1-2. Magama ari pana Isaia 65:16, 17, anotivangisa kudini kuti titame kuremba?

“MUCADOREMBA!” uwu wainga musoro wo gungano ro 2017. Gungano iri rakavonesa kuti tingacungiririsa kudini zvineso zvatinosongana nazvo. Papera makore marongomuna gungano iri norapera kuitwa, asi tiri kuenderera mberi tecicungirira zvineso zvo nyika ino yakashata.

² Zvineso zvapi zvamakasongana nazvo wari uno? Makatamikihwa ngo ukama kana shamwari yamunoda maningi here? Muno ndhendha icikarapiki here? Muri kusongana no zvineso zvinoviiswa ngo usharuka here? Muri kusongana no ngozi jinoitika jega, ugandanga kana kuteverehwa here? Kana muri kupsaswa ngo ndhendha yakadari inga koronavhiru? Rangariranyi njiku yokuti zvineso zvese izvi zvinozova zvokare. Aticazviceukijizve kana kuti aticazosongani no zvineso zvimweni!—Verenganyi Isaia 65:16, 17.

3. Zvicinyi zvatinodikana kuita wari, ngenyi?

³ Upenyu huri kunesa maningi mu nyika ino. Asi kumbejiyo tingatodikana kucungirira zvineso zvakakura maningi kupinda izvi. (Mateu 24:21) Zvakajeka kuti, tinodikana kwenderera mberi teciengejera kucungirira kwedu. Ngenyi? Ngokuti Jesu wakati: “Munozoponesa upenyu hwenyu ngo kucungirira kwamunoita.” (Ruka 21:19) Kurangarira kuti vamweni vari kucungiririsa kudini zvineso zvakatojana no zvedu, kungavangisa kucungirira kwedu.

4. Ngenyi tingananga kuti Jehovha muezaniso wakanaka wo kucungirira?

⁴ Ndiyani wakagaja muezaniso waushoni wo kucungirira? Ndi Jehovha Mwari. Mashamaisika ngo mupinguro uu here? Kangaije, asi mukanasa kurangarijisisa amuzoshamaisiki. Dhiyabhu ndiyena ari kutonga nyika ino, iyona yakazara ngo zvineso. Jehovha ano simba ro kuzvipeja ngo kukasika, asi iyena  ari kuvetera kuti azviite kumbejiyo. (Varoma 9:22) Ngo kudaro, Mwari ari kucungirira mbhera njiku yaakasana kuti aparaje nyika iyi igume. Ngativone zviro zvipfumbamwe zviri kucungirihwa ndi Jehovha.

5. Zina ra Mwari riri kutukiswa kudini, munojizwa kudini pamunozwa manyepo aya?

⁵ Jehovha ari kucungirira kutukwa kuri kuithwa zina rake. Jehovha anoda zina rake i anoda kuti vese varireremeje. (Isaia 42:8) Asi ko zviuru zvitandhatu zvo makore, zina rake riri kutukwa. (Nduyo 74:10, 18, 23) Zina iri rakatanga kutukwa mu munda wo Edheni. Dhiyabhu paakanyepera Adhamu na Evha ecivavhunja kuti Mwari ari kuvarambisa zviro zvaushoni zvinovaita kuti vadakare. (Genesi 3:1-5) Kuvhira pondhopo, Sathana ari kundhandhanisa manyepo okuti Jehovha ari kurambisa vandhu kuti vaite zvavanoda. Jesu waineseka ngo kuti zina ra Baba wake rainga recitukwa. Ngo kudaro, wakajijisa vajiji vake kuti vakumbire kudari: “Baba wedu muri kumatenga, zina renyu ngariceneswe.”—Mateu 6:9.

6. Ngenyi Jehovha wakatendera kuti vandhu vajitonge vega ko mukuvo wakareba?

⁶ Jehovha ari kucungirira kuphikizwa ko ukuru-kuru hwake. Jehovha ndiyena ano citendehwa cokutonga mudenga no pasi. Cimwenizve, matongero ake ndiwona akanaka. (Apokaripsi 4:11) Asi Dhiyabhu wakaeja kucengeja ngirozi no vandhu ngo kuvaita kuti varangarire kuti Mwari aana citendehwa ici. Ngo kudaro, zvaizotora nguva kuti Jehovha avonese kuti ndiyena ano citendehwa cokutonga. Ngo ungwaru hwese, Mwari wakatendera kuti vandhu vazvitonge vega ko mukuvo wakareba, kuitira kuvonesa kuti avacaizobudirira pacina besero ro Musiki. (Jeremia 10:23) Ngo ndava yokusengerera ka Mwari, kumbejiyo apana anozokana-kana kuti Jehovha ndiyena anocitendehwa cokutonga nyezuru no pasi. Vese vanozoziva kuti iyena mutongi wakanaka. Umambo hwake ndihwona hunozoviisa runyararo no rugarisiko panyika.

7. Ndiyani wakapandukira Jehovha, waro Jehovha anozovaitirenyi?

⁷ Jehovha ari kucungirira kupanduka kwakaitwa ngo vamwe vo vana vake. Jehovha wakasika ngirozi no vandhu vakakwana, vacina pakaposeka. Asi Sathana paakapera kupandukira Jehovha, iyena wakhowesavo Adhamu na Evha kuti vaitevo zvondhozvo. Ngirozi jimweni no vandhu vamweni, vakabatanavo na Sathana pakupandukira uku. (Judha 6) Pakufamba ko nguva, pikija jinja ro Vaizraeri rainga no vandhu vakasanwa ndi Mwari, rakamuramba rotanga kunamata zvimwari zvo kunyepa. (Isaia 63:8, 10) Jehovha wakacengejwa kamare. Kuvhira pondhopo, iyena wakacungirira, anozoenderera mberi acicungirira mbhera ugume mukuvo wo kuparaja vapanduki vese. Perapo Jehovha no vaya vakagondeka kwaari, vanozodakara ngokuti avazodikanizve kucungirira zviro zvakashata zviri kuitika mu nyika ino.

8-9. Ngoapi manyepo ari kunangwa ngo pamusoro pa Jehovha, itusu tingaitenyi ngo pamusoro pazvo?

⁸ Jehovha ari kucungirira manyepo anonangwa nguva jese ndi Dhiyabhu. Sathana wakapumbha Jobe no vashandiri vese vakagondeka va Jehovha, kuti ivona vanonamata Mwari basi ngo ndava yo zviro zvavanopuwa. (Jobe 1:8-11; 2:3-5) Dhiyabhu arikundoenderera mberi acicengeja vandhu mbhera na nyamasi. (Apokaripsi 12:10) Itusu tinodikana kuita divi redu kuti tikhombije kuti Sathana munyepi, ngo kucungirira zvineso zvatinosongana nazvo, toramba takagondeka kuna Jehovha ngokuti itusu tinomuda. Jehovha wakakomborera Jobe, anozotikomboreravo kudari tikacungirira.—Jakobo 5:11.

 ⁹ Sathana anoshandisa vatungamiriri vo zviyara zvo manyepo kuti vanange kuti Jehovha wakashata, ndiyena ari kuitisari matambujiko ese nyamasi uno. Vandhu vamweni vanoti panofa mwana mudoko, Mwari ndiyena watora mwaneo ngokuti anomuda kuti aengejere ngirozi kumatenga. Kutuka kwakadini uku! Itusu tinoziva kuti Jehovha ndi Baba vano rudo. Patinonga tino ndhendha inonesa maningi kana patinofihwa, narini atizoshori Mwari. Itusu tinothemba kuti njiku iri yese, Mwari anozopeja ndhendha no kumusa vandhu vakafa. Tinodikana kuvhunja vandhu vamweni kuti vavone kuti Jehovha ndi Mwari ano rudo. Patinoita zviro zvakanaka kwaari, iyena anokwanisa kudavira vaya vanomushora.—Mazwi Akangwara 27:11.

10. Nduyo 22:24, 25, inokhombijenyi ngo pamusoro pa Jehovha?

¹⁰ Jehovha ari kucungirira kutambujika ko vashandiri vake vanodiwa. Jehovha ndi Mwari wo unyasha. Jehovha adakajihwi paanotizwa ticicema ngo ndava yo matambujiko atiri kucungirira, akadari inga ndhendha, kuteverehwa no kutama kukwana kwedu. (Verenganyi Nduyo 22:24, 25.) Iyena anozwisisa kuhwajihwa kwatinako, anoda kuzvipeja, anozozvipeja kamare. (Ezanisanyi no Exodo 3:7, 8; Isaia 63:9.) Dhiya iyi painozoguma, “iyena anozopukuta musoji jese mumeso mavo, akucazovizve no kufa, kusuruvara, kucema no kuhwajihwa.”—Apokaripsi 21:4.

11. Jehovha anozwa kudini ngo pamusoro po vashandiri vake vakagondeka vakafaya?

¹¹ Jehovha ari kucungirira ngo kutamazve kuva no shamwari jake jakafaya. Jehovha anozwa kudini ngo pamusoro po vanarume no vanakaji vakagondeka vakafaya? Iyena anodazve kuvavona. (Jobe 14:15) Amborangariranyi manera Jehovha arikuda kuvonazve shamwari yake Abhirahama. (Jakobo 2:23) Kana kuti  munokwanisa kurangarira cido cina Jehovha co kuda kubhuyazve “meso ngo meso” na Mosi? (Exodo 33:11) Iyena, arikudazve kuzwa Dhavhidhi no vatari vamweni vo nduyo, vaciimba ndumbo jinodakajisa maningi jinokuja Jehovha. (Nduyo 104:33) Pikija kuti shamwari ja Mwari jikafa, iyena aazovakanganwi. (Isaia 49:15) Iyena anoceukija zviro zvese ngo pamusoro po mugariro javo. Bhaibheri rinoti: “Kwaari, vese vanorarama.” (Ruka 20:38) Njiku iri yese, iyena anozomusa vandhu vakafa, wozozwazve mukumbiro javo jo mwoyo wese wotenderazve kunamatwa ndivona. Kudari mafihwa, zvese izvi zvaperari kunangwa zvingamunyaraja no kumuvangisa.

12. Zvicinyi zviri kunyangajisa maningi Jehovha mu njiku jino jakashatari?

¹² Jehovha ari kucungirira kubzinyirihwa kuri kuitwa vandhu ndi Sathana. Kupanduka pokwakatanga mu munda wo Edheni, Jehovha waiziva kuti zviro zvicikato zvaita nane zvaizovha pakushata zvecienda pakushatisisa. Jehovha anonyenya ushati, kutama kurunguma no ugandanga uri kuitwa mu nyika ino. Iyena nguva yese anokwanisa kukorondha vandhu vaya vacikakwanisi kuzvijivirira, vakadari inga ndherera no noni. (Zakaria 7:9, 10) Jehovha anonyangajwa paanovona vashandiri vake vakagondeka vecibzinyirihwa no kudihwa mu kadheya. Imwimwi mungava no cokwadi cokuti iyena anoda vese vari kucungirira pamwepo na iyena.

13. Ngowapi mufambiro wakashata wakavoniwa ndi Mwari, zvicinyi zvaanozoita ngo pamusoro pazvo?

¹³ Jehovha ari kucungirira kutama kuzwana ko mbhuri. Vandhu vakasikwa kuti vatevejere Mwari, asi Sathana anoda maningi kuita zvakashata. Mwari ‘paakavona kuti kuxata ko vandhu kwaikura’ mu njiku ja Nowa, iyena “wakakhauya ngo kurura mundhu pasi pano, woita bundu mu mwoyo make.” (Genesi 6:5, 6, 11) Kureva kuti kuvha pa mukuvo uu zviro zvakaita nane here? Kunasa kunanga haiwa! Dhiyabhu anodakara maningi panovona mushovo wese wo uhure, unobatanija uhure wo mwanakaji no mwanarume, mwanarume no mwanarume no wo mwanakaji no mwanakaji. (Vaefeso 4:18, 19) Sathana anodakara maningi panovona vashandiri va Jehovha veciita zvishaishi zvikuru. Kusengerera kwa Jehovha kukapera, iyena anozokhombija kunyenya kwanoita zviro zvakashata.

14. Ngozvapi zviri kuitwa ngo vandhu ngo pamusoro po nyika no zvinyama?

¹⁴ Jehovha ari kucungirira kuparajwa ko zvisikwa zvake. ‘Vandhu [avaripi] kutonga panyezuru po vamweni’ basi, asi avaripivo kutaja nyika no zvinyama inga manera aida Jehovha. (Mucumaeri 8:9; Genesi 1:28) Masientista amweni anonanga kuti mutengo unokwana kuita ciuru cimwe co mushovo wese wo zvinyama no, miti mumakore anozari zvinopera kufa. Azvinesi kuzwisisa kuti ngenyi vandhu vari kuneska ngo ndava yo nyika ino. Zvinodakajisa ngo zvokuti, Jehovha ari kuda “kuparaja vaya vanophwanya-phwanya nyika.”—Apokaripsi 11:18; Isaia 35:1.

15-16. Zvicinyi zvinotindundira kuti ticungirire inga ndi Jehovha? Ipanyi muezaniso

¹⁵ Amborangariranyi zvineso zviri kucungirira Baba wedu vo kudenga ku zviuru no zviuru zvo makore akapinda. (Vonanyi bhokiso rinoti: “ Ngozvapi Zviri Kucungirira Jehovha?”) Jehovha anozoparaja nyika ino yakashata pa mukuvo uri wese. Asi kusengerera kwake kwatibesera maningi kamare. Ambovonanyi muezaniso uu basi. Ngatiti mukaji no mwamuna, vavhunjwa kuti vanozobara mwana ana zvineso zvikuru zvo uhomi, zvokuti  azokwanisi kupona mukuvo wakareba. Asi vabereki ava, vanodakara ngo kubahwa kwake, pikija kuti vanozosongana no zvineso zvakawanda pa kumukorondha. Zvecivoneka kuti ivona vanomuda maningi, ivona vanokwanisa kuita zvirizvese kuti vape mwana uu upenyu urinane.

¹⁶ Mukufananavo, mubarihwana wese wa Adhamu na Evha auzivi kukwana paunobahwa. Pikija zvakadaro, Jehovha anovada no kuvakorondha. (1 Johani 4:19) Mukusiyana no vabari vanangwaya pa muezaniso, Jehovha angapeja matambujiko o vana vake. Iyena wakagaja mukuvo wokuzopeja zvineso zvese zvino vandhu. (Mateu 24:36) Rudo wa Jehovha unoita kuti ticungirire mukuvo wese unodikanaro hawo.

17. Ngenyi zvinonangwa pana Vahebheru 12:2, 3, zvinotivangisa kuti ticungirire?

¹⁷ Jehovha imuezaniso waushoni wo kucungirira. Jesu wakatevejeravo muezaniso wa Baba wake wo kucungirira. Jesu paainga pasi pano, wakacungirira kutukwa, kunyoejwa no kukhomehwa pa mutanda wo kutambujikira ngo ndava yedu. (Verenganyi Vahebheru 12:2, 3.) Muezaniso wa Jehovha wokucungirira, pacina kukana-kana wakapa Jesu simba kuti acungirirevo. Izvi zvingativangisavo.

18. 2 Pedhru 3:9, inotibesera kudini kuzwisisa zvakaitika ngo kusengerara kwa Jehovha?

¹⁸ Verenganyi 2 Pedhru 3:9. Jehovha anoziva mukuvo waushoni wokuparaja nyika iyi yakashata. Ngodava yo kusengerera kwake, vandhu vazinji vari kukwanisa kumuziva. Wari zviuru zvo vandhu zviri kumunamata. Vese vari kubonga ngo kucungirira kwa Jehovha ngokuti kwakaita kuti ivona vagume pa kubahwa, vojijira kumuda no kuzvipira kwaari. Civaringo cakatema Jehovha co kuva anocungirira, cinozomudakajisa ngokuti zviuru zvo vandhu vanozokwanisa kucungirira mbhera kumagumo.

19. Tinodikana kutema civaringo co kuitenyi? Ngowapi unozova muviyo wakona?

¹⁹ Itusu tinokwanisa kucungirira ngo kuvona manera Jehovha wakacungirira ngo mudakaro. Pikija no zvineso zvese zviri kuitiswari ndi Sathana, Jehovha ari kuenderara mberi ari “Mwari wakadakara.” (1 Timoti 1:11) Itusu tingaramba takadakadara patinonga tecivetera kuti Jehovha acenese zina rake, ukuru-kuru hwake, apeje zviro zvakashata no kupeja zvineso zvedu. Ngatiteme civaringo co kucungirira no kunyarajwa ngo kuziva kuti Baba wedu vo mugore vari kucungiriravo. Kudari tikaita izvi, magama anoteverari anova okadi kuna umwe nga umwe wedu: “Anodakara nga wiya anoenderera mberi ecicungirira, ngokuti paanoejwa, anozoashira junguja ro upenyu rakagondeswa ndi Jehovha kuna vaya vanoenderera mberi vecimuda.”—Jakobo 1:12.