1, 2. ¿Kenke tlen kiijtoua Isaías 65:16, 17, techpaleuia nojua ma tikijiyouijtokaj tlen techpano?

“¡XIKIJIYOUIJTO NOCHI!”. Kiampa motokaxtik nopa ueyi tlanechikolistli tlen eyi tonali tlen mochijki ipan 2017. Tlen nopaya kiixtonkej techpaleuik ma tikijiyouikaj nochi tlaouijkayotl tlen techpano. Ya panotok naui xiuitl uan nojua tikijiyouijtokej tlen amo kuali.

² ¿Tlake tlaouijkayotl tikixnamiktokej? Uelis titlaijiyouijtokej pampa mijki se tlen tochampoyouaj o se touampo, tlauel timokokouaj, ya tiueuejtixtokej, techtlasojsoljuilik se tlenijki, tlauel mauilili kampa tiitstokej, techtlatsakuiltiaj o titlaijiyouiaj pampa momoyajtok nopa kokolistli COVID-19. Yeka, nochi tijnekij ma asi nopa tonali kema ayokmo titlaijiyouisej. Kema moaxitis tlen Jehová kitenkajtok, ayokmo timoiljuisej ipan nopa tlamantli yon techtlaijiyouiltis tlen amo kuali (xijpoua Isaías 65:16, 17).

3. ¿Tlake moneki tijchiuasej nama, uan kenke?

³ Ipan ni tonali tijpiaj miak tlaouijkayotl, uan uelis teipa nojua tikixnamikisej sekinok tlamantli tlen tlauel ouij (Mat. 24:21). Yeka, moneki nojua tijchijtosej kampeka tikijiyouisej nochi. Jesús kiijtok kenke moneki tikijiyouisej tlen techpano: “Intla inkipiasej inmoyolo uan inkiijiyouisej, inmomakixtisej” (Luc. 21:19). Tlauel techpaleuis tlaj timoiljuisej kenijkatsa sekinok nojkia kiixnamiktokej miak tlaouijkayotl kej tojuantij.

4. ¿Kenke tikijtouaj Jehová techmachtia kenijkatsa tikijiyouisej tlen amo kuali?

⁴ ¿Ajkia kiijiyouijtok miak tlamantli tlen amo kuali? Jehová. ¿Kenke kiampa tikijtouaj? Pampa Satanás tlanauatia ipan Tlaltipaktli, yeka pano miak tlamantli tlen amo kuali. Maske Jehová uelis kitsontlamiltis, ya kinextia kipia iyolo uan kichiuas  kema kinamikis (Rom. 9:22). Yeka, ya nojua kiijiyouijtok tlen pano pampa ayamo asi nopa tonali. Ma tikitakaj chiknaui tlamantli tlen kiijiyouijtok.

5. ¿Kenijkatsa kisokiuijtokej toTeotsij itoka, uan tlake tijyolmati?

⁵ Kisokiuiaj itoka. Jehová tlauel kipatiita itoka uan kineki nochi ma kitlepanitakaj (Is. 42:8). Maske ya kineki kiampa ma kichiuakaj, kipia se 6,000 xiuitl tlauel kisokiuijtokej itoka (Sal. 74:10, 18, 23). Pejki ipan xochimili Edén kema Diablo (tlen kiijtosneki “teistlakauijketl”) kiijtok Jehová amo kinekiyaya Adán uan Eva ma yolpakikaj (Gén. 3:1-5). Ipan nopa tonali pejkej kiistlakauiaj Jehová kema kiijtojkej ya amo kineki maseualmej ma yolpakikaj. Jesús amo kinekiyaya nojua tlauel ma kisokiuikaj iTata itoka. Yeka, kimachtik itokilijkauaj ma momaijtokaj: “ToTeko toTata tlen tiitstok nepa iluikak. Nochi tlakamej ma kiueyichiuakaj motoka” (Mat. 6:9).

6. ¿Kenke Jehová kikajtok ma pano miak xiuitl uan kiampa kinextis san ya kinamiki tlanauatis?

⁶ Kiijtouaj amo kinamiki tlanauatis. San Jehová kinamiki tlanauatis ipan iluikak uan ipan Tlaltipaktli pampa eli se kuali tlanauatijketl (Apoc. 4:11). Maske san ya kinamiki kiampa kichiuas, Diablo kichijtok iluikaeuanij uan maseualmej ma moiljuikaj toTeotsij amo kinamiki tlanauatis. Yeka, monektok panos miak xiuitl uan kiampa kinextis san ya kinamiki tlanauatis. Jehová kipia miak tlalnamikilistli, yeka kinkajtok maseualmej ma monauatikaj miak xiuitl uan kiampa kiitasej Jehová kinamiki kinyakanas uan kiampa yolpakisej (Jer. 10:23). Jehová kinextijtok kipia iyolo, yeka uelis kinextis san ya kinamiki tlanauatis uan san iTlanauatijkayo uelis kichiuas ma tiitstokaj ika pakilistli uan ika tlaseuilistli.

7. ¿Ajkia inijuantij kiijixnamiktokej Jehová, uan tlake kinchiuilis?

⁷ Se keskij toTeotsij ikoneuaj tlaijixnamijkej. Jehová kinchijchijki xitlauakej iluikaeuanij uan maseualmej. Teipa, se iluikaejketl katli itoka Satanás (tlen kiijtosneki “tlaijixnamijketl”), kichijki Adán uan Eva ma kiijixnamikikaj Jehová. Uan teipa, se keskij iluikaeuanij uan se keskij maseualmej nojkia kiampa kichijkej (Jud. 6). Kej panotiajki tonali, israeleuanij nojkia pejkej tlaijixnamikij uan kinueyichijkej sekinok teotsitsij, maske Jehová kintlapejpenijtoya kej ialtepe (Is. 63:8, 10). Yeka Jehová tlauel kiyolkokok tlen kichijkej. Maske ipan ni tonali nojua kiijiyouijtok tlen kichiuaj maseualmej, teipa ayokmo kiampa kichiuas pampa kintsontlamiltis ikualankaitakauaj. Nelia tlauel yolpakisej nochi katli kitekipanouaj Jehová pampa nojkia kiijiyouiaj tlen ya kiijiyouijtok.

8, 9. ¿Kenijkatsa kiistlakauiaj Jehová, uan kenijkatsa uelis tijpaleuisej?

⁸ Satanás nochipa kiistlakauia Jehová. Kema Satanás kitlaijiljuik Job, kinejki kinextis tijtekipanouaj toTeotsij pampa techmokuitlauia (Job 1:8-11; 2:3-5). Ipan ni tonali Satanás nojua kiampa kiijtoua (Apoc. 12:10). Tlaj tikijiyouiaj nochi tlen techpano uan amo tijtlauelkauaj Jehová pampa tikikneliaj, tijnextisej Satanás eli se istlakatiketl. Jehová kiteochijki Job, yeka uelis timotemachisej nojkia techteochiuas tlaj tikijiyouisej tlen techpano (Sant. 5:11).

⁹ Satanás kintekiuia katli tlayakanaj ipan religiones tlen amo melauak uan kiampa kiijtouaj Jehová amo teiknelia uan kichiua ma titlaijiyouikaj. Uan kema miki se pilkonetsi kiijtouaj toTeotsij kichijki ma miki pampa kinekiyaya seyok iluikaejketl. Tlauel amo kuali tlen kiijtouaj pampa kinextiaj amo kitlepanitaj toTeotsij. Maske kiampa kiijtouaj,  tojuantij tijmatij tlen nelia melauak. Yeka, maske tijpiaj se ueyi kokolistli o miki se katli tlauel tikikneliaj, amo kema timoiljuiaj Jehová kichijki kiampa ma pano. Tojuantij timotemachiaj asis se tonali kema ayokmo titlaijiyouisej. Yeka kema titlajtolmoyauaj, ma tikiniljuikaj maseualmej Jehová tlauel techiknelia. Kema kiampa tijchiuaj, Jehová kinextia Satanás eli se istlakatiketl (Prov. 27:11).

10. Kej kiijtoua Salmo 22:23, 24, ¿tlake tijyekouaj tlen Jehová?

¹⁰ Tlaijiyouiaj itekipanojkauaj. Jehová kikuamachilia tlen techpano. Yeka kema kiita titlaijiyouiaj, techtlatsakuiltiaj o timokokouaj, ya tlauel kiyolkokoua (xijpoua Salmo 22:23, 24). Ya nelia kitekipachoua tlen techpano, yeka mosentlalijtok kitlamiltis tlen amo kuali (nojkia xikita Éxodo 3:7, 8; Isaías 63:9). Asis nopa tonali kema moaxitis tlen kiijtoua Apocalipsis: “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos” (Apoc. 21:4).

11. ¿Kenijkatsa kiyolmati Jehová kema kinilnamiki itekipanojkauaj katli ya mijkej?

¹¹ Mikij iuampoyouaj. ¿Kenijkatsa kiyolmati Jehová kema miki se itekipanojka? Ya tlauel kineki sampa kiitas (Job 14:15). Ma timoiljuikaj, Jehová sampa kineki kiitas iuampo Abraham (Sant. 2:23). Nojkia, Moisés katli kipaktiyaya iuaya kamanaltis (Éx. 33:11). Uan sampa kineki kinkakis kej uikayayaj David uan sekinok katli kiijkuilojkej Salmos (Sal. 104:33). Maske iuampoyouaj ya mijkej, ya amo kinilkaua (Is. 49:15). Ya amo kiilkajtok kenijkatsa eliyayaj iuampoyouaj pampa iixpa kejuak “nochi yoltokej” (Luc. 20:38). Asis se tonali kema Jehová sampa kinyolkuis, kintlakakilis kema sampa momaijtosej uan tlauel yolpakis kema sampa kitekipanosej.  Tlaj mijki se katli tlauel tikikneliaj, tlauel techyolchikaua tijmatisej ni tlamantli.

12. ¿Tlake kitekipachoua Jehová ipan ni tonali kema kiita pano miak tlamantli tlen amo kuali?

¹² Katli amo kipiaj kuali ininyolo tetlaijiyouiltiaj. Kema Adán uan Eva kiijixnamijkej Jehová ipan xochimili Edén, ya nima moiljuik momiakiliskia tlen amo kuali. Ya tlauel kikualankaita tlen amo kuali, kema kichiuaj tlen amo xitlauak uan kema mosisiniaj. Yeka, nochipa kitekipachojtok tlen kinpano katli amo uelij momanauiaj uan amo kipiaj chikaualistli, kej iknotsitsij uan katli ayokmo kipiaj ininueue (Zac. 7:9, 10). Uan nojua tlauel kiyolkokoua kema itekipanojkauaj kintlatsakuiltiaj uan kintsakuaj. Yeka, katli kichiuaj kampeka kiijiyouisej tlen kinpano, kej Jehová kiijiyouijtok, uelis motemachisej ya nochipa kiniknelis.

13. ¿Tlake kiijia Jehová, uan tlake kichiuas?

¹³ Maseualmej ayokmo kuali monejnemiltiaj. Maske Jehová techchijchijki kej ya itlachialis, Satanás kipaktia ayokmo kuali ma timonejnemiltikaj. Kema Noé itstoya, Jehová kiitak “nelmiak inintlaixpanoljuaj tlakamej ipan Tlaltipaktli” uan yeka “moyoliljuik intla kuali elki para kinchijtoya tlakamej o axtle uan nelia kiyolkokok” (Gén. 6:5, 6, 11). Ipan ni tonali maseualmej nojkia ayokmo kuali monejnemiltiaj. Satanás kipaktia kiitas kema auilnemij o momekatiaj, kema se tlakatl moteka iuaya seyok tlakatl o se siuatl iuaya seyok siuatl (Efes. 4:18, 19). Nojkia, tlauel yolpaki kema kiita se Jehová itekipanojka tlajtlakolchiua. Kema Jehová kitlamiltis nochi tlen amo kuali, kinextis ya tlauel kiijia kej monejnemiltiaj maseualmej.

14. ¿Tlake kichiuaj maseualmej ika Tlaltipaktli uan ika tlapialmej?

¹⁴ Kinempolouaj Tlaltipaktli. Maseualmej amo san kipiaj “chikaualistli para mochiuilisej tlen axkuali se ika seyok”, nojkia amo kinmokuitlauiaj tlapialmej uan amo kimokuitlauiaj Tlaltipaktli kej Jehová kineki (Ecl. 8:9; Gén. 1:28). Se keskij ixtlamatinij kiijtouaj ipan se keski xiuitl tlauel miakej tlapialmej mikisej pampa tlauel kisokiuiaj Tlaltipaktli. Yeka, maseualmej tlauel motekipachouaj. Tojuantij tlauel tijtlaskamatij pampa tijmatij Jehová kiijtojtok nechka kintsontlamiltis katli amo kimokuitlauiaj Tlaltipaktli uan nechka kichiuas se xochimili (Apoc. 11:18; Is. 35:1).

15, 16. ¿Tlake techpaleuis nojkia ma tikijiyouikaj tlen techpano? Xikijto se neskayotl.

¹⁵ Ma timoiljuikaj kenijkatsa Jehová tlauel miak xiuitl kiijiyouijtok tlen amo kuali (xikita recuadro “ Jehová kiijiyouijtok kema...”). Maske Jehová ueli kitlamiltis tlen amo kuali kema ya kinekis, ya kinextijtok kipia iyolo uan nopa tlauel techpaleuijtok. Ma timoiljuikaj ipan ni neskayotl. Ximoiljui se siuatl nechka kipias ipilkone. Ya uan iueue kiniljuiaj amo kuali tlakatis, tlauel mokokos uan uelis amo uejkauas itstos. Maske nopa tetajmej kimatij kema tlakatis ininpilkone kipias miak tlaouijkayotl, inijuantij kiseliaj ika miak tlaiknelili. Yeka maske kipiasej miak tlaouijkayotl, kichiuaj kampeka kuali kiiskaltisej pampa tlauel kiikneliaj.

¹⁶ Tojuantij nojkia tielij kej nopa pilkonetsi pampa tiikoneuaj Adán uan Eva, yeka tijpiaj tlajtlakoli uan titlaijiyouiaj. Maske kiampa tielij, Jehová techiknelia uan techmokuitlauia (1 Juan 4:19). Sampa ma tikilnamikikaj nopa neskayotl. Maske inintatauaj nopa pilkonetsi kinektoskiaj kikixtilisej nopa tlaijiyouilistli, amo uelkej. Uan Jehová kena uelis kitlamiltis tlen kintlaijiyouiltia itekipanojkauaj pampa ya kiixtlalijtok se tonali kema kichiuas  (Mat. 24:36). Jehová tlauel techiknelia, yeka techpaleuia ma tikijiyouikaj tlen techpano.

17. Kej kiijtoua Hebreos 12:2, 3, ¿kenijkatsa techpaleuia tlen Jesús kichijki?

¹⁷ Jehová techpaleuia tikitasej kena uelis tikijiyouisej tlen techpano. Uan Jesús kichijki kej iTata. Kema itstoya ipan Tlaltipaktli kiijiyouik kema kitlaijiljuijkej uan kema kimiktijkej ipan se kuauitl (xijpoua Hebreos 12:2, 3). Jesús kiijiyouik nochi nopa tlamantli pampa kiita iTata kiijiyouijtok nochi tlen pano. Tojuantij nojkia uelis tlauel techpaleuis.

18. Kej kiijtoua 2 Pedro 3:9, ¿kenijkatsa techpaleuia pampa tijmatij Jehová kipia iyolo?

¹⁸ (Xijpoua 2 Pedro 3:9). Jehová kuali kimati kema kitlamiltis nochi tlen amo kuali. Ya kinextijtok kipia iyolo, yeka nama tlauel miakej kitekipanouaj uan kiueyichiuaj. Nochi inijuantij tlauel kitlaskamatij Jehová pampa ayamo kitlamiltijtok tlen amo kuali. Yeka, uelkej tlakatij, pejkej momachtiaj Biblia, moatsonpoliuiltijkej uan pejkej kitekipanouaj. Ipan nopa tonali kema tlauel miakej Jehová itekipanojkauaj kiselisej nopa tlateochiualistli pampa kiijiyouijkej tlen kiixnamijkej, kitlaskamatisej Jehová pampa kipixki iyolo.

19. ¿Ipan tlake moneki timosentlalijtosej, uan tlake tijselisej?

¹⁹ Tlen Jehová kiijiyouijtok, techmachtia nojkia uelis tikijiyouisej ika pakilistli nochi tlen techpano. Ya nochipa yolpaki, maske kiyolkokoua tlen pano uan onka miak tlaijiyouilistli tlen Satanás kichijtok (1 Tim. 1:11). Tojuantij nojkia uelis tikijiyouisej tlen techpano ika pakilistli pampa tijmatij Jehová nechka kiuejkapantlalis itoka, kinextis san ya kinamiki tlanauatis, kitlamiltis nochi tlen amo kuali uan kitlamiltis nochi tokuesoljuaj. Yeka, ma timosentlalijtokaj tikijiyouisej tlen techpano uan ma timoyolchikauakaj pampa Jehová nojkia kiijiyouijtok se keski tlamantli. Tlaj kiampa tijchiuaj, tikitasej kenijkatsa moaxitia ni texto ipan sejse tlen tojuantij: “ToTeko kinteochiuas nopa tlakamej tlen kiijiyouiaj uan axtlajtlakolchiuaj kema uala tlayejyekoli uan tlaouijkayotl. [...] Kena, kinmakas yolistli para nochipa keja ya kintenkauilijtok kinmakas tlen kiikneliaj” (Sant. 1:12).