʼin tíbʼaxki̱ je jaʼaínle Niná (Sal. 74:10, 18, 23). Yaa kinroatsʼiani ya ʼndenaxóle Edén kʼianga kʼoakitso je Na̱i (“xi énndiso báne” sʼin tsoyanile) nga tsín mele Niná nga tsjoa sa̱tío kon je Adán kao Eva (Gén. 3:1-5). Saʼnda nga kʼia, kui énndiso tísʼene je Jeobá nga kʼoatíʼmile nga tsín títsjoále chjota jmekjoanni xi machjénle. Je Jesús kui koankjáojinle nga chʼaosʼin tsʼaxki̱ je jaʼaínle Nʼaile. Kuinga kʼoakitsonile je chjotatjenngile nga i̱ katatso nga katabʼétsʼoa: “Nʼainajin xi tijnai ngʼajmi, kataʼyaxkón jaʼaínli” (Mat. 6:9).

6. Ánni nga kʼoasikji tse nichxin tísíkʼatoni je Jeobá nga jchale nga toje xi tiʼndele batéxoma ya ngʼajmi kao i̱ Sonʼnde.

⁶ Nkjín mani xi batiochjoale Jeobá nga toje xi tiʼndele batéxoma. Tojé Jeobá xi tiʼndele koatexoma ya ngʼajmi kao i̱ Sonʼnde, kʼoa tojé xi nʼio ndasʼin batéxoma (Apoc. 4:11). Tonga je Na̱i kui xi mele nga kʼoasʼin katamakjainle je ánkje kao chjota nga tsín tiʼndele Niná nga je koatexomaná. Tonga kjoa jebi alikui tojngo jao nichxin sʼe̱ndajinni. Nga nʼio chjine je Niná títsjoáʼndele chjota nga je katabatéxomale yaole, kʼoa jokjitse tjíobatio chjota tíʼyale nga tsín ndasʼin tíbichómani nga tsín je Niná batéxomaná (Jer. 10:23). Nga tsejta kjima Niná kuicho nichxin nga sʼe̱ndajin kjoa jebi. Jchale nga toje xi nʼio ndasʼin batéxoma, kʼoa tojé Chjotaxále xi koa̱nle sindachon i̱ Sonʼnde nga ndasʼin kuiyoaa kʼoa nga tsjoa sa̱tío tokoán.

7. ʼYáni xi yátsʼi̱n tjíobinyále je Jeobá, kʼoa jméni xi koa̱ntʼain je xi kʼoasʼín.

⁷ Je xi yátsʼi̱n tsakinyále Niná. Je Jeobá ñaki ndasʼin kisinda je ánkje kao chjota. Tonga jngo ánkje xi xíjin koan, xi Satanás sʼin tsakʼaijaʼaínle (“xi bʼejnachjoa” sʼin tsoyanile) kʼoati tsakʼanachale je Adán kao Eva nga kʼoati xíjin katama tsanda je, nga tsín tije Jeobá katasítjosonnile. Kʼoati nkjínsa ánkje kao chjota xi yátsʼi̱n tsakinyále Niná (Jud. 6). Nga jeki nichxin kʼoati nkjín chjota israelita xi xíjin koan kʼoa xi niná ndiso tsakʼétsʼoale (Is. 63:8, 10). Nga kʼoakisʼin alikui nda kisʼe kon je Jeobá. Tonga tojo tíkale saʼnda ndʼaibi kʼoa tosi tonda ska̱le saʼnda nga kuicho nichxin nga sikjeson je xi xíjin. Kʼianga kʼoakoa̱n, nʼiojin nda sa̱tío kon je choʼndale xi kixi tjíofitʼale, xi kʼoati tjíokale nga chʼao chon sonʼnde.

8, 9. Jmé énndiso xi sʼene je Jeobá, kʼoa jósʼin koakoá ñá nga tsín kʼoatjín jme xi ʼmile.

⁸ Je énndiso xi tso Na̱i. Jmeni xi kitsole Na̱i je Job, joxi kuini xi kitso nga totjín xi sʼínnile ngatsʼi xi Niná síxále (Job 1:8-11; 2:3-5). Je Na̱i tojo kui énndiso tísíchjén saʼnda ndʼaibi (Apoc. 12:10). Tsakui nga tsjoachaa je Jeobá nga kixi mangíntʼanilee kʼoa tsa chókjoajinná je kjoa xi kuitjátojiaan, kʼoasʼin koakoñá nga to énndiso jmeni xi tso je Na̱i. Kʼoa je Jeobá kʼoati sichikontʼainná tojo kisikao je Job (Sant. 5:11).

⁹ Je Na̱i jé tísíchjén xi nyatítjonle religión xi to énndiso bakóya nga kʼoatso nga tsʼen je Jeobá kʼoa nga je xosʼín nga kʼoasikji kjoañʼai tjín. Kʼianga jngo ʼndílee mʼe, kʼoatso kʼa chjota nga je Niná xi  kʼoasʼin koanmele nga kʼien, nga̱ kʼoatso nga ijngo ánkje machjénle Niná ya ngʼajmi. Tonga ʼyañá nga tsín kʼoatjín jmeni xi ʼmile je Jeobá. Kʼianga táo chʼin katʼaná kʼoa tsa jngo xíngiaa nichaa alikui je Niná basenlee, tosaa kʼoasʼin makjainná nga kjoaʼaí nichxin nga kjoaʼaxin Niná ngayeje kjoañʼai xi chjaʼá. Koaan kʼoéyanajmílee je chjota nga nʼio tsjoakená je Jeobá. Tsa kʼoasʼiaan, je Jeobá koaan kʼoekjaoʼakao je xi besin (Prov. 27:11).

10. Jmé xi bakóyaná Salmo 22:23, 24 xi tʼatsʼe Jeobá.

¹⁰ Kjoañʼai xi faʼá choʼndale Niná. Je Jeobá nʼio tjínle kjoamatokon, kuinga aon manile nga kjoañʼai chjaʼá, jolani kʼianga chjota fitjenngikená, tsa chʼin katʼaná kʼoa tsa tsín nda sʼe tokoán jñani tsín nda nʼia (tʼexkiai Salmo 22:23, 24). * Majinle josatío tokoán kʼoa kʼoatso nga kjoaʼaí nichxin nga tsín tikjoañʼai chja̱ʼañá (tingósonkoai Éxodo 3:7, 8; Isaías 63:9). Chaan kuicho nichxin nga kuitjoson én jebi: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” (Apoc. 21:4).

11. Jósʼe kon Jeobá kʼianga síkjaʼaitsjen tʼatsʼe choʼndale xi jekʼien xi kixi kitʼale.

¹¹ Nga biya je miyole. Jósʼe kon Jeobá nga síkjaʼaitsjen tʼatsʼe choʼndale xi jekʼien xi kixi kitʼale. Je Jeobá mele sikjaʼáyanile (Job 14:15). Si̱kjaʼaitsjenla je Abrahán, je Jeobá jejin mele skoe̱ ijngokʼani je miyole (Sant. 2:23). Kʼoa jejin mele kjoakaonajmí ijngokʼa je Moisés, xi ñaki nga̱ʼa nga̱ʼa tsakjákao (Éx. 33:11). Kʼoajinti mele nga  kjuinrʼoé ijngokʼale je David kao salmista xi ngikʼa nga séle (Sal. 104:33). Ngatsʼi chjota jebi miyole Niná koan, kʼoa ningalani jekʼien, je Jeobá alikui tíchajinle xi tʼatsʼe (Is. 49:15). Je Jeobá nʼio nda faʼaitsjenle jokoankjoan chjota jebi, nga̱ xi kao je joxi tjíokonni (Luc. 20:38). Je Jeobá sikjaʼáyanile kʼoa nʼio tsjoa sʼe̱ kon nga kjuinrʼoéle kʼianga kʼoetsʼoale. Tsa jekinichaa xíngiaa, sínʼio tokoán je én jebi.

12. Jméni xi ba bʼé kon je Jeobá nichxin xi tiyoaa ndʼaibi nga kʼoasikji kjoatsʼen tjín.

¹² Nga tsʼen je chjota totaon be xi kjaʼaí. Kʼianga tsakajngijée je Adán kao Eva ya ʼndenaxóle Edén, je Jeobá koanjinle nga sa chʼao sa chʼao koa̱nchon saʼnda nga sʼe̱ndajin kjoa jebi. Je Jeobá nʼio jtike nga kjoatsʼen tjín kʼoa nga tsín kixi jme xi matʼain kʼa je choʼndale nichxin xi tiyoaa ndʼaibi. Je Jeobá makjáojinle ngantsjai tʼatsʼe xi tsín ʼya xi sítoánntjai, jolani yánchjínkʼan kao xi jchʼa̱n (Zac. 7:9, 10). Kʼoa ngisaa aon male nga totaon ʼya kʼoa nga ndoyá nikatíoʼya je choʼndale xi kixi fitʼale. Kʼianga kaná nga kjoa bitjatojiaan alikui jao kʼoé tokoán nga nʼio tsjoakená je Jeobá.

13. Jótjíosʼín chjota ndʼaibi xi tsín sasénle Jeobá, kʼoa jósʼin kʼoendajin kjoa jebi.

¹³ Sa chʼao sa chʼao tjíosʼín ndʼaibi je chjota nga tjíosíchajngi. Je Niná kʼoasʼin kisindaná nga koa̱n chjénngilee jokjoan, tonga je Na̱i kui xi mele nga kui xi chʼaotjín kʼoasʼin je chjota. Kʼianga nichxinle Noé, “je Jeobá tsabee nga sa tsʼen sa tsʼen koan je chjota”, kʼoa “aon koanle nga kʼoasʼin chjota kisinda i̱ sonʼnde; nʼio ba koanle ni̱ma̱le” (Gén. 6:5, 6, nota, 11). Saʼnda nga kʼia, sa chʼao sa chʼao kjimachon sonʼnde. Nʼio tsjoa male je Na̱i nga tsín tichʼaosʼin beni chjota kʼianga síchajngi. Alikui chʼaotjín male tsa jngo xʼin jngo chjoón xi kʼoasʼin kʼoa tsa tixʼin kʼoa tiyánchjín xínkjín kjoáyokaoni (Efes. 4:18, 19). Kʼoa je Na̱i nʼio tsjoa male kʼianga jngo choʼndale Jeobá bajngijée. Tonga kʼianga kuicho nichxin, je Jeobá koako nga nʼio jtike je kjoajndí kʼoa sikjeson je xi kui xá sʼín tsa tsín sikʼantjaiya yaole.

14. Jósʼin tjíosíkitsón chjota je Sonʼnde kʼoa jósʼin tjíosíkiʼaon je cho̱.

¹⁴ Je chjota tjíosíkitsón je Sonʼnde. Je chjota tijé tjíosíkiʼaonni xínkjín nga tije tjíobatéxomanile yaole, alikui tjíosíkuinda je Sonʼnde kao je cho̱ tojosʼin koanmele tsakai je Jeobá (Gén. 1:28; Ecl. 8:9). Tjínkʼa je chjotachjine xi kʼoatso nga tongichoasa nó chale kʼianga jngo millón cho̱ kao yá xi kjaʼaí kjaʼaínile jchangi. Kuinga nʼio makjáojin kʼanile xi tʼatsʼe kjoa jebi. Bʼailee kjoanda je Jeobá nga kʼoatso nga chan kjoaʼaí nichxin nga sikjeson ngatsʼi “xi sikitsón sonʼnde” kʼoa nga ʼndenaxó sikao (Apoc. 11:18; Is. 35:1).

15, 16. Jméni xi koasenkaoná nga kʼoati tsejta koaan joni Jeobá. Jngo choa̱ tʼejnai.

¹⁵ Si̱kjaʼaitsjenjinla jótjín kjoa tíkale je Jeobá jokji tífaʼato nó (chótsenlai je recuadro “ Xi tíkale Jeobá”). Je Jeobá ngotjo koa̱nnile kjoaʼaxin xi chʼaotjín i̱ Sonʼnde. Tonga tsejta kjima. Si̱kjaʼaitsjenla choa̱ jebi: tsa je xi xijchá ma kʼoakʼuínle nga tsín nda jtsín je ʼndíle, nga chʼin sʼe̱le kʼoa nga tochoatse kʼoéjnakon, ningalani be xijchá jebi nga tse kjoa kjoaʼatojin, nʼio tsjoa satío kon nga tsin je ʼndíleele. Nga tsjoake je ʼndíle chókjoajinle tojme kjoa xi faʼatojin nga̱ kui xi mele nga nda kʼoéjna je ʼndíle.

¹⁶ Nga ya Adán kitjenñá chjotajée maa ngatsʼiaa. Ninga kʼoalani, je Jeobá nʼio tsjoakená kʼoa síkuindaná (1 Juan 4:19). Tonga je Jeobá alikui ya mangóson je xijchá xi jenása kanikʼaxkiaa nga kanikʼéjnaa  je choa̱, je Jeobá koaanle koasenkaoná xi je. Jetíjnachoa̱le nichxin nga kjoaʼaxin jmeni xi kjoañʼai síkjaʼá je xtile (Mat. 24:36). Nga tsjoakená je Jeobá chókjoajinná je kjoa xi bitjatojiaan tojotjín tse kjoaʼato.

17. Jósʼin basenkaoná jmeni xi tso Hebreos 12:2, 3 xi tʼatsʼe Jesús.

¹⁷ Jé Jeobá xi ngisa tíkale. Kʼoa je Jesús kʼoati kiskale nga̱ yaa kiskenngile je Jeobá. Kʼianga tsakʼejna i̱ Sonʼnde kiskale kʼianga totsakʼin tomanile, nga totaon tsaʼya kʼoa nga yá kisʼetʼa (tʼexkiai Hebreos 12:2, 3). * Nga kale je Nʼaile kʼoati kui xi tsakasenkao je Jesús nga kiskale jme xi koantʼain. Kʼoa je choa̱le kʼoati kui xi koasenkaoná tsanda ñá nga ska̱ná.

18. Jósʼin tíbichómani nga tsejta kjima je Jeobá tojo tso 2 Pedro 3:9.

¹⁸ (Tʼexkiai 2 Pedro 3:9). * Jé Jeobá xi ngisa nda be kʼiáni kuicho choa̱le nga tjóxin xi chʼaotjín i̱ Sonʼnde. Nga tsejta kjima Jeobá, ndʼaibi millón mani chjota xi je tjíosíxále. Tsjoále kjoanda je Jeobá nga tsejta kjima nga tjíotsjoáʼndele nga tjíotsin, nga tsjoake kjima Niná kʼoa nga je tjíotsjoátʼale yaole. Kʼianga tjoéná kjoanda xi millón mañá nga chókjoajinná saʼnda nga kjoetʼa jmeni xi chon sonʼnde, jchañá nga nʼio nda kisʼin je Jeobá nga kiskale.

19. Jméni xi tiyondaa nga kʼoasʼiaan, kʼoa jmé kjoanda xi so̱koná.

¹⁹ Je choa̱le Jeobá basenkaoná nga tsjoa sʼe tokoán ninga tse kjoa bitjatojiaan, nga̱ je Jeobá tojo tsjoa tjín kon ninga kʼoasikji tse kjoa tíbajngi je Na̱i (1 Tim. 1:11). Kʼoati koa̱n tsjoa kʼoé tokoán nga tsejta kjimaa nga tichoyalee je nichxin nga kʼoasjetsje je jaʼaínle Jeobá, nga koako nga toje xi bakinle batéxoma, nga kjoaʼaxin ngayeje xi chʼaotjín kʼoa nga tsín tijme kjoa sʼe̱niná. Ñaki kʼoakʼoé tokoán nga chókjoaná ninga kjoa kuitjátojiaan kʼoa kui kuenta sʼiaan nga kʼoati tíkale je Jeobá. Tsa kʼoasʼiaan, kuitjoson je én jebi: “Jó tondale chjota xi síkjaínle kjoañʼai. Kʼia nga je kichotʼale, kuinjele kjoabijnachon xi joni jngo korona, xi Niná kitsjoa tsʼoa nga tsjoále je xi tsjoake nga je” (Sant. 1:12).