1-2. Uulayo ci uwaya pali Ezaya 65:16, 17 uukatwazwa ukutwalilila ukuzizimizya?

UMUTWE wa ukongano wa citungu uwa mu 2017 uwatangi: Muteezya Ukutoovoka! wali u wakukomelezya. Ukongano uu watulangilile vino tungatwalilila ukuzizimizya intazi. Ipapita ni myaka 4 pano twakwatile ukongano uu, nupya tucili tukuzizimizya umu nsi ii iipisye.

² Iintazi ci zino mwakwatapo? Uzye mwafwilwapo lupwa winu nanti cuza winu? Uzye mukalwalilila? Uzye ivintu vikumutalila pa mulandu wakuti imukota? Uzye mukucuula pa mulandu na mazanzo aakaiponela, unkalwe, nanti ukuzunyiwa? Nanti uzye mukucuula pa mulandu nu ulwale wakwe COVID-19? Tukaloleela insita isuma lino iviipe vyonsi vii vilafumiziwapo nupya vitalatala vicitikepo!—Belengini Ezaya 65:16, 17.

3. I vyani vino tulinzile ukucita ndakai, nupya umulandu ci?

³ Ivintu umu umi vyatala sana, fwandi tulinzile ukutwalilila ukuzizimizya intazi na zyuze izili nu kwiza uku nkoleelo. (Mate. 24:21) Acino tulinzile ukutwalilila ukusambilila vino tungazizimizya. U mulandu ci? Pano Yesu walanzile ukuti: “Nga mwazizimizya alino mulapusuka.” (Luka 21:19) Ukwelenganya pali vino yauze yakuzizimizya intazi wakwe zino twakwatako kungatwazwa ukuzizimizya.

4. U mulandu ci uno tungalandila ukuti tulinzile ukukolanya vino Yeova akazizimizya?

⁴ A weni wino tungakolanya ukuzizimizya? A Yeova Leza. Limwi mwazunguka. Nomba nga mwelenganyapo sana citange cimuzungusye. Insi ii ikatungululwa na Ciwa, fwandi mwaya intazi izingi. Yeova wakwata amaka ya kufumyapo  intazi zyonsi zii insita ili yonsi, nomba akalolela insita ya ku nkoleelo. (Loma 9:22) Nomba Leza watwalilila ukuzizimizya mpaka insita lino alonona insi ikafike. Lekini tulande pa vintu 9 vino Yeova akuzizimizya.

5. Uzye izina lyakwe Leza lyazewanyiziwa uli, nupya mukauvwa uli pali vivyo?

⁵ Yeova akazizimizya umuzewanya uno yaleeta api zina lyakwe. Yeova watemwa izina lyakwe nupya akalonda yonsi ukulicindika. (Eza. 42:8) Nomba pa myaka 6,000 iyapita, izina lyakwe lyazewanyiziwa. (Masa. 74:10, 18, 23) Umuzewanya uu watandikile umu calo ca Edeni lino Ciwa walanzile ukuti Yeova atalondanga ukupeela Adamu na Eva ivintu ivyali nu kulenga yaye ni nsansa. (Utan. 3:1-5) Ukufuma papa kwene, Yeova yakamubepezya ukuti asipeela antu vino yakalonda. Yesu uvwile uyi pa mulandu wakuti izina lyakwe Isi lyasaalulwanga. Ali mulandu kwene uno waneniile alondezi yakwe ukulapepa ukuti: “Tata witu uwa kwi yulu, leka izina lyako licindikwe.”—Mate. 6:9.

6. U mulandu ci uno Yeova walekela ukuti papite insita lino atatala walanga ukuti wakwata insambu izya kuteeka iyulu ni insi?

⁶ Aingi yakakana Leza na ukateeka wakwe. Yeova sile u wakwata amaka ya kuteeka iyulu ni insi yonsi, nupya ukateeka wakwe waziipa sana. (Kuso. 4:11) Nomba Ciwa wezya ukuponzya ya malaika na antu nu kulenga yaelenganya ukuti Leza atakwata insambu zizyo. Pangapita insita pakuti tusininkizye ukuti Yeova wakwata insambu zya kuteeka nupya a kateeka musuma. Leza waleka antunze ukulaiteeka pa myaka iingi pakuti yailolele ukuti yatange yatunguluke ndi cakuti yasikuvwila Kaumba. (Yele. 10:23) Pa mulandu na vino Leza wateekela, kusi ali wensi alatwisika ukuti u walinga ukuteeka iyulu ni insi. Yonsi kwene yalamanya ukuti ukateeka wakwe Yeova u wazipa nu kuti Uwene wakwe sile uulaleta umutende wa cumi nu kucingilillwa.

7. Aaweni apondokile Yeova, nupya i vyani vino alayacita?

⁷ Vino anakwe yamwi yamupondokiile. Yeova waumvile ya malaika na antu amalilike, ukwaula ulema uli onsi. Nomba Satana uwali a malaika wizile apondokela Yeova nu kuleka Adamu na Eva antunze aali amalilike ukupondokela Yeova. Ya malaika yauze na antunze nayo kwene yapondwike. (Yuda 6) Lino papisile insita, na antu yakwe kwene aina Izlaeli yano wasoolwile nayo kwene yamupondokiile nu kutandika ukupepa tuleza twaufi. (Eza. 63:8, 10) Yeova uvwile uyi. Nomba watwalilila ukuzizimizya, nupya alatwalilila ukuzizimizya ukufika lino alonona yacipondoka yonsi. Lyene Yeova na aomvi yakwe acisinka yalaya ni nsansa, pano yatalatwalilila ukuzizimizya iviipe ivikacitika ndakai.

8-9. Ufi ci uno yakabepezya Yeova, nupya i vyani vino tungacita pa ufi uwo?

⁸ Ufi uno Ciwa watwalilila ukubepa. Satana wabepizye Yobo na aomvi yakwe Yeova yonsi akamuombela na ucisinka ukuti yakapepa Leza pa mulandu wakuti akayapeela vimwi. (Yobo 1:8-11; 2:3-5) Ciwa watwalilila ukubepezya antu ukufika na ndakai. (Kuso. 12:10) Tungazwilizyako ukusinila Satana ukuti u wa ufi, lino tukuzizimizya intazi nu kutwalilila ukuya acisinka kuli Yeova pa mulandu wakuti twamutemwa. Yeova wapaazile Yobo nupya naswe kwene alatupaala ndi cakuti twatwalilila ukuzizimizya.—Yako. 5:11.

 ⁹ Satana akaomvya intunguluzi zya mipepele ya ufi ukunena antu ukuti Yeova u munkalwe nupya aakalenga antu ukucuula. Umwana nga wafwa, yamwi yakalanda nu kuti a Leza atamusenda ukwi yulu pakuti akaye malaika. Kuu u kusaalula Leza. Nomba twamanya ukuti a Tata uwaya nu kutemwa. Nga twalwala nanti wino twatemwa wafwa, tusipeela Leza umulandu. Lelo twataila ukuti wanda umwi alapozya alwale nu kutuutulula afwe. Tunganenako ali wensi angatemwa ukuvwa ukuti Yeova a Leza uwaya nu kutemwa. Lyene Yeova angakwata insambu zya kwasuka aakamuzewanya.—Mapi. 27:11.

10. I vyani vino ilembo lya Masamu 22:23, 24 likalanda pali Yeova?

¹⁰ Kucuula kuno aomvi yakwe yano watemwa yakacuula. Yeova a Leza uwaya nu luse. Akauvwa uyi nga walola tukucuula limwi pa mulandu nu kuzunyiwa, kulwalilila, nanti pa mulandu nu kukanamalilika. (Belengini Masamu 22:23, 24.) Yeova akalola uyi uno tukapitamo, akalonda ukuufumyapo, nupya alaufumyapo. (Loliniko na Kufuma 3:7, 8; Ezaya 63:9.) Insita ilafika lino alakumbula “aminsozi yonsi, kutalaya imfwa, kutalaya ukuloosya nanti ukulila nanti ukuvwa ukuwaika.”—Kuso. 21:4.

11. Uzye Yeova akauvwa uli pa aomvi yakwe acisinka afwa?

¹¹ Kufwilwa ya cuza yakwe. Uzye Yeova akauvwa uli pa yonsi na anaci ya utailo afwa? Akalondesya ukuyatuutulula! (Yobo 14:15) Elenganyini vino Yeova akalondesya ukwizalola cuza wakwe Abulahamu nupya! (Yako. 2:23) Nanti elenganyini vino Yeova akalondesya ukwizalanda na Mose wino wavwanganga nawe “manso na manso!” (Kufu. 33:11) Nupya akalondesya ukwiza uvwa  kuno Davidi na ya kalemba ya masamu yauze yakwimba inyimbo zya kumulumbanya! (Masa. 104:33) Nanti cakuti ya cuza yakwe Leza yonsi yaa yafwa, Yeova ataailila. (Eza. 49:15) Akaiusya vyonsi pali wenga na wenga. Baibo ikalanda ukuti: “Kuli aliwe yonsi aumi.” (Luka 20:38) Wanda umwi alayatuutulula nu kutwalilila ukukutika uku mapepo yao akufuma pansi ya mwenzo. Ndi cakuti mwafwilwa umutemwikwa, amazwi yaa yangamuteekezya.

12. I vyani ivikalenga Yeova auvwa sana uyi umu manda yaa akusyalikizya?

¹² Vino antu aipe yakacuzya auze. Lino ucipondoka watandike umu Edeni, Yeova wamanyile ukuti ivintu vyali nu kwipa lino atatala wazifya insi. Yeova wapata iviipe, lufyengo, nu uunkalwe ukacitika umu nsi ndakai. Akasakamala sana yayo atonta nupya aatange yaicingilile, wakwe, ana yansiwa na ya mukamfwilwa. (Zaka. 7:9, 10) Yeova akauvwa sana uyi ndi cakuti walola aomvi yakwe acisinka yakuyacuzya nu kuika umu vifungo. Mungasininkizya ukuti Yeova wamitemwa mwensi mwe muno mukuzizimizya pamwi nawe.

13. I miyele ci ino antu yaya nayo ndakai, nupya i vyani vino Leza alacita?

¹³ Vino imiyele ya antu ikuya ikwipilako. Antu yaumvilwe ukuti yakolanya imiyele yakwe Leza, lelo Satana akayalenga ukulacita iviipe. Lino Yeova walola “vino antu yacilamo ukucita ivipe,” umu manda yakwe Nowa, “Yeova aya nu ulanda cuze nu mwenzo umuwaya pa kuumba antu nu kuika pano nsi.” (Utan. 6:5, 6, 11) Uzye ukufuma lili kwene ivintu vyatala vyazipapo pano nsi? Awe foo! Satana akatemwa sana nga walola vino uzelele alino ni miyele yuze iipisye ikuvulilako, wakwe kulalana kwa onsi yatupu na anaci yatupu! (Efes. 4:18, 19) Satana akauvwa ningo sana ndi cakuti ya kapepa yakwe Yeova yacita uluyembu ulwipisye. Yeova alalanga ukuti wapata iviipe lino alafumyapo antu akacita iviipe asilonda ukusenuka.

14. I vyani vino antu yakacita uku nyama ni nsi?

¹⁴ Vino antu yakonona insi ino wapanzile. Antu yasiteeka sile antu yauze mu unkalwe lelo yasisunga ningo ni nsi alino ni nyama zino Yeova wayanenyile ukuti yasakamala. (Kasa. 8:9; Utan. 1:28) Ya sayansi yalanda ukuti pa mulandu na vino antu yakacita, imitundu ya nyama ni vimelwa ukufika kuli 1 milyoni vyasya vice vilowe. Ali mulandu uno antu yakasakamalila pali vino insi ilaya uku nkoleelo. Twaya ni nsansa pali vino Yeova watulaya ukuti ali “nu konona aakaonona insi” nu kulenga insi yonsi ukuya paladaise.—Kuso. 11:18; Eza. 35:1.

15-16. I cani cilinzile ukutulenga ukuzizimizya wakwe vino Yeova akazizimizya? Langililini.

¹⁵ Elenganyini pa vintu uwingi vino Tata witu uwa kwi yulu wazizimizya pa myaka iingi. (Lolini kambokosi kakuti “ Vintu Vino Yeova Akazizimizya.”) Yeova angafumyapo iviipe ivili vyonsi ivikacitika umu nsi pa nsita ili yonsi. Nomba vino wateekela vikatwazwa sana. Elenganyini pa cilangililo cii. Tuti limwi atwalane yayanena ukuti umwana wino yali nu kukwata alakwata intazi ikulu nupya alafwa ala umwance. Nanti ciye vivyo, avyazi yaya ni nsansa lino umwana wavyalwa nanti cakuti cilayatalila ukulamusakamala. Pa mulandu wakuti yatemwa umwana, yalazizimizya intazi izili zyonsi pakuti umwana wao aye nu umi.

 ¹⁶ Umu nzila ili imwi kwene, yonsi ana yakwe Adamu na Eva yakavyalwa nu luyembu. Nomba, Yeova wayatemwa nupya akayasakamala. (1 Yoa. 4:19) Nupya ukupusanako na avyazi aali umu cilangililo cii, Yeova angafumyapo ukucuula kuno anakwe yakacuula. Wasoolola insita ino alafumyapo ukucuula konsi. (Mate. 24:36) Ukutemwa Yeova kulinzile ukutulenga ukuzizimizya intazi zyonsi zino tungakwata.

17. Uzye amazwi yakwe Yesu aya pa Aebele 12:2, 3 yangatwazwa uli ukutwalilila ukuzizimizya?

¹⁷ Yeova ali wino tungakolanya sana ukuzizimizya. Yesu wakolanyanga vino Isi akazizimizya. Lino wali pano nsi, wazizimizye lino yamupontelanga, ukumusaalula na lino yamupoopiile pa cimuti ca kucuuziwilwapo pa mulandu witu. (Belengini Aebele 12:2, 3.) Ukuzizimizya kwakwe Yeova kwakomelizye Yesu. Naswe kwene kungatukomelezya.

18. Uzye ilembo lyakwe 2 Petulo 3:9 likatwazwa uli ukuvwikisya ivyacitika pa mulandu wakuti Yeova wateekela?

¹⁸ Belengini 2 Petulo 3:9. Yeova wamanya insita isuma ino alononelapo insi iipisye. Pa mulandu wakuti wateekela, calenga ukuti antu aingi yamumanye nupya ndakai lyene iumba ilikalamba lya antu, yakamupepa nu kumulumbanya. Nupya yonsi yaya nu luzango pano Yeova watwalilila ukuzizimizya, na cico calenga ukuti yavyalwe, kusambilila ukumutemwa, nu kuipeela kuli aliwe. Ndi cakuti antu aingi yazizimizya ukufika nu ku mpela, cilalenga Yeova apingulepo ukuti vino wasoolwilepo ukuzizimizya vyali sile ningo.

19. I vyani vino tulinzile ukulalondesya ukucita, nupya i vyani ivilatucitikila?

¹⁹ Yeova akatusambilizya vino tungazizimizya nu luzango. Asi mulandu ni vintu iviipe nu kucuula kuno Satana waleta, Yeova watwalilila ukuya “Leza wa nsansa.” (1 Tim. 1:11) Naswe kwene tungatwalilila ukuya nu luzango lino tukuloleela Yeova ukucindika izina lyakwe, ukulanga ukuti aliwe walinga ukuteeka, ukufumyapo iviiipe vyonsi alino ni ntazi zino tukapitamo. Lekini tutwalilile ukuzizimizya nu kuteekeziwa pa kumanya ukuti na Tata witu uwa kwi yulu akuzizimizya. Nga twacita vivyo amazwi yaa yalaya acumi kuli swensi wenga na wenga akuti: “Uwa nsansa u muntu aakatwalilila ukuzizimizya uwezyo, pano pa cisila ca kuzumiliziwa alapokelela icilambu ca umi, cino Yeova walaya antu aakatwalilila ukumutemwa.”—Yako. 1:12.