1-2. Oohapu dhaJehova ndhoka tadhi adhika muJesaja 65:16, 17, otadhi tu ladhipike ngiini kaatu teke omukumo?

“INO TEKA OMUKUMO!” osho sha li oshipalanyolo shoshigongi shetu shoshitopolwa shomo 2017. Oshigongi shoka oshe tu kwathele tu mone nkene tatu vulu okwiidhidhimikila omaupyakadhi ngoka hatu taalele. Ngashingeyi opwa pita omimvo ne, ihe natango onkee ngaa tatu idhidhimikile onkalamwenyo yomuuyuni mbuka wa kolokosha.

² Mbela uupyakadhi wuni to idhidhimikile ngashingeyi? Mbela owa silwa omuntu gwaandjeni nenge kuume koye? Mbela owu na uuvu wa kwata miiti? Mbela onkalamwenyo oye ku dhigupalela, molwaashono ngashingeyi wu li omukokele? Mbela owa adhika koshiponga shopaunshitwe, wa ningilwa omuyonena nenge to patanekwa? Nenge oto mono iihuna omolwonkalo ndjoka ye etithwa komukithi gwo-COVID-19? Otwa tegelela nondjuulukwe esiku ndyoka omaupyakadhi agehe ngoka taga ka kala kaage po we noitatu ke ga dhimbulukwa we.​—Lesha Jesaja 65:16, 17.

3. Oshike tu na okuninga, nomolwashike?

³ Onkalamwenyo muuyuni mbuka ondhigu, notashi vulika nokuli monakuyiwa tu ka taalele omaupyakadhi omadhigu noonkondo. (Mat. 24:21) Osha yela kutya otwa pumbwa okutsikila okwiilonga okwiidhidhimika. Omolwashike mbela? Omolwaashoka Jesus okwa ti: “Mokwiidhidhimika otamu ihupithile oomwenyo dheni.” (Luk. 21:19) Okudhiladhila kunkene ooitaali ooyakwetu hayi idhidhimikile omaupyakadhi nomupondo, otaku vulu oku tu kwathela tu tsikile okwiidhidhimika.

4. Omolwashike tatu vulu okutya Jehova oku li oshiholelwa dhingi sheidhidhimiko?

⁴ Olye e li oshiholelwa dhingi sheidhidhimiko? OJehova Kalunga. Otashi vulika wu kale we shi kuminwa, ihe ngele owa dhiladhila muule kombinga yasho, oto ka kala wu shi uvite ko kutya omolwashike. Uuyuni mbuka otawu pangelwa kOndiyapoli, nowu  udha omaupyakadhi. Jehova oku na oonkondo dhokuhanagula po uuyuni mbuka mepathimo lyeho, ihe okwa tegelela e ke shi ninge pethimbo lyo opala. (Rom. 9:22) Omanga esiku ndyoka inaali thika, Kalunga ketu ota ka tsikila nokwiidhidhimika. Natu ka taleni kiinima omugoyi mbyoka Jehova ti idhidhimikile.

5. Edhina lyaKalunga olya nyatekwa ngiini, nowu shi uvitile ngiini?

⁵ Okunyatekwa kwedhina lye. Jehova oku hole edhina lye, nokwa hala kehe gumwe a kale e li simaneka. (Jes. 42:8) Ihe uule womimvo 6 000, edhina lye olya kala tali nyatekwa. (Eps. 74:10, 18, 23) Okunyatekwa kwedhina lyaJehova okwa tamekele moshikunino shaEden sho Ondiyapoli (edhina ndyoka tali ti “Omulundili”) ya lundile Kalunga kutya okwi indika Adam naEva sha shoka ya pumbwa, opo ya kale ya nyanyukwa. (Gen. 3:1-5) Okuza kesiku ndyono, Jehova okwa kala ta lundilwa kutya ohi indike aantu shoka ya pumbwa. Jesus okwa kala e na ko nasha nokuyapulwa kwedhina lyaHe, nomolwaashono a li a longo aalongwa ye ya galikane taya ti: “Tate yetu, ngu u li megulu, edhina lyoye nali yapulwe.”​—Mat. 6:9.

6. Omolwashike Jehova e etha pu pite ethimbo ele, manga inaa kandula po ompata kombinga yuunamapangelo we?

⁶ Aantu oyendji oye li ompinge naKalunga nosho wo nuunamapangelo we. Jehova oye awike e na uuthemba wokupangela egulu nevi, nomukalo gwe gwokupangela ogwo dhingi. (Eh. 4:11) Ihe Ondiyapoli oya kala nokupukitha aayengeli nosho wo aantu kutya Kalunga ke na uuthemba mboka. Ompata kombinga yuunamapangelo waJehova kaya li tayi vulu okukandulwa po mesiku limwe. Onkene Jehova okwe etha aantu yi ipangele yo yene uule wethimbo, opo ya mone kutya itaya vulu okwiipangela yo yene kaapu na ewiliko lyOmushiti. (Jer. 10:23) Omolweidhidhimiko lyaKalunga, ompata ndjoka sikulimwe otayi ka kandulwa po thiluthilu. Ayehe otaya ka tseya kutya omukalo gwaJehova gwokupangela ogwo dhingi nosho wo kutya Uukwaniilwa we owo owala tawu vulu okweeta ombili negameno lyashili kombanda yevi.

7. Oolye ya tukululile Jehova oshipotha, note ke ya ningila shike?

⁷ Uunashipotha woyana ye yamwe. Jehova okwa li a shiti oyana yopambepo noyopanyama ya gwanenena, ano kaaye na okapethili kasha. Ihe konima yethimbo omwanamati gwe gumwe, omuyengeli omunashipotha, Satana (edhina ndyoka tali ti “Omupataneki”) okwa ningitha Adam naEva mboka ya li ya gwanenena, ya tukuluthile wo Jehova oshipotha. Aayengeli yontumba nosho wo aantu yalwe oye ya wayimine muunashipotha. (Jud. 6) Konima yethimbo, aantu yomoshigwana shaIsraeli, mboka ya li oshigwana shaKalunga sha hogololwa, oya pilamene Kalunga e taya tameke okulongela iikalunga. (Jes. 63:8, 10) Jehova okwa li e shi uvitile nayi noonkondo. Nonando ongawo, okwe shi idhidhimikile nota ka tsikila okwiidhidhimika sigo ethimbo lyokuhanagula po aanashipotha ayehe mboka lya thiki. Shoka otashi ke etela aalongeli ye aadhiginini epepelelo, mboka nayo tayi idhidhimikile uuyuni mbuka wa kolokosha.

8-9. Iifundja yini hayi popiwa kombinga yaJehova, notatu vulu okuninga po shike kombinga yayo?

⁸ Iifundja iitokele yOndiyapoli. Satana okwa lundile omupiya gwaJehova omudhiginini Job nosho wo aalongeli ye ayehe kutya ohaye mu longele owala omolwuuwanawa mboka He ya ningile. (Job 1:8-11; 2:3-5) Sigo okunena Ondiyapoli otayi tsikile okulundila aapiya yaKalunga. (Eh. 12:10) Otatu vulu okukwathela tu ulike kutya Satana omufundja, mokukala hatu idhidhimikile omaupyakadhi ngoka hage tu adha nokukala aadhiginini kuJehova, molwaashoka tu mu hole. Ngaashi a li a ningile Job, natse Jehova ote ke tu yambeka wo omolweidhidhimiko lyetu.​—Jak. 5:11.

 ⁹ Satana oha longitha wo aawiliki yomalongelokalunga, a lundile Jehova kutya omukwanyanya noye he etitha okumona iihuna kwaantu. Aawiliki yamwe ohaya ti nokuli kutya ngele okanona oka si, kungawo Kalunga oye e ki ila po, molwaashoka okwa pumbwa aayengeli megulu. Shoka otashi shekitha lela edhina lyaKalunga. Ihe tse otu shi kutya Jehova oTate omunahole. Uuna twa kwatwa kuuvu wa kwata miiti nenge omuholike gwetu a sa, ihatu pe nando Kalunga ombedhi. Mepingathano naashono, otwi itaala kutya esiku limwe Kalunga ota ka hulitha po okweehama nokuyumudha aaholike yetu mboka ya sa. Otatu vulu okulombwela kehe gumwe ngoka a hala okupulakena ketumwalaka lyetu kutya Jehova oKalunga omunahole. Kungawo Jehova ota ka vula okuyamukula ngoka te mu sitha ohoni.​—Omayel. 27:11.

10. Episalomi 22:23, 24 otali holola shike kombinga yaJehova?

¹⁰ Okumona iihuna kwaapiya ye aadhiginini. Jehova oKalunga omunalukeno. Ohashi mu yemateke noonkondo uuna e wete okumona iihuna kwetu, hoka tashi vulika haku etithwa kokupatanekwa, kokweehama nenge kokwaagwanenena kwetu. (Lesha Episalomi 22:23, 24.) Jehova oha kala e tu uvitile uukwawo wanankali, okwa halelela okuhulitha po okumona iihuna kwaantu note ke shi ninga. (Yelekanitha Eksodus 3:7, 8; Jesaja 63:9.) Esiku otali ke ya, uuna ‘ta ka theta po omahodhi agehe momeho [getu], noitaku ka kala we eso, oluhodhi, elilo nenge uuwehame.’​—Eh. 21:4.

11. Jehova okwa yuulukwa shike kombinga yaapiya ye aadhiginini mboka ya sa?

¹¹ Eso lyookuume ke aadhiginini. Mbela Jehova oha kala u uvitile ngiini aalumentu naakiintu aadhiginini mboka ya sa? Okwa halelela oku ya mona ishewe! (Job 14:15) Dhiladhila owala kunkene Jehova tashi vulika a yuulukwa noonkondo kuume ke Abraham. (Jak. 2:23) Nenge Moses, ngoka a li ha popi naye ‘oshipala noshipala.’ (Eks. 33:11) Okwa yuulukwa wo noonkondo  okuuva David nosho wo aanyoli yomapisalomi yalwe taye mu imbile oondjimbo tadhi mu tanga. (Eps. 104:33) Nonando ookuume ke mboka oya sa, Jehova ine ya dhimbwa. (Jes. 49:15) Natango oku shi uukwatya wawo awuhe. Ombiimbeli oya ti kutya “mekwatathano naye ayehe otaa kala ye na omwenyo.” (Luk. 20:38) Esiku limwe ote ke ya yumudha, note ku uva ishewe omagalikano gawo taga zi komutima nokukala taye mu longele. Ngele owa silwa, oohapu ndhoka nadhi ku hekeleke.

12. Oshike hashi yemateke unene Jehova pethimbo ndika lyomasiku gahugunina?

¹² Okuthiminikwa kwaantu kaakolokoshi. Sho uunashipotha wa tameke muEden, Jehova okwa li e shi kutya oonkalo otadhi ke enda owala tadhi nayipala. Jehova oku tonde uukolokoshi, okwaanuuyuuki nosho wo elongithonkondo ndyoka li li apuhe muuyuni kunena. Okwa kala aluhe e na ko nasha unene naamboka kaaye na ngoka te ya kwathele, ngaashi aankundi, mboka kaaye na ngoka te ya popile, oothigwa naaselekadhi. (Sak. 7:9, 10) Jehova oha kala nokuli a yemata noonkondo uuna e wete aapiya ye aadhiginini taya patanekwa nenge taya tulwa mondholongo. Otatu vulu okukala nuushili kutya oku tu hole atuhe mboka tatu idhidhimike pamwe naye.

13. Eihumbato lya nyata lini Kalunga ha kala e wete mokati kaantu, nota ka ninga po shike?

¹³ Eindjipalo lyuuholume. Kalunga okwa shita aantu oshifetha she, ihe Satana oku hole oku ya ningitha ya ninge iinima ya nyata. Sho Jehova pethimbo lyaNoa “a mono uuwinayi waantu kombanda yevi mpoka wu thike,” “oku uvu nayi, sho a shitile omuntu kombanda yevi.” (Gen. 6:5, 6, 11) Mbela okuza ethimbo ndyono onkalo yaantu kombanda yevi oya hwepopala ngaa? Hasho! Ondiyapoli oyi na okukala hayi kala ya nyanyukwa sho yi wete omilalo dha nyata dhi li apuhe kunena, mwa kwatelwa omilalo pokati kaantu yuukashike ko okantu wa yoolokathana nosho wo pokati kaamboka yuukashike ko okantu wa faathana! (Ef. 4:18, 19) Satana oha kala wo unene a nyanyukwa uuna mboka haya longele Jehova ya yono eyono lya kwata miiti. Jehova ita kala ti idhidhimikile eihumbato lya nyata sigo aluhe, onkene uuna esiku lya thiki, ote ku ulika kutya oku tonde eihumbato kehe lya nyata, mokuhanagula po kehe ngoka inaa hala okulundulula eihumbato lye.

14. Aantu otaya ungaunga ngiini neshito lyaKalunga?

¹⁴ Okuyonagulwa kweshito lye. Kunena aantu ‘itaya dhiladhilile owala aantu ooyakwawo oshiponga,’ ihe otaya kwata wo nayi evi niinamwenyo mbyoka Jehova e ya pa ye yi tonatele. (Omuuv. 8:9; Gen. 1:28) Aatseyinawa yamwe otaya londodha kutya moomvula dhokomeho, oonkatu dhaantu otashi vulika dhi ningithe omaludhi giishitwa emiliyona limwe yi kale kaayi ko we. Itashi kumitha nokuli sho aantu haya ti kutya eshito oli li moshiponga! Lago enene, Jehova oku uvaneka kutya ‘ota ka hanagula po mboka taya yonagula po evi,’ e te li ningi oparadisa.​—Eh. 11:18; Jes. 35:1.

15-16. Oshike shi na oku tu inyengitha tu idhidhimike pamwe naJehova? Shi thaneka.

¹⁵ Dhiladhila owala komaupyakadhi agehe taga yemateke, ngoka Tate yetu gwomegulu a kala nokwiidhidhimikila uule womimvo omayuvi. (Tala oshimpungu “ Shoka Jehova ti idhidhimikile.”) Jehova okwa li ta vulu okuhulitha po uuyuni mbuka wa kolokosha pethimbo kehe a hala. Ihe eidhidhimiko lye olye tu etela uuwanawa owundji. Natu shi thaneke ngeyi: Natu tye ando omusamane nomukulukadhi oya lombwelwa kutya okanona kawo hoka inaaka valwa natango oke na uuvu wa kwata miiti, ota ka ka kala nonkalamwenyo ondhigu nota ka ka valwa inaaka adha. Nonando ongawo, aavali oya kala ya nyanyukwa sho okanona kawo ka valwa, nando oye shi kutya otashi ka kala oshidhigu noonkondo kuyo oku ka sila oshimpwiyu. Molwaashoka oye ka hole, otaye ki idhidhimikila uupyakadhi kehe, opo ka kale nonkalamwenyo yi li nawa.

 ¹⁶ Sha faathana, oluvalo aluhe lwaAdam naEva olwa valwa inaalu gwanenena. Nando ongawo, Jehova oku tu hole nohe tu sile oshimpwiyu. (1 Joh. 4:19) Mepingathano naavali yomethaneko lyetu, Jehova ota vulu okuhulitha po okumona iihuna kwaantu. Okwa hogolola ethimbo ndyoka ta ka hulitha po okumona iihuna akuhe. (Mat. 24:36) Mbela ohole ye yoku tu hola kayi na oku tu inyengitha tu idhidhimike pamwe naye sigo oosho esiku ndyoka lya thiki?

17. Oohapu ndhoka tadhi popi kombinga yaJesus ndhoka tadhi adhika mAahebeli 12:2, 3, otadhi vulu ngiini oku tu ladhipika tu tsikile okwiidhidhimika?

¹⁷ Jehova okwe tu tulila po oshiholelwa dhingi shokwiidhidhimika. Jesus naye okwa li a holele eidhidhimiko lyaHe. Sho a li kombanda yevi, okwa li i idhidhimikile oku ulwa omalaka, okushekwa nokwiidhidhimikile eso enyanyalithi komuti gwomahepeko, molwetu. (Lesha Aahebeli 12:2, 3.) Kapu na omalimbililo kutya oshiholelwa shaJehova sheidhidhimiko osha kwathele Jesus naye i idhidhimike. Natse otashi vulu oku tu kwathela tu idhidhimike.

18. Petrus omutiyali 3:9 ote tu kwathele ngiini tu uve ko shoka eidhidhimiko lyaJehova tali tompola po?

¹⁸ Lesha 2 Petrus 3:9. Jehova oku shi kutya ethimbo lini tali opalele okuhanagula po uuyuni mbuka wa kolokosha. Omolweidhidhimiko lye, aantu oyendji oya mono ompito ye mu tseye, mboka ngashingeyi taye mu longele ye li ongundu onene. Ayehe oya pandula sho Jehova a kala ti idhidhimike ethimbo alihe ndyono, shono she ya pe ethimbo yi ilonge kombinga ye, ya kale ye mu hole noye mu iyapulile. Sho Jehova ta ka pa aantu omamiliyona ondjambi yomwenyo gwaaluhe, otashi ka kala shi iwetikile kutya okwa ninga etokolo lyopandunge lela sho a kala ti idhidhimike ethimbo alihe ndyono.

19. Otu na okukala twa tokola toko okuninga shike, notatu ka pewa ondjambi yashike ngele twe shi ningi?

¹⁹ Otatu vulu okwiilonga kuJehova nkene tu na okwiidhidhimika nenyanyu. Nonando Satana okwe etitha okumona iihuna okundji muuyuni noha nyateke edhina lye, Jehova natango oku li “Kalunga omunyanyukwi.” (1 Tim. 1:11, NW) Natse otatu vulu okukala twa nyanyukwa, manga twa tegelela neidhidhimiko Jehova a yapulithe edhina lye, a yukipalithe uunamapangelo we, a hulithe po uukolokoshi awuhe noku hulithe po omaupyakadhi getu agehe. Natu kaleni twa tokola toko okwiidhidhimika nokuhekelekwa kokutseya kutya Tate yetu gwomegulu naye oti idhidhimike. Ngele otwe shi ningi, otatu ka mona uushili woohapu ndhika tadhi ti: “Omulumentu omunelago oongoka ta sindana mokumakelwa, oshoka shampa a piti mo, Kalunga ote ke mu pa ondjambi, omwenyo gwaaluhe, ngoka e gu uvanekela mboka ye mu hole.”​—Jak. 1:12.