1-2. Iehova ena gwauhamata Isaia 65:16, 17 ese ita be ede e hagoadada tomamu baita haheauka totona?

LAḠANI 2017 rijinol hebouna ena sinado na “Basita Hesiku!” Program ese e hahedinaraia edena dalai eda hekwakwanai baita haheaukalaidia. Laḡani 4 vada ela, ita na doini hari ina negai hekwakwanai ta haheaukalaimu.

² Oi be dahaka hekwakwanai o davarimu? Turamu ta eiava emu ruma bese ai ta e mase, a? Eiava oi be gorere badana ta o haheaukalaiamu, a? Eiava laḡanimu e bada e laomu dainai emu ai mauri na e aukamu? Eiava emu gabu ai disasta bona daḡedaḡe e varamu, a? Eiava COVID-19 pandemic dainai e varamu hekwakanaidia o haheaukalaimu, a? Ita na unu hekwakwanai bae ore negana ta nariamu. Una negai unu hekwakwanai iboudiai na baita lalodia boiomu.​—Isaia 65:16, 17 ba duahi.

3. Namona be hari dahaka baita kara, bona dahaka dainai?

³ Hari ina nega oromana ai mauri na auka bona vaira negai hekwakwanai badadia baita davarimu. (Mat. 24:21) Una dainai haheauka karana na baita goadalaia. Dahaka dainai? Badina Iesu na eto: “Baine haheauka ela bona dokona tauna na do baine mauri.” (Mat. 24:13) Haida danu ita ta davarimu hahetohodia e davarimu, to ta itadiamu e haheaukalaimu neganai una ese ita na e hagoadadamu baita haheauka.

4. Dahaka dainai baita gwau diba Iehova na haheauka karanai haheitalai namona?

⁴ Daika be haheauka karanai haheitalai hereadaena? Iehova Dirava. Edena dalai? Ina tanobada na Diabolo ena siahu henunai dainai hekwakwanai amo e honu. Ena be Iehova na mai ena siahu unu hekwakwanai iboudiai baine haoredia, to ia na vaira negai unu baine kara toma negana maorona e nariamu. (Roma 9:22) Una nega e nariamu lalonai ia na e haheaukamu. Mani Iehova ese e haheaukalaimu gaudia 9 aita herevalai.

5. Iehova ladana be ede e hadikaia toma, bona oi ese una be ede o laloa tomamu?

⁵ Iehova na e haheaukamu ena be ladana na haida ese e hadikaiamu. Iehova na ladana na e laloa badamu, bona ia na e uramu taunimanima iboudiai ese bae matauraia. (Isa. 42:8) To laḡani 6,000 lalodiai, una lada namona na ta ese e hadikaia. (Sal. 74:10, 18, 23) Una na Eden imeana ai e hematama, unuseniai Diabolo (anina na “Lada Ihadikana Tauna”) na e gwa Dirava na se uramu Adam bona Heva bae hamoaledia ḡauna ta baine henidia. (Gen. 3:1-5) Una nega amo ema bona hari, Satana na e gwaumu Iehova ese taunimanima bae hamoaledia ḡauna na se henidiamu. Iesu na se ura una koikoi herevana ese Tamana ladana baine hadikaia dainai, ena hahediba e hadibadia ini bae ḡuriḡuri toma: “Tamamai e, guba ai o nohomu, oi ladamu baia hahelaḡaia.”​—Mat. 6:9.

6. Dahaka dainai Iehova na nega e heni ena lohia siahuna e hepapahuahulaia karana baine hamaoromaoroa?

⁶ Momo ese Dirava bona ena lohia siahuna na e inai heniamu. Iehova na mai ena maoro guba bona tanobada baine lohiadia, bona ena lohia dalana na hereadae. (Apok. 4:11) To Diabolo na e hekwarahimu aneru bona taunimanima baine koidia unu amo bae laloa Dirava na asi ena maoro baine lohia. Iehova na nega e heni ena lohia siahuna e hepapahuahulaia karana baine hamaoromaoroa bona baine hahedinaraia ia baine lohia na maoro. Danu, Dirava na nega e heni unu amo taunimanima na bae itaia bema Ihavaradia Tauna basie kamonai heniamu, sibodia na basie helohia dibamu. (Ier. 10:23) Dirava ena haheauka karana dainai una hekwakwanai na be hamaoromaoroamu. Bona taunimanima iboudiai na be dibamu Dirava ese guba bona tanobada baine lohiadia na maoro. Iena Basileia sibona ese tanobadai maino bona noho namo be havaraiamu.

7. Daidia ese Iehova e gwau-edeede henia, bona idia ediai be dahaka be varamu?

⁷ Ia natuna haida ese ia e gwau-edeede henia. Iehova ese ena aneru bona taunimanima e karadia neganai, idia na ḡoevadae. To Satana (anina na, “Gwau-Edeede Tauna”) ese Iehova e gwau-edeede henia, bona ḡoevadae taudia Adam bona Heva e hakaudia kerere dainai, idia ese danu Iehova e gwau-edeede henia. Bena aneru bona taunimanima ma haida danu Dirava e gwau-edeede henia. (Iuda 6) Gabeai, Dirava ese e abia hidi besena, Israel taudia, ese Dirava e dadaraia bona dirava koikoidia e tomadiho henidiava. (Isa. 63:8, 10) Iehova na e lalohisihisi. To, ia na e haheauka, bona baine haheauka ela bona e abia hidi negana ai gwau-edeede taudia iboudiai baine haoredia. Una ese Iehova bona ia e badinaiamu taudia be hamoalediamu. Badina hari ina negai e davarimu hekwakwanaidia na basie haheaukalaidia loumu.

8-9. Diabolo ese Iehova be ede e herevalaia koikoi toma, bona ita be dahaka baita kara?

⁸ Diabolo ena koikoi herevadia. Satana ese Iobu, Iehova e badinaia tauna e hamaoroa herevana amo e hahedinaraia, Iehova e badinaiamu taudia iboudiai na sibodia edia namo dainai Dirava e tomadiho heniamu. (Iobu 1:8-11; 2:3-5) Ema bona hari Diabolo na doini taunimanima e uduguiraidiamu. (Apok. 12:10) Satana ena hereva baita hakoikoia totona ta davarimu hahetohodia na baita haheaukalai, bona lalokau dainai Iehova baita badinaia. Iobu heḡereḡerena, eda haheauka karana dainai Iehova ese be hanamodamu.​—Iak. 5:11.

⁹ Satana ese tomadiho koikoi igunalaina taudia e ḡaukaralaidiamu e tomu Iehova na se hebogahisimu bona taunimanima edia hisihisi e havaramu tauna. Maraḡidia e masemu neganai haida na e gwaumu, Dirava na gubai aneru haida e uramu dainai eme abia. Una na Dirava asie matauraiamu  lalohadaina! Ita na mai dibada Iehova na tama lalokauna. Bema ta na e gorereamu eiava ta lalokau heniamu tauna ta e masemu, gwau na Dirava asita heniamu. To ta abia daemu nega ta ia ese gorere be haoreamu bona mase taudia na be hatoredia isi loumu. Kamonai taudia baita hadibadia Iehova na lalokau Diravana. Unu amo e gwau heniamu tauna baine haere henia.​—Her. 27:11.

10. Salamo 22:23, 24 ese Iehova be ede e herevalaia toma?

¹⁰ Ena hesiai taudia edia hisihisi. Iehova na hebogahisi Diravana. Una dainai ia na se uramu ma haida ese bae daḡedaḡe henida, bona baita gorere bona ita na dia ḡoevadae dainai eda kerere daidiai ta karamu kereredia daidiai baita lalohisihisi. (Salamo 22:23, 24 ba duahi.) Iehova ese eda hisihisi na e itamu bona e mamimu, una dainai e uramu baine haoredia. (Esodo 3:7, 8; Isaia 63:9 ba haheḡereḡere.) Nega ta be maimu “ia ese iruru-matadia iboudiai matadia amo baine dahu oho. Mase bona dara-doko bona taitai bona hisihisi bae ore.”​—Apok. 21:4.

11. Iehova ena hesiai taudia e masemu neganai iena hemami be ede bamona?

¹¹ Ia turana e masemu neganai. Abidadama hesiai tatau bona hahine e masemu neganai, Iehova ena hemami be ede bamona? Ia na e ura dikadikamu baine itadia lou! (Iobu 14:15) Mani a laloa, Iehova na e ura dikadikamu turana Abraham baine itaia lou. (Iak. 2:23) Eiava Mose, Iehova ida “e hevaira heheni bona e hereva heheni” tauna danu. (Eso. 33:11) Bona Iehova na e ura dikadikamu David bona salamo e torea taudia ma haida ese ia ihanamolaina anedia bae abi bona baine kamonai lou! (Sal. 104:33) Ena be Ia turana na vada e mase, to Iehova ese idia na basine lalodia boiomu. (Isa. 49:15) Ia ese edia kara iboudiai na e lalodia taomu. Iena roharoha ai idia iboudiai na dounu e maurimu. (Luka 20:38, NWT) Nega ta ia ese be hatoredia isi  loumu, edia ḡuriḡuri be kamonaimu bona edia tomadiho be abia daemu. Bema o lalokau heniamu tauna ta e mase, una lalohadai ese tauhalo baine henimu.

12. Ina nega dokodia lalonai dahaka ese Iehova lalona e hahisiamu?

¹² Kara dika taudia ese ma haida e hahisidiamu. Eden imeana ai gwau-edeede e vara neganai, Iehova na e diba tanobadai dika na be bada be laomu. Iehova ese hari ina negai tanobadai e varamu kara dika, kara gageva bona daḡedaḡe karadia na e inai henidiamu. Iehova na nega iboudiai sibodia basie hegima taudia na e bogadia hisimu, heḡereḡere vabu bona ihareha. (Sek. 7:9, 10) Iehova na e itaiamu bema ena hesiai taudia na inaidia ese e daḡedaḡe henidiamu bona e hadiburadiamu neganai, ia na e lalohisihisimu. Namona na ba diba ia ida o haheauka heboumu taumui iboumuiai na e lalokau henimuimu.

13. Taunimanima be dahaka kara dika rohorohodia e karamu Dirava vairanai, bona ia be dahaka be karamu?

¹³ Taunimanima edia matabodaḡa karadia na e badamu. Dirava ese taunimanima e karaia na iena kara bae tohotohoa, to Satana na e uramu idia ese kara dikadia bae kara. Noa ena negai, Dirava ese “taunimanima edia kara havara e itaia, vada e bada herea. . . . Bena Iehova e helalo, taunimanima e havaradia tanobada ai dainai; lalona e hisihisi danu.” (Gen. 6:5, 6, 11) Ina tanobada maurina be e namo e laomu eiava? Lasi. Satana na e moalemu badina e itaiamu taunimanima na matabodaḡa karadia e abi daemu, idia ediai tatau tatau bona hahine hahine bae mahuta hebou na asi ena kerere. (Efe. 4:18, 19) To Satana na e moale dikadikamu bema Iehova e tomadiho heniamu taudia ese kara dika badana ta e karaiamu. Iehova ese matabodaḡa karadia na e inai henidiamu, bona unu kara asie uramu bae dadarai taudia na kahirakahira be haorediamu.

14. Taunimanima se tanobada bona animal be ede e tomadiamu?

¹⁴ Dirava ese e kara ḡaudia na taunimanima ese e hadikamu. Taunimanima na dia bamodia e biagudiamu bona e hahisidiamu mo, to Iehova ese e kara ḡaudia tanobada bona animal na asie naridia namonamomu. (Koh. 8:9; Gen. 1:28) Saiens taudia haida na e gwaumu taunimanima ese e kara ḡaudia daidiai, kahirakahira animal bona tubutubu ḡaudia 1 milion mai kahana na laḡani haida lalodiai da be oremu. Una dainai ta lalopararamu dahaka dainai taunimanima na e lalohekwarahimu! Ta moalemu badina Iehova na e gwauhamata “tanobada ihadikana taudia” na kahirakahira be haorediamu bona tanobada ibounai paradaiso ai be halaoamu.​—Apok. 11:18; Isa. 35:1.

15-16. Dahaka ese baine hagoadada Iehova heḡereḡerena baita haheauka? Haheitalai ta ba gwauraia.

¹⁵ Laḡani tausen momo lalodiai Tamada gubai ese e haheaukalaimu ḡaudia mani a lalodia. (“ Iehova ese E Haheaukalaimu Ḡaudia” ena maua ba itaia.) Iehova baine ura neganai ina nega oromana dikana na baine haorea haraḡa diba. To iena haheauka karana ese ita na e duruda badamu! Mani ina haheitalai a laloa. Dokta ese tau ta mai adavana ida baine hamaorodia natudia na mai gorerena ida be varamu bona karukarunai be masemu. Ena be mai dibadia una natu be varamu neganai inarina na mai hekwarahina, to be varamu neganai idia na be moalemu. Bona natudia e lalokau heniamu dainai hekwakwanai idauidau be haheaukalaimu, bona be hekwarahimu natudia bae naria.

¹⁶ Una heḡereḡerena, Adam bona Heva besedia tanobadai e vara neganai idia na dia ḡoḡoevadae. To dounu, Iehova ese na e lalokau henidiamu bona e naridiamu.  (1 Ioa. 4:19) Haheitalai ai tame herevalaia bamona, Iehova ena kara na idau tama sina edia amo, Ia ese natuna edia hisihisi na be haorediamu. Ia ese taunimanima e davarimu hisihisidia iboudiai baine haoredia negana ta na vada e abia hidi. (Mat. 24:36) Iehova ena lalokau baita laloamu neganai, una ese be hagoadadamu baita haheaukamu.

17. Heberu 12:2, 3 heḡereḡerena, Iesu ena haheitalai ese ita be ede e hagoadada tomamu baita haheauka?

¹⁷ Haheauka karanai Iehova na haheitalai ḡoevadaena. Iesu ese Tamana ena haheauka karana na e tohotohoa ḡoevaḡoeva. Iesu tanobadai e nohova neganai, ia ese inaina edia hahedika herevadia, ia ihahemaraina karana bona hisihisi auna na ita daidai e haheaukalai. (Heberu 12:2, 3 ba duahi.) Momokani, Iehova ena haheauka karana ese Iesu na goada e henia baine haheauka. Una ese ita danu baine hagoadada.

18. Edena dalai 2 Petro 3:9 ese e durudamu Iehova ena haheauka karana dainai e ḡuḡuru ḡaudia baita lalopararalai?

¹⁸ Petro Iharuana 3:9 ba duahia. Iehova na mai dibana edena nega be nega maorona ina tanobada dikana baine haorea. Ena haheauka karana dainai taunimanima hutuma bada e haboudiamu ia bae tomadiho henia bona bae imodaia. Idia iboudiai na e moalemu badina Iehova e haheauka daudau lalonai idia e vara, Iehova ilalokau henina e dibaia, bona edia mauri na ienai e gwauhamatalaia. Taunimanima milion momo be haheaukamu ela bona dokona neganai una ese be hahedinaraiamu, Iehova na haheauka karanai abi hidi maorona e karaia.

19. Laloda baita hadai dahaka baita kara be namo, bona baita abiamu hahenamona be dahaka?

¹⁹ Iehova amo ta dibamu ede baita haheauka toma bona baita moale. Ena be Satana ese e havaramu hisihisidia na momo herea, to Iehova na doini “moale Diravana.” (1 Tim. 1:11, NWT) Ita danu mai moaleda ida ta haheaukamu lalonai, Iehova ta nariamu ladana baine hahelaḡaia, ena lohia siahuna baine abia isi, kara dika iboudiai baine haoredia bona hari ina negai ta davarimu hekwakwanaidia iboudiai baine haoredia. Ta dibamu Tamada gubai e haheaukamu karana ese ita na e hagoadadamu baita haheauka. Bema unu baita kara tomamu, ita ta ta edai ini hereva na be momokanimu: “Hedibaḡani ai e haheaukamu tauna be namo, badina be baine kwalimu negana ai ia ese mauri ena kwara-havava ḡauna baine abia, Dirava ese vada e gwauraia hamata ḡauna, ia bae ura henia taudia ese bae abia e tomamu.”​—Iak. 1:12.