1-2. Madhu ala enafwanyeya va Isaías 65:16, 17 enanikongomedha addi ovilela?

“KUSELELE!” Ola waali musolo wamusonkano wamalabo mararu wa 2017. Musonkano ola ohunihudhiha makalelo ovilela naari nifwanyiwaga makathamiho. Ofiyera peeno, nihakwaniha yaka 4. Iyo nili vala amentweene, nivilelagave malabo ala ookuthula.

² Kawubuwele makathamiho yufwanyile malabo yala a peeno. Podi wera ohumuyelela mmudhaawo obe mukwawo wamudhiveliwe muukwani, obe wahifwanyiwa oredda wuhiyale neena nuukwa. Obe podi wera onna owanana makathamiho mwaha wowuluvala. Onorajhihaga wereliwa obure obe ohufwanyiwa ngovi? Onna woona goyi mwaha wa Koronaviru? Nnofuna ofiya mudhidhi dhego ndha dhinadhiiwa dhivira. Nnojhehera nuuthaba nlabo dhithu ndha nnadhihu niddiwala!​—Omwileri Isaías 65:16, 17.

3. Nnofwanelela wera ddi, ki mwaha bwaddi?

³ Okalawo malabo yala a peeno kinakweya, teto osogolo nnadhowihuwo enere othabwa. (Mat. 24:21) Enowoneleyamo wihina nnofwanelela okala athu ovilela. Mwahaya bwaddi? Mwaha Yesu ahisoriha egi: ‘Mwaha wovilela weenyu, munere ovulusa egumi yenyu.’ (Lucas 21:19) Wubuwela makalelo athu amodha enaagonjhihiwa makathamiho ewa enaligana naala enanifwanya, podi onikavihera owedha ovilela.

4. Mwahaya bwaddi nigawoga wi Yehova tajhiha yapama wodhela ovilela?

⁴ Muthu anafwanelela otajhihiwa woodhela ovilela baani? Di Yehova Mulugu. Eyo enowutikiniha? Karajhiha okarati wubuwele. Elabo ela enasugweriwa ni Saddana, teto ehimala odhaala makathamiho. Yehova ohukanna kopolo dhowamariha makathamiho amatene mudhidhi vang’no. Mbwenye oliye anajhehera nlabo athomiliye wihina erena. (Rom. 9:22) Labo  nna nihinafiye, oliye anera ddi? Annovilelave. Nnafuna nawoone makathamiho matanu nennayi anaavilelana Yehova.

5. Obajha mu Edeni, ndina na Mulugu nnatakalihiwa avi, ki eyo enuuhiya avi?

⁵ Otakalihiwa ndina naaye. Yehova onodhiveliwa ndina naaye ni anafuna atene erihege. (Isa. 42:8) Mbwenye dhihivira yaka 6 mil ndina nna nitakalihiwaga. (Sal. 74:10, 18, 23) Eyo yambele mundda wo Edeni, Ddiyabo (enatapulela “muliba waaba”) nuumwinkedha Mulugu wi era omuwadelihedha Adawu ni Eva, ethu yahoweliwa wihina ekale oohagalala. (Gén. 3:1-5) Ofiyera peeno Yehova anna winkedhiwa wihina kanavaha athu dhithu dhinahoweliwa. Yesu ootakaleliwa oonaga ndina na ababe nitakalihiwaga. Bumwahaya oliye adhe ahudhihege anamaharaye olobela. ‘Babihu muli odhulu, ndina nenyu ntxenihiwe.’ — Mat. 6:9.

6. Mwahaya bwaddi Yehova agajheha mudhidhi wowinjhivene ahiwogaga muladdu ola wodhela oneti anniyena wothonga?

⁶ Ovanyihiwa onamathonga waye.  Yehova ohukanna oneti watene wothonga elabo yodhulu ni elabo yavati, oliye dhinonne pama othonga. (Apo. 4:11) Mbwenye Ddiyabo waleketha angero ni athu, ni mubuwelo wowi Mulugu kanna oneti wothonga. Wodhela muselu ola wothonga, obe nere oneti anniyena wothonga, kuwaali muladdu waawogiwe labonene. Wohoweleya ovira mudhidhi wowinjhivene wihina athu yonelemo wi kiyawedhe withonga yekiwa yahinvuruwanaga mpaddusi ewa. (Jer. 10:23) Mulugu ahubuwelavo pama wahiyedha mudhidhi wowinjhivene athu. Mwaha wovilela waye, muladdu ola onodha owogiwe dila modha baahi omale. Kavo ananganyedhege wihina Mulugu dinna oneti wothonga, teto duliye anonne makalelo apama owerana ndo. Athu atene enere onona wihina Omwene wa Mulugu bunaadhena murenddele webaribari nubareleya elabo yavati.

7. Baani amusadduwele Yehova, ki Yehova anere ddi?

⁷ Anaaye omusadduwela. Yehova aapadduse angero naathu ologomanene. Nuwindo mungero mmodha omusadduwela okala Saddana, enatapulela “namapokiha”. Vano mubuwelo wa Saddana wavolowela athu. Adawu ni Eva ofiyera omusadduwela Mulugu. Angero ni athu amodha witaganyihedha omusadduwela Mulugu. (Judas 6) Nuuvira mudhidhi amwaana Ezarayeli amodha nlogo nasakuliwe ni Mulugu, omukodda Yehova ofiyera wawebedha amulugu owoota. (Isa. 63:8, 10) Yehova katakaleliwe ebewene. Naarive dhigalive ndo, Yehova anowavilelana makathamiho ala ofiyera labo anaagujhuliye athu atene oohiwelela. Eyo enere odhana woobowa waathu atene oororomeleya enavilelana makathamiho vamodha ni Yehova, eli mwilaboni muna.

8-9. Dhithu baani Saddana anamwinkedhiye Mulugu, ki iyo navuruwana nerege ddi?

⁸ Saddana omwinkedha. Saddana omwinkedha Jo ni adhaari amodha oororomeleya a Yehova wihina enamulabela Mulugu mwaha wareeliha. (Jó 1:8-11; 2:3-5) Ofiyera peeno Saddana kaseelele wawinkedha athu wihina enamulabela Mulugu mwaha mareeliho anavahiye. (Apo. 12:10) Iyo podi werana epaddi yehu nuutonyihedha wihina oliye muliba woota. Nnerana yeyo navilelagana makathamiho enanifwanya, nakalagave oororomeleya wa Yehova ni naatonyihedhaga odhivela nuliye. Natajhiha ovilela wa Jo, ni iyoya nnere oreelihiwa. — Tia. 5:11.

⁹ Saddana onowalabihedha anamaholela gereja wihina emwinkedhege, Yehova wi muthu abure ni duliye anatota makathamiho.  Mwaana akwa, athu amodha enofiyedha owoga wi Mulugu dimuthukule mwaha omuhoowela mwanamungero. Wula onpujha Mulugu! Iyo nihimunona pamadhene. Nakanna oredda onanisimweliha obe muthu akwa, kannamwinkedhege Mulugu ehu. Ohiya eyo, nikanna nroromelo wi labo nimodha oliye anere omariha oredda nuukwa. Iyo podi wawaddela athu aatene yale enanivuruwana wi Yehova, Mulugu oodhivela. Nerana ndo, nnere omukavihera Yehova omwakula ole ananpujha.​—Pro. 27:11.

10. Salmos 22:23, 24 ananihudhiha ddi wodhela Yehova?

¹⁰ Goyi enoona adharaaye anaadhiveliye. Yehova onowaweddela thagaraga adharaaye. Onotakaleliwa anonaga noonaga goyi mwaha oharahariwa, oredda obe naari ohulogomana wehu. (Omwileri Salmos 22:23, 24.) Yehova onowoona opama wimodhave, bumwahaya onofuna wamariha makathamiho ehu ni anere werana. (Kasugwa Êxodo 3:7, 8; Isaías 63:9.) Vohilegela, ‘oliye onere wavuda mitoridhiwa dhatedhene mwintonimwiwa, kawindha wikala okwa, kutho, wibulela, naari widdela.’​—Apo. 21:4.

11. Yehova anakala aavi mwaha okwa adharaaye oororomeleya?

¹¹ Wayelela akwaye muukwani. Yehova anakala aavi mwaha wookwa akwaye oororomeleya? Oliye ohukanna munukwela wowawona dila bili! (Jó 14:15) Onowoona munukwela anna Yehova ni mukwaye Abarawu? (Tia. 2:23) Obe naari ni Moses, amuwogiyena ‘kove ni kove’? (Êxo. 33:11) Onokanna munigwa wiwa jhibo ya Davidi ni anamwiba amodha yibaga jhibo dhomuthithimihana! (Sal. 104:33) Naarive adhaari ala oororomeleya egamanle okwa, Yehova kaadduwale. (Isa. 49:15) Onowubuwela dhikalelo dhaatene yanniwana. Nimakalelo mamodha, ‘vamentoni  vaye athu atene ekwile ehikalawo.’ (Luc. 20:38, nota) Nlabo nimodha, Yehova anere wahogolosa, aavuruwanege malobelo ewa avati vamurima ni arumedhe makalelo ewa owebedha. Akala ohumuyelela muthu onamudhiveliwe, wubuwela thalo dhendha podi wuvaha oliba murima.

12. Malabo ala okuthula, enathabwa omutakalela Yehova ddi?

¹² Makalelo athu abure enawoonihiwa goyi akwiwa. Ohiwelela obanjhe mu Edeni, Yehova ahinona wi dhatedhene dhahinawomele, osogolowa dhere othabwa. Yehova kanadhiveliwa oonaga elabo ela obure, ohogowa ni opanga. Oliye onowathuwathuwela ale yahinna muthu owawakihedha, ninga anakwadhuni ni amamukwele. (Zac. 7:9, 10) Malabo a peeno, ethu enathabwa omutakalela Yehova fuwawona adharaaye yonaga goyi, etabusiwaga ebewene ni evokedhiwaga mukambura. Mukanne ebaribari wi Yehova onowudhivelani nyu aatene munavilelana makathamiho.

13. Dhithu baani dhotakala athu eneriwana, ki Yehova anafuna ere ddi?

¹³ Athu ohuvahana thima. Saddana ohunona wi athu epaddusiwe moligana ni Mulugu. Bumwahaya, oliye onodhiveliwa wanyemula athu. Yehova ‘ahoona wi obure waathu wahithabwa,’ malabo a Nowe ‘Yehova ahikubanya mwaha wowapaddusa athu elabo yela yavati, ni murimaye wahukuwa.’ (Gén. 6:5, 6, nota, 11) Nerege vano dhithudha dhihiwomela? Newene! Saddana anodhiveliwa vanlubale awonaga athu yeragana dhithu dhotakala, makalelo aatene oraruwa athu enowawerana, podi akala mulobwana ni muhiyana obe alobwana alobwanave obe ahiyana ahiyanave. (Efé. 4:18, 19) Teto oliye onothabwa odhiveliwa aamoonaga mudhaari a Yehova agerilena yothega enlubale. Mbwenye ovilela wa Yehova wihikanna manddile. Mohulegela, oliye anere otonyihedha makalelo aniddiye mararuwo wodhela waxela athu aatene yahinafuna osaddula mubuwelo wewa wodhela mararuwo.

14. Athu enerana ddi elabo ela yavati, vamodha ni anenyama?

¹⁴ Makalelo enanongiwa elabo yavati. Mulugu ohavaha mutholo athu wihina esamalelege elabo yavati ni dhatedhene apaddusiliye. (Ecl. 8:9; Gén. 1:28) Yowukulihaya sowi ‘athu yathonganaga enitotela goyi’ ni enononga elabo ela ni anenyama. Masiyentista amodha enihina mwaha waathu, mbwabwadda ni mbwabwadda wanenyama * enere orimela yaka dhinaharela. Enowoneleyamo pama mwahaya bwaddi athu egathuwathuwela elabo ela. Yohagalasaya sowi Yehova onopaganya wi ‘anere watolosa aatene enanonga elabo yavati’ ni asaddula elabo yavati wihina ekale parayizu!​—Apo. 11:18; Isa. 35:1.

15-16. Enanithukulela ovilela vamodha ni Yehova ddi? Oladdanihe.

¹⁵ Kubuwela dhithu baani babihu oodhulu anavileliyena muwari mwa yaka dhowinjhivadhene. (Osugwe kwaduru “ Dhithu baani Yehova anavileliyena.”) Yehova ahafune ere omariha elabo ela mudhidhi anafuniye. Mbwenye oliye anna ovilelave, teto eyo mareeliho eepaddi yehu. Iyo podi wubuwela eyo nlabihedhaga nladdaniho nna. Kubuwela anamatelana enafuna ombala mwaana, nuwindo mediku wawaddela: Mwaninyu ohukanna makathamiho owinjhiva mwigumini mwaaye. Egumaye kinamweddele pama oliye kanaakalewo malabo owinjhivene. Omulela mwaana ola enakale makathamiho manlubale. Naari  dhigarive ndo, ababe enomwakela ni mada menli. Odhivela winere wathukulela ovilela ni wilibihera omulela mwaniwa.

¹⁶ Ninga mwaana ola, ahima a Adawu ni Eva kinabaliwa oologomana. Naarive dhigari ndo, Yehova anna wasamalela nuudhivela. (1 João 4:19) Mbwenye vihikala ohiyana ababi ala ewogiwe va yoladdaniha ela ni Yehova. Yehova podi wamariha makathamiho anaaye, mwaha wodhivela oliye ohuthoma labo anafuniye werana ndo. (Mat. 24:36) Odhivela wa Yehova winonithukulela ovilela vamodha nuliye, njhehaga mudhidhi anafuniye wamariha makathamiho.

17. Yotajhiha ya Yesu enasorihiwa va Hebreus 12:2, 3, enanikongomedha addi ohuselela ovilela?

¹⁷ Yehova yotajhiha yapama wodhela ovilela, teto Yesu ahimutajhiha babe pamadhene. Mwaha onidhivela, Yesu ahivilelana oruwaniwa, ototiwa manyazo, ni okomeliwa vantxikwani na goyi agaali mwilaboni yavati. (Omwileri Hebreus 12:2, 3.) Mohanganyedha ekalelo yovilela ya Yehova ehimuthukulela Yesu ovilela. Eyo podi wereya ni iyo.

18. Mowiwanana ni 2 Pedro 3:9, mareeliho baani enadhana ovilela wa Yehova?

¹⁸ Omwileri 2 Pedro 3:9. Yehova ohuthoma labo anafuniye ogujhula elabo ela. Mwaha wovilela wa Babihu oodhulu, athu owinjhivene yaka ndha dhivirile ehibaliwelamo, teto ehikanna ofuru wohudhera ni opeleka egumi yewa mmadani mwaaye. Athu ala peeno enokosa epaddi ya nikuru ninlubale ni enomutamalela Mulugu mwaha ovilela waye. Osogolo, Yehova anere otonyihedha wi ovilela ethu yapama adha areeliha athu aatene enaavilele ofiyedha omakuthulo!

19. Enohoweleya nikome werana ddi, ki mareeliho baani nnawakelihu?

¹⁹ Yotajhiha ya Yehova enonikavihera ovilela nuuhagalala. Naarive Saddana erege ononiha goyi, Yehova, ‘Mulugu oohagalala.’ (1 Tim. 1:11) Ohiya eyo, iyo ninna ojhehera nuuvilela nlabo Yehova anadhiye atxenihe ndina naaye, abarele onamathonga waye ni amarihe makathamiho aatene nnawonihu peeno. Mbwenye nlabo nna nihinafiye, wikome ovilela ni ohuddiwale wi Babihu oodhulu anna ovilela. Werana ndo, kadda muthu wa iyo anere wonelamo wi yolebela ya Tiago 1:12, enihina: ‘Oohagalala duule anavilela eehiwaga, mwaha awedha ovilela anere wakela kara yegumi, Yehova apaganyiliye ale yahinahiye omudhivela,’ ebaribari.